Lumella Lentsoe La Molimo Hore le Tsamaise Mehato ea hao
“Lentsoe la hao ke lebone la leoto la ka, ke leseli tseleng ea ka.”—PESALEME EA 119:105.
1, 2. Ke hobane’ng ha batho ba bangata ba hlōlehile ho fumana khotso le thabo ea sebele?
NA U hopola lekhetlo leo ka lona u kileng ua kōpa motho e mong hore a u bontše tsela? Mohlomong u ne u le haufi le moo u eang empa u sa tsebe hantle hore na literateng tse ’maloa tsa ho qetela ke sefe seo u lokelang ho se nka. Kapa e ka ’na eaba u ne u hlile u lahlehile ’me u lokela ho fetola tsela ea hao. Ho sa tsotellehe hore na boemo e ne e le bofe, na ho ne ho ke ke ha e-ba bohlale hore u latele litaelo tsa motho ea tsebang sebaka seo hantle? Motho eo o ne a ka u thusa hore u fihle moo u eang teng.
2 Ka lilemo tse likete, batho ka kakaretso ba ’nile ba leka ho tsamaisa bophelo ba bona kantle ho thuso ea Molimo. Leha ho le joalo, ha batho ba sa phethahalang ba itokolla ho Molimo, ba lahleha ka ho feletseng. Ba sitoa ho fumana tsela e ka ba isang moo ba ka fumanang khotso le thabo ea sebele. Ke hobane’ng ha ba hlōlehile ho finyella lintho tsee? Lilemo tse ka holimo ho 2 500 tse fetileng, moprofeta Jeremia o ile a re: “Ha ho matleng a motho ea tsamaeang hore a tsamaise mehato ea hae.” (Jeremia 10:23) Mang kapa mang ea lekang ho tsamaisa mehato ea hae kantle ho thuso e bohlale, joang kapa joang o tla ferekana. Ka sebele, batho ba hloka tataiso!
3. Ke hobane’ng ha Jehova Molimo e le eena ea tšoanelehang haholo ho tataisa batho, hona o tšepisa eng?
3 Jehova Molimo ke eena ea tšoanelehang haholo ho fana ka tataiso ena. Hobane’ng? Hobane o utloisisa hamolemo tsela eo batho ba bōpiloeng ka eona ho feta motho leha e le ofe. O tseba hantle hore na ho tlile joang hore moloko oa batho o khelohe le ho lahleha. O boetse oa tseba hore na ho hlokahala eng hore o khutlele tseleng. Hape, joaloka ’Mōpi, kamehla Jehova o tseba se molemohali bakeng sa rōna. (Esaia 48:17) Kahoo, re ka tšepa ka ho feletseng keletso ea hae e tlalehiloeng ho Pesaleme ea 32:8: “Ke tla etsa hore u be le temohisiso ’me ke u rupele ka tsela eo u lokelang ho tsamaea ka eona. Ke tla u fa keletso leihlo la ka le le holim’a hao.” Ha ho pelaelo hore Jehova o fana ka tataiso e molemohali. Empa o re tataisa joang?
4, 5. Lipolelo tsa Molimo li ka re tsamaisa joang?
4 Mopesaleme o ile a re ha a rapela Jehova: “Lentsoe la hao ke lebone la leoto la ka, ke leseli tseleng ea ka.” (Pesaleme ea 119:105) Lipolelo le likhopotso tsa Molimo li fumanoa ka Bibeleng, ’me li ka re thusa ho hlōla litšitiso tseo re ka ’nang ra thulana le tsona bophelong. Ha e le hantle, ha re bala Bibele ebile re e lumella hore e re tsamaise, re ikutloela ka borōna se boleloang ho Esaia 30:21: “Litsebe tsa lōna li tla utloa lentsoe ka mor’a lōna le reng: ‘Tsela ke eona ena. Tsamaeang ho eona.’”
5 Leha ho le joalo, hlokomela hore Pesaleme ea 119:105 e bua ka lintho tse peli tse amanang tse etsoang ke Lentsoe la Molimo. Ea pele, ke lebone la maoto a rōna. Ha re thulana le mathata a letsatsi le letsatsi, melao-motheo ea Bibele e lokela ho tsamaisa mehato ea rōna e le hore re etse liqeto tse bohlale le ho qoba maraba le lifi tsa lefatše lena. Ea bobeli, likhopotso tsa Molimo li khantša tsela ea rōna, li re thusa ho khetha lintho tse lumellanang le tšepo ea rōna ea ho phela ka ho sa feleng Paradeiseng eo Molimo a e tšepisitseng. Ha tsela e ka pele e bonesitsoe hantle, re tla khona ho lemoha liphello—tse molemo kapa tse mpe—tsa tsela e itseng. (Baroma 14:21; 1 Timothea 6:9; Tšenolo 22:12) A re boneng ka ho qaqileng hore na ke joang lipolelo tsa Molimo tse ka Bibeleng e ka bang lebone la maoto a rōna le leseli tseleng ea rōna.
“Ke Lebone la Leoto la Ka”
6. Ke maemong afe moo lipolelo tsa Molimo e ka bang lebone maotong a rōna?
6 Re etsa liqeto letsatsi le leng le le leng. Liqeto tse ling li ka bonahala e se tsa bohlokoa, empa ka linako tse ling re ka ’na ra tobana le boemo bo lekang boitšoaro ba rōna, botšepehi ba rōna, kapa ho se jele paate ha rōna. E le hore re tobane ka katleho le liteko tsena, re lokela ho ‘koetlisa matla a rōna a ho lemoha e le hore re khetholle se nepahetseng le se fosahetseng.’ (Baheberu 5:14) Ka ho fumana tsebo e nepahetseng ea Lentsoe la Molimo le ka ho utloisisa melao-motheo ea lona, re koetlisa matsoalo a rōna e le hore re etse liqeto tse khahlisang Jehova.—Liproverbia 3:21.
7. Hlalosa boemo bo ka etsang hore Mokreste a batle ho tloaelana le batho ba sa lumelang bao a sebetsang le bona.
7 Nahana ka mohlala ona. Na u motho e moholo ea lekang ka tieo ho thabisa pelo ea Jehova? (Liproverbia 27:11) Haeba u etsa joalo, rea u babatsa. Empa a re re batho ba bang bao u sebetsang le bona ba u fa tekete ea hore u ee le bona papaling e itseng. Ba thabela setsoalle sa hao mosebetsing ebile ba rata ho thabela botsoalle le uena ha le se mosebetsing. U ka ’na ua lumela ka matla hore batho bana ha ba babe. Mohlomong ba bile ba na le mekhoa e itseng e metle. U tla etsa’ng? Na u bona eka ho ka ba kotsi ho lumela ha ba u mema? Lentsoe la Molimo le ka u thusa joang hore u etse qeto e nepahetseng tabeng ee?
8. Ke melao-motheo efe ea Mangolo e ka re thusang ha re nahana ka taba ea metsoalle?
8 Nahana ka melao-motheo e seng mekae ea Mangolo. Oa pele oo u ka ’nang oa u hopola o ho 1 Bakorinthe 15:33, e reng: “Litloaelano tse mpe li senya mekhoa e metle.” Na ho khomarela molao-motheo oo ho bolela hore u lokela ho qoba kahohle-hohle batho ba sa lumelang? Mangolo a araba potso ena ka ho re, che. Ebile le moapostola Pauluse ka boeena o ile a nahanela ka lerato “batho ba mefuta eohle,” ho akarelletsa le ba sa lumelang. (1 Bakorinthe 9:22) Bokreste ka bobona bo hloka hore re rate batho ba bang—ho akarelletsa le ba sa lumeleng lintho tseo re li lumelang. (Baroma 10:13-15) Ha e le hantle, re ka latela joang keletso e reng “re sebetseng se molemo ho bohle” haeba re ikhetha ho batho bao ho ka ’nang ha hlokahala hore re ba thuse?—Bagalata 6:10.
9. Ke keletso efe ea Bibele e re thusang ho bontša ho leka-lekana likamanong tsa rōna le batho bao re sebetsang le bona?
9 Leha ho le joalo, ho na le phapang e hlakileng pakeng tsa ho ba botsoalle ho motho eo u sebetsang le eena le ho ba metsoalle e ntšanang se inong. Tabeng ena ho sebetsa molao-motheo o mong oa Mangolo. Moapostola Pauluse o ile a lemosa Bakreste a re: “Le se ke la kena jokong e sa lekaneng hammoho le ba sa lumelang.” (2 Bakorinthe 6:14) Polelo e reng “le se ke la kena jokong e sa lekaneng” e bolela’ng? Liphetolelo tse ling tsa Bibele li e fetolela e le “le se ke la ipōpa ngatana ’ngoe,” “le se ke la ba khokanyan’a phiri,” kapa “khaotsang ho ba le litšebelisano tse sa lokelang.” Ke neng moo ho ka thoe’ng ho sebelisana le motho eo u sebetsang le eena ha hoa lokela? Ho fosahala ha ho fihla hokae hona ho fetoha joko e sa lekaneng ha ho le joang? Lentsoe la Molimo, Bibele, le ka u tataisa boemong bona.
10. (a) Jesu o ile a khetha metsoalle joang? (b) Ke lipotso life tse ka thusang motho hore a etse liqeto tse bohlale tabeng ea metsoalle?
10 Nahana ka mohlala oa Jesu, ea ratileng batho ho tloha tšimolohong. (Liproverbia 8:31) Ha a ntse a le lefatšeng, o ne a e-na le setsoalle se haufi le balateli ba hae. (Johanne 13:1) O ile a ba ‘a ikutloa a rata’ monna ea neng a e-na le maikutlo a sa nepahalang ka bolumeli. (Mareka 10:17-22) Empa Jesu o ile a beha meeli e tobileng tabeng ea metsoalle e haufi eo a e khethang. Ha aa ka a etsa setsoalle se haufi le batho ba neng ba sa rate ho etsa thato ea Ntate oa hae. Ka lekhetlo le leng, Jesu o ile a re: “Le metsoalle ea ka haeba le etsa seo ke le laelang sona.” (Johanne 15:14) Ke ’nete hore u ka ’na ua ba botsoalle ho motho ea itseng eo u sebetsang le eena. Empa ipotse: ‘Na ebe motho eo o ikemiselitse ho phetha litaelo tsa Jesu? Na o batla ho ithuta ka Jehova, e leng eena eo Jesu a re laetseng hore re mo rapele? Na o phela ka melao ea boitšoaro e tšoanang le eo ’na joaloka Mokreste ke phelang ka eona?’ (Matheu 4:10) Likarabo tsa lipotso tsena li tla totobala ha u ntse u buisana le batho bao u sebetsang le bona ’me u tsitlella ho sebelisa melao ea Bibele.
11. Fana ka mehlala ea maemo ao ho ’ona lipolelo tsa Molimo li lokelang ho tsamaisa mehato ea rōna.
11 Ho na le maemo a mang a mangata ao ho ’ona lipolelo tsa Molimo li ka bang joaloka lebone maotong a rōna. Ka mohlala, Mokreste ea hlokang mosebetsi a ka ’na a fumana mosebetsi oo a neng a hlile a o batla. Leha ho le joalo, kemiso ea mosebetsi oo e hloka nako e ngata, ’me haeba a o nka, o tla fosoa ke liboka tse ’maloa tsa Bokreste ebile o tla sitoa ho kopanela mesebetsing e meng e amanang le borapeli ba ’nete. (Pesaleme ea 37:25) Mokreste e mong a ka ’na a lekeha ka matla hore a shebelle boithabiso boo ho hlakileng hore ha bo lumellane le melao-motheo ea Bibele. (Baefese 4:17-19) E mong eena a ka ’na a khopisoa habonolo ke mefokolo ea balumeli-’moho le eena. (Bakolose 3:13) Maemong ana kaofela, re lokela ho lumella Lentsoe la Molimo hore e be lebone maotong a rōna. Bonneteng, haeba re latela melao-motheo ea Bibele, re ka sebetsana ka katleho le bothata leha e le bofe bophelong. Lentsoe la Molimo “le molemo bakeng sa ho ruta, bakeng sa ho khalemela, bakeng sa ho otlolla lintho, bakeng sa ho laea ka ho loka.”—2 Timothea 3:16.
“Ke Leseli Tseleng ea Ka”
12. Lipolelo tsa Molimo li khantša tsela ea rōna joang?
12 Pesaleme ea 119:105 e boetse e bolela hore lipolelo tsa Molimo li ka re khantšetsa tsela e ka pele. Ha re phopholetse mabapi le bokamoso, hobane Bibele e hlalosa se boleloang ke maemo a lefatše a tepeletsang le hore na a tla fella ka eng. Ha e le hantle, rea tseba hore re phela “matsatsing a ho qetela” a tsamaiso ena e khopo ea lintho. (2 Timothea 3:1-5) Ho tseba se tla etsahala nakong e tlang ho lokela ho susumetsa ka matla tsela eo re phelang ka eona hona joale. Moapostola Petrose o ile a ngola: “Kaha lintho tsena tsohle li tla qhibiliha ka tsela eo, le tšoanela ho ba batho ba mofuta ofe liketsong tse halalelang tsa boitšoaro le liketsong tsa boinehelo ba bomolimo, le letile ’me le lutse le hopola ho ba teng ha letsatsi la Jehova!”—2 Petrose 3:11, 12.
13. Ho potlaka ha mehla ea rōna ho lokela ho ama joang monahano oa rōna le tsela eo re phelang ka eona?
13 Monahano oa rōna le tsela eo re phelang ka eona li lokela ho bontša hore re kholisehile ka tieo hore “lefatše lea feta ’me ho joalo le ka takatso ea lona.” (1 Johanne 2:17) Ho sebelisa melao-motheo ea Bibele ho tla re thusa hore re etse liqeto tse bohlale mabapi le lipakane tsa rōna tsa ka moso. Ka mohlala, Jesu o ile a re: “Joale, le ’ne le batle ’muso pele le ho loka ha hae, ’me lintho tsena tse ling tsohle le tla li ekeletsoa.” (Matheu 6:33) Ruri hoa babatseha ho bona bacha ba bangata ba bontšang tumelo mantsoeng a Jesu ka ho kenela tšebeletso ea nako e tletseng! Ba bang—ho akarelletsa le malapa ’ohle—ba ithaopetse ho fallela linaheng tseo ho hlokahalang baboleli ba ’Muso ka potlako.
14. Lelapa le leng la Bakreste le ile la atolosa tšebeletso ea lona joang?
14 Nahana ka lelapa le leng la Bakreste la batho ba bane le ileng la falla United States eaba le ea Dominican Republic ho ea sebetsa le phutheho e motseng o nang le baahi ba 50 000. Phutheho eo e na le bahoeletsi ba ’Muso ba ka bang 130. Leha ho le joalo, ka la 12 April , 2006, batho ba ka bang 1 300 ba ile ba tla Sehopotsong sa lefu la Kreste! Tšimo ea sebaka seo e “soeufetse bakeng sa kotulo” hoo ka mor’a likhoeli tse hlano feela, ntate enoa, mosali oa hae, mora le morali oa hae ba neng ba khanna lithuto tsa Bibele tse 30. (Johanne 4:35) Ntate oa hlalosa: “Ho na le bara le baralib’abo rōna ba 30 ba falletseng phuthehong ena ho tla thusa. Ba ka bang 20 ba tsoa United States, ’me ba bang ba tsoa Bahamas, Canada, Italy, New Zealand le Spain. Ba fihla mona ba chesehela ho kopanela tšebeletsong ’me ba susumelitse barab’abo rōna ba sebakeng sena haholo.”
15. U fumane mahlohonolo afe ka lebaka la ho etelletsa lithahasello tsa ’Muso pele bophelong ba hao?
15 Ke ’nete hore hase ba bangata ba khonang ho fallela naheng e ’ngoe e le hore ba e’o sebeletsa moo ho hlokahalang baboleli haholo. Empa ba khonang ho etsa joalo—kapa ba ka khonang ho fetola maemo a bona e le hore ba sebelisoe—ka sebele ba fumana mahlohonolo a mangata ka ho kopanela tšebeletsong ea mofuta ona. ’Me ho sa tsotellehe hore na u sebeletsa u le hokae, u se fetoe ke monyetla oa ho fumana thabo e tlisoang ke ho sebeletsa Jehova ka matla ’ohle a hao. Haeba u etelletsa lithahasello tsa ’Muso pele bophelong ba hao, Jehova o tšepisa hore o tla u ‘tšollela tlhohonolofatso ho fihlela ho se ho se letho le hlokoang.’—Malakia 3:10.
Ho Rua Molemo Tataisong ea Jehova
16. Re tla rua molemo ofe haeba re lumela ho tataisoa ke lipolelo tsa Molimo?
16 Joalokaha re bone, lipolelo tsa Jehova li re tataisa ka litsela tse peli tse amanang. Ke lebone la maoto a rōna, li re thusa ho tsamaea tseleng e nepahetseng ebile lia re tataisa ha re lokela ho etsa liqeto. ,Li khantša tsela ea rōna, li re nolofalletsa ho bona ka ho hlaka se larileng ka pele. Joale, sena se re thusa ho sebelisa keletso ea Petrose e reng: “Hlomellang likelello tsa lōna bakeng sa tšebetso, le lule le hlaphohetsoe likelellong ka ho feletseng; behang tšepo ea lōna moseng o sa tšoanelang o tla tlisoa ho lōna tšenolong ea Jesu Kreste.”—1 Petrose 1:13.
17. Ho ithuta Bibele ho ka re thusa ho latela tataiso ea Molimo joang?
17 Ha ho pelaelo hore Jehova o fana ka tataiso. Potso ke hore, Na u tla ikokobeletsa eona? E le hore u utloisise tataiso eo Jehova a fanang ka eona, ikemisetse ho bala karolo e itseng ea Bibele letsatsi ka leng. Thuisa ka seo u se balang, leka ho utloisisa hore na thato ea Jehova ke efe tabeng eo ho buuoang ka eona, ’me u nahane ka litsela tse sa tšoaneng tseo boitsebiso bona bo ka sebetsang ka tsona bophelong ba hao. (1 Timothea 4:15) Ebe joale u sebelisa ‘matla a hao a ho nahana’ ha u iketsetsa liqeto.—Baroma 12:1.
18. Ha re lumella Lentsoe la Molimo hore le re tataise, re tla fumana mahlohonolo afe?
18 Haeba re e lumella, melao-motheo e ka Lentsoeng la Molimo e tla re hlaha leseling e be e re fe tataiso eo re e hlokang ha re etsa liqeto mabapi le tsela e nepahetseng eo re lokelang ho e nka. Re ka kholiseha hore lipolelo tsa Jehova tse tlalehiloeng li “hlalefisa ea se nang phihlelo.” (Pesaleme ea 19:7) Ha re lumella Bibele hore e re tataise, re tla ba le letsoalo le hloekileng re be re khotsofatsoe ke hore re khahlisa Jehova. (1 Timothea 1:18, 19) Haeba re lumella lipolelo tsa Molimo hore li tsamaise mehato ea rōna letsatsi le letsatsi, qetellong Jehova o tla re putsa ka bophelo bo sa feleng.—Johanne 17:3.
Na U sa Hopola?
• Ke hobane’ng ha e le habohlokoa ho lumella Jehova Molimo hore a tsamaise mehato ea rōna?
• Ke ka tsela efe lipolelo tsa Molimo e ka bang lebone maotong a rōna?
• Ke joang lipolelo tsa Molimo e ka bang leseli tseleng ea rōna?
• Ho ithuta Bibele ho tla re thusa joang hore re latele tataiso ea Molimo?
[Setšoantšo se leqepheng la 15]
Ke neng ho seng bohlale ho ba le setsoalle le motho ea sa lumelang?
[Setšoantšo se leqepheng la 16]
Metsoalle ea Jesu e haufi e ne e le batho ba neng ba etsa thato ea Jehova
[Litšoantšo tse leqepheng la 17]
Na tsela eo re phelang ka eona e bontša hore re etelletsa lithahasello tsa ’Muso pele?