“Mpatlisise, Uena Molimo”
“Mpatlisise, uena Molimo, u tsebe pelo. . . . Ntataise tseleng ea nako e sa feleng ea ka.”—PESALEME EA 139:23, 24, NW.
1. Jehova o sebelisana joang le bahlanka ba hae?
KAOFELA ha rōna re rata ho thusoa ke motho ea utloisisang, motho ea nahanelang maemo a rōna, motho ea re thusang ha re etsa liphoso, motho ea sa batleng ho fetang hoo re ka khonang ho ho etsa. Jehova Molimo o sebelisana le bahlanka ba hae ka tsela ena. Pesaleme ea 103:14 e re: “Hobane o tsebisisa ho bōpjoa ha rōna, o elelloa hoba re lerōle feela.” ’Me Jesu Kreste, ea etsisang Ntate oa hae ka ho phethahetseng, o fetisa memo ena e mofuthu: “Tlong ho ’na, lōna bohle ba sebetsang ka thata le ba imetsoeng, ’me ke tla le khatholla. Jarang joko ea ka [kapa, “Kenang le ’na jokong,” mongolong o botlaaseng ba leqephe] ’me le ithute ho ’na, hobane ke na le botho bo bonolo le pelo e ikokobelitseng, ’me le tla fumana khatholoho bakeng sa liphefumolohi tsa lōna. Hobane joko ea ka e mosa ’me mojaro oa ka o bobebe.”—Mattheu 11:28-30, NW.
2. Bontša phapang ponong ea Jehova le ea batho mabapi le (a) Jesu Kreste, le (b) balateli ba Kreste.
2 Hangata pono eo Jehova a nang le eona ka bahlanka ba hae e fapane haholo le ea batho. O talima taba ho tsoa ponong e fapaneng ’me o nahanela litšobotsi tseo ba bang ba sa li tsebeng. Ha Jesu Kreste a ne a tsamaea lefatšeng, o ne a “khesoa ’me a qojoa ke batho.” Batho ba neng ba sa lumele hore ke Messia “ba ile ba mo nka e se oa bohlokoa.” (Esaia 53:3, NW; Luka 23:18-21) Leha ho le joalo, mahlong a Molimo, e ne e le “Mora [oa Molimo] ea ratoang,” eo Ntate a ileng a re: “Ke u amohetse.” (Luka 3:22, NW; 1 Petrose 2:4) Har’a balateli ba Jesu Kreste ho na le batho ba khesoang ka lebaka la hore ba futsanehile mabapi le lintho tse bonahalang ’me ba mamella mahlomola a mangata. Leha ho le joalo, mahlong a Jehova le Mora oa hae, batho ba joalo ba ruile. (Ba-Roma 8:35-39; Tšenolo 2:9) Ke hobane’ng ha lipono li sa tšoane?
3. (a) Ke hobane’ng ha pono ea Jehova ka batho hangata e fapane le ea batho? (b) Ke hobane’ng ha ho le bohlokoa ka ho fetisisa hore re itlhahlobe hore na re batho ba mofuta ofe kahare?
3 Jeremia 11:20 (NW) e araba ka ho re: “Jehova . . . o hlahloba liphio le pelo.” O bona seo re leng sona kahare, esita le litšobotsi tsa botho ba rōna tse patehileng mahlong a ba bang. Tlhahlobong ea hae, o hatella haholo-holo litšoaneleho le maemo a leng bohlokoa bakeng sa ho ba le kamano e ntle le eena, e leng tse nang le molemo oa nako e telele ho rōna. Ho tseba sena ho a re khothatsa; ho boetse ho etsa hore re nahane ka ho teba. Kaha Jehova o ela hloko seo re leng sona ka hare, ke habohlokoa hore re hlahlobe seo re leng sona ka hare e le hore re ka khona ho ipaka re le mofuta oa batho bao a ba batlang lefatšeng la hae le lecha. Lentsoe la hae le re thusa ho etsa tlhahlobo e joalo.—Ba-Heberu 4:12, 13.
Mehopolo ea Molimo ke ea Bohlokoa Haholo Hakaakang!
4. (a) Mopesaleme o ile a susumetsoa ke eng ho bolela hore mehopolo ea Molimo e bohlokoa ho eena? (b) Ke hobane’ng ha e lokela ho ba bohlokoa ho rōna?
4 Ka mor’a hore mopesaleme Davida a thuise ka bophara le botebo ba tsebo eo Molimo a nang le eona ka bahlanka ba hae, esita le ka matla a sa tloaelehang a Molimo a ho fana ka thuso leha e le efe eo ba ka e hlokang, o ile a ngola: “Kahoo, mehopolo ea hao ho ’na e bohlokoa haholo hakaakang!” (Pesaleme ea 139:17a, NW) Mehopolo eo, e senotsoeng Lentsoeng la hae le ngotsoeng, e phahametse ea batho haholo, ho sa tsotellehe hore na likhopolo tsa bona li ka bonahala li le bohlale hakae. (Esaia 55:8, 9) Mehopolo ea Molimo e re thusa ho talima ka hloko lintho tsa bohlokoa tsa bophelo le ho bontša cheseho tšebeletsong ea hae. (Ba-Filippi 1:9-11) E re bontša kamoo re ka talimang lintho ka tsela eo Molimo a li talimang ka eona. E re thusa hore re tšepahale ho rōna ka borōna, ho lumela mofuta oa motho eo re leng eena ka sebele pelong. Na u ikemiselitse ho etsa seo?
5. (a) Lentsoe la Molimo le re khothaletsa hore re lebele eng “ho feta tsohle”? (b) Tlaleho ea Bibele mabapi le Kaine e ka re ruisa molemo joang? (c) Le hoja re se tlas’a Molao oa Moshe, o re thusa joang ho utloisisa se thabisang Jehova?
5 Tšekamelo ea batho ke ho hlokomela haholo ponahalo ea kantle, empa Mangolo a re eletsa: “Boloka pelo ea hao ka ho fetisisa.” (Liproverbia 4:23) Ka lipolelo le ka mehlala, Bibele e re thusa ho etsa seo. E re bolella hore Kaine o ile a etsetsa Molimo mahlabelo e le feela ho phetha molao empa pelo ea hae e ne e tletse bora, le lehloeo, ho moen’ae Abele. ’Me e re khothaletsa hore re se tšoane le eena. (Genese 4:3-5; 1 Johanne 3:11, 12) E tlaleha tlhokahalo ea kutlo e hlahang Molaong oa Moshe. Empa e boetse e hatella hore tlhokahalo ea sehlooho ea Molao e ne e le hore ba rapelang Jehova ba tlameha ho mo rata ka pelo ea bona eohle, khopolo, sephefumolohi, le matla; ’me e bolela hore taelo e neng e latela eo ka bohlokoa ke ea hore ba rate baahisane ba bona joalokaha ba ithata.—Deuteronoma 5:32, 33, NW; Mareka 12:28-31, NW.
6. Ha re sebelisa Liproverbia 3:1, re lokela ho ipotsa lipotso life?
6 Ho Liproverbia 3:1, re khothaletsoa hore re se ke ra boloka litaelo tsa Molimo feela empa re kholisehe hore kutlo ke pontšo ea seo re leng sona ka sebele pelong. Ho hlokahala hore re ipotse ka bomong, ‘Na ke bontša kutlo ka tsela ena linthong tse hlokoang ke Molimo?’ Haeba re hlokomela hore litabeng tse ling matla a re susumetsang kapa monahano oa rōna oa haelloa—kaha ho se motho ho rōna ea ka reng ha a na mefokolo—kahoo ho hlokahala hore re ipotse, ‘Ke etsa eng ho ntlafatsa boemo?’—Liproverbia 20:9; 1 Johanne 1:8.
7. (a) Ho nyatsa ha Jesu Bafarisi ho Mattheu 15:3-9 ho ka re thusa joang ho sireletseng lipelo tsa rōna? (b) Ke maemo afe a ka re hlokang hore re nke mehato e matla ea ho laea mehopolo le lipelo tsa rōna?
7 Ha Bafarisi ba Bajode ba ne ba iketsa eka ba tlotlisa Molimo ha ka mano ba ntšetsa pele mekhoa e susumetsoang ke ho batla ho khotsofatsa lithahasello tsa botho, Jesu o ile a ba nyatsa ka hore ke baikaketsi ’me a bontša hore borapeli ba bona ke ba lefeela. (Mattheu 15:3-9) Jesu o ile a boela a lemosa hore e le ho thabisa Molimo, ea bonang pelo, ha hoa lekana ho phela bophelo bo bonahalang kantle bo hloekile boitšoarong, ha ka nako e tšoanang, e le hore motho a fumane thabo e bakoang ke takatso, ebe re boetse re phehella ho nahana ka lintho tsa boitšoaro bo bobe. Ho ka ’na ha hlokahala hore re nke mehato e matla hore re laee monahano oa rōna le pelo. (Liproverbia 23:12; Mattheu 5:27-29) Taeo e joalo e boetse ea hlokahala haeba ka lebaka la mosebetsi oa boipheliso, lipakane tsa rōna tsa thuto, kapa khetho ea rōna ea boithabiso, li etsa hore re fetohe baetsisi ba lefatše, re le lumella hore le re kenye foromong ea litekanyetso tsa lona. E se eka le ka mohla re ka se lebale hore morutuoa Jakobo o re batho ba ipolelang hore ke ba Molimo empa ba batla ho ba metsoalle ea lefatše ke “bafebi.” Hobane’ng? Hobane “lefatše lohle le rapaletse ka tlase ho e mobe.”—Jakobo 4:4; 1 Johanne 2:15-17; 5:19.
8. E le ho rua molemo o feletseng mehopolong ea bohlokoa ea Molimo, ho hlokahala hore re etse eng?
8 E le hore re ka rua molemo ka ho felletseng mehopolong ea Molimo litabeng tsena le tse ling, ho hlokahala hore re behelle ka thōko nako ea ho e bala kapa ho e utloa. Le ho feta moo, ho hlokahala hore re ithute eona, re bue ka eona, ’me re thuise ka eona. Babali ba bangata ba Molula-Qhooa ona ba ba teng ka mehla libokeng tsa phutheho tsa Lipaki tsa Jehova, moo ho buisanoang ka Bibele. Ba reka nako ho tsoa linthong tse ling tse phehelloang e le hore ba ka ho etsa. (Ba-Efese 5:15-17) ’Me seo ba boelloang ke sona se feta hōle maruo a lintho tse bonahalang. Na hase kamoo u ikutloang ka teng?
9. Ke hobane’ng ha ba bang ba tlang libokeng tsa Bokreste ba hatela pele ka potlako ho feta ba bang?
9 Leha ho le joalo, ba bang ba tlang libokeng tsena ba hatela pele ka potlako moeeng ho feta ba bang. Ba sebelisa ’nete ka botlalo haholoanyane bophelong ba bona. Lebaka la sena ke lefe? Khafetsa, lebaka la sehlooho ke khothalo ea bona thutong ea botho. Ba utloisisa hore ha re phele ka bohobe feela; lijo tsa moea letsatsi le leng le le leng ke tsa bohlokoa joaloka ho ja lijo tsa nama ka mehla. (Mattheu 4:4; Ba-Heberu 5:14) Kahoo ba leka ka matla hore bonyane ba qete nako e itseng letsatsi le leng le le leng ba bala Bibele kapa likhatiso tse e hlalosang. Ba lokisetsa liboka tsa phutheho, ba ithuta esale pele lihlooho tse ithutoang ’me ba phetla le mangolo. Ba etsa ho fetang feela ho bala boitsebiso; ba thuisa ka bona. Mokhoa oa bona oa ho ithuta o kopanyeletsa ho nahana ka ho teba ka hore na seo ba ithutang sona se lokela ho ba le phello efe bophelong ba bona. Ha bomoea ba bona bo ntse bo hōla, ba ikutloa joaloka mopesaleme ea ileng a ngola: “Molao oa hao ke o rata haholo hakaakang! . . . Likhopotso tsa hao li hlolla hakaakang.”—Pesaleme ea 1:1-3; 119:97, 129, NW.
10. (a) Ho molemo ho tsoela pele ka thuto ea Lentsoe la Molimo ka nako e telele hakae? (b) Mangolo a bontša sena joang?
10 Ebang re ithutile Lentsoe la Molimo ka nako e ka etsang selemo, lilemo tse hlano, kapa lilemo tse 50, ha ho mohla le fetohang ntho e pheta-phetoang—eseng ha e le hore mehopolo ea Molimo e bohlokoa ho rōna. Ho sa tsotellehe hore na ba bang ba rōna ba ithutile ho hongata hakae Mangolong, ho na le ho eketsehileng hoo re sa ho tsebeng. Davida o itse: “Uena Molimo, kakaretso ea tsona e ngata hakaakang! Leha nka leka ho etsa lenane la tsona, li ngata le ho feta le lehlabathe.” Mehopolo ea Molimo e mengata haholo ho ka lekanngoa. Haeba re ne re ka etsa lenane la mehopolo ea Molimo letsatsi lohle ebe re robala re ntse re le etsa, ha re tsoha hoseng re ne re tla ’ne re be le ho eketsehileng hoo re tla nahana ka hona. Ka hona, Davida o ile a ngola: “Ke tsohile, leha ho le joalo ke ntse ke e-na le uena.” (Pesaleme ea 139:17, 18, NW) Ho tla ’ne ho be le ho eketsehileng hoo re tla ithuta hona ka Jehova le litsela tsa hae ka nako e sa feleng. Ha ho mohla re tla fihla moo re tla tseba sohle.—Ba-Roma 11:33.
Ho Hloea seo Jehova a se Hloileng
11. Ke hobane’ng ha ho le bohlokoa ho tseba eseng feela mehopolo ea Molimo empa le ho ba le maikutlo a hae?
11 Ha re ithute Lentsoe la Molimo ka sepheo sa ho tlatsa lihlooho tsa rōna feela ka linnete. Ha re le lumella hore le kenelle lipelong tsa rōna, re boetse re qala ho ba le maikutlo ao Molimo a nang le oona. Seo se bohlokoa hakaakang! Haeba re sa hōlise maikutlo a joalo, sena se ka fella ka eng? Le hoja re ka khona ho pheta se boleloang ke Bibele, ho ka etsahala hore re talime se thibetsoeng se lakatseha, kapa re ikutloe hore lintho tseo ho hlokahalang hore re li etse ke moroalo o boima. Ke ’nete hore le hoja re ka hloea bobe, re tla ’ne re loane ka lebaka la ho se phethahale ha botho. (Ba-Roma 7:15) Empa haeba re sa etse boiteko ba sebele ba ho etsa hore seo re leng sona ka hare se lumellane le se nepahetseng, na re ka lebella ho thabisa Jehova, “mohlahlobi oa lipelo”?—Liproverbia 17:3, NW.
12. Lerato la bomolimo le lehloeo la bomolimo li bohlokoa hakae?
12 Lehloeo la bomolimo ke tšireletso e matla khahlanong le ho etsa bobe, joalokaha lerato la bomolimo le etsa hore ho etsa se nepahetseng e be ho thabisang. (1 Johanne 5:3) Khafetsa Mangolo a re khothaletsa ho hlaolela lerato le lehloeo. “Lōna ba ratang Jehova, hloeang bobe!” (Pesaleme ea 97:10) “Hloeang ho hobe, le khomarele ho molemo.” (Ba-Roma 12:9) Na re etsa seo?
13. (a) Re lumellana ka botlalo le thapelo efe ea Davida mabapi le ho felisoa ha ba khopo? (b) Joalokaha ho bontšitsoe thapelong ea Davida, ba khopo bao a ileng a rapella hore Molimo a ba felise ke bo-mang?
13 Ka ho hlakileng Jehova o bontšitse morero oa hae oa ho felisa ba khopo lefatšeng le ho tlisa lefatše le lecha moo ho loka ho tla haha teng. (Pesaleme ea 37:10, 11; 2 Petrose 3:13) Barati ba ho loka ba laba-labela hore nako eo e fihle. Ba lumellana ka botlalo le mopesaleme Davida, ea ileng a rapela hore: “E se eka Uena Molimo, u ka bolaea ea khopo! Joale esita le batho ba molato oa mali ka sebele ba tla tloha ho ’na, ba buang ka uena ho latela likhopolo tsa bona; ba tšoere lebitso la hao ka tsela e se nang molemo—lira tsa hao.” (Pesaleme ea 139:19, 20, NW) Davida o ne a sa laba-labele hore eena ka boeena a bolaee batho ba joalo ba khopo. O ne a rapella hore phetetso e etsoe ke letsoho la Jehova. (Deuteronoma 32:35; Ba-Heberu 10:30) Bana hase batho bao ka tsela e itseng ba ileng ba khopisa Davida ka boeena feela. Ba ne ba bua hampe ka Molimo, ba tšoara lebitso la hae ka tsela e se nang molemo. (Exoda 20:7) Ka bolotsana, ba ne ba ipolela hore baa mo sebeletsa, empa ba ne ba sebelisa lebitso la hae ho ntšetsa merero ea bona pele. Davida o ne a sa rate batho ba khethang ho ba lira tsa Molimo.
14. Na ho na le batho ba khopo ba ka thusoang? Haeba ho joalo, ba ka thusoa joang?
14 Ho na le batho ba limillione tse makholo a likete ba sa tsebeng Jehova. Ba bangata ba bona ka ho hloka tsebo ba etsa lintho tseo Lentsoe la Molimo le bontšang hore li khopo. Haeba ba phehella tseleng ena, ba tla ba har’a ba felisoang mahlomoleng a maholo. Leha ho le joalo, Jehova ha a thabele lefu la ea khopo, le rōna ha rea lokela ho le thabela. (Ezekiele 33:11) Ha feela nako e lumela, re leka ho thusa batho ba joalo hore ba ithute ’me ba sebelise litsela tsa Jehova. Empa ho thoe’ng haeba batho ba bang ba bontša lehloeo le tebileng ho Jehova?
15. (a) Ke bo-mang bao mopesaleme a neng a ba talima e le “lira tsa sebele”? (b) Kajeno re ka bontša joang hore re “hloile” ba fetohelang Jehova?
15 Mabapi le bona, mopesaleme o itse: “Na ha kea hloea ba u hloileng ka ho teba, Uena Jehova, ’me na ha kea nena ba u fetohelang? Ke ba hloile ka lehloeo le feletseng. Ho ’na ba fetohile lira tsa sebele.” (Pesaleme ea 139:21, 22, NW) Ke ka lebaka la hore ba hloile Jehova ka ho teba Davida a ileng a ba hloea. Bakoenehi ba kopanyeletsoa har’a ba bontšang lehloeo la bona ho Jehova ka ho mo fetohela. Ha e le hantle, bokoenehi ke ho fetohela Jehova. Bakoenehi ba bang ba ipolela hore ba tseba Molimo le hore baa mo sebeletsa, empa ba hana lithuto kapa litlhokahalo tse boletsoeng Lentsoeng la hae. Ba bang ba ipolela hore ba lumela Bibele, empa ba latola mokhatlo o hlophisitsoeng oa Jehova ’me ka matla ba leka ho thibela mosebetsi oa oona. Haeba ka boomo ba khetha bobe bo joalo ka mor’a ho tseba se nepahetseng, haeba bobe boo bo thophothela hoo bo ke keng ba aroloa bothong ba bona, ke moo Mokreste a tlamehang ho hloea (ho ea ka kutloisiso ea Bibele ea lentsoe leo) ba imatahantseng le bobe ba sa arohane le bona. Bakreste ba ’nete ba na le maikutlo a tšoanang le a Jehova mabapi le bakoenehi ba joalo; ha ba lehele-hele ka likhopolo tsa bakoenehi. Ho fapana le seo, ba “nena” ba ikentseng lira tsa Molimo, empa ba tlohella Jehova hore e be eena ea lihang kahlolo ea phetetso.—Jobo 13:16; Ba-Roma 12:19; 2 Johanne 9, 10.
Ha Molimo a re Batlisisa
16. (a) Ke hobane’ng ha Davida a ne a batla hore Jehova a ’matlisise? (b) Ke eng se teng lipelong tsa rōna seo re lokelang ho kōpa Molimo hore a re thuse ho se lemoha?
16 Davida o ne a sa batle ho tšoana le ba khopo ka tsela leha e le efe. Batho ba bangata ba leka ho pata seo ba leng sona kahare, empa ka boikokobetso Davida o ile a rapela: “Mpatlisise, Uena Molimo, ’me u tsebe pelo ea ka. Ntlhahlobisise, ’me u tsebe mehopolo ea ka e tšoenyehileng, ’me u bone haeba ka ho ’na ho na le tsela e utloisang bohloko, ’me u ntataise tseleng ea nako e sa feleng.” (Pesaleme ea 139:23, 24, NW) Ha Davida a bua ka pelo ea hae, o ne a sa bolele pelo ea nama. Tumellanong le moelelo oa tšoantšetso oa polelo eo, o ne a bua ka seo a leng sona kahare, motho ea ka hare-hare. Le rōna ka ho tšoanang re lokela ho lakatsa hore Molimo a batlisise lipelo tsa rōna ’me a lemohe haeba re na le litakatso leha e le life tse sa lokang, likameho, maikutlo, merero, mehopolo, kapa sepheo. (Pesaleme ea 26:2) Jehova oa re mema: “Ngoan’a ka, mphe pelo ea hao, mahlo a hao a khahloe ke tsela tsa ka.”—Liproverbia 23:26.
17. (a) Ho e-na le ho koahela mehopolo e tšoenyehileng, re lokela ho etsa’ng? (b) Na ho lokela ho re makatsa hore ebe re na le litšekamelo tse fosahetseng lipelong tsa rōna, hona re lokela ho etsa’ng ka tsona?
17 Haeba ka ho rōna ho ipatile mehopolo e utloisang bohloko, e tšoenyehile ka lebaka la litakatso tse fosahetseng kapa lipakane tse fosahetseng kapa ka lebaka la boitšoaro bo itseng bo bobe boo re bo entseng, joale ka sebele re tla batla hore Jehova a re thuse ho lokisa taba. Ho e-na le ho ngola “tsela leha e le efe e utloisang bohloko,” phetolelo ea Moffatt e sebelisa polelo “tsela e fosahetseng”; The New English Bible e re: “Tsela leha e le efe e u [Molimo] utloisang bohloko.” Ho ka etsahala hore rōna ka borōna re se ke ra utloisisa ka ho hlakileng mehopolo ea rōna e tšoenyehileng ka hona re sa tsebe kamoo re ka bolellang Molimo bothata ba rōna, empa o utloisisa boemo ba rōna. (Ba-Roma 8:26, 27) Ha hoa lokela ho re makatsa haeba ho e-na le litšekamelo tse mpe ka lipelong tsa rōna; leha ho le joalo re tlameha hore re se ke ra li etsetsa seipato. (Genese 8:21) Re lokela ho batla thuso ea Molimo hore re li ntše ka metso. Haeba re fela re rata Jehova le litsela tsa hae, re ka mo atamela bakeng sa ho fumana thuso e joalo ka kholiseho ea hore “Molimo o moholo ho lipelo tsa rōna, ’me o tseba tsohle.”—1 Johanne 3:19-21.
18. (a) Jehova o re tataisetsa joang tseleng ea nako e sa feleng? (b) Haeba re tsoela pele ho latela tataiso ea Jehova, re ka lebella ho amohela pabatso efe e mofuthu?
18 Tumellanong le thapelo ea mopesaleme ea hore Jehova a mo tataise ka tsela ea nako e sa feleng, Jehova ka sebele, o tataisa bahlanka ba hae ba ikokobelitseng, ba bontšang kutlo. Ha a ba tataise feela tseleng e ka isang bophelong ba nako e telele hobane ba sa felisoe pele ho nako ka lebaka la ho etsa bobe empa o ba tataisetsa tseleng e isang bophelong bo sa feleng. O hatisa ka ho rōna hore re hloka molemo oa sehlabelo sa Jesu se phekolang libe. Ka Lentsoe la hae le ka mokhatlo oa hae o hlophisitsoeng, o re fa taeo ea bohlokoa e le hore re ka khona ho etsa thato ea hae. O hatisa ka ho rōna bohlokoa ba ho arabela thusong ea hae e le hore ka hare re ka fetoha mofuta oa batho bao re ipolelang hore re bona ka ntle. (Pesaleme ea 86:11) ’Me o re khothatsa ka tebello ea bophelo ba ’mele bo phethahetseng lefatšeng le lecha la ho loka hammoho le bophelo bo sa feleng boo re tla bo sebelisa ho mo sebeletsa, Molimo a ’notši oa ’nete. Haeba re tsoela pele ho arabela ka botšepehi tataisong ea hae, ha e le hantle o tla re ho rōna, joalokaha a buile ho Mora oa hae: “Ke u amohetse.”—Luka 3:22, NW; Johanne 6:27; Jakobo 1:12.
U ka Hlalosa Joang?
◻ Ke hobane’ng ha hangata pono ea Jehova ka bahlanka ba hae e fapane le ea batho?
◻ Ke eng se ka re thusang ho lemoha seo Molimo a se bonang ha a hlahloba lipelo tsa rōna?
◻ Ke thuto ea mofuta ofe e re thusang ho bona boemo ba sebele ba lintho le ho boloka lipelo tsa rōna?
◻ Ke hobane’ng ha ho le bohlokoa ho tseba eseng feela se boleloang ke Molimo empa le ho ba le maikutlo a hae?
◻ Ke hobane’ng ha rōna ka borōna re lokela ho rapela hore: “Mpatlisise, Uena Molimo, ’me u tsebe pelo ea ka”?
[Setšoantšo se leqepheng la 16]
Ha u ithuta, leka ho etsa hore mehopolo le maikutlo a Molimo e be a hao
[Setšoantšo se leqepheng la 18]
Mehopolo ea Jehova e “feta lehlabathe”
[Tlhaloso ea Moo Setšoantšo se Nkiloeng Teng]
Pictorial Archive (Near Eastern History) Est.