Boholo ba Jehova bo ke ke ba Batlisisoa
“Jehova o moholo ’me o lokela ho rorisoa haholo, boholo ba hae bo ke ke ba batlisisoa.”—PESALEME EA 145:3.
1, 2. Davida e ne e le motho oa mofuta ofe, hona o ile a inka joang ha a ipapisa le Molimo?
MOQAPI oa Pesaleme ea 145 ke e mong oa batho ba tummeng haholo historing. Ha e sa le moshanyana, o ile a talimana le seqhenqha se hlometseng ’me a se bolaea. Ha e ne e le mohlabani eo hape e neng e le morena, mopesaleme enoa o ile a hlōla lira tse ngata. Lebitso la hae ke Davida, ’me e ne e le morena oa bobeli oa Iseraele ea boholo-holo. Botumo ba Davida bo ile ba tsoela pele le ka mor’a lefu la hae, hoo esita le kajeno batho ba limilione ba tsebang ho itseng ka eena.
2 Ho sa tsotellehe lintho tseo a neng a li finyelletse, Davida o ne a ikokobelitse. Mabapi le Jehova o ile a bina a re: “Ha ke bona maholimo a hao, mesebetsi ea menoana ea hao, khoeli le linaleli tseo u li lokisitseng, motho ea shoang ke’ng hore u ’ne u mo hopole, le mora oa motho oa lefatše ke’ng hore u mo hlokomele?” (Pesaleme ea 8:3, 4) Ho e-na le ho inka e le motho e moholo, Davida o ile a re ke Jehova ea mo lopolotseng lireng tsohle tsa hae eaba o re ka Molimo: “U tla mpha thebe ea hao ea poloko, ke boikokobetso ba hao bo nketsang hore ke be moholo.” (2 Samuele 22:1, 2, 36) Jehova o bontša boikokobetso ka ho bontša mosa ho baetsalibe, ’me Davida o ile a ananela mosa o sa tšoanelang oa Molimo.
‘Ke Tla Phahamisa Morena Molimo’
3. (a) Davida o ne a e-na le pono efe ka borena ba Iseraele? (b) Davida o ile a lakatsa ho rorisa Jehova ho isa bohōleng bofe?
3 Le hoja Davida a ne a khethiloe ke Molimo hore e be morena, o ne a e-na le pono ea hore Jehova e ne e le eena Morena oa sebele oa Iseraele. Davida o ile a re: “’Muso ke oa hao, Jehova, uena Eo hape u iphahamisang u le hlooho ka holim’a tsohle.” (1 Likronike 29:11) Ka sebele Davida o ne a hlompha Molimo ka hore ke ’Musi! O ile a bina a re: “Ke tla u phahamisa, Morena Molimo oa ka, ke tla rorisa lebitso la hao ho isa nakong e sa lekanyetsoang, esita le ka ho sa feleng. Ke tla u boka letsatsi lohle, ke tla rorisa lebitso la hao ho isa nakong e sa lekanyetsoang, esita le ka ho sa feleng.” (Pesaleme ea 145:1, 2) Davida o ne a lakatsa ho rorisa Jehova Molimo letsatsi lohle le ka ho sa feleng.
4. Pesaleme ea 145 e senola litseko life tsa bohata?
4 Pesaleme ea 145 e fana ka karabelo e matla tsekong ea Satane ea hore Molimo ke ’musi ea ichebileng boeena feela ea hanelang libōpuoa tsa hae ka tokoloho. (Genese 3:1-5) Pesaleme ena e boetse e senola leshano la Satane la hore batho ba mamelang Molimo ba etsa joalo feela ka mabaka a boithati, eseng hobane ba rata Molimo. (Jobo 1:9-11; 2:4, 5) Joaloka Davida, kajeno Bakreste ba ’nete ba etsa hore ho be le likarabo bakeng sa liqoso tsa Diabolose tsa bohata. Ba nka tšepo ea bona ea bophelo bo sa feleng pusong ea ’Muso e le ea bohlokoa hobane ba lakatsa ho rorisa Jehova ka ho sa feleng. Hona joale, batho ba limilione ba se ba qalile ho etsa joalo ka ho bontša tumelo sehlabelong sa thekollo sa Jesu le ka ho sebeletsa Jehova ka boikokobetso kahobane ba mo rata e le barapeli ba hae ba inehetseng, le ba kolobelitsoeng.—Baroma 5:8; 1 Johanne 5:3.
5, 6. Ho na le menyetla efe ea ho boka Jehova le ho mo rorisa?
5 Nahana ka menyetla e mengata eo re nang le eona ea ho boka Jehova le ho mo rorisa joaloka bahlanka ba hae. Re ka etsa sena ka thapelo ha re anngoe ka ho teba ke ntho e itseng eo re e balileng Lentsoeng la hae, Bibele. Re ka rorisa le ho leboha Molimo ka kananelo ha re anngoe maikutlo ke tsela eo a sebelisanang le batho ba hae ka eona kapa ha re thabisitsoe ke karolo e itseng ea pōpo ea hae e hlollang. Re boetse re rorisa Jehova Molimo ha re buisana le balumeli-’moho ka merero ea hae libokeng tsa Bokreste kapa meqoqong ea rōna. Ha e le hantle, ‘mesebetsi eohle e molemo’ e etsoang molemong oa lithahasello tsa ’Muso oa Molimo e rorisa Jehova.—Matheu 5:16.
6 Mehlala ea morao-rao ea mesebetsi e joalo e molemo e akarelletsa libaka tse ngata tsa borapeli tse hahiloeng ke batho ba Jehova linaheng tse futsanehileng. Boholo ba mesebetsi ena bo entsoe ka thuso ea lichelete tse tsoang ho balumeli-’moho ba linaha tse ling. Bakreste ba bang ba ile ba thusa ka ho ithaopela ho ea libakeng tse joalo ho ea kenya letsoho kahong ea Liholo Tsa ’Muso. ’Me mosebetsi oa bohlokoa ka ho fetisisa har’a mesebetsi eohle e molemo ke oa ho rorisa Jehova ka ho bolela litaba tse molemo tsa ’Muso oa hae. (Matheu 24:14) Joalokaha litemana tse latelang tsa Pesaleme ea 145 li bontša, Davida o ile a ananela bobusi ba Molimo a ba a tlotlisa borena ba Hae. (Pesaleme ea 145:11, 12) Na le uena u na le kananelo e tšoanang bakeng sa tsela e lerato eo Molimo a busang ka eona? Hona na kamehla u bua le ba bang ka ’Muso oa hae?
Mehlala ea Boholo ba Molimo
7. Fana ka lebaka le ka sehloohong la ho rorisa Jehova.
7 Pesaleme ea 145:3 e fana ka lebaka le ka sehloohong la ho rorisa Jehova. Davida oa bina o re: “Jehova o moholo ’me o lokela ho rorisoa haholo, boholo ba hae bo ke ke ba batlisisoa.” Boholo ba Jehova ha bo na meeli. Batho ba ke ke ba bo batlisisa ka ho feletseng, ba bo utloisisa kapa ba bo lekanya. Empa ka sebele re tla rua molemo ka hore hona joale re tšohle mehlala ea boholo ba Jehova bo ke keng ba batlisisoa.
8. Bokahohleng bo senola eng ka boholo ba Jehova le matla a hae?
8 Leka ho hopola lekhetlo leo u kileng ua tloha maboneng a khanyang a motse o moholo ’me ua lahlela mahlo leholimong le elileng bosiu. Na ha ua ka ua hlolloa ke ho bona linaleli tse ngata-ngata tse bonahalang sepaka-pakeng se lefifi? Na ha ua ka ua susumelletseha ho rorisa Jehova ka lebaka la boholo ba hae ka hore ebe o bōpile lihloliloeng tseo tsohle tsa leholimo? Leha ho le joalo, seo u se boneng e ne e mpa e le karolo e nyenyane feela ea linaleli tse ka har’a molala oa linaleli oo lefatše e leng karolo ea oona. Ho phaella moo, ho hakanngoa hore ho na le melala ea linaleli e fetang limilione tse likete tse lekholo, ke e meraro feela eo motho a ka e bonang a sa sebelise sebonela-hōle. Ka sebele, linaleli le melala ea linaleli e mengata haholo eo e leng karolo ea bokahohleng bo boholohali ke bopaki ba matla a Jehova a pōpo le boholo ba hae bo ke keng ba batlisisoa.—Esaia 40:26.
9, 10. (a) Ke litšobotsi life tsa boholo ba Jehova tse bonahalitsoeng tabeng ea Jesu Kreste? (b) Tsoho ea Jesu e lokela ho ama tumelo ea rōna joang?
9 Nahana ka litšobotsi tse ling tsa boholo ba Jehova—tse amang Jesu Kreste. Boholo ba Molimo bo ile ba bonahala ha a ne a bōpa Mora oa hae le ha a ne a mo sebelisa ka nako e telele e ke keng ea lekanngoa e le “mosebetsi [oa Hae] ea hloahloa.” (Liproverbia 8:22-31) Boholo ba lerato la Jehova bo ile ba bonahala ha a ne a fana ka Mora oa hae ea tsoetsoeng a ’notši e le sehlabelo sa thekollo bakeng sa batho. (Matheu 20:28; Johanne 3:16; 1 Johanne 2:1, 2) Hape batho ba ke ke ba utloisisa ’mele o hlollang le o sa shoeng oa moea oo Jehova a ileng a o etsetsa Jesu ha a ne a tsosoa.—1 Petrose 3:18.
10 Tsoho ea Jesu e ne e akarelletsa litšobotsi tse ngata tse tsotehang tsa boholo ba Jehova bo ke keng ba batlisisoa. Ha ho pelaelo hore Molimo o ile a etsa hore Jesu a hopole mosebetsi o ileng oa ameha ha ho ne ho bōptjoa lintho tse sa bonahaleng le tse bonahalang. (Bakolose 1:15, 16) Lintho tsena li akarelletsa libōpuoa tse ling tsa moea, bokahohle, lefatše le behang, le mefuta eohle ea lintho tse phelang lefatšeng la rōna. Ho phaella tabeng ea ho etsa hore Mora oa hae a boele a be le tsebo e feletseng ea histori ea bophelo ba leholimo le ba lefatšeng eo Mora oa hae a bileng le eona pele e e-ba motho, Jehova o ile a boela a hopotsa Jesu lintho tse etsahetseng ha e ne e le motho ea phethahetseng. E, boholo ba Jehova bo ke keng ba batlisisoa bo bonahala tsohong ea Jesu. Ho feta moo, ketso eo e khōlō ke tiiso ea hore ho tla khoneha hore le batho ba bang ba tsosoe. E lokela ho matlafatsa tumelo ea rōna ea hore Molimo a ka tsosa batho ba limilione ba shoeleng ba leng khopolong ea hae e phethahetseng.—Johanne 5:28, 29; Liketso 17:31.
Mesebetsi e Hlollang le Liketso Tse Matla
11. Ho ile ha qalisoa mosebetsi ofe o moholo oa Jehova ka Pentekonta ea 33 C.E.?
11 Ho tloha tsohong ea Jesu, Jehova o entse mesebetsi e meng e mengata e meholo le e hlollang. (Pesaleme ea 40:5) Ka Pentekonta ea 33 C.E., Jehova o ile a etsa hore ho be le sechaba se secha, “Iseraele ea Molimo,” e entsoeng ka barutuoa ba Kreste ba neng ba tlotsitsoe ka moea o halalelang. (Bagalata 6:16) Sechaba sena se secha sa moea se ile sa eketseha ka tsela e matla lefatšeng lohle le neng le tsejoa nakong eo. Ho sa tsotellehe bokoenehi bo ileng ba etsa hore ho hlahe Bokreste-’mōtoana ka mor’a lefu la baapostola ba Jesu, Jehova o ile a ’na a etsa mesebetsi e hlollang ho tiisa hore morero oa hae oa phethahala.
12. Taba ea hore ebe Bibele e fumaneha ka lipuo tsohle tse khōlō tsa lefatše ke bopaki ba eng?
12 Ka mohlala, Bibele e feletseng e ile ea sireletsoa ’me qetellong ea fetoleloa ka lipuo tsohle tse khōlō tse teng lefatšeng kajeno. Hangata Bibele e ne e fetoleloa tlas’a maemo a thata le tlas’a tšokelo ea lefu e etsoang ke mahlahana a Satane. Ka sebele, haeba e ne e se thato ea Jehova, Molimo eo boholo ba hae bo ke keng ba batlisisoa, ho ne ho ke ke ha khoneha hore Bibele e fetoleloe ka lipuo tse fetang 2 000!
13. Ho tloha ka 1914, boholo ba Jehova bo ’nile ba bonahala joang tabeng ea merero ea ’Muso oa hae?
13 Boholo ba Jehova bo ’nile ba bonahala tabeng ea merero ea ’Muso oa hae. Ka mohlala, ka selemo sa 1914, o ile a hlomamisa Mora oa hae, Jesu Kreste, e le Morena oa leholimo. Nakoana ka mor’a moo, Jesu o ile a nka khato khahlanong le Satane le bademona ba hae. Ba ile ba lelekoa leholimong ’me ba thibelletsoe lefatšeng, moo ba letetseng ho kenngoa ka mohohlong. (Tšenolo 12:9-12; 20:1-3) Ho tloha nakong eo, balateli ba Jesu ba tlotsitsoeng ba ’nile ba hlorisoa haholo. Leha ho le joalo, Jehova o ba bolokile nakong ena ea ho ba teng ha Kreste ho sa bonahaleng.—Matheu 24:3; Tšenolo 12:17.
14. Jehova o ile a etsa mosebetsi ofe o hlollang ka 1919, ’me sena se finyelletse eng?
14 Ka selemo sa 1919, Jehova o ile a etsa mosebetsi o mong o hlollang o ileng oa bontša boholo ba hae. Balateli ba Jesu ba tlotsitsoeng, ba neng ba entsoe hore ba be boemong ba moea ba ho se sebetse, ba ile ba tsosolosoa. (Tšenolo 11:3-11) Lilemong tse ileng tsa latela ka mor’a moo, ka cheseho batlotsuoa ba ’nile ba bolela litaba tse molemo tsa ’Muso o hlonngoeng oa leholimo. Batlotsuoa ba bang ba ’nile ba bokelloa e le hore ho phethoe lenane le feletseng la ba 144 000. (Tšenolo 14:1-3) Jehova o sebelisitse balateli ba tlotsitsoeng ba Kreste ho rala motheo oa “lefatše le lecha,” e leng mokhatlo oa batho ba lokileng. (Tšenolo 21:1) Empa ho tla etsahala eng ka “lefatše le lecha” ha batlotsuoa ba tšepahalang kaofela ba e-ea leholimong?
15. Bakreste ba tlotsitsoeng ba ’nile ba etella pele mosebetsing ofe, ’me seo se feletse ka eng?
15 Ka 1935, tokollo ea makasine ena ea la 1 August le ea la 15 August li ne li e-na le lihlooho tsa bohlokoa tse buang ka “bongata bo boholo” bo boletsoeng ho Tšenolo khaolo ea 7. Ka cheseho Bakreste ba tlotsitsoeng ba ile ba qala ho batla barapeli bana ba bang ba tsoang lichabeng tsohle, melokong eohle, merabeng eohle le lipuong tsohle hore ba tl’o kopanela le bona. ‘Bongata bona bo boholo’ bo tla pholoha “matšoenyeho a maholo” a haufi, bo e-na le tebello ea bophelo bo sa feleng Paradeiseng e le litho tsa ka ho sa feleng tsa “lefatše le lecha.” (Tšenolo 7:9-14) Ka lebaka la mosebetsi oa ho bolela ka ’Muso le oa ho etsa barutuoa, o etelletsoeng pele ke Bakreste ba tlotsitsoeng, hona joale batho ba fetang limilione tse tšeletseng ba na le tšepo ea ho phela ka ho sa feleng lefatšeng la paradeise. Ke mang ea lokelang ho rorisoa ka keketseho e joalo e bileng teng ho sa tsotellehe khanyetso ea Satane le lefatše la hae le bolileng? (1 Johanne 5:19) Ke Jehova feela ea neng a ka etsa sena sohle, a sebelisa moea oa hae o halalelang.—Esaia 60:22; Zakaria 4:6.
Bokhabane bo Khanyang ba Jehova le ho Hlompheha ha Hae
16. Ke hobane’ng ha batho ba ke ke ba bona ‘bokhabane bo khanyang ba ho hlompheha ha Jehova’?
16 Ho sa tsotellehe hore na “mesebetsi e hlollang” le ‘liketso tse matla’ tsa Jehova ke life, le ka mohla li ke ke tsa lebaloa. Davida o ile a ngola a re: “Moloko o mong ka mor’a o mong o tla babatsa mesebetsi ea hao, o tla bolela liketso tsa hao tse matla. Ke tla nahanisisa ka bokhabane bo khanyang ba ho hlompheha ha hao le litaba tsa mesebetsi ea hao e hlollang. Ba tla bua ka matla a lintho tsa hao tse tšabehang; ha e le boholo ba hao, ke tla bo bolela.” (Pesaleme ea 145:4-6) Empa Davida o ne a ka tseba ho hokae ka bokhabane bo khanyang ba Jehova, kaha “Molimo ke Moea” ’me kahoo ha a bonahale mahlong a batho?—Johanne 1:18; 4:24.
17, 18. Davida o ne a ka hōlisa joang kananelo ea hae ka ‘bokhabane bo khanyang le ho hlompheha ha Jehova’?
17 Le hoja Davida a ne a ke ke a bona Molimo, ho ne ho e-na le litsela tseo ka tsona a neng a ka hōlisa kananelo ea hae ka ho hlompheha ha Jehova. Ka mohlala, o ne a ka bala tlaleho ea Mangolo ea liketso tse matla tsa Molimo, tse kang ho timetsoa ha lefatše le khopo ka metsi a moroallo oa lefatše lohle. E tlameha ebe Davida o ile a ithuta kamoo Molimo a ileng a tlotlolla melimo ea bohata ea Egepeta kateng ha a ne a lopolla Baiseraele bokhobeng ba Egepeta. Liketsahalo tse joalo li paka ho hlompheha ha Jehova le boholo ba hae.
18 Ha ho pelaelo hore hase ka ho bala Mangolo feela Davida a ileng a hōlisa kananelo ea hae ka ho hlompheha ha Molimo, empa hape o ile a thuisa ka ’ona. Ka mohlala, e ka ’na eaba o ile a thuisa ka se ileng sa etsahala ha Jehova a ne a fa Baiseraele Molao. Ho ile ha e-ba le lialuma, mahalima, leru le leholo le molumo o moholo oa lenaka. Thaba ea Sinai e ile ea thothomela ea ba ea kubella mosi. Baiseraele ba neng ba bokane mosikong oa thaba eo ba ile ba ba ba utloa le “Mantsoe a Leshome” a tsoa har’a mollo le leru ha Jehova a ntse a bua le bona ka lengeloi leo e neng e le moemeli oa hae. (Deuteronoma 4:32-36; 5:22-24; 10:4; Exoda 19:16-20; Liketso 7:38, 53) Tseo e bile liponahatso tse tšosang hakaakang tsa boholo ba Jehova! Ka sebele litlaleho tsena tsa ‘bokhabane bo khanyang le ho hlompheha ha Jehova’ li susumetsa batho ba ratang Lentsoe la Molimo ba thuisang ka tsona. Kajeno, rōna re na le Bibele e feletseng, e nang le lipono tse khanyang tse etsang hore re hlolloe ke boholo ba Jehova.—Ezekiele 1:26-28; Daniele 7:9, 10; Tšenolo, khaolo ea 4.
19. Ke eng e tla hōlisa kananelo ea rōna ka ho hlompheha ha Jehova?
19 Tsela e ’ngoe eo ka eona Davida a neng a ka hlolloa ke ho hlompheha ha Molimo e ne e tla ba ka ho ithuta melao eo Molimo a ileng a e fa Baiseraele. (Deuteronoma 17:18-20; Pesaleme ea 19:7-11) Ho mamela melao ea Jehova ho ne ho etsa hore sechaba sa Iseraele se be le seriti ’me ho ile ha etsa hore se fapane le lichaba tse ling kaofela. (Deuteronoma 4:6-8) Ho tšoana le Davida, ha re bala Mangolo kamehla, re thuisa ka ’ona ka botebo, re bile re ithuta ’ona ka hloko re tla hōlisa kananelo ea rōna ka ho hlompheha ha Jehova.
Makhabane a Molimo a Maholo Hakaakang!
20, 21. (a) Pesaleme ea 145:7-9 e totobatsa boholo ba Jehova mabapi le makhabane afe? (b) Makhabane a Molimo a boletsoeng moo a na le phello efe ho bohle ba mo ratang?
20 Joalokaha re hlokometse, litemana tsa pele tse tšeletseng tsa Pesaleme ea 145 li re fa mabaka a utloahalang a ho rorisa Jehova ka lintho tse amanang le boholo ba hae bo ke keng ba batlisisoa. Temana ea 7 ho ea ho ea 9 e totobatsa boholo ba Molimo ka ho bua ka makhabane a hae. Davida oa bina o re: “Ba tla bua ba sa khaotse ka molemo oa hao o mongata, ba tla hoeletsa ka thabo ka lebaka la ho loka ha hao. Jehova o mosa ’me o mohau, o lieha ho halefa ’me o na le mosa o lerato o moholo. Jehova o molemo ho bohle, mehauhelo ea hae e holim’a mesebetsi eohle ea hae.”
21 Mona Davida o qala ka ho totobatsa molemo oa Jehova le ho loka ha hae—e leng makhabane ao Satane Diabolose a ileng a a belaella. Makhabane aa a na le phello efe ho bohle ba ratang Molimo le ba ikokobelletsang bobusi ba hae? Ka sebele, molemo oa Jehova le tsela ea hae e lokileng ea ho busa li thabisa barapeli ba hae haholo hoo ba ke keng ba khaotsa ho mo rorisa. Ho feta moo, molemo oa Jehova o akaretsa batho “bohle.” Re tšepa hore sena se tla thusa ba bang ba bangata ho baka ’me e be barapeli ba Molimo oa ’nete pele metsotso e ja babeli.—Liketso 14:15-17.
22. Jehova o tšoara bahlanka ba hae joang?
22 Davida o ile a boela a ananela makhabane ao Molimo ka boeena a ileng a a totobatsa ha A ne a “feta ka pel’a sefahleho sa [Moshe] ’me a re: ‘Jehova, Jehova, Molimo ea mohau le ea mosa, ea liehang ho halefa le ea tletseng mosa o lerato le ’nete.’” (Exoda 34:6) Kahoo, Davida o ne a ka re: “Jehova o mosa ’me o mohau, o lieha ho halefa ’me o na le mosa o lerato o moholo.” Le hoja Jehova a le moholo ka tsela e ke keng ea batlisisoa, o hlompha bahlanka ba hae ka ho ba tšoara ka mosa. O tletse mohau, o ikemiselitse ho tšoarela baetsalibe ba bakileng motheong oa sehlabelo sa Jesu sa thekollo. Hape, Jehova o lieha ho halefa, hobane o fa bahlanka ba hae monyetla oa ho hlōla mefokolo ea bona e ka ba thibelang ho kena lefatšeng la hae le lecha la ho loka.—2 Petrose 3:9, 13, 14.
23. Sehloohong se latelang re tla tšohla tšobotsi efe ea bohlokoa?
23 Davida o tlotlisa mosa o lerato oa Molimo kapa lerato le tšepahalang. Ha e le hantle, karolo eohle e setseng ea Pesaleme ea 145 e bontša kamoo Jehova a bontšang tšobotsi ena kateng le kamoo bahlanka ba hae ba tšepahalang ba arabelang kateng moseng oa hae o lerato. Lintlha tsena li tla tšohloa sehloohong se latelang.
U ka Araba Joang?
• Ho na le menyetla efe ea ho rorisa Jehova “letsatsi lohle”?
• Ke mehlala efe e bontšang hore boholo ba Jehova bo ke ke ba batlisisoa?
• Re ka hōlisa kananelo joang ka ho hlompheha ho khanyang ha Jehova?
[Setšoantšo se leqepheng la 10]
Melala ea linaleli e bokahohleng e paka boholo ba Jehova
[Tlhaloso ea Moo Setšoantšo se Nkiloeng Teng]
Courtesy of Anglo-Australian Observatory, photograph by David Malin
[Setšoantšo se leqepheng la 12]
Boholo ba Jehova bo bonahalitsoe joang tabeng ea Jesu Kreste?
[Setšoantšo se leqepheng la 13]
Ha Baiseraele ba ne ba amohela Molao Thabeng ea Sinai, ba ne ba bone bopaki ba ho hlompheha ho khanyang ha Jehova