Ke Hobane’ng ha re Lokela ho ‘Rorisa Jah’?

1-3. (a) E ka ’na eaba Pesaleme ea 147 e ngotsoe neng? (b) Re ka ithuta’ng ho Pesaleme ea 147?

HA MOTHO a entse ntho e ntle kapa a e-na le makhabane a itseng, oa rorisoa. Haeba re rorisa batho, re na le mabaka a mangata le ho feta a hore re rorise Jehova Molimo. Re lokela ho mo rorisa hobane o matla ’ohle ’me o bopile lintho tsohle tse ntle ebile oa re rata hobane o ile a fana ka Mora oa hae e le sehlabelo bakeng sa rona.

² Mongoli oa Pesaleme ea 147 o ile a rorisa Jehova, a ba a khothalletsa batho ba bang hore le bona ba rorise Jehova.—Bala Pesaleme ea 147:1, 7, 12.

³ Le hoja re sa tsebe hore na mongoli oa Pesaleme ena ke mang, e ka ’na eaba o phetse nakong eo Jehova a ileng a lokolla Baiseraele motseng oa Babylona. (Pes. 147:2) Mopesaleme eo o ile a rorisa Jehova hobane Baiseraele ba ile ba lokolloa e le hore ba eo rapela sebakeng sa bona se loketseng. Empa o ne a e-na le mabaka a mang a ho rorisa Jehova. Ke afe? Uena u na le mabaka afe a ho rorisa Jah?—Pes. 147:1.

 4. E ka ’na eaba Baiseraele ba ile ba ikutloa joang ha ba lokolloa Babylona, hona hobane’ng?

⁴ Nahana hore na Baiseraele ba ne ba ikutloa joang ha ba le botlamuoeng Babylona. Bababylona ba ne ba ba soma ba re: “Re bineleng e ’ngoe ea lipina tsa Sione.” Ka nako eo, Baiseraele ba ne ba se na lebaka la ho bina kaha ba ne ba hapuoe. (Pes. 137:1-3, 6) Kaha ba ne ba utloile bohloko, ba ne ba hloka ho tšelisoa. Empa Jehova o ile a romela morena oa Persia e leng Cyruse ho ba lokolla joalokaha a ne a profetile. Cyruse o ile a hlola Bababylona eaba o re: “Jehova Molimo . . . o ntaetse hore ke mo hahele ntlo Jerusalema . . . Mang kapa mang ea har’a lōna bohle batho ba hae, Jehova Molimo oa hae a be le eena. Kahoo a ke a nyolohe.” (2 Likron. 36:23) E tlameha ebe Baiseraele ba neng ba lula Babylona ba ile ba khothala haholo ha ba lokolloa.   

 5. Mopesaleme o ile a re’ng ka Jehova?

⁵ Jehova ha aa ka a tšelisa Moiseraele a le mong empa o ile a tšelisa sechaba sohle. Le mehleng ena Jehova o tšelisa bahlanka bohle ba hae. Ha mopesaleme a ngola ka Molimo o ile a re: “O folisa ba robehileng lipelo, o tlamisa maqeba a bona a bohloko.” (Pes. 147:3) Jehova o tsotella motho e mong le e mong ea nang le mathata ebile o ikemiselitse ho re tšelisa ha re nyahame. (Pes. 34:18; Esa. 57:15) O re fa bohlale le matla a hore re sebetsane le bothata leha e le bofe boo re thulanang le bona.—Jak. 1:5.

 6. Re ka rua molemo joang ka lintho tseo mopesaleme a buileng ka tsona ho Pesaleme ea 147:4? (Sheba setšoantšo se qalong.)

⁶ Temaneng e latelang, mopesaleme o bua ka maholimo ’me o re Jehova “o bala palo ea linaleli” ebile “o li bitsa ka mabitso a tsona.” (Pes. 147:4) Ke hobane’ng ha mopesaleme a se a bua ka taba e fapaneng le ea ho tšelisoa? Nahana ka taba ena: Le hoja mopesaleme a ne a khona ho bona linaleli, o ne a sa tsebe hore na li kae ka palo. Hona joale re se re khona ho bona linaleli tse ngata ho feta lilemong tse fetileng. Batho ba bang ba re e ka ’na eaba ho na le linaleli tse libilione sehlopheng sa linaleli se bitsoang Milky Way. Ho ka etsahala hore ebe ho na le lihlopha tsa linaleli tse limilione tse 1 000 000. Ha re sheba leholimo, re bona linaleli li se na palo. Empa ’Mopi oa rona eena o li file mabitso kaofela ha tsona e leng hore o tseba e ’ngoe le e ’ngoe ea tsona. (1 Bakor. 15:41) Na Jehova o tseba batho ka tsela ka eo? Kaha o tseba hantle moo naleli ka ’ngoe e leng hona teng, o u tseba hantle. Oa tseba hore na u hokae, hore na u ikutloa joang le hore na u hloka eng ka nako e itseng.

7, 8. (a) Ha Jehova a thusa batho ba hae ba nang le mathata, o hopola eng? (b) Etsa mohlala oa kamoo Jehova a utloelang batho ba sa phethahalang bohloko kateng.

⁷ Ha se feela hore Jehova oa u tsotella, empa o boetse o u utloela bohloko ebile o na le matla a ho u thusa ha u na le mathata. (Bala Pesaleme ea 147:5.) U ka ’na oa ikutloa u imetsoe hoo u utloang eka u ke ke oa khona ho sebetsana le mathata a hao. Molimo “oa hopola hore re lerōle,” kahoo oa tseba hore na re hloleha ho etsa’ng. (Pes. 103:14) Kaha ha rea phethahala, re lula re etsa liphoso tse tšoanang, tse kang ho bua re sa nahana, ho ba le mekhoa e itseng e bakoang ke ho se phethahale kapa ho honohela batho ba bang. Le hoja Jehova a sa etse liphoso, o re utloisisa ho feta kamoo re nahanang kateng.—Esa. 40:28.

⁸ Mohlomong u kile oa bona ha Jehova a u thusa ka mathata ao u kileng oa ba le ’ona. (Esa. 41:10, 13) Mohlala, morali’abo rona Kyoko ke pula-maliboho. O ile a nyahama haholo ha a fuoa kabelo e ncha. Jehova o ile a bontša joang hore o utloisisa mathata a hae? Ka mor’a hore a fumane kabelo eo e ncha, o ile a kopana le batho ba neng ba utloisisa boemo ba hae hantle. O re e ne eka Jehova o re ho eena: “Kea u rata. Eseng hobane feela u le pula-maliboho, empa hobane u morali oa ka ea inehetseng ho ’na. Ke batla hore u thabele ho ba Paki ea ka.” Ke maemong afe moo u boneng hore ‘kutloisiso ea Jehova e ke ke ea batlisisoa’?

9, 10. Ha Jehova a re thusa o qala ka ho re fa eng pele? Etsa mohlala.

⁹ Ho na le lintho tseo re li hlokang hore re phele. Mohlala, ka linako tse ling re tšoenyeha ka hore na re tla ja’ng. Empa Jehova ke eena ea entseng hore lijo li be teng. O fepa esita le makhoaba a manyenyane. (Bala Pesaleme ea 147:8, 9) Haeba o fepa makhoaba, re kholisehile hore le rona o tla re fa lintho tseo re li hlokang.—Pes. 37:25.

¹⁰ Ntho ea bohlokoa le ho feta ke hore Jehova o re fa lintho tsohle tse ka re thusang hore re be le kamano e ntle le eena ’me re be le “khotso ea Molimo e fetang monahano oohle.” (Bafil. 4:6, 7) Mohlala, mor’abo rona Mutsuo le mosali oa hae ba ile ba bona kamoo Jehova a ba hlokomelang kateng ka mor’a hore ho be le tsunami naheng ea Japane. Ba ile ba balehela mokatong o ka holimo oa ntlo ea bona e le hore ba pholohe. Ba ile ba qeta bosiu bohle ba le mokatong oo, ho le lefifi ho bile ho bata. Letsatsing leo, ba ile ba lahleheloa ke sohle seo ba neng ba e-na le sona. Ha e e-ba hoseng, ba batla lingoliloeng tseo ba ka li balang hore ba imatlafatse tumelo. Ba ile ba fumana Buka ea Selemo ea Lipaki Tsa Jehova ea 2006. Ka ho khetheha, mor’abo rona Mutsuo o ile a khahloa ke sehlooho se reng “Tsunami e Kotsi ka ho Fetisisa ho Tse Kileng Tsa Tlalehoa.” Se ne se bua ka tšisinyeho ea lefatše e mpe ka ho fetisisa e bileng sehlekehlekeng sa Sumatra ka 2004. Mor’abo rona Mutsuo le mosali oa hae ba ile ba bala sehlooho seo ba ntse ba lla. Ba ile ba bona kamoo Jehova a ba ratang kateng hore ebe o ile a ba tšelisa nakong eo ba neng ba hlile ba hloka matšeliso. Jehova o ile a boela a ba fa lintho tseo ba li hlokang ka hore a romele barab’abo rona ho ba tlisetsa tsona. Empa ba ile ba matlafala le ho feta ha phutheho ea bona e eteloa ke baemeli ba mokhatlo oa Jehova. Mor’abo rona Mutsuo o re: “Ke ne ke utloa hore Jehova o haufi le rona kaofela ebile oa re tsotella. Kannete ke ile ka tšeliseha.” Jehova o qala pele ka ho re matlafatsa tumelong. Ka mor’a moo o re fa lintho tseo re li hlokang hore re phele.   

11. Re lokela ho etsa’ng e le hore Jehova a re thuse?

¹¹ Jehova o lula a ikemiselitse ho “imolla ba bonolo.” (Pes. 147:6a) Empa re lokela ho etsa’ng hore a re thuse? Re lokela ho ba le kamano e ntle le eena. Re ka ba le kamano e ntle le eena haeba re le “bonolo” kapa re ikokobelitse. (Sof. 2:3) Batho ba bonolo ba emela hore Jehova e be eena ea ba lokisetsang lintho ha foselitsoe. Jehova o rata batho ba joalo haholo.

12, 13. (a) Re lokela ho qoba ho etsa’ng e le hore Jehova a re thuse? (b) Jehova o khahlisoa ke batho ba joang?

¹² Empa Jehova “o kokobetsa ba khopo.” (Pes. 147:6b) Ha ho le ea mong oa rona ea batlang ho kokobetsoa joalo. Kaha ha re batle ho halefisa Jehova, re lokela ho hloea lintho tseo a li hloileng. (Pes. 97:10) Mohlala, re lokela ho hloea bohlola, e leng hore re lokela ho qoba lintho tse ka etsang hore re bo etse, tse kang ho sheba litšoantšo tse litšila. (Pes. 119:37; Mat. 5:28) Le hoja ho ka ba thata ho loanela ho qoba lintho tse joalo, re ikemiselitse ho sebetsa ka thata ho li qoba hobane re batla hore Jehova a re hlohonolofatse.

¹³ Ha re ntse re loana joalo, re lokela ho itšetleha ka Jehova, eseng matla a rona. Jehova a ke ke a thaba haeba re batla thuso ‘matleng a pere,’ e leng moo batho ba batlang thuso teng ho e-na le ho e batla ho eena. Re ke ke ra tšepa “maoto a motho,” e leng ho nahana hore rona kapa batho ba bang ba ka re pholosa. (Pes. 147:10) Empa re lokela ho rapela Jehova re mo kope hore a re thuse. Jehova ha a tšoane le bahlabolli hobane ha ho mohla a khathalang ha re mo kopa lintho tse itseng esita le haeba re mo kopa ka makhetlo. “Jehova o khahlisoa ke ba mo tšabang, ba letelang mosa oa hae o lerato.” (Pes. 147:11) Re na le tšepo ea hore o tla lula a re rata, a re thuse hore re loantše mefokolo ea rona.

14. Ke’ng e ileng ea thusa mopesaleme ho lula a khobile matšoafo?

¹⁴ Jehova o re fa lebaka la ho kholiseha hore o tla re thusa ha re hloka thuso. Ha mopesaleme a nahana ka nakong eo tempele ea Jerusalema e neng e tsosolosoa, o ile a bina ka Jehova a re: “O entse hore mekoallo ea liheke tsa hao e be matla. O hlohonolofalitse bara ba hao ka hare ho uena. O beha khotso naheng ea hao.” (Pes. 147:13, 14) Mopesaleme o ne a khobile matšoafo hobane a kholisehile hore Jehova o tla koala liheke ka thata e le hore barapeli ba hae ba sireletsehe.

15-17. (a) Ka linako tse ling re ka ikutloa joang ka mathata a rona, empa Jehova o re thusa joang ka Lentsoe la hae? (b) Etsa mohlala oa hore na ke joang ‘Lentsoe la Molimo le mathang ka lebelo.’

¹⁵ U ka ’na oa hlaheloa ke mathata a etsang hore u lule u tšoenyehile. Empa Jehova a ka u fa bohlale hore u mamelle. Mopesaleme o ile a re Molimo oa hae “o romela polelo ea hae lefatšeng. Lentsoe la hae le matha ka lebelo.” A re Jehova o fana ka lehloa, o hasanya serame ’me o lahla leqhoa.’ Ka mor’a moo mopesaleme o ile a re: “Ke mang ea ka emang ka pel’a serame sa hae?” A boela a re Jehova “o romela lentsoe la hae ’me oa li qhibilihisa.” (Pes. 147:15-18) Molimo oa rona ea bohlale, ea matla ’ohle, ea laolang sefako le lehloa, a ka u thusa hore u hlole bothata bofe kapa bofe boo u ka bang le bona.

¹⁶ Mehleng ena, Jehova o re thusa ka Lentsoe la hae, e leng Bibele. “Lentsoe la hae le matha ka lebelo” hobane o re fa lintho tseo re li hlokang ka nako hore re be le kamano e ntle le eena. Nahana kamoo u ruang molemo kateng ha u bala Bibele, u bala lingoliloeng tsa “lekhoba le tšepahalang le le masene,” u shebella Khaso ea JW, u kena ho jw.org, u buisana le baholo kapa u kopana le Bakreste-’moho le uena. (Mat. 24:45) Na u hlokometse kamoo Jehova a potlakang kateng hore a u tataise?

¹⁷ Morali’abo rona Simone o ile a bona kamoo Lentsoe la Molimo le leng matla kateng. O ne a ikhalala hoo a neng a nahana hore Jehova ha a mo rate. Le hoja a ne nyahame joalo, o ile a rapela a kopa Jehova hore a mo thuse. A boela a ithuta Bibele moo a leng mong. O re: “Ha ho mohla ke sa kang ka bona matla a Jehova le kamoo a re tataisang kateng.” Kahoo, o leka ka hohle ho lula a e-na le maikutlo a nepahetseng.

18. Ke’ng e u kholisang hore Jehova oa u rata, hona u na le mabaka afe a ho ‘Rorisa Jah’?

¹⁸ Mopesaleme o ne a tseba hore Molimo o ne a rata batho ba hae. E ne e le bona feela sechaba seo Molimo a se fileng “lentsoe la hae . . . le liqeto tsa hae tsa boahloli.” (Bala Pesaleme ea 147:19, 20.) Mehleng ena, re hlohonolofalitsoe ka hore ebe ke rona feela ba bitsoang ka lebitso la Molimo. Kaha re tseba Jehova ’me re phetha seo re ithutileng sona Lentsoeng la hae, re na le kamano e ntle le eena. Na le uena joaloka mongoli oa Pesaleme ea 147 ha u na mabaka a mangata a ho ‘rorisa Jah’ le hore u khothaletse batho ba bang hore le bona ba mo rorise?