Kamehla Lahlela Meroalo ea Hao ho Jehova
BA BANGATA kajeno ba ikutloa ba hatelletsoe ke meroalo. Mathata a moruo, mathata a sithabetsang a malapa, mathata a bophelo, bohloko le mahlomola tse tlisoang ke bohatelli le puso ea bompoli le masoabi a mang a mangata a leketla joaloka maloala melaleng ea bona. Ka ntle ho likhatello tsena tsa kantle, ba bang ba boetse ba nyahamisoa ke boikutlo ba ho ba ba hlokang thuso le ba ho hlōleha ka lebaka la ho se phethahale. Ba bangata ba na le boikutlo ba ho inehela ka ho feletseng ntoeng ena. U ka sebetsana ka katleho le meroalo e bonahalang e sa jarehe joang?
Ka nako e ’ngoe Morena Davida oa Iseraele o kile a ba khatellong eo a neng a utloa a sa khone ho e jara. Ho latela Pesaleme ea 55, o ne a ferekantsoe ke matšoenyeho ka lebaka la likhatello le lehloeo tse tsoang ho lira tsa hae. O ile a ba masisa-pelong le tšabong e khōlō. O ne a feheloa feela mesarelong ea hae. (Pesaleme ea 55:2, 5, 17) Leha ho le joalo, ho sa tsotellehe ho tepella ha hae, o ile a fumana tsela ea ho atleha. Joang? O ile a talima ho Molimo oa hae bakeng sa tšehetso. O ile a eletsa ba bang ba ka ’nang ba ikutloa joaloka eena ka ho re: “Jarisa Jehova phahlo tsa hao.”—Pesaleme 55:22.
O ne a bolela eng ka ho re “jarisa Jehova phahlo tsa hao”? Na ke taba feela ea ho ea ho Jehova ka thapelo le ho hlalosa se re tšoenyang? Kapa na re ka etsa ho hong ho ikimolla ka borōna? Ho thoe’ng haeba re ikutloa re sa tšoanelehe ho atamela Jehova? Re ka fumana seo Davida a neng a se bolela ka ho sheba tse ling tsa liphihlelo tseo e lokelang ebe o ile a li hopola ka ho hlaka ha a ne a ngola mantsoe ao.
Etsa Lintho ka Matla a Jehova
Na u hopola kamoo Goliathe a ileng a kenya tšabo kateng lipelong tsa banna ba ntoa Iseraeleng? Monna enoa oa seqhenqha, ea fetang limithara tse 2,7 ka bolelele, o ile a ba tšosa. (1 Samuele 17:4-11, 24) Empa Davida o ne a sa tšoha. Hobane’ng? Hobane ha aa ka a leka ho sebetsana le Goliathe ka matla a hae. Ho tloha nakong eo a neng a tlotsetsoa ho ba morena oa kamoso oa Iseraele, o ne a ile a lumella moea oa Molimo ho mo tataisa le ho mo matlafatsa ho tsohle tseo a li etsang. (1 Samuele 16:13) Kahoo o ile a re ho Goliathe: “’Na, ke tla ho uena ka lebitso la Jehova oa makhotla, Molimo oa makhotla a Iseraele, eo u mo nyelisitseng. Kajeno, Jehova o tla u neela matsohong a ka.” (1 Samuele 17:45, 46) Davida e ne e le setsebi sa ho betsa ka letjeketjane, empa re ka kholiseha hore moea o halalelang oa Jehova o ile oa tataisa le ho etsa hore lejoe le letjeketjaneng le bolaee Goliathe.—1 Samuele 17:48-51.
Davida o ile a sebetsana ka katleho le phephetso ena e khōlōhali ’me a e hlōla kahobane a ne a kholisehile hore Molimo o tla mo tšehetsa le ho mo tiisa. O ne a ile a hlaolela kamano e ntle, ea ho tšepa Molimo. Ntle ho pelaelo, e ile ea matlafatsoa ke tsela eo Jehova a neng a ile a mo lokolla ka eona pejana. (1 Samuele 17:34-37) Joaloka Davida, u ka boloka kamano e matla ea botho le Jehova ’me ua tšepa ka ho feletseng matla a hae le boikemisetso ba hae ba ho u matlafatsa le ho u tšehetsa maemong ’ohle.—Pesaleme 34:7, 8.
Etsa Seo U ka se Khonang ho Rarolla Bothata
Leha ho le joalo, joalokaha Pesaleme ea 55 e bontša ka ho hlaka, sena hase bolele hore linako tsa tlokotsi, matšoenyeho esita le eona tšabo li ke ke tsa e-ba teng le ka mohla. Ka mohlala, ka mor’a ho bontša ho tšepa Jehova a sa tšabe ka lilemo tse maloa, Davida o ile a ba le tšabo e khōlō ka pel’a lira tsa hae. O ile a hlouoa ke Morena Saule ’me a tlameha ho baleha ho pholosa bophelo ba hae. Inahanele feela pherekano ea maikutlo eo sena e tlamehang ebe se ile sa e bakela Davida, lipotso tseo e tlamehang ebe li ile tsa phahama kelellong ea hae mabapi le ho phethahala ha morero oa Jehova. Etsoe, o ne a se a tlotselitsoe ho ba morena oa kamoso oa Iseraele, empa ke mona o tlameha ho phela e le mophaphathehi lehoatateng, a tsongoa joaloka phoofolo e hlaha. Ha a ne a leka ho tšabela motseng oa Gathe, ha habo Goliathe, o ile a lemohuoa. Ka phello efe? Tlaleho e re o ile ‘a tšaba haholo.’—1 Samuele 21:10-12.
Empa ha aa ka a lumella tšabo le matšoenyeho a hae a tebileng hore li mo thibele ho talima ho Jehova bakeng sa thuso. Ho latela Pesaleme ea 34 (e ngotsoeng ka lebaka la phihlelo ena), Davida o ile a re: “Ka na ka batla Jehova, ’me a nkaraba, a ba a mpholosa ho tšabeng ha ka kaofela. Mohlomohi ha a rapela, Jehova oa utloa; o mo pholosa mahlomoleng a hae kaofela.”—Pesaleme 34:4, 6.
Ka sebele, Jehova o ile a mo tšehetsa. Leha ho le joalo hlokomela hore Davida ha aa ka a itulela feela eaba o emetse hore Jehova a mo pholose. O ile a hlokomela hore maemong ao ho ne ho hlokahala hore a etse sohle se matleng a hae hore a tsoe bothateng. O ile a lumella letsoho la Jehova ho mo lopolla, empa le eena ka boeena o ile a nka khato, a ikhakanya joaloka lehlanya e le hore morena oa Gathe a se ke a mo bolaea. (1 Samuele 21:14–22:1) Le rōna ka ho tšoanang re lokela ho etsa sohle se matleng a rōna ho ikimolla meroalo, ho e-na le ho ikemela feela hore Jehova a re pholose.—Jakobo 1:5, 6; 2:26.
Se ke Ua Eketsa Meroalo ea Hao
Davida o ile a ithuta thuto e ’ngoe, e bohloko, hamorao bophelong ba hae. E ne e le efe? Hore ka linako tse ling re eketsa meroalo ea rōna. Ka mor’a ho hlōla Bafilista, lintho li ile tsa tsamaela Davida hampe ha a ne a etsa qeto ea ho isa areka ea selekane Jerusalema. Tlaleho ea histori ea re bolella: “Davida a tloha, a e-na le sechaba sohle see a nang le sona, a ea Baale-Juda, ho lata areka ea Molimo teng . . . Ba kenya areka ea Molimo koloing e ncha, . . . Ussa le Akio, bara ba Abinadabe, ba ne ba tsamaisa koloi eo e ncha.”—2 Samuele 6:2, 3.
Ho palamisa Areka koloing ho ne ho le khahlanong le litaelo tsohle tseo Jehova a faneng ka tsona mabapi le eona. Ho ne ho boletsoe ka ho hlaka hore ke feela ba lumeletsoeng ho jara areka, Balevi ba Bakehathe, ba neng ba lokela ho jara Areka mahetleng a bona, ba sebelisa mejaro e kenngoang mehoeleng e haheletsoeng ka ho khetheha Arekeng. (Exoda 25:13, 14; Numere 4:15, 19; 7:7-9) Ho hlokomoloha litaelo tsena ho ile ha tlisa tlokotsi. Ha likhomo tse neng li hula koloi li khoptjoa ’me e batla e e-oa, Ussa, eo mohlomong e neng e le Molevi empa ka sebele e se moprista, a tšoara Areka ho e tsitsisa ’me Jehova a mo otla ka lebaka la ho se hlomphe ha hae.—2 Samuele 6:6, 7.
Davida e le morena o ile a tlameha ho jara boikarabelo bo itseng bakeng sa sena. Boitšoaro ba hae bo bontša hore ka linako tse ling esita le bao ba nang le kamano e ntle le Jehova ba ka ’na ba sitoa ho itšoara maemong a lekang. Qalong Davida o ile a halefa. Hamorao o ile a tšoha. (2 Samuele 6:8, 9) Kamano ea hae ea ho tšepa Jehova e ile ea beoa tekong haboima. Lena e ne e le lekhetlo leo ho bonahalang a ile a hlōleha ho lahlela moroalo oa hae ho Jehova, ka ho se latele litaelo tsa hae. Na mohlomong boo e ka ba boemo ka rōna ka linako tse ling? Na le ka mohla re ke re behe Jehova molato ka mathata a hlahisoang ke ho hlokomoloha litaelo tsa hae?—Liproverbia 19:3.
Ho Sebetsana ka Katleho le Moroalo oa Boikutlo ba ho ba Molato
Hamorao, Davida o ile a ipakela moroalo o moholo oa boikutlo ba ho ba molato ka ho etsa sebe se tebileng khahlanong le litekanyetso tsa boitšoaro tsa Jehova. Lekhetlong lena Davida o ile a lahla boikarabelo ba hae ba ho etella pele banna ba hae ntoeng. O ile a sala Jerusalema ha ba ile ntoeng. Sena se ile sa lebisa khathatsong e tebileng.—2 Samuele 11:1.
Morena Davida o ile a bona Bathe-sheba e motle a hlapa. O ile a kopanela boitšoarong bo bobe le eena, ’me ea e-ba moimana. (2 Samuele 11:2-5) Ho leka ho koahela boitšoaro boo bo bobe, o ile a lokisetsa hore monna oa hae, Uria, a khutlisetsoe Jerusalema a e-tsoa lebaleng la ntoa. Uria o ile a hana ho ba le likamano tsa lenyalo le mosali oa hae nakong eo Iseraele e ntseng e le ntoeng. (2 Samuele 11:6-11) Joale Davida a sebelisa mokhoa o khopo le o tletseng mano ho koahela sebe sa hae. O ile a lokisetsa hore bo-mphato ba Uria sesoleng ba tlohele Uria sebakeng se hlaselehang habonolo ntoeng e le hore a tle a bolaoe. E bile sebe se nyonyehang le se tebileng hakaakang!—2 Samuele 11:12-17.
Ka sebele, qetellong sebe sa Davida se ile sa mo tšoara, ’me o ile a pepesoa. (2 Samuele 12:7-12) Nahana feela botebo ba mesarelo le boikutlo ba ho ba molato boo e tlamehang ebe Davida o bile le bona ha a hlokomela ho teba ha sebe sa hae ka lebaka la takatso ea hae e mpe. E ka ’na eaba o ile a sithabetsoa ke boikutlo ba hae ba ho hlōleha, haholo-holo hobane mohlomong e ne e le monna ea hlokolosi, ea nang le boikutlo. Mohlomong o ile a ikutloa a se na thuso ka ho feletseng!
Leha ho le joalo, Davida o ile a phakisa a amohela phoso ea hae, a lumela ho moprofeta Nathane: “Ke sitetsoe Jehova.” (2 Samuele 12:13) Pesaleme ea 51 e re bolella kamoo a ileng a ikutloa kateng le kamoo ka tieo a ileng a kōpa Jehova Molimo hore a mo hloekise ’me a mo tšoarele. O ile a rapela: “Ntlhatsoe, u be u ntlhatsoisise bokhopo ba ka, u mphekole sebe sa ka! Hobane ke tseba litlōlo tsa ka, sebe sa ka se pel’a ka ka mehla.” (Pesaleme 51:2, 3) Kahobane a ile a baka e le kannete, o ile a boela a haha kamano e matla, e haufi le Jehova. Davida ha aa ka a lulela ho ikoahlaea le ho ikutloa a se na thuso. O ile a lahlela moroalo oa hae ho Jehova ka ho amohela molato ka boikokobetso, ho bontša pako ea sebele, le ho rapela ka tieo hore Jehova a mo tšoarele. O ile a boela a amoheloa ke Molimo.—Pesaleme 51:7-12, 15-19.
Ho Sebetsana ka Katleho le ho se Tšepahale
Sena se re tlisa ketsahalong e ileng ea susumeletsa Davida ho ngola Pesaleme ea 55. O ne a le tlas’a khatello e khōlō ea maikutlo. O ile a ngola: “Pelo ea ka e thothomela ka hare ho ’na, matšabeho a lefu a ntšoere.” (Pesaleme 55:4) Ke’ng se ileng sa baka bohloko boo? Mor’a Davida, Absalome, o ile a rera ho utsoa borena ba Davida ka bolotsana. (2 Samuele 15:1-6) Ho se tšepahale hona ha mor’a hae ho ile ha mo imela hore a ka ho jara, empa ho ileng ha etsa hore ho be thata le ho feta ke hore moeletsi eo Davida a neng a mo tšepa ka ho fetisisa, monna ea bitsoang Akitofele, o ile a kenella ’momoring oa ho fetohela Davida. Ke Akitofele eo Davida a mo hlalosang ho Pesaleme ea 55:12-14. Ka lebaka la ’momori oo le ho se tšepahale hoo, Davida o ile a tlameha ho baleha Jerusalema. (2 Samuele 15:13, 14) Seo e tlameha ebe se ile sa mo nyahamisa hakaakang!
Ho ntse ho le joalo, ha aa ka a lumella maikutlo a loantšanang le mesarelo ea hae ho fokolisa tšepo le kholiseho ea hae ho Jehova. O ile a rapela Jehova hore a ferekanye merero ea ba etsang ’momori. (2 Samuele 15:30, 31) Hape rea hlokomela hore Davida ha aa ka a ikemela feela a sa etse letho a letetse hore Jehova a etse mosebetsi oohle. Hang ha monyetla o itlhahisa, o ile a etsa sohle se matleng a hae ho thibela ’momori khahlanong le eena. O ile a romela e mong oa baeletsi ba hae, Hushai, ho khutlela Jerusalema a ikhakantse eka o kenella ’momoring, le hoja, ha e le hantle, a ne a tsamaela ho ea o senya. (2 Samuele 15:32-34) Ka tšehetso ea Jehova, leano leo le ile la sebetsa. Hushai o ile a tšoarella Absalome nako e telele ho lekana hore Davida a boele a itokise le ho itlhophisa bakeng sa ho itšireletsa.—2 Samuele 17:14.
Bophelong bohle ba hae e tlameha ebe Davida o ile a ananela hakaakang tlhokomelo e sireletsehileng ea Jehova hammoho le mamello le boikemisetso ba hae ba ho tšoarela! (Pesaleme 34:18, 19; 51:17) Ke ka lebaka la liphihlelo tsena Davida a khothaletsang rōna ba phelang linakong tsa rōna tsa tsieleho ho retelehela ho Jehova bakeng sa thuso, ‘le ho lahlela matšoenyeho a rōna ho Jehova.’—Bapisa le 1 Petrose 5:6, 7.
Ho Haha le ho Boloka Kamano e Matla le Jehova, ea ho mo Tšepa
Ke joang re ka fumanang mofuta oa kamano eo Davida a ileng a ba le eona le Jehova, kamano e ileng ea mo boloka nakong ea teko le matšoenyehong a maholo? Re haha kamano e joalo ka ho ba liithuti tse mafolo-folo tsa Lentsoe la Molimo, Bibele. Re lumella ho lauoa ke melao ea hae, melao-motheo le botho ba hae. (Pesaleme 19:7-11) Ha re thuisa ka Lentsoe la Molimo, re atamela haufi le eena haholoanyane ’me re ithuta ho mo tšepa ka ho feletseng. (Pesaleme 143:1-5) Re tebisa le ho matlafatsa kamano eo ka ho tloaelana hammoho le barapeli-’moho bakeng sa ho lauoa ka ho tsoelang pele ke Jehova. (Pesaleme 122:1-4) Re matlafatsa kamano ea rōna le Jehova ka ho etsa thapelo e tiileng.—Pesaleme 55:1.
Ke ’nete hore Davida, joaloka rōna, o ile a ’na a ba le boikutlo ba ho nyahama nakong eo kamano ea hae le Jehova e neng e se matla joalokaha e ne e lokela. Khatello e ka etsa hore re ‘hlanye.’ (Moeklesia 7:7) Empa Jehova o bona se etsahalang, ’me o tseba le se ka lipelong tsa rōna. (Moeklesia 4:1; 5:8) Re lokela ho sebetsa ka thata ho boloka kamano ea rōna le Jehova e le matla. Kahoo, ho sa tsotellehe meroalo eo re tlamehang ho e jara, re ka itšetleha ka Jehova bakeng sa ho re imolla kapa ho re fa matla a ho sebetsana ka katleho le maemo a rōna. (Bafilippi 4:6, 7, 13) Ke taba ea hore re lule haufi le Jehova. Ha Davida a ne a etsa sena, o ile a sireletseha ka ho feletseng.
Kahoo, ho sa tsotellehe hore na maemo a hao ke afe, Davida o re kamehla lahlela meroalo ea hao ho Jehova. Joale re tla latsoa ’nete ea tšepiso: “O tla u tšehetsa; a ke ke a lumela hore ea lokileng a ’ne a sisinngoe.”—Pesaleme 55:22.