Lentsoe la Jehova Lea Phela
Lintlha-khōlō Tsa Buka ea Bobeli ea Lipesaleme
JOALOKA bahlanka ba Jehova, re lebeletse ho thulana le liteko. Moapostola Pauluse o ile a ngola a re: “Bohle ba lakatsang ho phela ka boinehelo ba bomolimo kamanong le Kreste Jesu le bona ba tla hlorisoa.” (2 Timothea 3:12) Ke eng e tla re thusa ho mamella liteko le mahloriso, ’me ka tsela eo re pake hore re tšepahala ho Molimo?
Likarolong tse hlano tsa lipesaleme, karolo ena ea bobeli ke eona e re fang thuso eo. Pesalemeng ea 42 ho ea ho ea 72 re bontšoa hore haeba re batla ho atleha ho mamella liteko, re lokela ho tšepa Jehova ka botlalo ’me re ithute ho mo letela hore a re lopolle. Eo ke thuto ea bohlokoa hakaakang ho rōna! Joaloka likarolo tse ling tsa Lentsoe la Molimo, ruri molaetsa oa Buka ea Bobeli ea Lipesaleme ‘oa phela ’me o fana ka matla’ esita le kajeno.—Baheberu 4:12.
JEHOVA “KE SETŠABELO LE MATLA A RŌNA”
Molevi ea itseng o ne a le kholehong. A utloisitsoe bohloko ke hore ebe o ne a ke ke a ea sehalalelong sa Jehova ho ea rapela, o ile a itšelisa ka ho re: “Uena moea oa ka, ke hobane’ng ha u feletsoe ke tšepo, ke hobane’ng ha u le morusu ka hare ho ’na? Letela Molimo.” (Pesaleme ea 42:5, 11; 43:5) Temana ena e hlahang ka makhetlo a mangata e kopanya lirapa tse tharo tsa Pesaleme ea 42 le ea 43 hore e be thoko e le ’ngoe. Pesaleme ea 44 ke kōpo e tiileng e etsetsoang Juda—e leng sechaba se neng se le tlokotsing, mohlomong e le ka lebaka la tšokelo ea ho hlaseloa ke Assyria mehleng ea Morena Ezekiase.
Pesaleme ea 45, e leng pina e buang ka lechato la morena, e profeta ka Morena oa Bomesia. Lipesaleme tse tharo tse latelang li hlalosa hore Jehova ke “setšabelo le matla,” “Morena e moholo oa lefatše lohle,” ebile ke “sebaka se phahameng sa tšireletso.” (Pesaleme ea 46:1; 47:2; 48:3) Ka sebele Pesaleme ea 49 e hlalosa ka tsela e tsotehang hore ha ho motho “eo ka mokhoa leha e le ofe a ka lopollang esita le mor’abo”! (Pesaleme ea 49:7) Lipesaleme tse robeli tse qalang tsa karolo ea bobeli li ngotsoe ke bara ba Kora. Ea borobong, e leng Pesaleme ea 50, e qapiloe ke Asafe.
Lipotso Tsa Mangolo Lia Arajoa:
44:19—‘Sebaka sa liphokojoe’ e ne e le eng? Mohlomong mopesaleme o ne a nahanne ka lebala la ntoa, moo ba bolailoeng e bang lijo tsa liphokojoe.
45:13, 14a—“Morali oa morena” ea “tla tlisoa ho morena” ke mang? Ke morali oa “Morena oa bosafeleng,” Jehova Molimo. (Tšenolo 15:3) O emela phutheho e tlotlisitsoeng ea Bakreste ba 144 000, bao Jehova a ba amohelang e le bana ba hae ka ho ba tlotsa ka moea oa hae. (Baroma 8:16) “Morali” enoa oa Jehova, ea ‘lokisitsoeng joaloka monyaluoa ea khabileng bakeng sa monna oa hae,’ o tla tlisoa ho monyali—e leng Morena oa Bomesia.—Tšenolo 21:2.
45:14b, 15—“Baroetsana” ba emela bo-mang? Ke “bongata bo boholo” ba barapeli ba ’nete, ba ikopanyang le masala a tlotsitsoeng ba bile ba a tšehetsa. Kaha ‘ba tsoa matšoenyehong a maholo’ ba phela, ba tla be ba le lefatšeng ha lenyalo la Morena oa Bomesia le phetheloa leholimong. (Tšenolo 7:9, 13, 14) Ba tla tlala “thabo le nyakallo” ka lebaka la ketsahalo eo.
45:16—Ke ka tsela efe ho tla ba le bara sebakeng sa baholo-holo ba morena? Ha Jesu a ne a hlaha lefatšeng, o ne a e-na le baholo-holo ba lefatšeng. E tla ba bara ba hae ha a ba tsosa bafung Pusong ea hae ea Lilemo Tse Sekete. Ba bang ba bona ba tla akarelletsoa har’a ba tla behoa hore e be “likhosana lefatšeng lohle.”
50:2—Ke hobane’ng ha ho ne ho thoe Jerusalema ke “e phethahetseng ka botle”? E ne e se ka lebaka la ponahalo ea motse oo. Ho e-na le hoo, e ne e le hobane Jehova o ne a sebelisa Jerusalema a bile a e file khanya ka ho etsa hore e be sebaka seo tempele ea hae e leng ho sona le hore e be motse-moholo oa marena a hae a tlotsitsoeng.
Seo re Ithutang Sona:
42:1-3. Joalokaha khama e tšehali e sebakeng se omeletseng e lakatsa metsi, Molevi eo o ne a lakatsa ho ba moo ho rapeloang Jehova. Monna eo o ne a utloile bohloko haholo kahobane a ne a sa khone ho rapela Jehova sehalalelong sa Hae hoo a ileng a felloa ke takatso ea lijo ’me ‘meokho ea hae ea fetoha lijo tsa hae bosiu le motšehare.’ Na ha rea lokela ho hlaolela kananelo e tebileng ea ho rapela Jehova re e-na le balumeli-’moho?
42:4, 5, 11; 43:3-5. Haeba ka lebaka le itseng le ke keng la qojoa, re sa khone ho kopanela le phutheho ea Bokreste ka nakoana, ho hopola thabo eo re bileng le eona nakong e fetileng ha re ne re e-na le balumeli-’moho le rōna ho ka re matlafatsa. Le hoja qalong sena se ka totisa bohloko ba ho jeoa ke bolutu, se tla boetse se re hopotsa hore Molimo ke setšabelo sa rōna ’me re lokela ho mo letela hore a re thuse.
46:1-3. Ho sa tsotellehe hore na re hlaheloa ke tlokotsi efe, re lokela ho ba le tšepo e sa thekeseleng ea hore “Molimo ke setšabelo le matla a rōna.”
50:16-19. Motho leha e le mang ea buang leshano le ea etsang lintho tse mpe ha a na tokelo ea ho emela Molimo.
50:20. Ho e-na le ho chesehela ho bua ka mefokolo ea ba bang, re lokela ho e hlokomoloha.—Bakolose 3:13.
“MOEA OA KA, U LETELE MOLIMO KA KHUTSO”
Lipesaleme tsena li qala ka thapelo ea Davida e tlohang botebong ba pelo ka mor’a hore a etse sebe le Bathe-sheba. Pesalemeng ea 52 ho ea ho ea 57 ho bontšoa hore Jehova o tla lopolla ba lahlelang meroalo ea bona ho eena ’me ba mo letela bakeng sa poloko. Joalokaha ho hlalositsoe Pesalemeng ea 58-64, Davida o ile a etsa Jehova setšabelo sa hae litlokotsing tsohle tsa hae. Oa bina: “Moea oa ka, u letele Molimo ka khutso, hobane tšepo ea ka e tsoa ho eena.”—Pesaleme ea 62:5.
Ho ba le kamano e haufi le Molopolli oa rōna ho lokela ho re susumetsa hore re ‘binele khanya ea lebitso la hae.’ (Pesaleme ea 66:2) Pesalemeng ea 65, Jehova o rorisoa ka hore ke mohlokomeli ea seatla se bulehileng, Pesalemeng ea 67 le ea 68 teng o rorisoa ka hore ke Molimo oa liketso tse pholosang, ’me o rorisoa ka hore ke Mopholosi Pesalemeng ea 70 le ea 71.
Lipotso Tsa Mangolo Lia Arajoa:
51:12—Davida o ne a kōpa hore a tšehetsoe ka “moea o ratang” oa mang? Moea ona hase boikemisetso ba Molimo ba ho thusa Davida ebile hase moea o halalelang oa Jehova, empa ke moea oa Davida ka boeena—tšekamelo ea kelello ea hae. O kōpa hore Molimo a kenye ka ho eena takatso ea ho etsa se nepahetseng.
53:1—Motho ea latolang hore Molimo o teng ‘ha a na kelello’ ka tsela efe? Ho hloka kelello ho boleloang mona hase hore motho eo ke sethoto. E le ho bontša hore motho ea joalo ha a na kelello boitšoarong, re ka utloisisa sena ka ho hlahloba tšenyeho ea boitšoaro e hlalositsoeng Pesalemeng ea 53:1-4.
58:3-5—Ke ka tsela efe ba khopo ba leng joaloka noha? Mashano ao ba a buang ka ba bang a tšoana le mahloko a noha. Ba senya botumo bo botle ba batho ba bang. “Joaloka masumu ea ithibang litsebe,” ba khopo ha ba mamele tataiso kapa khalemelo.
58:7—Ba khopo ba “qhibiliha joalokaha eka ke ka metsing a ikelang ka tsela ea ’ona” joang? E ka ’na eaba Davida o ne a nahanne ka metsi a liphula tsa melapo e phoroselang ea Naha e Tšepisitsoeng. Le hoja sekhohola se ne se tla eketsa metsi phuleng e joalo, metsi ao a phalla ka potlako ebe aa nyamela. Davida o ne a rapella hore ba khopo ba nyamele ka potlako.
68:13—‘Mapheo a leeba a ne a koahetsoe joang ka silevera le masiba a lona a koahetsoe joang ka khauta e botala bo bosehla’? Maeba a mang a maputsoa a na le masiba a ’mala o khanyang o hlahisang ’mala oa mookoli. Ha a le khanyeng ea letsatsi, masiba a ’ona a ba le ’mala o phatsimang o kang mookoli. Mohlomong Davida o ne a tšoantša bahlabani ba Iseraele ba hlōtseng ntoeng le leeba le joalo—le fofang ka matla le le phatsimang. Joalokaha litsebi tse ling li bolela, tlhaloso eo e ka ’na ea tšoanela mohope o entsoeng ka bokhabane o hapiloeng ntoeng. Ho sa tsotellehe hore na boemo ke bofe, Davida o ne a bua ka mokhoa o sa tobang ka tsela eo Jehova a neng a entse hore batho ba hae ba hlōle lira tsa bona.
68:18—“Limpho tseo e leng banna” e ne e le bo-mang? Bana e ne e le banna ba tsoang har’a ba neng ba hapiloe nakong eo ho neng ho hlōloa Naha e Tšepisitsoeng. Hamorao banna bao ba ile ba abeloa hore ba thuse Balevi mosebetsing oa bona.—Esdrase 8:20.
68:30—Kōpo e reng “khalemela ka matla sebata sa mahlaka” e bolela’ng? Ha Davida a tšoantša lira tsa batho ba Jehova le libata, o ne a kōpa Molimo hore a li khalemele, kapa a laole matla a tsona a ho hlahisa kotsi.
69:23—Ho boleloa eng ka ho ‘tetemisa matheka a lira’? Mesifa ea letheka e bohlokoa haholo bakeng sa ho etsa mesebetsi e boima, e kang ho nka le ho jara lintho tse boima. Matheka a sa tieang a bontša ho felloa ke matla. Davida o ne a rapella hore lira tsa hae li felloe ke matla.
Seo re Ithutang Sona:
51:1-4, 17. Ha ho hlokahale hore ho etsa sebe ho re arohanye le Jehova Molimo. Haeba re baka, re ka kholiseha hore o tla re hauhela.
51:5, 7-10. Haeba re entse sebe, re ka kōpa Jehova hore a re tšoarele kaha re futsitse boetsalibe. Hape re lokela ho rapella hore a re hloekise, a re tsosolose, a re thuse ho tlosa mekhoa ea boetsalibe lipelong tsa rōna ’me a re fe moea o tiileng.
51:18. Libe tsa Davida li ile tsa beha kotsing boiketlo ba sechaba kaofela. Kahoo o ile a rapella hore Molimo a amohele Sione. Ha re etsa sebe se tebileng, hangata se tlisetsa lebitso la Jehova le phutheho thohako. Re lokela ho rapela Molimo hore a lokise tšenyo leha e le efe eo e ka ’nang eaba re e bakile.
52:8. Re ka ba “joaloka sefate sa mohloaare se behang haholo ka tlung ea Molimo”—re be haufi le Jehova ’me re behe litholoana tšebeletsong ea hae—ka ho mo mamela le ka ho amohela taeo ea hae ka ho rata.—Baheberu 12:5, 6.
55:4, 5, 12-14, 16-18. Davida o ile a utloa bohloko haholo ka lebaka la morero o bolotsana oa mor’a hae Absalome le ka lebaka la ho ekoa ke Akitofele, moeletsi eo a neng a mo tšepa. Leha ho le joalo, seo ha sea ka sa fokolisa tšepo ea Davida ho Jehova. Ha rea lokela ho lumella hore ho utloa bohloko ho fokolise kamano ea rōna le Molimo.
55:22. Re ka lahlela moroalo oa rōna ho Jehova joang? Re etsa sena (1) ka ho rapella taba eo re amehileng ka eona, (2) ka ho tšepa hore Lentsoe la hae le mokhatlo oa hae o hlophisitsoeng li re tataise ’me li re tšehetse le (3) ka ho etsa sohle seo re ka se khonang ka boemo boo.—Liproverbia 3:5, 6; 11:14; 15:22; Bafilipi 4:6, 7.
56:8. Jehova ha a hlokomele feela boemo boo re leng ho bona, empa o hlokomela le tsela eo bo re amang ka eona maikutlong.
62:11. Ha ho hlokahale hore Molimo a itšetlehe ka mohloli leha e le ofe oa matla a sa tsoeng ho eena. Ke eena mohloli oa matla. ‘Matla ke a hae.’
63:3. ‘Mosa o lerato oa Molimo o molemo ho feta bophelo’ hobane ntle ho oona, bophelo ha bo na morero. Re bontša bohlale ha re hlaolela ho ba le botsoalle le Jehova.
63:6. Bosiu—ha ho khutsitse ebile ho se na litšitiso tsa letho—e ka ba nako e ntle ea ho thuisa.
64:2-4. Lesebo le kotsi le ka senya botumo ba motho ea se nang molato. Ha rea lokela ho mamela lesebo le joalo ebile ha rea lokela ho le jala.
69:4. E le hore re boloke khotso, ka linako tse ling e ka ’na ea e-ba bohlale hore re ‘khutlise’ ka ho kōpa tšoarelo, esita le haeba re sa kholiseha hore ke rōna ba molato.
70:1-5. Jehova oa utloa ha re kōpa thuso ho eena ka potlako. (1 Bathesalonika 5:17; Jakobo 1:13; 2 Petrose 2:9) Molimo a ka ’na a lumella hore teko e ’ne e tsoele pele, empa o tla re fa bohlale ba ho sebetsana le boemo boo ’me a re fe matla a ho bo mamella. A ke ke a re tlohela hore re lekoe ho feta seo re ka se jarang.—1 Bakorinthe 10:13; Baheberu 10:36; Jakobo 1:5-8.
71:5, 17. Davida o ile a ba sebete le ho ba matla ka hore a tšepe Jehova bocheng ba hae—esita le pele a tobana le Goliathe, senatla sa Mofilista. (1 Samuele 17:34-37) Bacha ba lokela ho tšepa Jehova linthong tsohle tseo ba li etsang.
“Khanya ea Hae e Tlale Lefatšeng Lohle”
Pina ea ho qetela karolong ea bobeli ea lipesaleme, e leng Pesaleme ea 72, e bua ka puso ea Solomone, e tšoantšetsang maemo a tla ba teng pusong ea Mesia. Ho hlalosoa mahlohonolo a babatsehang hakaakang karolong eo—khotso e ngata, ho fela ha khatello le pefo, nala ea lijo-thollo lefatšeng! Na re tla ba har’a ba tlang ho thabela lintho tsee hammoho le mahlohonolo a mang a ’Muso? Re ka ba har’a bona haeba, joaloka mopesaleme, re khotsofalla ho letela Jehova, re mo etsa setšabelo le matla a rōna.
“Lithapelo tsa Davida . . . li fihlile sephethong” ka mantsoe ana: “Ho bokoe Jehova Molimo, Molimo oa Iseraele, ea etsang mesebetsi e hlollang a le mong. Ho bokoe lebitso la hae le khanyang ho isa nakong e sa lekanyetsoang, khanya ea hae e tlale lefatšeng lohle. Amen le Amen.” (Pesaleme ea 72:18-20) Ka ho tšoanang, a re bokeng Jehova ka lipelo tsohle tsa rōna ’me re tlotlise lebitso la hae le khanyang.
[Setšoantšo se leqepheng la 9]
Na ua tseba hore na “morali oa morena” o tšoantšetsa mang?
[Setšoantšo se leqepheng la 10, 11]
Jerusalema e bitsoa “e phethahetseng ka botle.” Na u tseba lebaka?