Na U Tla Tsamaea le Molimo?
“U inyenyefatse ha u tsamaea le Molimo oa hao.”—MIKEA 6:8.
1, 2. Tsela eo Jehova a ikutloang ka eona ka rōna e ka bapisoa joang le tsela eo motsoali a ikutloang ka eona ha a ruta ngoana ho tsamaea?
NGOANA e monyenyane, ea emeng a ntse a thekesela, o nanabela matsoho a otlolohileng a motsoali hore a itšoareletse, ebe o qala ho tlosa leoto. Eo e ka ’na ea bonahala e le ntho e nyenyane, empa ke ntho e khōlō ho ’mè le ntate, ke nako e fanang ka tšepo bakeng sa bokamoso. Batsoali ba lebella ka thahasello e khōlō hore ba tsamaee le ngoana oa bona, ba mo tšoere ka matsoho likhoeling tse tlang esita le lilemong tse tlang. Ba tšepa hore ba tla tataisa ngoana ka litsela tse ngata le ho mo tšehetsa ho isa hōle nakong e tlang.
2 Jehova Molimo o ikutloa ka tsela e tšoanang ka bana ba hae ba lefatšeng. Mabapi le batho ba hae ba Iseraele kapa Efraime, o kile a re: “Ka ruta Baefraime ho tsamaea, ka ba sika ka matsoho . . . Ke ’nile ka ba hula ka liropo tsa motho oa lefatše, ka lithapo tsa lerato.” (Hosea 11:3, 4) Mona Jehova o itlhalosa e le motsoali ea lerato eo ka mamello a rutang ngoana ho tsamaea, mohlomong A mo sika ka matsoho ha a oela. Jehova, e leng Motsoali ea phahameng ka ho fetisisa, o labalabela ho re ruta ho tsamaea. Hape o thabela ho tsamaea le rōna ha re ntse re hatela pele. Joalokaha temana ea rōna ea sehlooho e bontša, re ka khona ho tsamaea le Molimo! (Mikea 6:8) Empa ho tsamaea le Molimo ho bolela’ng? Ke hobane’ng ha re lokela ho etsa joalo? Seo se ka khoneha joang? Hona, ke litlhohonolofatso life tse tlisoang ke ho tsamaea le Molimo? A re hlahlobeng lipotso tsena tse ’nè ka bonngoe.
Ho Tsamaea le Molimo ho Bolela’ng?
3, 4. (a) Ke eng e babatsehang ka papiso ea ho tsamaea le Molimo? (b) Ho tsamaea le Molimo ho bolela’ng?
3 Ho hlakile hore motho oa nama le mali a ke ke a tsamaea ka tsela ea sebele le Jehova, eo e leng motho oa moea. (Exoda 33:20; Johanne 4:24) Kahoo ha Bibele e bua ka hore batho ba tsamaea le Molimo, e bua ka tsela ea tšoantšetso. E hlalosa seo ka tsela e babatsehang, e sebetsang ho batho ba lichaba tsohle, ho sa tsotellehe hore na ke ba setso sefe, kapa hore na ba phela nakong efe. Etsoe ke mang ea ka sitoang ho utloisisa khopolo ea batho ba babeli ba tsamaeang ’moho? Papiso ena e bontša mofuthu le ho atamelana haufi, na ha ho joalo? Maikutlo a joalo a re thusa ho utloisisa hore na ho tsamaea le Molimo ho bolela’ng. Leha ho le joalo, e-re re tobe taba.
4 Hopola banna ba tšepahalang, e leng Enoke le Noe. Ke hobane’ng ha ho thoe ba ne ba tsamaea le Molimo? (Genese 5:24; 6:9) Ka Bibeleng, poleloana e reng “ho tsamaea” hangata e bolela ho etsa lintho ka tsela e itseng. Enoke le Noe ba ile ba khetha tsela ea bophelo e neng e lumellana le thato ea Jehova Molimo. Ho fapana le batho ba neng ba phela lefatšeng le ba potolohileng, ba ile ba sheba Jehova hore a ba tataise ’me ba latela tataiso ea hae. Ba ne ba mo tšepa. Na see se bolela hore Jehova ke eena ea neng a ba etsetsa liqeto? Che. Jehova o file batho bolokolohi ba ho ikhethela, ’me o batla hore re sebelise mpho eo hammoho le ‘matla a rōna a ho nahana.’ (Baroma 12:1) Leha ho le joalo, ha re etsa liqeto, ka boikokobetso re lumella matla a rōna a ho nahana hore a tataisoe ke monahano oa Jehova o phahameng ka tsela e ke keng ea lekanngoa. (Liproverbia 3:5, 6; Esaia 55:8, 9) Ha e le hantle, ha re ntse re tsamaea tseleng ea bophelo, re kena leetong leo re tsamaea haufi-ufi le Jehova.
5. Ke hobane’ng ha Jesu a ne a bua ka ho eketsa setsoe nakong ea bophelo ba motho?
5 Hangata Bibele e tšoantša bophelo le leeto kapa ho tsamaea. Maemong a mang, papiso eo e totobetse, empa maemong a mang e boleloa ka tsela e sa tobang. Ka mohlala, Jesu o ile a re: “Ke mang ho lōna eo ka ho tšoenyeha a ka eketsang nako ea bophelo ba hae ka setsoe se le seng?” (Matheu 6:27) U ka ’na ua makatsoa ke mantsoe a mang a sebelisitsoeng moo. Ke hobane’ng ha Jesu a ne a bua ka ho eketsa “setsoe se le seng,” e leng tekanyo ea bolelele ba sebaka, empa a ne a bua ka “bophelo” ba motho, bo lekanngoang ka nako?a Ho totobetse hore Jesu o ne a tšoantša bophelo le leeto. Ha e le hantle, o ne a ruta hore ho tšoenyeha ho ke ke ha u thusa ho eketsa esita le mohato o monyenyane feela leetong la hao la bophelo. Leha ho le joalo, na re lokela ho etsa qeto ea hore ha ho letho leo re ka le etsang mabapi le hore na re tsamaea le Molimo halelele hakae? Le hanyenyane! Sena se re tlisa potsong ea rōna ea bobeli, Ke hobane’ng ha re lokela ho tsamaea le Molimo?
Ke Hobane’ng ha re Lokela ho Tsamaea le Molimo?
6, 7. Ke eng eo batho ba sa phethahalang ba e hlokang ka hohle-hohle, hona ke hobane’ng ha re lokela ho retelehela ho Jehova hore re e fumane?
6 Lebaka le leng leo ka lona re lokelang ho tsamaea le Jehova Molimo le hlalositsoe ho Jeremia 10:23: “Ke tseba hantle, Jehova, hore tsela ea motho oa lefatše ha e matleng a hae. Ha ho matleng a motho ea tsamaeang hore a tsamaise mehato ea hae.” Kahoo, rōna batho ha re na bokhoni ebile ha re na tokelo ea hore re itsamaise bophelong. Re hloka tataiso ka hohle-hohle. Ba tsitlellang ho ikela ka tsela ea bona, ba sa itšetlehe ka Molimo, ba etsa phoso e tšoanang le eo Adama le Eva ba ileng ba e etsa. Banyalani bao ba pele ba ile ba inkela tokelo ea ho iketsetsa qeto ea hore na se setle le se sebe ke sefe. (Genese 3:1-6) “Ha ho matleng” a rōna ho inkela tokelo eo.
7 Na ha u utloe ho hlokahala hore u tataisoe leetong lee la bophelo? Letsatsi le letsatsi re talimana le ho etsa liqeto tse khōlō le tse nyenyane. Tse ling tsa tsona li boima ebile li ka ama bokamoso ba rōna—hammoho le ba baratuoa ba rōna. Leha ho le joalo, ak’u nahane feela haeba motho e mong e moholo haholo ho rōna le ea bohlale ho re feta a ne a ka thabela ho re tataisa ka lerato ha re etsa liqeto tseo! Ka masoabi, kajeno batho ba bangata ba khetha ho tšepa kahlolo ea bona le ho tataisa mehato ea bona. Ba hlokomoloha ’nete e boletsoeng ho Liproverbia 28:26: “Ea tšepang pelo ea hae o hloka kelello, empa ea tsamaeang ka bohlale ke eena ea tla phonyoha.” Jehova o batla hore re pheme litlokotsi tse bakoang ke ho tšepa pelo ea motho e bolotsana. (Jeremia 17:9) O batla hore re tsamaee ka bohlale, re mo tšepe joaloka Motataisi oa rōna le Morupeli oa rōna. Ha re etsa joalo, re tla tsamaea re sireletsehile, re khotsofetse ebile re thabile bophelong.
8. Ka tloaelo sebe le ho se phethahale li isa batho hokae, empa Jehova eena o re batlela eng?
8 Lebaka le leng leo ka lona re lokelang ho tsamaea le Molimo le amana le hore na re batla ho tsamaea halelele hakae. Bibele e bolela ’nete e bohloko. Ho isa bohōleng bo itseng, batho bohle ba sa phethahalang ba tsamaea ba habile sebakeng se tšoanang. Ha e hlalosa mathata a tsamaeang le botsofali, Moeklesia 12:5 e re: “Motho o ea ntlong ea hae e tšoarellang halelele ’me ba bokollang ba tsamaile ho pota seterata.” ‘Ntlo ee e tšoarellang halelele’ ke’ng? Ke lebitla, e leng moo ka tloaelo sebe le ho se phethahale li re isang teng. (Baroma 6:23) Leha ho le joalo, Jehova ha a batle hore re tsamaee leeto le lekhutšoanyane feela, le tletseng likhathatso la ho tloha ha re tsoaloa ho fihlela re ea lebitleng. (Jobo 14:1) Ke ka ho tsamaea le Molimo feela re ka bang le tšepo ea ho tsamaea halelele kamoo a neng a re reretse kateng—e leng ka ho sa feleng. Na seo hase sona seo u se batlang? Kahoo, ho hlakile hore u lokela ho tsamaea le Ntate oa hao.
Re ka Tsamaea le Molimo Joang?
9. Ke hobane’ng ha Jehova a ne a ipatela batho ba hae ka linako tse ling, empa o ile a ba kholisa ka eng ho latela Esaia 30:20?
9 Puisanong ena ea rōna, re lokela ho ela hloko ka ho fetisisa potso ea boraro. E re, Re ka tsamaea le Molimo joang? Re fumana karabo ho Esaia 30:20, 21: “Morupeli oa lōna e Moholo ha a sa tla hlola a ipata, ’me mahlo a lōna a tla bona Morupeli oa lōna e Moholo. Litsebe tsa lōna li tla utloa lentsoe ka mor’a lōna le reng: ‘Tsela ke eona ena. Tsamaeang ho eona,’ esere la ea ka ho le letona kapa la ea ka ho le letšehali.” Litemaneng tsena tse khothatsang, e ka ’na eaba mantsoe a Jehova a tlalehiloeng temaneng ea 20 a ile a hopotsa batho ba hae hore ha ba mo fetohetse, ha e le hantle o ne a ipatetse bona. (Esaia 1:15; 59:2) Leha ho le joalo, mona ho boleloa hore Jehova ha aa ipata, empa o eme pooaneng ka pel’a batho ba hae ba tšepahalang. Mohlomong re ka nahana ka morupeli ea emeng ka pel’a liithuti tsa hae, a li bontša seo a batlang hore li ithute sona.
10. Ke ka kutloisiso efe u ka ‘utloang lentsoe ka mor’a hao’ le tsoang ho Morupeli oa hao e Moholo?
10 Temaneng ea 21, ho sebelisoa papiso e fapaneng. Jehova o hlalosoa a tsamaea ka mor’a batho ba hae, a ba laela hore na ba tsamaee tseleng efe e nepahetseng. Litsebi tsa Bibele li hlalositse hore e ka ’na eaba polelo ena e thehiloe mokhoeng oo ka linako tse ling molisa a salang linku tsa hae morao ka oona, a hoeletsa hore a li tataise le ho li thiba hore li se ke tsa kheloha. Papiso ee e sebetsa joang ho rōna? Ha e le hantle, ha re leba Lentsoeng la Molimo e le hore re fumane tataiso, re bala mantsoe a ileng a tlalehoa lilemong tse likete tse fetileng. Kaha a ile a tlalehoa khale koana, ho joalokaha eka a hlaha ka mor’a rōna. Empa a ntse a sebetsa le kajeno, feela joalokaha a ne a sebetsa mohla a neng a ngoloa. Keletso ea Bibele e ka re tataisa liqetong tseo re li etsang letsatsi le letsatsi, ’me e ka re thusa ho rala tsela ea rōna ea bophelo ea lilemong tse tlang. (Pesaleme ea 119:105) Haeba re batla keletso e joalo ka tieo ebile re e sebelisa, joale Jehova ke Motataisi oa rōna. Re tsamaea le Molimo.
11. Ho ea ka Jeremia 6:16, Jehova o ile a etsetsa batho ba hae papiso efe e ipiletsang, empa ba ile ba etsa’ng?
11 Na ruri re lumella Lentsoe la Molimo hore le re tataise haufi-ufi joalo? Ho loketse hore ka linako tse ling re ke re nahane ka ho teba ’me re itlhahlobe ka botšepehi. Nahana ka temana ena e tla re thusa ho etsa joalo: “Sena ke seo Jehova a se boletseng: ‘Emang litseleng, ’me le bone, ’me le botse ka litsela tsa khale, moo, joale, ho nang le tsela e ntle; le tsamaee ho eona, ’me le fumanele meea ea lōna boiketlo.’” (Jeremia 6:16) Mantsoe ana a ka ’na a re hopotsa motsamai ea emang hanyenyane mateanong a litsela a botsa hore na a nke tsela efe. Ka kutloisiso ea moea, batho ba Jehova ba neng ba mo fetohetse ba Iseraele ba ne ba lokela ho etsa ntho e tšoanang. Ba ne ba lokela ho khutlela morao ba fumane “litsela tsa khale.” “Tsela e ntle” e ne e le tsela eo baholo-holo ba bona ba tšepahalang ba neng ba tsamaile ho eona, e leng tsela eo ka booatla sechaba se neng se e khelohile. Ka masoabi, ka manganga Iseraele e ile ea hana ho amohela khopotso ena e lerato e tsoang ho Jehova. Temana eona eo e tsoela pele ho re: “Empa ba ’na ba re: ‘Re ke ke ra tsamaea ho eona.’” Leha ho le joalo, mehleng ea kajeno batho ba Molimo ba nkile bohato bo fapaneng ha ba utloa keletso eo.
12, 13. (a) Balateli ba Jesu ba tlotsitsoeng ba nkile bohato bofe ka keletso ea Jeremia 6:16? (b) Re ka ’na ra itlhahloba ka tsela efe mabapi le mokhoa oo re tsamaeang ka oona kajeno?
12 Ho tloha bofelong ba lekholo la bo19 la lilemo, balateli ba Kreste ba tlotsitsoeng ba ile ba sebelisa keletso ea Jeremia 6:16. E le sehlopha, ba eteletse pele ho khutlela ka pelo eohle ‘litseleng tsa khale.’ Ho fapana le Bokreste-’mōtoana ba bokoenehi, ba tšoareletse ka botšepehi ‘mohlaleng oa mantsoe a phelisang hantle’ o ileng oa thehoa ke Jesu Kreste ’me oa tšehetsoa ke balateli ba hae ba tšepahalang lekholong la pele la lilemo C.E. (2 Timothea 1:13) Ho fihlela kajeno, batlotsuoa baa thusana esita le ho thusa metsoalle ea bona ea “linku tse ling” hore ba phehelle tsela ea bophelo e phelisang hantle, e thabisang eo Bokreste-’mōtoana bo e lahlileng.—Johanne 10:16.
13 Ka ho lokisetsa lijo tsa moea ka nako e tšoanetseng, sehlopha sa lekhoba le tšepahalang se thusitse ba limilione ho fumana “litsela tsa khale” le ho tsamaea le Molimo. (Matheu 24:45-47) Na u e mong oa bao ba limilione? Haeba ho joalo, u ka etsa’ng ho qoba hore u se ke ua hoholeha, ’me ua latela tsela ea hao? Ke bohlale hore nako le nako u ke u eme ’me u hlahlobe kamoo u tsamaeang kateng bophelong. Haeba ka botšepehi u bala Bibele le lingoliloeng tse thehiloeng Bibeleng ’me u e-ba teng mananeong a taeo a lokiselitsoeng ke batlotsuoa kajeno, joale u koetlisetsoa hore u tsamaee le Molimo. Haeba ka boikokobetso u sebelisa keletso eo u e fuoang, ruri u tsamaea le Molimo, u latela “litsela tsa khale.”
Tsamaea Joalokaha Eka U “Bona Ea sa Bonahaleng”
14. Haeba Jehova e le oa sebele ho rōna, seo se tla bonahala joang ka liqeto tseo re li etsang?
14 Hore re tsamaee le Jehova, e lokela ho ba oa sebele ho rōna. Hopola hore Jehova o ile a tiisetsa Baiseraele ba tšepahalang ba boholo-holo hore o ne a sa ipatela bona. Ka ho tšoanang, kajeno o itšenola ho batho ba hae e le Morupeli e Moholo. Na Jehova ke oa sebele hakaalo ho uena, joalokaha eka o eme ka pel’a hao hore a u rupele? Re lokela ho ba le tumelo ea mofuta oo hore re tsamaee le Molimo. Moshe o ne a e-na le tumelo e joalo, “kaha o ile a tsoela pele a tiile joalokaha eka o bona Ea sa bonahaleng.” (Baheberu 11:27) Haeba Jehova e le oa sebele ho rōna, joale re tla nahana hore na o ikutloa joang ha re etsa liqeto. Ka mohlala, re ke ke ra nahana le hanyenyane feela ho etsa ntho e fosahetseng ebe joale re leka ho patela baholo ba Bakreste libe tsa rōna kapa ho li patela litho tsa malapa a rōna. Ho e-na le hoo, re leka ho tsamaea le Molimo esita leha ho se na motho ea re bonang. Joaloka Morena Davida oa mehleng ea khale, re etsa qeto e tiileng ka ho re: “Ke tla tsamaea botšepehing ba pelo ea ka ka har’a ntlo ea ka.”—Pesaleme ea 101:2.
15. Ho kopanela le bara le barali babo rōna ba moea ho tla re thusa joang ho bona hore Jehova ke oa sebele?
15 Jehova oa utloisisa hore re libōpuoa tse sa phethahalang, tsa nama, le hore ka linako tse ling re ka ’na ra thatafalloa ke ho lumela ntho eo re sa e boneng. (Pesaleme ea 103:14) O etsa ho hongata hore a re thuse ho hlōla bofokoli boo. Ka mohlala, o bokeletse batho ba tsoang lichabeng tsohle tsa lefatše hore e be “batho bakeng sa lebitso la hae.” (Liketso 15:14) Ha re ntse re sebeletsa hammoho re kopane, rea matlafatsana. Ha re utloa kamoo Jehova a thusitseng mora kapa morali e mong oabo rōna moeeng hore a hlōle bofokoli bo itseng kapa a fete tekong e itseng e boima, seo se etsa hore Molimo oa rōna e be oa sebele le ho feta ho rōna.—1 Petrose 5:9.
16. Ho ithuta ka Jesu ho tla re thusa joang hore re tsamaee le Molimo?
16 Ka holim’a tsohle, Jehova o re file mohlala oa Mora oa hae. Jesu o ile a re: “Ke ’na tsela le ’nete le bophelo. Ha ho ea tlang ho Ntate haese ka ’na.” (Johanne 14:6) Ho ithuta tsela ea Jesu ea bophelo ha a ne a le lefatšeng ke e ’ngoe ea litsela tse molemo ka ho fetisisa tsa ho etsa hore Jehova e be oa sebele haholoanyane ho rōna. Ntho e ’ngoe le e ’ngoe eo Jesu a ileng a e bua le ho e etsa e ne e bontša ka ho phethahetseng botho ba Ntate oa hae oa leholimo le litsela tsa hae. (Johanne 14:9) Ha re etsa liqeto, re lokela ho nahana ka hloko mabapi le hore na Jesu o ne a tla sebetsa litaba joang. Ha liqeto tsa rōna li bontša hore re nahanne taba ka hloko joalo le ho e rapella, joale re tla be re latela mehato ea Kreste. (1 Petrose 2:21) Ka lebaka leo, re tla be re tsamaea le Molimo.
Hoo ho Tla Tlisa Litlhohonolofatso Life?
17. Haeba re tsamaea tseleng ea Jehova, re tla fumanela meea ea rōna “boiketlo” bofe?
17 Ho tsamaea le Jehova Molimo ke ho phela ka tsela e khotsofatsang. Hopola seo Jehova a ileng a se tšepisa batho ba hae mabapi le ho batla “tsela e ntle.” O ile a re: “Le tsamaee ho eona, ’me le fumanele meea ea lōna boiketlo.” (Jeremia 6:16) “Boiketlo” boo bo bolela’ng? Na bo bolela bophelo ba boiketlo ba menyaka le mabothobotho? Che. Jehova o lokisetsa ho hong ho molemo le ho feta, ntho eo le batho ba ruileng ka ho fetisisa har’a moloko oa batho ba sa atiseng ho e fumana. Ho fumanela moea oa hao boiketlo ke ho fumana khotso ea kelello, nyakallo, khotsofalo le ho thaba moeeng. Boiketlo bo joalo bo bolela hore u ka kholiseha hore u khethile tsela e molemohali bophelong. Khotso e joalo ea kelello ke tlhohonolofatso e sa atiseng ho fumaneha lefatšeng lena le tletseng mathata!
18. Jehova o batla ho u tšollela tlhohonolofatso efe, hona u ikemiselitse ho etsa’ng?
18 Ho hlakile hore bophelo ka bobona ke tlhohonolofatso e khōlō. Esita le ho tsamaea hakhutšoanyane feela ha ho tšoane le ho se tsamaee ho hang. Leha ho le joalo, ha ho mohla Jehova a neng a rerile hore u tsamaee leeto le lekhutšoanyane feela la ho tloha sehlahlong sa bocha ho isa bohlokong ba botsofali. Ho e-na le hoo, Jehova o batla hore u fumane tlhohonolofatso e khōlō ka ho fetisisa. O batla hore u tsamaee le eena ka ho sa feleng! Sena se hlalosoa hantle ho Mikea 4:5: “Lichaba tsohle li tla tsamaea se seng le se seng ka lebitso la molimo oa sona; empa re tla tsamaea ka lebitso la Jehova Molimo oa rōna ho isa nakong e sa lekanyetsoang, esita le ka ho sa feleng.” Na u batla tlhohonolofatso eo? Na ha u rate ho phela “bophelo ba sebele” boo Jehova a u memelang bona? (1 Timothea 6:19) Ka hona, ikemisetse ka hohle-hohle ho tsamaea le Jehova kajeno, ka linako tsohle le ho isa ka ho sa feleng!
[Mongolo o botlaaseng ba leqephe]
a Liphetolelo tse ling tsa Bibele li fetola “setsoe” temaneng ena li re ke tekanyo ea nako, joaloka “motsotsoana o le mong” (The Emphatic Diaglott) kapa “motsotso o le mong” (A Translation in the Language of the People, ea Charles B. Williams). Leha ho le joalo, lentsoe le sebelisitsoeng tabeng e ngotsoeng qalong le bolela setsoe, se neng se le bolelele ba lisenthimithara tse ka bang 45.
U ka Araba Joang?
• Ho tsamaea le Molimo ho bolela’ng?
• Ke hobane’ng ha u utloa ho hlokahala hore u tsamaee le Molimo?
• Ke eng e tla u thusa hore u tsamaee le Molimo?
• Ba tsamaeang le Molimo ba tleloa ke litlhohonolofatso life?
[Litšoantšo tse leqepheng la 23]
Ha re bala Bibele, re utloa lentsoe la Jehova ka mor’a rōna le re, “Tsela ke eona ena”
[Setšoantšo se leqepheng la 25]
Libokeng, re fumana lijo tsa moea ka nako e tšoanetseng