Ke Joang Borapeli ba Rona bo ka Khahlisang Molimo?

Joalokaha re ithutile khaolong e fetileng, ha se malumeli ’ohle a khahlisang Molimo. Leha ho le joalo, re ka khona ho rapela ’Mopi oa rona ka tsela eo a e batlang. Ke “mofuta oa borapeli” o joang o mo khahlisang? (Jakobo 1:​27) Hlokomela hore na Bibele e re’ng.

1. Re lokela ho theha borapeli ba rona hokae?

Borapeli ba rona bo lokela ho thehoa Bibeleng. Jesu o ile a re ho Molimo: “Lentsoe la hao ke ’nete.” (Johanne 17:​17) Malumeli a mang a iphapanyetsa ’nete e fumanoang ka Lentsoeng la Molimo le bululetsoeng, e leng Bibele. Ho e-na le ho ruta ’nete ka Molimo, ba ruta lithuto tsa batho le meetlo. Leha ho le joalo, Jehova ha a thabe ha batho ba “behella taelo ea [Hae] ka thoko.” (Bala Mareka 7:9.) Ka lehlakoreng le leng, haeba re theha borapeli ba rona Bibeleng ’me re mamela keletso ea eona, Jehova oa thaba.

2. Re lokela ho rapela Jehova joang?

Re lokela ho rapela Jehova feela, hobane ke ’Mopi oa rona. (Tšenolo 4:​11) Sena se bolela hore re lokela ho mo rata le ho rapela eena a le mong, re sa sebelise litšoantšo leha e le life.​—Bala Esaia 42:8.

Borapeli ba rona bo lokela ho ‘halalela le ho amoheleha’ ho Jehova. (Baroma 12:1) Sena se bolela hore re lokela ho mamela melao ea hae. Mohlala, batho ba ratang Jehova, ba rata le melao ea hae e mabapi le lenyalo ebile baa e mamela. Hape ba qoba mekhoa e kotsi e kang ho tsuba koae le ho sebelisa lithethefatsi le joala hampe.a

3. Ke hobane’ng ha re lokela ho rapela Jehova re le ’moho le Bakreste ba bang?

Libokeng tsa rona tsa beke le beke re ba le monyetla oa ho ‘rorisa Jehova phuthehong.’ (Pesaleme ea 111:​1, 2) Tsela e ’ngoe eo re etsang sena ka eona ke ka ho binela Molimo lipina tsa thoriso. (Bala Pesaleme ea 104:​33.) Jehova o batla re ee libokeng hobane oa re rata ebile oa tseba hore li tla re thusa ho thabela bophelo ka ho sa feleng. Liboka li re tsoela molemo ebile ha re le ho tsona rea khothatsana.

ITHUTE LINTLHA TSE LING

4. Ha rea lokela ho sebelisa litšoantšo borapeling ba rona

VIDEO: Na Molimo o Batla Hore re Sebelise Litšoantšo ha re mo Rapela? (3:26)

• Ho ile ha etsahala’ng mehleng ea ha ho ne ho ngoloa Bibele ha bahlanka ba bang ba Molimo ba leka ho mo rapela ba sebelisa litšoantšo?

Batho ba bang ba sebelisa litšoantšo ha ba rapela Molimo hobane ho etsa joalo ho etsa hore ba ikutloe eka ba haufi le eena. Empa na ho etsa joalo ha ho ba suthisetse hole le eena? Bala Exoda 20:​4-6 le Pesaleme ea 106:​35, 36 ebe le buisana ka lipotso tsena:

• Ke lintho kapa litšoantšo life tseo u kileng oa bona batho ba li sebelisa ha ba rapela?

• Jehova o ikutloa joang ha batho ba sebelisa litšoantšo ha ba mo rapela?

• Uena u ikutloa joang ka ho li sebelisa?

5. Ho rapela Jehova feela ho re lokolla lithutong tsa bohata

VIDEO: ’Nete e Ile ea mo Lokolla (5:16)

Bala Pesaleme ea 91:​14 ebe le buisana ka potso ena:

• Jehova o re tšepisa’ng ha re mo bontša hore rea mo rata ka ho rapela eena feela?

6. Re rapela Molimo ha re le libokeng

Re rorisa Jehova le ho khothatsana ka ho bina le ho arabela ha re le libokeng. Bala Pesaleme ea 22:​22 ebe le buisana ka lipotso tsena:

• Na u thabela ho utloa likarabo tsa batho ba bang ha u le libokeng?

• Na u ka rata ho itokisetsa hore le uena u tle u arabele?

7. Jehova oa thaba ha re bolella batho ba bang seo re ithutileng sona

Ho na le litsela tse ngata tsa ho bolella batho ba bang seo re ithutileng sona ka Bibeleng. Bala Pesaleme ea 9:1 le ea 34:1 ebe le buisana ka potso ena:

• Ke eng eo u ithutileng eona Bibeleng eo u ka ratang ho e bolella motho e mong?

KAKARETSO

Re thabisa ’Mopi oa rona ha re rapela eena a le mong, ha re mo rorisa libokeng le ha re bolella batho ba bang seo re ithutileng sona.

Re Ithutile’ng?

• Ke hokae moo Molimo a re bolellang hore na re mo rapele joang?

• Ke hobane’ng ha re lokela ho rapela Jehova feela?

• Ke hobane’ng ha re lokela ho rapela Molimo re e-na le batho ba batlang ho mo khahlisa?

BATLA

Bala pale e nang le sehlooho se reng: “Ha ke sa Sebeletsa Litšoantšo,” u bone hore na ke joang ’mè e mong a ileng a khaotsa ho rapela litšoantšo.

“Bibele e Fetola Batho” (Molula-Qhooa, July 1, 2011)

Bala hore na ke eng e ka u thusang ho araba ha u le libokeng.

“Rorisang Jehova Har’a Phutheho” (Molula-Qhooa, January 2019)

Bona hore na mohlankana e mong o ile a fumana molemo joang ka ho ba teng libokeng le hoja ho ne ho se bonolo hore a be teng ho tsona.

Jehova o Ile a Ntsotella 3:​07

Batho ba bangata ba amahanya sefapano le Bokreste, empa na re lokela ho se sebelisa borapeling ba rona?

“Ke Hobane’ng ha le sa Sebelise Sefapano Bolumeling ba Lona?” (Sehlooho se websaeteng)