Ke Hobane’ng ha ‘Re ka ea ho Bohloa’?
MORENA Salomone ea bohlale oa Iseraele ea boholo-holo o ile a fana ka keletso: “E-ea ho bohloa.” Ke hobane’ng ha a ile a rialo? Re ka ithuta eng ho bohloa?
Salomone o ile a phaella: “U qamake mekhoa ea [bohloa], u tle u hlalefe. Ha bo na molisa, leha e le mohlahlobi, kapa morena; leha ho le joalo, bo itokisetsa bohobe ba bona lehlabula, bo ipokellela lijo ha ho kotuloa.” (Liproverbia 6:6-8) Mantsoe ao a khale a tiisa linnete tse ileng tsa utulloa ke litsebi tsa tlhaho tsa morao tjena.
Mongoli oa Liproverbia Agure o bontša hore bohloa bo na le “bohlale ba tlhaho.” (Liproverbia 30:24, 25, NW) Ke ’nete, bohlale ba bona hase phello ea monahano o bohlale empa ke phello ea bohlale ba tlhaho boo ’Mōpi a bo nehileng bona. Ka mohlala, ka lebaka la bohlale ba tlhaho bohloa bo khona ho bokella lijo ka nako e loketseng.
Bohloa bo hlophisehile ka tsela e hlollang. Bo sebelisana hammoho le basebetsi-’moho ba bang ’me bo khona ho ba thusa, bo thusa bohloa bo bong ho khutlela mokoting ha bo tsoile kotsi kapa bo khathetse. Ka bohlale ba tlhaho bo lokisetsa nako e tlang ’me bo etsa ntho e ’ngoe le e ’ngoe eo bo ka e khonang ho phetha mesebetsi ea bona.
Mesebetsi ea bohloa ea tlhaho e bolela hore batho ba lokela ho rera esale pele ’me ba sebetse ka thata. Sena se sebetsa sekolong, mosebetsing, le mesebetsing ea moea. Joalokaha bohloa bo rua molemo ka baka la ho sebetsa ka thata, kahoo Molimo o batla hore batho ba ‘latsoe boiketlo ka mokhathala oohle oa bona.’ (Moeklesia 3:13, 22; 5:18) Joaloka bohloa bo tšoarehileng, Bakreste ba ’nete ba phetha mosebetsi o lekaneng oa letsatsi. Ba etsa ‘sohle se fihleloang ke matsoho a bona hore se ka sebetsoa,’ eseng hobane mookameli a ba shebile, empa ka baka la botšepehi le takatso ea ho ba basebetsi ba sebetsang ka thata, ba behang litholoana.—Moeklesia 9:10; bapisa le Liproverbia 6:9-11; bona hape le Tite 2:9, 10.
Ka sebele, re tla thaba haeba re “e-ea ho bohloa” ’me re sebelisa seo re ithutang sona ho bona. ’Me re tla tleloa ke thabo e khōlō ka ho fetisisa haeba re ikitlaeletsa ho etsa thato ea Jehova Molimo, joalokaha e bontšitsoe ka Bibeleng.