“Ho Tšaba Jehova ke Bohlale”

“QETELLO ea taba, ha ntho e ’ngoe le e ’ngoe e se e utloiloe, ke ena: Tšaba Molimo oa ’nete ’me u boloke litaelo tsa hae. Etsoe sena ke sohle seo motho a tlamehang ho se etsa.” (Moeklesia 12:13) Ao ke mantsoe a matla hakaakang ao Morena Solomone oa Iseraele ea boholo-holo a ileng a lihela likhala ka ’ona a susumetsoa ke moea oa Molimo! Mopatriareka Jobo le eena o ne a utloisisa hore ho tšaba Molimo ke habohlokoa, hobane o ile a re: “Bona! Ho tšaba Jehova—ke bohlale, ho furalla bobe ke kutloisiso.”—Jobo 28:28.

Bibele e re ho tšaba Jehova ke ntho ea bohlokoa haholo. Ke hobane’ng ha e le bohlale hore re tšabe Molimo le ho mo hlompha? Ho tšaba Molimo ho re tsoela molemo ka tsela efe—re le batho ka bomong hape re le sehlopha sa barapeli ba ’nete? Lipotso tsena li arajoa ho Liproverbia khaolo ea 14 temana ea 26 ho ea ho ea 35.a

Mohloli oa “Kholiseho e Matla”

Solomone o re: “Ho na le kholiseho e matla ho tšabeng Jehova, ’me ho tla ba le setšabelo bakeng sa bara ba hae.” (Liproverbia 14:26) Motho ea tšabang Molimo o tšepa Jehova, Molimo ea matla ’ohle le ea tšepahalang. Ha ho makatse hore ebe motho ea joalo o kholisehile ka matla ka bokamoso, etsoe bokamoso ba hae bo bolelele ebile boa thabisa!

Leha ho le joalo, ho thoe’ng ka bokamoso ba ba behileng tšepo ea bona lefatšeng—mererong ea lona, mekhatlong ea lona, likhopolong tsa lona le maruong a lona? Bokamoso leha e le bofe boo ba bo lebeletseng ke ba nakoana, hobane Bibele e re: “Lefatše lea feta ’me ho joalo le ka takatso ea lona, empa ea etsang thato ea Molimo o hlola ka ho sa feleng.” (1 Johanne 2:17) Joale, na ebe re na le lebaka leha e le lefe la ho “rata lefatše kapa lintho tse lefatšeng”?—1 Johanne 2:15.

Ke mehato efe eo batsoali ba tšabang Molimo ba ka e nkang ho tiisa hore “ho tla ba le setšabelo” bakeng sa bana ba bona? Mopesaleme o ile a bina a re: “Tloong, lōna bara, le ’mamele; ke tla le ruta ho tšaba Jehova.” (Pesaleme ea 34:11) Ha batsoali ba ruta bana ho tšaba Molimo ka ho ba behela mohlala, bana e tla ba banna le basali ba hōlileng ba tšepang Jehova haholo.—Liproverbia 22:6.

Ha Solomone a tsoela pele o re: “Ho tšaba Jehova ke seliba sa bophelo, bakeng sa ho furalla maraba a lefu.” (Liproverbia 14:27) Ho tšaba Jehova ke “seliba sa bophelo” hobane Molimo oa ’nete ke “mohloli oa metsi a phelang.” (Jeremia 2:13) Ho rua tsebo ka Jehova le Jesu Kreste ho ka bolela bophelo bo sa feleng ho rōna. (Johanne 17:3) Ho tšaba Molimo ho boetse ho re furallisa maraba a lefu. Joang? Liproverbia 13:14 e re: “Molao oa ea bohlale ke mohloli oa bophelo, bakeng sa ho furallisa motho maraba a lefu.” Haeba re tšaba Jehova, re mamela molao oa hae, ebile re lumella Lentsoe la hae hore le re tataise, na seo ha se re sireletse mekhoeng le maikutlong a kotsi a ka etsang hore re shoe kapele?

“Mokhabo oa Morena”

Karolong e khōlō ea puso ea hae, Solomone e ne e le morena ea tšabang Molimo le ea neng a mamela Jehova. Sena se ile sa etsa hore puso ea hae e atlehe. Ke eng se rerang hore na ebe morena o tla atleha pusong ea hae kapa che? Liproverbia 14:28 e araba tjena: “Ho na le mokhabo oa morena ha batho ba le bangata, empa moo sechaba se haellang ho na le tšenyeho ea molaoli ea phahameng.” Ho atleha ha morena ho lekanyetsoa ka boiketlo ba bafo ba hae. Haeba batho ba bangata ba ntse ba rata hore a ba buse, seo se bontša hore ke ’musi ea molemo. Solomone o ne a e-na le “bafo ho tloha leoatleng [le Lefubelu] . . . ho ea [leoatleng la Mediterranean] . . . le ho tloha Nōkeng [ea Eufrate] ho ea lipheletsong tsa lefatše.” (Pesaleme ea 72:6-8) Pusong ea hae ho ne ho e-na le khotso le nala tseo ho seng mohla li kileng tsa e-ba teng. (1 Marena 4:24, 25) Solomone o ne a atlehile pusong ea hae. Empa, haeba sechaba se sa rate puso, seo ke mahlabisa-lihlong ho molaoli ea phahameng.

Tabeng ena, ho thoe’ng ka bophahamo ba Solomone e Moholoanyane, e leng Morena oa Bomesia, Jesu Kreste? Nahana feela ka bafo bao a nang le bona esita le kajeno. Banna le basali ba tšabang Molimo ba fetang limilione tse tšeletseng lefatšeng ka bophara ba se ba khethile ho phela tlas’a puso ea Kreste. Ba bontša tumelo ho Jesu ebile ba kopane borapeling ba ’nete ba Molimo ea phelang. (Johanne 14:1) Bofelong ba Puso ea Lilemo Tse Sekete, bohle ba leng khopolong ea Molimo ba tla be ba tsositsoe. Ka nako eo lefatše la paradeise le tla be le tletse batho ba thabileng le ba lokileng, ba bontšitseng hore ba ananela Morena oa bona. Ka sebele boo e tla ba bopaki bo babatsehang ba hore puso ea Kreste e atlehile! A re khomareleng ka tieo tšepo ea rōna ea ’Muso e hlollang.

Melemo e Bang Teng Moeeng le ’Meleng

Ho tšaba Molimo hobane re mo hlompha ho ka etsa hore lipelo le likelello tsa rōna li be le khutso. Sena se ka etsahala hobane bohlale bo ka bontšoa ka litsela tse ngata tse akarelletsang ho ba le kahlolo e molemo le temoho. Liproverbia 14:29 e re: “Ea liehang ho halefa o tletse temoho, empa ea felang pelo o phahamisa booatla.” Temoho e re thusa ho hlokomela hore bohale bo sa laoleheng bo ka re lematsa moeeng. Har’a mesebetsi e ka re thibelang ho “rua ’muso oa Molimo” ho thathamisitsoe “bora, ho qabana, poulelo, ho tlakoloha ka bohale [le] ho rata likhang.” (Bagalata 5:19-21) Re eletsoa hore re se koetle khalefo esita leha ho e-na le lebaka la hore re halefe. (Baefese 4:26, 27) Ho fela pelo ho ka etsa hore re bue le ho etsa lintho ka booatla ebe hamorao rea ikoahlaea.

Ha morena oa Iseraele a bontša hore na khalefo e ka re lematsa joang ’meleng, o itse: “Pelo e nang le khutso ke bophelo ba sebōpuoa sa nama, empa poulelo ke ho bola masapong.” (Liproverbia 14:30) Maloetse a bakoang ke ho halefa a akarelletsa mathata a amanang le ho hema, khatello ea mali, lefu la sebete le ho lematsa manyeme. Lingaka le tsona li re ho halefa ho ka hakatsa kapa ha baka maloetse a kang liso tsa ka maleng, ha ntša motho makhopho, ha baka asma, mafu a letlalo le a ho se silehe hantle ha lijo ka maleng. Empa “pelo e nang le khotso e phelisa motho hantle.” (Liproverbia 14:30, Bibele—Phetolelo e Ncha) Kahoo re lokela ho “[phehella] lintho tse tlisang khotso le lintho tseo re ka hahanang ka tsona.”—Baroma 14:19.

Ho Tšaba Molimo ho re Thusa ho se be Leeme

Solomone o re: “Ea etsetsang ea tlaase bolotsana o nyelisitse Moetsi oa hae, empa ea bontšang mohau ho ea futsanehileng oa Mo tlotlisa.” (Liproverbia 14:31) Motho ea tšabang Molimo oa tseba hore batho bohle ba na le Moetsi a le mong, e leng Jehova Molimo. Ka hona, motho ea tlaase le eena ke motho joaloka rōna, ’me tsela eo re mo tšoarang ka eona e ka nyelisa ’Mōpi oa batho kapa ea mo tlotlisa. E le hore re tlotlise Molimo, ha rea lokela ho ba leeme ha re sebelisana le batho ba bang. Mokreste ea kojoana li mahetleng ha aa lokela ho khetholloa linthong tsa moea. Re lokela ho isetsa batho ba futsanehileng le ba ruileng litaba tse molemo tsa ’Muso oa Molimo.

Ha a bua ka molemo o mong o tlisoang ke ho tšaba Molimo, morena ea bohlale o re: “Ka lebaka la bobe ba hae ea khopo o tla sutumelletsoa fatše, empa ea lokileng o tla fumana setšabelo botšepehing ba hae.” (Liproverbia 14:32) Ea khopo o sutumelletsoa fatše joang? Ho ’nile ha fanoa ka tlhahiso ea hore sena se bolela hore ho thata hore a fumane thuso leha e le efe ha a le tsietsing. Empa ha motho ea tšabang Molimo a hlaheloa ke tlokotsi, o fumana setšabelo botšepehing ba hae ho Molimo. Kaha esita leha a ka shoa o tla be a ntse a tšepile Jehova ka ho feletseng, o bontša boikemisetso bo tšoanang le ba Jobo, ea ileng a re: “Nke ke ka tlosa botšepehi ba ka ho ’na ho fihlela ke shoa!”—Jobo 27:5.

Ho hlokahala hore motho a tšabe Molimo le ho ba bohlale e le hore a boloke botšepehi. Bohlale bo ka fumanoa hokae? Liproverbia 14:33 e araba tjena: “Pelong ea ea nang le kutloisiso ho lutse bohlale, ’me bo tsebahala har’a ba hlokang kelello.” Ha ho pelaelo hore bohlale bo ka fumanoa pelong ea motho ea nang le kutloisiso. Empa bohlale bo tsebahala joang har’a ba hlokang kelello? Ho latela buka e ’ngoe ea boitsebiso, “kaha leoatla le rata ho hlaha eka le bohlale, le bua seo le nahanang hore ke bohlale empa kaha ha le tsebe ho sebelisa bohlale ka nepo, seo le se etsang se fetoha booatla.”

“Ho Phahamisa Sechaba”

Joale morena oa Iseraele o tlosa mohopolo oa rōna tabeng ea hore na ho tšaba Molimo ho ama motho joang ’me o re hlokomelisa kamoo ho amang sechaba sohle kateng, o re: “Ho loka ho phahamisa sechaba, empa sebe ke ntho e nyelisehang lihlopheng tsa lichaba.” (Liproverbia 14:34) Molao-motheo ona o ile oa bonahala hantle hakaakang sechabeng sa Iseraele! Ho khomarela melao e phahameng ea Molimo ho ile ha etsa hore Baiseraele ba phahamele lichaba tse ba potolohileng. Leha ho le joalo, ho se mamele ha Baiseraele ka makhetlo-khetlo ho ile ha etsa hore e be ba nyelisehang eaba qetellong Jehova oa ba lahla. Molao-motheo ona o ntse o sebetsa le ho batho ba Molimo kajeno. Phutheho ea Bokreste ha e tšoane le lefatše hobane e boloka melao-motheo e lokileng ea Molimo. Empa, e le hore re finyelle boemo bo joalo bo phahameng, ka mong oa rōna o lokela ho hloeka boitšoarong. Ha re etsa sebe ha re itlisetse nyeliso re le bang empa re tlisetsa Molimo le phutheho ea hae sekhobo.

Ha a bua ka hore na morena o thabisoa ke eng, Solomone o re: “Morena o khahlisoa ke mohlanka ea etsang ka temohisiso, empa khalefo ea hae e ba ho ea itšoarang ka mokhoa o hlabisang lihlong.” (Liproverbia 14:35) ’Me Liproverbia 16:13 e re: “Molomo oa ho loka o khahlisa morena e moholo; ’me o rata motho ea buang lintho tse lokileng.” Ka sebele, Jesu Kreste, e leng Moeta-pele oa rōna le Morena oa rōna, o thaba haholo ha re itšoara ka ho loka le ha re etsa ka temohisiso ’me re sebelisa melomo ea rōna mosebetsing oa ho bolela ka ’Muso le oa ho etsa barutuoa. Kahoo, a re ikakheleng ka setotsoana mosebetsing ona ha re ntse re thabela meputso e tlisoang ke ho tšaba Molimo oa ’nete.

[Mongolo o botlaaseng ba leqephe]

[Setšoantšo se leqepheng la 15]

Motho a ka rutoa ho tšaba Molimo