U ka Thabela Setsoalle se Tšoarellang
SETSOALLE se na le meeli. Ha e le hantle, Bibele e ile ea bolela esale pele hore “matsatsing a ho qetela” lerato, boikutlo bo mofuthu ba tlhaho le botšepehi li ne li tla haella. (2 Timothea 3:1-5; Matheu 24:12) Maemo ana a bakile seoa seo ho seng mohla se kileng sa e-ba teng sa bolutu. Motho e mong o ile a re: “Tikolohong eo ke leng ho eona, ho tšoana le arekeng ea Noe. Haeba ha u lenyalong, u qheleloa ka thōko.” Molato oohle o ke ke oa behoa holim’a motho a le mong ea jeoang ke bolutu. Libakeng tse ling tsa lefatše, ho falla ha batho khafetsa, ho senyeha ha malapa, metse e se nang kamano ea botho le e kotsi ’moho le ho fokotseha ho hlokomelehang ha nako ea ho phomola ke tse ling tsa liphephetso setsoalleng se tšoarellang.
Ka beke, moahi oa kajeno oa motse o moholo a ka kopana le batho ba bangata ho feta bao moahi ea phetseng lekholong la bo18 la lilemo a ileng a ba bona ka selemo kapa bophelong bohle ba hae! Leha ho le joalo, hangata kajeno likamano ha esale tsa sebele. Ba bangata ba ikenya menyakeng e sa khaotseng ’me ba leka ho ithabisa. Leha ho le joalo, re tšoanela ho lumela hore ho ba le menate ea lefeela le metsoalle e khethiloeng hampe ho tšoana le ho beseletsa ka meutloa. Moeklesia 7:5, 6 e re: “Ho molemo hore motho a mamele khalemelo ea ea hlalefileng, ho e-na le hore a mamele pina ea maoatla; hobane joalo ka ho qhoma ha meutloa e besoang tlasa pitsa, ho joalo le litšeho tsa maoatla. Hoo le hona ke lefeela.” Ka bokhutšoanyane, meutloa e etsa mollo o khanyang le o lerata, empa ha e-na matla a lekaneng a ho re futhumatsa. Ka ho tšoanang, metsoalle e lerata, e keketehang e ka ’na ea faposa mehopolo ea rōna ka nakoana, empa e ke ke ea felisa bolutu bohle le ho khotsofatsa litlhoko tsa rōna bakeng sa metsoalle ea ’nete.
Ho ba boinotšing ho fapane le bolutu. Hoa hlokahala ho ba boinotšing ka linako tse ling e le hore re ka ikhatholla ’me ka hona re be le ho hongata hoo re ka fanang ka hona joaloka metsoalle. Ha ba tobane le bolutu, ka potlako ba bangata ba retelehela ho ithabiseng ka lintho tse itseng tsa elektronike. Phuputso e ’ngoe e ile ea fumana hore karabelo e tloaelehileng haholo bakeng sa bolutu ke ho shebella thelevishene. Leha ho le joalo, bafuputsi ba ile ba qeta ka hore ho shebella thelevishene nako e telele ke e ’ngoe ea lintho tse mpe ka ho fetisisa tseo re ka li etsang ha re jeoa ke bolutu. E khothalletsa ho se etse letho, ho boreha le ho nahana lintho tse ke keng tsa etsahala, ’me e ke ke ea ema sebakeng sa ho buisana le batho ba bang hamolemo.
Ha e le hantle, ho ba boinotšing e ka ba habohlokoa haholo haeba re sebelisa nako ea rōna re le bang hantle. Re ka etsa sena ka ho bala, ho ngola mangolo, ho etsa lintho tse itseng le ho roba monakeli. Ho sebelisa ho ba boinotšing hantle ho akarelletsa ho rapela Molimo, ho ithuta Bibele le ho thuisa ka eona. (Pesaleme ea 63:6) Tsena ke litsela tsa ho atamela haufi le Jehova Molimo haholoanyane, eena eo e ka bang Motsoalle oa rōna oa hlooho ea khomo.
Mehlala ea Bibele ea Setsoalle
Le hoja ho le hotle ho tloaelana le batho ba bangata, Bibele e re hopotsa hore “motsoalle e mong o’a khomarele motho ho fetisa ngoan’abo motho.” (Liproverbia 18:24) Kaofela ha rōna re hloka metsoalle e seng mekae e haufi-ufi, e hlileng e re tsotellang, eo setsoalle sa eona se re fang thabo, matla le khotso. Le hoja setsoalle se joalo sa ’nete se se se sa tloaeleha kajeno, mehlala e itseng ea boholo-holo ka ho khethehileng ea hlokomeleha ka Bibeleng. Ka mohlala, ho bile le setsoalle se ikhethang pakeng tsa Davida le Jonathane. Re ka ithuta’ng ho sona? Ke hobane’ng ha setsoalle sa bona se ile sa tšoarella?
Har’a tse ling, Davida le Jonathane ba ne ba e-na le lithahasello tse tšoanang tsa bohlokoa. Habohlokoa ka ho fetisisa, ba ne ba inehetse ka ho teba ho Jehova Molimo. Ka ho hlokomela tumelo ea Davida ho Molimo le liketso tsa hae ho sireletseng batho ba Jehova, “pelo ea Jonathane ea holehana le pelo ea Davida, ’me Jonathane a mo rata, joalo ka ha a ithata.” (1 Samuele 18:1) Ka hona, ho ba le lerato le tšoanang ho Molimo ho thusa ho tlamahanya metsoalle hammoho.
Jonathane le Davida e ne e le batho ba matla ba neng ba phela ka melao-motheo ea bomolimo. Ka hona, ba ne ba ka hlokomelana. (1 Samuele 19:1-7; 20:9-14; 24:6) Ka sebele re hlohonolofalitsoe haeba re e-na le metsoalle e tšabang Molimo e laoloang ke melao-motheo ea Mangolo.
Mabaka a mang a ile a tlatsetsa setsoalleng sa Davida le Jonathane. Setsoalle sa bona e ne e le sa ’nete le se sa thekeseleng, ’me e mong o ne a e-na le kholiseho ka e mong. Ka botšepehi Jonathane o ne a etelletsa lithahasello tsa Davida ka pele ho tsa hae. O ne a se mōna hore ebe Davida o ile a tšepisoa borena; ho e-na le hoo, Jonathane o ile a mo tšehetsa maikutlong le moeeng. ’Me Davida o ile a amohela thuso ea hae. (1 Samuele 23:16-18) Ka litsela tse loketseng tsa Mangolo, Davida le Jonathane ba ne ba bolellana maikutlo. Botsoalle ba bona ba bomolimo bo ne bo theiloe kananelong ea sebele le boikutlong bo mofuthu. (1 Samuele 20:41; 2 Samuele 1:26) Ha boa ka ba arohana kaha banna bao bobeli ba bona ba ile ba lula ba tšepahala ho Molimo. Ho sebelisa melao-motheo e joalo ho ka re thusa hore re thehe setsoalle sa ’nete le ho se boloka.
Kamoo re ka Hlaolelang Setsoalle
Na u batla metsoalle ea ’nete? Ho ka ’na ha se ke ha hlokahala hore u batlele hōle. Ba bang ba bao u kopanang le bona kamehla e ka ba metsoalle ea hao, ’me ba ka ’na ba hloka setsoalle sa hao. Haholo-holo ho Bakreste-’moho le uena, ke bohlale ho sebelisa keletso ea moapostola Pauluse ea hore “le atolohe.” (2 Bakorinthe 6:11-13) Leha ho le joalo, u se ke ua ferekana haeba boiteko bohle ba hao ba ho etsa metsoalle bo sa felle ka maqhama a tebileng. Hangata ho nka nako ho hōlisa setsoalle, empa hase kamano e ’ngoe le e ’ngoe e tla ba e tebileng ka ho lekana. (Moeklesia 11:1, 2, 6) Ho hlakile hore, e le hore re ka thabela setsoalle sa sebele, re tlameha ho hloka boithati, ’me ho hlokahala re latele keletso ea Jesu: “Ka hona lintho tsohle, tseo le batlang hore batho ba le etse tsona, le lōna ka ho tšoanang le ba etse tsona.”—Matheu 7:12.
Ke bo-mang ba hlokang setsoalle sa hao? Ha re behella lithaka tsa hao ka thōko, ho thoe’ng ka ba banyenyane ho uena kapa batho ba baholo? Setsoalle sa Davida le Jonathane, Ruthe le Naomi ’moho le Pauluse le Timothea se ne se e-na le lekhalo la lilemo ho bohle ba amehang. (Ruthe 1:16, 17; 1 Bakorinthe 4:17) Na u ka atolosetsa setsoalle sa hao ho bahlolohali le ho batho ba bang ba seng lenyalong? Hape, nahana ka ba sa tsoa fihla sebakeng sa heno. E ka ’na eaba ba tlohetse botsoalle boo ba neng ba bo rata kapa metsoalle eohle ea bona ka ho falla kapa ho fetola tsela ea bona ea bophelo. U se ke ua emela hore ba bang e be bona ba etsang setsoalle le uena. Haeba u Mokreste, etsa setsoalle se tšoarellang ka ho sebelisa keletso ea Pauluse: “Leratong la bara ba motho e-bang le boikutlo bo bonolo e mong bakeng sa e mong. Ho bontšeng tlhompho e mong ho e mong etellang pele.”—Baroma 12:10.
Re ka nahana ka setsoalle e le mofuta o mong oa ho fana. Jesu o ile a re haeba re fana, batho le bona ba tla re fa. O ile a ba a hlakisa hore ho na le thabo e eketsehileng ho faneng ho feta e teng ho amoheleng. (Luka 6:38; Liketso 20:35) Na u se u kile ua kopana le batho ba semelo se fapaneng le sa hao? Likopano tsa machaba tsa Lipaki tsa Jehova li pakile hore batho ba litso tse fapaneng ba ka theha setsoalle sa ’nete le se tšoarellang ha ba kopanela borapeling bo le bong ba Molimo.
Ho Boloka Setsoalle se Momahane
Ka masoabi, ka linako tse ling ba nkoang e le metsoalle ba utloisana bohloko. Ho seba ho kotsi, ho senola lekunutu, ho haella ha kananelo—tsena li har’a lintho tse utloisang bohloko haholo ha li e-tsoa ho motho eo u neng u mo nkile e le motsoalle oa ’nete. Maemong a joalo ho ka etsoa joang?
Beha mohlala o motle. Etsa ntho e ’ngoe le e ’ngoe eo u ka e khonang ho qoba ho utloisa ba bang bohloko. Libakeng tse ling ho tloaelehile hore metsoalle e tšehe mefokolo ea e mong ka tsela e somang. Empa tšoaro e mpe kapa ho qhekella ka bolotsana li ke ke tsa momahanya metsoalle, esita le haeba ba nahana hore ke ‘ho bapala.’—Liproverbia 26:18, 19.
Sebetsa ka thata bakeng sa ho boloka setsoalle. Ka linako tse ling ho hlaha ho se utloisisane ha metsoalle e lebelletse ho hongata haholo ho e mong. Motsoalle ea kulang kapa ea tšoarehileng ka lebaka la bothata bo tebileng ho ka etsahala hore a se bontše mofuthu o tšoanang le oa mehla. Ka hona, linakong tse joalo leka ho ba ea utloisisang le ea tšehetsang.
Rarollang mathata ka potlako le ka mosa. Ha ho ka khoneha, etsang joalo lekunutung. (Matheu 5:23, 24; 18:15) Etsa bonnete ba hore motsoalle oa hao oa tseba hore u batla ho boloka setsoalle se le setle. Metsoalle ea sebele ea tšoarelana. (Bakolose 3:13) Na u tla ba motsoalle oa mofuta oo—ea khomarelang motho ho fetisa ngoan’abo motho?
Ho bala le ho nahana ka setsoalle ke qalo feela. Haeba re e-na le bolutu, a re nkeng khato e loketseng ’me re ke ke ra jeoa ke bolutu nako e telele. Ha re hahamalla ho etsa joalo, re ka etsa metsoalle ea ’nete. Re tla theha maqhama a khethehileng le ba bang ba eona. Empa ha ho na ea ka nkang sebaka sa Molimo, Motsoalle e moholo ka ho fetisisa. Ke Jehova feela ea ka tsebang, a utloisisa a ba a re tšehetsa ka ho feletseng. (Pesaleme ea 139:1-4, 23, 24) Ho feta moo, Lentsoe la hae le fana ka tšepo e tsotehang bakeng sa bokamoso—lefatše le lecha leo ho lona ho tla bang bonolo ho ba le metsoalle ea ’nete ka ho sa feleng.—2 Petrose 3:13.
[Litšoantšo tse leqepheng la 5]
Davida le Jonathane ba ne ba thabela setsoalle sa ’nete, ’me le rōna re ka se thabela