Na Molimo o Sebetsa ka Litsela Tse “Khopameng”?

“DEUS ESCREVE CERTO POR LINHAS TORTAS” (“MOLIMO O NGOLA lintho ka ho nepahala ka mekhoa e khopameng”) kamoo maele a Brazil a bolelang kateng. A fana ka maikutlo a hore kamehla Molimo o etsa ntho e nepahetseng, empa ka linako tse ling e le ka mokhoa o khopameng ho batho. Ka mohlala, ha motho ea sa ntseng a le mocha a e-shoa, ba bangata ba re, ‘Molimo o mo bilelitse leholimong.’ Haeba motho e mong a holofetse kapa a hlaheloa ke tlokotsi, ba bang ba re, ‘Ke thato ea Molimo.’ Kaha Molimo o behoa molato ka lefu, bokuli le lisosa tse ling tsa mahlomola, lipolelo tse kang tseo li fana ka maikutlo a hore Molimo ‘o ngola ka mokhoa o khopameng,’ ka mantsoe a mang, o etsa lintho ka tsela eo motho a ke keng a e utloisisa.

Ke hobane’ng ha batho ba bangata ba bolumeli ba lumela hore Molimo o ikarabella bakeng sa lefu le litsietsi? Hangata litumelo tsena li thehiloe kutloisisong e fosahetseng ea litemana tse itseng tsa Bibele. A re hlahlobeng ka bokhutšoanyane tse ling tsa tsona.

● “Ke mang ea etsang motho semumu, kapa ea tsebetutu, kapa ea bonang, kapa ea sefofu? Na hase ’na Jehova na?”—Exoda 4:11.

Na see se bolela hore Molimo ke eena ea molato ka bohle ba holofetseng ka litsela tse fapaneng? Che. Sena se tla be se sa lumellane le botho ba Molimo. Bibele ea re bolella: “Pōpo e ’ngoe le e ’ngoe ea Molimo e ntle.” (1 Timothea 4:4) A ke ke a behoa molato haeba motho a tsoaloa e le sefofu, semumu kapa sethōlō. O batlela pōpo ea hae se molemo feela, kaha ke eena Mohloli oa “mpho e ’ngoe le e ’ngoe e molemo le neo e ’ngoe le e ’ngoe e phethahetseng.”—Jakobo 1:17.

Ke batsoali ba rōna ba pele, Adama le Eva, bao ho ea ka khetho ea bona ba ileng ba fetohela Molimo ’me ba lahleheloa ke phetheho ea bona, ’me ka hona, ba lahleheloa le ke ho tsoala bana ba phethahetseng. (Genese 3:1-6, 16, 19; Jobo 14:4) Ha bana ba bona ba nyala ’me ba e-ba le bana, ho se phethahale ho eketsehileng ho ile ha qala ho bonahala bathong, ho kopanyelletsa le ho holofala. Le hoja Jehova Molimo a sa baka sena, o lumelletse hore se etsahale. Ka hona, o ne a ka ipolela e le eena ea ‘etsang’ limumu, lithōlo le lifofu.

● “Se khopamisitsoeng se ke ke sa otlolloa.”—Moeklesia 1:15, NW.

Na ke Molimo ea khopamisitseng lintho? Ho hlakile hore ha ho joalo. Moeklesia 7:29 ea hlokomela: “Molimo o entse batho ba lokile, empa bona ba batlile mamene-mene a mangata.” Contemporary English Version e hlalosa temana ena ka mantsoe ana: “Re ne re tšepahala ka ho feletseng ha Molimo a ne a re bōpa, empa hona joale re na le likelello tse sothehileng.” Ho e-na le hore ba latele litekanyetso tse lokileng tsa Molimo, ka kakaretso banna le basali ba ’nile ba khetha ka boomo ho latela merero ea bona, liketso, maqheka kapa litsela—tse fellang ka hore ba tsoe kotsi.—1 Timothea 2:14.

Hape, joalokaha moapostola Pauluse a ile a hlokomela, ka lebaka la sebe sa moloko oa batho, “pōpo e ile ea behoa tlas’a lefeela.” (Baroma 8:20) ’Me boemo bona ‘bo ke ke ba otlolloa’ ke boiteko ba motho. Ho khopama hohle le lefeela tse leng teng litabeng tsa lefatše li tla felisoa feela ke ha Molimo a kenella.

● “Talima mosebetsi oa Molimo. Ke mang ea ka otlollang seo o se kobileng?”—Moeklesia 7:13.

Ka mantsoe a mang, Morena Solomone oa botsa: ‘Ke mang har’a moloko oa batho ea ka lokisang mefokolo le ho se phethahale tseo Molimo a li lumeletseng?’ Ha a eo, hobane ho na le lebaka le entseng hore Jehova Molimo a lumelle lintho tsena hore li etsahale.

Ka lebaka leo, Solomone oa eletsa: “Letsatsing le letle u be ea molemo, ’me letsatsing la tlokotsi u bone hore Molimo oa ’nete o entse hore esita le lena le be hantle feela joalo, ka morero oa hore ho hang moloko oa batho o se ke oa fumana ntho leha e le efe ka mor’a oona.” (Moeklesia 7:14, NW) Motho o lokela ho ananela letsatsi leo ka lona lintho li sa ntseng li tsamaea hantle ’me a bontše kananelo ea hae ka ho bonahatsa molemo. O lokela ho talima letsatsi le letle e le mpho e tsoang ho Molimo. Empa ho thoe’ng haeba letsatsi leo le tlisa tlokotsi? Motho o etsa hantle ha a ‘bona,’ ke hore, a hlokomela hore Molimo o lumeletse tlokotsi hore e etsahale. Ke hobane’ng ha a entse joalo? Solomone o re: “Ka morero oa hore ho hang moloko oa batho o se ke oa fumana ntho leha e le efe ka mor’a oona.” See se bolela eng?

Taba ea hore Molimo o lumella hore re be le thabo le mathata e re hopotsa taba ea hore re ke ke ra tseba seo bokamoso bo re tšoaretseng sona. Tlokotsi e ka hlahela ba lokileng le ba khopo. Ha ho na mekhelo. Sena se lokela ho etsa hore re elelloe bohlokoa ba ho itšetleha ka Molimo, eseng ka borōna, re hopola hore “Molimo ke lerato.” (1 Johanne 4:8) Le hoja hona joale re ke ke ra utloisisa lintho tse itseng, re ka kholiseha hore ka mor’a hore tsohle li phethahale, seo Molimo a se lumeletseng se tla be se phethile morero oa bohlokoa ho bohle ba amehang.

Ntho leha e le efe eo a e lumellang le ka mohla e ke ke ea fella ka kotsi ea ka ho sa feleng ho ba lokileng. Moapostola Petrose o ile a hlakisa sena ha a bua ka mahlomola a neng a hlahela balumeli-’moho le eena mehleng ea hae: “Ka mor’a hore le utloe bohloko ka nakoana, Molimo oa mosa oohle o sa tšoanelang, ea le bitselitseng khanyeng ea hae e sa feleng kopanong le Kreste, ka boeena o tla qetela koetliso ea lōna, o tla le tiisa, o tla le matlafatsa.”—1 Petrose 5:10.

Nako ea ho Otlolla Lintho

Jehova o re fa matla a hore re mamelle liteko tsa rōna tsa hona joale. O boetse o tšepisa ho etsa “lintho tsohle li be ncha.” (Tšenolo 21:5) E, ke morero oa hae hore ’Muso oa hae oa leholimo haufinyane o khutlisetse ho ba holofetseng bophelo bo botle, ’me o tla hlokomela le tsoho ea ba shoeleng. ’Muso oo o tla boela o felise eo litsela tsa hae ka sebele li khopameng—Satane Diabolose. (Johanne 5:28, 29; Baroma 16:20; 1 Bakorinthe 15:26; 2 Petrose 3:13) E tla ba tlhohonolofatso e kaakang bakeng sa batho ba tšabang Molimo lefatšeng lohle ha nako ea Molimo ea ho otlolla lintho e fihla!

[Tlhaloso ea Moo Setšoantšo se Nkiloeng Teng e leqepheng la 28]

Job Hearing of His Ruin/The Doré Bible Illustrations/Dover Publications