Laola Moea oa Hao!
“SETSEBI sa kelello se fumane hore, batho ba ratang ho halefa, ba belaelang ba na le menyetla e mehlano ea hore ba ka shoa ba le ka tlaase ho lilemo tse 50 ho fapana le batho ba khutsitseng le ba nang le tšepo.” Ho tlalehile joalo The New York Times ea January 17, 1989. Ngaka Redford B. Williams, moprofesa oa Setsi sa Meriana sa Univesithi ea Duke e Durham, North Carolina, “o ne a theile liphuputso tsa hae lithutong tse ’maloa.” Times e tlalehile: “O itse, lipelo tse nang le tšepo li tšoarella nako e telele, hobane li sirelelitsoe tšenyehong ea tšebetso ea methapo-kutlo.”
Khalefo e ka phahamisa khatello ea mali, ea baka mathata a ho phefumoloha, ’me ea e-ba le liphello tse ling tse kotsi. Bohale bo ka sitisa tšebetso ea ho nahana, ’me hangata liphello e ba nako ea ho tepella kelellong ho fetelletseng. Ho bohloko ka ho fetisisa, ke liphello tsa khalefo bophelong bo botle ba motho ba moea. Ha ho makatse ha Bibele e re: “Pelo e tšoeu e phelisa ’mele oa motho.” (Liproverbia 14:30) E, u phela hantle ha u laola moea oa hao. Empa hlokomela mabaka a mang a ho etsa joalo.
Phehella Tsela e Bohlale
E mong le e mong kelellong ea hae e lokileng o batla ho itšoara ka bohlale. Tsela e ’ngoe ea ho etsa hona ke ho bontša boitšoaro. Tabeng ena, Liproverbia 29:11 e-ea bolela: “Lehlanya le hlahatsa khalefo ea lona; empa ea bohlale oa e tšoara, oa e khutsisa.”
Ka Bibeleng hangata lentsoe “moea” (spirit, ka Senyesemane) le bolela boikutlo bo atileng bo susumetsang motho ho phehella tsela e itseng. “Lehlanya” le hlahatsa khalefo ea lona, hobane ha le na matla holim’a eona. Le lumella khalefo ea lona ho phatloha ntle ho ho nahana ka liphello. Moea oa leoatla o ka qala ho le etsa hore le be le sefahleho se bontšang khalefo. Joale moea oa lona o ka ’na oa iponahatsa ka puo e mabifi le liketso tsa bothoto.
Leha ho le joalo, motho ea bohlale o boloka moea oa hae ‘oa o tšoara, oa o khutsisa.’ Oa o laola ’me o nahana ka hloko ka se ka hlahang haeba a lumella khalefo. Le haeba a na le lebaka le utloahalang la ho halefa, o hlokomela hore ho etsa lintho ka lepotla-potla ha a ntse a halefile joalo kelellong ho ka baka tšenyo e khōlō. Kahoo, o bontša boitšoaro ’me oa itšoara hore a se bontše khalefo ea hae ka tsela ea booatla le e sa laoleheng. O talima ho Jehova bakeng sa thuso, mohlomong a etse thapelo e potlakileng, a khutsitse. Ka hohle-hohle, molemong oa bohle ba amehang, motho ea bohlale o nolofalloa ho kokobetsa khalefo ea hae le ho beha mabaka ka ho hlakileng tumellanong le Mangolo le thato ea Molimo. Ho feta moo, motho ea bohlale o hlokomela hore ha a lokela ho boloka bohale hobane hoo ho ka mo hatella hore a etse ketso ea booatla le ho etsa sebe.
Hape motho ea bohlale o sebelisa keletso ea moapostola Pauluse: “Ekare ha le halefa, le se ke la etsa sebe; letsatsi le se ke la phirimela bohale ba lōna; ’me le se ke la nea Diabolose sebaka.” (Ba-Efese 4:26, 27) Haeba u lokela ho halefa, u se ke ua lula u halefile, ua lumella letsatsi ho phirima u ntse u le boemong boo. Hobane’ng? Hobane u tla be u nea Satane Diabolose sebaka sa ho u sebelisa, mohlomong a u susumelletse ho etsa bokhopo ’me u nyatsoe ke Molimo. (Pesaleme ea 37:8, 9) Ho e-na le hoo, laola moea oa hao ’me u nke bohato kapele ho lokisa mathata ao mohlomong a tsositseng khalefo ea hao.—Mattheu 18:15-17.
E-ba ea Khutsitseng Moeeng
Maele a mang a re: “Ea itšoarang lipuong o na le tsebo, ’me motho ea nang le temoho o khutsitse moeeng.” (Liproverbia 17:27, NW) Motho ea ruileng tsebo ea Lentsoe la Molimo o ‘itšoara lipuong’ ’me ha a lumelle mantsoe a hae ho tsoa ka bolokolohi, a sa laolehe, haholo-holo ha a ferekane. A ela hloko kamano ea hae le Jehova le boemo ba hae bo loketseng mokhatlong o hlophisitsoeng oa Molimo, a ke ke a lumella mocheso oa khalefo ho mo laola. Ho e-na le hoo, “motho ea nang le temoho” o ikitlaetsa ho khutsa le ho ba ea leka-lekaneng mohopolong. Ka ho ba le moea o joalo, le uena u ka tseba ho laola maemo a tla khannela leoatla sebeng.
Ho lumellana le sena, rea bala: “Ea liehang ho halefa o na le kelello e kholo; empa ea pelo e befang kapele o hlahatsa bothoto.” (Liproverbia 14:29) Ho hloka mamello ha u khathalitsoe maikutlong ho ka lebisa liketsong tsa bothoto. Ho molemo hakaakang ho nahana ka se ka hlahisoang ke puo kapa boitšoaro bo sa laoleheng! Ka ntle ho moo, motho a ka halefa kapele ’me a etsa ho seng bohlale kahoo a ‘hlahatse bothoto.’ Ka baka leo, e-ba ea “liehang ho halefa,” ho tšoana le Molimo, ’me u tla qoba ho hloka mamello le liketso tse seng bohlale.—Exoda 34:6.
Qoba Boikhohomoso
Ka lebaka la boikhohomoso, motho e ka ba ea sa nahaneleng ba bang esita le ho halefa. Kahoo rea bala: “Motho ea bohale o butsoela likhang; ea phakisang ho halefa, libe tsa hae li ngata.” (Liproverbia 29:22) Haeba motho a sa laole moea oa hae empa ‘a le bohale,’ a ka ’na a ‘butsoela likhang,’ esita le ka hare ho metsoalle. ’Me motho “ea phakisang ho halefa, libe tsa hae li ngata.” E, a ka etsa sebe habonolo—e leng ntho eo motho ea bohlale le ea tšabang Molimo a batlang ho e qoba.
U se ke ua lebala hore Jehova o hanana le boikhohomoso le ho halefa haholo. (Liproverbia 16:18) Ho molemo haholo ho batla thuso ea Molimo bakeng sa ho mamella teko ’me u ikokobetse ho e-na le ho lumella boikhohomoso ba khalefo kapa bohale.—Liproverbia 29:23.
Itšoare ka Bonolo
Ho ba bonolo hoa hlokahala haeba ho ka etsahala hore u khalemeloe ke ea nang le matla. Ka nako eo, boikutlo ba hao ba pele e ka ba bofe? Mohlomong ho araba kapele, ka puo e halefileng. Empa Bibele ea eletsa: “Ha pelo ea ’musi e ka u halefela, u se ke ua furalla litulo tsa hao, hobane mosa o ka u phemisa phoso e kholo.” (Moeklesia 10:4) Ho bohlale hakaakang ho araba ka bonolo! Ka sebele, “karabo e bonolo e thethefatsa bohale.” (Liproverbia 15:1) Ho hlokahala boitšoaro ho araba ka bonolo, empa tsela ena e bohlale e lokisa mathata ’me e hōlisa likamano tse khutsitseng.
Haeba u khalemeloa ho sa hlokahale, ho tšeptjoa hore motho eo ea nang le matla o tla u lumella ho hlalosa litaba. Ke ’nete hore tlhaloso leha e le efe e lokela ho etsoa ka moea o bonolo ka tšepo ea hore pono e sa nepahalang e tla lokisoa. Motho ea filoeng matla o lokela ho laola moea oa hae ho lumella tlhaloso e joalo, ’me hona ho tla bontša hore o na le bohlale le matla.
Ho sa tsotellehe hore na Mokreste o boemong ba ho ba le matla kapa che, o lokela ho hopola hore “motho ea hlōloang ke ho busa pelo ea hae, ke motse o kenoeng ke lira, o se nang lerako.” (Liproverbia 25:28) Motho ea seng bonolo ’me a sa laole moea oa hae a ka futuheloa ke menahano e sa lokang e ka mo susumetsang ho itšoara ka tsela e fosahetseng. Jesu Kreste, ea behileng mohlala o phethahetseng, o ne a le “mosa le pelo e nolo.” (Mattheu 11:29) Ho feta moo, bonolo ke tholoana ea moea o halalelang oa Molimo, eo Bakreste ba lokelang ho e rapella.—Luka 11:13; Ba-Galata 5:22, 23.
U Laole Moea oa Hao Hobane’ng?
Re ananela mantsoe a bonolo, empa hangata ha re tsebe hore ke eng e susumelitseng ho phasoloha ka bohale. Motho ea se nang boitšoaro a ka ba a atleha ho pata bohale ba hae le boikemisetso ba hae ba ho iphetetsa ho motho e mong ka phoso ea sebele kapa e inahaneloang! Ka boikaketsi, a ka emela nako e loketseng ea ho bua ho hong ho senyang ka motho eo a hōlisitseng lehloeo ho eena. Ka sebele, Mokreste ha a lokela ho lumella moea oo ho hōla ka ho eena, hobane moapostola Johanne o ngotse: “Empa ea hloileng ngoan’abo, o lefifing, ’me o tsamaea lefifing, ’me ha a tsebe moo a eang teng, kahobane lefifi le foufalitse mahlo a hae.” Johanne o boetse a re: “E mong le e mong ea hloileng ngoan’abo ke ’molai; ’me lea tseba hobane ha ho ’molai eo bophelo bo sa feleng bo lutseng ho eena.”—1 Johanne 2:11; 3:15.
Haeba boikhohomoso, boikaketsi, kapa mokhoa o mong o seng motle o patehile, boikhakanyo bo joalo bo ke ke ba thetsa Molimo. Leha e le ho ipolela kapa ho iponahatsa u lokile li ke ke tsa patela Molimo se ka pelong. Liproverbia 16:2 e re: “Mekhoa eohle ea motho e lokile mahlong a hae, empa Jehova o lekanya meea.” Molimo o ke ke oa thetsoa.
Molemong oa hao ka bouena le ka mabaka a Mangolo ao re buisaneng ka ’ona, joale, e-ba joaloka Jesu le batho ba bang ba bohlale ba ’nileng ba qoba boikhohomoso ’me ba itšoara ka tsela e mosa. Ka litsela tsohle, laola moea oa hao!