Thabo—Ho Thata Hakaakang Ho E Finyella!
BOHALE, matšoenyeho le ho tepella maikutlo e ’nile ea e-ba taba e batlisisoang ke bo-rasaense ka nako e telele. Leha ho le joalo, lilemong tsa morao tjena, bo-rasaense ba li hulang pele ba ’nile ba etsa lipatlisiso ka phihlelo e nepahetseng le e lakatsoang ke batho—thabo.
Ke eng e ka thabisang batho haholoanyane? Ebe e ka ba ho ba ha bona ba bachanyana, ba ruileng haholoanyane, ba sa khathatsoeng ke ho kula, ba baleletsana kapa ba basesaane? Senotlolo sa thabo ea sebele ke sefe? Batho ba bangata ba fumana ho le thata, haeba ke ntho e ka khonehang, ho araba potso eo. Ha ho nahanoa ka ho hlōleha ho fumana thabo ho jeleng setsi, mohlomong ba bang ba tla nolofalloa haholoanyane ke ho araba hore na ke eng seo e seng senotlolo sa thabo.
Ka nako e telele, litsebi tse li hulang pele tsa kelello li ’nile tsa buella senotlolo sa thabo e le filosofi ea ho re motho ka mong a amehe ka se tsoelang eena feela molemo. Li ile tsa khothalletsa batho ba sa thabang hore ba lebise tlhokomelo e feletseng ho khotsofatseng litlhoko tsa bona tsa botho. Lipolelo tse hapang tlhokomelo tse kang “e-ba seo u leng sona,” “itsebe hantle,” le “iphumane,” li ’nile tsa sebelisoa ha ho phekoloa mathata a kelello. Leha ho le joalo, tse ling tsa litsebi tsona tseo tse ileng tsa buella khopolo ena, hona joale lia lumela hore boikutlo bo joalo ba ho etelletsa pele lithahasello tsa motho ka boeena ha bo hlahise thabo e tšoarellang. Joang kapa joang, ho iketelletsa pele ho tla baka bohloko le ho se thabe. Boithati hase senotlolo sa thabo.
Senotlolo sa ho se Thabe
Ba lebeletseng ho fumana thabo ka ho lelekisa monyaka ba talimile sebakeng sesele. Nahana ka mohlala oa Morena Solomone ea bohlale oa Iseraele ea boholo-holo. Bukeng ea Bibele ea Moeklesia, oa hlalosa: “Tsohle tse neng li lakatsoa ke mahlo a ka, ha kea ka ka a tima tsona; ha kea ka ka hanela pelo ea ka le thabo efe le efe: pelo ea ka ea ’na ea thabela mosebetsi oohle oa ka; ke sona seo nkileng ka se rua mosebetsing oohle oa ka.” (Moeklesia 2:10) Solomone o ile a ikahela matlo, a itemela masimo a morara ’me a iketsetsa masimo a mang, lirapa tsa lifate le matangoana. (Moeklesia 2:4-6) Ka nako e ’ngoe o kile a botsa: “Ke mang ea jang le ho noa ho mpheta?” (Moeklesia 2:25, NW) O ne a thabisoa ka ho bineloa ke likheleke le ke ba letsang liletsa tsa ’mino ka bokhabane ’me o ne a e-na le bolekane le basali ba batle ka ho fetisisa naheng eo.—Moeklesia 2:8.
Taba ke hore Solomone ha aa ka a itima menyaka. O ile a fihlela qeto efe ka mor’a ho khasa ka har’a menate bophelong? O itse: “Eitse ha ke talima mesebetsi eohle eo matsoho a ka a e entseng, ’me ke bala mokhathala oo ke ikhathalitseng ka oona ha ke e sebetsa, ka bona hoba tsohle ke lefeela le mosebetsi o nyopileng; ha ho letho le ka fihleloang ka tsohle tse etsoang tlas’a letsatsi.”—Moeklesia 2:11.
Seo morena eo ea bohlale a ileng a se hlokomela se sa le joalo le kajeno. Ka mohlala, nahana ka naha e ruileng joaloka ea United States. Lilemong tse 30 tse fetileng, Maamerika a batlile a menahanya leruo la ’ona habeli, la lintho tse kang likoloi le lithelevishene. Leha ho le joalo, ho ea ka litsebi tsa bophelo ba kelello, Maamerika ha aa thaba ho feta batho ba bang. Ho latela mohloli o mong, “ka lilemo tsona tseo, ho tepella maikutlo ho phahame. Ho ipolaea ha bacha ba ka tlaase ho lilemo tse 20 ho imenne hararo. Tlhalo e imenne habeli.” Haufinyane tjena, bafuputsi ba fihletse qeto e tšoanang ka mor’a hore ba ithute ka kamano e teng lipakeng tsa chelete le thabo ho baahi ba linaha tse 50 tse fapaneng. Ka ho toba, u ke ke ua reka thabo.
Ho fapana le moo, ha e le hantle ho phehella maruo ho ka bitsoa senotlolo sa ho se thabe. Moapostola Pauluse o ile a lemosa: “Ba ikemiselitseng ho rua ba oela molekong le lerabeng le litakatsong tse ngata tse se nang kelello le tse kotsi, tse lihelang batho timetsong le tšenyehong. Etsoe lerato la chelete ke motso oa mefuta eohle ea lintho tse kotsi, ’me ka ho hahamalla lerato lena ba bang ba khelositsoe tumelong ’me ba itlhabile hohle ka bohloko bo boholo.”—1 Timothea 6:9, 10.
Maruo, leha e le bona bophelo bo botle ba ’mele, bocha, botle, matla kapa ho kopanya leha e le life tsa lintho tsena ho ke ke ha tlisa thabo e tšoarellang. Hobane’ng? Hobane ha re na matla a ho thibela lintho tse mpe hore li se ke tsa etsahala. Ka nepo, Morena Solomone o ile a hlokomela: “Motho ha a tsebe nako ea hae, joalo ka ha e sa tsejoe le ke lihlapi tse tšoasoang ke letlooa le li bolaeang, le ke linonyana tse pitloang lifing; bana ba batho ba ee ba tšoasoe joalo ka tsona nakong ea tlokotsi, ha e ba oela ka sehlōhō.”—Moeklesia 9:12.
Pakane eo ho Leng Thata ho e Finyella
Ha ho patlisiso leha e le efe ea saense e ka hlahisang pheko kapa leano e iketselitsoeng ke batho ea ho fumana thabo. Solomone o ile a boela a re: “Ka boela ka bona tlas’a letsatsi hore hase ba mathang ka sekhahla ba sieang peisong‚ kapa hona hore ntoa ke ea liqhenqha‚ kapa hona hore lijo ke tsa ba bohlale‚ leha e le hona hore leruo ke la ba nang le kutloisiso‚ le hona ho ratoa hase ha ba nang le tsebo; hobane nako le ketsahalo e sa lebelloang li ba oela bohle.”—Moeklesia 9:11, NW.
Ba bangata ba lumellanang le mantsoe a ka holimo ba fihletse qeto ea hore ha ho utloahale ho lebella bophelo bo nang le thabo ea sebele. Tichere e ’ngoe e tummeng e ile ea bolela hore “thabo e mpa e le boemo bo inahaneloang feela.” Ba bang ba lumela hore senotlolo sa thabo ke lekunutu le patiloeng, le hore matla a ho sibolla lekunutu leo a ka lekanyetsoa ho ba seng bakae ba fuoeng bohlale bo makatsang.
Leha ho le joalo, ha ba ntse ba batla thabo, batho ba ntse ba tsoela pele ho leka mekhoa e fapaneng ea bophelo. Ho sa tsotellehe ho hlōleha ha baholo-holo ba bona, ba bangata kajeno ba ntse ba phehella maruo, bolaoli, bophelo bo botle ba ’mele kapa monyaka e le tsona tse ka phekolang ho se thabe ha bona. Ho batla thabo hona ho tsoela pele hobane batho ba bangata, botebong ba maikutlo a bona baa lumela hore thabo e tšoarellang hase boemo feela tjee bo inahaneloang. Ba na le tšepo ea hore thabo hase toro e ke keng ea finyelloa. Joale u ka botsa, ‘Nka e fumana joang?’