Ho Tšaba Molimo—Na ho ka U Tsoela Molemo?
“Tšaba Molimo, u boloke litaelo tsa oona, hobane, ke eona tšoanelo eohle ea motho.”—MOEKLESIA 12:13.
1, 2. (a) Borapeli ba rōna ho Molimo bo lokela ho theoa holim’a eng? (b) Leha ho le joalo, ke eng hape eo Molimo o e hlokang? (Deuteronoma 10:12)
NA POLELO “tšaba Molimo” e utloahala e makatsa ho uena? Ba bangata ba ka ’na ba ikutloa hore haeba kannete ba rata Molimo, ha baa lokela hore ba boele ba mo tšabe. Na re hlile re lokela ho li etsa ka bobeli? Haeba ho joalo, ho tšaba Molimo ho re tsoela molemo joang?
2 Mangolo a bontša hore borapeli ba rōna le tšebeletso ho Molimo li tlameha ho theoa leratong. Jesu o ile a hlakisa sena ha a re bolella hore re lokela ho rata Jehova ka pelo ea rōna eohle, ka moea oa rōna oohle, khopolo ea rōna eohle, le ka matla a rōna ’ohle. (Mareka 12:30) Empa bohlokoa ba ho tšaba Molimo bo boetse bo hatisoa ka Lentsoeng la oona. Ho Moeklesia 12:13, re bolelloa ka tsela e tobileng: “Tšaba Molimo, u boloke litaelo tsa oona, hobane, ke eona tšoanelo eohle ea motho.” Na Jehova o bua lintho tse sa nyallaneng ha a batla hore re mo tšabe re be re mo rate ka nako e tšoanang?
3. Re tlameha ho hopola eng mabapi le tšabo?
3 Ha ho hlile ha ho joalo—haeba re hopola hore ho na le mefuta e fapaneng ea tšabo. Ha batho ba nahana ka tšabo, hangata ba hopola boikutlo ba ho tlakasela bo felisang tšepo le bo etsang hore re ikutloe re nyahame. Ka ho totobetseng, Jehova o ne a ke ke a batla hore re ikutloe ka tsela eo ka eena! Ntate oa rōna oa leholimo o batla hore re tle ho eena feela joalokaha ngoana a tla ho ntat’ae, a kholisehile ka lerato la ntat’ae empa ka nako e tšoanang a tšaba ho mo halefisa. Tšabo e joalo e tla re thusa hore re lule re utloa Ntate oa rōna oa leholimo ha re beoa tekong ea ho etsa ho fosahetseng. Ena ke “tšabo ea bomolimo” e loketseng eo Bakreste ba tlamehang ho ba le eona.—Ba-Heberu 5:7, NW; 11:7, NW.
4. Ke tšabo ea mofuta ofe eo lerato le e felisang?
4 Jehova ha a tšoane le moahloli ea sa qeneheleng eo ha hae feela e leng ho otla bahlanka ba hae hang ha ba re khiri. Ho fapana le hoo, oa ba rata ’me o batla hore ba atlehe. Kahoo haeba re etsa phoso kapa re etsa sebe, ho tšaba Jehova ha hoa lokela ho re thibela ho bua le eena ka hona. (1 Johanne 1:9; 2:1) Tšabo ea rōna e nang le hlompho ho Jehova hase tšabo ea hore re tla soetsoa kapa re furalloe. Joalokaha re bala ho 1 Johanne 4:18: “Ha ho tšabo leratong, empa lerato le phethehileng le leleka tšabo; hobane tšabo e tsamaea le kotlo.” Leha ho le joalo, “lerato le phethehileng,” le ne le sa tl’o tlosa hlompho e tebileng le tšabo e loketseng tseo re lokelang ho ba le tsona ho Jehova joaloka ’Mōpi le Monei-bophelo oa rōna.—Pesaleme ea 25:14.
Nahanisisa ka Melemo
5. (a) Bohlale bo ka fumanoa feela ka tsela efe? (b) Ke eng e ileng ea susumetsa eo pele e neng e le lekhoba la lithethefatsi ho fetola tsela ea hae e booatla ea bophelo?
5 A re ke re nahanisiseng ka e meng ea melemo e phallang ka baka la “ho tšaba Jehova.” Ka mohlala, ho lebisa ho fumaneng ha rōna bohlale ba ’nete. Batho ba lekile ka litsela tse ngata, ba itekile kahohle, ho fumana bohlale bo joalo, empa ba hlōlehile hobane ba iphapanyetsa molao oa motheo: “Qalo ea bohlale ke ho tšaba Jehova.” (Pesaleme ea 111:10; Liproverbia 9:10) Nahanisisa kamoo tšabo e joalo e ileng ea thusa eo pele e neng e le lekhoba la lithethefatsi hore a sebetse ka bohlale. Oa hlalosa: “Ha ke ntse ke fumana tsebo ka Molimo, ke ile ka boela ka hōlisa tšabo ea ho mo khopisa kapa ho mo halefisa. Ke ne ke tseba hore o ntse a talimile, ’me ke ne ke labalabela hore ke amohelehe mahlong a hae. Hona ho ile ha ntšusumelletsa ho senya lithethefatsi tseo ke neng ke e-na le tsona ka ho li akhela ka ntloaneng.” Monna enoa o ile a hlōla mekhoa ea hae e mebe, a nehelana ka bophelo ba hae ho Jehova, ’me hona joale ke mosebeletsi Johannesburg, Afrika Boroa.
6. “Ho tšaba Jehova” ho tla re sireletsa joang khahlanong le lintho tse mpe, ’me ho tla re lebisa ho eng?
6 Na u lakatsa ho qoba bobe? “Ho tšaba Jehova ke ho hloea bobe.” (Liproverbia 8:13) E, tšabo ena e loketseng e ka u thiba mekhoeng e mengata e mebe eo Molimo o e nyatsang, e kang ho tsuba, tšebeliso e mpe ea lithethefatsi, botahoa, le boitšoaro bo bobe ba likamano tsa botona le botšehali. Ntle le ho khahlisa Jehova, u itšireletse khahlanong le linthong tse sisimosang tse hlahelang batho, ho akarelletsa mafu a tšabehang ao ba ipeketlelang ’ona. (Ba-Roma 1:26, 27; 12:1, 2; 1 Ba-Korinthe 6:9, 10; 1 Ba-Thessalonika 4:3-8) Ho tšaba Molimo ho ke ke ha u thusa feela ho itebela khahlanong le ho hobe le ho nyelisehang empa ho tla u lebisa ho se hloekileng le se hahang, hobane re bolelloa hore “ho tšaba Morena ke ntho e hloekileng.”—Pesaleme ea 19:10, TLP.
7, 8. (a) Ngoanana e mong e monyenyane o ile a fumana joang hore “ho tšaba Jehova” ho lebisa thabong? (b) Bolela melemo e eketsehileng e tlelang ba tšabang Jehova.
7 Thabo ke pakane e ’ngoe e lelekisoang ke batho ba bangata. U ka e fumana joang? Lentsoe la Molimo le re: “Ho thaba motho ea tšabang Jehova.” (Pesaleme ea 112:1, NW; 128:1, NW) Phihlelo ea ngoanana e mong ea lilemong tsa bocha e tiisa sena. O ne a ile a kenella mekhoeng eohle e litšila ea likamano tsa botona le botšehali, ’moho le tšebelisano le meea le ho utsoa. Joale a qala ho ithuta Bibele ’me a bona bohlokoa ba ho mamela le ho tšaba Jehova. O re: “Ho tseba Jehova ke ntho ea bohlokoa ka ho fetisisa e kileng ea nketsahalla. Jehova o nthusitse haholo hore ke fumane ’nete le thabo. Ke ikutloa ke mo kolota ho hoholo hobane o ile a tutubolla mahlo a ka ’me a mpha monyetla oa hore kannete ke hle ke nahane ka eena ’me ke mo fumane. Joale ke batla ho thusa batho ba bang ho fumana thabo ena.”
8 Jehova o boetse o tšepisa hore o tla putsa ‘ba tšabang lebitso la hae.’ (Tšenolo 11:18) Ho feta moo, “ho tšaba Jehova ho isa bophelong; ea mo tšabang o tla khora, a robale, a sa hlaheloe ke kotsi.” (Liproverbia 19:23) Ka sebele, ke “ho tšaba Jehova” ho tla re tlisetsa sohle seo re ka se hlokang. Ha ho tsamaea le boikokobetso, phello ke “leruo, le khanya, le bophelo.”—Liproverbia 22:4; 10:27.
9. Ke hobane’ng ha “ho tšaba Jehova” ho lebisa tseleng e le ’ngoe feela e bontšang bohlale bophelong? (Jobo 28:28, NW; Mikea 6:9, NW)
9 Na hoo ha ho re nee khothatso eohle ea ho tšaba Molimo oa ’nete? Ka sebele, “ho tšaba Jehova” ke ho ipiletsang ka ho fetisisa. Ho lebisa linthong tsohle tse tla re tlisetsa khotsofalo ea ’nete—phihlelo e fumanehang seoelo kajeno. Mantsoe aa a bululetsoeng ke a khothatsang hakaakang: “Leha moetsalibe a etsa hampe halekholo, ’me a ateloa ke matsatsi, leha ho le joalo, ke tseba hoba ba tšabang Molimo ho tla lula hantle le bona, e leng ba tšabang ho etsa hampe pel’a sefahleho sa oona. Molotsana eena ho ke ke ha lula hantle le eena, ’me a ke ke a ateloa ke matsatsi. O tla feta joale ka lesoiti, hobane ha a ka a tšaba ho etsa hampe pel’a sefahleho sa Molimo”! (Moeklesia 8:12, 13) Ke ofe motho ea sa batleng ha litaba tsa hae li ‘tsamaea hantle’? Phihlelo ena e thabisang e tla thabeloa feela ke ba tšabang Molimo.—Pesaleme ea 145:19.
10. Ke mabaka afe a mang a bohlokoa a lokelang ho re susumelletsa ho tšaba Molimo?
10 Na hoo ha hoa lokela ho etsa hore re ikemisetse ho ba le hlonepho e tebileng, bakeng sa Ntate oa rōna oa leholimo Jehova, e, ho mo tšaba? Bonneteng, re lokela ho ba le tšabo e ntle ea ho mo halefisa. Re ananela ka ho tebileng mosa oohle o lerato le molemo tseo a re bontšitseng tsona. Ntho e ’ngoe le e ’ngoe eo re nang le eona e tsoa ho eena. (Tšenolo 4:11) Ho feta moo, ke Moahloli ea Phahametseng tsohle, Ea Matla ’Ohle, ea nang le matla a ho timetsa bohle ba sa mo utloeng. Moapostola Pauluse o phehella hore: “Le fele le sebeletse polokeho ea lōna ka tšabo le ka thothomelo.”—Ba-Filippi 2:12; Hosea 3:5; Luka 12:4, 5.
11. (a) Bakreste ba lokela ho qoba boikutlo bofe mehleng ena ea qetello? (b) Ke moea ofe o lokelang ho hlaoleloa?
11 Mona ha ho sesupo sa hore re ka fumana polokeho ka ho ba le boikutlo ba ho ea ka hlooho feela, re etsa ho honyenyane ka hohle kamoo re ka khonang, re tšepile hore ka tsela e ’ngoe e itseng lintho li tla tsamaea hantle. Bona hase boikutlo bo ka bontšoang ke Bakreste bao mehleng ena ea qetello ba loanelang ho boloka kamano le ea bonang kahare-hare ho lipelo tsa bona le ea tsebang menahano ea bona e kahare-hare le likhopolo tsa bona tse tebileng. (Jeremia 17:10) Ke feela ba hlokomelang Jehova ka ho loketseng ba tlang ho amoheloa ke eena. O re: “Empa eo ke tla mo talima ke ea hlomohileng, ea robehileng pelo, le ea thothometsoang ke Lentsoe la ka.”—Esaia 66:2.
Re Tlameha ho Ithuta ho Tšaba Jehova
12. (a) Sechaba sa Iseraele se ile sa ratoa ho feta lichaba tse ling ka litsela life? (b) Jehova o ne a lebelletse eng bakeng sa hoo?
12 Ho nahanisisa ka litšebelisano tsa Jehova le Iseraele ho ka boetse ha hatisa ka likelellong tsa rōna tlhokahalo ea ho mo tšaba. Ha ho sechaba se seng se ileng sa fumana tšoaro e ntle joalo le tlhokomelo tse tsoang ho ’Musi oa bokahohleng. (Deuteronoma 4:7, 8, 32-36; 1 Samuele 12:24) Baiseraele ba ile ba bona ka mahlo a bona seo Jehova a se entseng ho Baegepeta, bao, ka ho se mo tšabe, ba ileng ba hatella batho ba hae le ho ba etsa makhoba. O ne a lebelletse eng bakeng sa hoo? “U tla phutha sechaba, banna, le basali, le bana, le molichaba ea metseng ea hao, ba tle ba utloe, ’me ba ithute ho tšaba Jehova, Molimo oa lōna, ’me ba hlokomele ho etsa litaba tsohle tsa molao ona. Bana ba bona ba sa kang ba tseba litaba tseo, ba tla utloa, ’me ba tla ithuta ho tšaba Jehova, Molimo oa lōna, ka matsatsi ’ohle a ho phela ha lōna lefatšeng leo le eang ho le rua ka ho tšela Jordane.”—Deuteronoma 31:12, 13; 14:23.
13. Ntho ea sehlooho eo batsoali ba lokelang ho ameha ka eona mabapi le bana ba bona ke efe?
13 Joaloka Baiseraele, bahlanka ba Molimo ba kajeno ba tlameha ho ‘ithuta ho tšaba Jehova.’ Ke boikarabelo bo bokaakang boo hoo ho bo beang ho rōna kaofela—haholo-holo batsoali! Batsoali, ipotseng: ‘Nka thusa joang bana ba ka ho fumana pelo e tšabang Jehova?’ Ka letsatsi le leng ha ba se ba hōlile ’me ba tloha lapeng, ke eng e tla fana ka tšireletso e molemo bakeng sa bana ba hao, moeeng, kelellong, kapa linthong tse bonahalang, ho feta hoo? Jehova ka boeena o hatisa bohlokoa ba sena ha a bua ka thapeli: “Oho! hoja ba ka ba le pelo e joalo ka mehla, ea ho ntšaba, le ea ho boloka litaelo tsa ka tsohle ka mehla, ba tle ba be le lehlohonolo, bona, le bana ba bona, ka ho sa feleng!”—Deuteronoma 5:29; 4:10.
14. Bolela ntlha e ’ngoe eo batsoali ba lokelang ho e hopola ha ba koetlisa bana ba bona hore e be ba tšabang Jehova, ’me u hlalose kamoo sena se ka sebelisoang kateng.
14 Mokreste leha e le ofe ea holisitseng bana o tla lumela ntle le tika-tiko hore ona hase mosebetsi o bonolo. Leha ho le joalo, Lentsoe le bululetsoeng la Molimo le hlokomelisa batsoali lintlha tse ’maloa tsa bohlokoa. E ’ngoe ke ho qala ha bana ba le banyenyane. Bonyenyane bo bokae? Ha Baiseraele ba ne ba phutheha ho fumana taeo e tsoang ho Jehova, “ba banyenyane” ba ne ba akarelletsoa. (Deuteronoma 29:10-13; 31:12, 13, NW) Ka ho totobetseng, basali ba Baiseraele ba ne ba e-tla le masea a bona liketsahalong tse joalo, kaha ho ne ho hlokahala hore bohle ba be teng. Ho “tloha boseeeng,” bara ba bona le barali ba bona ba ne ba tla ithuta ka tlhokahalo ea ho khutsa le ho mamela lipokanong tse joalo. (2 Timothea 3:15, NW) Kahoo tloo le ‘bana ba hao ba banyenyane’ libokeng. Hape, ba kopanyelletse tšebeletsong ea tšimo hang ha ba khona ho kopanela. Bacha ba bangata ba ithutile ho buella makasine kapa pampitšana le pele ba qala ho kena sekolo. Qala e sa le pele ho ruta “bana ba banyenyane,” ba hao ka litsela tse nyenyane, “ho tšaba Jehova.”
15. Ntlha ea bobeli ke efe, ’me batsoali ba ka e finyella joang?
15 Ntlha e ’ngoe ke ho ba ea tsitsitseng. Hona ho ka etsoa haeba kamehla re khomarela Lentsoeng la Molimo koetlisong, khalemelong, le taeong tseo re li neang bana ba rōna. Esita le phomolong kapa boikhathollong, eba ea tsitsitseng ho lumella melao-motheo ea Bibele ho rera hore na ke eng se tla lumelloa liketsahalong tse joalo. (Ba-Efese 6:4) Hona ho tla hloka boiteko, joalokaha Lentsoe la Molimo le bontša ka ho hlaka ha le re: “Litaelo tseo ke u laelang tsona kajeno, li be pelong ea hao. U tlo u li rute bana ba hao, ’me u bue ka tsona, ha u lutse tlung ea hao, leha u le tseleng u tsamaea, leha u ea robala, leha u tsoha.” (Deuteronoma 6:4-9; 4:9; 11:18-21) Ho tsitsa ho joalo ho theosa le lilemo ho tla etsa ho hongata ho thusa bana ba hao ho hlaolela pelo e tšabang Jehova.
16. (a) Ntlha ea boraro ke efe, ’me ke hobane’ng ha ee e le ea bohlokoa hakaale? (b) Batsoali ba lokela ho ipotsa lipotso life?
16 Batsoali ba boetse ba tlameha ho loanela ho hatisa ka likelellong le lipelong tsa bana ba bona hore bona ka bobona, joaloka batsoali, ke “ba tšabang Jehova.” (Pesaleme ea 22:23) Tsela e ’ngoe eo ba ka etsang sena ka eona ke ka ho sebelisa keletso ea puso ea Molimo ha ba rupela le ho khalemela bana ba bona. Ena ke ntlha ea boraro eo ho ka nahanoang ka eona. Ipotse: ‘Na ke ithuta Bibele le bana ba ka kamehla?’ ‘Na ke sebelisa ka botlalo lithuso tse kang Buka ea ka ea Lipale tsa Bibele le Ho Mamela Mosuoe e Moholo bakeng sa bana ba ka ba banyenyane?’ Ha ba ntse ba hōla, na ke sebelisa buka Bocha ba Hao—Ho Fumana se Molemohali ho Bona le lihlooho tsa “Bacha ba Botsa” tse ho Tsoha? Na ke lokisetsa boikhathollo le boithabiso bo botle bo ke keng ba ba le tšusumetso e kotsi baneng ba ka? ‘Na ke amohetse se boletsoeng ke mokhatlo o hlophisitsoeng oa Jehova ka thuto e phahameng?’ ‘Na ke rupela bana ba ka ho latela seo?’ ‘Na lipakane tseo ke li beileng bakeng sa bana ba ka ke tse tla ba thusa ho ba le “tšabo ea bomolimo”?’—Ba-Heberu 5:7, NW.
17. Ke mang ea fumanang molemo ha bana ba ithuta ho tšaba Jehova? Bontša.
17 Melemo le thabo ha li na ho tlela bana ba hao feela empa le uena li tla u tlela ka baka la ho etsa sohle seo u ka se khonang ho ba laea ka ‘tšabo ea Jehova.’ Ka mohlala, Paki eo qetellong ea letsatsi e utloang “maoma a ntoa,” joaloka ha mosali e mong a boletse, e fumana ntho e ’ngoe le e ’ngoe e tšoanela boiteko boo e bo entseng ha e utloa morali oa hae ea lilemo li supileng a rapela Jehova. Mahlo a hae a tlala likeleli ’me o ikutloa a le motlōtlō ha a mamela thapelo ea morali oa hae: “Jehova ea lerato, kea u leboha ka lintho tsohle tse molemo tseo u nketselitseng tsona kajeno. Kea u leboha bakeng sa lijo tsa ka. Jehova, thusa baena bohle ba teronkong le likampong tsa mahloriso ho fumana lijo, le baena le bo-khaitseli ba basesaane kaofela ba linaheng tse ling. Jehova, le bona u ba thuse hore ba fumane lijo tse lekaneng. Le ba kulang, u ba thuse hore ba hlaphoheloe e le hore ba ka ea libokeng. Jehova, ke kōpa hore u etse hore mangeloi a ntlhokomele ha ke robetse bosiu, le ntate oa ka le ’mè oa ka, le khaitseli’a ka, le ntate-moholo oa ka le nkhono oa ka, le baena bohle le bo-khaitseli ba ’neteng. Ka Mora oa hao Jesu, Amen.”
18. Re ama ba bang joang tabeng ee ea ho tšaba Jehova?
18 Tabeng ena ea ho tšaba Jehova, re tlameha ho hopola hore re ama ba bang ka mohlala oo re o beang. Batsoali ba ama bana ba bona. Baholo le bahlanka ba sebeletsang ba ama liphutheho tsa habo bona. Balebeli ba tsamaeang ba ama bao ba ba sebeletsang. Ka ho totobetseng, ke ka lebaka lena marena a Iseraele a neng a laeloa ho bala Molao oa Molimo ka matsatsi ’ohle a bophelo ba ’ona e le hore a “tle a ithute ho tšaba Jehova.” (Deuteronoma 17:18-20) Mohlala oo morena a neng a tla o bea oa ho tšaba Jehova o ne o ka ama sechaba sohle.
19. Pale e paka eng ka Baiseraele?
19 Pale e paka ’nete ea hore Iseraele, e le sechaba, e ile ea khaotsa ho tšaba Jehova. Ba ile ba nahana hore ho ba le tempele Jerusalema ho ne ho tla sebetsa e le tšireletso ho bona, ntho e kang seroala sa “lehlohonolo,” ho sa tsotellehe hore na ba utloa melao ea hae kapa che. (Jeremia 7:1-4; Mikea 3:11, 12) Empa ba ne ba fositse. Jerusalema le tempele ea eona li ile tsa timetsoa. Hamorao, ha ba boptjoa hape ho ba sechaba, ba ile ba boela ba hlōleha ho bontša tšabo e loketseng ho Jehova. (Malakia 1:6) Ho na le ho hongata hoo re ka ithutang hona phihlelong ena, ho tla akarelletsoa sehloohong se latelang.
20. Re ka akaretsa joang hore na ke hobane’ng ha re lokela ho tšaba Jehova?
20 Joale, hopola hore ho tšaba Jehova ha ho qephise lerato la rōna ho eena; ho fapana le hoo, hoa le matlafatsa le ho le tiisa. Ho utloa litaelo tsa hae kaofela ha ho na ho paka feela hore re tšaba Jehova empa hore rea mo rata. Lintho tseo ke tsa bohlokoa ka bobeli. Ho ke ke ha etsahala hore re be le e ’ngoe e be re hloka e ’ngoe. Ke habohlokoa hakaakang hore batsoali ba hahe tšabo ena ea bomolimo ho Jehova le lerato ho eena ka ho bana ba bona! ’Me ke thabo e kaakang eo hona ho e tlisang ho ba baholo le ba banyenyane! Ka hona, e se e ka re ka ikutloa ka tsela e tšoanang le eo mopesaleme a ileng a ikutloa ka eona ha a re: “U tlamelle pelo ea ka eohle le tšabo ea lebitso la hao.”—Pesaleme ea 86:11.
Lintlha tsa ho Nahanisisoa
◻ Re ka rata Jehova ra ba ra mo tšaba joang?
◻ Melemo e meng ea ho tšaba Jehova ke efe?
◻ Ke lintlha life tse tharo tse ka thusang batsoali ho thusa bana ba bona ho hlaolela pelo e tšabang Jehova?
◻ Re ama ba bang joang tabeng ea ho tšaba Jehova?
[Setšoantšo se leqepheng la 12]
Ho tšaba Jehova ho tla thusa bacha ho hanyetsa liteko tsa ho etsa bobe
[Setšoantšo se leqepheng la 14]
Batsoali ba lokela ho thusa bana ba bona ho hlaolela tšabo e ntle ea Jehova
[Setšoantšo se leqepheng la 15]
“Lintho li tla tsamaea hantle bakeng sa ba tšabang Molimo oa ’nete.”—Moeklesia 8:12, “NW”
[Tlhaloso ea Moo Setšoantšo se Nkiloeng Teng]
Ka tumello ea Serapa sa Linoha le Liphoofolo sa Hartebeespoort