Na Bokamoso ba Hao bo Reriloe ke Matla a Rerang Liketsahalo Esale Pele?

HAEBA u ne u ka pholoha kotsing ea tšohanyetso e neng e tla u bolaea, na u ne u tla ikutloa hore u thusitsoe ke matla a rerang liketsahalo esale pele? Kapa ho e-na le hoo u ne u tla leboha feela hore e be ho ile ha etsahala hore u be sebakeng se nepahetseng ka nako e nepahetseng?

Monna ea bohlale Salomone o itse: “Ka boela ka bona tlas’a letsatsi hoba ba mathang ka sekhahla hase bona ba sieang peisong, kapa hona hore ntoa ke ea liqhenqha, kapa hona hore bohobe ke ba ba bohlale, leha e le hona hore leruo ke la ba nang le kutloisiso, le hona ho ratoa ha se ha ba nang le tsebo; hobane nako le ketsahalo e sa lebelloang li ba oela bohle.” (Moeklesia 9:11, NW) Lintho tse sa lebelloang li etsahala hangata hakaakang! Semathi seo ho lebelletsoeng hore se tla hlōla se hlaha kotsi, ’me se neng se sa lebelloa hore se ka hlōla sea hlōla. Kotsi ea tšohanyetso e tlisetsa rakhoebo ea tšepahalang mathata a lichelete, e etsa hore rakhoebo e mong ea sa tšepahaleng eo ba qothisanang lehlokoa le eena a rue. Empa na Salomone o ile a re liketsahalo tsena tse sa tloaelehang li tlisoa ke ho hlolloa bokamoso? Che ha ho joalo. Liketsahalo tsena e mpa feela e le liphello tsa “nako le ketsahalo e sa lebelloang.”

Jesu Kreste o ile a hlokomela seo ka ho tšoanang. Ha a bua ka ketsahalo eo ho bonahalang eka bamameli ba hae ba ne ba e tseba, Jesu o ile a botsa: “Ba leshome le metso e robileng meno e le ’meli, bao tora e ba oetseng holimo Siloe, ea ba bolaea, hleka le lekanya hoba ba ne ba le molato ho fetisa batho bohle ba ahileng Jerusalema na?” (Luka 13:4) Jesu ha aa ka a re mafu ao a bakiloe ke ho hlolloa bokamoso ha mohlolo kapa ke thato ea Molimo, leha e le hore o ne a lumela hore ba shoeleng ka mokhoa o itseng ba ne ba ka behoa molato ho feta ba bang. Kotsi e mpe ea tšohanyetso e ne e mpa e le mohlala o mong feela oa ho sebetsa ha nako le ketsahalo e sa lebelloang.

Ha ho kae kapa kae moo Bibele e khothalletsang khopolo ea hore Molimo o rerile esale pele nako ea rōna ea ho shoa. Ke ’nete hore Moeklesia 3:1, 2 e re: “Ntho e ’ngoe le e ’ngoe e na le sebaka sa eona, ’me nako e teng ea tsohle tse etsoang tlas’a letsatsi: nako e teng ea ho tsoaloa, e teng nako le ea ho shoa; nako e teng ea ho hloma, e teng nako le ea ho fothola se hlomiloeng.” Empa Salomone o ne a mpa a bua ka potoloho e tsoelang pele ea bophelo le lefu tse hlasetseng batho ba sa phethahalang. Rea tsoaloa, ’me ha nako e fihla, ha nako e tloaelehileng ea bophelo e finyelletsoe—hangata ka mor’a lilemo tse 70 kapa 80 kapa tse atametsang hona moo—rea shoa. Ho ntse ho le joalo, Molimo hase oona o rerang nako e tobileng ea lefu esale pele joalokaha e se oona o rerang nako eo ka eona molemi a tla etsa qeto ea “ho hloma” kapa “ho fothola se hlomiloeng.”

Ha e le hantle, hamorao Salomone o bontša hore motho a ka ’na a shoa pele ho nako, o re: “U se ke ua iketsa e mobe ka ho fetisisa, u se ke ua ipea leoatla; hobane ke ha u no u tla shoela’ng, e e-s’o ho be nako ea hao?” (Moeklesia 7:17) Keletso ena e ne e tla utloahala joang haeba nako ea motho ea ho shoa e ne e se e ntse e reriloe esale pele ka tsela e ke keng ea fetoha? Ka hona Bibele e hana khopolo ea ho hlolloa bokamoso. Baiseraele ba bakoenehi ba ileng ba amohela khopolo ena ea bohetene ba ile ba nyatsoa ka ho tebileng ke Molimo. Esaia 65:11, (NW) e re: “Lōna le ba tlohelang Jehova, ba lebalang thaba ea ka e halalelang, ba tekang tafole bakeng sa molimo oa Lehlohonolo le ba tšellang molimo oa Matla a Rerang Liketsahalo Esale Pele veine e tsoakiloeng.”

Joale, ke bothoto bo bokaakang ho bolela hore likotsi tsa tšohanyetso le litsietsi li bakoa ke ho hlolloa bokamoso kapa, ho hobe le ho feta moo, hore li bakoa ke Molimo ka booona! Bibele e bolela hore “Molimo ke lerato,” joale ho o nģosa ka hore ke mohloli oa mahlomola a batho ho khahlanong le ’nete ena ea motheo.—1 Johanne 4:8, NW.

Merero ea Molimo ka Bokamoso

Leha ho le joalo, ho thoe’ng ka litebello tsa rōna tsa pholoho? Na ’nete ea hore ho hlolloa bokamoso ho ke keng ha qojoa ha ho laole bophelo ba rōna e bolela hore re lokela ho phela bophelo bo se nang morero? Ho hang ha ho joalo, hobane Molimo o rerile seo moloko oa motho ka kakaretso o tla se fumana nakong e tlang. Bibele e bua ka ho bōptjoa ha “lefatše le lecha moo ho loka ho ikahetseng teng.”—2 Petrose 3:13.

Ho finyella sena, Molimo o tla kenella ka ho toba litabeng tsa batho. E ka ’na eaba u sa tsebe, u ’nile ua rapella hore sena se etsahale, ka ho pheta thapelo e reng: “Ho tle ’muso oa hao; thato ea hao e etsoe lefatšeng, joale ka ha e etsoa leholimong.” (Mattheu 6:10) ’Muso ona ke puso ea sebele e thehiloeng maholimong. Ka ho rapella hore o tle, u rapella hore ’Muso oo o nke taolo ea lefatše mebusong e teng hona joale.—Daniele 2:44.

Ho Sireletsa Bokamoso ba Hao

Hore na liketsahalo tsena tse ipiletsang li tla ama bokamoso ba hao joang ha hoa itšetleha ka ho hlolloa bokamoso kapa esita le ka nako le ketsahalo e sa lebelloang, empa ho itšetlehile ka tsela eo u khethang ho e latela. Hopola koluoa eane ea tora ea Siloe. Jesu o ile a sebelisa ketsahalo eo e bohloko ho ruta thuto ea bohlokoa. Ba ileng ba shoa ha tora eo e heleha, ba ile ba hlōleha ho pholoha ketsahalong e ileng ea ba hlahela. Ka lehlakoreng le leng, bamameli ba Jesu ba ne ba ka qoba timetso e neng e tla tlisoa ke khalefo ea Molimo. Jesu o ile a ba lemosa hore: “Ekare ha le sa bake, le tla timela joalo kaofela.” (Luka 13:4, 5) Ka ho hlakileng, ba ne ba ka ikhethela bokamoso ba bona.

Re fuoe monyetla o tšoanang kajeno—ho sebeletsa pholoho ea rōna. (Ba-Filippi 2:12) Molimo o lakatsa hore “batho ba mefuta eohle . . . ba fihle tsebong e nepahetseng ea ’nete.” (1 Timothea 2:4, NW) Le hoja e mong le e mong oa rōna a angoa ke lefutso le tikoloho ho isa bohōleng bo itseng, Molimo o re file boikhethelo—matla a ho etsa qeto mabapi le kamoo re batlang ho sebelisa bophelo ba rōna ka teng. (Mattheu 7:13, 14) Re ka etsa se nepahetseng kapa se fosahetseng. Re ka fumana boemo bo amohelehang ho Jehova Molimo ’me ra fumana bophelo, kapa re ka mo furalla ’me ra shoa.

Ba bangata ba ikhethela ho phela ka ntle ho taolo ea Molimo. Ba sebelisa bophelo ba bona ho lelekisa lintho tse bonahalang, menyaka, kapa botumo. Empa Jesu o ile a lemosa: “Iponeleng, le ipoloke bakeng sa takatso ea leruo; hobane bophelo ba motho bo ke ke ba tsoa bongateng ba lintho tseo a li ruileng.” (Luka 12:15) Joale, bophelo ba rōna bo itšetlehile ka eng? Ho 1 Johanne 2:15-17, Bibele ea hlalosa: “Se rateng lefatše, leha e le tse lefatšeng. . . . Tsohle tse lefatšeng, takatso ea nama, le takatso ea mahlo, le boikhantšo joa bophelo, ha li tsoe ho Ntate, empa li tsoa lefatšeng. ’Me lefatše lea feta, le eona takatso ea lona; empa ea etsang thato ea Molimo, o hlola ka ho sa feleng.”

Ho Khetha Bophelo

U ka kholiseha joang hore ruri u etsa thato ea Molimo? Jesu o ile a bolela hore: “Bophelo bo sa feleng ke hore ba u tsebe, uena Molimo o ’notši oa ’nete, le Jesu Kreste eo u mo romileng.” (Johanne 17:3) Tsebo e nepahetseng e tsoang Bibeleng e fana ka motheo oa tumelo. “Tumelo ha e le sieo, ha ho kamoo Molimo o ka khahlisoang; ea atamelang Molimo e ka khona a lumele hobane o teng, le hoba ke oona moputsi oa ba o batlang.” (Ba-Heberu 11:6) Tsebo eo ho hlokahalang hore u e fumane e-ea fumaneha. Lipaki tsa Jehova li se li thusitse ba limillione ho e fumana ka thuto ea ka mehla ea Bibele.a

E le hore u thabise Molimo, u tla tlameha ho etsa liphetoho tse itseng. Ho ka ’na ha ba le mekhoa e mebe eo u lokelang ho e hlōla kapa esita le litloaelo tsa boitšoaro bo bobe tseo u lokelang ho li khaotsa. U se ke ua tlohella boiteko ba ho fetoha, joalokaha eka ho ke ke ha khoneha hore u fetohe. Khopolo ea hore lintho li ke ke tsa fetoha ke khopolo e ’ngoe feela e nkiloeng thutong ea bohata ea ho hlolloa bokamoso. Ka thuso ea Jehova, ho ka etsahala hore e mong le e mong ‘a fetole mohopolo oa hae’ le hore a fumane “botho bo bocha.” (Ba-Roma 12:2, NW; Ba-Efese 4:22-24, NW) Boiteko ba hao ba ho thabisa Molimo bo ke ke ba hlokomolohuoa. O lula e le malala-a-laotsoe bakeng sa ho hlohonolofatsa ba etsang thato ea oona.

Rea lumela hore ho ithuta Bibele ho ke ke ha rarolla mathata ’ohle a hao. Bahlanka ba ’nete ba Molimo ba hlaheloa ke likotsi tsa tšohanyetso le maemo a mabe, joaloka ba bang. Leha ho le joalo, Molimo o ka re fa bohlale ba ho sebetsana le mathata. (Jakobo 1:5) Ho boetse ho na le thabo ea ho tseba hore motho o na le kamano e ntle le Molimo. Liproverbia 16:20, (NW) e re: “Ho thabile ea tšepang Jehova.”

Paradeiseng e tsosolositsoeng tlas’a ’Muso oa Molimo, re ke ke ra hlola re tšosoa ke nako le ketsahalo e sa lebelloang. Ha e le hantle, Molimo o tla tlosa lintho tsohle tse senyang thabo ea motho hona joale. Bibele e tšepisa hore: “Molimo o tla hlakola meokho eohle mahlong a [rōna]; lefu ha le sa tla hlola le e-ba teng; ’me ha ho sa tla ba masoabi, leha e le ho bokolla, kapa bohloko.” (Tšenolo 21:4) Batho ba bangata haholo ba bolailoeng ke likotsi tsa tšohanyetso ba tla ba le phihlelo ea ho tsosoa bafung.—Johanne 5:28, 29.

Na u tla rua bokamoso boo bo khanyang? Ha Baiseraele ba ne ba le mothating oa ho kena Naheng e Tšepisitsoeng, Moshe o ile a ba bolella hore: “Ke beile pel’a hao bophelo le lefu, lehlohonolo le thohako. Ikhethele bophelo, u tle u phele, uena, le litloholo tsa hao; u tle u rate Jehova, Molimo oa hao, u utloe lentsoe la hae, ’me u mo khomarele; hobane ke eena bophelo ba hao, le bolelele ba matsatsi a hao.”—Deuteronoma 30:19, 20.

Che, ha re tlas’a taolo ea ho hlolloa bokamoso ho se nang mohau. Thabo ea hao ea nakong e tlang, ha e le hantle bokamoso ba hao ba ka ho sa feleng, bo matsohong a hao. Re u khothalletsa hore u khethe bophelo.

[Mongolo o botlaaseng ba leqephe]

[Ntlha e Qolotsoeng e leqepheng la 5]

Baiseraele ba bakoenehi ba ileng ba amohela khopolo ea bohetene ea ho hlolloa bokamoso ba ile ba nyatsoa ka ho tebileng ke Molimo