Matla a Molimo a Bonahala Linaleling
“Phahamisetsang mahlo holimo ’me le bone. Ke mang ea bōpileng lintho tsee? Ke Ea hlahisang lekhotla la tsona ka palo, e ’ngoe le e ’ngoe o e bitsa le ka lebitso. Ka lebaka la bonatla ba hae bo boholo, kaha o boetse o na le matla a maholo, ha ho le e ’ngoe ea tsona e haellang.”—ESAIA 40:26.
LETSATSI ke naleli e itekanetseng ka boholo. Leha ho le joalo, le leholo ho feta lefatše ka makhetlo a 330 000. Boholo ba linaleli tse haufi le lefatše li nyenyane ho feta letsatsi. Leha ho le joalo, linaleli tse ling, tse kang e bitsoang V382 Cygni, li khōlō ho feta letsatsi bonyane ka makhetlo a 27.
Letsatsi le hlahisa matla a makae? Ak’u inahanele feela hore na mollo o bohale hakae haeba o le bohōle ba lik’hilomithara tse leshome le metso e mehlano empa u ntse u utloa mocheso oa oona. Letsatsi le bohōle ba lik’hilomithara tse ka bang limilione tse 150 ho tloha lefatšeng. Empa, ha ho chesa haholo le ka tlabola letlalo! Hoa makatsa hore ebe ke karolo e nyenyane haholo ea matla a letsatsi e fihlang lefatšeng. Ho ntse ho le joalo, karoloana ena ea matla a letsatsi e lekane hore e etse hore bophelo bo tsoele pele lefatšeng.
Ha e le hantle, bo-rasaense ba fumane hore matla a tsoang letsatsing feela a lekane hore a ka etsa hore bophelo bo tsoele pele lipolaneteng tse libilione tse 31 tse kang lefatše. Kapa ha matla ana a maholo a lekanngoa ka tsela e ’ngoe: Haeba matla ’ohle a letsatsi a ne a ka huloa ka motsotsoana feela a ne a tla fepela United States “matla ka lilemo tse 9 000 000 ho ea ka matla ao e a sebelisang hona joale,” ho rialo Space Weather Prediction Center (SWPC) ho Inthanete.
Matla a letsatsi a tsoa bohareng ba lona—e leng mohloling oa matla a nyutlelie. Letsatsi le leholo haholo ’me bohareng ba lona ho teteane hoo ho nkang lilemo tse limilione hore matla ana a hlahelle ka holimo. “Haeba Letsatsi le ne le ka emisa ho hlahisa matla kajeno, ho ne ho ka nka lilemo tse 50 000 000 hore liphello tsa seo li utloahale Lefatšeng!” Sena ke se buuoang ke SWPC Inthaneteng.
Joale nahana ka taba ena: Ha u phahamisa mahlo a hao bosiung boo leholimo le hlakileng ka bona, u bona linaleli tse likete, e ’ngoe le e ’ngoe e hlahisa matla a maholo, a kang a letsatsi la rōna. Bo-rasaense ba lekanya hore ho na le linaleli tse libilione tsa libilione sepakapakeng!
Linaleli tsee kaofela li tsoa hokae? Hona joale boholo ba babatlisisi ba lumela hore ka mabaka ao ba ntseng ba sa a utloisise, ho iketsahaletse feela hore leholimo le lefatše li be teng lilemong tse fetileng tse ka bang limilione tse likete tse 14. Bibele e re: “Tšimolohong Molimo o ile a bōpa maholimo le lefatše.” (Genese 1:1) Ntle ho pelaelo, Ea entseng linaleli tse khōlō tseo e leng mohloli oa matla ho ka thoe “o na le matla a maholo.”—Esaia 40:26.
Kamoo Molimo a Sebelisang Matla a Hae Kateng
Jehova Molimo o sebelisa matla a hae ho matlafatsa ba etsang thato ea hae. Ka mohlala, moapostola Pauluse o ile a sebelisa matla a hae ho ruta ba bang ka Molimo. Pauluse o ne a se na matla a sa tloaelehang, empa o ne a khona ho etsa mosebetsi o mongata o molemo ho sa tsotellehe khanyetso e matla. O ne a khona joang? O ile a lumela hore o amohetse “matla a fetang se tloaelehileng” ho Molimo.—2 Bakorinthe 4:7-9.
Jehova Molimo o ile a boela a sebelisa matla a hae ho timetsa ba tlōlang melao ea hae ea boitšoaro ka boomo. Jesu Kreste o ile a etsa mohlala ka timetso ea Sodoma le Gomora le Moroallo oa mehleng ea Noe ha a bontša kamoo Jehova a hloaeang kateng ha a sebelisa matla a hae a ho timetsa. Jesu o ile a profeta hore haufinyane Jehova o tla boela a sebelisa matla a hae ho timetsa ba tlōlang melao ea Hae.—Matheu 24:3, 37-39; Luka 17:26-30.
U Ikutloa Joang?
Ka mor’a ho nahanisisa ka matla a Molimo a bonahalang linaleling, u ka ’na ua ikutloa joaloka Morena Davida, ea ileng a re: “Ha ke bona maholimo a hao, mesebetsi ea menoana ea hao, khoeli le linaleli tseo u li lokisitseng, motho ea shoang ke’ng hore u ’ne u mo hopole, le mora oa motho oa lefatše ke’ng hore u mo hlokomele?”—Pesaleme ea 8:3, 4.
Ka sebele ha re bona kamoo re seng letho kateng ha re bapisoa le pōpo eohle, re ikutloa re tlameha ho ikokobetsa. Empa matla a Molimo ha aa lokela ho etsa hore re ikutloe re le basesaane. Jehova o ile a bululela moprofeta Esaia hore a ngole mantsoe ana a khothatsang: “[Molimo] o fana ka matla ho ea khathetseng; ’me o etsa hore matla a feletseng a atele ea se nang matla. Bashanyana ba tla khathala ’me ba tepelle, ’me ruri bahlankana ba tla khoptjoa, empa ba tšepileng Jehova ba tla boela ba fumane matla. Ba tla nyoloha ka mapheo a kang a ntsu. Ba tla matha ’me ba ke ke ba tepella; ba tla tsamaea ’me ba ke ke ba khathala.”—Esaia 40:29-31.
Haeba u lakatsa ho etsa thato ea Molimo, u ka kholiseha hore o tla u fa moea oa hae o halalelang e le hore o u thuse hore u tsoele pele ho etsa thato ea hae. Empa u lokela ho o kōpa. (Luka 11:13) Molimo a ka u fa matla a ho mamella teko efe kapa efe le a ho etsa se nepahetseng.—Bafilipi 4:13.
[Ntlha e Qolotsoeng e leqepheng la 7]
Molimo a ka u fa matla a ho etsa se nepahetseng
[Litšoantšo tse leqepheng la 7]
Ho tloha ka holimo ka letsohong le letšehali ho ea ho le letona: sehlopha sa linaleli sa Whirlpool, sehlopha sa linaleli sa Pleiades, Orion Nebula, sehlopha sa linaleli sa Andromeda
[Litšoantšo tse leqepheng la 7]
Letsatsi le leholo ho feta lefatše ka makhetlo a 330 000
[Moo Litšoantšo li Nkiloeng Teng leqepheng la 7]
Pleiades: NASA, ESA and AURA/Caltech; all others above: National Optical Astronomy Observatories