Jehova O Rata ho Loka le Toka
NGOANANA e mong e monyenyane oa Sarajevo o ipotsa hore na ke hobane’ng ha bana ba motse oa habo ba tlameha ho mamella mahlomola a makaalo. O re: “Ha rea etsa letho. Ha re na molato.” Bo-’mè ba Argentina ba tsielehileng ba entse pontšo ea nyatso ka lilemo tse 15, lepatlelong la motse la Buenos Aires, ba ipelaetsa ka ho nyamela ha bara ba bona. Moafrika ea bitsoang Emmanuel, eo ’mè oa hae le baralib’abo ba bararo ba ileng ba bolaoa ka sehlōhō nakong eo pefo ea morabe e neng e simoloha, oa tiisa: “E mong le e mong o tlameha ho fumana moputso oa hae o mo loketseng . . . Re batla toka.”
Toka ke e ’ngoe ea litšoaneleho tse ka sehloohong tsa Jehova Molimo. Bibele e re: “Litsela tsa hae kaofela li lokile.” Ruri, Jehova o “rata ho loka le toka.” (Deuteronoma 32:4; Pesaleme ea 33:5, NW) Ho tseba Molimo hantle, re tlameha ho utloisisa hore na o na le maikutlo afe ka toka ’me re ithute ho a etsisa.—Hosea 2:19, 20; Baefese 5:1.
Maikutlo a rōna ka toka mohlomong a susumelitsoe ke seo batho ba nkang tšoaneleho ena e le sona. Likarolong tse ling tsa lefatše, hangata toka e tšoantšoa ka mosali ea foufetseng ea nkileng sabole le sekala. Ho lekanngoa hore toka ea batho ha e leeme, ke hore, e iphoufaletsa leruo kapa tšusumetso. E lokela ho lekanyetsa ka hloko hore na moqosuoa o molato kapa ha a na oona. Ka sabole ea eona, toka e lokela ho sireletsa ba seng molato le ho otla bafosi.
Buka ea Right and Reason—Ethics in Theory and Practice e re “toka e amana le molao, tlameho, litokelo le boikarabelo, ’me e putsa ka ho hloka leeme kapa ho latela seo motho a tšoaneloang ke sona.” Empa toka ea Jehova e fetela pejana. Re ka hlokomela sena ka ho hlahloba liketso le litšoaneleho tsa Jesu Kreste, ea tšoanang haholo le Ntate oa hae oa leholimo.—Baheberu 1:3.
Mongoli oa Kosepele Matheu o ile a sebelisa mantsoe a Esaia 42:3 (NW) ho Jesu, ha a re: “Ha ho lehlaka le tletleraneng leo a tla le silakanya, ’me ha ho khoele ea lebone ea folakse e kunkelang eo a tla e tima, ho fihlela a romela toka ka katleho.” Jesu o ile a bolela molaetsa o tšelisang ho batho ba neng ba tšoana le lehlaka le tletleraneng le neng le kobehile le bile le hataketsoe. Ba ne ba tšoana le khoele ea lebone e kunkelang, joalokaha eka tlhase ea bona ea ho qetela ea bophelo e ne e le haufi le ho tima. Ho e-na le hore ka tšoantšetso a silakanye mahlaka a tletleraneng le ho tima likhoele tsa lebone tse kunkelang, Jesu o ile a utloela ba mahlomoleng bohloko, a ba ruta le ho ba folisa, ’me a ba hlakisetsa toka ea Jehova Molimo. (Matheu 12:10-21) Joalokaha boprofeta ba Esaia bo ile ba bolela esale pele, mofuta o joalo oa toka o ne o fana ka tšepo.
Mohau oa Jehova le Toka ea Hae
Mohau ke karolo ea bohlokoa ea toka ea Molimo. Sena se ile sa hlahella ha Jesu a ne a le lefatšeng. O ile a emela litekanyetso tsa Molimo tsa toka le ho loka ka tsela e phethahetseng. Leha ho le joalo, bangoli le Bafarisi ba Bajuda ba ne ba batla ho finyella ho loka ka ho latela melao e thata—bongata ba eona e le eo ba e entseng. Toka ea bona e khomarelang molao ka tloaelo e ne e hloka mohau. Likhohlano tse ngata pakeng tsa Jesu le Bafarisi li ne li likoloha tsekong ena: Toka ea ’nete le ho loka ke eng?—Matheu 9:10-13; Mareka 3:1-5; Luka 7:36-47.
Jesu o ile a bontša tsela ea ho tšoara ba bang ka toka le ka ho loka. Monna e mong ea rutehileng Molaong o kile a botsa Jesu se hlokahalang bakeng sa ho rua bophelo bo sa feleng. Jesu ha a arabela o ile a mo botsa potso le ho mo babatsa ha a e araba ka hore melao e ’meli ea bohlokoa ka ho fetisisa ke hore motho a rate Molimo ka pelo eohle ea hae, soule, kelello le matla le ho rata moahelani oa motho joalokaha a ithata. Eaba monna enoa oa botsa: “Moahelani oa ka ke mang?” Jesu o ile a araba ka ho pheta setšoantšo sa Mosamaria ea nang le moea oa boahelani.—Luka 10:25-37.
Setšoantšo sa Jesu sa Mosamaria se ile sa bontša ho loka ha Jehova le toka ea hae e nang le mohau. Ka hore ka ho hloka boithati a thuse monna ea lemetseng eo a neng a sa mo tsebe, Mosamaria o ile a etsa ho hong ho khabane, ho nang le toka le ho mohau. Jesu ka boeena o ile a bontša moea o tšoanang ha a le lefatšeng. O ne a lokile a bile a e-na le toka. Ho feta moo, o ile a nehelana ka bophelo ba hae bakeng sa batho ba futsanehileng, bakeng sa baetsalibe le moloko oa batho ba sa phethahalang ba bohlankeng ba ho utloa bohloko, ho kula le lefu. Moapostola Pauluse o ile a amahanya ho loka le tokisetso ea thekollo. O ile a ngola: “Joalokaha ka tšito e le ’ngoe phello ho batho ba mefuta eohle e ile ea e-ba tsuo, ka ho tšoanang hape ka ketso e le ’ngoe ea tokafatso [kapa, “ketso e le ’ngoe e lokileng,” bona le mongolo o botlaaseng ba leqephe ho NW.] phello ho batho ba mefuta eohle ke ho ba bolela ba lokile bakeng sa bophelo.” (Baroma 5:18) ‘Ketso ena e le ’ngoe e lokileng’ e ne e le tsela ea Molimo ea ho boloka moloko oa batho ba utloang liphellong tse senyang tsa sebe sa Adama, seo ba neng ba sa ikarabelle ka ho toba ho sona.
Toka ea Molimo e ne e batla ho lopolla batho ba baetsalibe le ho phahamisa melao-motheo e lokileng ka nako e tšoanang. Ho hlokomoloha sebe e ka be e bile ho sa lokang le ho bontšang ho hloka lerato, hobane ho ka be ho ile ha khothalletsa ho hloka molao. Ka lehlakoreng le leng, haeba toka ea Molimo e ne e ile ea lekanyetsoa ho faneng ka meputso kapa likotlo, boemo ba moloko oa batho e ka be e bile bo hlokang tšepo. Ho ea ka Bibele, “moputso oo sebe se o lefang ke lefu” ’me “ha ho motho ea lokileng, leha a le mong.” (Baroma 3:10; 6:23) Ka tahlehelo ea hae e khōlō ea botho le ea Mora oa hae ea ratoang, Jehova o ile a fana ka sehlabelo sa poelano bakeng sa libe.—1 Johanne 2:1, 2.
Thekollo ena e bontša hore toka ea bomolimo e tlamahane le lerato le laoloang ke melao-motheo (a·gaʹpe, ka Segerike). Ruri, toka ea Molimo ke ho phethoa ha melao-motheo ea hae e lokileng—pontšo ea litekanyetso tsa hae tsa boitšoaro. Ka hona, ha a·gaʹpe e bontšoa ke Molimo, ke lerato leo toka ea bomolimo e thehiloeng holim’a lona. (Matheu 5:43-48) Ka hona haeba re hlile re utloisisa toka ea Jehova, re tla tšepa liqeto tsa hae tsa boahloli ka ho feletseng. Kaha ke “Moahloli oa lefatše,” o etsa se nepahetseng kamehla.—Genese 18:25; Pesaleme ea 119:75.
Etsisa Toka ea Jehova
Bibele e re khothaletsa hore re “be baetsisi ba Molimo.” (Baefese 5:1) Sena se bolela ho etsisa toka ea hae esita le lerato la hae. Leha ho le joalo, kaha ha rea phethahala, litsela tsa rōna ha lia phahama joaloka tsa Jehova Molimo. (Esaia 55:8, 9; Ezekiele 18:25) Ka hona re ka bontša joang hore re ba ratang ho loka le toka? Ka ho apara “botho bo bocha, bo ileng ba bōptjoa ho ea ka thato ea Molimo ho lokeng ha ’nete le botšepehing bo sa sekisetseng.” (Baefese 4:24) Joale re tla rata seo Molimo a se ratang ’me re hloee seo a se hloileng. ‘Ho loka ha ’nete’ ho qoba pefo, boitšoaro bo bobe, litšila le bokoenehi, hobane tsena li hlokomoloha se halalelang. (Pesaleme ea 11:5; Baefese 5:3-5; 2 Timothea 2:16, 17) Toka ea bomolimo e boetse e re susumeletsa ho bontša ba bang thahasello ea sebele.—Pesaleme ea 37:21; Baroma 15:1-3.
Ho feta moo, haeba re ananela sebōpeho se mohau sa toka ea Molimo, re ke ke ra sekamela ho ahlola bara kapa baralib’abo rōna moeeng. Ho ka etsahala joang hore re ba utloisise joalokaha Jehova a ba utloisisa? Na re ne re ke ke ra ba ahlola ka pono ea rōna e leeme? Kahoo, Jesu o ile a lemosa: “Khaotsang ho ahlola e le hore le se ke la ahloloa; kaha kahlolo eo le ahlolang ka eona, le tla ahloloa ka eona; ’me ka ntho e lekanyang eo le lekanyetsang ka eona, ba tla le lekanyetsa ka eona. Joale, ke hobane’ng ha u sheba lehlokoa le ka leihlong la mor’eno, empa u sa nahane ka kapa e ka leihlong la hao? Kapa ke joang u ka reng ho mor’eno, ‘Ntumelle ke ntše lehlokoa ka leihlong la hao’; athe, bona! kapa e ka leihlong la hao? Moikaketsi! Pele ntša kapa ka leihlong la hao, ’me joale u tla bona ka ho hlaka kamoo u ka ntšang lehlokoa ka leihlong la mor’eno.” (Matheu 7:1-5) Ho lekanyetsa ka botšepehi mefokolo ea rōna ho tla re thibela ho ahlola ka tsela eo Jehova a neng a tla e talima e sa loka.
Baholo ba phutheho ba khethiloeng ba tlameha ho ahlola linyeoeng tsa liphoso tse tebileng. (1 Bakorinthe 5:12, 13) Ha ba etsa seo, ba hopola hore toka ea Molimo e batla ho bontša mohau moo ho khonehang. Haeba ho se na lebaka la ho o bontša—joaloka tabeng ea baetsalibe ba sa bakeng—mohau o ke ke oa bontšoa. Empa baholo ha ba leleke mofosi ea joalo phuthehong hobane ba batla ho iphetetsa. Ba tšepa hore khato ea ho khaola ka boeona e tla etsa hore a inahane. (Bapisa le Ezekiele 18:23.) Tlas’a bohlooho ba Kreste, baholo ba susumetsoa ke toka tšebeletsong ea bona, ’me sena se akarelletsa ho ba joaloka “tšireletso ha moea o foka.” (Esaia 32:1, 2) Ka lebaka leo ba tlameha ho bontša ho se be leeme le ho ba le kahlolo e molemo.—Deuteronoma 1:16, 17.
Jala Lipeō ka ho Loka
Ha re ntse re letetse lefatše le lecha la Molimo la ho loka, re tlameha ho ‘batla ho loka’ e le hore re thabele kamohelo ea Molimo. (Sofonia 2:3; 2 Petrose 3:13) Khopolo ena e hlalosoa hamolemo mantsoeng ana a fumanoang ho Hosea 10:12: “Le itjalle [lipeō ka, NW] ho loka, le tle le kotule mohau; le itemele thite e ncha; hobane ke nako ea ho batla Jehova, a tle a be a tle, a le nesetse ho loka.”
Bophelong ba rōna ba letsatsi le letsatsi, re na le menyetla e mengata ea ho ‘jala lipeō ka ho loka,’ joalokaha Jesu a ile a bontša ka papiso ea hae ea Mosamaria ea nang le moea oa boahelani. Jehova o tla tiisa hore re ‘kotula mohau.’ Haeba re ntse re tsamaea ‘tseleng ea ho loka,’ re tla tsoela pele ho fumana taeo ka ho loka tlas’a puso ea ’Muso. (Esaia 40:14) Ha nako e ntse e feta, ha ho pelaelo hore re tla ananela ka ho feletseng haholoanyane hore Jehova o rata ho loka le toka.—Pesaleme ea 33:4, 5.
[Setšoantšo se leqepheng la 23]
Mosamaria ea nang le moea oa boahelani o ne a tšoantšetsa toka ea Jehova
[Setšoantšo se leqepheng la 23]
Jesu o ne a utloela batho ba mahlomoleng bohloko, ba neng ba tšoana le mahlaka a tletleraneng