Khaolo ea Bosupa

Ho Malimabe Serapa sa Morara se sa Tšepahaleng!

Esaia 5:1-30

1, 2. “Moratuoa” o lema eng, empa e ipaka e le e soabisang joang?

“HO BATLA ho se papiso e tšoanang le ena ka bokheleke bo hlollang le bokhoni bo phahameng ka ho fetisisa ba puisano e atlehileng.” Ke kamoo ho boletseng mohlalosi e mong oa Bibele ha a bua ka litemana tse qalang tsa Esaia khaolo ea 5. Ho e-na le ho ba mosebetsi o khabane feela, mantsoe a Esaia a fana ka tlhaloso e amang maikutlo ea tlhokomelo e lerato eo Jehova a nang le eona ho batho ba hae. Ka nako e tšoanang, mantsoe ana a re lemosa ka lintho tse sa mo khahliseng.

² Papiso ea Esaia e qala ka ho re: “Ka kōpo, a nke ke binele moratuoa oa ka pina ea moratuoa oa ka mabapi le serapa sa hae sa morara. Moratuoa oa ka o ne a e-na le serapa sa morara letsoapong le behang. A se lema ’me a tlosa majoe ho sona a hloma sefate se setle ka ho fetisisa sa morara o mofubelu ho sona, a haha tora har’a sona. A cheka sehatelo sa veine ho sona. A ’na a lebella hore se tla hlahisa morara, empa qetellong sa hlahisa morara oa naha.”—Esaia 5:1, 2; bapisa le Mareka 12:1.

Tlhokomelo ea Serapa sa Morara

3, 4. Ho fanoa ka tlhokomelo efe e lerato serapeng sa morara?

³ Ho sa tsotellehe hore na Esaia o binela bamameli ba hae papiso ena ka tsela ea sebele kapa che, ruri e hapa tlhokomelo ea bona. Mohlomong ba bangata ba tloaelane le mosebetsi oa ho lema serapa sa morara, ’me tlhaloso ea Esaia e hlakile ebile ke ea sebele. Joaloka balemi ba morara ba kajeno, mong’a serapa sa morara ha a leme peō ea morara, empa o lema “sefate se setle ka ho fetisisa,” kapa sa boleng bo botle haholo, “sa morara o mofubelu”—lekala le ponngoeng kapa lehlōmela le tsoang sefateng se seng sa morara. Ka ho loketseng, o lema serapa sena sa morara “letsoapong le behang,” sebakeng seo ho sona serapa sa morara se tlang ho atleha.

⁴ Ho hlokahala hore motho a sebetse ka thata ho etsa hore serapa sa morara se hlahise litholoana. Esaia o hlalosa hore mong’a sona ‘o lema naha le ho tlosa majoe ho eona’—e leng mosebetsi o tepeletsang, o khathatsang! Mohlomong o sebelisa majoe a maholoanyane ho “haha tora.” Mehleng ea boholo-holo litora tse joalo e ne e le libaka tsa balebeli ba neng ba lebela lijalo khahlanong le liphoofolo le masholu.a Hape, o haha lerako la majoe ho etsa makorota a serapa sa morara. (Esaia 5:5) Hangata sena se ne se etsoa ho thibela khoholeho ea mobu oa bohlokoa o ka holimo.

 5. Ka tšoanelo, ke’ng seo mong’a serapa sa morara a se lebeletseng serapeng sa hae, empa o fumana eng?

⁵ Ha a sebelitse ka thata hakaalo ho sireletsa serapa sa hae sa morara, ka ho utloahalang mong’a sona o ne a tla lebella hore se behe litholoana. A lebeletse hore ho tla etsahala joalo, o cheka sehatelo sa veine. Empa na chai e lebeletsoeng e hlile e ba teng? Che, serapa seo sa morara se hlahisa morara oa naha.

Serapa sa Morara le Mong’a Sona

6, 7. (a) Mong’a serapa sa morara ke mang, hona serapa sa morara ke’ng? (b) Mong’a sona o kōpa kahlolo efe?

⁶ Mong’a sona ke mang, hona serapa see sa morara ke’ng? Mong’a serapa sena sa morara o arabela lipotso tsena ha eena ka boeena a bua: “Joale, Lōna baahi ba Jerusalema le lōna banna ba Juda, ka kōpo ahlolang pakeng tsa ka le serapa sa ka sa morara. Ho sa ntse ho e-na le eng e ka etsoang serapeng sa ka sa morara eo ke sa e etsang ho sona? Ke hobane’ng ha ke ne ke lebeletse hore se hlahise morara, empa qetellong se hlahisitse morara oa naha? Joale, ka kōpo a nke ke le tsebise seo ke tla se etsa serapeng sa ka sa morara: Lekhoakhoa la sona le tla tlosoa, ’me se reretsoe ho chesoa. Lerako la sona la majoe le tla heletsoa, ’me se reretsoe ho ba sebaka sa ho hatakeloa.”—Esaia 5:3-5.

⁷ E, Jehova ke eena mong’a serapa seo sa morara, ’me ka tsela ea tšoantšetso o ka lekhotleng, o batla hore ho lihuoe kahlolo pakeng tsa hae le serapa sa hae sa morara se soabisang. Joale, serapa sa morara ke’ng? Mong’a sona oa hlalosa: “Serapa sa morara sa Jehova oa mabotho ke ntlo ea Iseraele, ’me batho ba Juda ke sebaka se lenngoeng seo a neng a se rata.”—Esaia 5:7a.

 8. Ke’ng se boleloang ke hore ebe Esaia o bitsa Jehova “moratuoa oa ka”?

⁸ Esaia o bitsa Jehova, mong’a serapa sa morara, “moratuoa oa ka.” (Esaia 5:1) Esaia a ka bua ka Molimo ka tsela e bontšang katamelano e joalo hobane feela a e-na le kamano e haufi-ufi le Eena. (Bapisa le Jobo 29:4; Pesaleme ea 25:14.) Leha ho le joalo, lerato la moprofeta eo ho Molimo le fokola haholo ha le bapisoa le lerato leo Molimo a le bontšitseng ho ‘serapa sa hae sa morara’—sechaba seo a se ‘hlomileng.’—Bapisa le Exoda 15:17; Pesaleme ea 80:8, 9.

 9. Ke ka tsela efe Jehova a tšoereng sechaba sa hae joaloka serapa sa morara sa bohlokoahali?

⁹ Jehova o ile a ‘hloma’ sechaba sa hae naheng ea Kanana ’me a se fa melao ea hae le litaelo, tse neng li sebeletsa e le lerako le se sireletsang hore se se ke sa silafatsoa ke lichaba tse ling. (Exoda 19:5, 6; Pesaleme ea 147:19, 20; Baefese 2:14) Ho feta moo, Jehova o ile a se fa baahloli, baprista le baprofeta hore ba se rupele. (2 Marena 17:13; Malakia 2:7; Liketso 13:20) Ha Iseraele e ne e sokeloa ka tlhaselo ea sesole, Jehova o ne a hlahisa bapholosi. (Baheberu 11:32, 33) Ka lebaka le utloahalang, Jehova oa botsa: “Ho sa ntse ho e-na le eng e ka etsoang serapeng sa ka sa morara eo ke sa e etsang ho sona?”

Ho Tsebahatsa Serapa sa Morara sa Molimo Kajeno

10. Jesu o ile a fana ka papiso efe e amanang le serapa sa morara?

¹⁰ E ka ’na eaba Jesu o ne a hopotse mantsoe a Esaia ha a ne a etsa papiso ea balemi ba tletseng moea oa polao: “Ho ne ho e-na le motho e mong, mong’a ntlo, ea ileng a lema serapa sa morara ’me a etsa motero ho se potoloha eaba o cheka sehatelo sa veine ho sona ’me a emisa tora, eaba o se hirisetsa balemi, ’me o etela hōle.” Ka masoabi, balemi bao ba ile ba hloka botšepehi ho mong’a serapa sa morara, ba ba ba bolaea mor’a hae. Jesu o ile a tsoela pele ho bontša hore papiso ena e ne e sa ame Iseraele ea sebele feela ha a ne a re: “’Muso oa Molimo o tla nkuoa ho lōna [Iseraele ea nama] ’me o fuoe sechaba se hlahisang litholoana tsa oona.”—Matheu 21:33-41, 43.

11. Ke serapa sefe sa morara sa moea se neng se le teng lekholong la pele la lilemo, empa ho ile ha etsahala’ng ka mor’a lefu la baapostola?

¹¹ “Sechaba” seo se secha e ile ea e-ba “Iseraele ea Molimo”—sechaba sa moea sa Bakreste ba tlotsitsoeng ba 144 000 ka kakaretso. (Bagalata 6:16; 1 Petrose 2:9, 10; Tšenolo 7:3, 4) Jesu o ile a tšoantša barutuoa bana le “makala” a leng ‘sefateng sa morara sa ’nete,’ e leng eena. Ka ho utloahalang, ho lebeletsoe hore makala ana a behe litholoana. (Johanne 15:1-5) A lokela ho bonahatsa litšoaneleho tse kang tsa Kreste ’me a kopanele mosebetsing oa ho bolela “litaba tsena tse molemo tsa ’muso.” (Matheu 24:14; Bagalata 5:22, 23) Empa haesale ho tloha ka lefu la baapostola ba leshome le metso e ’meli, boholo ba batho ba ipolelang hore ke makala a “sefate sa morara sa ’nete” ba iponahalitse e le makala a bohata—a hlahisang morara oa naha ho fapana le litholoana tse ntle.—Matheu 13:24-30, 38, 39.

12. Mantsoe a Esaia a nyatsa Bokreste-’mōtoana joang, hona a fupere thuto efe bakeng sa Bakreste ba ’nete?

¹² Ka hona, ho nyatsa ha Esaia Juda ho sebetsa ho Bokreste-’mōtoana kajeno. Ho ithuta histori ea bona—lintoa tsa bona, litlhaselano tsa bona tsa bolumeli, Makhotla a bona a Otlang Bakhelohi—ho senola hantle kamoo litholoana tsa bona li ’nileng tsa e-ba bolila kateng! Leha ho le joalo, serapa sa morara sa ’nete sa Bakreste ba tlotsitsoeng le metsoalle ea bona ea “bongata bo boholo” se lokela ho ela hloko mantsoe a Esaia. (Tšenolo 7:9) Hore ba tle ba khahlise mong’a serapa sa morara, ba lokela hore e le batho ka bomong ebile e le sehlopha, ba hlahise litholoana tse mo khahlisang.

“Morara oa Naha”

13. Jehova o tla etsa’ng ka serapa sa hae sa morara kahobane se hlahisitse litholoana tse mpe?

¹³ Kaha o entse boiteko bo sa tloaelehang ba ho hlokomela le ho lema serapa sa hae sa morara, ka ho loketseng Jehova o lebeletse hore e be “serapa sa morara sa veine e phophomang!” (Esaia 27:2) Leha ho le joalo, ho e-na le hore se hlahise litholoana tse ka sebelisoang, se hlahisa “morara oa naha,” ha e le hantle “lintho tse nkhang hampe” kapa “likhunoane tse putileng (bolileng).” (Esaia 5:2, NW; mongolo o botlaaseng ba leqephe; Jeremia 2:21) Ka hona, Jehova o phatlalatsa hore o tla tlosa “lekhoakhoa” la hae la tšireletso le lika-likelitseng sechaba seo. Sechaba seo se tla ‘behoa e le ntho e sentsoeng’ ’me se tla lahloa le ho hlaseloa ke komello. (Bala Esaia 5:6.) Moshe o ne a ile a lemosa hore ba ne ba tla hlaheloa ke lintho tse joalo haeba ba ne ba sa mamele Molao oa Molimo.—Deuteronoma 11:17; 28:63, 64; 29:22, 23.

14. Jehova o lebeletse hore sechaba sa hae se hlahise litholoana life, empa ho e-na le hoo se hlahisa life?

¹⁴ Molimo o lebeletse hore sechaba se hlahise litholoana tse ntle. Mikea, ea phetseng mehleng ea Esaia, oa phatlalatsa: “Jehova o batla eng ho uena haese hore u sebelise toka u rate mosa ’me u inyenyefatse ha u tsamaea le Molimo oa hao?” (Mikea 6:8; Zakaria 7:9) Leha ho le joalo, sechaba se hlōleha ho ela hloko khothatso ea Jehova. “[Molimo] a ’na a lebella kahlolo, empa, bonang! tlōlo ea molao; a lebella ho loka, empa, bonang! mohoo.” (Esaia 5:7b) Moshe o ile a bolela esale pele hore sechaba se sa tšepahaleng se ne se tla hlahisa morara o chefo o tsoang “sefateng sa morara sa Sodoma.” (Deuteronoma 32:32) Ka hona, mohlomong boitšoaro bo bobe ba ho kopanela liphate, ho akarelletsa le bosodoma, ke karolo e ’ngoe ea ho kheloha ha bona Molaong oa Molimo. (Levitike 18:22) Poleloana e reng “tlōlo ea molao” e ka boela ea fetoleloa e le “tšollo ea mali.” Ha ho pelaelo hore tšoaro e mpe joalo e feletse ka hore ho be le “mohoo” oa ba tšoeroeng hampe—e leng mohoo o fihlileng litsebeng tsa Molemi oa serapa sa morara.—Bapisa le Jobo 34:28.

15, 16. Bakreste ba ’nete ba ka qoba ho hlahisa litholoana tse mpe tse ileng tsa hlahisoa ke Iseraele joang?

¹⁵ Jehova Molimo “o rata ho loka le toka.” (Pesaleme ea 33:5) O ile a laela Bajuda: “Le se ke la etsa ka ho hloka toka kahlolong. Le se ke la tšoara ea tlaase ka leeme, ’me le se ke la emela e moholo. Le ahlole oa habo lōna ka toka.” (Levitike 19:15) Ka hona re lokela ho nena leeme ha re sebelisana le ba bang, le ka mohla re se ke ra lumella lintho tse kang morabe, lilemo, leruo kapa bofutsana hore li susumetse tsela eo re nkang batho ka eona. (Jakobo 2:1-4) Ke habohlokoa haholo hore ba sebeletsang boemong ba bolebeli ‘ba se ke ba etsa letho ho ea ka tšekamelo e leeme,’ kamehla ba batle ho utloa taba ka mahlakoreng a mabeli pele ba fana ka kahlolo.—1 Timothea 5:21; Liproverbia 18:13.

¹⁶ Ho feta moo, e ka ba ntho e bonolo hore Bakreste ba phelang lefatšeng le se nang molao ba hōlise boikutlo bo bobe kapa ba borabele mabapi le litekanyetso tsa bomolimo. Empa Bakreste ba ’nete ba lokela ho ‘itokisetsa ho mamela’ melao ea Molimo. (Jakobo 3:17) Ho sa tsotellehe boitšoaro bo bobe ba ho kopanela liphate le pefo tsa ‘tsamaiso ea joale e khopo ea lintho,’ ho hlokahala hore ba ‘lule ba lebetse ka tieo hore kamoo ba tsamaeang kateng hase joaloka batho ba seng bohlale empa ke joaloka ba bohlale.’ (Bagalata 1:4; Baefese 5:15) Ba batla ho qoba pono e lumellang ntho e ’ngoe le e ’ngoe ka ho kopanela liphate, ’me ha ho e-ba le ho se lumellane, ba lokela ho rarolla lintho tse joalo kantle le “bohale le khalefo le ho tleroha le puo e nyefolang.” (Baefese 4:31) Ka ho hlaolela ho loka, Bakreste ba ’nete ba tlotlisa Molimo le ho fumana kamohelo ea hae.

Liphello Tsa Meharo

17. Phatlalatsong ea pele ea bomalimabe ea Esaia, ke boitšoaro bofe bo khopo bo nyatsoang?

¹⁷ Temaneng ea 8, Esaia ha a sa qotsa mantsoe a Jehova. Ha a nyatsa o mong oa “morara oa naha” o hlahisitsoeng ke Juda, eena ka seqo o ntša phatlalatso ea pele liphatlalatsong tse tšeletseng tsa bomalimabe: “Ho malimabe ba kopanyang matlo, le ba eketsang masimo ho fihlela ho se ho se na sebaka se eketsehileng ’me le lulisitsoe le le bang har’a naha! Moo ke ntseng ke utloa Jehova oa mabotho [o hlapantse hore] matlo a mangata, le hoja a le maholo a bile a le matle, a tla makalloa, a hloke moahi. Etsoe esita le liakere tse leshome tsa serapa sa morara li tla hlahisa tekanyo e le ’ngoe feela ea bate, esita le tekanyo ea homere ea peō e tla hlahisa tekanyo ea efa feela.”—Esaia 5:8-10.

18, 19. Batho ba mehleng ea Esaia ba hlokomoloha melao ea Jehova joang mabapi le matlotlo, hona phello e tla ba efe ho bona?

¹⁸ Iseraeleng ea boholo-holo, naha eohle e ne e le ea Jehova ka ho feletseng. Lelapa ka leng le ne le e-na le lefa le fanoeng ke Molimo, leo le neng le ka le hirisa kapa la alimana ka lona empa le ka mohla le ne le ke ke la le rekisa “ka ho sa feleng.” (Levitike 25:23) Molao ona o ne o thibela tšebeliso e mpe ea matla, e kang ea batho ba ipokellang ka litša ba le bang. Hape o ne o thibela malapa hore a se ke a iphumana a le ka har’a bofuma bo tšabehang. Leha ho le joalo, ba bang Juda, ka meharo ba ne ba tlōla melao ea Molimo mabapi le matlotlo. Mikea o ile a ngola: “Ba lakalitse masimo ebile ba a nkile; le matlo, ’me ba a nkile; ba etselitse monna ea shahlileng bolotsana le ba ntlo ea hae, monna le lefa la hae.” (Mikea 2:2) Empa Liproverbia 20:21 ea lemosa: “Lefa le fumanoa ka meharo qalong, empa bokamoso ba lona bo ke ke ba hlohonolofatsoa.”

¹⁹ Jehova o tšepisa ho amoha bana ba meharo leruo la bona kaofela leo ba le fumaneng ka bolotsana. Matlo ao ba inkelang ’ona ka likhoka a tla ‘hloka baahi.’ Masimo ao ba a lakatsang a tla hlahisa karolo e nyenyane feela ea seo a ka khonang ho se hlahisa. Ha hoa boleloa hore na ha e le hantle thohako ena e tla phethahala joang le hore na neng. Ho ka etsahala hore ebe ka lehlakoreng le leng, e bolela maemo a tlisoang ke ho ea botlamuoeng Babylona nakong e tlang.—Esaia 27:10.

20. Kajeno Bakreste ba ka qoba joang ho etsisa boikutlo ba ho ba meharo bo ileng ba bontšoa ke ba bang Iseraeleng?

²⁰ Kajeno Bakreste ba lokela ho nyonya meharo e feteletseng e kang e ileng ea bontšoa ke Baiseraele ba bang morao koo. (Liproverbia 27:20) Ha lintho tse bonahalang li fetoha tsa bohlokoa ka ho feteletseng, ho bonolo ho inehela mekhoeng e fosahetseng ea ho fumana chelete. Motho a ka tšoaseha habonolo litšebelisanong tsa khoebo tse belaetsang kapa mererong eo e seng ea sebele ea ho batla ho rua kapele. “Ea potlakelang ho fumana maruo a ke ke a lula a hloka molato.” (Liproverbia 28:20) Kahoo, ke habohlokoa hakaakang ho khotsofalla seo re nang le sona!—1 Timothea 6:8.

Leraba la Boithabiso bo Belaetsang

21. Ho nyatsoa libe life phatlalatsong ea bobeli ea bomalimabe ea Esaia?

²¹ Joale ho latela phatlalatso ea bobeli ea bomalimabe ea Esaia: “Ho malimabe ba tsohang hoseng haholo e le hore feela ba batle joala bo tahang, ba liehang ho fihlela ka shoalane hoo veine e ba tahang! Ho tla ba le harepa le seletsa se likhoele, moropa o monyenyane le lekolilo, le veine meketeng ea bona; empa ha ba talime mosebetsi oa Jehova, ’me ha baa bona mosebetsi oa matsoho a hae.”—Esaia 5:11, 12.

22. Ke ho hloka boitšoaro hofe ho bonahalang Iseraeleng, ’me phello e tla ba efe ho sechaba?

²² Jehova ke “Molimo ea thabileng” ’me ha a honohele bahlanka ba hae ha ba e-ba le boikhathollo bo loketseng. (1 Timothea 1:11) Leha ho le joalo, bana ba phehellang menyaka ba fetela ka nģ’ane ho meeli! Bibele e re “ba tahoang ka tloaelo ba tahoa bosiu.” (1 Bathesalonika 5:7) Empa barati bana ba menyaka ba boleloang boprofeteng ba qalella ho noa haholo ho tloha ka meso ’me ba tsoela pele ho noa ho fihlela mantsiboea! Ba itšoara joalokaha eka Molimo ha a eo, joalokaha eka a ke ke a ba nka ba ikarabella bakeng sa liketso tsa bona. Esaia o bolela esale pele bokamoso bo lerootho ba batho ba joalo. “Sechaba sa ka se tla lokela ho ea kholehong ka lebaka la ho haelloa ke tsebo; khanya ea sona e tla ba banna ba lapileng, ’me bongata ba sona bo omelle ke lenyora.” (Esaia 5:13) Ka lebaka la ho hana ho nka bohato tumellanong le tsebo ea ’nete, batho ba Molimo ba selekane—ba phahameng le ba tlaase—ba tla theohela Sheole.—Bala Esaia 5:14-17.

23, 24. Ke boitšoaro bofe le ho lekanyetsa hofe tseo Bakreste ba khothalletsoang hore ba li bontše?

²³ “Mekete e lerata,” kapa “meketjana e hlaha,” e ne e boetse e le bothata har’a Bakreste ba bang lekholong la pele la lilemo. (Bagalata 5:21; Byington; 2 Petrose 2:13) Kahoo ha ho makatse hore ebe kajeno Bakreste ba bang ba inehetseng ba bontšitse kahlolo e fosahetseng ha ho tluoa ’mokeng ea botsoalle. Ho sebelisa lino tse tahang ka tsela e se nang tekanyetso ho entse hore ba bang ba etse lerata le ho baka moferefere. (Liproverbia 20:1) Ho bile ha e-ba le ba itšoarang hampe ha ba le tlas’a tšusumetso ea tahi e feteletseng, ’me ’moka e meng e ’nile ea lumelloa hore e tsoele pele hoo e batlang e le bosiu bohle, e sitisa mesebetsi ea Bokreste letsatsing le latelang.

²⁴ Leha ho le joalo, Bakreste ba bontšang ho leka-lekana ba hlahisa litholoana tsa bomolimo ’me ba sebelisa boitšoaro le ho lekanyetsa ha ba khetha boikhathollo. Ba ela hloko keletso ea Pauluse e fumanoang ho Baroma 13:13: “Joaloka motšehare a re tsamaeeng ka mokhoa o hlomphehang, eseng meketeng e lerata le ho inehelleng botahoa.”

Ho Hloea Sebe le ho Rata ’Nete

25, 26. Phatlalatsong ea hae ea boraro le ea bone ea bomalimabe, ke monahano ofe o khopo oa Baiseraele oo Esaia a o pepesang?

²⁵ Joale utloa phatlalatso ea boraro le ea bone ea bomalimabe ea Esaia: “Ho malimabe ba hulang phoso ka liropo tsa leshano, le sebe joalokaha eka ke ka lithapo tsa koloi; ba reng: ‘Mosebetsi oa hae o ke o potlake; o ke o tle kapele, e le hore re ka o bona; morero oa Mohalaleli oa Iseraele o ke o atamele ’me o tle, e le hore re ka o tseba!’ Ho malimabe ba reng botle ke bobe le bobe ke botle, ba behang lefifi sebakeng sa khanya le khanya sebakeng sa lefifi, ba behang ho baba sebakeng sa monate le monate sebakeng sa ho baba!”—Esaia 5:18-20.

²⁶ Ke papiso e hlakileng hakaakang ea batho ba tloaetseng ho etsa sebe! Ba khomaretse sebe feela joalokaha liphoofolo tse hulang thoto li hokelloa likariking. Baetsalibe bana ha ba tšabe letsatsi leha e le lefe le tlang la kahlolo. Ka ho soma, ba re: “[Mosebetsi oa Molimo] o ke o potlake!” Ho e-na le hore ba ikokobeletse Molao oa Molimo, ba sotha litaba, ba phatlalatsa hore “botle ke bobe le bobe ke botle.”—Bapisa le Jeremia 6:15; 2 Petrose 3:3-7.

27. Kajeno Bakreste ba ka qoba boikutlo bo tšoanang le ba Baiseraele joang?

²⁷ Kajeno Bakreste ba lokela ho qoba boikutlo bo joalo maemong ’ohle. Ka mohlala, ba hana ho amohela pono ea lefatše ea hore bohlola le bosodoma ke lintho tse amohelehang. (Baefese 4:18, 19) Ke ’nete hore Mokreste a ka ’na ‘a nka mohato o fosahetseng’ o ka lebisang ho etseng sebe se tebileng. (Bagalata 6:1) Baholo ka phuthehong ba itokiselitse ho thusa ba oeleng ba hlokang thuso. (Jakobo 5:14, 15) Ka thuso ea lithapelo le keletso e thehiloeng Bibeleng, motho a ka hlaphoheloa moeeng. Ho seng joalo, ho na le kotsi ea ho ba “lekhoba la sebe.” (Johanne 8:34) Ho e-na le ho soma Molimo le ho hlōleha ho hlokomela letsatsi le tlang la kahlolo, Bakreste ba loanela ho lula ba ‘se na letheba le sekoli’ ka pel’a Jehova.—2 Petrose 3:14; Bagalata 6:7, 8.

28. Ho nyatsoa libe life liphatlalatsong tsa ho qetela tsa bomalimabe tsa Esaia, hona Bakreste ba ka qoba libe tse joalo joang kajeno?

²⁸ Ka ho loketseng, Esaia o phaella ka liphatlalatso tsena tsa ho qetela tsa bomalimabe: “Ho malimabe ba iponang bohlale le ba inkang ba le masene! Ho malimabe ba matla ho noeng veine, le batho ba mafolofolo bakeng sa ho tsoaka joala bo tahang, ba phatlalatsang hore ea khopo o lokile ka lebaka la tjotjo, le ba tlosang ho loka ha ea lokileng!” (Esaia 5:21-23) Ho ka etsahala hore ebe mantsoe ana a ne a lebisitsoe ho ba sebeletsang e le baahloli naheng. Kajeno baholo ba phutheho ba qoba ho bonahala e le “ba iponang bohlale.” Ka boikokobetso ba amohela keletso e tsoang ho baholo-’moho le bona ’me ba khomarela litaelo tsa mokhatlo o hlophisitsoeng haufi-ufi. (Liproverbia 1:5; 1 Bakorinthe 14:33) Ba sebelisa lino tse tahang ka ho lekanyetsa, le ka mohla ha ba noe lino tse tahang pele ba phetha boikarabelo ba phutheho. (Hosea 4:11) Baholo ba boetse ba qoba esita le ho iponahatsa feela e le ba bontšang leeme. (Jakobo 2:9) Ba fapane hakaakang le baruti ba Bokreste-’mōtoana! Ba bangata ba baruti bana ba pata baetsalibe ba nang le tšusumetso e matla le ba ruileng har’a bona, e leng se fapaneng ka ho toba le temoso ea moapostola Pauluse e ho Baroma 1:18, 26, 27; 1 Bakorinthe 6:9, 10; le Baefese 5:3-5.

29. Serapa sa Jehova sa morara sa Iseraele se letetsoe ke phello efe ea tlokotsi?

²⁹ Esaia o phethela molaetsa ona oa boprofeta ka ho hlalosa phello ea tlokotsi ho ba ‘lahlileng molao oa Jehova’ eaba ba hlōleha ho beha litholoana tse lokileng. (Esaia 5:24, 25; Hosea 9:16; Malakia 4:1) Oa phatlalatsa: “[Jehova] o hlahiselitse sechaba se seholo se hōle haholo pontšo, ’me o se letselitse mololi pheletsong ea lefatše; bonang! se tla tla ka potlako.”—Esaia 5:26; Deuteronoma 28:49; Jeremia 5:15.

30. Ke mang ea tla bokella “sechaba se seholo” khahlanong le batho ba Jehova, hona e le ka phello efe?

³⁰ Mehleng ea boholo-holo palo e sebakeng se phahameng e ne e ka sebeletsa e le “pontšo,” kapa sebaka seo ho phutheheloang ho sona, bakeng sa batho kapa mabotho a sesole. (Bapisa le Esaia 18:3; Jeremia 51:27.) Joale Jehova ka boeena o tla bokella ‘sechaba sena se seholo’ se sa boleloeng ka lebitso hore a lihe kahlolo ea hae.b O tla ‘se letsetsa mololi,’ ke hore, a lebise tlhokomelo ea sona ho batho ba hae ba khelohileng e le ba loketseng ho hlōloa. Ho latelang, moprofeta o hlalosa tlhaselo e potlakileng le e tšosang ea bahlōli bana ba kang litau ba tlang ho ‘tšoara phofu,’ ke hore sechaba sa Molimo, ’me ba ‘tsamaee ka eona e sireletsehile’ ho e isa botlamuoeng. (Bala Esaia 5:27-30a.) Ke phello e bohloko hakaakang bakeng sa naha ea batho ba Jehova! “Motho o tla talima naheng, ’me bonang! ho na le lefifi le bakang mahlomola; esita le khanya e fifetse ka lebaka la marotholi a oelang holim’a eona.”—Esaia 5:30b.

31. Bakreste ba ’nete ba ka qoba kotlo e ileng ea fuoa serapa sa Jehova sa morara sa Iseraele joang?

³¹ E, serapa sa morara seo Molimo a se lemmeng ka lerato hakana se bonahala se sa behe—e le se loketsoeng feela ke ho timetsoa. Mantsoe a Esaia a fupere thuto e matla hakaakang bakeng sa bohle ba lakatsang ho sebeletsa Jehova kajeno! E se eka ba ka loanela ho beha litholoana tse lokileng feela, bakeng sa ho tlotlisa Jehova le hore ba bolokehe!

[Mongolo o botlaaseng ba leqephe]

[Setšoantšo se leqepheng la 83]

Moetsalibe o khomaretse sebe feela joalokaha phoofolo e hulang thoto e hokelloa kariking

[Setšoantšo se tletseng leqephe la 85]