Ho Phela ka Tumelo Litšepisong Tsa Molimo
“Ke ’na Molimo o matla, ’me ha ho o mong; ke ’na Molimo, ’me ha ho ea joalo ka ’na. Ke ’na, ha e sa le ho hlaheng, ke bolelang tse tlang ho tla, le khale ke boletse tse e-song ho hlahe.”—ESAIA 46:9, 10.
1, 2.Ho na le maikutlo afe a sa tšoaneng mabapi le ho kenella ha Molimo litabeng tsa lefatše?
MOLIMO o kenelletse hakae litabeng tsa lefatše? Maikutlo aa fapana. Maikutlo a mang ke hore ho hang ha a kenelle ho tsona. Ka mor’a hore a bōpe lintho, ha aa ikemisetsa ebile ha aa khone ho etsa letho molemong oa rōna. Ho ea ka maikutlo ana, Molimo o joaloka ntate ea palamisang mor’a hae baesekele e ncha, oa e tsitsisa ebe o e sutumelletsa pele ’mileng o motheo. Ka mor’a moo, ntate eo oa itsamaela. Moshanyana eo o setse a le mong; a ka ’na a oa kapa a se ke a oa. Hore na ho etsahala eng, ntate ha a sa ameha ka letho tabeng eo.
2 Maikutlo a mang ke hore ka mafolofolo Molimo o tsamaisa tšobotsi e ’ngoe le e ’ngoe ea bophelo ba rōna le hore o kenella ka ho toba ketsahalong e ’ngoe le e ’ngoe pōpong ea hae. Leha ho le joalo, haeba sena ke ’nete, ba bang ba ne ba tla fihlela qeto ea hore hase feela hore Molimo o etsa lintho tse molemo tse etsahalang empa hape o etsa tlōlo ea molao le litlokotsi tse utloisang batho bohloko. Ho tseba ’nete ka litšebelisano tsa Molimo ho tla re thusa ho tseba seo re ka se lebellang ho eena. Ho tla boela ho matlafatse tumelo ea rōna ea hore litšepiso tsa hae li ke ke tsa hlōleha ho phethahala.—Baheberu 11:1.
3. (a) Re tseba joang hore Jehova ke Molimo ea nang le morero? (b) Ke hobane’ng ha ho buuoa ka Jehova e le ea ‘etsang’ le ea ‘bōpang’ morero oa hae?
3 Ntho e ka sehloohong mabapi le ho kenella ha Molimo litabeng tsa batho ke ’nete ea hore Jehova ke Molimo ea nang le morero. Seo se totobatsoa ke lebitso la hae ka bolona. “Jehova” e bolela hore “O Etsa Hore ho be Teng.” Ka mokhoa o tsoelang pele, Jehova o iketsa hore e be Mophethahatsi oa litšepiso tsohle tsa hae. Ka lebaka leo, ho buuoa ka Jehova e le ea ‘etsang,’ kapa ea bōpang morero oa hae mabapi le liketsahalo kapa liketso tsa nako e tlang. (2 Marena 19:25; Esaia 46:11) Mantsoe ana a tsoa lentsoeng la Seheberu ya·tsarʹ, le amanang le lentsoe le bolelang “sebōpi sa lipitsa.” (Jeremia 18:4) Feela joalokaha sebōpi sa lipitsa se nang le tsebo se ka bōpa khoabi ea letsopa hore se etse pitsa e ntle, Jehova a ka bōpa, kapa a tsamaisa lintho hore a phethahatse thato ea hae.—Baefese 1:11.
4. Molimo o ile a lokisa lefatše joang hore batho ba lule ho lona?
4 Ka mohlala, Molimo o ne a rerile hore lefatše e be sebaka se setle haholo seo ho sona ho hahileng batho ba phethahetseng, ba mamelang. (Esaia 45:18) Nako e telele pele a bōpa monna oa pele le mosali, Jehova o ile a ba etsetsa tokisetso e lerato. Likhaolo tse qalang tsa buka ea Genese li hlalosa kamoo Jehova a ileng a etsa motšehare le bosiu, naha le leoatle kateng. Ka mor’a moo a bōpa limela le liphoofolo. Tokiso ena ea lefatše bakeng sa hore le hahuoe ke batho e ile ea nka lilemo tse likete. Morero oo o ile oa phethoa ka katleho. Monna oa pele le mosali ba ile ba qala ho phela Edene, paradeise e khahlisang e neng e e-na le sohle se hlokahalang e le hore ba ka thabela bophelo. (Genese 1:31) Ka tsela eo, Jehova o ne a keneletse ka ho toba litabeng tsa lefatše, a ntse a tsoela pele ho bōpa mesebetsi ea hae ho latela morero oa hae o phahameng. Na ho atoloha ha lelapa la motho ho ile ha fetola ho kenella ha hae litabeng tsa lefatše?
Jehova o Lekanyetsa Litšebelisano Tsa Hae le Batho
5, 6. Ke hobane’ng ha Molimo a lekanyetsa litšebelisano tsa hae le batho?
5 Jehova ha a tsamaise le ho laola karolo e ’ngoe le e ’ngoe ea liketso tsa batho le hoja a e-na le matla a ho etsa joalo. Ho na le mabaka ka seo. Le leng ke hore batho ba bōpiloe ka setšoantšo sa Molimo, ba e-na le matla a ho ikhethela, kaha e le batho ba nang le matla a ho iketsetsa liqeto. Jehova ha a re qobelle hore re phethe litaelo tsa hae; leha e le hore re laoloe ke batho ba bang. (Deuteronoma 30:19, 20; Joshua 24:15) Le hoja Molimo a re nka re ikarabella ka liketso tsa rōna, ka lerato o re file bolokolohi bo bongata ba ho iketsetsa qeto ea hore na re tla phela joang.—Baroma 14:12; Baheberu 4:13.
6 Lebaka le leng leo ka lona Molimo a sa laoleng ntho e ’ngoe le e ’ngoe e etsahalang le amana le tseko eo Satane a ileng a e hlahisa Edene. Satane o ile a phephetsa bobusi ba Molimo. O ile a fa Eva se neng se bonahala eka ke monyetla oa boipuso—mpho eo eena le monna oa hae Adama hamorao, ba ileng ba e amohela. (Genese 3:1-6) Ha a arabela, Molimo o lumelletse batho hore ba ipuse ka nako e itseng ho paka hore na phephetso ea Satane e ne e nepahetse kapa che. Ka lebaka lena, Molimo a ke ke a behoa molato ka lintho tse fosahetseng tseo batho ba li etsang kajeno. Moshe o ile a ngola tjena ka batho ba marabele: “Bona ba entse ka mokhoa o senyang; hase bana ba [Molimo], sekoli ke sa bona.”—Deuteronoma 32:5, NW.
7. Morero oa Jehova ke ofe ka lefatše le ka moloko oa batho?
7 Leha ho le joalo, le hoja a lumelletse ho ikhethela ka bolokolohi le ho leka ho ipusa, Jehova ha a sebelise leano la ho se kenelle litabeng tsa lefatše, le neng le tla re siea re se na tšepo ea hore o tla phethahatsa litšepiso tsa hae. Le hoja Adama le Eva ba ile ba fetohela bobusi ba Molimo, Jehova ha aa ka a fetola morero oa hae o lerato bakeng sa lefatše le moloko oa batho. Ntle ho pelaelo o tla fetola lefatše hore e be paradeise eo ho eona ho lulang batho ba phethahetseng, ba mamelang le ba thabileng. (Luka 23:42, 43) Ho tloha ho Genese ho ea ho Tšenolo, tlaleho ea Bibele e hlalosa kamoo Jehova a ’nileng a tsoela pele ho sebeletsa hore a phethe morero oo.
Molimo o Nka Bohato Hore a Phethe Thato ea Hae
8. Ho ne ho ameha eng ha Baiseraele ba isoa Naheng e Tšepisitsoeng?
8 Litšebelisanong tsa hae le sechaba sa Iseraele, Molimo o ile a bontša hore o tla phethahatsa morero oa hae. Ka mohlala, Jehova o ile a tiisetsa Moshe hore O ne a tla lopolla Baiseraele Egepeta le ho ba kenya Naheng e Tšepisitsoeng, naha e phallang lebese le mahe a linotši. (Exoda 3:8) Ena e ne e le phatlalatso ea bohlokoahali le e fanang ka tšepo. E ne e tla kopanyelletsa ho lokolla Baiseraele—bao hammoho le metsoalle ea bona ba neng ba ka ba limilione tse tharo—sechabeng se matla se neng se hanyetsa ka matla hore ba tsamaee. (Exoda 3:19) Naheng eo ba neng ba tla isoa ho eona ho ne ho ahile lichaba tse matla tse neng li tla hanela ka matla ho fihla ha bona. (Deuteronoma 7:1) Pele ba fihla moo ba eang teng Baiseraele ba ne ba tla hloka lijo le metsi lefeelleng. Boemo bona bo ile ba lumella Jehova hore a bonahatse matla a hae a maholo le Bomolimo ba hae.—Levitike 25:38.
9, 10.(a) Ke hobane’ng ha Joshua a ile a khona ho paka hore litšepiso tsa Molimo lia tšepahala? (b) Ke habohlokoa hakae hore re be le kholiseho ea hore Molimo o khona ho putsa batho ba hae ba tšepahalang?
9 Molimo o ile a ntša Baiseraele Egepeta ka liketso tse matla tse latellanang. Ea pele, o ile a tlisetsa sechaba sa Egepeta likotlo tse leshome tse senyang. Ka mor’a moo, o ile a arola Leoatle le Lefubelu, a nolofaletsa Baiseraele ho phonyoha ’me Baegepeta ba neng ba ba lelekisa ba timela. (Pesaleme ea 78:12, 13, 43-51) Ka mor’a moo, o ile a hlokomela Baiseraele ka lilemo tse 40 lefeelleng, a ba fepa manna, a ba fa metsi esita le ho etsa hore liaparo tsa bona tsa ka holimo li se ke tsa taboha le hore maoto a bona a se ke a ruruha. (Deuteronoma 8:3, 4) Ka mor’a hore Baiseraele ba kene Naheng e Tšepisitsoeng, Jehova o ile a etsa hore ba hlōle lira tsa bona. Joshua, ea neng a sebelisa tumelo e matla litšepisong tsa Jehova, e bile paki e boneng ka mahlo lintho tseo tsohle. Kahoo, ka kholiseho o ne a ka bolella banna ba baholo ba mehleng ea hae tjena: “Lea itsebela pelong tsa lōna bohle le meeeng ea lōna bohle hobane ha ho ntho leha e le ’ngoe ea tsohle tse molemo tsee Jehova Molimo oa lōna, a le baletseng tsona, e hlokahetseng; tsohle li etsahetse ho lōna.”—Joshua 23:14.
10 Joaloka Joshua oa khale, kajeno Bakreste ba kholisehile ka ho feletseng hore Molimo o ikemiselitse ebile o khona ho nka bohato molemong oa ba mo sebeletsang. Kholiseho ena ke karolo ea bohlokoa ea tumelo ea rōna. Moapostola Pauluse o ngotse: “Ka ntle ho tumelo ho ke ke ha khoneha ho mo khahlisa haholo, kaha ea atamelang Molimo o lokela ho lumela hore . . . e ba moputsi oa ba mo batlang ka tieo.”—Baheberu 11:6.
Molimo o Bona Nako e Tlang Esale Pele
11. Ke mabaka afe a nolofalletsang Molimo hore a phethahatse litšepiso tsa hae?
11 Ho fihlela joale, re bone hore le hoja Molimo a lumella boikhethelo le boipuso ba batho, o na le matla ebile o ikemiselitse ho nka bohato hore a phethe morero oa hae. Leha ho le joalo, ho na le lebaka le leng le tlatsetsang phethahatsong e itseng ea litšepiso tsa Molimo. Jehova o khona ho bona nako e tlang esale pele. (Esaia 42:9) Molimo o ile a re ka moprofeta oa hae: “Hopolang liketso tsa pele tse etsahetseng khale, hobane ke ’na Molimo o matla, ’me ha ho o mong; ke ’na Molimo, ’me ha ho ea joalo ka ’na. Ke ’na, ha e sa le ho hlaheng, ke bolelang tse tlang ho tla, le khale ke boletse tse e-song ho hlahe. Ke re: Morero oa ka o tla tiea, ke tla phetha thato ea ka kaofela.” (Esaia 46:9, 10) Molemi ea nang le phihlelo oa tseba hore na a jale peō neng, hona sebakeng sefe, empa o ntse a ke ke a tiiseha hore na lijalo li tla hōla joang. Leha ho le joalo, “Morena oa bosafeleng” o na le tsebo e nepahetseng ea ho bona esale pele hore na o lokela ho nka bohato neng, hona sebakeng sefe bakeng sa ho phetha morero oa hae.—1 Timothea 1:17.
12. Jehova o ile a sebelisa bokhoni ba ho tseba esale pele ka tsela efe mehleng ea Noe?
12 Nahana kamoo Molimo a ileng a sebelisa bokhoni ba ho tseba esale pele mehleng ea Noe. Ka lebaka la bobe bo atileng bo neng bo tletse lefatšeng, Molimo o ile a rera ho timetsa batho ba sa mameleng. O ile a beha nako eo ka eona a neng a tla etsa sena, lilemo tse 120 tse neng li tla latela. (Genese 6:3) Ha a beha nako eo e tobileng, Jehova o ile a nahana ka ho hong ho fetang ho timetsa batho ba khopo, e leng hoo a neng a ka ho etsa ka nako leha e le efe. Kemiso ea Jehova ea nako e ile ea boela ea lokisetsa ho bolokoa ha batho ba lokileng. (Bapisa le Genese 5:29.) Ka bohlale ba hae, Molimo o tsebile esale pele hore na o tla fana ka mosebetsi o lebisang polokong eo neng. O ile a fa Noe boitsebiso bo qaqileng ka ho lekaneng. Noe o ne a lokela ho haha areka “bakeng sa ho pholosa ba ntlo ea hae” ’me ba khopo ba ne ba lokela ho timetsoa ka moroallo oa lefatše lohle.—Baheberu 11:7; Genese 6:13, 14, 18, 19.
Morero o Moholohali oa Kaho
13, 14. Ke hobane’ng ha ho haha areka e ne e le kabelo e phephetsang?
13 Talima kabelo ena ho ea kamoo Noe a neng a tla e talima kateng. Kaha Noe e ne le motho oa Molimo, o ne a tseba hore Jehova a ka timetsa batho ba sa tšabeng Molimo. Leha ho le joalo, pele seo se etsahala, ho ne ho e-na le mosebetsi o lokelang ho etsoa—mosebetsi o neng o hloka tumelo. Ho haha areka e ne e tla ba morero o moholohali. Molimo o ne a fane ka litekanyo tsa eona. Areka e ne e le telele ho feta a mang a mabala a lipapali a kajeno ’me bophahamo ba eona e ne e le ba mohaho o nang le mekato e mehlano. (Genese 6:15) Liahi tsa eona li ne li se na phihlelo ebile li fokola ka palo. Li ne li se na lisebelisoa tse tsoetseng pele le thepa e fumanehang kajeno. Ho phaella moo, kaha Noe o ne a se na bokhoni bo tšoanang le ba Jehova ba ho tseba nako e tlang esale pele, o ne a se na mokhoa oa ho tseba hore na ho ne ho tla hlaha maemo afe ha lilemo li ntse li feta, a neng a ka thusa kapa a sitisa morero oa ho haha. Mohlomong Noe o ne a ipotsa lipotso tse ngata. Thepa ea ho haha e ne e tla bokelloa joang? O ne a tla bokella liphoofolo joang? Ho ne ho tla hlokahala lijo life, hona tse ngata hakae? Hantle-ntle Moroallo o boletsoeng esale pele o ne o tla etsahala neng?
14 Joale ho ne ho e-na le maemo sechabeng. Bokhopo bo ne bo atile. Banefilime ba matla—bana bao e neng e le motsoako oa mangeloi a khopo le basali—ba ne ba tlatsitse lefatše ka pefo. (Genese 6:1-4, 13, NW) Ho feta moo, ho haha areka e ne e se mosebetsi o ka etsoang sephiring. Batho ba ne ba tla ipotsa hore na Noe o etsa’ng, ’me o ne a tla ba bolella. (2 Petrose 2:5) Na ho ne ho ka lebelloa hore ba amohele seo a ba bolellang sona? Le hanyenyane! Lilemo tse itseng pejana, Enoke ea tšepahalang o ne a ile a phatlalatsa ho timetsoa ha ba khopo. Molaetsa oa hae o ne o sa ratehe hoo Molimo ‘a ileng a mo nka,’ kapa a khutsufatsa bophelo ba hae, ka ho hlakileng e le ho thibela hore a se ke a bolaoa ke lira tsa Hae. (Genese 5:24; Baheberu 11:5; Jude 14, 15) Hase feela hore Noe o ne a lokela ho phatlalatsa molaetsa o sa ratoeng ka tsela e tšoanang empa hape o ne a lokela ho haha areka. Ha areka eo e ntse e hahuoa, e ne e tla sebeletsa e le khopotso e matla ea botšepehi ba Noe har’a batho ba khopo ba mehleng ea hae!
15. Ke hobane’ng ha Noe a ne a kholisehile hore o ne a ka phetha kabelo ea hae?
15 Noe o ne a tseba hore Molimo Ea Matla ’Ohle o tla tšehetsa le ho hlohonolofatsa mosebetsi oo. Etsoe, na e ne e se Jehova ka boeena ea faneng ka mosebetsi oo? Jehova o ne a tiiselitse Noe hore eena le ba lelapa la hae ba ne ba tla kena ka arekeng e phethiloeng ’me ba bolokoe ba phela Moroallong oa lefatše ka bophara. Molimo o bile a tiisa bonnete ba seo ka tumellano e tiileng. (Genese 6:18, 19) Mohlomong Noe o ne a hlokometse hore Jehova o nahanetse sohle ebile o hlahlobile sohle se amehang pele a fana ka kabelo eo. Ho feta moo, Noe o ne a tseba hore Jehova o na le matla a ho kenella hore a mo thuse ha ho hlokahala. Kahoo tumelo ea Noe e ile ea mo susumelletsa ho nka bohato. Joaloka Abrahama setloholo sa hae, Noe o ne “a kholisehile ka botlalo hore seo [Molimo] a neng a se tšepisitse o ne a boetse a khona ho se etsa.”—Baroma 4:21.
16. Ha mosebetsi oa ho haha areka o ntse o tsoela pele, tumelo ea Noe e ile ea matlafatsoa joang?
16 Ha lilemo li ntse li feta ’me mosebetsi oa areka o totobala, tumelo ea Noe e ile ea matlafala. Ho ile ha rarolloa mathata a kaho le a monahano. Liteko li ile tsa hlōloa. Ho ne ho se khanyetso e neng e ka thibela mosebetsi. Jehova o ile a tšehetsa le ho sireletsa lelapa la Noe. Ha Noe a ntse a tsoela pele, ‘tšobotsi e lekiloeng ea tumelo ea hae e ile ea hlahisa mamello.’ (Jakobo 1:2-4) Qetellong, areka e ile ea phethoa, Moroallo oa tla ’me Noe le lelapa la hae ba pholoha. Noe o ile a bona ha litšepiso tsa Molimo li phethahala, feela joalokaha Joshua le eena a ile a bona hamorao. Tumelo ea Noe e ile ea putsoa.
Jehova o Tšehetsa Mosebetsi
17. Mehla ea rōna e tšoana le mehla ea Noe joang?
17 Jesu o ile a bolela esale pele hore mehla ea rōna e ne e tla tšoana le mehla ea Noe. Molimo o boetse o ikemiselitse ho timetsa ba khopo ’me o behile nako eo sena se tla etsahala ka eona. (Matheu 24:36-39) Hape o entse litokisetso tsa ho pholosa ba lokileng. Le hoja Noe a ne a lokela ho haha areka, bahlanka ba Molimo kajeno ba lokela ho phatlalatsa merero ea Jehova, ba rute Lentsoe la hae ’me ba etse barutuoa.—Matheu 28:19.
18, 19. Re tseba joang hore Jehova o tšehelitse boboleli ba litaba tse molemo?
18 Haeba Jehova a ne a sa ka a ba le Noe ho mo tšehetsa le ho mo hlokomela, areka e ka be e sa ka ea hahuoa. (Bapisa le Pesaleme ea 127:1.) Ka ho tšoanang, kantle ho tšehetso ea Jehova, Bokreste ba ’nete bo ne bo ke ke ba pholoha, re se re sa letho ka ho atleha. Sena se ile sa hlokomeloa lekholong la pele la lilemo ke Gamaliele, Mofarisi ea hlomphehang le tichere ea Molao. Ha Sanhedrin ea Bajuda e ne e batla ho felisa baapostola, o ile a lemosa lekhotla leo: “Le se ke la kena-kenana le banna bana, empa le ba tlohele; (hobane, haeba morero ona kapa mosebetsi ona o tsoa ho batho, o tla lihuoa; empa haeba o tsoa ho Molimo, ha le na ho khona ho ba liha.)”—Liketso 5:38, 39.
19 Ho atleha ha mosebetsi oa boboleli lekholong la pele la lilemo le kajeno, ho bontšitse hore ona hase mosebetsi o tsoang ho batho, empa ke oa Molimo. Sehlooho se latelang se tla tšohla maemo a thabisang le liketsahalo tse tlatselitseng hore mosebetsi ona o atlehe haholo hakana.
Le ka Mohla U se ke ua Tela!
20. Ke bo-mang ba re tšehetsang ha re bolela litaba tse molemo?
20 Le hoja re phela ‘linakong tse mahlonoko tseo ho leng thata ho sebetsana le tsona,’ re ka kholiseha hore Jehova o laola lintho ka ho feletseng. Ke eena ea tšehetsang le ho hlokomela batho ba hae ha ba ntse ba sebeletsa ho phetha boboleli ba litaba tse molemo pele ho fihla nako e behiloeng ea hore Molimo a felise tsamaiso ena e khopo ea lintho. (2 Timothea 3:1; Matheu 24:14) Jehova o re memela hore re be “basebetsi-’moho” le eena. (1 Bakorinthe 3:9) Hape, rea tiisetsoa hore Kreste Jesu o na le rōna mosebetsing ona le hore re ka itšetleha ka tšehetso le tataiso ea mangeloi.—Matheu 28:20; Tšenolo 14:6.
21. Re lokela hore le ka mohla re se ke ra tela ho kholiseha ka eng?
21 Kahobane Noe le lelapa la hae ba ne ba sebelisa tumelo litšepisong tsa Jehova, ba ile ba pholosoa metsing a moroallo. Ba sebelisang tumelo e tšoanang le kajeno ba tla pholosoa “matšoenyehong a maholo.” (Tšenolo 7:14) Ka sebele re phela linakong tse susumetsang maikutlo. Ho larile liketsahalo tsa bohlokoa ka pele! Haufinyane, Molimo o tla nka bohato ba ho tlisa maholimo a macha le lefatše le lecha tseo ho loka ho tla aha ho tsona. (2 Petrose 3:13) Le ka mohla, le ka mohla u se ke ua tela kholisehong ea hao ea hore eng kapa eng eo Molimo a e bolelang, o tla boela a khone ho e etsa.—Baroma 4:21.
Lintlha Tse Lokelang ho Hopoloa
◻ Ke hobane’ng ha Jehova a sa laole likarolo tsohle tsa liketso tsa motho?
◻ Matla a Jehova a ho phethahatsa morero oa hae a ile a bonahala joang litšebelisanong tsa hae le Iseraele?
◻ Matla a Jehova a ho bona nako e tlang a ile a bonahatsoa joang mehleng ea Noe?
◻ Re ka ba le kholiseho efe litšepisong tsa Molimo?