Ho Rutoa ke Jehova ho Fihlela Kajeno
“Jehova o ’neile leleme la ba rutehileng.”—ESAIA 50:4.
1, 2. (a) Jehova o ile a lokisetsa morutoana oa hae ea ratoang haholo eng, hona e le ka phello efe? (b) Jesu o ile a lumela Mohloli oa lithuto tsa hae joang?
JEHOVA MOLIMO e bile Tichere ho tloha ha a fetoha Ntate. Nako e itseng ka mor’a hore bana ba bang ba hae e be bafetoheli, o ile a lokisetsa morutoana oa hae ea ratoang haholo, Letsibolo la hae, bakeng sa tšebeletso lefatšeng. (Liproverbia 8:30) Esaia khaolo ea 50 ka mokhoa oa boprofeta e hlalosa hore morutoana enoa o itse: “Morena Jehova o ’neile leleme la ba rutehileng, ke tle ke tsebe ho khothatsa ea khathetseng ka lentsoe la ka.” (Esaia 50:4) Ka lebaka la ho sebelisa thuto ea Ntate oa hae ha a le lefatšeng, Jesu e bile mohloli oa khatholoho ho bohle ba neng ba ‘khathetse, ba imetsoe.’—Mattheu 11:28-30.
2 Jesu o ile a etsa mesebetsi e mengata e matla lekholong la pele la lilemo. O ile a bula mahlo a lifofu le ho tsosa bafu, empa o ne a tsebahala haholo ho batho ba neng ba phela nakong ea hae e le tichere. Balateli ba hae haesita le bahanyetsi ba hae ba ne ba ’mitsa joalo. (Mattheu 8:19; 9:11; 12:38; 19:16; Johanne 3:2) Ha ho mohla Jesu a kileng a nka hore o tšoaneloa ke botumo ka lebaka la seo a se rutileng empa ka boikokobetso o ile a re: “Thuto ea ka hase ea ka, empa e le ea ea nthomileng.” “Ke bolela litaba tseo, joalo ka ha Ntate a nthutile.”—Johanne 7:16; 8:28; 12:49.
Kamano ea Sebele Pakeng Tsa Tichere le Morutoana
3. Boprofeta ba Esaia bo bontša thahasello ea Jehova joang ho bao a ba rutang?
3 Tichere e hloahloa e ba le thahasello ea botho, e hlokolosi le e lerato ho barutoana ba eona. Esaia khaolo ea 50 e senola hore Jehova Molimo o na le thahasello e joalo ho bao a ba rutang. Boprofeta bo re: “Ke eena ea ntsosang ka meso eohle, ea bulang litsebe tsa ka, ke tle ke tsebe ho mamela ka mokhoa oa ba rutoang.” (Esaia 50:4) Puo e sebelisitsoeng mona e fana ka maikutlo a morupeli ea tsosang barutoana ba hae esale ka matjeke hore a ba rute. Ha setsebi se seng sa Bibele se bua ka tšebeliso ea boprofeta bona, se itse: “Taba-taba ke hore Molopolli e ne e tla ba . . . motho ea leng sekolong sa Molimo ha re sebelisa puo ea tšoantšetso; motho ea tšoanelehang ho fana ka thupelo ho ba bang. . . . Messia o ne a tla tšoaneleha ka ho totobetseng, ka lebaka la thuto ea Bomolimo, hore e be morupeli oa moloko oa batho.”
4. Jesu o ile a arabela joang thutong ea Ntate oa hae?
4 E le hore ho be le liphello tse molemo, barutoana ba arabela hantle thutong ea morupeli oa bona. Jesu o ile a arabela joang thutong ea Ntate oa hae? Karabelo ea hae e ne e le tumellanong le seo re se balang ho Esaia 50:5: “Morena Jehova o nthibolotse litsebe, ’me ha kea ka ka hana, leha e le ho sutha ka santhao.” E, Jesu o ne a laba-labela ho ithuta. O ile a mamela ka hloko. Ho feta moo, o ne a ikemiselitse ho etsa eng kapa eng eo Ntate oa hae a neng a e batla ho eena. E ne e se mofetoheli; ho e-na le hoo, o itse: “Ho se ke ha etsoa thato ea ka, ho etsoe ea hao.”—Luka 22:42.
5. (a) Ke eng se bontšang hore Jesu o ne a tseba esale pele liteko tseo a neng a tla ba le tsona lefatšeng? (b) Boprofeta ba Esaia 50:6 bo ile ba phethahatsoa joang?
5 Boprofeta bo bontša hore Mora o ne a fuoe boitsebiso ba liphello tse ka hlahisoang ke ha a etsa thato ea Molimo. Sena se bontšoa ke seo ea rutoang a se bolelang: “Ke neile ba nkotlang mokokotlo oa ka, le ba hlothang litelu ke ba neile marama a ka, ha kea ka ka patela sefahleho sa ka lihlong le mathe.” (Esaia 50:6) Joalokaha boprofeta bo bontša, Jesu o ile a tšoaroa ka mokhoa o sehlōhō mona lefatšeng. Moapostola Mattheu o ile a ngola: “Ba mo tšoela ka mathe mahlong, ba mo jabela.” (Mattheu 26:67) Sena se entsoe ke baeta-pele ba bolumeli bosiung ba Paseka ka 33 C.E. Letsatsing le latelang Jesu o ile a nehela mokokotlo oa hae ho ba mo otlang, nakong ea ha masole a Baroma a mo shapa ka tsela e hlokang mohau pele a mo fanyeha thupeng hore a shoele teng.—Johanne 19:1-3, 16-23.
6. Ke eng se bontšang hore ha ho mohla Jesu a ileng a felloa ke tšepo ho Tichere ea hae, hona tšepo ea hae e ile ea putsoa joang?
6 Mora, ea rutiloeng hantle esale pele, ha aa ka a felloa ke tšepo ea hae ho Tichere ea hae. Sena se bontšoa ke seo a tsoelang pele ho se bolela ho latela boprofeta: “Morena Jehova ke thuso ea ka; ka baka leo, ke mameletse lihlong.” (Esaia 50:7) Tšepo ea Jesu thusong ea Tichere ea hae e ile ea putsoa ka ho enneng. Ntate oa hae o ile a mo phahamisa, a mo hlohonolofatsa ka ho mo fa boemo bo phahameng ho feta ba bahlanka ba bang bohle ba Molimo. (Ba-Filippi 2:5-11) Le rōna re emetsoe ke litlhohonolofatso tse khōlō haeba ka ho mamela re khomarela thuto ea Jehova ’me re sa ‘suthe ka santhao.’ Ha re shebeng kamoo thuto ena e entsoeng hore e fumanehe ho fihlela kajeno.
Lenaneo le Atolositsoeng la Thuto
7. Jehova o ntšelitse thuto ea hae pele joang lefatšeng?
7 Joalokaha re hlokometse pejana, Jehova o ile a sebelisa Moemeli oa hae oa lefatšeng, Jesu Kreste, ho ntšetsa pele thuto ea bomolimo lekholong la pele la lilemo. (Johanne 16:27, 28) Kamehla Jesu o ne a supa Lentsoeng la Molimo e le matla a thuto ea hae, a beha mohlala bakeng sa bao a neng a ba ruta. (Mattheu 4:4, 7, 10; 21:13; 26:24, 31) Ka mor’a moo, thuto ea Jehova e ile ea ntšetsoa pele lefatšeng ka boboleli ba ba joalo ba rutiloeng. Hopola hore Jesu o ile a ba laela hore: “E-eang ke hona, le rute lichaba tsohle, . . . le ba rute ho boloka tsohle tseo ke le laetseng tsona.” (Mattheu 28:19, 20, mongolo o tšekaletseng ke oa rōna.) Ha ho ne ho etsoa barutuoa, ba ile ba fetoha karolo ea ‘ntlo ea Molimo, phutheho ea Molimo o phelang.’ (1 Timothea 3:15, NW) Ba ile ba boela ba hlophisoa ka liphutheho moo ba neng ba rutoa ke Jehova. (Liketso 14:23; 15:41; 16:5; 1 Ba-Korinthe 11:16) Na thuto e joalo ea bomolimo e tsoetse pele ho fihlela kajeno?
8. Jesu o bontšitse hore mosebetsi oa boboleli o ne o tla laoloa joang lefatšeng pele bofelo bo ka tla?
8 Ho joalo ka sebele! Matsatsi a mararo pele ho lefu la hae, Jesu o ne a boletse esale pele hore pele ho bofelo ba tsamaiso ena ea lintho, ho ne ho tla ba le mosebetsi o moholo oa boboleli. O itse: “Evangeli ena ea ’muso e tla boleloa lefatšeng lohle, e tle e be bopaki ho lichaba tsohle; ’me e tla ba hona bofelo bo hlahang.” Jesu o ile a tsoela pele ho hlalosa mocha o neng o tla laola lenaneo lena la lefatšeng ka bophara la boboleli le la thuto. O ile a bua ka “mohlanka ea khabane, ea bohlale” ea neng a tla sebeletsa e le mocha bakeng sa ho fana ka lijo tsa moea ho bahlanka ba Hae. (Mattheu 24:14, 45-47) Jehova Molimo o sebelisitse “mohlanka” enoa ho hlokomela lithahasello tsa ’Muso lefatšeng lohle.
9. Ke bo-mang ba etsang mohlanka ea khabane le ea bohlale?
9 Kajeno, mohlanka ea khabane le ea bohlale o entsoe ka masala a majalefa a ’Muso. Bana ke Bakreste ba tlotsitsoeng, masala a lefatšeng a ba 144 000, bao e leng “ba Kreste” le bao e leng karolo ea “peō ea Abrahama.” (Ba-Galata 3:16, 29, NW; Tšenolo 14:1-3) U ka khetholla mohlanka ea khabane le ea bohlale joang? Haholo-holo ka mosebetsi oo ba o etsang le ka ho khomarela ha bona Lentsoe la Molimo, Bibele, haufi-ufi.
10. Sehlopha sa mohlanka se sebelisa eng ho ntšetsa pele lithuto tsa Jehova?
10 Jehova o sebelisa “mohlanka” enoa e le mocha oa hae oa ho ruta batho kajeno. Ba sehlopha sa mohlanka ba ile ba amohela lebitso la Lipaki tsa Jehova ka 1931. Ho tloha ka nako eo ba limilione ba ikopantse le bona ’me ba amohetse lebitso lena ’me ba kopanetse ho bolela ka ’Muso oa Molimo. Makasine ona, Molula-Qhooa O Tsebahatsa ’Muso oa Jehova, ke sesebelisoa se ka sehloohong sa “mohlanka” enoa mosebetsing oa ho ruta. Leha ho le joalo, likhatiso tse ling lia sebelisoa, ho akarelletsa libuka, libukana, libukana tse lekanang le makasine, lipampitšana le makasine oa Tsoha!
11. “Mohlanka” o tšehelitse likolo life, hona morero oa sekolo ka seng ho tsee ke ofe?
11 Ho phaella moo, “mohlanka” o tšehetsa likolo tse fapa-fapaneng. Tsena li akarelletsa Sekolo sa Bibele sa Gileade sa Watchtower, seo e leng thupelo ea likhoeli tse hlano e lokisetsang basebeletsi ba bacha tšebeletso ea boromuoa linaheng lisele, le thupelo ea likhoeli tse peli ea Sekolo sa ho Koetlisetsoa Bosebeletsi, se koetlisang baholo le bahlanka ba sebeletsang ba seng lenyalong bakeng sa likabelo tse khethehileng tsa puso ea Molimo. Ho boetse ho na le Sekolo sa Tšebeletso sa ’Muso, moo baholo le bahlanka ba sebeletsang ba Bakreste ba rupeloang nako le nako mabapi le boikarabelo ba bona ba phutheho le Sekolo sa Tšebeletso ea Bopula-maliboho, se hlomellang baboleli ba evangeli ba nako e tletseng hore ba atlehe haholoanyane mosebetsing oa bona oa ho ruta.
12. Tšobotsi ea beke le beke ea lenaneo la thuto ke efe?
12 Tšobotsi e ’ngoe ea lenaneo la ho ruta ke liboka tse hlano beke le beke tse tšoaroang liphuthehong tse fetang 75 500 tsa batho ba Jehova lefatšeng ka bophara. Na u rua molemo kahohle kamoo ho ka khonehang libokeng tsee? Ka ho ela hloko thupelo e fanoang, na u bontša hore ehlile ua lumela hore u sekolong sa Molimo ha re bua ka tšoantšetso? Na khatelo-pele ea hao ea moea e etsa hore ho totobale ho ba bang hore u na le “leleme la ba rutehileng”?—Esaia 50:4; 1 Timothea 4:15, 16.
Ho Rutoa Libokeng Tsa Phutheho
13. (a) Tsela ea bohlokoa eo Jehova a rutang batho ba hae ka eona kajeno ke efe? (b) Re ka bontša kananelo ea rōna joang bakeng sa Molula-Qhooa?
13 Haholo-holo Jehova o ruta batho ba hae ka thuto ea beke le beke ea Bibele, ho sebelisoa Molula-Qhooa e le thuso ea ho ruta. Na u nka seboka sena e le sebaka seo u ka rutoang ke Jehova ho sona? Le hoja Esaia 50:4 e sebetsa haholo-holo ho Jesu, e ka boetse ea sebetsa ho bohle ba amohelang litokisetso tsa Molimo tsa ho fana ka “leleme la ba rutehileng.” Tsela e ’ngoe eo u ka bontšang hore u nka Molula-Qhooa e le oa bohlokoa ke ka ho bala tokollo ka ’ngoe kapele kamoo ho ka khonehang ha u qeta ho e amohela. Joale, ha ho ithutoa Molula-Qhooa phuthehong, u ka bontša kananelo ea hao ho Jehova ka ho ba teng le ka ho itokisetsa ho etsa polelo ea phatlalatsa ea tšepo ea hao.—Ba-Heberu 10:23.
14. (a) Ke hobane’ng ha ho fana ka likarabo libokeng e le tokelo ea bohlokoa hakaale? (b) Ke likarabo tsa mofuta ofe tsa ba banyenyane tse khothatsang haholo?
14 Na ua utloisisa hore ka likarabo tsa hao libokeng, u ka ba le karolo lenaneong le leholo la thuto la Jehova? Ntle ho pelaelo, ho araba libokeng ke tsela ea bohlokoa eo re ka susumeletsanang “leratong le mesebetsing e metle.” (Ba-Heberu 10:24, 25) Na bana ba ka ba le karolo lenaneong lena la taeo? E, ba ka ba le eona. Likarabo tse tlohang pelong tsa ba banyenyane hangata li khothatsa ba hōlileng. Ka linako tse ling, ba bacha ’neteng ba tlang libokeng tsa rōna ba susumelitsoe ke likarabo tsa bana hore ba be le thahasello e tebileng haholoanyane ’neteng ea Bibele. Bana ba bang ba tloaetse ho bala likarabo ka ho toba ho tsoa serapeng kapa ba phete seo motho e moholo a ba sebelang sona ka tsebeng. Leha ho le joalo, ho khothatsa haholo haeba likarabo tsa bona li lokiselitsoe hantle. Likarabo tse joalo ruri li tlisa tlhompho ho Morupeli oa rōna e Moholo le lenaneo la hae le phahameng la thuto.—Esaia 30:20, 21.
15. Batsoali ba ka etsa eng ho thusa bana hore ba arabe ka tsela e atlehang haholoanyane?
15 Hoa thabisa ho bona bana ba batla ho ba le seabo ho roriseng Molimo oa rōna. Jesu o ile a ananela lipolelo tsa thoriso tse tsoang ho ba banyenyane. (Mattheu 21:15, 16) Moholo e mong oa Mokreste o re: “Ha ke sa le ngoana, ke ne ke batla ho araba Thutong ea Molula-Qhooa. Ha Ntate a qeta ho nthusa hore ke lokisetse karabo, o ne a batla hore ke ikoetlise ka karabo ena bonyane ka makhetlo a supileng.” Mohlomong thutong ea lōna ea lelapa ea Bibele, batsoali le ka thusa bana ba lōna hore ba lokisetse likarabo ka mantsoe a bona lirapeng tse khethiloeng ho Molula-Qhooa. Ba thuseng hore ba ananele tokelo e khōlō eo ba nang le eona ea ho ba le karolo lenaneong la Jehova la thuto.
16. Molemo oa Sekolo sa Tšebeletso sa Puso ea Molimo ke ofe, hona ke bo-mang ba ka ngolisang sekolong see?
16 Thuto e fanoang libokeng tse ling tsa Bokreste le eona e lokela ho nahanisisoa ka ho teba, ka bobeli ke ba fuoeng tokelo ea ho fana ka boitsebiso le ba mamelang thupelo e fanoang. Ka lilemo tse fetang 50 joale, Jehova o ’nile a sebelisa Sekolo sa Tšebeletso sa Puso ea Molimo ho koetlisa banna le basali ba limilione ho fana ka molaetsa oa ’Muso ka katleho e khōloanyane. Ba kopanelang ka mafolo-folo le phutheho ba ka ngolisa, ho kopanyelletsa batho ba sa tsoa qala ho ba teng libokeng, hafeela ba phela bophelo bo leng tumellanong le litekanyetso tsa Bokreste.
17. (a) Seboka sa Phatlalatsa se thehiloe ka morero ofe ka ho khetheha? (b) Ke lintlha life tseo libui tsa phatlalatsa li lokelang ho li hopola?
17 Karolo e ’ngoe ea nako e telele ea lenaneo la thuto ke Seboka sa Phatlalatsa. Joalokaha lebitso la sona le bontša, seboka sena se thehiloe haholo-holo bakeng sa ho tloaetsa bao eseng Lipaki lithuto tsa motheo tsa Bibele. Ka hona, ea fanang ka puo ho hlokahala hore a fetise boitsebiso ka tsela e utloahalang ho ba utloang molaetsa ka lekhetlo la pele. Sena se bolela hore a hlalose mantsoe a kang “linku tse ling,” “baena,” le “masala,” e leng mantsoe ao bao e seng Lipaki ba ka ’nang ba se a utloisise. Kaha batho ba tlang Sebokeng sa Phatlalatsa e ka ’na eaba ba na le litumelo kapa mekhoa ea bophelo e fapaneng haholo le Mangolo—le hoja e amoheleha mokhatlong oa batho kajeno—ho hlokahala hore sebui se be masene ’me le ka mohla se se ke sa phoqa litumelo tse joalo kapa mekhoa ea bophelo.—Bapisa le 1 Ba-Korinthe 9:19-23.
18. Ho na le liboka life hape tsa beke le beke, hona li sebeletsa morero ofe?
18 Thuto ea Buka ea Phutheho ke seboka seo ho sona likhatiso tse lokiselitsoeng tlas’a tataiso ea mohlanka ea khabane ea bohlale li ithutoang beke le beke hammoho le Bibele. Buka ea Tšenolo—Tlhōrō ea Eona e Hlollang ka Botle e Haufi! ke eona e ntseng e ithutoa hona joale linaheng tse ngata. Seboka sa Tšebeletso se etselitsoe ho hlomella batho ba Jehova hore ba be le karolo e tletseng ha ba bolela litaba tse molemo tsa ’Muso le ho etsa barutuoa.—Mattheu 28:19, 20; Mareka 13:10.
Ho Rutoa Libokeng Tse Khōloanyane
19. “Mohlanka” o lokisetsa lipokano life tse khōloanyane selemo le selemo?
19 Ka lilemo tse fetang lekholo, ‘mohlanka ea khabane’ o lokiselitse likopano tse khōlō le tse nyenyane bakeng sa ho ruta le ho khothatsa Bakreste ba ’nete ka mokhoa o khethehileng. Liboka tse joalo tse khōloanyane hona joale li ba teng hararo selemo le selemo. Ho na le kopano ea letsatsi le le leng eo ho eona ho bang teng liphutheho tse etsang potoloho. Pele selemo se fela, potoloho ka ’ngoe e boetse e ba le pokano ea matsatsi a mabeli e bitsoang kopano ea potoloho. Ho phaella moo, ho na le pokano, e bitsoang kopano ea setereke, eo ho eona ho bang teng lipotoloho tse ’maloa. Ka mor’a lilemo tse ’maloa ho ka ’na ha e-ba le likopano tsa machaba. Lipokano tsena tse khōlō tseo ho bang le Lipaki tsa baeti tse tsoang linaheng tse ngata ruri li matlafatsa tumelo ea batho ba Jehova!—Bapisa le Deuteronoma 16:16.
20. Ho ’nile ha hatisoa eng lipokanong tse khōloanyane tsa Lipaki tsa Jehova ka mokhoa o tšoanang?
20 Ka 1922, ha batho ba ka bang 10 000 ba kopane Cedar Point, Ohio, U.S.A., baemeli ba ile ba susumetsoa ke khothatso ea sebui ha se re: “Lena ke letsatsi har’a matsatsi. Bonang, Morena oa busa! Le babuelli ba hae ba phatlalatsa. Ka hona phatlalatsang, phatlalatsang, phatlalatsang, Morena le ’muso oa hae.” Likopano tse joalo tse khōlō li ’nile tsa beha khatiso mosebetsing oa boboleli ka mokhoa o tšoanang. Ka mohlala, kopanong ea machaba ka 1953 New York City, ho ile ha etsoa tsebiso ka ho kenngoa tšebetsong ha lenaneo la ho koetlisetsoa ho ea ka ntlo le ntlo liphuthehong tsohle. Ho kenngoa ha lona tšebetsong ho bile le phello e ntle boboleling ba ’Muso linaheng tse ngata.
Ho Rutoa ke Molimo ho Ruta
21. Re batla ho amohela tokelo efe, re sa lebale morero oa eona?
21 Ka sebele, Jehova o na le lenaneo le hlollang la thuto lefatšeng kajeno! Bohle ba le sebelisang ba ka rutoa ke Molimo, e, ba ka ba har’a ba fuoeng “leleme la ba rutehileng.” Ke tokelo e kaakang ho ba sekolong sa Molimo ha re bua ka tšoantšetso! Leha ho le joalo, ha re amohela tokelo ena, re tlameha hore re se lebale morero oa eona. Jehova o ile a ruta Jesu e le hore a ka ruta ba bang, ’me Jesu o rutile barutuoa ba hae e le hore ba tle ba etse mosebetsi o tšoanang le oo a neng a o etsa empa e le ka tekanyo e khōloanyane. Ka ho tšoanang, re koetlisoa ke lenaneo la Jehova le leholo la thuto ka morero oa ho ruta ba bang.—Johanne 6:45; 14:12; 2 Ba-Korinthe 5:20, 21; 6:1; 2 Timothea 2:2.
22. (a) Moshe le Jeremia ba ne ba e-na le bothata bofe, empa bo ile ba rarolloa joang? (b) Re ka ba le kholiseho efe hore Molimo o tla lokisetsa hore boboleli ba ’Muso bo phethoe?
22 Na le uena, joaloka Moshe u re, “Ha ke monna ea buang habonolo,” kapa joaloka Jeremia u re, “Ha ke tsebe ho bua”? Jehova o tla u thusa joalokaha a ile a ba thusa. O itse ho Moshe: “E tla ba ’na ke bang le molomo oa hao.” ’Me ho Jeremia a re: “U se ke ua ba tšaba, hobane ke na le uena.” (Exoda 4:10-12; Jeremia 1:6-8) Ha baeta-pele ba bolumeli ba ne ba batla ho khutsisa barutuoa ba Jesu, o ile a re: “Bao ha ba ka khutsa, majoe a ka hooa.” (Luka 19:40) Empa ha hoa ka ha hlokahala hore majoe a hooe ka nako eo, ’me le hona joale ha ho hlokahale hore a hooe hobane Jehova o sebelisa leleme la batho ba hae ba rutiloeng ho phatlalatsa molaetsa oa hae oa ’Muso.
Na U ka Araba?
◻ Ke kamano efe e nang le liphello tse molemo ea Tichere le morutoana e totobatsoang ke Esaia khaolo ea 50?
◻ Jehova o ntšelitse pele lenaneo le pharalletseng la thuto joang?
◻ Litšobotsi tse ling tsa thuto ea Jehova ke life?
◻ Ke hobane’ng ha e le tokelo e khōlō ho ba le karolo lenaneong la Jehova la thuto?
[Setšoantšo se leqepheng la 16]
Hangata likarabo tsa bana tse tlohang pelong li khothatsa ba hōlileng