Boprofeta bo Buang ka Mesia

E NE e le khale sechaba sa Bajuda se lebeletse Mesia hobane se ne se tseba seo Esaia le baprofeta ba bang ba se ngotseng ka eena. Ha e le hantle, mehleng ea Jesu Bajuda ba bangata ba ne ba “lebeletse” hore Mesia a hlahe neng kapa neng. (Luka 3:15) Hoa thahasellisa hore ebe boprofeta ba Bibele bo bolela makolopetso a hlollang mabapi le bophelo ba Mesia. Ha ho motho ea neng a ka profeta liketsahalo tse joalo kapa a etsa hore li etsahale bophelong ba Jesu.

Litaba Tse Amanang le Tsoalo ea Mesia. Esaia o ile a profeta hore Mesia, kapa Kreste, o ne a tla tsoaloa ke moroetsana. Ka mor’a ho hlalosa liketsahalo tsa mohlolo tse amanang le tsoalo ea Jesu, moapostola Matheu o ile a re: “Sena sohle se ile sa etsahala hore ho phethahale se ileng sa buuoa ke Jehova ka moprofeta oa hae, ha a re: ‘Bonang! Moroetsana o tla ima ’me o tla tsoala mora.’” (Matheu 1:22, 23; Esaia 7:14) Esaia o ile a boela a profeta hore Kreste e ne e tla ba setloholo sa Davida, a qoolla Jese, ntate oa Davida. Ha e le hantle Jesu o ile a tsoa lesikeng la Davida. (Matheu 1:6, 16; Luka 3:23, 31, 32) Kahoo, pele Jesu a tsoaloa, lengeloi le bitsoang Gabriele le ile la re ho Maria, ’mè oa Jesu: “Molimo o tla mo fa terone ea ntat’ae Davida.”​—Luka 1:32, 33; Esaia 11:1-5, 10; Baroma 15:12.

Litaba Tse Amanang le Bophelo ba Mesia. Ha Jesu e se e le motho e moholo ’me a le ka synagogeng Nazaretha, o ile a bala boprofeta ba Esaia ka lentsoe le phahameng, ho akarelletsa le mantsoe ana: “Moea oa Jehova o holim’a ka, hobane o ntlotselitse hore ke bolelle mafutsana litaba tse molemo.” Jesu o ile a bontša hore boprofeta boo bo sebetsa ho eena ’me a re: “Kajeno lengolo lena leo le sa tsoa le utloa le phethahetse.” (Luka 4:17-21; Esaia 61:1, 2) Esaia o ile a boela a profeta hore Jesu o ne a tla tšoara batho ba hlokang phekolo ka tsela e mosa, e bonolo le e bontšang boikokobetso. Matheu o re: “Ba bangata le bona ba mo latela, ’me a ba phekola kaofela, empa a ba laela ka thata hore ba se ke ba etsa hore a bonahale; e le hore ho ka phethahala se ileng sa buuoa ka moprofeta Esaia . . . ‘A ke ke a pheha khang ka lerata, kapa a hoeletsa haholo . . . Ha ho lehlaka le tletleraneng leo a tla le silakanya.’”​—Matheu 8:16, 17; 12:10-21; Esaia 42:1-4; 53:4, 5.

Litaba Tse Amanang le ho Utloa Bohloko ha Mesia. Esaia o ile a profeta hore batho ba bangata ba Iseraele ba ne ba ke ke ba amohela Mesia empa e ne e tla ba “lejoe le [ba] khopang.” (1 Petrose 2:6-8; Esaia 8:14, 15) Bonneteng, ho sa tsotellehe mehlolo e mengata eo Jesu a ileng a e etsa, batho “ba ne ba sa behe tumelo ho eena, hoo lentsoe la moprofeta Esaia le ileng la phethahala leo a ileng a le bua: ‘Jehova, ke mang ea behileng tumelo nthong eo re e utloileng?’” (Johanne 12:37, 38; Esaia 53:1) E ’ngoe ea lintho tse neng li etsa hore Bajuda ba se ke ba ba le tumelo ke maikutlo a atileng le a fosahetseng a hore Mesia o ne a tla lokolla sechaba hang-hang pusong ea Baroma ’me a tsosolose ’muso o ikemetseng oa Davida lefatšeng. Kaha Jesu o ile a utloisoa bohloko a ba a shoa, Bajuda ba bangata ba ne ba sa lumele hore ke Mesia. Empa, ’nete ke hore Esaia o ne a profetile hore Mesia o ne a tla utloisoa bohloko pele e e-ba Morena.

Bukeng ea Esaia, Mesia o re: “Ke file babolai mokokotlo oa ka . . . Ha kea ka ka pata sefahleho sa ka linthong tse tlotlollang le ho tšoeloa ka mathe.” Matheu o bolela se ileng sa etsahala nyeoeng ea Jesu, o re: “Ba mo tšoela ka mathe sefahlehong ’me ba mo otla ka litebele. Ba bang ba mo jabela sefahlehong.” (Esaia 50:6; Matheu 26:67) Esaia o re: “A itumella hore a hlorisoe; leha ho le joalo o ne a sa ahlamise molomo.” Kahoo, ha Pilato a botsa Jesu ka lintho tseo Bajuda ba mo qosang ka tsona, Jesu “ha aa ka a mo araba, che, leha e le ka lentsoe le le leng, hoo ’musisi a ileng a makala haholo.”—Esaia 53:7; Matheu 27:12-14; Liketso 8:28, 32-35.

Litaba Tse Amanang le Lefu la Mesia. Boprofeta ba Esaia bo ile ba boela ba phethahala ha Jesu a e-shoa le ka mor’a moo. Esaia o ile a profeta a re: “O tla etsa sebaka sa hae sa lepato hammoho le ba khopo, le sehlopha sa barui lefung la hae.” (Esaia 53:9) Boprofeta boo bo bonahalang eka boa ikhanyetsa bo ne bo tla phethahala joang? Ha Jesu a e-shoa, o ile a khokhotheloa thupeng pakeng tsa lisenyi tse peli. (Matheu 27:38) Empa hamorao, Josefa oa Arimathea ea ruileng o ile a beha setopo sa Jesu ka lebitleng la hae le neng le sa tsoa fatoa lefikeng. (Matheu 27:57-60) Qetellong, ha Jesu a e-shoa ho ile ha phethahala karolo ea bohlokoa ka ho fetisisa ea boprofeta ba Esaia. Esaia o ile a bua tjena ka Mesia: “Ea lokileng, mohlanka oa ka, o tla tlisa boemo bo lokileng ho batho ba bangata; ’me o tla jara liphoso tsa bona.” Ha e le hantle, lefu la Jesu e ile ea e-ba thekollo e le hore batho bohle ba tšepahalang ba ka lokolloa sebeng.​—Esaia 53:8, 11; Baroma 4:25.

Boprofeta Boo ho Seng Potang Hore bo Tla Phethahala

E le ho bontša ka Mangolo hore na Mesia ke mang, baapostola le Jesu ba ile ba qotsa khafetsa boprofeteng ba Esaia ho feta bukeng leha e le efe ea Bibele.[1] Leha ho le joalo, buka ea Esaia hase eona feela e ileng ea profeta bokamoso. Boprofeta bo bong bo bongata ba Mangolo a Seheberu bo phethahala ho Jesu, ’Musong oa hae, le linthong tse ntle tseo o tla li finyella nakong e tlang.a (Liketso 28:23; Tšenolo 19:10) Ho ne ho e-na le bonnete bo bokae ba hore boprofeta boo bo tla phethahala? Jesu o ile a re ho Bajuda ba neng ba mo mametse: “Le se ke la nahana hore ke tlil’o felisa Molao kapa Baprofeta [ke hore, Mangolo a Seheberu]. Ha kea tlela ho felisa, empa ho phethahatsa; etsoe kannete ke re ho lōna leholimo le lefatše li ne li tla feta kapele ho e-na le hore ho hang tlhaku e le ’ngoe e nyenyane ka ho fetisisa kapa phatsa e le ’ngoe ea tlhaku e tlohe Molaong ’me lintho tsohle li sa etsahale.”​—Matheu 5:17, 18.

Jesu o ile a boela a bua ka ho phethahala ha boprofeta ba Bibele linthong tse ileng tsa etsahala nakong ea hae le tse neng li tla etsahala nakong e tlang. (Daniele 9:27; Matheu 15:7-9; 24:15) Ho feta moo, Jesu le barutuoa ba hae ba ile ba profeta lintho tse neng li tla etsahala ka mor’a mehla ea bona, ho akarelletsa le tse ngata tseo re li boneng li etsahala kajeno. Sehloohong se latelang ho tla tšohloa kamoo boprofeta bona ba Bibele bo phethahalang kateng le kamoo bo bong bo sa ntseng bo tla phethahala kateng.

[Mongolo o botlaaseng ba leqephe]

[Setšoantšo se leqepheng la 4]

“Moroetsana o tla . . . tsoala mora”

[Setšoantšo se leqepheng la 5]

“Ha kea ka ka pata sefahleho sa ka linthong tse tlotlollang”