Leseli la Jehova le Khanyetsa Batho ba Hae
“Ho uena Jehova o tla fetoha leseli le hlolang ka nako e sa lekanyetsoang.”—Esaia 60:20.
1. Jehova o hlohonolofatsa batho ba hae ba tšepahalang joang?
“JEHOVA o khahlisoa ke batho ba hae. O khabisa ba bonolo ka poloko.” (Pesaleme ea 149:4) Mantsoe ana a ile a buuoa ke mopesaleme oa boholo-holo ’me histori e tiisitse hore mantsoe a hae ke ’nete. Batho ba Jehova ha ba tšepahala, oa ba hlokomela, oa ba atlehisa le ho ba sireletsa. Mehleng ea boholo-holo o ne a etsa hore ba hlōle lira tsa bona. Kajeno, o ba boloka ba le matla moeeng ’me o ba tiisetsa hore o tla ba boloka motheong oa sehlabelo sa Jesu. (Baroma 5:9) O etsa sena hobane ba khabane mahlong a hae.
2. Batho ba Molimo ba kholisehile ka eng le hoja ba hanyetsoa?
2 Ha e le hantle, ba ‘phelang ka boinehelo ba bomolimo’ lefatšeng le lefifing la bo-nka-ntjana, ba tla hanyetsoa. (2 Timothea 3:12) Leha ho le joalo, Jehova o bona bahanyetsi, ’me o ba lemosa ka ho re: “Sechaba leha e le sefe le ’muso leha e le ofe o ke keng oa u sebeletsa o tla timela; ’me ruri lichaba li tla ripitloa.” (Esaia 60:12) Kajeno, khanyetso e bonahatsoa ka litsela tse ngata. Linaheng tse ling, bahanyetsi ba leka ho lekanyetsa kapa ho thibela borapeli boo Bakreste ba tšepahalang ba bo nehang Jehova. Ho tse ling, batho ba nang le cheseho e feteletseng ba hlasela barapeli ba Jehova ’me ba chesa thepa ea bona. Leha ho le joalo, hopola hore Jehova o se a entse qeto ea hore na ho tla etsahala’ng ka ntho eohle e hanyetsang ho phethahatsoa ha thato ea hae. Bahanyetsi ba tla hlōloa. Ba loantšang Sione, e emeloang ke bana ba eona ba lefatšeng, ba ke ke ba atleha. Na tšepiso ee e tsoang ho Jehova, Molimo oa rōna e moholo, ha e re khothatse?
Ba Hlohonolofalitsoe ka ho Fetisisa
3. Bokhabane le ho beha ha barapeli ba Jehova li tšoantšelitsoe joang?
3 ’Nete ke hore matsatsing ana a ho qetela a tsamaiso ena ea lintho, Jehova o hlohonolofalitse batho ba hae ka ho fetisisa. Ka ho khetheha o ’nile a khabisa sebaka sa hae sa borapeli le batho ba leng ka ho sona ba bitsoang ka lebitso la hae. Ho latela boprofeta ba Esaia, o re ho Sione: “Khanya ea Lebanone e tla tla ho uena, sefate sa junipere, sefate se nang le makala a kang molora le kyprese ka nako e tšoanang, bakeng sa ho khabisa sebaka sa sehalalelo sa ka; ’me ke tla tlotlisa sebaka sa maoto a ka.” (Esaia 60:13) Mahlo a khahloa ke ho bona lithaba tse apereng meru e tlokomang. Kahoo, lifate tse behang li tšoantšetsa hantle bokhabane le ho beha ha barapeli ba Jehova.—Esaia 41:19; 55:13.
4. Sehalalelo” le “sebaka sa maoto a [Jehova]” ke eng, ’me li khabisitsoe joang?
4 “Sehalalelo” le “sebaka sa maoto a [Jehova]” tse boleloang ho Esaia 60:13 ke eng? Li hlalosa mabala a tempele e khōlō ea moea ea Jehova, e leng tokisetso ea ho mo atamela borapeling ka Jesu Kreste. (Baheberu 8:1-5; 9:2-10, 23) Jehova o boletse morero oa hae oa hore o tla tlotlisa tempele eo ea moea ka ho bokella batho ba lichaba tsohle hore ba tle ’me ba rapele ho eona. (Hagai 2:7) Pejana Esaia o ne a bone matšoele a tsoang lichabeng tsohle a phallela thabeng e telele ea Jehova ea borapeli. (Esaia 2:1-4) Makholo a lilemo hamorao, moapostola Johanne o ile a bona ponong “bongata bo boholo, boo ho seng motho ea neng a khona ho bo bala, bo tsoa lichabeng tsohle le melokong eohle le bathong bohle le malemeng ’ohle.” Bongata bona bo ne bo eme “ka pel’a terone ea Molimo . . . ba mo etsetsa tšebeletso e halalelang bosiu le motšehare ka tempeleng ea hae.” (Tšenolo 7:9, 15) Kaha boprofeta bona bo phethahala mehleng ea rōna, rea bona hore ntlo ea Jehova e khabisitsoe.
5. Maemo a bana ba Sione a ile a ntlafatsoa haholo joang?
5 Sione e ntlafetse hakaakang ka lebaka la see! Jehova o re: “Ho e-na le hore u be ea tlohetsoeng ka ho feletseng le ea hloiloeng, ho se ea fetang, ke tla u beha hore u be ntho eo ho ithorisoang ka eona ho isa nakong e sa lekanyetsoang, thabo e khaphatsehang molokong o mong ka mor’a o mong.” (Esaia 60:15) Ho ella bofelong ba ntoa ea pele ea lefatše, “Iseraele ea Molimo” e hlile ea e-ba lefeella ka nako e itseng. (Bagalata 6:16) E ile ea ikutloa e ‘tlohetsoe ka ho feletseng,’ hobane bana ba eona ba lefatšeng ba ne ba sa lemohe hantle hore na Molimo o rata ha ba etsa’ng. Joale, ka 1919, Jehova o ile a tsosolosa bahlanka ba hae ba tlotsitsoeng, ’me ho tloha ka nako eo o ba hlohonolofalitse ka nala e babatsehang ea moea. Ho feta moo, tšepiso e temaneng ena ea nyakallisa. Jehova o tla nka Sione e le “ntho eo ho ithorisoang ka eona.” Ha ho pelaelo hore bana ba Sione le Jehova ka boeena, ba tla ithorisa ka Sione. E tla ba “thabo e khaphatsehang,” mohloli oa nyakallo e se nang moeli. ’Me seo e ke ke ea e-ba ntho ea nakoana feela. Boemo bo amohelehang ba Sione, joalokaha e emeloa ke bana ba eona ba lefatšeng, bo tla tšoarella “molokong o mong ka mor’a o mong.” Bo ke ke ba khaotsa.
6. Bakreste ba ’nete ba sebelisa maruo a lichaba joang?
6 Joale, mamela tšepiso e ’ngoe ea Molimo. Jehova ha a bua le Sione o re: “U tla anya lebese la lichaba, ’me u tla anya matsoele a marena; ka sebele u tla tseba hore ’na, Jehova, ke Mopholosi oa hao, ’me Ea Matla oa Jakobo ke Morekolli oa hao.” (Esaia 60:16) Sione e iphepa ka “lebese la lichaba” le ho “anya matsoele a marena” joang? Ka hore Bakreste ba tlotsitsoeng le metsoalle ea bona ea “linku tse ling” ba sebelisa maruo a bohlokoa a lichaba e le hore ba ntšetse pele borapeli bo hloekileng. (Johanne 10:16) Menehelo ea chelete e etsoang ka boithatelo e thusa ho ntšetsa pele mosebetsi o moholo oa machaba oa ho bolela le ho ruta. Tšebeliso e bohlale ea theknoloji ea kajeno e thusitse hore ho hatisoe Libibele le lingoliloeng tsa Bibele ka lipuo tse makholo. Kajeno, ’nete ea Bibele e ka fumanoa ke batho ba eketsehileng ho feta neng kapa neng. Baahi ba lichaba tse ngata ba ithuta hore Jehova, ea rekileng bahlanka ba hae ba tlotsitsoeng bohlankeng ba moea, kannete ke ’Moloki.
Tlhophiso e Tsoetseng Pele
7. Bana ba Sione ba bile le tsoelo-pele efe e hlahelletseng?
7 Jehova o khabisitse batho ba hae ka tsela e ’ngoe. O ba hlohonolofalitse ka tlhophiso e tsoetseng pele. Rea bala ho Esaia 60:17: “Ke tla tlisa khauta ho e-na le koporo, ke tla tlisa silevera ho e-na le tšepe, ’me ke tla tlisa koporo, ho e-na le lehong, ke tlise tšepe, ho e-na le majoe; ke tla beha khotso hore e be balebeli ba hao le ho loka hore e be ba u abelang mosebetsi.” Ho nkela koporo sebaka ka khauta ke ntlafatso, ’me ho joalo le ka thepa e ’ngoe eo ho buuoeng ka eona. Tumellanong le sena, matsatsing ana a ho qetela Iseraele ea Molimo e ’nile ea tsoela pele ka lintlafatso tsa tlhophiso. Nahana ka mehlala e seng makae.
8-10. Hlalosa lintlafatso tse ling tsa tlhophiso tse etsahetseng ho tloha ka 1919.
8 Pele ho 1919, liphutheho tsa batho ba Molimo li ne li tsamaisoa ke baholo le badiakone, ’me kaofela ha bona ba ne ba khethoa ka ho vouteloa ke litho tsa phutheho. Ho tloha selemong seo, “lekhoba le tšepahalang le le masene” le ile la khetha motsamaisi oa tšebeletso phuthehong e ’ngoe le e ’ngoe hore a tsamaise tšebeletso ea tšimo. (Matheu 24:45-47) Leha ho le joalo, liphuthehong tse ngata tokisetso ena ha ea ka ea sebetsa hantle kahobane baholo ba bang ba khethiloeng ba ne ba sa tšehetse mosebetsi oa ho bolela evangeli ka ho feletseng. Kahoo, ka 1932, liphutheho li ile tsa laeloa hore li khaotse ho khetha baholo le badiakone. Ho e-na le hoo, li ne li lokela ho khetha banna ba tla sebetsa komiting ea tšebeletso le motsamaisi oa tšebeletso. Hona ho ne ho tšoana le ho khetha “koporo” ho e-na le “lehong,” eo e bile ntlafatso e khōlō hakaakang!
9 Ka 1938, liphutheho tse lefatšeng ka bophara li ile tsa etsa qeto ea ho amohela tokisetso e ntlafalitsoeng, e neng e lumellana haholo le mehlala ea Mangolo. Tsamaiso ea phutheho e ile ea behoa matsohong a mohlanka oa phutheho le bahlanka ba bang, kaofela ba khethiloe tlas’a bookameli ba lekhoba le tšepahalang le le masene. Likhetho tsa livoutu li ile tsa felisoa! Ka tsela eo, ho khethoa ha batho ka phuthehong ho ne ho etsoa ka tsela ea puso ea Molimo. Hona ho ne ho tšoana le ho khetha “tšepe” ho e-na le “majoe” kapa “khauta” ho e-na le “koporo.”
10 Ho tloha moo, tsoelo-pele ha ea ka ea khaotsa. Ka mohlala, ka 1972 ho ile ha hlokomeloa hore ha liphutheho li lebeloa ke sehlopha se sebelisanang sa baholo ba khethiloeng ka tsela ea puso ea Molimo, ho se moholo ea fetang ba bang ka matla a ho laela, boemo bo tla tšoana haholoanyane le kamoo liphutheho tsa Bakreste tsa lekholong la pele la lilemo li neng li tsamaisoa kateng. Ho feta moo, hoo e ka bang lilemong tse peli tse fetileng, ho ile ha nkoa bohato bo bong bo eang pele. Ho ile ha etsoa phetoho botsamaising ba mekhatlo e meng ea molao, ’me sena se ile sa nolofalletsa Sehlopha se Busang ho kena ka botebo lithahasellong tsa moea tsa batho ba Molimo le hore se se ke sa tšoenyeha ke litaba tsa kamehla tse amanang le molao.
11. Ke mang ea ’nileng a tšehetsa liphetoho tsa tlhophiso har’a batho ba Jehova, ’me liphetoho tsee li feletse ka eng?
11 Liphetoho tsee tse tsoelang pele li tšehetsoa ke mang? Ha ho pelaelo hore ke Jehova Molimo ka boeena. Ke eena ea reng: “Ke tla tlisa khauta.” Ke eena hape ea reng: “Ke tla beha khotso hore e be balebeli ba hao le ho loka hore e be ba u abelang mosebetsi.” E, Jehova ke eena ea ikarabellang ka ho lebeloa ha batho ba hae. Tlhophiso e tsoetseng pele e boletsoeng esale pele ke tsela e ’ngoe eo a khabisang batho ba hae ka eona. E entse hore Lipaki tsa Jehova li hlohonolofatsoe ka litsela tse ngata. Ho Esaia 60:18, rea bala: “Pefo ha e sa tla hlola e utluoa naheng ea heno, tlatlapo kapa thipitlo har’a meeli ea heno. Ka sebele u tla bitsa marako a hao Poloko le liheke tsa hao Thoriso.” Mantsoe ao a monate hakaakang! Empa a phethahalitsoe joang?
12. Ho tlile joang hore khotso e rene har’a Bakreste ba ’nete?
12 Bakreste ba ’nete ba shebile ka matla ho Jehova bakeng sa taeo le tataiso, ’me phello e joalokaha Esaia a ile a bolela esale pele, a re: “Bara bohle ba hao e tla ba batho ba rutoang ke Jehova, ’me khotso ea bara ba hao e tla ba ngata.” (Esaia 54:13) Ho feta moo, moea oa Jehova o sebetsa ho batho ba hae, ’me e ’ngoe ea litholoana tsa moea oo ke khotso. (Bagalata 5:22, 23) Khotso ea batho ba Jehova e hlahang ka lebaka lena e ba fetola setšabelo se khathollang lefatšeng le mabifi. Khotso ea bona e thehiloeng leratong leo Bakreste ba ’nete ba nang le lona har’a bona, ke selelekela sa bophelo ba lefatšeng le lecha. (Johanne 15:17; Bakolose 3:14) Ha ho pelaelo hore e mong le e mong oa rōna o thabela ho nyakallela le ho hōlisa khotso ena e rorisang le e tlotlisang Molimo oa rōna le eo e leng karolo e ka sehloohong ea paradeise ea rōna ea moea!—Esaia 11:9.
Leseli la Jehova le Tla ’ne le Khanye
13. Ke hobane’ng ha re ka tiisa hore leseli la Jehova le ke ke la khaotsa ho khanyetsa batho ba hae?
13 Na leseli la Jehova le tla ’ne le khanyetse batho ba hae? E! Rea bala ho Esaia 60:19, 20: “Letsatsi ha e sa tla hlola e e-ba leseli la hao motšehare, ’me bakeng sa khanya khoeli ha e sa tla hlola e u fa leseli. Ho uena Jehova o tla fetoha leseli le hlolang ka nako e sa lekanyetsoang, ’me Molimo oa hao e be botle ba hao. Letsatsi la hao ha le sa tla hlola le likela, kapa khoeli ea hao e fifale; etsoe ho uena Jehova o tla fetoha leseli le hlolang ka nako e sa lekanyetsoang, ’me matsatsi a ho siama ha hao a tla be a phethehile.” Ha “ho siama” ha batlamuoa ba moea ho fela ka 1919, leseli la Jehova le ile la qala ho ba khanyetsa. Lilemo tse fetang 80 hamorao, ba sa ntsane ba thabela mohau oa Jehova ha leseli la hae le ntse le tsoela pele ho khanya. ’Me le ke ke la khaotsa. Malebana le barapeli ba hae, Molimo oa rōna a ke ke a “likela” joaloka letsatsi kapa a ‘fifala’ joaloka khoeli. Ho e-na le hoo, o tla ba bonesetsa leseli ka ho sa feleng. Ke tšepiso e hlollang hakaakang bakeng sa rōna ba phelang matsatsing a ho qetela a lefatše lee le lefifing!
14, 15. (a) Batho bohle ba Molimo ba ‘lokile’ ka tsela efe? (b) Mabapi le Esaia 60:21, linku tse ling li lebeletse ka thabo phethahatso efe ea bohlokoa?
14 Joale, utloa tšepiso e ’ngoe eo Jehova a e bolelang mabapi le baemeli ba Sione ba lefatšeng, e leng Iseraele ea Molimo. Esaia 60:21 e re: “Ha e le batho ba hao, kaofela ha bona e tla ba ba lokileng; ba tla rua naha ho isa nakong e sa lekanyetsoang, lehlōmela la seo ke se lemileng, mosebetsi oa matsoho a ka, hore ke tlotlisoe.” Ka 1919 ha Bakreste ba tlotsitsoeng ba busetsoa temeng, e ne e le sehlopha se sa tloaelehang sa batho. Lefatšeng leo kannete e leng la boetsalibe, ho ne ho ‘boletsoe hore ba lokile’ motheong oa tumelo ea bona e sa sisinyeheng sehlabelong sa thekollo sa Kreste Jesu. (Baroma 3:24; 5:1) Joale, joaloka Baiseraele ba lokolotsoeng botlamuoeng ba Babylona, ba ile ba rua “naha,” naha ea moea, kapa sebaka sa mosebetsi, seo ho sona ba neng ba tla thabela paradeise ea moea. (Esaia 66:8) Botle ba paradeise ba naha eo bo ke ke ba senyeha hobane, ho fapana le Iseraele ea boholo-holo, sechaba sa Iseraele ea Molimo sona se tla lula se tšepahala. Tumelo ea sona, mamello ea sona le cheseho ea sona li tla tlisetsa lebitso la Molimo tlhompho kamehla.
15 Litho tsohle tsa sechaba seo sa moea li kene selekaneng se secha. Molao oa Jehova o ngotsoe lipelong tsa tsona kaofela, ’me Jehova o li tšoaretse libe motheong oa sehlabelo sa thekollo sa Jesu. (Jeremia 31:31-34) O bolela hore ke “bara” ba lokileng ’me o sebetsana le tsona joalokaha eka li phethahetse. (Baroma 8:15, 16, 29, 30) Metsoalle ea tsona ea linku tse ling le eona e tšoaretsoe libe motheong oa sehlabelo sa Jesu ’me, joaloka Abrahama, ho boletsoe hore ka tumelo ke metsoalle e lokileng ea Molimo. ‘E hlatsoitse liaparo tsa eona tse telele tsa ka holimo ’me e li soeufalitse maling a Konyana.’ ’Me metsoalle ena ea linku tse ling e lebeletse ka thabo tlhohonolofatso e ’ngoe e hlahelletseng. Ka mor’a ho pholoha “matšoenyehong a maholo” kapa ka mor’a ho tsosoa, e tla bona phethahatso ea sebele ea mantsoe a Esaia 60:21 ha lefatše lohle e e-ba paradeise. (Tšenolo 7:14; Baroma 4:1-3) Ka nako eo, “ba bonolo ba tla rua lefatše, ka sebele ba tla fumana thabo e phethehileng khotsong e ngata.”—Pesaleme ea 37:11, 29.
Keketseho e Tsoela Pele
16. Jehova o ile a etsa tšepiso efe e tsotehang, ’me e phethahalitsoe joang?
16 Temaneng ea ho qetela ea Esaia 60, re bala tšepiso ea ho qetela ea Jehova khaolong ena. O re ho Sione: “E monyenyane o tla fetoha ba sekete, ’me ea fokolang e be sechaba se matla. ’Na, Jehova, ke tla ho potlakisa ka nako ea teng.” (Esaia 60:22) Mehleng ea rōna, Jehova o phethahalitse seo a se boletseng. Ka 1919 ha masala a Bakreste ba tlotsitsoeng a ne a busetsoa temeng, a ne a fokola ka palo—e ne e le “e monyenyane” kannete. Palo ea ’ona e ile ea hōla ha ho ntse ho tlisoa Baiseraele ba eketsehileng ba moea. ’Me linku tse ling li qala ho bokana ho ’ona ka palo e eketsehang. Khotso eo batho ba Molimo ba nang le eona, e leng paradeise ea moea e teng ‘naheng’ ea bona, e hohetse batho ba bangata ba tšepahalang hoo “e monyenyane” a hlileng a fetohileng “sechaba se matla.” Hona joale “sechaba” sena—Iseraele ea Molimo le “basele” ba inehetseng ba fetang limilione tse tšeletseng—se sengata ho feta lichaba tse ngata tsa lefatše. (Esaia 60:10) Baahi bohle ba sona ba kopanela ho bonahatseng leseli la Jehova, ’me sena se ba etsa hore kaofela ba be khabane mahlong a hae.
17. Puisano ee ea Esaia khaolo ea 60 e u amme joang?
17 Ha ho pelaelo hore ho tšohla lintlha tse khōlō tsa Esaia khaolo ea 60 ho matlafatsa tumelo. Hoa tšelisa ho bona hore khale haholo joalo Jehova o ile a tseba hore batho ba hae ba ne ba tla ea botlamuoeng ba moea ebe baa tsosolosoa ka mor’a moo. Rea hlolloa ha re bona hore khale haholo Jehova o ile a bona esale pele hore palo ea barapeli ba ’nete e tla eketseha haholo mehleng ea rōna. Ho feta moo, ho tšelisa hakaakang ho hopola hore Jehova a ke ke a re lahla! Tšepiso ea hore liheke tsa “motse” li tla lula li butsoe hore ho ’ne ho amoheloe ka mofuthu ‘ba nang le tšekamelo e nepahetseng bakeng sa bophelo bo sa feleng,’ e lerato hakaakang! (Liketso 13:48) Jehova o tla ’ne a khanyetse batho ba hae. Sione e tla ’ne e be ntho eo ho ithorisoang ka eona ha bana ba eona ba ntse ba etsa hore leseli la bona le khanye haholoanyane. (Matheu 5:16) Ka sebele re ikemiselitse ho feta neng kapa neng ho lula haufi haholo le Iseraele ea Molimo le ho baballa tokelo ea rōna ea ho bonahatsa leseli la Jehova!
Na U ka Hlalosa?
• Re kholisehile ka eng mabapi le khanyetso?
• Bana ba Sione ba ‘antse lebese la lichaba’ joang?
• Jehova o tlisitse “koporo, ho e-na le lehong” ka litsela life?
• Ho Esaia 60:17, 21 ho totobatsoa litšoaneleho life tse peli?
• “E monyenyane” o fetohile “sechaba se matla” joang?
[Lebokose/Litšoantšo tse leqepheng la 18]
BOPROFETA BA ESAIA—Leseli Molokong Oohle oa Batho
Moko-taba oa sehlooho sena o ile oa fanoa e le puo Likopanong tsa Setereke tsa “Mesuoe ea Lentsoe la Molimo” tsa 2001/02. Qetellong ea puo ena, libakeng tse ngata sebui se ile sa lokolla buka e ncha e bitsoang Boprofeta ba Esaia—Leseli Molokong Oohle oa Batho, Moqolo oa Bobeli. Boprofeta ba Esaia—Leseli Molokong Oohle oa Batho, Moqolo oa Pele, e ne e se e lokolotsoe selemong se ka pele. Ho lokolloa ha buka ena e ncha ho entse hore ho be bonolo ho buisana ka mokhoa o nakong ka boholo ba litemana tsa buka ea Esaia. Meqolo ena ke thuso e khōlō ho tebiseng kutloisiso ea rōna le kananelo ea rōna bakeng sa boprofeta bo susumetsang tumelo ba buka ea Esaia.
[Setšoantšo se leqepheng la 15]
‘Jehova o khabisa batho ba hae ka poloko’ har’a khanyetso e mabifi
[Setšoantšo se leqepheng la 16]
Batho ba Molimo ba sebelisa maruo a bohlokoa a lichaba ho ntšetsa pele borapeli bo hloekileng
[Setšoantšo se leqepheng la 17]
Jehova o hlohonolofalitse batho ba hae ka tlhophiso e tsoetseng pele le khotso