Khaolo ea Mashome a Mabeli a Metso e Mehlano
Thapelo ea Pako
1, 2. (a) Morero oa taeo ea bomolimo ke ofe? (b) Bajuda ba tla lokela ho etsa khetho efe ka mor’a ho amohela taeo ea Jehova?
TIMETSO ea Jerusalema le tempele ea eona ka 607 B.C.E. e ne e le taeo e tsoang ho Jehova, e le pontšo ea hore ho hang ha e mo khahlise. Sechaba se sa mameleng sa Juda se ne se lokeloa ke kotlo e matla. Leha ho le joalo, Jehova o ne a sa rera hore Bajuda ba felisoe ka ho feletseng. Moapostola Pauluse o ile a bua ka morero oa taeo eo Jehova a fanang ka eona ha a ne a re: “Ke ’nete, ha ho taeo eo hona joale e bonahalang e thabisa, empa e baka mesarelo; leha ho le joalo ka mor’a moo ho ba koetlisitsoeng ke eona e beha litholoana tsa khotso, e leng, ho loka.”—Baheberu 12:11.
2 Bajuda ba tla itšoara joang mabapi le phihlelo eo e bohloko? Na ba tla hlonamela taeo ea Jehova? (Pesaleme ea 50:16, 17) Kapa ba tla e amohela e le koetliso? Na ba tla baka ’me ba folisoe? (Esaia 57:18; Ezekiele 18:23) Boprofeta ba Esaia bo fana ka maikutlo a hore bonyane ba bang ba bao e kileng ea e-ba baahi ba Juda ba tla amohela taeo eo. Ho qala ka litemana tse qetellang tsa khaolo ea 63 ho theosa le khaolo ea 64, sechaba sa Juda se hlahisoa e le batho ba soabileng ba tlang ho Jehova ka thapeli e tlohang pelong. Moprofeta Esaia o etsa thapelo ea pako lebitsong la batho ba habo ha ba se ba le botlamuoeng nakong e tlang. Ha a ntse a rapela joalo, o bua ka liketsahalo tsa nakong e tlang joalokaha eka li etsahala ka pel’a mahlo a hae.
Ntate ea Nang le Kutloelo-bohloko
3. (a) Thapelo ea Esaia ea boprofeta e phahamisa Jehova joang? (b) Thapelo ea Daniele e bontša joang hore thapelo ea Esaia ea boprofeta e hlalosa maikutlo a Bajuda ba bakileng ba Babylona? (Bona lebokose le leqepheng la 362.)
3 Esaia o rapela Jehova: “Talima u le leholimong ’me u bone u le sebakeng sa hao sa bolulo se phahameng sa khalalelo le botle.” Moprofeta o bua ka maholimo a moea, ao Jehova a lulang ho ’ona le libōpuoa tsa hae tsa moea tse sa bonahaleng. Ha a hlalosa maikutlo a Bajuda ba botlamuoeng, Esaia o tsoela pele: “Cheseho ea hao le matla a hao a feletseng li hokae, ho lubeha ha litho tsa hao tse ka hare, le mehauhelo ea hao? Li ithibile hore li se ke tsa tla ho ’na.” (Esaia 63:15) Jehova o thibile matla a hae le ho laola maikutlo a hae a tebileng—“ho lubeha ha litho tsa [hae] tse ka hare, le mehauhelo ea [hae]”—malebana le batho ba hae. Leha ho le joalo, Jehova ke “Ntate” oa sechaba sa Juda. Abrahama le Iseraele (Jakobo) e bile baholo-holo ba sona ka tsoalo, empa haeba ba ne ba ka tsosoa, mohlomong ba ne ba tla ba le tšekamelo ea ho furalla litloholo tsa bona tsa bakoenehi. Jehova o na le kutloelo-bohloko e khōloanyane. (Pesaleme ea 27:10) Ka kananelo Esaia o re: “Uena, Jehova, u Ntat’a rōna. Lebitso la hao ke Morekolli oa rōna oa khale.”—Esaia 63:16.
4, 5. (a) Jehova o etsa hore batho ba hae ba hlahlathele litseleng tsa hae ka kutloisiso efe? (b) Jehova o batla borapeli ba mofuta ofe?
4 Esaia o tsoela pele ka polelo e tlohang pelong: “Jehova, ke hobane’ng ha u etsa hore re ’ne re hlahlathele litseleng tsa hao? Ke hobane’ng ha u thatafatsa lipelo tsa rōna tšabong ea hao? Khutla ka lebaka la bahlanka ba hao, meloko ea lefa la hao.” (Esaia 63:17) E, Esaia o rapella hore Jehova a boele a lebise tlhokomelo ho bahlanka ba hae. Leha ho le joalo, ke ka kutloisiso efe Jehova a etsang hore Bajuda ba hlahlathele litseleng tsa hae? Na Jehova ke eena ea ikarabellang ka ho thatafala ha lipelo tsa bona ho etsang hore ba se ke ba mo tšaba? Che, empa oa ho lumella, ’me ho nyahameng ha bona Bajuda ba tletleba ka hore Jehova o ba file bolokolohi boo. (Exoda 4:21; Nehemia 9:16) Ba lakatsa eka Jehova a ka be a ile a kenella tabeng ho ba thibela ho etsa phoso.
5 Ka sebele Molimo ha a sebetsane le batho ka tsela eo. Re na le bolokolohi ba ho ikhethela, ’me Jehova o re lumella ho ikhethela ho mo mamela kapa ho se mo mamele. (Deuteronoma 30:15-19) Jehova o batla borapeli bo tlohang lipelong le likelellong tse susumetsoang ke lerato la sebele. Kahoo, o lumeletse Bajuda ho sebelisa bolokolohi ba bona ba ho ikhethela, le hoja sena se ba file monyetla oa ho mo fetohela. Ke ka tsela ena a thatafalitseng lipelo tsa bona.—2 Likronike 36:14-21.
6, 7. (a) Liphello e ba life ha Bajuda ba furalla litsela tsa Jehova? (b) Bajuda ba senola takatso efe ea lefeela, empa ha ba na tokelo ea ho lebella eng?
6 Phello ke efe? Esaia o re ka tsela ea boprofeta: “Sechaba sa hao se halalelang se ile sa rua ka nakoana. Bahanyetsi ba rōna ba hataketse sehalalelo sa hao. Ka nako e telele re bile joaloka bao u sa kang ua ba busa, joaloka ba sa kang ba bitsoa ka lebitso la hao.” (Esaia 63:18, 19) Batho ba Jehova ba ile ba rua sehalalelo sa hae ka nakoana. Ka mor’a moo Jehova o ile a lumella hore ba timetsoe ’me sechaba sa hae se isoe botlamuoeng. Ha seo se etsahala, ho bile joalokaha eka ho ne ho se na selekane pakeng tsa hae le litloholo tsa Abrahama le joalokaha eka li ne li sa bitsoe ka lebitso la hae. Joale ha ba se ba le botlamuoeng Babylona, Bajuda ba hooa ba le boemong ba bona ba ho hloka tšepo: “Hoja u hahotse maholimo, ua theoha, ’me ka lebaka la hao lithaba tsa sisinyeha, joalokaha mollo o chesa mofero, ’me mollo o etsa hore metsi a bele, e le hore u ka tsebisa bahanyetsi ba hao lebitso la hao, hore ka lebaka la hao lichaba li ferekane!” (Esaia 64:1, 2) Ka sebele Jehova o na le matla a ho pholosa. Ka sebele a ka be a theohile ho tla loanela batho ba hae, a hahola tsamaiso ea puso e kang maholimo le ho heletsa mebuso e kang lithaba. Jehova a ka be a tsebahalitse lebitso la hae ka ho bonahatsa cheseho ea hae e tukang molemong oa batho ba hae.
7 Jehova o ne a entse lintho tse joalo nakong e fetileng. Esaia oa pheta: “Ha u ne u etsa lintho tse tšosang tseo re neng re ke ke ra li lebella, u ile ua theoha. Lithaba tsa sisinyeha ka lebaka la hao.” (Esaia 64:3) Liketso tse khōlō joalo li ile tsa bonahatsa matla a Jehova le Bomolimo ba hae. Leha ho le joalo, Bajuda ba sa tšepahaleng ba mehleng ea Esaia ha ba na tokelo ea ho lebella hore Jehova a nke khato e joalo molemong oa bona.
Ke Jehova Feela ea ka Pholosang
8. (a) Tsela e ’ngoe eo ka eona Jehova a fapaneng le melimo ea bohata ea lichaba ke efe? (b) Ke hobane’ng ha Jehova a sa nke khato ho pholosa batho ba hae le hoja a e-na le matla a ho etsa joalo? (c) Pauluse o qotsa Esaia 64:4 le ho e sebelisa joang? (Bona lebokose le leqepheng la 366.)
8 Melimo ea bohata ha e etsetse barapeli ba eona liketso tse matla tsa poloko. Esaia oa ngola: “Ho tloha nakong ea khale ha ho le ea mong ea utloileng, kapa a mamela, kapa leihlo la bona Molimo, haese uena, ea nkang bohato molemong oa ea mo lebellang. U kopane le ea thabileng le ea etsang ho loka, ba ntseng ba u hopola litseleng tsa hao.” (Esaia 64:4, 5a) Jehova ke eena feela “moputsi oa ba mo batlang ka tieo.” (Baheberu 11:6) O nka khato ho sireletsa ba etsang ho lokileng le ba mo hopolang. (Esaia 30:18) Na Bajuda ba itšoere ka tsela ee? Che. Esaia o re ho Jehova: “Bona! U halefile, ha re ntse re etsa sebe—ka nako e telele, ’me na re lokela ho pholosoa?” (Esaia 64:5b) Kaha batho ba Molimo ba na le tlaleho ea nako e telele ea ho phehella ho etsa sebe, ha ho na lebaka la hore Jehova a thibe khalefo ea hae ’me a nke khato ho ba pholosa.
9. Bajuda ba bakileng ba ka lebella eng, hona re ka ithuta eng ho see?
9 Bajuda ba ke ke ba etsolla lintho tsa nakong e fetileng, empa haeba ba baka ’me ba khutlela borapeling bo hloekileng, ba ka lebella ho tšoareloa le ho hlohonolofatsoa nakong e tlang. Jehova o tla putsa ba bakileng ka nako ea hae e loketseng ka ho ba lokolla botlamuoeng ba Babylona. Leha ho le joalo, ba lokela ho mamella. Le hoja ba bakile, Jehova ha a na ho fetola kemiso ea hae. Leha ho le joalo, haeba ba lula ba falimehile ’me ba ela hloko thato ea Jehova, ba tiisetsoa hore qetellong ba tla lokoloha. Ka ho tšoanang, Bakreste kajeno ba lula ba letetse Jehova ka mamello. (2 Petrose 3:11, 12) Re nka ka ho teba mantsoe a moapostola Pauluse, ea ileng a re: “A re se keng ra tela ho etsa se setle, kaha ka nako e loketseng re tla kotula haeba re sa khathale.”—Bagalata 6:9.
10. Thapelo ea Esaia e bolela ka ho toba hore ha ho na matla a ho etsa eng?
10 Thapelo ea Esaia ea boprofeta hase mokhoa feela o hlomamisitsoeng oa ho ipolela libe. E bontša hore o hlile o hlokomela hore sechaba ha se na matla a ho ipholosa. Moprofeta o re: “Re joaloka ea sa hloekang, kaofela ha rōna, ’me liketso tsohle tsa rōna tsa ho loka li tšoana le seaparo sa linako tsa ho ilela khoeli; re tla nyamela joaloka makhasi, kaofela ha rōna, ’me liphoso tsa rōna li tla re fefola joaloka moea.” (Esaia 64:6) Mohlomong qetellong ea botlamuoa Bajuda ba bakileng ba se ba khaolitse ho etsa liketso tsa bokoenehi. Mohlomong ba bile ba khutletse ho Jehova ka liketso tsa ho loka. Empa ba ntse ba sa phethahala. Le hoja liketso tsa bona tse molemo li babatseha, ha lia fapana le liaparo tse silafetseng ha ho tluoa tabeng ea ho koaheloa ha libe. Ho tšoarela ha Jehova ke mpho e sa tšoanelang e susumetsoang ke mohau oa hae. Hase ntho e ka fumanoang e le moputso.—Baroma 3:23, 24.
11. (a) Ho na le boemo bofe bo kotsi ba moea ho Bajuda ba bangata ba botlamuoeng, hona e ka ’na eaba lebaka la see ke lefe? (b) Ke bo-mang bao e bileng mehlala e babatsehang ea tumelo nakong ea botlamuoa?
11 Ha Esaia a talima pele, o bona eng? Moprofeta oa rapela: “Ha ho na ea ipiletsang lebitsong la hao, ha ho na ea tsohang hore a u tšoare; etsoe u re patetse sefahleho sa hao, ’me u etsa hore re qhibilihisoe ke matla a liphoso tsa rōna.” (Esaia 64:7) Sechaba se boemong bo hlobaetsang ba moea. Batho ha baa ipiletsa lebitsong la Molimo ka thapelo. Le hoja ba se ba se molato oa sebe se tebileng sa borapeli ba litšoantšo, ho totobetse hore ba hlokomolohile borapeli ba bona, ’me ‘ha ho na ea tsohang hore a tšoare’ Jehova. Ho hlakile hore ha ba na kamano e ntle le ’Mōpi. Mohlomong ba bang ba ikutloa ba sa tšoanelehe ho bua le Jehova ka thapelo. E ka ’na eaba ba bang ba iketsetsa mesebetsi ea bona ea letsatsi le letsatsi ba sa mo natse. Ke ’nete hore ho na le batho ba kang Daniele, Hanania, Mishaele, Azaria le Ezekiele har’a batlamuoa, ’me bana ke mehlala e metle ea tumelo. (Baheberu 11:33, 34) Ha lilemo tse 70 tsa botlamuoa li le haufi le ho fela, banna ba kang Hagai, Zakaria, Zorobabele le Moprista ea Phahameng Joshua ba itokiselitse ho etella pele ka tsela e babatsehang ho ipiletseng lebitsong la Jehova. Leha ho le joalo, ho bonahala thapelo ea Esaia ea boprofeta e hlalosa boemo ba batlamuoa ba bangata.
“Ho Mamela ho Molemo ho Feta Sehlabelo”
12. Esaia o hlalosa boikemisetso ba Bajuda ba bakileng ba ho fetola boitšoaro ba bona joang?
12 Bajuda ba bakileng ba ikemiselitse ho fetoha. Esaia o rapela Jehova lebitsong la bona: “Joale, Jehova, u Ntat’a rōna. Re letsopa, ’me u Sebōpi sa rōna; kaofela ha rōna re mosebetsi oa letsoho la hao.” (Esaia 64:8) Mantsoe ana a boetse a ela hloko bolaoli ba Jehova e le Ntate, kapa Monehi-Bophelo. (Jobo 10:9) Bajuda ba bakileng ba bapisoa le letsopa le bonolo. Ka tsela ea tšoantšetso, ba amohelang taeo ea Jehova ba ka bōptjoa tumellanong le litekanyetso tsa Molimo. Empa sena se ka finyelloa feela haeba Jehova, Sebōpi, a tšoarela. Kahoo, ka makhetlo a mabeli Esaia o ipiletsa ho eena hore a hopole hore Bajuda ke batho ba hae: “Jehova, u se ke ua halefa ka ho fetisisa, ’me u se ke ua hopola liphoso tsa rōna ka ho sa feleng. Joale, ka kōpo, bona: kaofela re sechaba sa hao.”—Esaia 64:9.
13. Naha ea Iseraele e boemong bofe nakong ea ha batho ba Molimo ba le botlamuoeng?
13 Nakong ea botlamuoa, Bajuda ha ba mamelle ho ba botlamuoeng naheng ea bohetene feela. Ho etsoa lesupi ha Jerusalema le tempele ea eona ho tlisa thohako ho bona le ho Molimo oa bona. Thapelo ea Esaia ea pako e pheta tse ling tsa lintho tse tlisang thohako ena: “Metse ea hao e halalelang e fetohile lefeella. Sione e fetohile lefeella le leholo, Jerusalema ke lesupi. Ntlo ea rōna ea khalalelo le botle, eo baholo-holo ba rōna ba u rorisitseng ho eona, e fetohile ntho e chesoang mollong; ’me e ’ngoe le e ’ngoe ea lintho tsa rōna tse lakatsehang e ripitliloe.”—Esaia 64:10, 11.
14. (a) Jehova o ile a lemosa joang ka boemo bo teng joale? (b) Le hoja Jehova a ne a khahlisoa ke tempele ea hae le mahlabelo a etsetsoang ho eona, ke eng eo e leng ea bohlokoa le ho feta?
14 Ke ’nete hore Jehova o lemoha se etsahalang naheng ea baholo-holo ba Bajuda. Lilemo tse ka bang 420 pele Jerusalema e timetsoa, o ile a lemosa batho ba hae hore haeba ba ka furalla litaelo tsa hae ’me ba sebeletsa melimo e meng, o ne a tla ba ‘felisa naheng,’ ’me tempele eo e ntle e ne e tla “fetoha liqubu tsa lithako.” (1 Marena 9:6-9) Ke ’nete hore Jehova o ne a khahlisoa ke naha eo a e fileng batho ba hae, tempele e majabajaba e hahetsoeng ho mo tlotlisa le mahlabelo ao a neng a a hlabeloa. Empa botšepehi le kutlo ke tsa bohlokoa ho feta lintho tse bonahalang, esita le mahlabelo. Ka nepo moprofeta Samuele o ile a re ho Morena Saule: “Na Jehova o thabela linyehelo tsa secheso le mahlabelo joalokaha a thabela ho mameloa ha lentsoe la Jehova? Bona! Ho mamela ho molemo ho feta sehlabelo, ho ela hloko ho molemo ho feta mafura a lipheleu.”—1 Samuele 15:22.
15. (a) Esaia o etsa thapeli efe ho Jehova ka tsela ea boprofeta, hona e arabeloa joang? (b) Ke liketsahalo life tse ileng tsa etsa hore Jehova a qetelle a lahlile Iseraele e le sechaba?
15 Leha ho le joalo, na Molimo oa Iseraele a ka talima tlokotsi ea batho ba hae ba bakileng eaba o sitoa ho ba utloela bohloko? Eo ke potso eo Esaia a qetellang thapelo ea hae ea boprofeta ka eona. Lebitsong la Bajuda ba botlamuoeng, o etsa thapeli: “Jehova, na u tla lula u ithibile linthong tsee? Na u tla khutsa ’me u lumelle hore re hlorisoe ka ho fetisisa?” (Esaia 64:12) Qetellong, Jehova o fela a tšoarela batho ba hae, ’me ka 537 B.C.E., o ba khutlisetsa naheng ea habo bona e le hore ba ka tsosolosa borapeli bo hloekileng teng. (Joele 2:13) Leha ho le joalo, lilemo tse makholo hamorao, Jerusalema le tempele ea eona li ile tsa boela tsa timetsoa, ’me qetellong Molimo a lahla sechaba seo a entseng selekane le sona. Hobane’ng? Hobane batho ba Jehova ba ne ba khelohile litaelo tsa hae ’me ba hanne ho amohela Mesia. (Johanne 1:11; 3:19, 20) Ha seo se etsahala, Jehova o ile a nkela Iseraele sebaka ka sechaba se secha, sechaba sa moea, e leng “Iseraele ea Molimo.”—Bagalata 6:16; 1 Petrose 2:9.
Jehova, “Ea Utloang Thapelo”
16. Bibele e ruta eng mabapi le ho tšoarela ha Jehova?
16 Re ka ithuta lithuto tsa bohlokoa ho se ileng sa etsahalla Iseraele. Rea hlokomela hore Jehova o “molemo ’me [o] itokiselitse ho tšoarela.” (Pesaleme ea 86:5) Re le libōpuoa tse sa phethahalang, re itšetlehile ka mohau oa hae le tšoarelo ea hae e le hore re bolokehe. Liketso tsa rōna li ke ke tsa re thusa ho fumana moputso oa litlhohonolofatso tsena. Leha ho le joalo, Jehova ha a tšoarele feela-feela tjee. Ke feela ba bakelang libe tsa bona ’me ba sokoloha ba mocheng oa ho fumana tšoarelo ea Molimo.—Liketso 3:19.
17, 18. (a) Re tseba joang hore Jehova o hlile o thahasella menahano ea rōna le maikutlo a rōna? (b) Ke hobane’ng ha Jehova a sa mameletse batho ba baetsalibe?
17 Re boetse re ithuta hore Jehova o thahasella menahano ea rōna le maikutlo a rōna ka tieo ha re mo bolella ’ona ka thapelo. Ke “Ea Utloang thapelo.” (Pesaleme ea 65:2, 3) Moapostola Petrose oa re tiisetsa: “Mahlo a Jehova a talimile ba lokileng, ’me o sekehela thapeli ea bona tsebe.” (1 Petrose 3:12) Ho feta moo, re ithuta hore thapelo ea pako e tlameha ho akarelletsa ho ipolela libe ka boikokobetso. (Liproverbia 28:13) Leha ho le joalo, sena ha se bolele hore re ka nka mohau oa Molimo e le oa lefeela. Bibele e lemosa Bakreste hore ‘ba se ke ba amohela mosa o sa tšoanelang oa Molimo ’me ba lahleheloa ke morero oa oona.’—2 Bakorinthe 6:1.
18 Qetellong, re hlokomela sepheo sa mamello ea Molimo ho batho ba hae ba baetsalibe. Moapostola Petrose o ile a hlalosa hore Jehova o sa mameletse “hobane ha a lakatse hore leha e le mang a timetsoe empa o lakatsa hore bohle ba fihle pakong.” (2 Petrose 3:9) Leha ho le joalo, ba phehellang ho sebelisa mamello ea Molimo hampe qetellong ba tla fuoa kotlo. Mabapi le ba joalo rea bala: “[Jehova] o tla buseletsa e mong le e mong ho ea ka mesebetsi ea hae: bophelo bo sa feleng ho ba batlang khanya le tlhompho le ho se bole, ka mamello mosebetsing o molemo; leha ho le joalo, bakeng sa ba ratang likhang le ba sa mameleng ’nete empa ba mamela ho se loke ho tla ba le khalefo le bohale.”—Baroma 2:6-8.
19. Kamehla Jehova o tla ’ne a bonahatse litšobotsi life tse sa fetoheng?
19 Ena ke eona tsela eo Molimo a ileng a sebetsana le Iseraele ea boholo-holo ka eona. Kamano ea rōna le Jehova kajeno e tataisoa ke melao-motheo e tšoanang kahobane ha a fetohe. Le hoja a fana ka kotlo e tšoanelang, kamehla e tla ’ne e be “Jehova, Molimo ea mohau le ea mosa, ea liehang ho halefa le ea tletseng mosa o lerato le ’nete, ea bolokelang ba likete mosa o lerato, ea tšoarelang phoso le tlōlo le sebe.”—Exoda 34:6, 7.
[Lebokose/Litšoantšo tse leqepheng la 362]
Thapelo ea Daniele ea Pako
Moprofeta Daniele o phetse Babylona ka lilemo tse 70 tsa botlamuoa ba Bajuda. Neng-neng selemong sa bo68 sa botlamuoa, Daniele o ile a hlokomela boprofeteng ba Jeremia hore bojaki ba Iseraele bo ne bo se bo le haufi le ho fela. (Jeremia 25:11; 29:10; Daniele 9:1, 2) Daniele o ile a retelehela ho Jehova ka thapelo—thapelo ea pako lebitsong la sechaba sohle sa Juda. Daniele o re: “Ka lebisa sefahleho sa ka ho Jehova Molimo oa ’nete, e le hore ke mo batle ka thapelo le ka likōpo tse tiileng, ka ho itima lijo le ka ho apara lesela la mokotla le ka ho lula moloreng. Ka qala ho rapela Jehova Molimo oa ka ’me ka ipolela.”—Daniele 9:3, 4.
Daniele o ile a rapela thapelo ea hae lilemo tse ka bang makholo a mabeli ka mor’a hore Esaia a ngole thapelo ea boprofeta e fumanehang khaolong ea 63 le ea 64 ea buka ea hae. Ntle ho pelaelo, Bajuda ba bangata ba tšepahalang ba ile ba rapela Jehova nakong ea lilemo tse thata tsa botlamuoa. Leha ho le joalo, Bibele e totobatsa thapelo ea Daniele, eo kamoo ho bonahalang kateng e neng e emela maikutlo a Bajuda ba bangata ba tšepahalang. Kahoo, thapelo ea hae e bontša hore maikutlo a thapelo ea Esaia ea boprofeta e ne e hlile e le maikutlo a Bajuda ba tšepahalang ba Babylona.
Hlokomela ho tšoana ho hong ho teng pakeng tsa thapelo ea Daniele le ea Esaia.
Esaia 64:10, 11 Daniele 9:16-18
[Lebokose se leqepheng la 366]
“Leihlo ha Lea Bona”
Lengolong la hae le eang ho Bakorinthe, moapostola Pauluse o ile a qotsa buka ea Esaia ha a ne a ngola: “Feela joalokaha ho ngoliloe: ‘Leihlo ha lea bona le tsebe ha ea utloa, leha e le hore ho simolohile ka pelong ea motho lintho tseo Molimo a li lokiselitseng ba mo ratang.’” (1 Bakorinthe 2:9)a Mantsoe a Pauluse kapa a Esaia ha a bolele lintho tseo Jehova a li lokiselitseng batho ba hae lefeng la bona la leholimo kapa paradeiseng e tlang ea lefatšeng. Pauluse o sebelisa mantsoe a Esaia ha a bolela litlhohonolofatso tseo Bakreste ba neng ba se ba ntse ba li thabela lekholong la pele la lilemo, tse kang ho utloisisa lintho tse tebileng tsa Molimo le ho amohela leseli la moea le tsoang ho Jehova.
Re ka khona ho utloisisa lintho tse tebileng tsa moea hafeela e le nako ea Jehova e loketseng ea hore a li senole—’me le teng, haeba feela re le batho ba moea ba nang le kamano e haufi le Jehova. Mantsoe a Pauluse a sebetsa ho ba fokolang moeeng kapa ba se nang bomoea ka ho feletseng. Mahlo a bona a sitoa ho bona, kapa ho lemoha linnete tsa moea, ’me litsebe tsa bona li sitoa ho utloa, kapa ho utloisisa lintho tse joalo. Tsebo ea lintho tseo Molimo a li lokiselitseng ba mo ratang ha e kene le ho kena lipelong tsa batho ba joalo. Empa ba inehetseng ho Molimo joaloka Pauluse, Molimo o ba senoletse lintho tsena ka moea oa hae.—1 Bakorinthe 2:1-16.
[Mongolo o botlaaseng ba leqephe]
a Mantsoe a Pauluse ha a fumanehe ka Mangolong a Seheberu ka tsela e tšoanang hantle le eo a a qotsitseng ka eona. Ho bonahala eka o kopantse likhopolo tse ho Esaia 52:15; 64:4; le 65:17.
[Setšoantšo se leqepheng la 367]
Batho ba Molimo ba ile ba rua Jerusalema le tempele ea eona “ka nakoana”