Karolo 10
Lefatše le Lecha le Hlollang le Entsoeng ke Molimo
1, 2. Ke eng se tla etsahala ka mor’a ntoa ea Harmagedone e hloekisang?
KA MOR’A ntoa ea Molimo ea Harmagedone e hloekisang, ke eng se tla latela? Ho tla qalisa mehla e mecha e khanyang. Baphonyohi ba Harmagedone, ba seng ba pakile botšepehi ba bona pusong ea Molimo, ba tla kena lefatšeng le lecha. Eo e tla ba nako e ncha e hlollang hakaakang historing ha melemo e babatsehang e tsoang ho Molimo e tlela lelapa la batho!
2 Tlas’a tataiso ea ’Muso oa Molimo, baphonyohi ba tla qala ho etsa paradeise. Matla a bona a tla sebelisetsoa lithahasellong tseo e seng tsa boithati tse tla tsoela bohle ba tla beng ba phela nakong eo molemo. Lefatše le tla qala ho fetoloa lehae la batho le letle, la khotso le le khotsofatsang.
Ho Loka ho Nkela Bokhopo Sebaka
3. Ke topollo efe e tla latsuoa hang-hang ka mor’a Harmagedone?
3 Sena sohle se tla nolofatsoa ke ho timetsoa ha lefatše la Satane. Ho ke ke ha hlola ho e-ba le malumeli a bohata a arolang batho, litsamaiso tsa sechaba, kapa mebuso. Ho ke ke ha hlola ho e-ba le lipuo tsa bosatane tse thetsang batho; mekhatlo eohle e li bakang e tla timetsoa le tsamaiso ea Satane. Ak’u nahane: tsamaiso eohle e kotsi ea lefatše la Satane e tla tlosoa! Seo e tla ba topollo e kaakang!
4. Hlalosa phetoho e tla etsahala thutong.
4 ’Me likhopolo tse kotsi tsa puso ea batho li tla nkeloa sebaka ke thuto e hahang e tsoang ho Molimo. “Bara ba hao kaofela e tla ba batho ba rutoang ke Jehova.” (Esaia 54:13, NW) Ka baka la thuto ena e molemo ea selemo le selemo, “lefatše le tla tlala tsebo ea Jehova, joale ka ha metsi a aparetse leoatle.” (Esaia 11:9) Batho ba ke ke ba hlola ba ithuta lintho tse mpe, empa “batho ba lefatše ba tla ithuta ho loka.” (Esaia 26:9) Likhopolo le liketso tse hahang e tla ba tšobotsi ea litsela tsa batho.—Liketso 17:31; Ba-Filippi 4:8.
5. Ho tla etsahala eng ka bokhopo bohle le ka batho ba babe?
5 Kahoo, ho ke ke ha hlola ho e-ba le lipolao, pefo, ho beta, bosholu kapa tlōlo e ’ngoe ea molao. Ha ho motho ea tla lokela ho utloa bohloko ka baka la liketso tsa batho ba bang tse khopo. Liproverbia 10:30 e re: “Ea lokileng a ke ke a sisinngoa le ka mohla o le mong; ha e le ba babe, ba ke ke ba ’na ba hlola lefatšeng.”
Bophelo bo Phethahetseng Boa Khutlisoa
6, 7. (a) Ke linnete life tse thata tseo puso ea ’Muso e tla li felisa? (b) Jesu o ile a bontša sena joang ha a le lefatšeng?
6 Lefatšeng le lecha, ho tla lokisoa liphello tsohle tsa bofetoheli ba pele. Ka mohlala, puso ea ’Muso e tla felisa ho kula le botsofali. Kajeno, le hoja u thabela tekanyo e itseng ea bophelo bo botle, ’nete e bohloko ke hore ha u ntse u tsofala, mahlo a hao a ba lerootho, meno a hao aa bola, u utloa ka thata, letlalo la hao le ea sosobana, litho tsa hao tse ka hare lia senyeha, ho fihlela qetellong u e-shoa.
7 Leha ho le joalo, liphello tseo tse utloisang bohloko tseo re li futsitseng ho batsoali ba rōna ba pele haufinyane e tla ba lintho tsa nakong e fetileng. Na u sa hopola hore ke eng seo Jesu a ileng a se bontša mabapi le bophelo bo botle ha a sa le lefatšeng? Bibele ea tlaleha: “Matšoele-tšoele a tla ho eena, a tlisa lihlotsa, lifofu, liritsa, limumu, le ba bang ba bangata, a ba bea pel’a maoto a hae, ’me Jesu a ba folisa. Batho ba hlolloa haholo ha ba bona limumu li bua, lihlotsa li folile, liritsa li tsamaea, lifofu li bona.”—Mattheu 15:30, 31, BPN.
8, 9. Hlalosa thabo e tla tla lefatšeng le lecha ha bophelo bo phethahetseng bo khutlisitsoe.
8 E tla ba thabo e kaakang lefatšeng le lecha ha maloetse a rōna ’ohle a phekotsoe! Bohloko bo bakoang ke ho se phele hantle bo ke ke ba hlola bo re hlokofatsa. “Ha ho moahi ea tla re: ‘Kea kula.’” “Ke moo mahlo a lifofu a tla tutuboloha, litsebe tsa ba thibaneng litsebe li bulehe. Sehlotsa se tla tlōla joale ka khama, leleme la semumu le tla bina.”—Esaia 33:24, NW; 35:5, 6.
9 Na e ke ke ea ba ntho e thabisang ho tsoha hoseng ho hong le ho hong ’me u hlokomela hore joale u thabela bophelo bo sehlahlo haholoanyane? Na e ke ke ea ba ntho e thabisang ho batho ba hōlileng ho tseba hore ba khutletse bocheng bo sehlahlo ka ho felletseng le hore ba tla finyella phetheho eo Adama le Eva ba neng ba e thabela pele? Tšepiso ea Bibele ke ena: “Nama ea hae a e ke e nchafale ho feta bocheng; ha a ke a khutlele matsatsing a bocha ba hae bo sehlahlo.” (Jobo 33:25, NW) E tla ba thabo e kaakang ho lahla ligalase tseo tsa mahlo, lithuso tsa ho utloa, liikokotlelo, litulo tsa liqhoala le meriana! Ho ke ke ha hlola ho hlokahala lipetlele, lingaka tsa meriana le tsa meno.
10. Ho tla etsahala eng ka lefu?
10 Batho ba thabelang bophelo bo botle joalo ba ke ke ba rata ho shoa. Ba ke ke ba shoa hobane batho ba tla be ba lokolohile matleng a ho se phethahale le lefu ho futsitsoeng. “Hobane e ka khona [Kreste] a buse [joaloka morena], a tle a be a bee lira tsohle ka tlas’a maoto a hae. Sera se tlang ho felisoa morao-rao ke lefu.” “Neo ea mohau oa Molimo ke bophelo bo sa feleng.”—1 Ba-Korinthe 15:25, 26; Ba-Roma 6:23; bona hape le Esaia 25:8.
11. Tšenolo e akaretsa melemo ea lefatše le lecha joang?
11 Buka ea ho qetela ea Bibele ha e akaretsa litlhohonolofatso tse tsoang ho Molimo o tsotellang tse tlelang lelapa la batho Paradeiseng, e re: “Molimo o tla hlakola meokho eohle mahlong a bona; lefu ha le sa tla hlola le e-ba teng; ’me ha ho sa tla ba masoabi, leha e le ho bokolla, kapa bohloko; hobane tsa pele li fetile.”—Tšenolo 21:3, 4.
Bafu Baa Khutla
12. Jesu o ile a bontša matla a hae a tsoho ao a a filoeng ke Molimo joang?
12 Jesu o entse ho hongata ho fetang feela ho folisa batho ba kulang le ba qhoalileng. O bile a tsosa bafu mabitleng. Kahoo o ile a bontša matla a babatsehang a tsoho ao Molimo o mo nehileng oona. Na u sa hopola ha Jesu a ne a tla tlung ea monna eo morali oa hae a neng a shoele? Jesu o ile a re ho ngoanana ea shoeleng: “Ngoanana, ke re ho uena: Tsoha.” Phello e bile efe? “Eaba ngoanana o phakisa a tsoha, a tsamaea.” Ha batho ba bona seo, “ba hlolloa haholo.” Ba ile ba sitoa ho laola thabo ea bona!—Mareka 5:41, 42; bona hape le Luka 7:11-16; Johanne 11:1-45.
13. Ke mefuta efe ea batho e tla tsosoa?
13 Lefatšeng le lecha, ‘ho tla ba le tsoho ea ba lokileng le ba sa lokang.’ (Liketso 24:15) Ka nako eo Jesu o tla sebelisa matla ao a a filoeng ke Molimo ho tsosa bafu hobane ho joalokaha a boletse: “Ke ’na tsoho le bophelo; ea lumelang ho ’na, leha a shoele, o tla phela.” (Johanne 11:25) O ile a boela a re: “Bohle ba mabitleng [khopolong ea Molimo] ba tla utloa lentsoe la hae [Jesu]; ’me ba tla tsoa ho ’ona.”—Johanne 5:28, 29.
14. Hobane lefu le tla be le le sieo, ke lintho life tse tla tlosoa?
14 Ho tla ba le thabo e khōlō lefatšeng ka bophara ha lihlopha tsa bafu li tsosoa le ho kopana le baratuoa ba tsona! Ho ke ke ha hlola ho e-ba le lipehi tsa bafu ho tlisetsa baphonyohi masoabi. Ho e-na le hoo, e tla ba se fapaneng: litsebiso tsa bafu ba sa tsoa tsosoa tse tlang ho tlisetsa baratuoa ba bona thabo. Ho ke ke ha hlola ho e ba le mafu, limmoshara, moo litopo li chesoang teng kapa mabitla!
Lefatše le Hlileng le Nang le Khotso
15. Boprofeta ba Mikea bo tla phethahatsoa joang ka kutloisiso e felletseng?
15 Khotso ea ’nete e tla finyelloa likarolong tsohle tsa bophelo. Lintoa, batšehetsi ba lintoa le ho etsoa ha libetsa e tla ba lintho tsa nako e fetileng. Hobane’ng? Hobane lithahasello tsa sechaba tse bakang likarohano, tsa morabe le tsa bochaba li tla fela. Joale, ka kutloisiso e felletseng, “sechaba se seng se ke ke sa hlola se tsohela sechaba se seng ka lerumo, ha ba sa tla hlola ba ithuta ntoa.”—Mikea 4:3.
16. Molimo o tla tiisa joang hore lintoa ha li sa tla etsahala?
16 Sena se ka ’na sa u makatsa ha u nahana ka histori ea motho ea ho kenella lintoeng tse sa khaotseng tsa tšollo ea mali. Ho bile joalo hobane moloko oa batho o ’nile oa ba tlas’a puso ea batho le ea bademona. Ke sena se tla etsahala lefatšeng le lecha tlas’a puso ea ’Muso: “Tlong, le bohe liketso tsa Jehova . . . O felisitse lintoa le ho isa pheletsong ea lefatše, o robile liqha, a robakanya marumo, a chesa makoloi a ntoa mollong.”—Pesaleme ea 46:8, 9.
17, 18. Lefatšeng le lecha ho tla ba le kamano efe pakeng tsa motho le liphoofolo?
17 Motho le phoofolo ba tla phela ka khotso joalokaha ba ne ba phela Edene. (Genese 1:28; 2:19) Molimo o re: “’Me ka letsatsi leo, ke tla ba etsetsa selekane le liphoofolo tsa naha, le linonyana tsa leholimo, le tse hahabang lefatšeng . . . ’me ke tla ba ahisa ka khotso.”—Hosea 2:18.
18 Khotso eo e tla ba e pharalletseng hakae? “Phiri e tla lula le konyana, lengau le bothe le potsanyane, namane le taoana le khomo e nontšitsoeng li tla ba hammoho, li sotetsoe ke moshanyana.” Liphoofolo e ke ke ea hlola e e-ba tšoso ho motho kapa ho tsona ka botsona. Esita le “tau e tla fula joang joale ka khomo”!—Esaia 11:6-9; 65:25.
Lefatše le Fetoloa Paradeise
19. Lefatše le tla fetoloa eng?
19 Lefatše lohle le tla fetoloa lehae la paradeise bakeng sa batho. Ke ka baka leo Jesu a ileng a tšepisa monna ea neng a lumela ho eena: “U tla ba le ’na Paradeiseng.” Bibele e re: “Naha e tšehla e tla thaba, le lona lefatše le omeletseng; mahalaopa a tla nyakalla, a mele lipalesa joale ka leshoma. . . . hobane metsi a tla kolla naheng e tšehla, melatsoana e phalle mahalaopeng.”—Luka 23:43, NW; Esaia 35:1, 6.
20. Ke hobane’ng ha tlala e ke ke ea hlola e hlokofatsa batho?
20 Le ka mohla tlala e ke ke ea hlola e hlokofatsa batho tlas’a ’Muso oa Molimo. “Nala ea mabele e tla ba teng lefatšeng holim’a lithaba, liqoapi tsa ’ona li hoase.” “Sefate se naheng se tla bea litholoana tsa sona, lefatše le bee tsa lona; ba tla iketla naheng ea bona.”—Pesaleme ea 72:16; Ezekiele 34:27.
21. Ho tla etsahala eng ka batho ba hlokang matlo, libaka tse nang le batho ba bangata haholo tsa boemo bo tlaase le litikoloho tse mpe?
21 Ho ke ke ha hlola ho e-ba le bofutsana, batho ba se nang matlo, libaka tse nang le batho ba bangata haholo tsa boemo bo tlaase kapa litikoloho tse tletseng tlōlo ea molao. “Ba tla haha matlo, ba lule ho ’ona; ba tla hloma merara, ba je litholoana tsa eona. Ba ke ke ba haha matlo, osele a lula teng, leha e le ho hloma merara, osele a je litholoana tsa eona.” “Ba tla lula e mong le e mong ka tlas’a feiga ea hae le ka tlas’a morara oa hae, ho se ea ba tšosang.”—Esaia 65:21, 22; Mikea 4:4.
22. Bibele e hlalosa litlhohonolofatso tsa puso ea Molimo joang?
22 Batho ba tla hlohonolofatsoa ka lintho tsena kaofela, ’me ba tla hlohonolofatsoa ka ho eketsehileng Paradeiseng. Pesaleme ea 145:16 (NW) e re: “Uena [Molimo] u fuparolla seatla sa hao ’me u khotsofatsa takatso ea ntho e ’ngoe le e ’ngoe e phelang.” Ha ho makatse ha boprofeta ba Bibele bo hlalosa: “Ba bonolo ba tla rua lefatše, ba iketle khotsong e kholo. . . . Ba lokileng ba tla ja lefa la lefatše, ’me ba tla hlola ho lona ka ho sa feleng.”—Pesaleme ea 37:11, 29.
Ho Etsolla se Etsahetseng Nakong e Fetileng
23. ’Muso oa Molimo o tla etsolla ho utloa bohloko hohle hoo re ho latsoitseng joang?
23 Puso ea ’Muso oa Molimo e tla etsolla tšenyo eohle e bakiloeng lelapeng la motho lilemong tse likete tse tšeletseng tse fetileng. Thabo ea nakong eo e tla feta hōle bohloko leha e le bofe boo batho ba kileng ba bo latsoa. Bophelo bo ke ke ba hlola ho khathatsoa ke mehopolo leha e le efe e mebe ea ho utloa bohloko ea nakong e fetileng. Likhopolo le mesebetsi tse hahang bophelong ba batho letsatsi le letsatsi butle-butle li tla hlakola mehopolo e bohloko.
24, 25. (a) Esaia o boletse esale pele hore ke eng e neng e tla etsahala? (b) Re ka kholiseha joang hore mehopolo ea ho utloa bohloko ea nakong e fetileng e tla lebaleha?
24 Molimo o tsotellang oa hlalosa: “Ke ea bōpa maholimo a macha [’muso o mocha oa leholimo holim’a moloko oa batho] le lefatše le lecha [mokhatlo o lokileng oa batho]; tse fetileng ha li sa tla hlola li hopoloa, li ke ke tsa khutlela mehopolong. Empa le tla ba le thabo le nyakallo e sa feleng ka seo ke eang ho se bōpa.” “Lefatše kaofela le phomotse, le na le khotso, ho hlajoa lipina tsa nyakallo.”—Esaia 14:7; 65:17, 18.
25 Molimo ka ’Muso oa oona o tla etsolla boemo bohle bo bobe bo tšoarelletseng nako e telele hakana ka ho sa feleng. Ho isa nakong e sa feleng o tla bontša ho tsotella ha hae ho hoholo ho rōna ka ho re tšollela litlhohonolofatso tse fetang bohloko leha e le bofe boo re kileng ra bo utloa bophelong ba rōna nakong e fetileng. Likhathatso tsa nakong e fetileng tseo re li latsoitseng li tla lebaleha, haeba re tla tsotella le ho li hopola.
26. Ke hobane’ng ha Molimo o tla re putsa bakeng sa ho utloa bohloko leha e le bofe ha nakong e fetileng?
26 Ke kamoo Molimo o tla re putsa ka teng bakeng sa bohloko boo mohlomong re ileng ra bo mamella lefatšeng lena. Oa tseba hore e ne e se phoso ea rōna hore re tsoaloe re sa phethahala, hobane re futsitse ho se phethahale ho batsoali ba rōna ba pele. E ne e se phoso ea rōna hore re tsoalloe lefatšeng la Satane, ho e-na le hoo, hoja Adama le Eva ba ile ba tšepahala, re ka be re tsoalletsoe paradeiseng. Kahoo ka mosa o moholo Molimo o tla etsolla bohloko bo etsahetseng nakong e fetileng boo re bo utloileng.
27. Ke boprofeta bofe bo hlollang bo tla phethahala lefatšeng le lecha?
27 Lefatšeng le lecha, batho ba tla latsoa tokoloho e boletsoeng esale pele ho Ba-Roma 8:21, 22: “Tse bōpiloeng li tla holloa bohlankeng ba tšenyeho, li tle li be tokollong ea khanya ea bana ba Molimo. Hobane rea tseba hore tse bōpiloeng tsohle li ntse li feheloa, li bile li tsietsing hammoho, ho fihlela joale.” Joale nakong eo batho ba tla bona ho phethahala ha thapelo ena ka botlalo: “Ho tle ’muso oa hao; thato ea hao e etsoe lefatšeng, joale ka ha e etsoa leholimong.” (Mattheu 6:10) Maemo a hlollang lefatšeng la Paradeise a tla bonahatsa maemo a leng leholimong.
[Litšoantšo tse leqepheng la 23]
Lefatšeng le lecha, maqheku a tla khutlela bocheng ba oona bo sehlahlo
[Setšoantšo se leqepheng la 24]
Mafu ’ohle le mefokolo li tla felisoa lefatšeng le lecha
[Setšoantšo se leqepheng la 25]
Lefatšeng le lecha, bafu ba tla tsosetsoa bophelong
[Setšoantšo se leqepheng la 26]
‘Ba ke ke ba hlola ba ithuta ntoa’
[Litšoantšo tse leqepheng la 27]
Batho le liphoofolo ba tla phela ka khotso e felletseng Paradeiseng
[Setšoantšo se leqepheng la 27]
‘Molimo o tla bula seatla sa oona ’me o khotsofatse takatso ea ntho e ’ngoe le e ’ngoe e phelang’
[Setšoantšo se leqepheng la 28]
’Muso oa Molimo o tla etsa ho hongata ho feta ho etsolla ho utloa bohloko hohle hoo re ho mamelletseng