Ho Hlōla Ntoa Khahlanong le ho Tepella Maikutlo

LOLA o ile a lumela: “Ntho e sithabetsang ka ho fetisisa eo ke ileng ka lokela ho sebetsana le eona ke ho ikutloa ke le molato ka baka la ho felloa ke tšepo kahobane joaloka e mong oa bahlanka ba Jehova, ke ne ke nahana hore ha kea lokela ho ikutloa ka tsela eo.” Ho hloka kutloisiso hona ho tloaelehileng hangata ke sona sera sa pele seo Mokreste ea tepelletseng maikutlo a tlamehang ho se hlōla. Lola o ile a phaella: “Hang ha ke khaotsa ho itlhōpha kelello ka baka la ho ikutloa ka tsela eo ke neng ke ikutloa ka eona ’me ke shebana le ho hlaphoheloa, ke ile ka khona ho sebetsana hamolemonyana le ho tepella maikutlo.” E, ho tepella maikutlo ka bohona hase lebaka la hore u nahane hore u sitetsoe Molimo.

Joalokaha ho boletsoe sehloohong se ka pele, sesosa sa ho tepella maikutlo e ka ’na eaba se ’meleng. Ka 1915, nako e telele pele ho phuputso ea morao-rao e amahanyang mafu a mangata a ’mele le ho tepella maikutlo, The Watch Tower e ile ea bolela: “Ho imeloa hona ha moea, kapa boikutlo ba ho ba mong le ho tepella maikutlo, ka linako tse ling ke ba tlhaho ho batho bohle . . . Ho isa tekanyong e itseng [bo] hlohlelletsoa ke boemo ba bophelo bo botle ’meleng.” Ka hona, haeba boikutlo ba ho tepella maikutlo bo qophella, tlhahlobo ea ngaka e ka ’na ea e-ba molemo. Haeba boemo e le bo fetelletseng, motho a ka ’na a batla hore ho kula hoo ho phekoloe ke setsebi se sebetsanang le ho tepella maikutlo ka ho khethehileng.a

Empa esita le haeba sesosa se se ’meleng, hase ho utloahalang ho lebella hore ha ho mohla e mong oa bahlanka ba Molimo a tla sareloa kapa a nyahame. Nahana feela kamoo Anna ea tšepahalang a ileng ‘a hlokofala moeeng ’me a lla habohloko.’ (1 Samuele 1:7, 10) Nehemia le eena o ile a ‘lla ’me a hlola bofifing ka litšiu tse ngatanyana’ a ba a ba le “masoabi a pelo.” (Nehemia 1:4; 2:2) Jobo o ile a tenoa ke bophelo ba hae a ba a ikutloa hore Molimo o mo furalletse. (Jobo 10:1; 29:2, 4, 5) Morena Davida o ile a bolela hore moea oa hae o tepelletse ka hare ho eena le hore pelo ea hae e felletsoe ke matla. (Pesaleme ea 143:4) ’Me moapostola Pauluse o ile a bua ka ho ba le ‘litšoho kahare’ le ho ba ea ‘kokobelitsoeng’ kapa ho “liheloa fatše” maikutlong.—2 Ba-Korinthe 4:9; 7:5, 6.

Le hoja bana kaofela e ne e le bahlanka ba Molimo ba tšepahalang, matšoenyeho a fapa-fapaneng, ho tšoha, kapa ho nyahama ho bohloko ka nakoana ho ile ha ba bakela mesarelo. Leha ho le joalo, Molimo o ne o sa ba furalla kapa hona ho ba amoha moea oa oona o halalelang. Boikutlo ba bona ba ho tepella maikutlo bo ne bo sa bakoe ke ho hlōleha moeeng. Ka nako e ’ngoe ha Davida a ne a hlomohile, o ile a ipiletsa thapelong: “U thabise moea oa mohlanka oa hao.” Molimo o ile oa tšelisa Davida ‘letsatsing lena la matsoalo’ ’me oa mo thusa hore ka mor’a nako, a boele a thabe. (Pesaleme ea 86:1, 4, 7) Jehova o tla thusa bahlanka ba hae ka ho tšoanang hona joale.

Kaha ho tepella maikutlo ka bohona hase bopaki ba ho hlōleha moeeng kapa ho fokola kelellong, Mokreste ea hlasetsoeng ke hona ha aa lokela ho lula a khutsitse ka hona ka baka la ho hlajoa ke lihlong. Ho fapana le hoo, o lokela ho nka o mong oa mehato ea bohlokoa ka ho fetisisa ea ho loantša ho kula hona. Ke ofe?

Tšolla Maikutlo a Hao

O lokela ho buisana le e mong ka hona. Liproverbia 12:25 e re: “Masoabi [“ho tšoenyeha,” NW] a fifatsa pelo ea motho; empa puo e molemo ea e thabisa.” Ha ho motho e mong ea ka tsebang kamoo ho tšoenyeha ho ka pelong ea hao ho leng matla ka teng ntle le hore u e bule ’me u bue ka hona. Ka ho buisana ka lekunutu la hao le motho ea nang le qenehelo ea ka thusang, mohlomong u tla ithuta hore ba bang ba bile le maikutlo le mathata a tšoanang. Hape, ho hlalosa maikutlo a hao ke mokhoa o phekolang, hobane o imolla pelo hore e senole phihlelo e bohloko ho fapana le ho e koetla. Ka hona, meea e tepelletseng e lokela ho buisana ka makunutu a eona le molekane oa lenyalo, motsoali, kapa motsoalle ea nang le kutloelo-bohloko le ea tšoanelehang moeeng.—Ba-Galata 6:1.

Karolo e ’ngoe ea bothata ba Marie (ea boletsoeng sehloohong se ka pele) ke hore o ile a koetla maikutlo a mo khathatsang a ileng a lebisa ho tepelleng ha hae maikutlong. O ile a re: “Ho theosa le lilemo, ke ile ka ba le boikaketsi bo boholo. Ho hang ba bang ba ne ba ke ke ba nahana hore ke na le bothata bo joalo ba ho sebetsana le maikutlo ana a ho se tšoanelehe.” Empa Marie o ile a senolela moholo e mong ka phuthehong bothata ba hae. Ka lipotso tse bohlale moholo o ile a ‘kha’ ho tšoenyeha hoo a neng a ho jere ka pelong ea hae ’me a mo thusa ho ikutloisisa hamolemonyana. (Liproverbia 20:5) Mantsoe a hae a molemo a tsoang Mangolong a ile a mo fa kholiseho. Marie o hlalositse: “Ka lekhetlo la pele, ke ile ka qala ho fumana thuso ea ho sebetsana le maikutlo a itseng a neng a tlatselitse ho tepelleng ha ka maikutlong.”

Kahoo ho bua le moholo ea utloisisang ho ka ’na ha fana ka “metsi” a khathollang moeeng ho eo ‘moea oa hae o kang lefatše le omeletseng.’ (Esaia 32:1, 2; Pesaleme ea 143:6, TLP) Moeletsi ea bohlale oa moea a ka ba a u thusa ho bona kamoo u ka nkang mehato ea sebele ea ho sebetsana le hoo e ka ’nang eaba u ’nile ua ho talima e le boemo bo hlokang tšepo. (Liproverbia 24:6) Empa ho hlokahala ho eketsehileng ho feta feela ho buisana le e mong ka lekunutu la hao.

Hlokomela Bohlokoa ba Hao ba Sebele

Maikutlo a ho se tšoanelehe ke lebaka le leholo la ho tepella maikutlo. Mohlomong ka baka la bophelo bo sa thabiseng bonyenyaneng, Bakreste ba bang ba ikhella fatše. Empa esita le haeba ho tšoaroa hampe ’meleng, maikutlong, kapa likamanong tsa botona le botšehali nakong e fetileng ho siile maqeba a maikutlo, sena ha se fetole bohlokoa ba motho. Ka hona, u tlameha ho loanela ho ba le pono e leka-lekaneng ka bohlokoa ba hao ba ’nete joaloka motho. Moapostola Pauluse o ile a phehella: “Ke ne ke tla re e mong le e mong oa lōna a se ke a itekanya ho feta bohlokoa ba hae ba sebele, empa a itekanye ka ho se ithetse.” (Ba-Roma 12:3, Charles B. Williams) Le hoja u lokela ho itebela khahlanong le boikakaso, u lokela ho leka hore u se ke ua fetelletsa lintho ka lehlakoreng le leng. Bao ba nang le kamano le Molimo ke ba bohlokoa, baa lakatseha ho oona, hobane o khethela batho ho ba “letlotlo le khethehileng” la hae. Ke tokelo e ikhethang hakaakang!—Malakia 3:17, NW; Haggai 2:7.

Hape, ke tlotla e kaakang ho ba “basebetsi ’moho le Molimo” ka ho kopanela mosebetsing oa Bokreste oa ho etsa barutuoa. (1 Ba-Korinthe 3:9, NW; Mattheu 28:19, 20) Bakreste ba bangata ba tepelletseng maikutlo ba fumane hore mosebetsi ona o haha boikutlo ba ho ba motho oa bohlokoa. Marie o ile a lumela: “Esita le ka mor’a ho fetoha Mokreste, ke ne ke ikutloa ke sa tšoanelehe haholo.” Ho ntse ho le joalo, o ile a qophella mosebetsing oa boboleli, ’me ka letsatsi le leng o ile a kopana le mosali e mong e mocha ea neng a senyehile boko ea neng a batla ho rutoa Bibele. Marie o itse: “O ne a hloka e mong ea tla mo mamella, kaha o ne a lieha ho ithuta. Kahobane o ile a hapa tlhokomelo ea ka e khōlō, ke ile ka itebala ’me ka lebala ho se tšoanelehe ha ka. O ne a hloka thuso ea ka, ’me ke ile ka hlokomela hore ka matla a Jehova ke ne nka mo fa eona. Ho ’mona a kolobetsoa ho ile ha nkhothatsa hoo ke sitoang ho hlalosa. Boikutlo ba ka ba ho ba motho oa bohlokoa bo ile ba hōla, ’me ho tepella maikutlo ho tebileng ho ile ha nyamella ruri.” Ke ’nete hakaakang hore “ea nosetsang o tla nosetsoa le eena”!—Liproverbia 11:25.

Ho ntse ho le joalo, batho ba bangata ba tepelletseng maikutlo ba arabela joaloka mosali e mong oa Mokreste ea neng a tepelletse ka ho tebileng maikutlong, ea ileng a lumela: “Le hoja ke sebetsa ka thata ho hloekisa le ho pheha le ho amohela baeti, ha ke reteleha, ke ipeha molato ka phoso e ’ngoe le e ’ngoe e nyenyane.” Ho tšoaea liphoso ho se nang motheo joalo ho nyenyefatsa boikutlo ba ho ba motho oa bohlokoa haholo. Hopola hore Molimo oa rōna oa utloisisa le hore “ha o lule o fumana phoso ka mehla.” (Pesaleme ea 103:8-10, 14, NW) Haeba Jehova, ea nang le kutloisiso e phahameng haholoanyane ea se nepahetseng, a sa re tšoenye ka phoso e ’ngoe le e ’ngoe e nyenyane ’me a ikemiselitse ho bontša tiisetso e joalo, na ha rea lokela ho leka ka matla ho mo etsisa ha re sebetsana le rōna ka borōna?

Kaofela ha rōna re na le liphoso le mefokolo. Leha ho le joalo, re boetse re na le moo re leng matla teng. Moapostola Pauluse o ne a sa lebella hore o tla ba le katleho e fetisisang boikemisetsong bohle ba hae. O boletse: “Esita le haeba ha ke kheleke puong, ka sebele ha ke joalo tsebong.” Pauluse ha aa ka a ikutloa e se letho kahobane feela e ka ’na eaba ha aa ka a ba le katleho e fetisisang ea ho ba sebui sa phatlalatsa. (2 Ba-Korinthe 11:6, NW) Ka ho tšoanang, batho ba tepelletseng maikutlo ba lokela ho shebana le lintho tseo ba li etsang hantle.

“Bohlale bo ho ba ikokobetsang,” kapa ba hlokomelang le ba amohelang likhaello tsa bona. (Liproverbia 11:2) E mong le e mong oa rōna ke moea o ikhethang, o nang le maemo a fapaneng, ho lula motho a le matla ’meleng, le matla a ho khona ho etsa lintho. Ha u ntse u sebeletsa Jehova ka moea oohle, u etsa seo u ka se khonang, oa thaba. (Mareka 12:30-33) Molimo hase motho eo ho seng mohla a khotsofatsoang ke boiteko ba barapeli ba hae ba inehetseng. Leora, Mokreste ea ileng a loana ka katleho le ho tepella ha hae maikutlong, o itse: “Ha ke atlehe joaloka e mong le e mong linthong tse itseng, joaloka linehelano tšebeletsong ea tšimo. Empa ke ntse ke leka. Seo ke se etsang ke se molemohali seo ’na nka se etsang.”

Ho Sebetsana le Liphoso le ho se Utloisisane

Empa, ho thoe’ng haeba u etsa phoso e tebileng? Mohlomong u ikutloa joaloka Morena Davida, ea ‘ileng a tsamaea ka bofifi tsatsi lohle’ ka baka la liphoso tsa hae, kapa sebe. Empa boikutlo bona ka bobona e ka ’na ea e-ba bopaki ba hore ha u e-s’o ee hōle haholo ’me ha ua etsa sebe se sa tšoareloeng! (Pesaleme ea 38:3-6, 8) Maikutlo a molato a ka ’na a bontša hore motho ea entseng sebe o na le pelo e tšepahalang le letsoalo le letle. Kahoo ho ka sebetsanoa le molato oo joang? Na u ile ua rapela Molimo ’me u nkile mehato ea ho lokisa phoso eo? (2 Ba-Korinthe 7:9-11) Haeba ho joalo, e-ba le tumelo mohaung oa Ea tšoarelang ka tsela e khōlō, u ntse u ikemiselitse hore u se ke ua pheta sebe seo. (Esaia 55:7) Haeba u lauoe, u se ke ‘ua nyahama ha u khalemeloa, hobane Jehova o laea eo a mo ratang.’ (Ba-Heberu 12:5, 6, NW) Khalemelo e joalo e etsoa ka morero oa ho thusa ho busetsa nku e khelohileng tseleng. Ha e theole bohlokoa ba motho.

Esita le haeba lipelo tsa rōna li re ahlola, ha ho hlokahale hore re etse qeto ea hore Jehova o re ahlotse. ‘Re ka tšepisa lipelo tsa rōna pel’a oona. Hobane leha lipelo tsa rōna li re qosa, Molimo o moholo ho lipelo tsa rōna, ’me o tseba tsohle.’ (1 Johanne 3:19, 20) Jehova o bona ho hongata ho feta libe le liphoso tsa rōna. O tseba maemo a bebofatsang molato, tsela eohle ea rōna ea bophelo, lipheo le lipakane tsa rōna. Boholo ba tsebo ea hae bo etsa hore ka qenehelo a khone ho utloa lithapelo tsa rōna tse tiileng bakeng sa tšoarelo, joalokaha a ile a utloa ea Davida.

Ho se utloisisane le ba bang le ho ameha ho tlōlisa ka ho amoheloa ke bona le hona ho tlatsetsa khaellong ea ho ikutloa motho e le oa bohlokoa, mohlomong esita le boikutlong ba ho ba ea lahliloeng. Ka baka la ho se phethahale, Mokreste e mong a ka ’na a u buisa ka tsela e bonahalang e sa nahanele kapa e se mosa. Ho ntse ho le joalo, ho se utloisisane ho hongata ho ka ’na ha lokisoa ka ho bolella motho kamoo seo a se buileng se u ammeng ka teng. (Bapisa le Mattheu 5:23, 24.) Hape, Salomone o elelitse: “Se hlokomele mantsoe ’ohle a buoang.” Hobane’ng? “Hobane pelo ea hao e tseba makhetlo a mangata ao le uena u sebileng ba bang ka ’ona.” (Moeklesia 7:21, 22) U se ke ua lebella phetheho ka ho sa utloahaleng ho uena kapa likamanong tsa hao le batho ba bang ba sa phethahalang. Potlakela ho tšoarela le ho mamella ba bang.—Ba-Kolosse 3:13.

Ho feta moo, molemo oa hao oa sebele ha o lekanngoe haholo-holo ke hore na ba bang baa u rata kapa che. Kreste o ile a “nkoa . . . e se oa bohlokoa ba letho,” ’me ‘ponong ea ba bang o ile a talingoa’ e le ea eisehang. (Esaia 53:3, NW; Zakaria 11:13, NW) Na see se ile sa fetola bohlokoa ba hae ba sebele kapa tsela eo Molimo o neng o mo talima ka eona? Che, hobane esita le haeba re ne re phethahetse, joaloka Jesu, re ne re ke ke ra thabisa e mong le e mong.

Matla a ho Mamella

Ka linako tse ling, ho tepella ho tebileng maikutlong ho ka ’na ha qophella ho sa tsotellehe boiteko ba rōna ba ho ho hlōla. Bohloko ba maikutlo bo ka ba ba etsa hore Bakreste ba bang ba ikutloe joaloka Jonase: “Ho ka bang molemo ho ’na ke ho shoa, e seng ho phela.” (Jonase 4:1-3) Leha ho le joalo, mahlomola a hae ha e-ea ka ea ba a ka ho sa feleng. O ile a tsoa har’a ’ona. Kahoo haeba ho tepella maikutlo ho etsa hore bophelo ba hao bo bonahale e le bo ke keng ba mamelleha, hopola hore ho tšoana le mahlomola ao Pauluse a ileng a re ke “a nakoana.” (2 Ba-Korinthe 4:8, 9, 16-18, NW) A tla fela! Ha ho boemo boo ho seng tšepo ho bona. Jehova o tšepisa “ho tsosolosa pelo ea ba leng bohlokong.”—Esaia 57:15, Lamsa.

Le ka mohla u se khaotse ho rapela, esita le haeba lithapelo tsa hao li bonahala li se na thuso. Davida o ile a ikōpela: “Molimo, mamela mehoo ea ka . . . ka pelo e tepeletseng . . . U ’nyolosetse lefikeng leo ke sitoang ho le hloa!” (Pesaleme ea 61:1, 2) Ke joang Molimo o re lebisang kholisehong e ka hare eo ho bonahalang re sitoa ho e fihlela ka matla a rōna? Eileen, ea ileng a loantša ho tepella maikutlo ka lilemo-lemo, oa arabela: “Jehova ha aa ntlohella hore ke tele. Sena se mpha tšepo ea hore haeba ke tsoela pele ho leka, o tla tsoela pele ho thusa. Ho tseba ’nete ea Bibele ka sebele ho mpolokile ke ntse ke phela. Ka litsela tse ngata tse fapaneng—thapelo, tšebeletso, liboka, likhatiso, lelapa, le metsoalle—Jehova o mphile matla a hore ke lule ke ntse ke leka.”

Talima ho kula hoo e le teko ea tumelo ea hao. Moapostola Pauluse oa re tiisetsa: “Le ka tšepa Molimo. O ke ke oa le tlohella ho lekoa ho feta kamoo le ka mamellang. Empa ha le lekoa, O tla boela o le etsetse tsela ea ho tsoa e le hore le ka ho mamella.” (1 Ba-Korinthe 10:13, Beck) E, Molimo o tla u fa “matla a fetang a tloaelehileng” a ho jara mojaro leha e le ofe oa maikutlo.—2 Ba-Korinthe 4:7, NW.

Lefatše le Lecha le Hlokang ho Tepella Maikutlo!

Molimo o tšepisitse hore haufinyane, ka ’Muso oa oona oa leholimo, o tla tlosa maemo ’ohle a tepelletsang maikutlo lefatšeng la rōna. Lentsoe la Oona lea phatlalatsa: “Ke ea bōpa maholimo a macha le lefatše le lecha; tse fetileng ha li sa tla hlola li hopoloa, li ke ke tsa khutlela mehopolong. Empa le tla ba le thabo le nyakallo e sa feleng ka seo ke eang ho se bōpa.” (Esaia 65:17, 18) Qalehong mantsoe ana a ile a phetha-hatsoa morao koana ka 537 B.C.E., nakong ea ha sechaba sa boholo-holo sa Iseraele se khutlisetsoa naheng ea habo sona. Ka nako eo batho ba oona ba ile ba bina: “Ho rōna ho bile joale ka toro. Eaba molomo oa rōna o tšèla litlatse tsa thabo, le leleme la rōna lipina tsa nyakallo.” (Pesaleme ea 126:1, 2) Phethahatso ea ho qetela ea boprofeta bona bo thabisang ba lefatše le lecha la Molimo e tlang ho finyelloa haufinyane e tla ba e hlollang hakaakang!—2 Petrose 3:13; Tšenolo 21:1-4.

Tlas’a ’Muso oa Molimo (“maholimo a macha”), mokhatlo o lokileng oa batho o holim’a lefatše (“lefatše le lecha”) o tla khutlisetsoa bophelong bo phethahetseng ba maikutlo, ba ’mele, le ba moea. Hase hore batho bana ba ke ke ba hopola nako e fetileng, empa ha ba talima maemo a thabisang ao ba tla lokela ho nahana ka ’ona le ho a thabela ka nako eo, ho ke ke ha ba le lebaka la hore ba hopole kapa ba shebane le liphihlelo tsohle tse bohloko tsa nako e fetileng. Nahana, hoseng ho hong le ho hong u tsoha ka monahano o hlakileng joaloka krystale, u chesehela ho tsoela pele ka mosebetsi oa letsatsi—u se u sa hatelloa ke boemo bo tepelletsang maikutlo!

A kholisehile ka botlalo ka bonnete ba tšepo ena, Lola (ea boletsoeng qalong), o itse: “Ho hopola hore ’Muso oa Jehova o tla lokisa bothata bona e bile thuso e khōlō ka ho fetisisa ho ’na. Ke ile ka tseba hore ho tepella maikutlo ho ke ke ha e-ba teng ka ho sa feleng.” E, u ka kholiseha hore haufinyane Molimo o tla etsa hore tlhōlo e felletseng e be teng holim’a ho tepella maikutlo!

[Mongolo o botlaaseng ba leqephe]