Etsisa Jehova—Sebelisa Toka le ho Loka
“Ke ’na Jehova, Ea sebelisang mosa o lerato, toka le ho loka lefatšeng; etsoe ke khahlisoa ke lintho tsena.”—JEREMIA 9:24, NW.
1. Ke tebello efe e babatsehang eo Jehova a e tšepisitseng?
JEHOVA o tšepisitse hore ho tla tla letsatsi leo ka lona e mong le e mong a tlang ho mo tseba. Ka moprofeta oa hae Esaia, o ile a re: “Ha ho sa tla etsoa hampe, ha ho sa tla hlola ho senngoa thabeng eohle e halalelang ea ka, hobane lefatše le tla tlala tsebo ea Jehova, joalo ka ha metsi a aparetse leoatle.” (Esaia 11:9) Eo ke tebello e babatsehang hakaakang!
2. Ho tseba Jehova ho akarelletsa eng? Hobane’ng?
2 Leha ho le joalo, ho bolela eng ho tseba Jehova? Jehova o ile a senolela Jeremia seo e hlileng e leng sa bohlokoa ka ho fetisisa: “Ho ba le temohisiso le ho ntseba, hore ke ’na Jehova, Ea sebelisang mosa o lerato, toka le ho loka lefatšeng; etsoe ke khahlisoa ke lintho tsena.” (Jeremia 9:24, NW) Kahoo, ho tseba Jehova ho akarelletsa ho tseba tsela eo a sebelisang toka le ho loka ka eona. Haeba joale re sebelisa litšobotsi tseo, o tla khahlisoa ke rōna. Re ka etsa seo joang? Ka Lentsoeng la hae, Bibele, Jehova o bolokile tlaleho ea litšebelisano tsa hae le batho ba sa phethahalang ho theosa le lilemo. Ka ho ithuta lona, re tla tseba tsela ea Jehova ea toka le ea ho loka ’me kahoo re mo etsise.—Baroma 15:4.
O Lokile Empa o na le Kutloelo-bohloko
3, 4. Ke hobane’ng ha ho ne ho loketse hore Jehova a timetse Sodoma le Gomora?
3 Kahlolo ea bomolimo holim’a Sodoma le Gomora ke mohlala o loketseng o bontšang litšobotsi tse ngata tsa toka ea Jehova. Hase feela hore Jehova o ile a liha kahlolo e neng e hlokahala empa o ile a boela a boloka ba neng ba lokeloa ke poloko. Na ho timetsoa ha metse eo ho ne ho hlile ho loketse? Abrahama, eo kamoo ho bonahalang kateng a neng a sa tsebe hakaalo ka boholo ba bokhopo ba Sodoma, ha aa ka a nahana joalo qalong. Jehova o ile a tiisetsa Abrahama hore haeba ho ne ho ka fumanoa batho ba leshome feela ba lokileng, o ne a tla tlohela motse oo. Ho hlakile hore ha ho mohla toka ea Jehova e ahlolang ka lepotlapotla kapa ka ho hloka mohau.—Genese 18:20-32.
4 Ho eteloa ha oona ke mangeloi a mabeli ho fana ka bopaki bo hlakileng ba ho hlepha ha boitšoaro ba Sodoma. Ha banna ba motse, “bana le ba holileng,” ba hlokomela hore banna ba babeli ba etetse ha Lota, ba ile ba hlasela ntlo ea hae ka sepheo sa ho etsa bosodoma e le sekhakhatha. Ka sebele boitšoaro ba bona bo ne bo hlile bo hlephile haholo! Ntle ho pelaelo, kahlolo ea Jehova holim’a motse oo e ne e le e lokileng.—Genese 19:1-5, 24, 25.
5. Molimo o ile a lopolla Lota le lelapa la hae joang Sodoma?
5 Ka mor’a ho qotsa timetso ea Sodoma le Gomora e le mohlala oa temoso, moapostola Petrose o ile a ngola: “Jehova o tseba ho lopolla batho ba boinehelo ba bomolimo tekong.” (2 Petrose 2:6-9) Toka e ne e tla be e sa phethoa haeba Lota ea lokileng le lelapa la hae ba ne ba timelitsoe hammoho le batho ba se nang bomolimo ba Sodoma. Ke ka lebaka leo mangeloi a Jehova a ileng a lemosa Lota ka timetso e atamelang. Ha Lota a ntse a likalika, mangeloi “ka baka la mohau oa Jehova” a ile a ba tšoara ka matsoho eena, mosali oa hae le barali ba hae ’me a ba ntšetsa ka ntle ho motse. (Genese 19:12-16) Re ka kholiseha hore Jehova o tla bontša kameho e tšoanang ka ba lokileng timetsong e tlang ea tsamaiso ena e khopo.
6. Ke hobane’ng ha re sa lokela ho tšoenyeha ka ho sa hlokahaleng ka timetso e tlang ea tsamaiso e khopo ea lintho?
6 Le hoja bofelo ba tsamaiso ena e tla ba nako ea “ho phethahatsa toka,” ha ho lebaka la hore re amehe ka ho sa hlokahaleng. (Luka 21:22) Kahlolo eo Molimo a tlang ho e liha ka Armagedone e tla ipaka e “lokile ka ho feletseng.” (Pesaleme ea 19:9) Joalokaha Abrahama a ile a ithuta, le rōna batho re ka tšepa toka ea Jehova ka ho feletseng, e phahametseng ea rōna hōle. Abrahama o ile a botsa: “Hleka Moahloli oa lefatše a ke ke a etsa ka ho loka na?” (Genese 18:25; bapisa le Jobo 34:10.) Kapa joalokaha Esaia a e beha ka ho loketseng, “ke mang ea rutang [Jehova] tsela ea toka?”—Esaia 40:14, NW.
Ketso e Lokileng ea ho Pholosa Moloko oa Batho
7. Toka ea Molimo e amana joang le mohau oa hae?
7 Toka ea Molimo ha e bonahale ka tsela eo feela a otlang bafosi ka eona. Jehova o itlhalosa e le “Molimo o lokileng, o bolokang.” (Esaia 45:21) Ka ho hlakileng, ho na le kamano e haufi-ufi pakeng tsa ho loka ha Molimo, kapa toka ea Molimo le takatso ea hae ea ho pholosa moloko oa batho liphellong tsa sebe. Ha e hlalosa temana ena, Khatiso ea 1982 ea The International Standard Bible Encyclopedia, e bontša hore “toka ea Molimo e batla litsela tse sebetsang tsa ho bontša mohau oa Hae le ho fana ka poloko ea Hae.” Hase hore toka ea Molimo e lokela ho ferekanngoa le mohau empa, ho fapana le hoo, mohau ke pontšo ea toka ea Molimo. Tokisetso ea Molimo ea ho fana ka thekollo bakeng sa poloko ea moloko oa batho ke mohlala o totobetseng ka ho fetisisa oa tšobotsi ena ea toka ea bomolimo.
8, 9. (a) Ke eng se neng se akarelletsoa ka tlhaloso e reng, “ketso e le ’ngoe ea toka”? Hobane’ng? (b) Ke eng seo Jehova a se kōpang ho rōna?
8 Theko ea thekollo ka boeona—bophelo ba bohlokoa ba Mora ea tsoetsoeng a ’notši oa Molimo, Jesu Kreste—e ne e le e phahameng kaha litekanyetso tsa Jehova ke tse akaretsang, ’me le eena o tlangoa ke tsona. (Matheu 20:28) Bophelo bo phethahetseng, ba Adama, bo ne bo lahlehile, kahoo ho ile ha hlokahala bophelo bo phethahetseng ho rekolla bophelo bakeng sa bana ba Adama. (Baroma 5:19-21) Moapostola Pauluse o hlalosa tsela ea Jesu ea botšepehi, ho akarelletsa ea ho lefa thekollo, e le “ketso e le ’ngoe ea toka.” (Baroma 5:18, NW, mongolo o botlaaseng ba leqephe) Hobane’ng ho le joalo? Hobane ho ea ka pono ea Jehova, ho rekolloa ha moloko oa batho e ne e le ntho e nepahetseng le e nang le toka ho e etsa, le hoja e ile ea tlameha ho etsoa ka tahlehelo e khōlō ho eena. Bana ba Adama ba ile ba tšoana le “lehlaka le tletleraneng,” leo Molimo a neng a sa rate ho le silakanya, kapa ba tšoana le “khoele ea lebone ea folakse e kunkelang,” eo a neng a sa batle ho e tima. (Matheu 12:20) Molimo o ne a kholisehile hore banna le basali ba bangata ba tšepahalang ba ne ba tla hlaha baneng bana ba Adama.—Bapisa le Matheu 25:34.
9 Re lokela ho arabela joang ketsong ee e phahameng ka ho fetisisa ea lerato le toka? E ’ngoe ea lintho tseo Jehova a li kōpang ho rōna ke hore re “sebelise toka.” (Mikea 6:8, NW) Re ka etsa see joang?
Batla Toka, U Phehelle ho Loka
10. (a) Ke ka tsela efe e ’ngoe re ka sebelisang toka? (b) Re ka batla ho loka ha Molimo pele joang?
10 Pele ho tsohle, re tlameha ho phela tumellanong le litekanyetso tsa Molimo tsa boitšoaro. Kaha litekanyetso tsa Molimo tsa boitšoaro li na le toka ’me li lokile, re sebelisa toka ha re phela tumellanong le tsona. Ke sona seo Jehova a se lebeletseng ho batho ba hae. Jehova o ile a bolella Baiseraele: “Ithuteng ho etsa se molemo; batlang toka.” (Esaia 1:17, NW) Jesu o ile a fana ka keletso e tšoanang ho bamameli ba hae Thutong ea Thabeng, ha a ne a ba laela ho ‘tsoela pele ba batla ’muso pele le ho loka ha Molimo.’ (Matheu 6:33) Pauluse o ile a khothalletsa Timothea ho ‘phehella ho loka.’ (1 Timothea 6:11) Ha re phela tumellanong le litekanyetso tsa Molimo tsa boitšoaro ’me re apara botho bo bocha, re phehella toka le ho loka ha ’nete. (Baefese 4:23, 24) Ka mantsoe a mang, re batla toka ka ho etsa lintho ka tsela ea Molimo.
11. Ke hobane’ng ha re lokela ho loantša ho busoa ke sebe, hona re lokela ho se loantša joang?
11 Joalokaha re hlokometse, hase kamehla ho leng bonolo ho batho ba sa phethahalang ho etsa se nang le toka le se lokileng. (Baroma 7:14-20) Pauluse o ile a khothalletsa Bakreste ba Baroma ho loantša ho busoa ke sebe, e le hore ba ka hlahisa ’mele ea bona eo ba e nehetseng ho Molimo e le “lihlomo tsa ho loka,” tse tla ba molemo ho Molimo ha a phethahatsa morero oa hae. (Baroma 6:12-14) Ka ho tšoanang, ka ho ithuta kamehla le ka ho sebelisa Lentsoe la Molimo, re ka fumana “taeo le kelello e laoloang ke Jehova” ’me ra ‘lauoa ka ho loka.’—Baefese 6:4; 2 Timothea 3:16, 17.
12. Ke eng eo re lokelang ho e qoba haeba re tla tšoara ba bang ka tsela eo re batlang hore Jehova a re tšoare ka eona?
12 Ea bobeli, re sebelisa toka ha re tšoara ba bang ka tsela eo re batlang hore Jehova a re tšoare ka eona. Ho bonolo ho ba le litekanyetso tse habeli—ho batla lintho li re tsamaele habonolo empa re le ba thata ho ba bang. Re lula re emela liphoso tsa rōna, empa re potlakela ho nyatsa mefokolo ea ba bang, eo e ka ’nang eaba ea fokola ha e bapisoa le ea rōna. Ka ho toba Jesu oa botsa: “Joale, ke hobane’ng ha u sheba lehlokoa le ka leihlong la mor’eno, empa u sa nahane ka kapa e ka leihlong la hao?” (Matheu 7:1-3) Le ka mohla ha rea lokela ho lebala hore ha ho le ea mong oa rōna ea neng a tla pholoha haeba Jehova a ne a ka phenya-phenya liphoso tsa rōna. (Pesaleme ea 130:3, 4) Haeba toka ea Jehova e mo lumella hore a hlokomolohe mefokolo ea barab’abo rōna, rōna re bo-mang hore re ba ahlole?—Baroma 14:4, 10.
13. Ke hobane’ng ha motho ea lokileng a ikutloa a tlameha ho bolela litaba tse molemo tsa ’Muso?
13 Ea boraro, re bontša toka ea bomolimo ha re kopanela ka mafolofolo mosebetsing oa boboleli. Jehova oa re eletsa: “Ea nang le tokelo, u se ke ua lesa ho mo etsa ka molemo, ha ho le matleng a hao.” (Liproverbia 3:27) E ne e ke ke ea e-ba ho nepahetseng hore re ipolokele tsebo e fanang ka bophelo eo Molimo a re fileng eona ka seatla se bulehileng hakana. Ke ’nete hore batho ba bangata ba ka ’na ba hana molaetsa oa rōna, empa hafeela Molimo a ntse a tsoela pele ho ba bontša mohau, re lokela ho ikemisetsa ho tsoela pele re ba fa monyetla oa hore “ba fihle pakong.” (2 Petrose 3:9) ’Me ho tšoana le Jesu, re ikutloa re thabile ha re khona ho thusa ba bang ho khutlela tokeng le ho lokeng. (Luka 15:7) Hona joale ke nako e loketseng ea hore re ‘jale ho loka.’—Hosea 10:12.
“Likhosana Bakeng sa Toka ka Boeona”
14. Baholo ba phetha karolo efe mabapi le toka?
14 Kaofela ha rōna re tlameha ho tsamaea tseleng ea ho loka, empa baholo ka phuthehong ea Bokreste ba na le boikarabelo bo ikhethang tabeng ena. Puso ea borena ba Jesu e ‘tšehelitsoe ka toka le ka ho loka.’ Ka ho loketseng, toka ea bomolimo ke tekanyetso ho baholo. (Esaia 9:7) Ba hopola se hlalositsoeng ka boprofeta ho Esaia 32:1 (NW): “Bonang! Morena o tla busa ka ho loka; ha e le likhosana, li tla busa e le likhosana bakeng sa toka ka boeona.” Joaloka balebeli ba khethiloeng ke moea, kapa ‘balebeli ba Molimo,’ baholo ba lokela ho etsa lintho ka tsela ea Molimo.—Tite 1:7.
15, 16. (a) Baholo ba etsisa molisa ea molemo oa papisong ea Jesu joang? (b) Baholo ba ikutloa joang ka ba lahlehileng moeeng?
15 Jesu o ile a bontša hore toka ea Jehova e na le kutloelo-bohloko, mohau, hape ke e nahanelang. Ka holim’a tsohle, o ile a leka ho thusa ba nang le mathata le “ho batla le ho pholosa se neng se lahlehile.” (Luka 19:10) Ho tšoana le molisa ea papisong ea Jesu ea neng a batla nku e lahlehileng a sa khathale ho fihlela a e fumana, baholo ba batla ba lahlehileng moeeng ’me ba leka ho ba tataisetsa ho khutlela lesakeng.—Matheu 18:12, 13.
16 Ho fapana le ho nyatsa bao mohlomong ba entseng libe tse tebileng, baholo ba batla ho ba folisa le ho ba lebisa pakong haeba seo se khoneha. Baa thaba ha ba khona ho thusa e mong ea neng a kheloha. Leha ho le joalo, ba utloa bohloko ha mofosi a sa bontše pako. Joale litekanyetso tse lokileng tsa Molimo li hloka hore ba khaole motho ea joalo ea sa bontšeng pako. Leha ho le joalo, ho tšoana le ntate oa mora ea lehlasoa, ba tšepa hore ka letsatsi le leng mofosi o tla “hlaphoheloa kelellong.” (Luka 15:17, 18) Ke kahoo baholo ba etsang boiteko ba ho etela batho ba itseng ba khaotsoeng ho ba hopotsa tsela eo ba ka khutlisetsoang ka mokhatlong o hlophisitsoeng oa Jehova ka eona.a
17. Baholo ba na le sepheo sefe ha ba il’o sebetsa taba ea phoso e entsoeng, ’me ke tšobotsi efe e tla ba thusa ho finyella pakane eo?
17 Ka ho khetheha baholo ba lokela ho etsisa toka ea Jehova ha ba sebetsana le litaba tsa liphoso tse entsoeng. Baetsalibe ba ile ba “’na ba atamela” ho Jesu hobane ba ne ba e-na le boikutlo ba hore o tla ba utloisisa ’me a ba thuse. (Luka 15:1; Matheu 9:12, 13) Ke ’nete hore Jesu o ne a sa khothalletse ho etsa liphoso. Ka lekhetlo le le leng Jesu a le lijong le Zakiase, mohanyapetsi eo ea tummeng hampe o ile a susumelletseha ho baka le ho lokisa tšenyo eohle eo a neng a e baketse batho ba bang. (Luka 19:8-10) Baholo kajeno ba na le sepheo se tšoanang ha ba le linyeoeng tsa boahloli—ho lebisa mofosi pakong. Haeba ba atameleha joalokaha Jesu a ne a atameleha, bafosi ba bangata ba tla fumana ho le bonolo ho batla thuso ea bona.
18. Ke eng e tla nolofalletsa baholo ho tšoana le “tšireletso ha moea o foka”?
18 Pelo e nang le boikutlo e tla thusa baholo ho sebelisa toka ea bomolimo, e sa hatelleng leha e le hona ho hloka boikutlo. Ho thahasellisang ke hore Esdrase ha aa ka a lokisa kelello ea hae feela empa le pelo ea hae, hore a tle a rute Baiseraele toka. (Esdrase 7:10) Pelo e nang le kutloisiso e tla nolofalletsa baholo ho sebelisa melao-motheo e loketseng ea Mangolo le ho nahanela maemo a motho ka mong. Ha Jesu a ne a folisa mosali ea neng a e-na le phallo ea mali, o ile a bontša hore toka ea Jehova e bolela ho utloisisa se hlileng se boleloang ke molao hammoho le likarolo tsa oona. (Luka 8:43-48) Baholo ba sebelisang toka e nang le kutloelo-bohloko ba ka ’na ba tšoantšoa le “tšireletso ha moea o foka” ho ba tsukutliloeng ke mefokolo ea bona kapa ke tsamaiso ena e khopo ea lintho eo re phelang ho eona.—Esaia 32:2.
19. Morali’abo rōna e mong o ile a arabela joang ha ho sebelisoa toka ea bomolimo?
19 Morali’abo rōna e mong ea ileng a etsa sebe se tebileng o ile a ananela toka ea bomolimo ka ho toba. Oa lumela: “Ho bua ’nete, ke ne ke tšaba ho ea ho baholo. Empa ba ile ba mpontša kutloelo-bohloko le tlhompho. Baholo ba ile ba tšoana le bo-ntate ho e-na le ho ba baahloli ba thata. Ba ile ba nthusa ho hlokomela hore Jehova o ne a ke ke a ntahla haeba ke ne ke ikemiselitse ho lokisa litsela tsa ka. Ke ile ka ithuta hore o re laea joaloka Ntate ea lerato. Ke ile ka khona ho tšollela pelo ea ka ho Jehova, ke kholisehile hore o ne a tla utloa thapeli ea ka. Ha ke hetla morao, ka sebele nka bolela hore ho kopana hoo ha ka le baholo lilemong tse supileng tse fetileng e bile tlhohonolofatso e tsoang ho Jehova. Ho tloha nakong eo, kamano ea ka le eena e bile e matla haholoanyane.”
Boloka Toka ’me U Etse se Lokileng
20. Ke melemo efe e fumanoang ka ho utloisisa le ho sebelisa toka le ho loka?
20 Rea leboha hore ebe toka ea bomolimo e bolela ho fetang feela ho fa motho e mong le e mong se mo lokelang. Toka ea Jehova e mo susumelletsa ho fana ka bophelo bo sa feleng ho ba sebelisang tumelo. (Pesaleme ea 103:10; Baroma 5:15, 18) Molimo o sebelisana le rōna ka tsela ena hobane toka ea hae e nahanela maemo a rōna, ’me e batla ho re pholosa ho e-na le ho re ahlola. Ka sebele, ho ba le kutloisiso e molemonyana ea botebo ba toka ea Jehova ho re atametsa haufi-ufi le eena. ’Me ha re ntse re leka ka matla ho etsisa tšobotsi ena ea botho ba hae, bophelo ba rōna le ba ba bang bo tla hlohonolofatsoa ka ho enneng. Ho phehella ha rōna toka ho tla hlokomeloa ke Ntate oa rōna oa leholimo. Jehova oa re tšepisa: “Bolokang molao, le etse ho lokileng, hobane poloko ea ka e s’e ea hlaha, le ho loka ha ka ho se ho tla bonahala. Ho lehlohonolo motho ea etsang hoo.”—Esaia 56:1, 2.
[Mongolo o botlaaseng ba leqephe]
Na U sa Hopola?
◻ Ho timetsoa ha Sodoma le Gomora ho re ruta eng ka toka ea Jehova?
◻ Ke hobane’ng ha thekollo e le ponahatso e totobetseng ea toka le lerato la Molimo?
◻ Ke ka litsela life tse tharo re ka sebelisang toka?
◻ Ke ka tsela efe e ikhethang baholo ba ka etsisang toka ea bomolimo?
[Setšoantšo se leqepheng la 15]
Ka mosebetsi oa rōna oa boboleli, re bonahatsa toka ea bomolimo
[Setšoantšo se leqepheng la 16]
Ha baholo ba bonahatsa toka ea bomolimo, ba nang le mathata ba fumana ho le bonolo bo batla thuso ea bona