Ho Sebeletsa Jehova ka Thabo

“Sebeletsang Jehova ka thabo. Itlhahiseng pel’a hae ka mohoo oa thabo.”—PESALEME EA 100:2, “NW.”

1, 2. (a) Moea oa bomorabe o ile oa hlahella joang Berlin, Jeremane, empa boiteko bo matla ba ho hlahisa “’Muso oa Lilemo tse Sekete” bo ile ba qetella joang? (b) Ka July 1990 ho ile ha hlokomeloa boemo bofe bo fapaneng le bo ileng ba e-ba teng ka 1936 Lebaleng la Lipapali la Olympia, ’me thabo ea sehlopha se seholo sa machaba se neng se phuthehile moo e thehiloe holim’a eng?

SEBAKA ke Lebala la Lipapali la Olympia, Berlin. Lilemong tse mashome a mahlano a metso e mene pejana, lebala lena le letle la lipapali le ile la fetoha setsi sa khohlano ha ’mampoli oa Nazi Adolf Hitler a hlekefetsa semathi sa lebelo la sekhahla sa Leamerika seo e neng e le motho e motšo se neng se hapile likhau tse ’nè tsa gauda, ho ea kamoo tlaleho e bolelang ka teng. Ka sebele, hoo e ile ea e-ba tlhaselo polelong ea Hitler e neng e susumetsoa ke moea oa bomorabe ea hore “Batho ba Basoeu bao e seng Bajode ba phahametse merabe e meng kaofela”!a Empa joale, ka la 26 July, 1990, batho ba batšo, ba basoeu, ba basehla—letšoele le kopaneng le tsoang lichabeng tse 64, la ba 44 532 kaofela—le phuthehetse mona bakeng sa Kopano ea Setereke ea Lipaki tsa Jehova ea “Puo e Hloekileng.” Ho khaphatseha thabo e khōlō hakaakang motšehareng oo oa mantsiboea a Labone! Ka morao ho puo ea kolobetso, batho ba 1 018 ba eang kolobetsong ba ntša mohoo o reng “Ja!” ’me ba boetse baa pheta, “Ja!” ho tiisa hore ba inehetse ho Jehova Molimo, ho etsa thato ea hae.

² Lipaki tsena tse ncha li nka metsotso e 19 ho tsoa ka lebaleng la lipapali li tsamaea ka mokoloko ho ea letamong la kolobetso. ’Me nakong ea metsotso eo kaofela, ho ntse ho luma litlatse ho pholletsa le lebala leo le leholo la lipapali. Ha ho mohla batho ba hlōtseng Lipapaling tsa Olimpiki ba kileng ba utloa litlatse tse tšoanang le tsena tseo joale li amohelang batho bana ba makholo-kholo, ba tsoang lichabeng tse ngata, ba bontšang tumelo e hlōlang lefatše. (1 Johanne 5:3, 4) Thabo ea bona e thehiloe ka tieo kholisehong ea hore ka sebele puso ea ’Muso oa Molimo ka Kreste e haufi le ho tlisetsa batho lilemo tse sekete tsa mahlohonolo a khanyang.—Ba-Heberu 6:17, 18; Tšenolo 20:6; 21:4, 5.

 3. Kholiseho ea batho ba tlileng kopanong e hatisa ’nete efe, hona joang?

³ Ha ho lehloeo la merabe kapa la bochaba mona, hobane bohle ba bua puo e hloekileng ea Lentsoe la Molimo, e leng ho hatisang ’nete ea mantsoe a Petrose: “Ke lemoha ka ’nete hore Molimo ha o ee ka tšobotsi ea batho. Empa har’a lichaba tsohle, ea o tšabang, le ea etsang ho lokileng, ke eena ea o khahlisang.”—Liketso 10:34, 35; Sofonia 3:9, NW.

 4. Boholo ba batho ba neng ba tlile kopanong eo ba ile ba fetoha balumeli tlas’a maemo afe, ’me lithapelo tsa bona li arabetsoe joang?

⁴ Boholo ba batho bana ba tlileng kopanong ea Berlin ke ba fetohileng balumeli nakong ea lilemo tse telele tsa khatello, tse akarelletsang mehla ea Nazi (1933-45) le mehla ea puso eo ho eona moruo oohle o neng o laoloa ke ’muso e ileng ea e-ba teng ka mor’a moo Jeremane Bochabela, moo ho sa tsoa tlosoa thibelo ea Lipaki tsa Jehova ka molao ka la 14 March, 1990. Kahoo, ba bangata ba bona ba ile ba “amohela lentsoe, har’a matšoenyeho a maholo, ka thabo ea Moea o Halalelang.” (1 Ba-Thessalonika 1:6) Hona joale ba na le tokoloho e kholoanyane ea ho sebeletsa Jehova, ’me thabo ea bona ke e khōlō ka ho fetisisa.—Bapisa le Esaia 51:11.

Liketsahalo Tsa Thabo

 5. Iseraele e ile ea keteka topollo eo Jehova a ileng a e fa eona Leoatleng le Lefubelu joang?

⁵ Ho lokolloa ha baena ba rōna Europe Bochabela, esita le likarolong tse ling tsa Afrika le Asia hona joale, ho re hopotsa topollo eo Jehova a ileng a fana ka eona linakong tse fetileng. Re hopola ketso e matla ea Jehova Leoatleng le Lefubelu, le kamoo pina ea Iseraele ea teboho e ileng ea fihla sehlohlolong ka mantsoe ana: “Jehova, ke mang ea tšoanang le uena har’a melimo? Ke mang ea tšoanang le uena, u ipakang u le matla khalalelong? Ea lokelang ho tšabjoa ka lipina tsa thoriso, Ea etsang meeka.” (Exoda 15:11, NW) Kajeno, na ha re tsoele pele ho thabela lintho tse tsotehang tseo Jehova a ntseng a li etsetsa batho ba hae? Ka sebele rea li thabela!

 6. Re ka ithuta eng ho hooeng ha Iseraele ka thabo ka 537 B.C.E.?

⁶ Ka 537 B.C.E. thabo e ile ea e-ba e khaphatsehang ha Iseraele e khutlisetsoa naheng ea habo eona ka mor’a hore e be khōlehong Babylona. Joalokaha Esaia a ne a profetile, joale sechaba sa Jehova se ne se ka phatlalatsa: “Bonang, Molimo ke poloko ea ka, ke na le tšepo, nke ke ka tšaba letho; hobane Jehova, Jehova ke matla a ka le sefela sa ka; o ikentse ’Moloki oa ka.” Eo e ile ea e-ba nyakallo e khōlō hakaakang! ’Me sechaba seo se ne se tla bontša thabo eo joang? Esaia o tsoela pele: “Ka letsatsi leo le tla re: Rorisang Jehova, rapelang lebitso la hae, le tsebise lichaba liketso tsa hae; tumisang, le re: Lebitso la hae ke le phahamileng. Binelang Jehova, hobane o entse taba tse kholo.” Joale ba ne ba ka ‘hooa ka nyakallo’ ha ba ‘tsebahatsa liketso tsa hae tse matla lefatšeng lohle,’ feela joalokaha bahlanka ba Jehova ba lokollotsoeng ba hooa ka nyakallo kajeno.—Esaia 12:1-6.

Thabo Mosebetsing oa Jehova

 7. Ke topollo efe e ileng ea tlisa thabo ka 1919?

⁷ Mehleng ea kajeno bahlanka ba Jehova ba ile ba qala ho hooa ka thabo ha a ba lopolla ka mokhoa o tsotehang ka 1919. Ka la 26 March selemong seo, litho tsa Sehlopha se Busang li ile tsa lokolloa teronkong United States moo li neng li koalletsoe teng ka likhoeli tse robong ka liqoso tsa bohata tsa hore li khothalletsa ho fetohela ’muso. Ho ile ha e-ba le mokete o moholo hakaakang oa ho ba amohela hape Bethele ea Brooklyn! Ho feta moo, joale bohle ba masala a tlotsitsoeng ba ne ba ka thabela ho lokolloa ka tsela ea moea ho Babylona e Moholo, tsamaiso ea bolumeli eo Satane a kentseng lefatše lohle tlas’a eona.—Tšenolo 17:3-6; 18:2-5.

 8. Ho ile ha tsebahatsoa ka tokoloho efe e neng e sa lebelloa Kopanong ea Cedar Point ka 1919, ’me ho ile ha etsoa mohoo ofe oa ho nka khato?

⁸ Liphetoho tse ikhethang historing tse ileng tsa e-ba teng ka 1919 li ile tsa fihla sehlohlolong ka kopano ea batho ba Molimo e ileng ea tšoareloa Cedar Point, Ohio, U.S.A., ka la 1 ho ea ho la 8 September. Letsatsing la bohlano la kopano eo ea “Letsatsi la Basebetsi-’moho,” mopresidente oa Mokhatlo oa Watch Tower, J. F. Rutherford, o ile a fa batho ba 6 000 puo e susumetsang e neng e e-na le sehlooho se reng “Ho Tsebahatsa ’Muso.” Ka mor’a hore a hlalose Tšenolo 15:2 le Esaia 52:7, o ile a bolella bamameli ba hae hore makasine o mocha, The Golden Age (oo hona joale o seng o tsebjoa e le Tsoha!), o ne o tla hatisoa libeke tse ling le tse ling tse peli, haholo-holo bakeng sa ho abjoa tšimong. Qetellong o ile a re: “Ha monyetla o hlaha, ba inehetseng ka ho felletseng ho Morena; ba sa tšabeng letho, ba lipelo li hloekileng, ba ratang Molimo le Morena Jesu ka likelello tsohle tsa bona, ka matla ’ohle a bona, ka liphefumolohi tsohle tsa bona le ka boleng bohle ba bona, ba tla thabela ho kopanela mosebetsing ona. Kōpang Morena hore a le fe tataiso le tsamaiso ea hae e le hore a le etse lenģosa la ’nete, le tšepahalang, le sebetsang ka katleho. Joale, le ntse le bina pina ea thabo ka lipelong tsa lōna, hatelang pele le mo sebeletse.”

9, 10. Jehova o atlehisitse ho hatisoa ha limakasine tsa Molula-Qhooa le Tsoha! joang?

⁹ ‘Pina eo ea thabo’ e se e utloahetse lefatšeng lohle! Ntle le pelaelo, ba bangata ba babali ba rōna ba ile ba kopanela ho phahamiseng kabo ea makasine oa Tsoha! hore e fihle lenaneng la likopi tse 12 980 000 tsa tokollo ka ’ngoe ka lipuo tse 64 hona joale. E le kofuto e matla bakeng sa ho lebisa batho ba thahasellang ’neteng, Tsoha! e sebeletsa e le ’mate oa Molula-Qhooa. Naheng e ’ngoe ea Bochabela, ha khaitseli e mong oa pula-maliboho a etsa tselana ea ka mehla ea makasine, o ile a makala ha a fumana hore nako le nako ha a isa limakasine tsa morao-rao, mong’a ntlo o fana ka chelete e lekanang le liranta tse 18 le lisente tse 20 bakeng sa mosebetsi oa Lipaki tsa Jehova lefatšeng ka bophara—ka sebele hoo ho bontša kananelo e ntle bakeng sa mosebetsi oa ’Muso!

¹⁰ Hona joale ha makasine oa Molula-Qhooa o kena selemong sa bo112 sa ho hatisoa ha oona, o se o abjoa ka likopi tse 15 290 000 ka lipuo tse 111, ’me likhatiso tse 59 har’a tsena li tsoa li e-na le litaba tse tšoanang ka nako e le ’ngoe lefatšeng ka bophara. Joaloka mohlokomeli ea tšepahalang, masala a tlotsitsoeng a tsoela pele ho fa babali ba ananelang “tekanyo ea bona ea phepelo ea lijo [tsa moea] ka nako e loketseng.” (Luka 12:42, NW) Selemong sa 1990, Lipaki tsa Jehova li ile tsa tlaleha hore li tsamaisitse lipeeletso tse ncha tse 2 968 309 tsa limakasine tsena tse peli, e leng keketseho ea 22,7 lekholong ka holimo ho selemo sa 1989.

Thabo ea Khaphatseha

11. (a) Ka 1922 ho ile ha lebisoa mohoo ofe ho batho ba Molimo Cedar Point? (b) Mohoo oa thabo o atolositsoe joang?

¹¹ Thabo e ile ea boela ea e-ba e khaphatsehang ha batho ba Molimo, bao joale ba neng ba se ba le 10 000 ka lenane, ba phuthehile ho tla kopanong ea bobeli Cedar Point, ka September 1922, moo ba 361 ba ileng ba kolobetsoa. Puong ea hae e neng e re “’Muso oa Maholimo o Atametse,” e neng e thehiloe ho Mattheu 4:17, Moena Rutherford o ile a fihla tlhorong e susumetsang: “Lefatše le tlameha ho tseba hore Jehova ke Molimo le hore Jesu Kreste ke Morena oa marena le ’Musi oa babusi. Lena ke letsatsi har’a matsatsi. Bonang, Morena oa busa! Ke lōna baemeli ba hae ba mo tsebahatsang. Ka baka leo, phatlalatsang, phatlalatsang, phatlalatsang, Morena le ’muso oa hae.” Lenane la ba ileng ba tlerola mohoo oa thabo o ileng oa phahama kopanong eo le eketsehile ho fihlela ha ka 1989 ba ka holimo ho 6 600 000 ba ne ba bōkane likopanong tse 1 210 tsa Lipaki tsa Jehova lefatšeng ka bophara, moo ba 123 688 ba ileng ba kolobetsoa.

12. (a) Kajeno batho ba Molimo ba kopanela thabong efe e ke keng ea lekanngoa? (b) Re leka-lekanya tšebeletso ea rōna ho Jehova le ho utloa “balaoli ba phahameng” joang?

¹² Lipaki tsa Jehova li ananela tokoloho ea tsona haholo. Ka holim’a tsohle, li thabela phethahatso ea mantsoe a Jesu mehleng ena: “Le tla tseba ’nete, ’me ’nete e tla le lokolla.” Ke thabo e khōlō hakaakang ho lokoloha liphiring le litumela-khoeleng tsa bolumeli ba bohata! Ho tseba Jehova le Mor’a hae le ho ba basebetsi-’moho le bona, ka tebello ea bophelo bo sa feleng ke thabo e khōlō hakaakang e ke keng ea lekanngoa! (Johanne 8:32; 17:3; 1 Ba-Korinthe 3:9-11, NW) Bahlanka ba Molimo ba boetse ba ananela ha “balaoli ba phahameng” ba lefatše lena, leo ba phelang tlas’a lona, ba hlompha tokoloho ea bona ea ho phatlalatsa tšepo e khanyang ea ’Muso oa Jehova o tlas’a Kreste. Ka boithaopo ba ‘ntšetsa Cesare tseo e leng tsa Cesare,’ ha ka nako e tšoanang ba ntšetsa “Molimo tseo e leng tsa Molimo.”—Ba-Roma 13:1-7, NW; Luka 20:25.

13. Lipaki tsa Jehova li ile tsa bontša thabo ea tsona joang ha li lokolloa khatellong?

¹³ Leha ho le joalo, haeba balaoli ba batho ba leka ho thibela tlamo ena eo Lipaki tsa Jehova li nang le eona ho Molimo, li arabela ka tsela eo baapostola ba ileng ba arabela ka eona: “E ka khona re utloe Molimo ho e-na le batho.” Ketsahalong eo, ka mor’a hore babusi ba ba lokolle, baapostola bana ba ile “ba tloha . . . ba thabile.” Ba ile ba bontša thabo eo joang? “Ha ba ka ba phetsa ka matsatsi ’ohle ho ruta le ho bolela tempeleng le ka matlung, hore Jesu ke Kreste.” (Liketso 5:27-32, 41, 42) Ka ho tšoanang, Lipaki tsa Jehova tsa mehleng ea kajeno lia thaba ha li fumana tokoloho e kholoanyane ea ho ntšetsa pele tšebeletso ea tsona. Linaheng tse ngata tseo ho tsona Jehova a butseng tsela, li bontša thabo ea tsona e matla ka ho fana ka bopaki bo phethahetseng ka lebitso la Jehova le ’Muso oa hae o tlang ka Kreste Jesu.—Bapisa le Liketso 20:20, 21, 24, NW; 23:11, NW; 28:16, 23, NW.

Ho Mamella ka Thabo

14. Thabo ee eo e leng tholoana ea moea e feta thabo e hlalosoang ke buka e hlalosang mantsoe joang?

¹⁴ Thabo ee e matla eo Bakreste ba ’nete ba e latsoang ke eng? Ke thabo e tebileng haholo le e bang teng ka nako e telele ho feta thabo ea nakoana eo motho ea hlōtseng Lipapaling tsa Olimpiki a bang le eona. Ke tholoana ea moea o halalelang oa Molimo, oo Molimo o o fang “ba o utloang joaloka ’musi.” (Liketso 5:32, NW) Buka e hlalosang mantsoe ea Webster e hlalosa thabo e le ‘e tebileng haholo ho feta nyakallo, e khanyang le e bonahalang ho feta nyakallo.’ Ho Mokreste thabo e bolela ho tebileng ho feta hoo. Kaha e thehiloe tumelong ea rōna, ke tšoaneleho e matla, e tiisang. “Thabo ea Jehova ke matla a lōna.” (Nehemia 8:10) Thabo ea Jehova, eo batho ba Molimo ba e hlaolelang, ke e fetang hōle tlhasimoloho ea motsotsoana eo batho ba e fumanang menyakeng ea nama, ea lefatše.—Ba-Galata 5:19-23.

15. (a) Phihlelong ea Bakreste ba tšepahalang, ke joang mamello e ’nileng ea tsamaea le thabo? (b) Bolela mangolo a mang a fanang ka khothatso e matlafatsang mabapi le ho ipoloka u thabile.

¹⁵ Nahana ka baena ba rōna ba Ukraine. Ha ‘bolaoli bo phahameng’ bo leleka ba likete-kete ba bona bo ba isa Siberia mathoasong a bo-1950, ba ile ba feta har’a mathata a boima. Hamorao, ha bolaoli bo ba tšoarela, ba ile ba leboha, empa hase bohle ba bona ba ileng ba khutlela naheng ea habo bona. Hobane’ng? Ho sebetsa ha bona ka thata Bochabela ho ile ha ba hopotsa Jakobo 1:2-4: “Banab’eso, le ke le lekanye hobane ke thabo feela ha le hlaheloa ke meleko e mengata; le ntse le tseba hobane ho lekoa ha tumelo ea lōna ho hlahisa mamello.” Ba ne ba batla ho tsoela pele ho mamella kotulong eo e thabisang, ’me e ile ea e-ba thabo e kaakang ho amohela Lipaki tse tsoang hōle libakeng tsa bochabela tse lebōpong la leoatle la Pacific likopanong tsa Lipaki tsa Jehova tse neng li tšoaretsoe Poland haufinyane tjee! Mamello le thabo li ile tsa sebelisana ho hlahiseng litholoana tsena. Ka sebele, kaofela ha rōna ba mamellang ka thabo tšebeletsong ea Jehova re ka re: “Empa ha e le ’na, ke tla ithabela ho Jehova, ke nyakalle ho Molimo oa poloko ea ka. Jehova Morena ke matla a ka.”—Habakuke 3:18, 19; Mattheu 5:11, 12, NW.

16. Mehlala e metle ea Jeremia le Jobo e lokela ho re khothatsa joang mosebetsing oa rōna oa tšimo?

¹⁶ Leha ho le joalo, ke joang re ka ipolokang re thabile haeba re paka har’a bahanyetsi ba lihlooho li thata? Hopola hore baprofeta ba Molimo ba ile ba ipoloka ba e-na le pono e thabisang ha ba le maemong a tšoanang le ana. Jeremia o ile a bolela tjena ha a le tlas’a teko: “Mantsoe a hao ha a mphihlela, ke itjeletse ’ona; mantsoe a hao ho ’na e bile thabo le nyakallo pelong ea ka, hobane ho rapetsoe lebitso la hao holim’a ka, Jehova, Molimo oa makhotla.” (Jeremia 15:16) Ho bitsoa ka lebitso la Jehova le ho pakela lebitso leo ke tokelo e khōlō hakaakang! Thuto ea rōna ea botho e etsoang ka mafolo-folo le ho kopanela ka botlalo libokeng tsa Bokreste li re matlafatsa hore re tsoele pele ho thaba ’neteng. Thabo ea rōna e tla bonahala boitšoarong ba rōna ha re le tšimong esita le pososelong ea rōna ea ’Muso. Esita le tlas’a teko e bohloko, Jobo o ne a ka bua tjena ka bahanyetsi ba hae: “Ke ne ke ee ke ba talime ke ntse ke bososela—ba ne ba ee ba sitoe ho kholoa hoo—’me ba ne ba ke ke ba senya ho ela ha sefahleho sa ka.” (Jobo 29:24, NW) Joaloka Jobo ea tšepahalang, ha ho hlokahale hore re hloname ha bahanyetsi ba re soma. U ’ne u bososele! Ponahalo ea rōna e ka senola thabo ea rōna ’me ea etsa hore ho be le ba re mamelang.

17. Ho mamella ka thabo ho ka beha litholoana joang?

¹⁷ Ha re ntse re pheta-pheta tšimo, mamello le thabo tsa rōna li ka khahla batho ba ratang ho loka ’me tsa ba khothalletsa ho hlahloba tšepo e khanyang eo re e tšoereng. Ho ba khannela lithuto tsa Bibele ka mehla ho tlisa thabo e khōlō hakaakang! ’Me ha ba ntse ba tebisa linnete tsa bohlokoahali tsa Lentsoe la Molimo ka lipelong tsa bona, re ikutloa re thabile hakaakang ha ba qetella ba fetohile metsoalle ea rōna tšebeletsong ea Jehova! Joalokaha moapostola Pauluse a ile a bolella balumeli ba bacha mehleng ea hae, joale re ka khona ho re: “Hobane tšepo ea rōna ke mang, kapa thabo ea rōna, kapa moqhaka oo re ithorisang ka oona ke’ng? Na hase lōna le tla ba oona pel’a Morena Jesu Kreste, ho tleng [“ho beng teng,” NW] ha hae? Efela ke lōna le leng khanya le thabo ea rōna.” (1 Ba-Thessalonika 2:19, 20) Ka sebele, thabo e khotsofatsang e ka fumanoa ka ho lebisa batho ba bacha ’neteng ea Lentsoe la Molimo le ho ba thusa ho fetoha Lipaki tse inehetseng, tse kolobelitsoeng.

Thabo e Matlafatsang

18. Ke eng e tla re thusa ho sebetsana ka katleho le liteko tse fapa-fapaneng tsa mehleng ea kajeno?

¹⁸ Bophelong ba rōna ba letsatsi le letsatsi, maemo a mangata a ka ’na a hloka mamello. Ho kula ’meleng, ho tepella maikutlo, le bothata ba moruo ke a mang a seng makae feela a ’ona. Ke joang Mokreste a ka ipolokang a thabile e le hore a tle a sebetsane ka katleho le liteko tse joalo? Sena se ka etsoa ka ho ea Lentsoeng la Molimo bakeng sa ho fumana matšeliso le tataiso. Ho bala kapa ho mamela ’malo oa lipesaleme ho ka fana ka khatholoho e khōlō nakong ea teko. Hape hlokomela keletso e bohlale ea Davida: “Jarisa Jehova phahlo tsa hao, ’me o tla u tšehetsa; a ke ke a lumela hore ea lokileng a ’ne a sisinngoe.” (Pesaleme ea 55:22) Ka sebele Jehova ke “ea utloang thapelo.”—Pesaleme ea 65:3, BPN.

19. Joaloka Davida le Pauluse, re ka ba le kholiseho efe?

¹⁹ Ka likhatiso tsa oona le ka baholo ba oona ba ka liphuthehong, mokhatlo o hlophisitsoeng oa Jehova o lutse e le malala-a-laotsoe ka mehla bakeng sa ho re thusa ho loana le mathata a rōna, kaha re batho ba fokolang. Ka mofuthu Davida oa eletsa: “U laeletse tsela ea hao ho Jehova, u mo tšepe; ho tla sebetsa eena.” Hape o ne a ka re: “Nkile ka ba mocha, ’me joale ke tsofetse; empa ha ke e-so ho bone ea lokileng a tloheloa, leha e le litloholo tsa hae li sikila bohobe.” Re kopane le phutheho ea Bokreste, re tla hlokomela hore “poloko ea ba lokileng e tsoa ho Jehova; ke eena qhobosheane ea bona letsatsing la matsoalo.” (Pesaleme ea 37:5, 25, 39) A re lateleng keletso ea Pauluse ka mehla: “Ka baka leo, ha re tepelle; . . . ha re fela re sa talime tse bonahalang, re mpa re talima tse sa bonahaleng; hobane tse bonahalang ke tsa mehla ena feela; empa tse sa bonahaleng ha li ka ke tsa e-ba le bofelo.”—2 Ba-Korinthe 4:16-18.

20. Ke eng seo re se bonang ka mahlo a tumelo, ’me see se re susumetsa joang?

²⁰ Ka mahlo a rōna a tumelo, re ka bona tsamaiso e ncha ea Jehova e seng e le haufinyane haholo! Ke thabo le mahlohonolo a ke keng a lekanngoa hakaakang a tla ba teng moo! (Pesaleme ea 37:34; 72:1, 7; 145:16) Ha re ntse re itokisetsa nako eo e khanyang, a re eleng hloko mantsoe a Pesaleme ea 100:2 (NW): “Sebeletsang Jehova ka thabo. Itlhahiseng pel’a hae ka mohoo oa thabo.”

[Mongolo o botlaaseng ba leqephe]

Bakeng sa Tlhahlobo:

◻ Ke ho hlōloa hofe ha moea oa bomorabe ho bonoang kajeno?

◻ Ke eng e ileng ea susumelletsa batho ba Molimo ba boholo-holo ho bina le ho hooa ka thabo?

◻ Thabo ea ’nete e eketsehile joang mehleng ea kajeno?

◻ Mamello le thabo li sebelisana joang?

◻ Re ka boloka thabo ea rōna ka mokhoa ofe?