Sebeletsa Jehova ka Pelo e Thabileng

“Lithohako tseo li tla ba holim’a hao . . . kahobane u tla be u sa ka ua sebeletsa Jehova, Molimo oa hao, ka thabo le ka pelo e monate [e thabileng, NW].”—DEUTERONOMA 28:45-47.

 1. Ho na le bopaki bofe ba hore ba sebeletsang Jehova ba thabile, hohle moo ba mo sebeletsang ba le teng?

BAHLANKA ba Jehova ba thabile, ho sa tsotellehe hore na ba etsa thato ea hae leholimong kapa lefatšeng. “Linaleli tsa meso” tsa mangeloi li ile tsa hooa ka thabo ha lefatše le thehoa, ’me ha ho pelaelo hore limiriade tsa mangeloi a leholimo li ‘phetha lentsoe la hae’ ka thabo. (Jobo 38:4-7; Pesaleme ea 103:20) Mora oa Jehova ea tsoetsoeng a ’notši e ne e le “motlatsi” ea thabileng leholimong ’me o ile a thaba ha a etsa thato ea Molimo e le motho Jesu Kreste lefatšeng. Ho feta moo, ‘ka baka la thabo eo a neng a e beetsoe, ha a ka ba a re letho ka lihlong, a ba a ea lula letsohong le letona la terone ea Molimo.’—Liproverbia 8:30, 31; Ba-Heberu 10:5-10; 12:2.

 2. Ke’ng se neng se rera hore na Baiseraele ba latsoa litlhohonolofatso kapa lithohako?

² Baiseraele ba ne ba thaba ha ba ne ba thabisa Molimo. Empa ho thoe’ng haeba ba ne ba sa mo mamele? Ba ile ba hlokomelisoa: “Lithohako tseo li tla ba holim’a hao, le holim’a litloholo tsa hao, ka mehla, e be lipontšo le mehlolo. Kahobane u tla be u sa ka ua sebeletsa Jehova, Molimo oa hao, ka thabo le ka pelo e monate [e thabileng, NW], ka baka la ho ateloa ke ntho tsohle, u tla sebeletsa lira tsa hao, tseo Jehova a tla li roma ho tla u loantša, u li sebeletse u lapile, u nyoriloe, u hlobotse, u hloka ntho tsohle; ’me li tla bea joko ea tšepe molaleng oa hao, li be li u felise.” (Deuteronoma 28:45-48) Litlhohonolofatso le lithohako li ile tsa etsa hore ho hlake hore na bao e leng bahlanka ba Jehova le bao eseng bona ke bo-mang. Lithohako tse joalo li ile tsa boela tsa tiisa hore ho ke ke ha bapaloa ka melao-motheo ea Molimo le merero ea hae, leha e le hona hore e ka nyelisoa. Kaha Baiseraele ba ile ba hana ho ela hloko litemoso tsa Jehova mabapi le lesupi le botlamuoa, Jerusalema e ile ea fetoha “ntho e tla rohakoa ke lichaba tsohle tsa lefatše.” (Jeremia 26:6) Kahoo ha re mameleng Molimo ’me re thabele kamohelo ea hae. Thabo ke e ’ngoe ea litlhohonolofatso tsa Molimo tse ngata tseo ba tšabang Molimo ba li latsoang.

Kamoo ho ka Sebeletsoang ka “Pelo e Thabileng”

 3. Pelo ea tšoantšetso ke eng?

³ Baiseraele ba ne ba tšoanela ho sebeletsa Jehova “ka thabo le ka pelo e thabileng.” Le bahlanka ba Molimo ba kajeno ba tlameha ho etsa joalo. Ho thaba ke “ho nyakalla; ho tlala thabo.” Le hoja ho buuoa ka pelo ea nama ka Mangolong, ha e nahane le ho beha mabaka ka tsela ea sebele. (Exoda 28:30, NW) Mosebetsi oa eona o ka sehloohong ke ho pompa mali a matlafatsang lisele tsa ’mele. Leha ho le joalo, maemong a mangata haholo, Bibele e bua ka pelo ea tšoantšetso, eo eseng feela setsi sa kameho e lerato, tšusumetso, le bohlale. Ho boleloa hore e emela “karolo eohle e khubung, e leng bokahare, ’me kahoo e emela motho oa ka hare ka boeena joalokaha a itlhahisa ka mesebetsi eohle ea hae e sa tšoaneng, litakatso tsa hae, kameho e lerato, maikutlo, litaba-tabelo, merero, likhopolo tsa hae, temoho, menahano, bohlale ba hae, tsebo, masene, litumelo tsa hae le ho beha mabaka ha hae, mohopolo oa hae le ho phela ha hae.” (Journal of the Society of Biblical Literature and Exegesis, 1882, leqepheng la 67) Pelo ea rōna ea tšoantšetso e akarelletsa maikutlo a rōna le boikutlo, ho kopanyelletsa le thabo.—Johanne 16:22.

 4. Re ka thusoa ke eng hore re sebeletse Jehova Molimo ka lipelo tse thabileng?

⁴ Re ka thusoa ke eng hore re sebeletse Jehova ka lipelo tse thabileng? Pono e nepahetseng le e nang le kananelo ea litlhohonolofatso tsa rōna le litokelo tseo Molimo a re fileng tsona ea thusa. Ka mohlala, ka thabo re ka hopola tokelo ea rōna ea ho etsetsa Molimo oa ’nete “tšebeletso e halalelang.” (Luka 1:74, NW) Ho na le tokelo e amanang le eo, e leng ea ho jara lebitso la Jehova re le Lipaki tsa hae. (Esaia 43:10-12) Ho sena re ka kenyelletsa thabo ea ho tseba hore ha re latela Lentsoe la Molimo re ea mo thabisa. ’Me ke thabo e kaakang ha re khantša leseli la moea ’me kahoo re thusa ba bangata ho tsoa lefifing!—Mattheu 5:14-16; bapisa le 1 Petrose 2:9.

 5. Mohloli oa thabo ea bomolimo ke eng?

⁵ Leha ho le joalo, ho sebeletsa Jehova ka pelo e thabileng hase feela taba ea ho nahana ka tsela e nepahetseng. Ho molemo ho ba le pono e nepahetseng. Empa thabo ea bomolimo ha e hlahisoe ka ho ntlafatsa botho. Ke tholoana ea moea oa Jehova. (Ba-Galata 5:22, 23) Haeba re se na thabo e joalo, ho ka ’na ha hlokahala hore re etse liphetoho e le hore re qobe ho nahana kapa ho itšoara ka mokhoa oo eseng oa mangolo o ka ’nang oa etsa hore re soabise moea oa Molimo. (Ba-Efese 4:30) Leha ho le joalo, re le ba inehetseng ho Jehova, ha re se keng ra ba le tšabo ea hore ho haelloa ke thabo e tlohang pelong maemong a mang ke bopaki ba hore Molimo ha a re amohele. Ha rea phethahala ’me ka linako tse ling re hlaseloa ke bohloko, masoabi, esita le ho tepella maikutlo, empa Jehova oa re utloisisa. (Pesaleme ea 103:10-14) Kahoo ha re rapelleng moea oa hae o halalelang, re hopole hore ke Molimo ea fanang ka tholoana ea oona ea thabo. Ntate oa rōna oa leholimo ea lerato o tla araba lithapelo tse joalo ’me o tla re nolofaletsa ho mo sebeletsa ka pelo e thabileng.—Luka 11:13.

Ha Thabo e le Sieo

 6. Haeba re se na thabo tšebeletsong ea rōna ho Molimo, re lokela ho etsa eng?

⁶ Haeba thabo e le sieo tšebeletsong ea rōna, ho ka ’na ha etsahala hore hamorao re khoehlise tšebeletsong ea Jehova kapa re be re ipake re sa tšepahale ho eena. Kahoo, e ne e ka ba bohlale hore ka boikokobetso le ka thapelo re nahane ka sepheo sa rōna ’me re etse liphetoho tse loketseng. Ho ba le thabo eo Molimo a fanang ka eona, re tlameha ho sebeletsa Jehova ka lerato le ka lipelo tsohle tsa rōna, meea eohle ea rōna, le likelello tsohle tsa rōna. (Mattheu 22:37) Ha rea tšoanela ho sebeletsa ka maikutlo a ho hlōlisana, hobane Pauluse o ile a ngola: “Ekare ha re phela ka Moea, a re keng re tsamaee le ka Moea. Re se keng ra batla boithoriso ba lefeela, ka ho phephetsana, le ka ho honohelana.” (Ba-Galata 5:25, 26) Re ke ke ra ba le thabo ea ’nete haeba re sebeletsa hobane re batla ho feta ba bang kapa re batla thoriso.

 7. Re ka tsosolosa thabo ea lipelo tsa rōna joang?

⁷ Re ka thaba ha re phelela boinehelo ba rōna ho Jehova. Ha re ne re sa tsoa inehela ho Molimo, re ile ra qalisa ka cheseho tseleng ea rōna ea bophelo ba Bokreste. Re ne re ithuta Mangolo ’me re kopanela libokeng kamehla. (Ba-Heberu 10:24, 25) Ho kopanela tšebeletsong ho ne ho re tlisetsa thabo. Empa, ho thoe’ng haeba thabo ea rōna e fokotsehile? Ho ithuta Bibele, ho ba teng libokeng, ho kopanela tšebeletsong—ha e le hantle, ho ameha ka ho feletseng tšobotsing e ’ngoe le e ’ngoe ea Bokreste—ho lokela ho etsa hore bophelo ba rōna bo tsitse moeeng ho be ho tsosolose lerato le thabo ea pelo tseo re neng re na le tsona pele. (Tšenolo 2:4) Joale re ke ke ra tšoana le ba bang bao ka tsela e itseng ba se nang thabo bao khafetsa ho hlokahalang hore ba fuoe thuso moeeng. Baholo ba thabela ho thusa, empa re tlameha hore ka bomong re phelele boinehelo ba rōna ho Molimo. Ha ho motho e mong ea ka re etsetsang sena. Kahoo ha re iketsetseng pakane ea ho latela kemiso e tsitsitseng ea Bokreste e le hore re ka phelela boinehelo ba rōna ho Jehova ’me re be le thabo ea ’nete.

 8. Ke hobane’ng ha letsoalo le hloekileng e le la bohlokoa haeba re batla ho thaba?

⁸ E le hore re ka ba le thabo eo e leng tholoana ea moea oa Molimo, ho hlokahala hore re be le letsoalo le hloekileng. Hafeela Morena Davida oa Iseraele a ne a leka ho pata sebe sa hae, o ne a hlomohile pelo. Ha e le hantle, o ne a se a mamarana, ’me e ka ’na eaba o ile a kula ’meleng. O ile a imoloha hakaakang ha a baka le ho ipolela! (Pesaleme ea 32:1-5) Re ke ke ra thaba haeba re pata sebe se itseng se tebileng. Sena se ka ba sa etsa hore bophelo ba rōna bo tlale matšoenyeho. Ruri, eo hase tsela ea ho latsoa thabo. Empa ho ipolela le ho baka hoa imolla ho bile ho tsosolosa moea.—Liproverbia 28:13.

Ho Leta ka Thabo

 9, 10. (a) Abrahama o ile a tšepisoa eng, empa e ka ’na eaba thabo ea hae le tumelo li ile tsa lekoa joang? (b) Re ka rua molemo joang mohlaleng oa Abrahama, Isaaka, le Jakobo?

⁹ Ke taba e ’ngoe ho ba le thabo ha re qala ho ithuta ka merero ea Molimo empa ho lula re thabile ha lilemo li ntse li feta ke e ’ngoe e fapaneng. Sena se ka tšoantšetsoa ka taba ea Abrahama ea tšepahalang. Ka mor’a hore a leke ho etsa mora oa hae Isaaka sehlabelo ka taelo ea Molimo, lengeloi le ile la fetisa molaetsa ona: “Ke hlapantse ka ’na hore, ka baka la hobane u entse taba eo, u sa ka ua nkhanela le mora oa hao, ea mong ho uena, ho hlohonolofatseng ke tla u hlohonolofatsa, ’me ho atiseng ke tla atisa moloko oa hao, o be ka ka linaleli tsa maholimo, le lehlabathe le lebopong la leoatle, ’me moloko oa hao o tla rua likhoro tsa lira tsa oona. Lichaba tsohle tsa lefatše li tla itlhohonolofatsa lelokong la hao, ka baka la hobane u mametse lentsoe la ka.” (Genese 22:15-18) Ha ho pelaelo ea hore Abrahama o ne a thabetse tšepiso ena haholo.

¹⁰ E ka ’na eaba Abrahama o ne a lebeletse hore Isaaka e ne e tla ba “peō” eo ka eona litlhohonolofatso tse tšepisitsoeng li neng li tla tla. Empa ha lilemo li ntse li feta ho se letho le hlollang le finyelloang ka Isaaka, e ka ’na eaba sena se ile sa leka tumelo le thabo ea Abrahama le lelapa la hae. Ho tiisa ha Molimo tšepiso ho Isaaka ’me hamorao ho mora oa hae Jakobo ho ile ha ba kholisa hore e ne e le hona Peō e tla tla nakong e tlang, ’me sena se ile sa ba thusa hore ba boloke tumelo ea bona le thabo ea bona. Leha ho le joalo, Abrahama, Isaaka, le Jakobo ba ile ba e-shoa ba e-s’o bone ho phethahala ha litšepiso tsa Molimo ho bona, empa e ne e se bahlanka ba Jehova ba sa thabang. (Ba-Heberu 11:13) Le rōna re ka tsoela pele ho sebeletsa Jehova ka tumelo le thabo ha re ntse re emetse ho phethahatsoa ha litšepiso tsa hae.

Ho Thaba ho sa Tsotellehe ho Hlorisoa

11. Re ka thaba joang ho sa tsotellehe tlhoriso?

¹¹ Re le bahlanka ba Jehova, re ka sebeletsa Jehova ka pelo e thabileng, le hoja re utloisoa bohloko ke ho hlorisoa. Jesu o ile a bolela hore ba hlorisoang ka lebaka la hae ba thabile, ’me moapostola Petrose o itse: “Thabang hore, mohla khanya ea hae e bonahalang, le tle le thabe ka nyakallo e fetisisang. Ha le nyefoleloa lebitso la Kreste, le lehlohonolo; hobane Moea oa khanya, Moea oa Molimo, o lutse holim’a lōna.” (1 Petrose 4:13, 14; Mattheu 5:11, 12) Haeba u mamella tlhoriso le ho utloa bohloko ka lebaka la ho loka, u na le moea oa Jehova ebile oa u amohela, ’me ruri seo se eketsa thabo.

12. (a) Ke hobane’ng ha re ka khona ho talimana le liteko tsa tumelo ka thabo? (b) Ke thuto efe ea motheo e ka ithutoang tabeng ea Molevi e mong ea bileng botlamuoeng?

¹² Re ka thulana le liteko tsa tumelo ka thabo hobane Molimo ke Setšabelo sa rōna. Sena se totobalitsoe ho Pesaleme ea 42 le ea 43. Ka lebaka le itseng, Molevi e mong o ile a ba botlamuoeng. O ile a hloloheloa borapeli bo etsetsoang sehalalelong sa Molimo hoo a ileng a ikutloa eka ke khama e khubelu e tšehali e nyoriloeng, kapa khama e tšehali, e nyoretsoeng metsi letsoatlareng. O ne a ‘nyoreloa’ kapa a hloloheloa Jehova le tokelo ea ho rapela Molimo sehalalelong sa Hae. (Pesaleme ea 42:1, 2) Phihlelo ena ea motho ea neng a le botlamuoeng e lokela ho re susumeletsa ho bontša teboho bakeng sa botsoalle boo re bo thabelang le batho ba Jehova. Haeba boemo bo joaloka ho koalloa chankaneng ka lebaka la ho hlorisoa bo ka re thibela ho ba le bona ka nakoana, ha re nahaneng ka thabo eo re bileng le eona ha re ne re le tšebeletsong e halalelang hammoho le bona ’me re rapelle mamello ha re ntse re ‘itšepetse Molimo’ hore a re tsosolosetse tšebeletsong ea kamehla le barapeli ba hae.—Pesaleme ea 42:4, 5, 11; 43:3-5.

“Sebeletsang Jehova ka Thabo”

13. Pesaleme ea 100:1, 2 e bontša joang hore thabo e tlameha hore e be tšobotsi ea tšebeletso ea rōna ho Molimo?

¹³ Thabo e tlameha ho ba tšobotsi ea tšebeletso ea rōna ho Molimo. Sena se ile sa bontšoa pineng ea teboho eo ho eona mopesaleme a ileng a bina: “Hooang ka tlhōlo ho Jehova, lōna batho bohle ba lefatše. Sebeletsang Jehova ka thabo. Tlong ka pel’a hae ka mohoo oa thabo.” (Pesaleme ea 100:1, 2, NW) Jehova ke “Molimo ea thabileng” ’me o batla hore bahlanka ba hae ba fumane thabo ha ba phetha boinehelo ba bona ho eena. (1 Timothea 1:11, NW) Batho ba lichaba tsohle ba lokela ho ithabela ho Jehova, ’me lipolelo tsa rōna tsa thoriso li lokela ho ba matla, joaloka ‘mohoo oa tlhōlo’ oa lebotho le hlōtseng. Kaha tšebeletso ea Molimo ea khatholla, e lokela ho etsoa ka thabo. Kahoo, mopesaleme o ile a phehella batho hore ba atamele Molimo “ka mohoo oa thabo.”

14, 15. Pesaleme ea 100:3-5 e sebetsa joang ho batho ba Jehova ba thabileng kajeno?

¹⁴ Mopesaleme o ile a eketsa: “Le tsebe [le hlokomele, le lumele] hobane Jehova ke Molimo! Ke eena ea re entseng, ’me re ba hae, re sechaba sa hae, re mohlape o alosoang ke eena.” (Pesaleme ea 100:3) Kaha Jehova ke ’Mōpi oa rōna, o re ruile joalokaha molisa a ruile linku tsa hae. Molimo o re hlokomela hantle hoo re mo rokang ka kananelo. (Pesaleme ea 23) Mabapi le Jehova, mopesaleme o ile a boela a bina: “Kenang likhorong tsa hae ka liteboho, le mabaleng a hae ka lithoko! Mo leboheng, le rorise lebitso la hae! Hobane Jehova o molemo, mohau oa hae o hlola ka ho sa eeng kae, le botšepehi ba hae melokong le melokong.”—Pesaleme ea 100:4, 5.

¹⁵ Kajeno, batho ba thabileng ba lichaba tsohle ba kena mabaleng a sehalalelo sa Jehova ho mo leboha le ho mo rorisa. Re rorisa lebitso la Molimo ka thabo ka hore ka linako tsohle re bue hantle ka Jehova, ’me litšoaneleho tsa hae tse hlollang li re susumelletsa ho mo rorisa. O molemo ka ho feletseng, ’me kamehla re ka tšepela moseng oa hae o lerato kapa tlhokomelo ea hae e qenehelang bakeng sa bahlanka ba hae, hobane li teng ka ho sa feleng. Jehova oa tšepahala tabeng ea ho bontša lerato ho ba etsang thato ea hae ho isa “melokong le melokong.” (Ba-Roma 8:38, 39) Kahoo, ruri re na le lebaka le molemo la ho ‘sebeletsa Jehova ka thabo.’

Ithabeleng Tšepong ea Lōna

16. Bakreste ba ka ithabela tšepong le litebellong life?

¹⁶ Pauluse o ile a ngola: “Thabelang tšepong.” (Ba-Roma 12:12) Balateli ba Jesu Kreste ba tlotsitsoeng ba ithabela tšepong e khanyang ea bophelo ba leholimo ba ho se shoe boo Molimo a entseng hore ba bo fumane ka Mora oa hae. (Ba-Roma 8:16, 17; Ba-Filippi 3:20, 21) Bakreste ba nang le tšepo ea bophelo bo sa feleng Paradeiseng lefatšeng le bona ba na le mabaka a ho thaba. (Luka 23:43) Bahlanka ba Jehova bohle ba tšepahalang ba na le lebaka la ho thabisoa ke tšepo ea ’Muso, hobane e tla ba karolo ea puso eo ea leholimo kapa ba phele sebakeng sa eona sa lefatšeng. Ke tlhohonolofatso e thabisang hakaakang!—Mattheu 6:9, 10; Ba-Roma 8:18-21.

17, 18. (a) Ho boletsoe eng esale pele ho Esaia 25:6-8? (b) Boprofeta boo ba Esaia bo phethahatsoa joang hona joale, ’me ho thoe’ng ka ho phethahala ha bona nakong e tlang?

¹⁷ Esaia le eena o ile a bolela esale pele ka bokamoso bo thabisang ba moloko oa batho o mamelang. O ile a ngola: “Thabeng ena, Jehova oa makhotla o tla etsetsa lichaba kaofela mokete oa lijo tse hlabosang, mokete oa liveine tse monate tse nkiloeng holim’a litšifa, mokete oa lijo tse hlabosang, tsa moko, oa liveine tse nkiloeng holim’a litšifa, tse hloekileng. Thabeng ena o tla tlosa lesira le siretseng batho bohle, le kobo e koahetseng lichaba kaofela. O tla felisa lefu ka ho sa eeng kae; Morena Jehova o tla felisa meokho lifahlehong tsohle, a felise sekhobo sa sechaba sa hae lefatšeng lohle, hobane Jehova o boletse.”—Esaia 25:6-8.

¹⁸ Mokete oa moea oo re kopanelang ho oona kajeno re le barapeli ba Jehova ruri ke mokete o thabisang. Ha e le hantle, thabo ea rōna ea khaphatseha ha re ntse re sebeletsa Molimo ka cheseho re lebeletse mokete oa lintho tsa sebele tse molemo tseo a li tšepisitseng lefatšeng le lecha. (2 Petrose 3:13) Motheong oa sehlabelo sa Jesu, Jehova o tla tlosa “kobo” e koahetseng moloko oa batho ka lebaka la sebe sa Adama. E tla ba thabo e kaakang ho bona sebe le lefu li tlositsoe! E tla ba thabo e kaakang ho amohela baratuoa ba tsohileng bafung, ho hlokomela hore meokho e felile, le ho phela lefatšeng la paradeise, moo batho ba Jehova ba ke keng ba rohakoa empa ba tla be ba file Molimo karabo e eang ho mosomi e moholo, Satane Diabolose!—Liproverbia 27:11.

19. Re lokela ho itšoara joang mabapi le litebello tseo Jehova a li behileng ka pel’a rōna re le Lipaki tsa hae?

¹⁹ Na ha u tlale thabo le teboho ke ho tseba seo Jehova a tla se etsetsa bahlanka ba hae? Ka sebele, litebello tse joalo tse hlollang li kolekela thabong ea rōna! Ho feta moo, tšepo ea rōna e tsotehang e etsa hore re itšetlehe ka Molimo oa rōna ea thabileng, ea lerato le ea fanang ka seatla se bulehileng ka maikutlo a kang ana: “Bonang, ke oona Molimo oa rōna, oo re o tšepileng hoba o tla re boloka; ke eena Jehova eo re mo tšepileng; a re nyakalleng, re thabele topollo ea hae.” (Esaia 25:9) Ha tšepo ea rōna e nyakallisang e tiile likelellong tsa rōna, ha re lekeng ka matla ho sebeletsa Jehova ka lipelo tse thabileng.

U ne U Tla Araba Joang?

◻ Re ka sebeletsa Jehova ka “pelo e thabileng” joang?

◻ Re ka etsa joang haeba re se na thabo tšebeletsong ea rōna ho Molimo?

◻ Ke hobane’ng ha batho ba Jehova ba ka ba le thabo ho sa tsotellehe tlhoriso?

◻ Re na le mabaka afe a ho ithabela tšepong ea rōna?

[Litšoantšo tse leqepheng la 17]

Ho kopanela litšobotsing tsohle tsa bophelo ba Bokreste ho tla eketsa thabo ea rōna