Khaolo ea 16
Khetho e Tiisetsang Bophelo Khotsong ea ’Nete le T,šireletsehong
1. Haeba re khetha ka nepo, thabo ea rōna le tšepo ea rōna e ka ba life hona joale?
KE THABO e kaakang ho ba le morero oa sebele bophelong, ho tseba moo u eang! ’Me ke khotso e kaakang ea kelello le ea pelo e tlisoang ke bonnete ba hore ha ho tsela e molemo ho feta ena eo u ka beng u ile ua e nka! Khotso e joalo le tšepo e ka ba tsa hao hafeela u etsa khetho e nepahetseng hona joale.
2. Ho tseba hoa rōna Jehova le merero ea hae ho re thusa joang mabapi le pono ea rōna ka bophelo?
2 Bopaki bo hlakile hore re ke ke ra lebella lefatše lena ho ba mohloli oa khotso ea ’nete le tšireletseho. Litsamaiso tsa khoebo, bolumeli, le lipolotiki, ho akarelletsa le Machaba a Kopaneng ka polelo ea oona ea ‘khotso le tšireletseho,’ li ke ke tsa li tlisa. Ka baka leo, Bibele e re supisa ho Jehova Molimo e le eena feela Mohloli oa khotso ea ’nete le tšireletseho. Ho mo tseba le merero ea hae ho re thusa ho utloisisa hore na ke hobane’ng ha re le teng lefatšeng le hore na ke hobane’ng ha lintho li le kamoo li leng kateng kajeno. Re ithuta ka tseko e khōlō e amang borena ba bokahohle ba Jehova, le hore na e re ama joang ka bomong. Re ithuta hore na lipakane tsa rōna ke tse bohlale le tse loketseng hakae, ’me re fumana litekanyetso tse tšepahalang tsa boitšoaro tseo re ka phelang ka tsona. Ha re talimane le ho kula, botsofali, kapa lefu, re na le tšepo e tšelisang ea bophelo tsamaisong e ncha ea ho loka, le e nang le bophelo bo botle, le haeba e le ka ho tsoha bafung, haeba ho hlokahala.
3. Ke hobane’ng ha Jehova e le eena eo re ka beang tšepo eohle ea rōna ho eena?
3 Ka baka leo, hase feela Esaia 26:4 e khothatsang: “Le tšepe Jehova ka mehla eohle, hobane Jehova, Jehova, ke lefika la ka mehla eohle.” Jehova ea sa fetoheng, ea matla ’ohle, le oa kamehla, ka sebele Jehova ke eena eo re ka beang tšepo eohle ea rōna ho eena. Na ha u batle ho thabela tataiso ea hae le tšireletso ea hae hona joale le ka nako eohle e tlang Tsamaisong e Ncha ea hae eo a e tšepisitseng? Haeba ho joalo, u tlameha ho etsa joang?
4. Ho fumana mohau oa Jehova, re hloka eng, ’me ke eng e ho nolofatsang?
4 Batho ka kakaretso ba arohile ho Molimo ka lebaka la sebe sa batsoali ba rōna ba pele. Empa Molimo o butse tsela ea poelano le setsoalle le oona ka sehlabelo sa Mora oa oona. (2 Ba-Korinthe 5:19-21; Ba-Efese 2:12, 13) Leha ho le joalo, ha hoa lekana hore feela re re re batla setsoalle sa Molimo.
5. Sepheo sa rōna e lokela ho ba sefe ha re batla setsoalle sa Jehova?
5 Re lokela ho ithaopela, le hona ho chesehela ho o pakela hore re batla sena, le hona e le ka sepheo se nepahetseng. Ka mohlala, na re batla setsoalle sa Jehova haholo-holo feela hore re tle re pholohe tlokotsi? Haeba re tla fumana boemo bo nepahetseng ho Molimo, e ke ke ea e-ba feela bakeng sa nako ena e potlakileng pele ho kahlolo ea oona kapa feela ho phonyoha ‘mahlomola a maholo’ a tlang. (Mattheu 24:21, 22) E tlameha ho ba bakeng sa nako eohle e tlang. Ke lerato la ’nete feela le tla re nea tšusumetso ena. Ka hona, re ka bontša ho tiea hoa takatso ea rōna bakeng sa setsoalle sa hae, Jehova ka Lentsoeng la hae o beile lintho tse itseng tseo e mong le e mong ho rōna a tlamehang ho li etsa hore a boelane le eena.
Tumelo e Phelang
6. Ho khahlisa Molimo, re lokela ho ba le tšepo efe ka oona?
6 Jehova ke Molimo oa ’nete. Ka hona re ka ba le tšepo e feletseng litšepisong tsa hae. Ha e le hantle, “tumelo ha e le sieo, ha ho kamoo Molimo o ka khahlisoang; ea atamelang Molimo e ka khona a lumele hobane o teng, le hoba ke oona moputsi oa ba o batlang.” (Ba-Heberu 11:6) Haeba u na le tumelo e joalo, joale u tseba hore sohle seo Molimo o se etsang se na le morero o lokileng, le hore kamehla pelong ea oona o na le lithahasello tse molemohali tsa rōna. Ka mesebetsi ea oona ea pōpo le ka Lentsoeng la oona le ngotsoeng, u bona hore ha o bohlale bohle le matla ’ohle feela, empa hape ke Molimo o lereko. Ha e le hantle, ha ho mohla o tla fetohela litekanyetso tsa oona tse lokileng. Leha ho le joalo, le hoja re sa phethahala ’me re etsa liphoso, haeba re rata ho loka, o na le tsela ea ho sebelisana le rōna e tla fella ka mahlohonolo.
7. Ho tšepa ho loka hoa Jehova le bohlale ba hae ho ka re sireletsa joang?
7 Kahoo, ha re amohela khalemelo e tsoang ho Molimo, re tla tseba hore e molemong oa boiketlo ba rōna ba ka ho sa feleng. Re tla tšepa Jehova joalokaha mora kapa morali a tšepa ntate ea lerato, ea bohlale, le ea matla. (Pesaleme ea 103:13, 14; Liproverbia 3:11, 12) Ho ba le tumelo e joalo, re ke ke ra belaela bohlale ba keletso ea hae leha e le ho lokela hoa litsela tsa hae, le hoja mohlomong ka nakoana re sa utloisise ka botlalo litaba tse itseng. Kahoo re ipea har’a bao mopesaleme a ba hlalositseng tjena: “Ba ratang molao oa hao ba na le khotso e kholo, ha ho khopiso ho bona.”—Pesaleme ea 119:165; Liproverbia 3:5-8.
8. (a) Ke hobane’ng ha tumelo feela e sa lekana? (b) Tumelo e lokela ho re susumelletsa ketsong efe e boletsoeng ho Liketso 3:19, 20?
8 Empa, joalokaha Jakobo 2:26 e bontša, “tumelo, ha e se na mesebetsi, e shoele.” Tumelo ea ’nete e susumelletsa motho ketsong. ’Me e ’ngoe ea lintho tsa pele tseo e susumelletsang motho hore a li etse ke seo moapostola Petrose a ileng a se khothalletsa: “Bakang . . . ’me le sokolohe, libe tsa lōna li tle li hlakoloe, hore ho tle ho be ho fihle mehla ea khatholoho ka ponahalo ea Morena [Jehova].” (Liketso 3:19, 20) Hoo ho bolela eng?
Ho Baka le Ho Sokoloha
9. (a) Pako ea ’nete ke eng? (b) Ke eng eo re lokelang ho e bakela?
9 Ka Bibeleng, pako e bolela ho fetola maikutlo ho tsamaeang le tšoabo e tlohang botebong ba pelo bakeng sa tsela eo motho a neng a phela ka eona nakong e fetileng kapa bakeng sa liketso tse fosahetseng. (2 Ba-Korinthe 7:9-11) Empa haeba re tla thabela “mehla ea khatholoho” e tšepisitsoeng ke Molimo, re ke ke ra bakela feela liketso tse fosahetseng tsa nakong e fetileng. Ho e-na le hoo, re tlameha ho bontša pako hobane re hlokomela hore, joaloka bana ba Adama, tlhaho ea rōna ke ea boetsalibe. Joalokaha moapostola Johanne a re: “Ha re re, ha re na sebe, rea ithetsa, . . . re o [Molimo] etsa leshano, ’me lentsoe la oona ha le eo ho rōna.” (1 Johanne 1:8, 10) Re lokela ho bonahatsa ka tšoanelo ’Mōpi oa rōna, re bonahatsa ho ‘tšoana le eena le ho ba ka setšoantšo sa hae.’ Empa sebe se futsitsoeng se re sitisa ho etsa hona ka tsela e phethahetseng. Ka hona, re ‘fosa pakane,’ e leng se boleloang ke lentsoe “sebe” ka Bibeleng.—Genese 1:26; Ba-Roma 3:23.
10, 11. (a) Re kolota bophelo ba rōna ho mang, hona hobane’ng? (b) Kahoo, re lokela hore e be re sebelisa bophelo ba rōna joang?
10 Ka hona re hloka tšoarelo ea Molimo. (Mattheu 6:12) Rea hlokomela hore re o kolota bophelo ba rōna joaloka ’Mōpi oa rōna. Empa joale re ithuta hore ka sehlabelo sa Mora oa Molimo, batho ba boetse ba “rekiloe ka theko” ea bohlokoa haholo. Ka hona ha rea lokela ho ba “baruoa ba batho,” leha e le ba litakatso tsa rōna tsa boithati. (1 Ba-Korinthe 7:23) Empa, pele re ithuta le ho amohela ’nete, na hase seo bohle re neng re le sona?—Johanne 8:31-34.
11 Pelong ea hao, na u ananela mpho ea Molimo ea Mora oa oona le seo o se entseng ka Kreste ho fana ka topollo bohlankeng ba sebe le lefu? Joale ka sebele u tla ikoahlaea kannete hore e be nakong e fetileng ho na le moo u ileng ua hlōleha ho sebelisa bophelo ba hao ho utloa ’Mōpi oa hao. Hona ho tla u susumelletsa pakong e tlohang botebong ba pelo hore e be u ile ua latela tsela ea bophelo e tšoanang le ea lefatše, e hananang le thato ea Molimo le morero oa oona.—Liketso 17:28, 30; Tšenolo 4:11.
12. Motho ea bakileng o bontša joang hore o hlile o latola tsela ea hae ea pele?
12 Pako ena ea ’nete e isa ‘tšokolohong.’ Motho ea bakileng kannete ha a ikoahlaele feela hore o ile a sebelisa bophelo ba hae hampe. O hana tsela eo e fosahetseng ’me o hlile o hloea litsela tsa hae tse fosahetseng. O bontša hona ka ‘ho sokoloha’ le ka ho etsa “mesebetsi e tšoanelang pako,” a tlisa bophelo ba hae tumellanong le thato ea Molimo.—Liketso 26:20; Ba-Roma 6:11.
13. (a) Ke eng se boleloang ke polelo ea Jesu ea hore balateli ba hae ba tlameha ‘ho itela’? (b) Kahoo re lokela ho ikokobeletsa Jehova ka lebaka lefe, ’me ho ama bophelo ba rōna joang?
13 Karolo ea ho baka hona le ho sokoloha e akarelletsa seo Jesu a itseng ke ‘ho itela.’ (Mattheu 16:24) Ke hore, ha re sa phela ho latela litakatso tsa rōna tsa boithati re sa natse thato ea Molimo le merero ea oona. Ho e-na le hoo, re hlokomela hore Jehova Molimo o hlile o na le tokelo e feletseng bophelong ba rōna joaloka ’Mōpi oa rōna le Morekolli oa rōna ka sehlabelo sa topollo sa Mora oa hae. Joalokaha Bibele e ho hlalosa, ‘ha re ba rōna, hobane re rekiloe ka theko.’ (1 Ba-Korinthe 6:19, 20) Kahoo, ho e-na le ho sebelisa hampe bolokolohi bo boholo bo re bulehetseng ka ’nete, re ikokobetsa ka botlalo ho etsa thato ea Molimo. (Ba-Galata 5:13; 1 Petrose 2:16) ’Me hona ha re ho etse feela ka lebaka la hobane ho nepahetse empa hobane re rata Jehova Molimo ka ‘lipelo tsa rōna tsohle, meea, mehopolo le matla.’ (Mareka 12:29, 30) Ka sebele hona ho hloka hore e mong le e mong ho rōna a phele bophelo ba boinehelo ho Molimo. Ho e-na le hore tsela ena e be moroalo, e re nolofaletsa ho thabela bophelo ho feta neng kapa neng pele.—Mattheu 11:28-30.
Ho Bolela Pontšeng bakeng sa Pholoho
14. (a) Ha motho a lumela hore ka nepo Jehova ke mong’a hae, a ka bontša Molimo hoo joang? (b) Ke eng hape eo a lokelang ho lakatsa ho e etsa, joalokaha e bontšitsoe ho Ba-Roma 10:10?
14 Ke ntho e ntle ho bolela ka thapelo tumelo ea rōna litokisetsong tsa Molimo, re lumela hore ke oona mong a rōna. Empa re ka batla ’me re lokela ho batla ho ntšetsa pele polelo ea rōna ea tumelo, joalokaha Ba-Roma 10:10 e re bolella: “Motho o lumela ka pelo, hore a beoe ea lokileng, ’me o bolela [“o bolela pontšeng,” NW] ka molomo, hore a bolokehe.” Polelo ena ea “pontšeng” ea tumelo ea rōna ho Jehova le litokisetso tsa hae e lokela ho tsoa ka thabo pelong e tletseng kananelo. Ho etsa polelo ena ho akarelletsa ho nehela bophelo ba rōna ho Jehova ho etsa thato ea hae le ho tšoantšetsa sena ka kolobetso ea metsing.
15. Ke hobane’ng ha re lokela ho nahana ka botebo ka kolobetso ea metsing?
15 Ha Jesu Kreste a qala tšebeletso ea hae ea pontšeng, o ile a etsa hore Johanne Mokolobetsi a mo qoelise metsing. Bibele e tlaleha hore Jesu joale o ile a re ho Molimo: “Ke tlile ho etsa thato ea hao.” (Ba-Heberu 10:9; Pesaleme ea 40:7, 8) Jesu o laetse hore bohle ba fetohang barutuoa ba hae le bona ba lokela hore ba kolobetsoe. Na u morutuoa ea joalo? Ho kolobetsoa hoa hao metsing e tla ba ‘polelo ea pontšeng’ ea sena.—Mattheu 28:19, 20.
16. (a) U ka lekanyetsa joang hore na u loketse ho kolobetsoa? (b) Balebeli ba thusa batho ka bomong joang tokisetsong ea bona ea kolobetso?
16 Ke tokelo e khōlō ho ba paki e inehetseng ea ba ea kolobetsoa ea Jehova, Morena oa bokahohle. Joale hlahloba hore na sena se akarelletsa eng: Jehova ka lerato o u buletse tsela ea ho ba setsoalleng le eena. Empa ho se fumana, u tlameha ho ba le tumelo, u lumela kannete hore Bibele ke Lentsoe le bululetsoeng la Molimo. (2 Timothea 3:16, 17) Hape, u tlameha ho sebelisa tumelo sehlabelong sa topollo sa Jesu e le oona mokhoa feela oa ho fumana boemo bo amohelehang ho Molimo. (Liketso 4:12) Ho hlokahala hore u ananele hore u itšetlehile ka Jehova ’me u bee bophelo ba hao tlas’a hae hore u etse thato ea hae, e seng ka lilengoana tse seng kae feela, empa ka ho sa feleng. Tsela e joalo e akarelletsa ‘ho se be oa lefatše.’ (Johanne 17:16; 1 Johanne 2:15) E le bopaki ba hore u bakile ‘le ho sokoloha,’ u tlameha e be u tlohetse mekhoa leha e le efe e hananang le litekanyetso tse lokileng tsa Molimo ’me u tlameha e be u etsa se laeloang ke Molimo. Na u se u fetotse kelello ea hao e le hore joale u talime bophelo ka tsela ee? (Ba-Roma 12:1, 2) Haeba ho joalo, Bibele e u khothalletsa hore u ‘bolele pontšeng’ tumelo e joalo. Bohato ba pele e ka ba ho atamela e mong oa balebeli ka phuthehong ea Lipaki tsa Jehova sebakeng sa heno e be u mo tsebisa hore na u ikutloa joang. O tla lokisetsa hore u hlahlobjoe bakeng sa lithuto tsa motheo tsa Bibele ho lokisetsa kolobetso.
17. U sebelisa Bibele, bontša kamoo re tlamehang ho tsoela pele ho ‘bolela tumelo ea rōna pontšeng.’
17 Bohato ba kolobetso ha bo na ho tšoaea qetello ea ‘polelo ea pontšeng ea tumelo ea hao.’ Joaloka Mokreste ea inehetseng ho Jehova Molimo, u tla batla ho bolela tšepo ea hao ka ho itlhalosa moo ho khobokanoeng, ‘u mo roka har’a sechaba se sengata.’ (Pesaleme ea 35:18; 40:9, 10) Hape u tla rata ho kopanela mosebetsing o khethehileng oa ‘polelo ea pontšeng’ oo Jehova a o abelang bohle ba ratang ho mo sebeletsa—ho bolela litaba tse molemo tsa ’Muso lefatšeng lohle le ho etsa barutuoa ka batho ba lichaba tsohle.—Mattheu 24:14; 28:19.
Ho Baballa Kamano ea Hao le Molimo
18. Boithuto ba botho ke ba bohlokoa hakae ho tiisa hore kamano ea motho le Jehova e tla tšoarella?
18 Joale, u ka tiisa joang hore, hang ha u fumane kamano ea hao le Jehova e tla tšoarella ka ho sa feleng khotsong le tšireletsehong e thabisang? Taba ea sehlooho, u tla rata hore u ’ne u hōle tsebong ea hae. Ka boithuto ba botho u tla fumana thabo ea sebele ho fumana matlotlo a bohlale a bolokiloeng Lentsoeng la Molimo. U ka tšoana le motho eo Pesaleme ea 1:2, 3 e mo hlalosang: “[O] ithabela molaong oa Jehova, molao oa oona a o nahana motšehare le bosiu. O joale ka sefate se hlomiloeng pel’a metsi a koellang, se beang litholoana tsa sona ka khoeli ea tsona, seo mahlaku a sona a sa foforeheng; see a se etsang kaofela sea mo atla.” E, ho rua tsebo ka Molimo, le ho sebelisa tsebo eo, ho tla u nolofaletsa ho tsamaea ‘litseleng tse khahlehang’ le ‘mebileng ea khotso,’ hobane ho tla u nea bohlale ba ho talimana le mathata ’ohle a bophelo. (Liproverbia 3:13, 17, 18) Ho nyoreloa hoa hao tsebo e joalo ea Bibele hona joale ho tla bontša hore u tšoanelehela bophelo Tsamaisong e Ncha ea Molimo, hobane ka nako eo “lefatše le tla tlala tsebo ea Jehova, joale ka ha metsi a aparetse leoatle.”—Esaia 11:9.
19. Ke hobane’ng ha ho ba teng kamehla libokeng e le ho hlokahalang bophelong ba batho ba Jehova?
19 Ho hong hape hoa bohlokoa hoo u ho hlokang ke ho ba teng kamehla libokeng le bahlanka ba bang ba Jehova. Mono u tla fumana tšusumetso ea ’nete e isang leratong le mesebetsing e metle, khothatso ea ho mamella kamanong ea hao e nepahetseng le Molimo. (Ba-Heberu 10:23-25) Kopano ena e monate, e kang ea lelapa ea bahlanka ba Jehova e fana ka bopaki bo matlafatsang ba hore khotso le tšireletseho tse tšepisitsoeng bakeng sa Tsamaiso e Ncha ea Molimo ke tsa ’nete.—Pesaleme ea 133:1; 1 Ba-Korinthe 14:26, 33.
20. Banna ba hōlileng ka phuthehong ba ka re thusa joang linakong tsa khanyetso le mathateng a botho?
20 Ka phuthehong u ka rua molemo tokisetsong e ’ngoe e lerato. Jesu, ‘Molisa ea Molemo,’ o na le ‘balisa ba tlase’ lefatšeng. Bana ke balebeli, kapa banna ba hōlileng moeeng ba hlokomelang “linku” tsa hae. Ke thuso e matla ea ho ntšetsa pele khotso le tšireletseho har’a batho ba Molimo ba bokantsoeng lefatšeng ka bophara. (1 Petrose 5:2, 3) Banna bana “ba joale ka tšireletso ha moea o foka, joale ka lehaha ha sefefo se e-tla, joale ka molatsoana oa metsi naheng e omileng le joale ka moriti oa lefika le phahameng naheng e nyoriloeng.” (Esaia 32:1, 2) E, linakong tsa lifefo tsa khatello le ho imeloa ka lebaka la khanyetso ea lefatše kapa mathata a botho, ka tumelo ea bona e kang lefika le ho khomarela hoa bona ka ho tiea Lentsoeng la Molimo, banna bana ba hōlileng moeeng ba ka fana ka tšehetso ea sebele. Ba ka u fepela ka keletso e khathollang le khothatso e khathollang.
21. Ke eng se tla re thibela ho lumella ho se phethahale hoa ba bang hore ho senye kamano ea rōna le Jehova?
21 Ke ’nete hore ho se phethahale hoa botho ho tla ’ne ho iponahatse, le har’a bahlanka ba Molimo. Bohle re etsa liphoso tsatsi le leng le le leng. (Jakobo 3:2) Empa na re tla itlohella hore re khoptjoe ke ho se phethahale hoa ba bang ’me re lumelle hore hona ho senye kamano ea rōna le Jehova? Kaha le rōna ka borōna re etsa liphoso, na ha rea lokela ho bontša ba bang tšoarelo eona eo re ipatlelang eona? (Mattheu 6:14, 15) Haeba re tla ipaka re le bafo ba tšoanelehang ba Tsamaiso e Ncha ea Molimo ea khotso, re tlameha hore hona joale re bonahatse matla a rōna a ho sebelisana le ba bang ka khotso. Re ke ke ra rata Molimo empa re sa rate baena ba rōna le bo-khaitseli ba rōna moeeng bao Kreste a ba shoetseng.—1 Johanne 4:20, 21.
22. Thapelo e lokela ho nka sebaka sefe bophelong ba rōna?
22 Kamano ea hao e nepahetseng le Molimo e u nea tokelo e ’ngoe e khōlō: ho atamela Molimo ka thapelo ka tieo ea hore o-oa u utloa. Baballa tokelo eo ’me u e sebelise letsatsi le letsatsi, letsatsi lohle. Mathata a tla hlaha. Ho se phethahale hoa hao ho ka ’na hoa u tšoenya. Empa Bibele e-ea eletsa: “Le se ke la belaella letho; empa nthong tsohle seo le se batlang, le ke le se tsebise Molimo ka thapelo le ka kōpo e nang le teboho. ’Me khotso ea Molimo, e fetisang kutloisiso eohle, e tla boloka lipelo tsa lōna le mehopolo ea lōna ho Jesu Kreste.”—Ba-Filippi 4:6, 7.
23. Ha re talimane le liteko le mahlomola bakeng sa tumelo ea rōna, ke eng e tla re thusa ho mamella?
23 Ka ho khetha ho sebeletsa Jehova, Mohloli oa ’nete oa khotso le tšireletseho, le ka ho bea tšepo ea hao Tsamaisong e Ncha ea hae, u tla be u tlohile ka leoto le nepahetseng. Joale, joalokaha Bibele e bolela, “le tšoanetse ho ba le mamello, le tle le etse thato ea Molimo, le tle le ntoo kotula tseo le li tšepisitsoeng.” (Ba-Heberu 10:36) Ha u se u latsoitse tlhohonolofatso ea kamano e nepahetseng le Jehova, ikemisetse hore u ke ke ua e tela. Le kamohla u se lumelle menyaka e fetang ka tsela ea lefatše hore e u khelose. Le hoja liteko tse tsoang lefatšeng la sera li ka ’na tsa e-ba matla, hopola hore ke tsa nakoana. Ha ho bapisoa le mahlohonolo ao Jehova a tlang ho a nea ba mo ratang, mahlomola a joalo hase letho.—2 Ba-Korinthe 4:16-18.
24. (a) Ke eng eo re hlileng re nang le lebaka la ho e thabela kajeno? (b) Joaloka mopesaleme, re lokela ho ikutloa joang kamehla ka Jehova le kamano ea rōna le eena?
24 Tsoela pele tseleng ea boinehelo ba bomolimo, u tšepile hore ke tsela ea bophelo e molemohali hona joale le hore e tla isa bophelong bo sa feleng Tsamaisong e Ncha ea Molimo. (1 Timothea 4:8) Thabela bopaki ba hore Tsamaiso eo e Ncha e haufi u be u thabele le khotso le tšireletseho tsa ka ho sa feleng tseo e tlang ho li tlisa. Ha u ntse u haha kamano ea hao le Jehova, kamehla u ikutloe joaloka mopesaleme ea ileng a ngola: “Lefika la pelo ea ka le kabelo ea ka ke Molimo, ka ho sa eeng kae! Hobane ba u koenehelang ba tla fela. U timetsa bohle ba eang ho itšilafaletsa hole le uena. Empa ha e le ’na, ho ba haufi le Molimo, ke molemo ho ’na; ke beile setšabelo sa ka ho Morena Jehova, ke tle ke tsebe ho bolela mesebetsi ea hao kaofela.”—Pesaleme ea 73:26-28.
[Litšoantšo tse leqepheng la 181]
Ho Etsa Polelo ea Pontšeng