Khaolo ea Leshome le Metso e Robeli

Jehova o Tšepisa Daniele Moputso o Babatsehang

1, 2. (a) Semathi se hloka tšoaneleho efe ea bohlokoa e le hore se atlehe? (b) Moapostola Pauluse o ile a tšoantša bophelo ba botšepehi tšebeletsong ea Jehova le peiso joang?

SEMATHI se itosa se habile kholeng. Se shoele ke mokhathala, empa kaha pakane ea sona e haufi, se itukubeletsa hore se mathe mehatonyana eo ea ho qetela. Ka ho ikitlaetsa ka hohle, se qetella se fihlile kholeng! Sefahleho sa sona se khanya khatholoho le tlhōlo. Ho mamella ho fihlela qetellong ho tlisitse tlhōlo.

² Qetellong ea Daniele khaolo ea 12, re fumana moprofeta enoa ea ratoang a le haufi le ho fihla kholeng ‘peisong’ ea hae—e leng bophelo ba hae tšebeletsong ea Jehova. Ka mor’a hore moapostola Pauluse a qotse mehlala e sa tšoaneng ea tumelo e neng e le har’a bahlanka ba Jehova ba pele ho Bokreste, o ile a ngola: “Kahoo, joale, kahobane re e-na le leru le leholo hakaalo la lipaki le re pota-potileng, le rōna a re hloboleng boima bo bong le bo bong le sebe se re tšoasang habonolo, ’me a re matheng ka mamello peisong e behiloeng ka pel’a rōna, ha re ntse re talimile ka hloko Moemeli ea ka Sehloohong le Mophethahatsi oa tumelo ea rōna, Jesu. Ka lebaka la thabo e neng e behiloe ka pel’a hae o ile a mamella thupa ea tlhokofatso, a sa natse lihlong, ’me o lutse ka letsohong le letona la terone ea Molimo.”—Baheberu 12:1, 2.

 3. (a) Ke eng e ileng ea susumelletsa Daniele ho ‘matha ka mamello’? (b) Ke lintho life tse tharo tse totobetseng tseo lengeloi la Jehova le ileng la li bolella Daniele?

³ Daniele o ne a le har’a ‘leru leo le leholo la lipaki.’ Ka sebele ke e mong ea ileng a lokela ho ‘matha ka mamello,’ ’me se ileng sa mo susumelletsa ho etsa joalo ke lerato le tebileng ho Molimo. Jehova o ne a senoletse Daniele ho hongata ka bokamoso ba mebuso ea lefatše, empa joale O ile a mo romella khothatso ena e mo tobileng: “Ha e le uena, e-ea bofelong; ’me u tla phomola, empa u tla ema bakeng sa kabelo ea hao bofelong ba matsatsi.” (Daniele 12:13) Lengeloi la Jehova le ne le bolella Daniele lintho tsena tse tharo tse totobetseng: (1) hore Daniele ‘a ee bofelong,’ (2) hore o ne a tla “phomola” le (3) hore o ne a tla “ema” hape nakong e tlang. Mantsoe aa a ka khothatsa Bakreste joang kajeno hore ba mamelle ho fihlela ba fihla kholeng peisong ea bophelo?

“E-EA BOFELONG”

 4. Lengeloi la Jehova le ne le bolela’ng ha le re “e-ea bofelong,” ’me ke hobane’ng ha hoo ho ne ho ka ’na ha hlahisetsa Daniele bothata?

⁴ Lengeloi le ne le bolela’ng ha le re ho Daniele: “Ha e le uena, e-ea bofelong”? Bofelong ba eng? Ha e le hantle, kaha Daniele o ne a ka ba lilemo li 100, ho bonahala hore sena se ne se bolela ho fela ha bophelo ba hae, hoo mohlomong ho neng ho se ho le haufi haholo.a Lengeloi le ne le phehella Daniele hore a mamelle ka botšepehi ho fihlela lefung. Empa ha ho pelaelo hore ho etsa joalo ho ne ho ke ke ha e-ba bonolo. Daniele o ne a phetse hore a bone ha ho lihuoa Babylona le ha masala a baholehuoa ba Bajuda a khutlela Juda le Jerusalema. E tlameha ebe moprofeta enoa ea tsofetseng o ile a thaba haholo ke sena. Leha ho le joalo, ha ho na tlaleho ea hore o ile a kenella leetong lena. Mohlomong o ne a se a tsofetse haholo kapa a fokola haholo ka nako eo. Kapa mohlomong e ne e le thato ea Jehova hore a sale Babylona. Ho sa tsotellehe hore na boemo e ne e le bofe, ha ho makatse haeba Daniele o ile a ikutloa a batla a saretsoe ha batho ba naha ea habo ba tloha ho khutlela Juda.

 5. Ke eng se bontšang hore Daniele o ile a mamella ho isa bofelong?

⁵ Ha ho pelaelo hore Daniele o ile a tsoha molota ke polelo e mosa ea lengeloi: “E-ea bofelong.” Re ka ’na ra hopola mantsoe ao Jesu Kreste a a buileng hoo e ka bang lilemo tse makholo a tšeletseng hamorao: “Ea mameletseng ho isa bofelong ke eena ea tla pholoha.” (Matheu 24:13) Ha ho pelaelo hore seo ke sona seo Daniele a ileng a se etsa. O ile a mamella ho isa bofelong a ba a matha peiso ea bophelo ka botšepehi ho fihlela qetellong. E ka ’na eaba leo ke lebaka leo ka lona hamorao a boleloang hantle ka Lentsoeng la Molimo. (Baheberu 11:32, 33) Ke eng se ileng sa etsa hore Daniele a mamelle ho fihlela qetellong? Tlaleho ea bophelo ba hae e re thusa ka karabo.

HO MAMELLA E LE SEITHUTI SA LENTSOE LA MOLIMO

 6. Re tseba joang hore Daniele e ne e le seithuti se khothetseng sa Lentsoe la Molimo?

⁶ Bakeng sa Daniele, ho mamella ho isa bofelong ho ne ho akarelletsa ho tsoela pele a ithuta le ho thuisa ka botebo ka litšepiso tse hlollang tsa Molimo. Rea tseba hore Daniele e ne e le seithuti se khothetseng sa Lentsoe la Molimo. Ho seng joalo, o ne a tla tseba joang ka tšepiso ea Jehova ho Jeremia ea hore kholeho e ne e tla nka lilemo tse 70? Daniele ka boeena o ile a ngola: “Ke ile ka lemoha ka libuka palo ea lilemo tseo.” (Daniele 9:2; Jeremia 25:11, 12) Ha ho pelaelo hore Daniele o ile a batla libuka tsa Lentsoe la Molimo tse neng li le teng ka nako eo. Ha ho pelaelo hore Daniele o ile a qeta nako e ngata e thabisang a bala a bile a thuisa ka libuka tsa Moshe, Davida, Solomone, Esaia, Jeremia, Ezekiele—leha e le efe eo a neng a ka e fumana.

 7. Ha re bapisa nako ea rōna le mehla ea Daniele, re na le melemo efe ha re ithuta Lentsoe la Molimo?

⁷ Ho ithuta Lentsoe la Molimo le ho tebisa mohopolo ho lona ke habohlokoa bakeng sa hore re hlaolele mamello kajeno. (Baroma 15:4-6; 1 Timothea 4:15) Hape re na le Bibele e feletseng, e akarelletsang tlaleho e ngotsoeng ea kamoo boprofeta bo bong ba Daniele bo ileng ba phethahala kateng makholo a lilemo hamorao. Ho feta moo, re lehlohonolo ka hore ebe re phela “nakong ea bofelo,” e boletsoeng esale pele ho Daniele 12:4. Mehleng ea rōna, batlotsuoa ba hlohonolofalitsoe ka temohisiso ea moea ’me ba khanya joaloka mahlaseli a ’nete lefatšeng lena le aparetsoeng ke lefifi. Ka lebaka leo, boprofeta bo bongata bo tebileng bo bukeng ea Daniele, boo bo bong ba bona bo ileng ba mo makatsa, bo bolela ho hongata ho rōna kajeno. Ka lebaka leo, a re tsoeleng pele ho ithuta Lentsoe la Molimo letsatsi le letsatsi, ho se ke ha e-ba le mohla re sa nkeng lintho tsena ka botebo. Ho etsa joalo ho tla re thusa hore re mamelle.

DANIELE O ILE A PHEHELLA HO RAPELA

 8. Daniele o ile a beha mohlala ofe tabeng ea thapelo?

⁸ Thapelo le eona e ile ea boela ea thusa Daniele hore a mamelle ho isa qetellong. O ne a retelehela ho Jehova Molimo letsatsi le leng le le leng ’me a bua le eena ka bolokolohi ka pelo e tletseng tumelo le kholiseho. O ne a tseba hore Jehova ke “Ea Utloang thapelo.” (Pesaleme ea 65:2; bapisa le Baheberu 11:6.) Ha pelo ea Daniele e ne e imetsoe ke masoabi ka lebaka la tsela ea bofetoheli ea Baiseraele, o ile a tšollela maikutlo a hae ho Jehova. (Daniele 9:4-19) Esita leha Dariase a ne a laetse hore likōpo li lebisoe ho eena feela ka matsatsi a 30, Daniele ha aa ka a lumella seo hore se mo sitise ho rapela Jehova Molimo. (Daniele 6:10) Na ha ho re ame maikutlo ho bona ka mahlo a kelello ha monna-moholo eo ea tšepahalang a tobana ka sebete le ho liheloa ka sekoting se tletseng litau ho e-na le hore a tlohele tokelo ea bohlokoa ea thapelo? Ha ho pelaelo hore Daniele o ile a ea bofelong ba hae ka botšepehi, a ntse a rapela Jehova ka matla letsatsi le leng le le leng.

 9. Ke hobane’ng ha re sa lokela ho tella tokelo ea thapelo?

⁹ Thapelo ke ketso e bonolo. Re ka rapela ka nako leha e le efe, kae kapa kae, ka lentsoe le phahameng kapa re khutsitse. Leha ho le joalo, le ka mohla ha rea lokela ho tella tokelo ena ea bohlokoa. Bibele e amahanya thapelo le mamello, tiisetso le ho falimeha moeeng kamehla. (Luka 18:1; Baroma 12:12; Baefese 6:18; Bakolose 4:2) Na ha ho tsotehe hore ebe re na le mocha o se nang lithibelo le o sa koaloeng oa puisano le motho ea phahameng ka ho fetisisa bokahohleng? ’Me oa mamela! Hopola nako ea ha Daniele a rapela, ’me Jehova a arabela ka ho romela lengeloi. Lengeloi le ile la fihla ha Daniele a ntse a rapela! (Daniele 9:20, 21) E ka ’na eaba mehla ea rōna hase ea ho eteloa ke mangeloi ka tsela e joalo, empa Jehova ha aa fetoha. (Malakia 3:6) Feela joalokaha a ile a utloa thapelo ea Daniele, le tsa rōna o tla li mamela. Ha re rapela, re tla atamela haufi le Jehova haholoanyane, re etse tlamo e tla re thusa ho mamella ho fihlela bofelong joaloka Daniele.

HO MAMELLA JOALOKA MOSUOE OA LENTSOE LA MOLIMO

10. Ke hobane’ng ha ho ruta ’nete ea Lentsoe la Molimo e ne e le habohlokoa ho Daniele?

¹⁰ Daniele o ile a lokela ho ‘ea bofelong’ ka kutloisiso e ’ngoe hape. O ile a lokela ho mamella joaloka mosuoe oa ’nete. Ha ho mohla a ileng a lebala hore ke e mong oa batho ba khethiloeng bao Mangolo a neng a itse ka bona: “‘Le lipaki tsa ka,’ ho bolela Jehova, ‘eena mohlanka oa ka eo ke mo khethileng.’” (Esaia 43:10) Daniele o ile a etsa sohle se matleng a hae hore a phelele thōmo eo. Mohlomong mosebetsi oa hae o ne o akarelletsa ho ruta sechaba sa habo se neng se le kholehong Babylona. Ha re tsebe letho le lekaalo ka litšebelisano tsa hae le Bajuda ba habo ntle le kamano ea hae le ba bararo ba bitsoang “bo-mphato ba hae”—e leng Hanania, Mishaele le Azaria. (Daniele 1:7; 2:13, 17, 18) Ruri setsoalle sa bona se haufi se ile sa ba thusa haholo hore e mong le e mong oa bona a mamelle. (Liproverbia 17:17) Daniele, a hlohonolofalitsoe ke Jehova ka temohisiso e khethehileng, o ne a e-na le ho hongata hoo a ka ho rutang metsoalle ea hae. (Daniele 1:17) Empa o ne a boetse a lokela ho ruta ka tsela e ’ngoe.

11. (a) Mosebetsi oa Daniele o ne o ikhetha ka eng? (b) Daniele o ile a atleha hakae ha a phethahatsa kabelo ea hae e sa tloaelehang?

¹¹ Daniele o ne a e-na le mosebetsi oa ho pakela Balichaba ba boholong o fetang oa moprofeta leha e le ofe e mong. Le hoja hangata a ne a lokela ho fetisa melaetsa e sa rateheng, ha aa ka a tšoara babusi bana joalokaha eka baa nyonyeha kapa ba ka tlaase ho eena ka tsela e itseng. O ile a bua le bona ka tlhompho le ka bohlale. Ho ne ho e-na le ba bang—ba kang babusisi ba liprofinse ba mōna le ba rerang merero e mebe—ba neng ba batla ho timetsa Daniele. Leha ho le joalo, ba bang ba boholong ba ile ba mo hlompha. Kaha Jehova o ile a nolofalletsa Daniele ho hlalosa liphiri tse qakang marena le banna ba bohlale, moprofeta enoa o ile a tuma haholo. (Daniele 2:47, 48; 5:29) Ke ’nete hore ha a tsofala, o ne a ke ke a hlola a e-ba mafolofolo joaloka bocheng ba hae. Empa ka sebele o ile a ea bofelong ba hae a ntse a batla ka botšepehi tsela leha e le efe eo ka eona a neng a ka sebeletsa e le paki ea Molimo ea ratoang oa hae.

12. (a) Ke mesebetsi efe ea ho ruta eo rōna re e etsang re le Bakreste kajeno? (b) Ke joang re ka latelang keletso ea Pauluse ea hore re ‘tsoele pele re tsamaea ka bohlale mabapi le ba ka ntle’?

¹² Ka phuthehong ea Bokreste kajeno, re ka ’na ra fumana metsoalle e tšepahalang e tla re thusa ho mamella, joalokaha Daniele le bo-mphato ba hae ba bararo ba ile ba thusana. Re boetse rea rutana, re ‘fapanyetsana khothatso.’ (Baroma 1:11, 12) Joaloka Daniele, thōmo ea rōna ke ho ea pakela ba sa lumelang. (Matheu 24:14; 28:19, 20) Kahoo, re lokela ho chorisa tsebo ea rōna e le hore re ka ‘tšoara lentsoe la ’nete ka nepo’ ha re bua le batho ka Jehova. (2 Timothea 2:15) Ho tla thusa haeba re mamela keletso ea moapostola Pauluse, e reng: “Tsoelang pele le tsamaea ka bohlale mabapi le ba ka ntle.” (Bakolose 4:5) Bohlale bo joalo bo akarelletsa ho ba le pono e leka-lekaneng ka bao re sa tšoaneng le bona ka tumelo. Ha re khese batho ba joalo, re inka hore re ba phahametse. (1 Petrose 3:15) Ho e-na le hoo, re batla ho ba tlisa ’neteng, re sebelisa Lentsoe la Molimo ka bohlale le ka tsebo e le hore re finyelle lipelo tsa bona. Re thaba hakaakang ha re atleha ho finyella motho e mong! Ka sebele thabo e joalo e re thusa hore re mamelle ho isa bofelong joaloka Daniele.

“U TLA PHOMOLA”

13, 14. Ke hobane’ng ha Bababylona ba bangata ba ne ba tšosoa ke tebello ea ho shoa, ’me pono ea Daniele e ne e fapane joang?

¹³ Ka mor’a moo lengeloi le ile la tiisetsa Daniele: “U tla phomola.” (Daniele 12:13) Mantsoe ao a ne a bolela’ng? Ha e le hantle, Daniele o ne a tseba hore lefu le mo emetse. Ho tloha mehleng ea Adama ho fihlela ho ea rōna, batho bohle ba ’nile ba fella lefung ntle ho boikhethelo. Ka nepo Bibele e re lefu ke “sera.” (1 Bakorinthe 15:26) Leha ho le joalo, ho Daniele tebello ea ho shoa e ne e bolela ntho e ’ngoe e fapaneng ka ho feletseng le seo e neng e se bolela ho Bababylona ba neng ba mo pota-potile. Ho bona, kaha ba ne ba tetebetse borapeling bo rarahaneng ba melimo ea bohata e ka bang 4 000, lefu le ne le e-na le lintho tsohle tse tšosang. Ba ne ba lumela hore ka mor’a lefu, batho ba phetseng ba sa thaba kapa ba shoeleng ka mabifi ba ne ba fetoha meea e tletseng boiphetetso e tšoenyang ba phelang. Bababylona ba ne ba boetse ba lumela hore ho na le lefatše la bafu le tšosang, le tletseng lilalōme tse tšosang tse kang batho le tse kang liphoofolo.

¹⁴ Ho Daniele, lefu le ne le sa bolele letho la lintho tsena. Makholo a lilemo pele ho mehla ea Daniele, Morena Solomone o ne a ile a bululeloa ke Molimo hore a re: “Ha e le ba shoeleng, ho hang ha ba tsebe letho.” (Moeklesia 9:5) Mopesaleme o ne a ile a bina tabeng ea motho ea shoang, a re: “Moea oa hae oa tsoa, eena o khutlela lerōleng la hae; ka letsatsi leo menahano ea hae ea timela.” (Pesaleme ea 146:4) Kahoo, Daniele o ne a tseba hore mantsoe a lengeloi ho eena e ne e tla ba ’nete. Lefu le ne le bolela phomolo. Ho se khopolo, ho se ho ikoahlaea ho bohloko, ho se tlhokofatso—’me ka sebele ho se lilalōme. Jesu Kreste o ile a bolela litaba ka mokhoa o tšoanang ha Lazaro a e-shoa. O ile a re: “Lazaro motsoalle oa rōna o phomotse.”—Johanne 11:11.

15. Letsatsi la ho shoa le ka ba molemo ho feta letsatsi la ho tsoaloa joang?

¹⁵ Nahana ka lebaka le leng leo ka lona Daniele a sa kang a tšosoa ke tebello ea ho shoa. Lentsoe la Molimo le re: “Lebitso le molemo ho feta oli e ntle, ’me letsatsi la ho shoa le molemo ho feta letsatsi la ho tsoaloa ha motho.” (Moeklesia 7:1) Letsatsi la ho shoa, leo e leng nako e bohloko e le ruri, le ka ba molemo joang ho feta letsatsi la thabo la ho tsoaloa? “Lebitso” ke lona le rarollang taba. “Oli e ntle” e ka rekoa ka chelete e ngata haholo. Khaitseli ea Lazaro Maria o kile a tlotsa maoto a Jesu ka oli e nkhang hamonate e neng e rekoa ka hoo e ka bang moputso oa selemo! (Johanne 12:1-7) Lebitso feela tjee e ka ba la bohlokoa hakaalo joang? Ho Moeklesia 7:1, Septuagint ea Segerike e re, “lebitso le letle.” Hase lebitso feela leo e leng la bohlokoa empa seo e leng sa bohlokoa haholo ke seo le se emelang. Ha mong’a lebitso a tsoaloa, ha a na botumo, ha a na tlaleho ea mesebetsi e metle, ha ho letho le hopoloang ka botho ba hae le litšoaneleho tsa hae. Empa qetellong ea bophelo, lebitso le bonahatsa lintho tsena kaofela. Haeba e le lebitso le molemo ponong ea Molimo, ke la bohlokoa haholo ho feta matlotlo leha e le afe a bonahalang.

16. (a) Daniele o ile a leka joang ho iketsetsa lebitso le molemo ho Molimo? (b) Ke hobane’ng ha Daniele a ne a ka ea phomola a kholisehile ka ho feletseng hore o ne a atlehile ho iketsetsa lebitso le molemo ho Jehova?

¹⁶ Daniele bophelong bohle ba hae o ile a etsa sohle se matleng a hae ho iketsetsa lebitso le molemo ho Molimo, ’me Jehova ha aa ka a hlokomoloha sena. O ile a alosa Daniele ’me a hlahloba pelo ea hae. Molimo o ne a entse ho hongata joalo bakeng sa Morena Davida, ea ileng a bina, a re: “Jehova, u ntlhahlobisisitse ka hohle, ’me ua ntseba. U tseba ho lula ha ka le ho ema ha ka. U etse hloko monahano oa ka u le hōle.” (Pesaleme ea 139:1, 2) Ho ke ke ha latoloa hore Daniele o ne a sa phethahala. E ne e le setloholo sa Adama oa moetsalibe ebile e le setho sa sechaba sa baetsalibe. (Baroma 3:23) Empa Daniele o ile a bakela boetsalibe ba hae ’me a ’na a leka hore a tsamaee le Molimo oa hae ka tsela e khabane. Ka lebaka leo, moprofeta ea tšepahalang o ne a ka kholiseha hore Jehova o ne a tla mo tšoarela libe tsa hae le hore ho ne ho se mohla a tla mo balla tsona. (Pesaleme ea 103:10-14; Esaia 1:18) Jehova o khetha ho hopola mesebetsi e metle ea bahlanka ba tšepahalang ba hae. (Baheberu 6:10) Kahoo, ka makhetlo a mabeli lengeloi la Jehova le ile la re Daniele ke “monna ea khahlehang haholo.” (Daniele 10:11, 19) Sena se ne se bolela hore Daniele e ne e le moratuoa oa Molimo. Daniele o ne a ka ea phomola a khotsofetse, a tseba hore o iketselitse lebitso le molemo ho Jehova.

17. Ke hobane’ng ha ho potlakile hore re iketsetse lebitso le molemo ho Jehova kajeno?

¹⁷ Ke hantle ha e mong le e mong oa rōna a botsa, ‘Na ke iketselitse lebitso le molemo ho Jehova?’ Re phela linakong tsa likhathatso. Hase bokoala empa ke ho toba ’nete ho hlokomela hore lefu le ka tsometsa mang kapa mang oa rōna ka nako leha e le efe. (Moeklesia 9:11) Kahoo, ke habohlokoa hakaakang hore e mong le e mong oa rōna a etse qeto ea ho iketsetsa lebitso le molemo ho Molimo hona joale, ntle ho tieho. Ha re etsa joalo, ha ho hlokahale hore re tšabe lefu. Ke phomolo feela—e joaloka boroko. Joaloka boroko, e lateloa ke ho tsoha!

“U TLA EMA”

18, 19. (a) Lengeloi le ne le bolela’ng ha le bolela esale pele hore Daniele o ne a tla “ema” nakong e tlang? (b) Ke hobane’ng ha Daniele a ne a tla be a tloaelane le tšepo ea tsoho?

¹⁸ Buka ea Daniele e qetella ka e ’ngoe ea litšepiso tse thabisang ka ho fetisisa tse kileng tsa etsetsoa motho. Lengeloi la Jehova le ile la re ho Daniele: “U tla ema bakeng sa kabelo ea hao bofelong ba matsatsi.” Lengeloi lee le ne le bolela’ng? Ha e le hantle, kaha ‘phomolo’ eo le neng le sa tsoa bua ka eona e ne e le lefu, tšepiso ea hore Daniele o ne a tla “ema” neng-neng hamorao e ne e ka bolela ntho e le ’ngoe feela—tsoho!b Ha e le hantle, litsebi tse ling li ’nile tsa tiisa hore Daniele khaolo ea 12 ke eona ea pele e bolelang tsoho ka ho hlaka ka Mangolong a Seheberu. (Daniele 12:2) Leha ho le joalo, tabeng ena teng li fositse. Daniele o ne a tloaelane haholo le tšepo ea tsoho.

¹⁹ Ka mohlala, ha ho pelaelo hore Daniele o ne a tseba mantsoe ana ao Esaia a neng a a tlalehile makholo a mabeli a lilemo pejana: “Bafu ba hao ba tla phela. Litopo tsa rōna—li tla tsoha. Tsohang ’me le hoeletse ka thabo, lōna ba ahileng lerōleng! Kaha . . . lefatše le tla etsa hore ba se nang matla lefung ba tsoaloe.” (Esaia 26:19) Khale pele ho moo, Jehova o ne a ile a fa Elia le Elisha matla a hore ba hle ba tsose batho. (1 Marena 17:17-24; 2 Marena 4:32-37) Esita le pele ho moo, Anna, ’mè oa moprofeta Samuele, o ile a lumela hore Jehova o khona ho tsosa batho Sheole, lebitleng. (1 Samuele 2:6) Pele ho moo, Jobo ea tšepahalang o ile a bolela tšepo ea hae ka mantsoe ana: “Haeba monna ea shahlileng a shoa na a ka phela hape? Ke tla leta ka matsatsi ’ohle a mosebetsi oohle oa ka o qobelloang, ho fihlela phomolo ea ka e fihla. U tla hooa, ’me ke tla u araba. U tla hloloheloa mosebetsi oa matsoho a hao.”—Jobo 14:14, 15.

20, 21. (a) Ha ho tikatiko hore Daniele o tla ba le seabo tsohong efe? (b) Mohlomong tsoho e ka ’na ea etsahala ka tsela efe Paradeiseng?

²⁰ Joaloka Jobo, Daniele o ne a e-na le lebaka la ho kholiseha hore Jehova o ne a tla hle a hloloheloe ho etsa hore a boele a phele nakong e tlang. Ho ntse ho le joalo, e lokela hore ebe e bile ho tšelisang haholo ho utloa sebōpuoa se matla sa moea se tiisa tšepo eo. E, Daniele o tla ema “tsohong ea ba lokileng,” e tla etsahala Pusong ea Kreste ea Lilemo tse Sekete. (Luka 14:14) Hoo ho tla ba joang ho Daniele? Lentsoe la Molimo le re bolella ho hongata ka eona.

²¹ Jehova ke “Molimo, eseng oa ho hloka taolo, empa oa khotso.” (1 Bakorinthe 14:33) Kahoo, ho totobetse hore Paradeiseng tsoho e tla etsahala ka tsela e laolehileng. Mohlomong ho tla be ho fetile nako e itseng ka mor’a Armagedone. (Tšenolo 16:14, 16) Mesaletsa eohle ea tsamaiso ea khale ea lintho e tla be e tlositsoe, ’me ha ho pelaelo hore ho tla be ho entsoe litokisetso tsa hore bafu ba amoheloe hape. Mabapi le hore na bafu ba tla khutla ka tatelano efe, Bibele e fana ka mohlala ona: “E mong le e mong boemong ba hae.” (1 Bakorinthe 15:23) Ho bonahala ho utloahala hore tabeng ea “tsoho ea ba lokileng hammoho le ba sa lokang,” ba lokileng ba tla tsosoa pele. (Liketso 24:15) Ka tsela eo, banna ba tšepahalang ba boholo-holo, ba kang Daniele, ba tla tseba ho thusa ho tsamaisa litaba tsa lefatše, ho akarelletsa ho ruta ba likete tsa limilione “ba sa lokang” ba tla beng ba tsositsoe.—Pesaleme ea 45:16.

22. Ke lipotso life tseo ho seng pelaelo hore Daniele o tla labalabela hore li arajoe?

²² Pele Daniele a e-ba boemong ba ho amohela boikarabelo bo joalo, ka sebele o tla ba le lipotso tseo a tla li botsa. Ha e le hantle, mabapi le boprofeta bo bong bo tebileng bo ileng ba behoa tlhokomelong ea hae, o ile a re: “Ke ile ka utloa, empa ha kea ka ka utloisisa.” (Daniele 12:8) O tla thaba hakaakang hore qetellong a utloisise liphiri tsee tse halalelang! Ha ho pelaelo hore o tla batla ho utloa sohle ka Mesia. Daniele o tla sibolla ka thahasello e khōlō tsoelo-pele ea mebuso ea lefatše ho tloha mehleng ea hae ho fihlela ho ea rōna, hore na ke bo-mang ba ileng ba khetholloa e le “bahalaleli ba Ea Holimo-limo” ba tšepahalang—ba ileng ba mamella ho sa tsotellehe mahloriso “nakong ea bofelo”—a boele a sibolle le litaba tsa timetso ea ho qetela ea mebuso eohle ea batho ha e timetsoa ke ’Muso oa Molimo oa Bomesia.—Daniele 2:44; 7:22; 12:4.

KABELO EA DANIELE—HAMMOHO LE EA HAO—PARADEISENG!

23, 24. (a) Lefatše leo Daniele a tla iphumana a tsoselitsoe ho lona le tla fapana joang le leo a neng a le tseba? (b) Na Daniele o tla ba le sebaka Paradeiseng, hona re tseba joang?

²³ Daniele o tla batla ho tseba ka lefatše leo a tla iphumana a le ho lona ka nako eo—lefatše le tla beng le sa tšoane ka ho feletseng le la mehleng ea hae. Mesaletsa eohle ea lintoa le khatello tse neng li senya lefatše leo a neng a le tseba e tla be e felile. Masoabi, ho kula le lefu li tla be li le sieo. (Esaia 25:8; 33:24) Empa lijo e tla ba matletsetletse, matlo a be mangata le mosebetsi o khotsofatsang o tla ba teng bakeng sa bohle. (Pesaleme ea 72:16; Esaia 65:21, 22) Moloko oa motho e tla ba lelapa le le leng le kopaneng le le thabileng.

²⁴ Ha ho pelaelo hore Daniele o tla ba le sebaka lefatšeng leo. Lengeloi le ile la re ho eena: “U tla ema bakeng sa kabelo ea hao.” Lentsoe la Seheberu le fetoletsoeng e le “kabelo” mona, le tšoana le le sebelisetsoang litša tsa sebele.c Mohlomong Daniele o ne a tloaelane le boprofeta ba Ezekiele bo buang ka ho aroloa ha naha e tsosolositsoeng ea Iseraele. (Ezekiele 47:13–48:35) Ha bo phethahala Paradeiseng, boprofeta boo ba Ezekiele bo fana ka maikutlo afe? A hore batho bohle ba Molimo ba tla ba le libaka Paradeiseng, esita le naha ka boeona e tla aroloa ka tsela e laolehileng le e nang le toka. Ha e le hantle, kabelo ea Daniele Paradeiseng e tla akarelletsa ho hoholo ho feta naha feela. E tla akarelletsa sebaka sa hae morerong oa Molimo moo. Ho na le tiiso ea hore Daniele o tla o fumana moputso oo a o tšepisitsoeng.

25. (a) Tse ling tsa litebello tsa bophelo Paradeiseng tse ipiletsang ho uena ke life? (b) Ke hobane’ng ha ho ka thoe ha habo batho ke Paradeiseng?

²⁵ Leha ho le joalo, ho thoe’ng ka kabelo ea hao? Litšepiso tse joalo li ka sebetsa ho uena. Jehova o batla hore batho ba mamelang ba ‘eme’ bakeng sa kabelo ea bona, hore ba be le libaka Paradeiseng. Nahana feela! Ka sebele, e tla ba thabo ho kopana le Daniele ka seqo, hammoho le banna le basali ba bang ba tšepahalang ba mehleng ea Bibele. Joale ho tla ba le ba bang ba se nang palo ba tla tsoha bafung, ba hloka ho rutoa e le hore ba tsebe Jehova Molimo le ho mo rata. Ipone u hlokometse lehae la rōna la lefatše ’me u thusa ho le fetola paradeise e nang le lintho tsa mefuta-futa tse se nang palo le e tletseng botle bo sa feleng. Nahana u rutoa ke Jehova, u ithuta ho phela ka tsela eo a neng a rerile hore moloko oa batho o phele ka eona. (Esaia 11:9; Johanne 6:45) E, u na le sebaka seo e leng sa hao Paradeiseng. Le hoja kajeno ho ba bang Paradeise e ka utloahala e le ntho e sa tloaelehang, hopola hore tšimolohong Jehova o ne a lokiselitse hore moloko oa batho o phele sebakeng se joalo. (Genese 2:7-9) Ka kutloisiso eo, Paradeise ke lehae la tlhaho la baahi ba likete tsa limilione ba lefatše. Ke ha habo bona. Ho fihla ho eona ho tla tšoana le ho ea hae.

26. Jehova o bontša joang hore oa hlokomela hore ho emela bofelo ba tsamaiso ee ha ho bonolo ho rōna?

²⁶ Na lipelo tsa rōna ha li khaphatsehe kananelo ha re nahana ka see sohle? Na uena ka bouena ha u labalabele ho ba teng moo? Ka hona, ha ho makatse hore ebe Lipaki tsa Jehova li chesehela ho tseba hore na bofelo ba tsamaiso ena ea lintho bo tla tla neng! Ho leta ha ho bonolo. Jehova le eena oa hlokomela hore ha ho bonolo, hobane o re phehella hore ‘re lule re lebeletse’ bofelo ‘esita le haeba bo ka lieha.’ O bolela hore ho ea ka pono ea rōna bo ka ’na ba bonahala bo lieha, hobane hona lengolong lena, re tiisetsoa hore: “Ha [bo] na ho siuoa ke nako.” (Habakuke 2:3; bapisa le Liproverbia 13:12.) E, bofelo bo tla tla hantle ka nako.

27. U lokela ho etsa’ng hore u tle u eme ka pel’a Molimo ka ho sa feleng?

²⁷ U lokela ho etsa’ng ha bofelo bo atamela? Joaloka moprofeta oa Jehova ea ratoang Daniele, mamella ka botšepehi. Khothalla ho ithuta Lentsoe la Molimo. Rapela ka cheseho. Kopanela ka lerato le balumeli-’moho le uena. Ruta ba bang ’nete ka mafolofolo. Ha bofelo ba tsamaiso ena e khopo ea lintho bo ntse bo atamela letsatsi le leng le le leng, lula u ikemiselitse ho ba mohlanka ea tšepahalang oa Ea Holimo-limo le ’muelli ea matla oa Lentsoe la hae. Ela hloko boprofeta ba Daniele ka mekhoa eohle! E se eka ’Musi Morena Jehova a ka u fa tokelo ea ho ema ka pel’a hae ka thabo ka ho sa feleng!

[Mongolo o botlaaseng ba leqephe]

KE ENG SEO U SE LEMOHILENG?

• Ke eng se ileng sa thusa Daniele hore a mamelle ho isa bofelong?

• Ke hobane’ng ha Daniele a sa ka a tšosoa ke tebello ea ho shoa?

• Tšepiso ea lengeloi ea hore Daniele ‘o tla ema bakeng sa kabelo ea hae’ e tla phethahala joang?

• U ruile molemo joang ka ho ela hloko boprofeta ba Daniele?

[Setšoantšo se tletseng leqephe la 307]

[Setšoantšo se leqepheng la 318]

Na u ela lentsoe la Molimo la boprofeta hloko joaloka Daniele?