Ho Lihuoa Kahlolo Khohlong ea Kahlolo
“A ho tle lichaba khohlong ea Josafate; hobane teng ke tla lula ho ahlola lichaba tsohle.”—JOELE 3:12.
1. Ke hobane’ng ha Joele a bona matšoele a bokaneng “khohlong ea kahlolo”?
“MATŠOELE, matšoele a teng . . . khohlong ea kahlolo”! Re bala mantsoe ao a susumetsang ho Joele 3:14. Matšoele ana a bokanetse’ng? Joele oa araba: ‘Letsatsi la Jehova le haufi.’ Ke letsatsi le leholo la ho tlosa qoso ho Jehova—letsatsi la ho ahlola matšoele a ileng a hana ’Muso oa Molimo o hlonngoeng tlas’a Kreste Jesu. Qetellong, “mangeloi a mane” a Tšenolo khaolo ea 7 a lokela ho lokolla “meea e mene ea lefatše” eo a e tšoereng ka tieo, e leng ho fellang ka “matšoenyeho a maholo ao a kang ’ona a e-s’o be teng ho tloha tšimolohong ea lefatše ho fihlela joale, che, leha e le hore a tla ba teng hape.”—Tšenolo 7:1; Matheu 24:21.
2. (a) Ke hobane’ng ha e le ka nepo sebaka sa ho liha kahlolo ea Jehova se bitsoang ‘khohlo ea Josafate’? (b) Josafate o ile a nka khato ka nepo joang ha a hlaseloa?
2 Ho Joele 3:12, sebaka seo kahlolo ena e tla etsetsoa ho sona se bitsoa ‘khohlo ea Josafate.’ Ka ho loketseng, nakong ea moferefere historing ea Juda, Jehova o ile a liha kahlolo sebakeng seo molemong oa Morena Josafate ea molemo, eo lebitso la hae le bolelang “Jehova ke Moahloli.” Ho nahana ka se ileng sa etsahala nakong eo ho tla re thusa ho utloisisa hamolemo se leng haufi le ho etsahala mehleng ea rōna. Tlaleho ena e fumanoa ho 2 Likronike khaolo ea 20. Temaneng ea 1 ea khaolo eo, re bala ka hore “bana ba Moabe le bana ba Ammone ba e-na le ba-Maone ba bang, ba futuhela Josafate.” Josafate o ile a itšoara joang? O ile a etsa seo bahlanka ba Jehova ba tšepahalang ba atisang ho se etsa ha ba le maqakabetsing. O ile a retelehela ho Jehova bakeng sa tataiso, a rapela ka tieo: “Oho, Molimo oa rōna, na u ke ke ua ba ahlola na? Hobane ha ho matla ka ho rōna a ho loana le sera seno se seholohali se re futuhelang; hape ha re tsebe hore na e ka khona re etse’ng? empa mahlo a rōna a talimile uena.”—2 Likronike 20:12.
Jehova o Araba Thapelo
3. Jehova o ile a fa Juda litaelo life ha e talimane le tlhaselo ea lichaba tsa boahelani?
3 Ha ‘Bajuda bohle ba eme joalo pel’a Jehova, hammoho le bana ba bona ba banyenyane, le basali ba bona le bara ba bona,’ Jehova o ile a arabela. (2 Likronike 20:13) Feela joalokaha a sebelisa “lekhoba le tšepahalang le le masene” la hae kajeno, ka ho tšoanang Moutloi e moholo oa thapelo o ile a matlafatsa moprofeta oa Molevi Jahaziele hore a fane ka karabo ea Hae ho ba bokaneng. (Matheu 24:45) Rea bala: “Ho itsoe ke Jehova: Se tšabeng, ’me le se ke la tepeletsoa ke sera se seholohali seno, hobane ntoa hase ea lōna, ke ea Molimo. . . . Le ke ke la tšoanela ho loana ntoeng ena; le mpe le hlahe, ’me le ikemele hona teng, le tle le bone poloko ea Jehova ea nang le lōna. . . . Se tšabeng, le se ke la tepella. Hosasane, le tsoele ho bona, hobane Jehova o tla ba le lōna.”—2 Likronike 20:15-17.
4. Ke ka tsela efe Jehova a ileng a batla hore batho ba hae ba be mafolofolo, e se be ba sa etseng letho, ha ba talimane le phephetso ea sera?
4 Jehova o ne a hloka ho hongata ho Morena Josafate le batho ba hae ho feta hore ba lule ba sa etse letho, ba emetse topollo ea mohlolo. Ba ne ba lokela ho nka bohato ba pele ba ho sebetsana ka katleho le phephetso ea sera. Morena hammoho le ‘Bajuda bohle, hammoho le bana ba bona ba banyenyane, le basali ba bona le bara ba bona,’ ba ile ba bontša tumelo e matla ha ka botšepehi ba tsoha e sa le hoseng ’me ba macha ho khahlanyetsa mabotho a hlaselang. Ha ba le tseleng, morena o ile a tsoela pele ho fana ka taeo ea puso ea Molimo le khothatso, a ba phehella: “Behang tumelo ho Jehova Molimo oa lōna le tle le ipake le le ba tšoarellang. Behang tumelo ho baprofeta ba hae, le tle le ipake le le ba atlehang.” (2 Likronike 20:20, NW) Ho ba le tumelo ho Jehova! Ho ba le tumelo ho baprofeta ba hae! Ke moo senotlolo sa katleho se neng se le teng. Ka ho tšoanang kajeno, ha re tsoela pele ho ba mafolofolo tšebeletsong ea Jehova, e se eka le ka mohla re ke ke ra belaella hore o tla etsa hore tumelo ea rōna e hlōle!
5. Kajeno Lipaki tsa Jehova li mafolofolo joang ha li ntse li rorisa Jehova?
5 Joaloka Bajudea ba mehleng ea Josafate, re lokela ho ‘boka Jehova, hobane mohau oa hae o hlola ka ho sa feleng.’ Re mo boka joang? Ka hore re bolele ’Muso ka cheseho! Joalokaha Bajudea bao ba ile ba “qala ho etsa lipina le lithoko,” ka tsela e tšoanang re kenyelletsa mesebetsi tumelong ea rōna. (2 Likronike 20:21, 22) E, a re bontšeng tumelo ea sebele ha Jehova a ntse a lokisetsa ho nka khato khahlanong le lira tsa hae! Le hoja tsela e ka bonahala e le telele, a re ikemisetseng ho mamella, re be mafolofolo tumelong joalokaha batho ba hae ba hlōlang ba etsa libakeng tse nang le mathata lefatšeng kajeno. Linaheng tse ling tse hlasetsoeng ke mahloriso, pefo, tlala le maemo a mabe haholo a moruo, bahlanka ba Molimo ba tšepahalang ba latsoa liphello tse tsotehang, joalokaha Buka ea Selemo ea Lipaki Tsa Jehova ea 1998 e tlaleha.
Jehova o Pholosa Batho ba Hae
6. Tumelo e matla e re thusa ho lula re tšepahala joang kajeno?
6 Lichaba tse sa tšabeng Molimo tse potolohileng Juda li ile tsa leka ho felisa batho ba Molimo, empa ka tumelo e ikhethang bahlanka ba Jehova ba ile ba arabela ka ho bina lithoriso tsa hae. Re ka bontša tumelo e joalo kajeno. Ka ho tlatsa bophelo ba rōna ka mesebetsi e rorisang Jehova, re matlafatsa lihlomo tsa rōna tsa moea, re sa siele maqiti a bolotsana a Satane sebaka sa hore a kenelle. (Baefese 6:11) Tumelo e matla e tla thibela teko ea ho khelosoa ke boithabiso bo silafetseng, lerato la lintho tse bonahalang le ho se tsotelle tse khethollang lefatše lena le shoang le re potolohileng. Tumelo ena e sa hlōloeng e tla re thusa ho tsoela pele ho sebeletsa ka botšepehi hammoho le “lekhoba le tšepahalang le le masene” ha re ntse re ōtloa ke lijo tsa moea tse fanoang “ka nako e tšoanetseng.”—Matheu 24:45.
7. Lipaki tsa Jehova li ile tsa itšoara joang litlhaselong tse sa tšoaneng khahlanong le tsona?
7 Tumelo ea rōna e thehiloeng Bibeleng e tla re matlafaletsa ho ema re tiile khahlanong le matšolo a lehloeo a hlohlelelitsoeng ke ba bonahatsang moea oa ‘lekhoba le lebe’ la Matheu 24:48-51. Bakeng sa ho phethahatsa boprofeta bona ka tsela e tsotehang, ka mokhoa o mafolofolo bakoenehi ba jala mashano le liphatlalatso tse mpe linaheng tse ngata kajeno, esita le ho sebelisana le ba bang ba boholong har’a lichaba. Moo ho loketseng, Lipaki tsa Jehova li arabetse joalokaha ho hlalositsoe ho Bafilippi 1:7, ka ho ‘sireletsa le ho theha ka molao litaba tse molemo.’ Ka mohlala, ka la 26 September, 1996, nyeoeng ea Greece, baahloli ba robong ba Lekhotla la Europe la Litokelo tsa Botho le Strasbourg, ka ntsoe-leng ba ile ba tiisa hore “Lipaki tsa Jehova li oela tlhalosong ea ‘bolumeli bo tsebahalang,’” bo nang le tokelo ea ho thabela bolokolohi ba ho nahana, ba letsoalo, le ba tumelo, hammoho le tokelo ea ho tsebahatsa tumelo ea tsona. Bakeng sa bakoenehi, kahlolo ea Molimo e re: “Polelo ea maele a ’nete e ba etsahaletse: ‘Ntja e khutletse mahlatseng a eona, le kolobe e tšehali e ileng ea hlatsuoa e khutletse ho ipitikeng seretseng.’”—2 Petrose 2:22.
8. Mehleng ea Josafate, Jehova o ile a liha kahlolo joang khahlanong le lira tsa batho ba Hae?
8 Khale mehleng ea Josafate, Jehova o ile a liha kahlolo khahlanong le ba neng ba batla ho ntša batho ba Hae kotsi. Rea bala: “Jehova a bea balalli ba ho loantša bana ba Ammone le ba-Moabe le ba thaba ea Seire ba futuhetseng ba Juda; ’me ba hlōloa. Bana ba Ammone le ba-Moabe ba loantša ba ahileng thabeng ea Seire ho ba neela anathema le ho ba timetsa; ’me eitse hobane ba qetele ho timetsa baahi ba Seire, ba tlatsana ho timetsana ba ’notši.” (2 Likronike 20:22, 23) Bajudea ba ile ba bitsa sebaka seo Khohlo ea Beraka, Beraka e bolelang “Tlhohonolofatso.” Le mehleng ea kajeno, ha Jehova a lihella lira tsa hae kahlolo, ho tla fella ka litlhohonolofatso tse khōlō ho batho ba hae.
9, 10. Ke bo-mang ba iponahalitseng ba tšoaneloa ke kahlolo ea Jehova e bohloko?
9 Re ka ’na ra botsa, Ke bo-mang mehleng ea kajeno ba lokelang ho amohela kahlolo e bohloko e tsoang ho Jehova? Ho fumana karabo ea potso eo, re tlameha ho khutlela boprofeteng ba Joele. Joele 3:3 e bua ka lira tsa batho ba habo tse neng li tla ‘ntša moshanyana ho ba moputso oa seotsoa, le ngoanana ho reka veine ka eena.’ E, ba talima bahlanka ba Molimo e le ba tlaase haholo, bana ba bona e le bao theko ea bona e sa feteng ea ho hira letekatse kapa ea ho reka jeke ea veine. Ba tla tlameha ho ikarabella bakeng sa seo.
10 Ba tšoaneloang ke kahlolo ka ho tšoanang ke ba etsang bootsoa ba moea. (Tšenolo 17:3-6) Ba molato ka ho khethehileng ke ba susumelletsang babusi ba lipolotiki hore ba hlorise Lipaki tsa Jehova le ho thibela mosebetsi oa tsona, joalokaha baeta-pele ba bang ba bolumeli ba bakang meferefere ba ’nile ba etsa Europe e ka Bochabela morao tjena. Jehova o bontša boikemisetso ba hae ba ho nka khato khahlanong le basebetsi ba joalo ba bobe.—Joele 3:4-8.
“Halaletsang Ntoa!”
11. Jehova o phephetsa lira tsa hae joang hore li loane?
11 Se latelang ke hore Jehova o biletsa batho ba hae ho phatlalatsa phephetso har’a lichaba: “Halaletsang ntoa! Susumetsang banna ba linatla! A ba atamele! A ba tle, banna bohle ba ntoa!” (Joele 3:9, NW) Ena ke phatlalatso ea mofuta o sa tloaelehang oa ntoa—ntoa ea ho loka. Lipaki tsa Jehova tse tšepahalang li tšepile lihlomo tsa moea ha li arabela liphatlalatsong tse mpe tsa leshano, li loantša leshano ka ’nete. (2 Bakorinthe 10:4; Baefese 6:17) Kapele, Molimo o tla halaletsa ‘ntoa ea letsatsi le leholo la Molimo ea Matla ’Ohle.’ (Tšenolo 16:14) E tla timetsa bahanyetsi bohle ba bobusi ba Molimo lefatšeng. Batho ba hae ba lefatšeng ba ke ke ba kopanela ho eona. Ka tsela ea sebele le ea tšoantšetso, ba ‘teile liphehla tsa bona tsa ntoa mehoma, le marumo a bona ba a teile lisekele.’ (Esaia 2:4) Ka ho fapaneng, Jehova o phephetsa lichaba tse hanyetsang hore li etse se fapaneng: “Ka mehoma ea lōna le tee lisabole, ka lisekele tsa lōna le tee marumo!” (Joele 3:10) O li mema hore li sebelise libetsa tsohle tsa tsona ntoeng. Empa li ke ke tsa atleha, hobane ntoa hammoho le tlhōlo ke tsa Jehova!
12, 13. (a) Ho sa tsotellehe ho fela ha Ntoa ea Mantsoe, lichaba tse ngata li bontšitse joang hore li ntse li rata ntoa? (b) Ke’ng eo lichaba li sa itokisetsang eona?
12 Mathoasong a bo-1990, lichaba li ile tsa phatlalatsa hore Ntoa ea Mantsoe e letse. Ka lebaka leo, na pakane e ka sehloohong ea Machaba a Kopaneng ea khotso le tšireletseho e finyeletsoe? Le hanyenyane! Liketsahalo tsa Burundi, Democratic Republic of Congo, Iraq, Liberia, Rwanda, Somalia le moo pele e neng e le Yugoslavia li re bolella’ng? Ka mantsoe a Jeremia 6:14, ba re: “Khotso! khotso! kanthe ha ho khotso.”
13 Le hoja ntoa e feletseng e khaolitse libakeng tse ling, lichaba tseo e leng litho tsa Machaba a Kopaneng li sa ntse li phehisana ka ho etsa libetsa tsa ntoa tse rarahaneng. Tse ling li tsoela pele ho boloka liqubu tsa libetsa tsa nyutlelie. Tse ling li qapa libetsa tsa lik’hemik’hale kapa tsa baktheria tse timetsang batho ba bangata. Ha lichaba tseo li bokana sebakeng sa tšoantšetso se bitsoang Armagedone, oa li phephetsa: “Ea fokolang a ke a re: ’Na ke senatla! Itlhahaneleng, le tle, lōna lichaba tsohle tse ka mathōko, le phuthehe!” Joale Joele o kenella ka boipiletso ba hae: “Uena Jehova, theolela linatla tsa hao teng!” (Mongolo o tšekaletseng ke oa rōna.)—Joele 3:10, 11.
Jehova o Sireletsa ba Hae
14. Linatla tsa Jehova ke bo-mang?
14 Linatla tsa Jehova ke bo-mang? Ka makhetlo a ka bang 280 ka Bibeleng, Molimo oa ’nete o bitsoa “Jehova oa makhotla.” (2 Marena 3:14) Makhotla ana ke mabotho a mangeloi a leholimo ao e leng malala-a-laotsoe bakeng sa ho etsa seo Jehova a se laelang. Ha Basyria ba ne ba batla ho tšoara Elisha, qetellong Jehova o ile a tutubolla mahlo a mohlanka oa Elisha e le hore a bone lebaka leo ka lona ba neng ba ke ke ba atleha: “Bona! sebaka se lithaba se ne se tletse lipere le likoloi tsa ntoa tsa mollo hohle ho potoloha Elisha.” (2 Marena 6:17) Jesu o ile a bolela hore o ne a ka ipiletsa ho Ntate oa hae bakeng sa “lilegione tse fetang leshome le metso e ’meli tsa mangeloi.” (Matheu 26:53) Ha e hlalosa ho palama ha Jesu bakeng sa ho ea liha kahlolo ka Armagedone, Tšenolo e re: “Mabotho a ntoa a neng a le leholimong a ne a mo latela ka lipere tse tšoeu, ’me a ne a apere line ea boleng bo botle, e tšoeu, e hloekileng. ’Me molomong oa hae ho tsoa sabole e telele e bohale, e le hore a ka hlatha lichaba ka eona, ’me o tla li lisa ka molamu oa tšepe. Hape o hatakela sehatelo sa veine sa bohale ba khalefo ea Molimo ea Matla ’Ohle.” (Tšenolo 19:14, 15) Sehatelo seo sa tšoantšetso sa veine se hlalosoa ka ho hlakileng e le ‘sehatelo sa veine se seholo sa bohale ba Molimo.’—Tšenolo 14:17-20.
15. Joele o hlalosa ntoa ea Jehova joang khahlanong le lichaba?
15 Joale, ke joang Jehova a arabelang kōpo ea Joele ea ho bolaea linatla tsa Molimo? Ke ka mantsoe ana a hlakileng: “A ho tsohe, a ho tle lichaba khohlong ea Josafate; hobane teng ke tla lula ho ahlola lichaba tsohle tse ka mathoko! Akhelang sekele, hobane mabele a butsoitse. Tloong, le hate, hobane sehatelo se tletse, linkho li bile lia khaphatseha; hobane bolotsana ba bona bo boholo. Matšoele, matšoele a teng a lehlana-hlana khohlong ea kahlolo! hobane le haufi letsatsi la Jehova, le tla ba teng khohlong ea kahlolo. Letsatsi le khoeli lia fifala, le linaleli li honyetsa phatsimo ea tsona. Jehova o tla rora Sione, a utloahatse lentsoe la hae a le Jerusalema, ho be ho thothomele leholimo le lefatše.”—Joele 3:12-16.
16. Ke bo-mang ba tla akarelletsoa har’a bao Jehova a lihang kahlolo khahlanong le bona?
16 Feela joalokaha lebitso Josafate le bolela “Jehova ke Moahloli,” ka sebele Molimo, Jehova, o tla tlosa bobusi ba hae qoso ha a liha kahlolo. Boprofeta bona bo hlalosa ba amohelang kahlolo e bohloko e le ‘matšoele, matšoele khohlong ea kahlolo.’ Masala leha e le afe a babuelli ba bolumeli ba bohata a tla ba har’a matšoele ao. Hape ho tla akarelletsoa ba hlalositsoeng ho Pesaleme ea bobeli—lichaba, batho, marena a lefatše, le mahosana—ba ratileng tsamaiso ea lefatše lena e senyehileng ho feta ho ‘sebeletsa Jehova ka tšabo.’ Bana ba hana ho ‘aka mora.’ (Pesaleme ea 2:1, 2, 11, 12) Ha ba amohele Jesu e le Morena ea busang le Jehova. Ho feta moo, matšoele a tšoaetsoeng timetso a tla akarelletsa batho bohle bao Morena eo ea khanyang a tla ahlola hore ke “lipōli.” (Matheu 25:33, 41) Ha nako ea Jehova e loketseng e fihlile ea ho rora a le Jerusalema ea leholimo, Morena oa hae oa marena ea khethiloeng o tla kalla ho ea liha kahlolo eo. Ka sebele leholimo le lefatše li tla thothomela! Leha ho le joalo, rea tiisetsoa: ‘Jehova e tla ba setšabelo ho sechaba sa hae, le qhobosheane ho bara ba Iseraele.’—Joele 3:16.
17, 18. Ke bo-mang ba tsebahatsoang e le baphonyohi ba matšoenyeho a maholo, ’me ba tla thabela maemo afe?
17 Tšenolo 7:9-17 e khetholla ba pholohang matšoenyeho a maholo e le “bongata bo boholo” bo entsoeng ka ba sebelisang tumelo matleng a rekollang a mali a Jesu. Bana ba sireletsoa letsatsing la Jehova, ha matšoele a subuhlellanang a boprofeta ba Joele a ahloloa habohloko. Joele o re ho baphonyohi: “’Me le tla tseba hobane ke ’na Jehova ke leng Molimo oa lōna, ’na ke lutseng Sione, thabeng ea ka e khethehileng,” sebaka sa bolulo sa Jehova sa leholimo.—Joele 3:17a.
18 Joale boprofeta bona bo re bolella hore sebaka se busoang ke ’Muso oa Molimo oa leholimo “e tla ba nģalo e khethehileng, balichaba ha ba sa tla feta ho eona.” (Joele 3:17b) Sebakeng sa leholimo le sa lefatšeng sa ’Muso oo oa leholimo, ho ke ke ha e-ba le balichaba, hobane bohle ba tla be ba kopane borapeling bo hloekileng.
19. Joele o hlalosa thabo ea paradeise ea batho ba Molimo kajeno joang?
19 Esita le kajeno, ho na le khotso e khōlō har’a batho ba Jehova mona lefatšeng. Ba kopane, ba bolela likahlolo tsa hae linaheng tse fetang 230 le ka lipuo tse fapaneng tse fetang 300. Joele o profetile katleho ea bona ka bokhabane: “Mohlang oo, lithaba li tla kolla veine e ncha, marallana a phalle lebese, melapo eohle ea Juda e tla ’ne e be le metsi a mathang.” (Joele 3:18) E, ho barorisi ba hae ba mona lefatšeng Jehova o tla tsoela pele ho tšollela ka bongata litlhohonolofatso tse nyakallisang le katleho, le ’nete ea bohlokoa e phallang ka ho eketsehileng. Bobusi ba Jehova bo tla be bo tlositsoe qoso ka ho feletseng khohlong ea kahlolo ’me ho tla ba le thabo e khōlō ha a lula ka ho sa feleng har’a batho ba hae ba lopolotsoeng.—Tšenolo 21:3, 4.
Na U ka Hopola?
◻ Jehova o ile a pholosa batho ba hae joang mehleng ea Josafate?
◻ Jehova o ahlola bo-mang e le ba loketseng ho timeletsoa “khohlong ea kahlolo”?
◻ Linatla tsa Molimo ke bo-mang ’me li phetha karolo efe ntoeng ea ho qetela?
◻ Barapeli ba tšepahalang ba latsoa thabo efe?
[Setšoantšo se leqepheng la 21]
Juda e ile ea bolelloa: ‘Le se ke la tepella hobane ntoa hase ea lōna, ke ea Molimo’
[Setšoantšo se leqepheng la 23]
Jehova o phephetsa lira tsa hae hore li ‘tee lisabole ka mehoma ea tsona’
[Setšoantšo se leqepheng la 24]
Bibele e tsebahatsa bongata bo boholo ba baphonyohi ba matšoenyeho a maholo