Ho Matlafatsa Tšepo ea Rōna ho Lokeng ha Molimo

“Kajeno ke u rutile, uena ka sebele, hore u bee tšepo ea hao ho Jehova.”—LIPROVERBIA 22:19.

1, 2. (a) Ke hobane’ng ha Lipaki tsa Jehova li tšepa Jehova? (Liproverbia 22:19) (b) Ke’ng se bontšang hore ho hlokahala hore batho ba bang ba matlafatse tšepo ea bona ho Jehova?

BAKRESTE ba ’nete ba hlohonolofalitsoe ka tsebo e nepahetseng ea Jehova le merero ea hae. “Lekhoba le tšepahalang le le masene” ka lerato le ba fa “lijo [tsa moea] ka nako e tšoanetseng.” (Matheu 24:45) Tsebo eo ba e fumanang e ba fa motheo o tiileng oo ho oona ba ka thehang tšepo ea bona ho Molimo. Kahoo, e le sehlopha, Lipaki tsa Jehova li bontša tšepo e tsotehang ho Jehova le ho lokeng ha hae.

² Leha ho le joalo, ho bonahala hore ho ka ’na ha hlokahala hore Lipaki tse ling li matlafatse tšepo e joalo e le batho ka bomong. Ka linako tse ling Mokhatlo o amohela mangolo a bontšang ho se kholisehe ka litlhaloso tse fanoang libukeng tsa oona. E ka ’na eaba lipelaelo tsena li hlaha ka lebaka la phetoho kutloisisong, kapa e ka ’na eaba li amana le litaba tse amang motho ea botsang, haholo-holo ka tsela e amang maikutlo.—Bapisa le Johanne 6:60, 61.

3. Ke eng se ka etsahalang esita le ho bahlanka ba Jehova ba tšepahalang, hona hobane’ng?

³ Esita le bahlanka ba ’nete ba Jehova ba latsoa bonnete ba Moeklesia 9:11 (NW): “Ke ile ka boela ka bona tlas’a letsatsi hore ba lebelo ha ba hlōle peisong, leha e le hore ba matla baa hlōla ntoeng, kapa hore ba bohlale le bona ba na le lijo, leha e le hore ba nang le kutloisiso le bona ba na le maruo, kapa hore esita le ba nang le tsebo ba fumana kamohelo; hobane bohle ba hlaheloa ke nako le ketsahalo e sa lebelloang.” See se ka ’na sa ipaka e le ’nete joang ka kutloisiso e batsi, kapa ea moea? Ho ka etsahala hore ebe re tsebile Bakreste ba neng ba potlakela ho sebelisa keletso ea Bibele, ba matla ho sireletseng ’nete, ba bohlale ho sebeliseng melao-motheo ea Bibele le ba chesehelang ho phehella tsebo e nepahetseng. Leha ho le joalo, ka lebaka la “nako le ketsahalo e sa lebelloang,” hona joale ba bang ba ka ’na ba ipona ba sa khone ho etsa ho hongata ka lebaka la kotsi e itseng kapa botsofali. Ba ka ’na ba ipotsa hore na ba tla kena lefatšeng le lecha la Molimo ba sa ka ba shoa.

4, 5. Ke hobane’ng ha Bakreste ba se na lebaka leha e le lefe la ho felloa ke tšepo ho lokeng ha Jehova?

⁴ Ha Mokreste a lahleheloa ke molekane oa hae oa lenyalo, bohloko le boikutlo ba tahlehelo li ba matla. E ka ’na eaba ba sebelelitse Jehova hammoho e le balekane ka lilemo tse ngata kapa esita le ka mashome a lilemo. Molekane ea ntseng a phela oa tseba hore lefu le khaola tlamo ea lenyalo.a (1 Bakorinthe 7:39) Joale, hore tšepo ea hae e se ke ea fokola, o lokela ho laola maikutlo a hae.—Bapisa le Mareka 16:8.

⁵ Ho bohlale hakaakang ho talima lefu la molekane, motsoali, ngoana kapa motsoalle oa Mokreste ea haufi e le monyetla oa ho bontša tšepo ho lokeng ha Jehova! Esita le tabeng ea tahlehelo ea botho, re ka kholiseha hore Jehova hase ea sa lokang. Re ka ba le tšepo ea hore e mong le e mong ea fumanang bophelo bo sa feleng—ebang ke ka ho pholoha kapa ka tsoho—o tla thaba. Mopesaleme o re ka Molimo: “U fuparolla seatla sa hao, u kholisa tse utloang kaofela. Jehova o lokile litseleng tsa hae tsohle, o mohau liketsong tsa hae tsohle. Jehova o haufi le bohle ba mo rapelang, le bohle ba mo rapelang ka ’nete. O fa ba mo tšabang ho ratoang ke bona, o utloa mehoo ea bona, ’me oa ba lopolla.”—Pesaleme ea 145:16-19.

Boikutlo ba Hore Re Utloile Bohloko ho sa Hlokahale

6, 7. (a) Ke hobane’ng ha Lipaki tse ling tse ileng tsa utloa bohloko nakong e fetileng hona joale li e-na le kutloisiso e fapaneng? (b) Ke hobane’ng ha re sa lokela ho talima Jehova e le ea sa lokang ka hore ebe o ile a lumella ho utloa bohloko ho joalo nakong e fetileng?

⁶ Nakong e fetileng, Lipaki tse ling li ’nile tsa utloa bohloko ka lebaka la ho hana ho kopanela mosebetsing oo e ka ’nang eaba hona joale matsoalo a bona a ba lumella ho o etsa. Ka mohlala, e ka ’na eaba ba ka be ba ile ba khetha ho etsa sena mabapi le mefuta e itseng ea tšebeletso ea sechaba nakong e telele e fetileng. Hona joale mor’abo rōna a ka ’na a ikutloa hore a ka etsa mesebetsi e joalo ka letsoalo le letle a sa tlōle meeli ea ho se jele paate ha hae ha Bokreste mabapi le tsamaiso ea lintho ea hona joale.

⁷ Na e ne e le ho sa lokang ka lehlakoreng la Jehova hore ebe o ile a lumella hore a utloe bohloko ka lebaka la ho hana seo hona joale a ka ’nang a se etsa ntle ho liphello tse itseng? Ba bangata ba bileng le phihlelo eo ba ne ba ke ke ba nahana joalo. Ho e-na le hoo, ba thabetse hore ebe ba bile le monyetla oa ho bontša phatlalatsa le ka ho hlaka hore ba ne ba ikemiselitse ho tiea mabapi le tseko ea bobusi ba bokahohleng. (Bapisa le Jobo 27:5.) Ke lebaka lefe leo motho leha e le ofe a neng a ka ba le lona la ho ikoahlaela hore ebe o latetse letsoalo la hae bakeng sa ho emela Jehova ka tieo? Ka ho khomarela melao-motheo ea Bokreste ka botšepehi kamoo ba neng ba e utloisisa kateng kapa ka ho arabela tšusumetsong ea matsoalo a bona, ba ile ba ipaka ba tšoaneleha ho fumana botsoalle ba Jehova. Ka sebele, ke ho bohlale ho qoba tsela e neng e tla tšoenya letsoalo la motho kapa eo ho neng ho ka etsahala hore e khopise ba bang. Tabeng ena re ka nahana ka mohlala oo moapostola Pauluse a o behileng.—1 Bakorinthe 8:12, 13; 10:31-33.

8. Ke hobane’ng ha Bakreste ba Bajuda, bao pele ba neng ba khomarela Molao, ba ne ba se na lebaka la ho belaella ho loka ha Jehova?

⁸ E le hore Bajuda ba ka khahlisa Jehova, ho ne ho hlokahala hore ba mamele Melao e Leshome le melao e meng e sa tšoaneng e ka bang 600. Hamorao, tlas’a tokisetso ea Bokreste, ho mamela melao ena ka bohona ho ne ho se ho sa hlokahale bakeng sa ho sebeletsa Jehova, esita le bakeng sa Bajuda ba nama. Melao e neng e se e sa tlame e ne e akarelletsa e amanang le lebollo, ho boloka Sabatha, ho nyehela mahlabelo a liphoofolo le ho boloka lithibelo tse itseng tsa lijo. (1 Bakorinthe 7:19; 10:25; Bakolose 2:16, 17; Baheberu 10:1, 11-14) Bajuda—ho akarelletsa le baapostola—ba ileng ba fetoha Bakreste ba ile ba lokolloa tlamong ea ho boloka melao eo ho neng ho hlokahala hore ba e mamele ha ba ne ba le tlas’a selekane sa Molao. Na ba ile ba belaela ka hore tokisetso ea Molimo e ne e le e sa lokang ha pele a ne a batla hore ba etse lintho tse neng li se li sa hlokahale? Che, ba ile ba thabela kutloisiso e atolohileng ea merero ea Jehova.—Liketso 16:4, 5.

9. Ho etsahetse’ng ka Lipaki tse ling, empa ke hobane’ng ha li se na lebaka la ho ikoahlaea?

⁹ Mehleng ea kajeno, ho bile le Lipaki tse ling tse neng li tiile haholo ponong ea tsona mabapi le seo li neng li ka se etsa le seo li neng li ke ke tsa se etsa. Ka lebaka leo li ile tsa utloa bohloko ho feta tse ling. Hamorao, tsebo e eketsehileng e ile ea li thusa ho atolosa pono ea tsona ea litaba. Empa ha li na lebaka la ho ikoahlaela hore ebe pele li ile tsa sebetsa tumellanong le matsoalo a tsona, esita le hoja e ka ’na eaba sena se ile sa li tlisetsa mahlomola a eketsehileng. Ka sebele hoa babatseha hore ebe li ile tsa bontša boikemisetso ba tsona ba ho utloa bohloko ka ho tšepahala ho Jehova, bakeng sa ho “etsa lintho tsohle ka lebaka la litaba tse molemo.” Jehova o hlohonolofatsa mofuta o joalo oa boinehelo ba bomolimo. (1 Bakorinthe 9:23; Baheberu 6:10) Moapostola Petrose o ile a ngola ka temohisiso: “Haeba, ha le etsa se molemo ’me le utloa bohloko, le ho mamella, ena ke ntho e lumellehang ho Molimo.”—1 Petrose 2:20.

Ho Ithuta ho Jonase

10, 11. Jonase o ile a bontša joang hore ha a tšepe Jehova (a) ha a ne a fuoa kabelo ea ho ea Ninive? (b) ha Molimo a sa timetse Baninive?

¹⁰ Ha Jonase a ne a laeloa hore a ee Ninive, o ile a bontša ho hloka kananelo bakeng sa tšepo eo Jehova a neng a e-na le eona ho eena. Ka mor’a phihlelo e tšosang e tlisitsoeng ke hore a be leqe ho mamela, Jonase o ile a hlaphoheloa, a hlokomela phoso ea hae, a amohela kabelo ea hae naheng esele, ’me a lemosa Baninive ka timetso e atamelang. Eaba ho etsahala se neng se sa lebelloa: Ka lebaka la boikutlo ba ho baka ba Baninive, Jehova o ile a rera ho se ba timetse.—Jonase 1:1–3:10.

¹¹ Jonase o ile a itšoara joang? A hlabehile, o ile a belaela ho Molimo thapelong. Moko-taba oa pelaelo ea hae e ne e le ona: ‘Ke ne ke nahana hore lintho li ne li tla tsamaea ka tsela ena. Ke ka lebaka leo ke neng ke sa batle ho tla Ninive ho tloha qalong. Joale, ka mor’a sohle seo ke fetileng ho sona, ho akarelletsa tšabo le tlotlollo ea ho metsoa ke tlhapi e khōlō, ’me ka mor’a mosebetsi oa ka o boima oa ho lemosa Baninive ka timetso e atamelang, ho etsahala tjena! Mosebetsi oohle oa ka le mahlomola e bile tsa lefeela! Ho ka be ho le molemo hoja ke shoele!’—Jonase 4:1-3.

12. Re ka ithuta eng phihlelong ea Jonase?

¹² Na Jonase o ne a e-na le lebaka le utloahalang la ho belaela? Na Jehova e ne e le ea sa lokang ha a bontša mosa ho bafosi ba bakileng? Ha e le hantle, Jonase o ne a lokela hore ebe o ile a thaba; batho ba mashome a likete ba ne ba tla bolokoa ba se ke ba timetsoa! (Jonase 4:11) Empa boikutlo ba hae ba ho hloka tlhompho le ba ho belaela bo ile ba bontša hore o ne a sa tšepe ho loka ha Jehova ka ho tebileng. O ne a inahana ho tlōla ’me a sa nahane hakaalo ka batho ba bang. A re ithuteng ho Jonase ka hore re se iketelletse pele rōna ka borōna haesita le maikutlo a rōna. A re kholiseheng hore ho mamela Jehova, ho latela tataiso e fanoeng ka mokhatlo oa hae o hlophisitsoeng le ho amohela liqeto tsa hae, ke hona ho nepahetseng hoo re lokelang ho ho etsa. Re kholisehile hore “lintho li tla tsamaea hantle ho ba tšabang Molimo oa ’nete.”—Moeklesia 8:12, NW.

Joale ke Nako ea ho Matlafatsa Tšepo ea Rōna!

13. Kaofela ha rōna re ka matlafatsa tšepo ea rōna ho Jehova joang?

¹³ Ho matlafatsa tšepo ea rōna ho Jehova ke tsela e bohlale. (Liproverbia 3:5-8) Ho hlakile hore re lokela ho etsa ho fetang feela ho rapela hore Jehova a re thuse hore re kholisehe haholoanyane. Kholiseho e hōla e itšetlehile ka tsebo e nepahetseng, ka hona re lokela ho ba le thuto ea botho ea Bibele, ho bala Bibele le lingoliloeng tse e hlalosang, e le karolo ea kemiso ea rōna ea letsatsi le letsatsi. Ho ba teng kamehla libokeng tsa Bokreste ke habohlokoa, joalokaha ho lokisetsa hantle le ho nka karolo ho isa moo ho khonehang e le habohlokoa. Ho itloaetsa ho abela ba bang linnete tsa Bibele, ho hlōla likhanyetso ka masene, le hona ho tebisa tšepo ea rōna ho Jehova le Lentsoeng la hae. Ka tsela eo re ba le kamano e khōloanyane le eena letsatsi le leng le le leng.

14. Ke hobane’ng ha haufinyane batho ba Molimo ba tla biletsoa ho bontša hore ba tšepa Jehova ho feta leha e le neng pele?

¹⁴ Nakong e tlang e haufi, nako ea matšoenyeho a maholo ka ho fetisisa a kileng a hlasela moloko oa batho e tla fihla ka tšohanyetso. (Matheu 24:21) Ha e fihla, ho tla hlokahala hore bahlanka ba Molimo ba tšepe ho loka ha Jehova le tataiso e fanoang ke mokhatlo oa hae o hlophisitsoeng ho feta leha e le neng pele. Ka tsela ea tšoantšetso, joale ka kholiseho ba tla mamela taelo ea Molimo e reng: ‘E-ea sechaba sa ka, kena kamoreng ea hao, u koale monyako ka mor’a hao! U ipate ho se hokae, ho fihlela khalefo e feta.’ (Esaia 26:20) Ba se ba ntse ba kene tikolohong e sireletsehileng ea liphutheho tse fetang 85 000 linaheng tse 232. Re ka kholiseha hore Jehova o tla re thusa ho etsa eng kapa eng eo e ka ’nang eaba e boetse ea akarelletsoa taelong ena e reng, “kena kamoreng ea hao.”

15. Taba ea tšepo e ile ea hatisoa joang ka 1998, ’me ke hobane’ng ha hoo ho ne ho loketse?

¹⁵ Ho hlokahala hore re matlafatse tšepo ea rōna hona joale. Ntle le ho tšepa barab’abo rōna ba Bakreste, ho tšepa mokhatlo oa Jehova o hlophisitsoeng ’me, ka holim’a tsohle, ho tšepa Jehova ka boeena, re ke ke ra pholoha. Ka hona ke ho loketseng hakaakang hore ebe ka 1998, ka makhetlo-khetlo Lipaki tsa Jehova lefatšeng lohle li ’nile tsa hopotsoa ke mantsoe a temana ea tsona ea selemo hore “e mong le e mong ea ipiletsang lebitsong la Jehova o tla pholoha”! (Baroma 10:13) Re lokela ho tsoela pele re kholisehile ka seo. Haeba re hlokomela esita le pelaelo e nyenyane ka tšepo ena, re lokela ho sebeletsa ho e lokisa hona joale, e, kajeno.

Kahlolo ea Jehova e Tla ba e Lokileng

16. Ho ka etsahala’ng ka tšepo haeba e sa hlaoleloe, ’me ke joang re ka thibelang see hore se se ke sa etsahala?

¹⁶ Ho Baheberu 3:14, Bakreste ba tlotsitsoeng baa lemosoa: “Etsoe ka sebele re fetoha ba nang le kabelo ho Kreste haeba feela re tiisa ho tšoarella ha rōna kholisehong eo re neng re e-na le eona tšimolohong ka tieo ho isa bofelong.” Ha e le hantle, mantsoe ana a boetse a sebetsa ho Bakreste ba nang le tšepo ea lefatšeng. Kholiseho ea pele e ka fela butle-butle haeba e sa hōlisoe. Ke habohlokoa hakaakang hore re tsoele pele ho phehella tsebo e nepahetseng, ka ho etsa joalo re matlafatsa motheo oo tšepo ea rōna e thehiloeng ho oona!

17. Ke hobane’ng ha re ka kholiseha hore mabapi le ho pholoha, Jesu o tla ahlola ka tsela e nepahetseng?

¹⁷ Haufinyane Kreste o tla hlahloba lichaba tsohle e le hore a ka “arola batho e mong ho e mong, feela joalokaha molisa a arola linku ho lipōli.” (Matheu 25:31-33) Re ka kholiseha hore Kreste o tla ahlola ka ho loka hore na ke mang ea tšoanelang ho pholoha. Jehova o mo file bohlale, temohisiso le litšoaneleho tse ling tse hlokahalang bakeng sa ho “ahlola ka ho loka lefatše leo ho ahiloeng ho lona.” (Liketso 17:30, 31) E se eka kholiseho ea rōna e ka tšoana le ea Abrahama, ea ileng a re: “Oho [Jehova]! u se ke ua etsa taba e joalo le hanyenyane, ua bolaea ea lokileng hammoho le ea bolotsana, hore ea lokileng a hlaheloe ke ntho e le ’ngoe le molotsana. Taba eo e be hole le uena! Hleka Moahloli oa lefatše a ke ke a etsa ka ho loka na?”—Genese 18:25.

18. Ke hobane’ng ha re sa lokela ho ameha ho tlōlisa ka seo e ka ’nang eaba ha re se tsebe hona joale?

¹⁸ Re e-na le tšepo e feletseng ho lokeng ha Jehova, ha ho hlokahale hore re khathatsehe ka ho fumana likarabo tsa lipotso tse kang tse reng: ‘Masea le bana ba banyenyane ba tla ahloloa joang? Na ho ka etsahala hore ebe palo e khōlō ea batho e tla be e e-s’o finyelloe ka litaba tse molemo ha Armagedone e fihla? Ho thoe’ng ka ba kulang kelellong? Ho thoe’ng ka . . . ?’ Ke ’nete hore hona joale re ka ’na ra se ke ra tseba hore na Jehova o tla rarolla litaba tsena joang. Leha ho le joalo, o tla li rarolla ka tsela e lokileng le e tletseng mohau. Ha rea lokela ho belaella seo le ka mohla. Ha e le hantle, re ka ’na ra hlolloa le ho thaba ha re mo bona a li rarolla ka tsela eo re neng re e-s’o ka re e nahana le ka mohla.—Bapisa le Jobo 42:3; Pesaleme ea 78:11-16; 136:4-9; Matheu 15:31; Luka 2:47.

19, 20. (a) Ke hobane’ng ha ho botsa lipotso tse utloahalang ho sa fosahala? (b) Jehova o tla fana ka likarabo tse hlokahalang neng?

¹⁹ Mokhatlo o hlophisitsoeng oa Jehova ha o nyatse lipotso tse botsoang ka botšepehi, tse nakong, joalokaha ka phoso bahanyetsi ba bang ba bolela. (1 Petrose 1:10-12) Leha ho le joalo, Bibele e re khothalletsa hore re qobe lipotso tsa booatla, tseo e leng khopolo-taba. (Tite 3:9) Ho botsa lipotso tse utloahalang le ho batlisisa Lentsoeng la Molimo le libukeng tsa Bokreste bakeng sa ho fumana likarabo tsa Mangolo ho ka eketsa tsebo ea rōna e nepahetseng ’me ka tsela eo ho ka matlafatsa tšepo ea rōna ho Jehova. Mokhatlo o hlophisitsoeng o latela mohlala oa Jesu. O ne a qoba ho araba lipotso tseo e neng e e-s’o be nako e loketseng ea ho li araba. O ile a hlalosa: “Ke na le lintho tse ngata tseo ke sa ntseng ke tla li bua ho lōna, empa ha le khone ho li jara hona joale.” (Johanne 16:12) O ile a boela a lumela hore lintho tse ling eena ka boeena o ne a sa li tsebe ka nako eo.—Matheu 24:36.

²⁰ Ho na le ho hongata hoo Jehova a sa ntseng a tla ho senola. Ho bohlale hakaakang ho mo letela, re kholisehile hore o tla senola merero ea hae ka nako e loketseng. Re ka kholiseha hore hang ha nako ea Jehova e loketseng e fihlile, re tla thabela ho fumana temohisiso e eketsehileng litseleng tsa hae. E, re tla putsoa, hafeela re tšepa Jehova ka ho feletseng le mokhatlo o hlophisitsoeng oo a o sebelisang. Liproverbia 14:26 (NW) ea re tiisetsa: “Ho tšabeng Jehova ho na le kholiseho e matla, ’me ho tla ba le setšabelo bakeng sa bara ba hae.”

[Mongolo o botlaaseng ba leqephe]

U Nahana Joang?

◻ Ke hobane’ng ha ho se bohlale ho lumella maikutlo ho fokolisa tšepo ea rōna ho Jehova?

◻ Re ka ithuta eng phihlelong ea Jonase?

◻ Ke hobane’ng ha ho ithuta Bibele le ho ba teng libokeng e le habohlokoa hakaale?

[Setšoantšo se leqepheng la 16]

Esita le tabeng ea tahlehelo ea botho, re ka kholiseha hore Jehova o lokile

[Setšoantšo se leqepheng la 18]

Na u kholisehile hore u tšepile Jehova?