Sebeletsang Jehova ka Kutloano
“Ka nako eo ke tla nea lichaba puo e hloekileng, e le hore kaofela li ka bitsa lebitso la Jehova, ho mo sebeletsa ka tumellano.”—SOFONIA 3:9, American Standard Version.
1, 2. (a) Hona joale Jehova o etsa hore ho phethahale boprofeta bofe? (b) Boprofeta boo bo hlahisa lipotso life kajeno?
JEHOVA MOLIMO o etsa ho hong kajeno hoo batho ba neng ba ke ke ba ho finyella ka bobona. Ho buuoa lipuo tse ka bang 3 000 lefatšeng lena le arohaneng, empa hona joale Molimo o etsa hore ho phethahale boprofeta bona: “Ke tla nea lichaba hore li fetohele puong e hloekileng, e le hore kaofela ha tsona li ka bitsa lebitso la Jehova, e le hore li mo sebeletse li jarisane ka mahetla.”—Sofonia 3:9, NW.
2 ‘Puo e hloekileng’ ee ke eng? E buuoa ke bo-mang? Hona ho bolela eng ho ‘sebeletsa Molimo ho jarisanoe ka mahetla’?
Ba Bua ‘Puo e Hloekileng’
3. ‘Puo e hloekileng’ ke eng, hona ke hobane’ng ha ba e buang ba sa arohana?
3 Ka letsatsi la Pentekonta 33 C.E., moea o halalelang oa Molimo o ile oa tšolleloa holim’a barutuoa ba Jesu Kreste, o ba nea matla a ho bua lipuo tseo ho neng ho se mohla ba kileng ba ithuta tsona. Hona ho ile ha ba nolofaletsa hore ba bolelle batho ba maleme a mangata “limakatso tsa Molimo.” Kahoo Jehova a qala ho tlisa batho ba limelo tsa mefuta eohle ea lichaba bonngoeng. (Liketso 2:1-21, 37-42) Eare ha Balichaba ba lumelang hamorao ba fetoha balateli ba Jesu, ka sebele bahlanka ba Molimo e ne e le batho ba lipuo-puo le ba merabe-rabe. Leha ho le joalo, ha ho mohla ba kileng ba tsekolloa ke mekoallo ea lefatše, hobane kaofela ba bua ‘puo e hloekileng.’ Ena ke puo e buuoang hammoho ea ’nete ea moea e hlileng ea boleloa ho Sofonia 3:9. (Ba-Efese 4:25) Ba buang ‘puo ena e hloekileng’ ha baa arohana empa “ba bolela taba e le ’ngoe,” ba ‘phethehile boikutlong bo le bong le khopolong e le ’ngoe.’—1 Ba-Korinthe 1:10.
4. Sofonia 3:9 e ile ea supa tšebelisano ea lipuo-puo le ea merabe-rabe joang, ’me e fumanoa hokae kajeno?
4 ‘Puo ena e hloekileng’ e ne e tla nolofaletsa batho ba lichaba tsohle le ba merabe eohle hore ba sebeletse Jehova “ba jarisane ka mahetla,” hantle-ntle, ‘ka lehetla le le leng.’ Ba ne ba tla sebeletsa Molimo “ka tumellano” (The New English Bible); “ka kutloano” (The New American Bible); kapa “ka kutloano eo ho seng ea e hanyetsang le ka lehetla le kopaneng.” (The Amplified Bible) Phetolelo e ’ngoe e re: “Joale ke tla fetola melomo ea lichaba tsohle hore e be e hloekileng, e le hore kaofela li ka bitsa lebitso la Jehova le ho sebelisana tšebeletsong ea hae.” (Byington) Tšebelisano e joalo ea lipuo-puo le merabe-rabe tšebeletsong ea Molimo e fumanoa feela har’a Lipaki tsa Jehova.
5. Lipaki tsa Jehova li khona ho sebelisa puo leha e le efe ea batho ka mokhoa o joang?
5 Kaha bohle bao e leng Lipaki tsa Jehova ba bua ‘puo ena e hloekileng’ ea ’nete ea Mangolo, ba nolofalloa ke ho sebelisa puo leha e le efe ea batho ka mokhoa o phahameng haholo—ba rorisa Molimo ’me ba bolela litaba tse molemo tsa ’Muso. (Mareka 13:10; Tite 2:7, 8; Ba-Heberu 13:15) Ke ho babatsehang hakaakang hore ‘puo e hloekileng’ joalo e nolofaletsa batho ba lichaba tsohle hore ba sebeletse Jehova ka kutloano!
6. Jehova o talima batho joang, empa ke eng e tla thusa haeba pelong ea Mokreste ea itseng ho sa ntsane ho salletse tekanyo e itseng ea ho ea ka tšobotsi?
6 Ha Petrose a ne a pakela Kornele le Balichaba ba bang, o ile a re: “Kannete kea hlokomela hore Molimo ha a ee ka tšobotsi; empa, lichabeng tsohle, ea mo tšabang, ea etsang toka, oa amoheleha ho eena.” (Liketso 10:34, 35, TLP) Ho ea ka liphetolelo tse ling, Jehova “hase Mohlomphi oa batho,” “ha a khetholle batho,” ’me “ha a na lithatohatsi.” (The Emphatic Diaglott; Phillips; New International Version) Joaloka bahlanka ba Jehova, re lokela ho talima batho ba lichaba tsohle joaloka eena. Empa ho thoe’ng haeba pelong ea Mokreste ea itseng ho sa ntsane ho salletse tekanyo eitseng ea ho ea ka tšobotsi? Joale e tla ba thuso ho hlokomela kamoo Molimo oa rōna o sa eeng ka tšobotsi o sebetsanang le bahlanka ba oona ba sechaba se seng le se seng, morabe o mong le o mong, batho ba bang le ba bang le leleme le leng le le leng.—Bona hape Tsoha! ea la 8 Motšeanong, 1985, maqephe 3-11.
Baa Lakatseha
7. Mabapi le kamano le Molimo, Mokreste e mong ha aa fapana joang le e mong oa sechaba se seng kapa morabe o mong?
7 Haeba u paki e kolobelitsoeng ea Jehova, mohlomong ka nako e ’ngoe u ne ‘u bobola, u feheloa ke manyala’ a etsahalang tsamaisong ena e khopo. (Ezekiele 9:4) U ne u ‘shoele libeng tsa hao,’ empa Molimo ka mohau oa u tlisa ho oona ka Jesu Kreste. (Ba-Efese 2:1-5; Johanne 6:44) Lintlheng tsena, u ne u sa fapana le ba bang bao e leng balumeli ’moho le uena hona joale. Le bona ba ne ba tepeletse ke bokhopo, ba ‘shoele libeng tsa bona,’ ’me ea e-ba baamoheli ba mohau oa Molimo ka Jesu Kreste. Hape ho sa tsotellehe hore na re ba morabe ofe kapa sechaba sefe, ke ka tumelo feela batho leha e le bafe har’a rōna ba nang le boemo bo botle le Jehova Molimo e le lipaki tsa hae.—Ba-Roma 11:20.
8. Haggai 2:7 e phethahatsoa joang hona joale?
8 Mantsoe a boprofeta a Haggai 2:7 a re thusa ho bona kamoo re lokelang ho talima balumeli bahabo rōna ba lichaba lisele. Mono Jehova o itse: “Ke tla sisinya le lichaba tsohle, ’me tse lakatsehang tsa lichaba tsohle li tla tla mona, ke be ke tlatse ntlo ena ka khanya.” Ho phahamisoa hona ho profetiloeng ha bolumeli bo hloekileng ho etsahala tempeleng ea ’nete ea Molimo, sebaka sa borapeli ba oona. (Johanne 4:23, 24) Empa “tse lakatsehang tsa lichaba tsohle” ke eng? Ke barati ba ho loka ba likete-kete ba amohelang hantle mosebetsi oa ho bolela ka ’Muso. Ho tsoa lichabeng tsohle le merabeng eohle, ba phallela ‘thabeng ea ntlo ea Jehova’ ba fetoha lipaki tsa hae tse kolobelitsoeng le karolo ea “bongata bo boholo” ba machaba. (Esaia 2:2-4; Tšenolo 7:9) Ba rorisang Jehova e le karolo ea mokhatlo o hlophisitsoeng oa hae oa lefatše ke batho ba hloekileng, ba boitšoaro bo botle le ba nang le bomolimo—ba lakatsehang ka ho fetisisa. Joale ka sebele, Mokreste e mong le e mong oa ’nete o lokela ho batla ho bontša lerato la boena ho bana bohle ba lakatsehang ba amohelehang ho Ntate oa rōna eo re mo kopanetseng ea leholimong.
Botho ba Bona bo Bocha
9. Le haeba nakong e fetileng re ne re sa nahane hantle ka basele, ke hobane’ng ha lintho li lokela ho fapana ha joale re se re le Bakreste?
9 Baena ba rōna ba moea le bo-khaitseli lefatšeng lohle le bona baa lakatseha hobane ba etse hloko keletso ea ‘ho hlobola motho oa khale le mekhoa ea hae le ho ikapesa motho e mocha.’ “Ea nchafallang tsebong ka setšoantšo sa ea ’mōpileng. Mona, ha ho mo-Gerike, leha e le mo-Juda, leha e le lebollo, leha e le boqai, leha e le mobarebare, leha e le mo-Skitha, leha e le ea ruiloeng, leha e le ea sa ruoang; empa Kreste e le ntho tsohle, le ho bohle.” (Ba-Kolosse 3:9-11) Haeba nakong e fetileng motho a ne a sa nahane hantle ka Mojode, Mogerike, kapa ba bang bao e leng basele ho eena, lintho li lokela ho fetoha hona joale ha e le Mokreste. Ho sa tsotellehe morabe, bochaba, kapa moetlo, ba nang le ‘botho bo bocha’ baa hlaolela ba bile ba bontša tholoana ea moea o halalelang oa Molimo—lerato, thabo, khotso, sebete, mosa, molemo, tumelo, bonolo, le boitšoaro. (Ba-Galata 5:22, 23, NW) Hona ho ba etsa ba ratehang ho barapeli-’moho le bona ba Jehova.
10. Haeba re lekoa hore re etse lipolelo tse mpe tse sa khetheng ka balumeli-’moho le rōna ba morabe o mong kapa sechaba se seng, Tite 1:5-12 e ka re thusa joang?
10 Ho fapana le bahlanka ba Jehova, batho ba bang ba lefatše ba bua lipuo tse nyelisang ka batho ba semelo sa sechaba se sa tšoaneng le sa bona. E, mabapi le batho bahabo, moprofeta oa Mokreta o kile a re: “Bakreta ke mahata kamehla, ke libatana tse khopo, ke menyollo e botsoa.” Moapostola Pauluse o ile a hopola mantsoe ao ha ho ne ho hlokahala hore a khutsise baruti ba bohata har’a Bakreste sehleke-hlekeng sa Kreta. Empa ka sebele Pauluse o ne a sa re: ‘Bakreste bohle ba Kreta ke mahata, le hore ba kotsi, ba botsoa e bile ke menyollo.’ (Tite 1:5-12, TLP) Che, hobane Bakreste ha ba bue ka ba bang ka mokhoa o nyelisang. Ho feta moo, boholo ba Bakreste bao ba Kreta ba ne ba apere “motho e mocha,” ’me ba bang ba ne ba tšoaneleha moeeng hore ba ka khetheloa ho ba baholo. Hona ho hloka boinahano bo tebileng haeba re ka kena molekong oa ho bua lipuo tse mpe tse sa khetheng ka baena le bo-khaitseli ba rōna ba moea ba morabe o itseng kapa bochaba bo itseng.
Nka Hore ba Bang Baa u Fetisa
11. Haeba pelong ea Mokreste ho e-na le ho ea ka tšobotsi ha mofuta ofe kapa ofe, a ka etsa joang?
11 Ka lehlakoreng le leng, haeba Mokreste a ne a ka ea ka tšobotsi ho morabe o mong kapa bochaba bo bong, mohlomong o ne a tla senola hona ka mantsoe a hae kapa liketso tsa hae. Le teng, hona ho ka baka ho jarana ka lipelo, haholo-holo phuthehong e entsoeng ka batho ba limelo tsa lichaba tse sa tšoaneng. Ka sebele, ha ho Mokreste ea neng a tla rata hore a senye bonngoe ba batho ba Molimo joalo. (Pesaleme ea 133:1-3) Ka hona haeba ka pelong ea Mokreste ho e-na le ho ea ka tšobotsi leha e le hofe, ke hantle hore a rapele: “U ntlhohlotse, u lekole pelo ea ka; u nteke; u tsebe mehopolo ea ka, u talime hoba a tsela ea bokhopo e teng ho ’na na, ’me u ntsamaise tseleng e isang bophelong bo sa feleng.”—Pesaleme ea 139:23, 24.
12. Ke hobane’ng ha re sa lokela ho ithorisa kapa ho rorisa ba bang ba semelo sa sechaba sa habo rōna?
12 Ho hotle ho ba le maikutlo a utloisisang a hore kaofela re batho ba sa phethahalang ba neng ba ke ke ba e-ba le boemo bo botle le Molimo hoja e se be ka sehlabelo sa Jesu Kreste. (1 Johanne 1:8–2:2) Ebe joale ke eng e re etsang hore re fapane le ba bang? Kaha ha re na letho leo re sa kang ra le fuoa, ke hobane’ng ha re ka ithorisa kapa ra rorisa ba bang ba semelo sa sechaba sa habo rōna?—Bapisa 1 Ba-Korinthe 4:6, 7.
13. Re ka tlatsetsa joang bonngoeng ba phutheho ’me re ka ithuta eng ho Ba-Filippi 2:1-11?
13 Re ka tlatsetsa bonngoeng ba phutheho haeba re lumela ’me re bontša kananelo bakeng sa litšoaneleho tse ntle tsa ba bang. Moapostola oa Mojode Pauluse o ile a re fa bohle seo re ka nahanang ka sona ha a bolella Bafilippi ba Balichaba: “Le ke le phethise thabo ea ka, ka ho ba le khopolo e le ’ngoe, le lerato le le leng, le moea o le mong, le ho ikutloa ho le hong feela. Le se ke la etsa letho ka khang, leha e le ka boithoriso ba lefeela, empa e mong le e mong, ka boikokobetso, a lekanye hobane ba bang baa mo fetisa.” Mohlala oa boikutlo boo ho loketseng hore re bo bontše ho batho ba kang rōna ba morabe kapa ba bochaba leha e le bofe o ile oa beoa ke Jesu Kreste. Le hoja e ne e le sebopuoa se matla sa moea, o ile a ‘iketsa ea tšoanang le batho’ ’me a ikokobetsa ho isa lefung thupeng ea tlhokofatso bakeng sa batho ba baetsalibe ba morabe o mong le o mong le ba sechaba se seng le se seng. (Ba-Filippi 2:1-11) Kahoo, joaloka balateli ba Jesu, na ha rea lokela hore re be ba lerato, ba ikokobelitseng, le ba utloelang ba bang bohloko, re lumela hore ba bang baa re fetisa?
Mamela ’me u Ele Hloko
14. Re ka thusoa joang hore re nahane hore ba bang baa re fetisa?
14 Re ka thusoa hore re nahane hore ba bang baa re fetisa haeba re hlile re mamela ha ba bua ’me re hlokomela boitšoaro ba bona ka hloko. Ka mohlala, mohlomong ka mokhoa o se nang mano re ka lumela ka ho rōna hore moholo oa habo rōna—mohlomong oa morabe o mong—o re fetisitse tsebong ea ho fana ka keletso e molemo Sekolong sa Tšebeletso sa Puso ea Molimo. Re ka ’na ra lemoha hore ke boemo ba hae ba moea, e seng hakaalo-kaalo khetho ea hae ea mantsoe kapa tsela eo a buang ka eona, bo mo nolofaletsang hore a fumane litholoana tse molemo ho thuseng balumeli-’moho le eena hore e be baboleli ba hloahloa ba ’Muso. Hape ho totobetse hore Jehova o hlohonolofatsa boiteko ba hae.
15. Re ka lemoha eng ha re mamela lipolelo tsa barapeli-’moho le rōna?
15 Ha re qoqa le baena le bo-khaitseli ba rōna kapa re mamela litlhaloso tsa bona libokeng, mohlomong re ka lemoha hore ba bang ba na le kutloisiso e molemonyana ea linnete tse itseng tsa Mangolo ho re feta. Re ka ’na ra lemoha hore lerato la bona la boena le bonahala le le matla haholoanyane, ho bonahala ba e-na le tumelo e matlanyana, kapa ba fana ka bopaki ba hore ba tšepa Jehova haholoanyane. Kahoo, e-bang ke ba sechaba sa habo rōna kapa che, ba re susumeletsa leratong le mesebetsing e metle, ba re thusa ho matlafatsa tumelo ea rōna, ’me ba re susumeletsa hore re tšepe Ntate oa rōna oa leholimo haholoanyane. (Liproverbia 3:5, 6; Ba-Heberu 10:24, 25, 39) Ho hlakile hore Jehova o ba atamelitse ho eena, ’me le rōna re lokela ho etsa joalo.—Bapisa Jakobo 4:8.
Re Hlohonolofalitsoe ’me re Tšehelitsoe
16, 17. Bontša ’nete ea hore Jehova ha a ee ka tšobotsi ha a hlohonolofatsa bahlanka ba hae ba sechaba leha e le sefe kapa morabe leha e le ofe.
16 Jehova ha a ee ka tšobotsi ha a hlohonolofatsa bahlanka ba hae ba bochaba kapa ba morabe leha e le ofe. Ka mohlala, nahana ka naha ea Brazil. Ha ea ba ka baromuoa ba tsoang linaheng lisele empa ka melomo ea batho ba tsamaeang le likepe ba robeli ba Brazil moo batho ba Brazil ba ileng ba qala ho utloa ka molaetsa oa ’Muso hoo e ka bang ka selemo sa 1920. Tlhohonolofatso ea Molimo e bile e totobetseng, hobane ka selemo sa tšebeletso sa 1987, ho ne ho e-na le tlhōrō ea bahoeletsi ba ’Muso ba 216 216 naheng eo ea baahi ba 141 302 000—karolelano ea mohoeletsi a le mong ho ba 654.
17 Nahana ka mohlala o mong oa tlhohonolofatso ea bomolimo. Ka ’Mesa 1923 Lipaki tsa Jehova tse peli tsa batho ba batšo tse tsoang sehleke-hlekeng sa Caribbean sa Trinidad li ile tsa rōmeloa ho ea bolela molaetsa oa ’Muso Afrika Bophirima. Ke kahoo Moena le Khaitseli W. R. Brown ba ileng ba sebeletsa moo ka lilemo, monna a tsejoa e le ‘Brown oa Bibele.’ Ba ile ba “hloma” ’me ‘Molimo oa ’na oa melisa’ ha ba bang le bona ba ntse ba sebetsa sebakeng seo se seholo. (1 Ba-Korinthe 3:5-9) Kajeno, palo ea baboleli ba ’Muso e feta 32 600 Ghana ’me Nigeria feela ba feta 133 800.
18, 19. Fana ka mehlala e bontšang kamoo Molimo oa rōna o sa eeng ka tšobotsi o tšehetsang bahlanka ba oona ba merabe eohle le ba lichaba tsohle.
18 Jehova ha a hlohonolofatse feela bahlanka ba hae ba lichaba tsohle le ba merabe eohle empa o boetse oa ba tšehetsa. Ka mohlala, nahana ka taba ea lipaki tse peli tsa Jehova tsa Majapane. Ka la 21 Phuptjane, 1939, Katsuo Miura le mosali oa hae ba ile ba tšoaroa ka tsela e se nang toka, ba kenngoa litlamong ’me ba arohanngoa le moshemane oa bona ea lilemo li hlano, ea ileng a lokela hore a hlokomeloe ke nkhono’ae. Khaitseli Miura o ile a lokolloa kamorao ho likhoeli tse robeli, empa Moena Miura o ile a tlangoa ho feta lilemo tse peli pele nyeoe ea hae e buuoa. O ile a tšoaroa hampe, a fumanoa a le molato, ’me a fumana kahlolo ea lilemo tse hlano. Ha a le chankaneng Hiroshima, Molimo o ile oa mo tšehetsa ka Mangolo, a ileng a fana ka matšeliso le matla a sa sitoeng ke letho. Ka ho ileng ha bonahala eka ke mohlolo, Moena Miura o ile a pholoha ka la 6 Phato, 1945, ha ho phatloha ha seqhomane sa athomo ho ripitla chankane eo a neng a le ho eona. Likhoeli tse peli hamorao, o ile a tseba ho kopana le mosali oa hae le mora oa hae ka leboea Japane.
19 Ntoeng ea II ea Lefatše, mahloriso a matla a ile a utluoa ke Lipaki tsa Jehova linaheng tse ngata. Ka mohlala, Robert A. Winkler e ne e le moena e mong oa Lejeremane ea ileng a hlokofatsoa likampong tsa mahloriso tsa Nazi Jeremane le Netherlands. Kaha o ne a ke ke a eka lipaki tsa habo, o ile a otloa hampe hoo a neng a tsoile tšobotsi. Empa o ile a ngola: “Ho hopola lipallo tsa Jehova tsa ho thusa motho likhathatsong tsa mefuta eohle ho ile ha mpha matšeliso le matla a hore ke mamelle sena sohle. . . . Ka Moqebelo ke ne ke ile ka shapuoa ke mapolesa a sekhukhu a Jeremane, ’me ka ’Mantaha o latelang ke ne ke tla hlongoa lipotso ke ’ona hape. E be joale ho ne ho tla etsahala joang hona ke ne ke lokela ho etsa eng? Ka retelehela ho Jehova ka thapelo, ke tšepile lipallo tsa hae. Ke ne ke tseba hore hona ho bolela ho sebelisa maqiti a ntoa ea puso ea Molimo molemong oa mosebetsi oa ’Muso le ho sireletsa baena ba ka ba Bakreste. E bile teko e matla haholo ho ’na ho mamella ’me ka letsatsi la leshome le metso e supileng ke ne ke se na thuso, empa ka leboha Jehova hore ka matla a hae ke bile le hona ho mamella teko ena le ho tšepahala.”—Pesaleme ea 18:35; 55:22; 94:18.
Re Leboha Boena ba Rōna
20. Ho hlompha ha rōna balumeli-’moho le rōna ba morabe o mong le o mong le sechaba se seng le se seng ho ka hōlisoa joang?
20 Ha ho pelaelo hore Jehova oa hlohonolofatsa o bile o tšehetsa Lipaki tsa hae tsa sechaba se seng le se seng le morabe o mong le o mong. Ha a ee ka tšobotsi, ’me joaloka bahlanka ba hae ba ineetseng, ha re na boikemelo kapa lebaka la ho bontša ho ea ka tšobotsi. Ho feta moo, ho hlompha ha rōna baena le bo-khaitseli ba rōna ba morabe o mong le o mong le sechaba se seng le se seng ho tla hōla haeba re nahana ka litsela tseo ba re fetisang ka tsona. Le bona ba sebelisa bohlale ba leholimo, bo sa khetholleng empa bo beang litholoana tse babatsehang. (Jakobo 3:13-18) E, ’me mosa oa bona, ho fana ha bona, lerato la bona, le litšoaneleho tse ling tsa bomolimo li re nea mehlala e metle.
21. Re lokela ho ikemisetsa ho etsa eng?
21 Re lokela ho leboha hakaakang, he, bakeng sa boena ba rōna ba merabe-rabe le ba lichaba-chaba! Ka thuso le tlhohonolofatso tsa Ntate oa rōna oa leholimo a re ‘mo sebeletseng re jarisane ka mahetla’ ka lerato la boena le ka ho hlomphana. Ka sebele, e lokela hore e be takatso ea rōna e matla le boikemisetso bo tiileng ho sebeletsa Jehova ka kutloano.
Litlhaloso tsa Hao ke Life?
◻ ‘Puo e hloekileng’ e nolofaletsa bahlanka ba Jehova ba limelo tsa lichaba tsohle ho etsa joang?
◻ Haggai 2:7 e phethahatsoa joang kajeno, ’me hona ho lokela ho ama pono ea rōna ka bahlanka ba bang ba Molimo joang?
◻ Ba-Filippi 2:3 e ka ama kamano ea rōna le batho ba morabe o mong le o mong le sechaba se seng le se seng joang?
◻ Haeba re mamela ’me re ela hloko, ke eng eo re tla e lemoha ka balumeli-’moho le rōna ba semelo sa bochaba bo bong?
[Litšoantšo tse leqepheng la 17]
Batho ba merabe eohle le lichaba tsohle ba rorisa Jehova ka kutloano
[Setšoantšo se leqepheng la 18]
Mamela ka hloko ’me u ele hloko. U tla susumetsoa ke lerato le tumelo tse totobalang mantsoeng le liketsong tsa lipaki tse ling tsa Jehova