Lithuto tse Tsoang Mangolong: Sofonia 1:1–3:20
Batla Jehova ’me u Mo Sebeletse ka Pelo Eohle
LILEMO tse ka bang 50 pele Bababylona ba ripitla Juda e koenehileng, Jehova o ile a phatlalatsa sena ka moprofeta oa hae Sofonia: “Ke ea tlosa, ke tlosetse ruri tsohle tse holim’a lefatše.” (1:1, 2) Empa hape Molimo o ile oa bontša batho ba oona tsela e isang polokehong. (2:3; 3:9) Ka baka la sena, buka ea Sofonia e na le lithuto tsa bohlokoa bakeng sa bohle bao hona joale ba talimaneng le “ntoa ea letsatsi le leholo la Molimo o matla ’ohle.”—Tšenolo 16:14.
Letsatsi la Jehova le Atametse
Erekaha letsatsi la Jehova le se le atametse haholo, motho leha e le ofe ea furalletseng Molimo kapele-pele o lokela ho khutlela ho oona. Har’a bao Molimo o tla ba “tlosa” ke “ba furalletseng Jehova.” Ba mo furalletse ’me ha ba sa tsotella le ka letho ka thato ea Molimo. Ke boemo bo kotsi hakaakang! Bo lokela ho lokisoa kapele-pele.—Sofonia 1:3-11.
Leruo la lintho tse bonahalang le ke ke la fana ka tšireletso letsatsing la Jehova. Ba bang ba ipolelang hore ba sebeletsa Jehova ba tšoarehile ka ho phehella lintho tse bonahalang, le maemo a mabotho-botho. Empa ho etsa seo ke boithetso bo bokaakang! Lintho tsa bona tse bonahalang li ke ke tsa ba sireletsa ka “tsatsi leo.”—Sofonia 1:12-18.
Poloko e ka Fumaneha
Hore motho a patoe tsatsing la Jehova, ho hlokahala tsebo e tebileng ea Mangolo. “Baikokobetsi” ba ’nileng ‘ba etsa ka litaelo tsa Hae’ ba eletsoa hore ‘ba batle ho loka, ba batle boikokobetso.’ Batho ba tla bolokoa e tla ba feela ba ileng ba ‘tiisetsa ho fihla qetellong.’—Sofonia 2:1-3; Mattheu 24:13.
Lichaba tseo kajeno li hatellang batho ba Jehova li tla timetsoa. Li tla oeloa ke phihlelo e tšoanang le e oetseng Moabe, Ammone, Assyria, le lichaba tse ling tse neng li pota-potile Juda. Timetso e boetse e emetse Babylona e Moholo. (Tšenolo 18:4-8) Sena se re khothatsa haholo hakaakang hore re hatele pele ho phatlalatseng hohle kahlolo ea Molimo!—Sofonia 2:4-15.
Batho ba Tsosolositsoeng
Hona joale Jehova o lokisetsa batho ba hae pholoho. Na u lahlile ka ho feletseng likhopolo tsa Bobabylona le ho qala ho bua “puo e hloekileng” ea ’nete e hlollang ea Bibele? Na u ile ua ‘bitsa lebitso la Jehova’ ka ho inehela ho eena? Na ‘u tlisa nyehelo,’ ke hore, “tholoana ea melomo e bolelang lebitso la hae”? Hore u pholohe, u lokela ho sebetsa “mahetla a bapile” le batho ba inehetseng ba Jehova.—Sofonia 3:1-10, NW; Ba-Roma 10:13-15; Ba-Heberu 13:15.
Bakeng sa poloko, re tlameha ho batla Jehova le ho phahamisa lebitso la hae le halalelang. Boikhohomoso, bokhopo, le mashano, ha li na sebaka har’a batho ba hae. (Ba-Efese 4:25-32) Ke feela ‘ba ikokobelitseng’ ba tla bolokoa ha a halaletsa lebitso la hae.—Sofonia 3:11-20.
Lithuto tse Tsoang Mangolong: Haggai 1:1–2:23
BUKA ea Haggai e re khutlisetsa selemong sa 520 B.C.E., lilemo tse 17 ka mor’a hore masala a Bajode a khutlele Jerusalema ho ea tsosolosa tempele ea Jehova. (Haggai 1:1) Eo e ne e le nako ea hore e mong le e mong a behe pelo ea hae mosebetsing oa Molimo. Empa leha ho le joalo, Jehova a fumana ho hlokahala hore a romele moprofeta Haggai ho hopotsa batho ba Hae ka tlamo ena ea bona. Na ho na le seo re ka ithutang sona ho see?
Etelletsa Mosebetsi oa Jehova Pele
Le ka mohla u se etelletse lithahasello tsa lintho tse bonahalang ka pele ho litšoanelo tsa moea. Bajode ba ileng ba khutlela naheng ea bona ba ne ba e-na le lebaka la ho ameha ka lebaka la maemo a ho se tsitse ha moruo, baahisani ba bona ba neng ba tletse bora, le tse joalo. Empa mabaka ao a ne a sa lokela ho ba etsa hore ba hlokomolohe lintho, kahobane ba ne ba phela mabotho-bothong. Ebile feela ka mor’a hore ba tsosolosoe ke Haggai moo ba ileng ba qalisa mosebetsi oa tempele. Ka ho tšoanang kajeno, ho hlokahala hore re ‘lekole litsela tsa lipelo tsa rōna’ ’me re tiise hore re tšehetsa mosebetsi oa Molimo ho ea bohōleng boo re ka bo finyellang.—Haggai 1:2-15.
Jehova o hlohonolofatsa boiteko ba ba etsang mosebetsi oa hae ka pelo eohle. Molimo o ne o tla hlohonolofatsa mosebetsi o neng o tla etsoa ke Zorobabele le Bajode ba bang oa ho phetha tempele, ’me khanya ea eona e ne e tla feta hōle ea ntlo ea pele. Ha e le mona “bongata bo boholo ba batho” bo arabela molaetseng oa ’Muso kajeno, “tse lakatsehang tsa lichaba tsohle” li tla tempeleng ea moea ea Jehova, ’me o ‘tlatsa ntlo ea hae ka khanya.’—Haggai 2:1-9; Tšenolo 7:9.
Ho Hlokahala Tšebetso ea Pelo Eohle
Borapeli ba rōna e-ba ba bohlokoa haeba feela re hloekile, sepheo sa rōna e le se hloekileng, ’me re sebeletsa Jehova ka pelo eohle. Bajode ba ne ba silafatsoa ke ho hlokomoloha ntlo ea Molimo, empa o ne o ba hlohonolofatsa hang-hang ha ba qalisa mosebetsi oa tempele. Ka hona, haeba re lakatsa ho thabela tlhohonolofatso ea Jehova, re tlameha ho lokisa ntho leha e le efe e hlokang tlhokomelo le ho laba-labela ho etsa mosebetsi oa hae. (Bapisa Numere 19:11-13.) Ha re ntse re emetse Molimo ho sisinya maholimo le lefatše, ho liha mebuso, e se eka re ka etsisa eo Zorobabele a neng a mo tšoantšetsa, Jesu Kreste, ’me re kopanele ka pelo eohle mosebetsing oa Jehova.—Haggai 2:10-23.
[Lebokose le leqepheng la 30]
LITEMANA TSA BIBELE LIA HLAHLOJOA
o Sofonia 1:5, (NW)—Malkame, ho ka etsahala hore e be ke lebitso le tšoanang le Milkome, Moleke, kapa Moloke, molimo o moholo oa bohata oa Baammone. (1 Marena 11:5, 7) Borapeli ba Moleke bo ne bo akarelletsa mahlabelo a nyontšang a bana ’me bo ne bo nyatsoa ke Molao.—Levitike 20:2-5; Liketso 7:42, 43.
o Sofonia 2:14—Joalokaha ho ile ha profetoa, lihlooho tsa litšiea tse ileng tsa ripitloa tsa Ninive li ile tsa fetoha libaka tsa linonyana le libatana. Ho ka etsahala hore e be linonyana le lifefo li ile tsa ‘letsa mololi’ lifenstereng tsa sebaka se tlohetsoeng se se na baahi. Menyako le likamore tse ka hare tsa ntlo ea borena le tsona li ile tsa timetsoa.
o Sofonia 3:9, (NW)—Puo e tšoanang ea batho ha e fane ka tiiso ea bonngoe, joalokaha sena se bontšoa ke lintoa tse loanoang pakeng tsa batho ba buang puo e tšoanang. “Puo e hloekileng” ke ’nete ea Mangolo, “mohlala oa mantsoe a phelisang.” (2 Timothea 1:13, NW) E fetela ka ’nģ’ane ho mekoallo ea boikhohomoso, e halaletsa Molimo, e kopanya bohle ba e buang.
o Haggai 1:6—Erekaha Bajode ba ne ba hlokomolohile tempele ea Jehova, ba ne ba sa amohele tlhohonolofatso ea hae. Ka baka leo, le hoja ba ne ba jalile haholo ba ile ba kotula mabele a fokolang ’me ka hona ba haelloa ke lijo tse lekaneng le metsi ho khotsofatsa litlhoko tsa bona. Ba ne ba haelloa ke liaparo kapa boleng ba tsona bo ne bo fokola hoo ba neng ba sa futhumale, ’me e ne e se eka ba amohelang moputso ba ne ba kenya chelete ea bona mokotlaneng o masoba. Ho fapana le Bajode bao, e se eka re ka se hlokomolohe lithahasello tsa bomolimo.—Liproverbia 10:22; Nehemia 10:39.
o Haggai 2:9—Le hoja tempele ea ‘pele,’ e neng e ahiloe ke Salomone, e ile ea ema ka lilemo tse 420, ‘ntlo ea morao’ e ile ea sebelisoa ka lilemo tse 584 (515 B.C.E.-70 C.E.). Ka hona tempele ea bobeli e ile ea tšoarella haleletsana. Barapeli ba eketsehileng ba ile ba phallela ho eona, joaloka nakong ea Pentekonta ea 33 C.E., ha Bajode le Baproselyte ba ne ba bokane ho eona ho tsoa mathōkong a Judea. Ho phaella moo, Messia, Jesu Kreste, o ile a ruta hona ‘ntlong ena ea morao.’ Mabaka ana a e neha khanya e eketsehileng ea bolumeli.