Mokhatlo o Momahaneng Barapeling ba Molimo

KA LILEMO tse ka bang 1 500, sechaba sa Iseraele se ne se bitsoa ka lebitso la Jehova. Ka mor’a moo, Jehova o ile “a lebisa tlhokomelo ea hae lichabeng hore a nke ho tsona batho bakeng sa lebitso la hae.” (Lik. 15:​14) Batho bana bao Jehova a ikhethetseng bona ke lipaki tsa hae, ’me ba etsa lintho ka mokhoa o tšoanang ho sa tsotellehe hore na ba hokae. Mosebetsi oa boboleli o ne o tla thusa hore ho bokelloe batho ba bitsoang ka lebitso la Jehova e le hore ho phethahale seo Jesu a ileng a laela balateli ba hae hore ba se etse ha a re: “Ka hona e-eang ’me le etse batho ba lichaba tsohle barutuoa, le ba kolobetse ka lebitso la Ntate le la Mora le la moea o halalelang, le ba rute ho boloka lintho tsohle tseo ke le laetseng tsona.”​—Mat. 28:​19, 20.

² Kaha u inehetse ho Jehova u bile u kolobelitsoe, u morutuoa oa Jesu Kreste. U e mong oa barapeli ba Jehova ba lekang kahohle hore ba se ke ba aroloa ke ho se tšoane ha morabe kapa maemo a moruo. (Pes. 133:1) Kahoo, u rata barab’eno ba ka phuthehong ebile oa ba hlompha. E ka ’na eaba u ne u sa utloisise ba bang hobane e le ba morabe o mong kapa ba sa ruteha joaloka uena. Leha ho le joalo, re ratana ho feta kamoo re ratang beng ka rona le metsoalle.​—Mar. 10:​29, 30; Bakol. 3:​14; 1 Pet. 1:22.

³ Haeba ba bang ba thatafalloa ho tlohela ho khetholla ba bang ka lebaka la morabe, lipolotiki, maemo a bophelo, kapa ba thatafalloa ho tlohela mefuta e meng ea khethollo e metseng ka metso, mohlomong ba ka nahana ka Bakreste ba pele ba Bajuda, ba ileng ba lokela ho khaotsa ho khetholla batho ba lichaba tse ling ka lebaka la bolumeli ba bona. Jehova o ile a lokisetsa Petrose kabelo eo a neng a lokela ho e phetha lapeng la Korneliase, eo e neng e le molaoli oa sesole sa Roma.​—Lik., khao. 10.

⁴ Ponong, Petrose o ile a bolelloa hore a hlabe ’me a je tse ling tsa liphoofolo tseo ho latela Bajuda li neng li sa hloeka. Ha Petrose a hana, lentsoe le tsoang leholimong le ile la re ho eena: “U khaotse ho bitsa lintho tseo Molimo a li hloekisitseng hore li silafetse.” (Lik. 10:​15) Molimo o ile a etsa seo e le hore Petrose a lokise tsela eo a nahanang ka eona ’me a phethe kabelo ea ho ea ho Korneliase. Ha Petrose a phetha taelo eo ea Jehova, o ile a re ho ba neng ba bokane: “Le tseba hantle kamoo ho sa lumelloeng ke molao hore Mojuda a ikopanye le motho oa morabe o mong kapa a mo atamele; leha ho le joalo Molimo o mpontšitse hore ha kea lokela ho re motho o silafetse kapa ha aa hloeka. Kahoo ke tlile, ntle ho khanyetso, ha ho romeletsoa hore ke tle.” (Lik. 10:​28, 29) Ka mor’a moo, Petrose o ile a bona hore Jehova o amohela Korneliase le ba lelapa la hae.

⁵ Saule oa Tarsase, eo e neng e le Mofarisi ea rutehileng haholo, o ile a lokela ho ikokobetsa le ho tloaelana le bao pele e neng e ke ke ea e-ba metsoalle ea hae. O ile a ba a lokela ho amohela litaelo tse tsoang ho bona. (Lik. 4:​13; Bagal. 1:​13-20; Bafil. 3:​4-11) Re ka inahanela feela hore na batho ba kang Sergiase Pauluse, Dionysiase, Damarise, Filemone, Onesimase le ba bang ba ile ba lokela ho lokisa monahano oa bona hakae ha ba amohela litaba tse molemo ’me ba fetoha barutuoa ba Jesu Kreste.​—Lik. 13:​6-12; 17:​22, 33, 34; Filem. 8-20.

⁶ Ha ho pelaelo hore lerato la bara le barali babo rona ka phuthehong le ile la u hulela ho Jehova le mokhatlong oa hae. U ile oa hlakeloa hore lerato ke letšoao le khethollang barutuoa ba ’nete ba Jesu Kreste, joalokaha a ile a re: “Ke le fa taelo e ncha, hore le ratane; le lona le ratane feela joalokaha ke le ratile. Bohle ba tla tseba ka sena hore le barutuoa ba ka, haeba le e-na le lerato har’a lona.” (Joh. 13:​34, 35) Hape u ile oa ananela Jehova le mokhatlo oa hae le ho feta ha u hlokomela hore lerato le ka phuthehong ke mohlala feela oa lerato le har’a batho ba hae lefatšeng lohle. U bona ha ho phethahala boprofeta ba Bibele bo bontšang hore matsatsing a ho qetela batho ba tla bokelleloa borapeling ba Jehova ’me ba phele ka khotso ba le bonngoeng.​—Mik. 4:​1-5.

⁷ Kaha ho na le lintho tse ngata tse arolang batho kajeno, ke mang ea neng a ka nahana hore batho ba tsoang “lichabeng tsohle le melokong eohle le bathong bohle le malemeng ’ohle” ba ka momahana? (Tšen. 7:9) Ak’u nahane ka phapang e teng pakeng tsa batho ba sebelisang theknoloji e phahameng le batho ba khomaretseng meetlo. Nahana ka lintoa tsa bolumeli pakeng tsa batho ba morabe o le mong. Ha moea oa bochaba o ntse o ja setsi, lipolotiki li ntse li arola batho ho feta leha e le neng pele. Ha u nahana hore batho ba arotsoe ke lintho tse kang boemo ba moruo le tse ling tse ngata, ke mohlolo hore ebe Molimo ea Matla ’Ohle o entse hore batho ba lichaba tsohle, ba lipuo tsohle le ba maemo ’ohle ba be bonngoeng ’me ba ratane.​—Zak. 4:6.

⁸ Ke ’nete hore Lipaki Tsa Jehova li momahane, ’me u bile bonngoeng le tsona ha u kolobetsoa. Kaha u rua molemo bonngoeng boo, ke boikarabelo ba hao ho etsa hore bo lule bo le teng. E le hore re etse sena, re lokela ho sekehela mantsoe a moapostola Pauluse tsebe a ho Bagalata 6:​10, a reng: “Hafeela re sa na le nako e loketseng, a re sebetseng se molemo ho bohle, empa haholo-holo ho ba amanang le rona tumelong.” Re boetse re mamela keletso ena e reng re se ke ra ‘etsa letho ka lebaka la ho rata likhang kapa ka lebaka la ho ipolelisa, empa ka ho ikokobetsa kelellong re nke hore ba bang ba re phahametse, re sa hlokomele lithahasello tsa litaba tsa rona feela, empa hape re hlokomela lithahasello tsa ba bang.’ (Bafil. 2:​3, 4) Haeba re leka ho talima bara le barali babo rona ka tsela eo Jehova a ba talimang ka eona, eseng ho latela kamoo ba shebahalang kateng, re tla utloana ’me re tla thaba.​—Baef. 4:​23, 24.

⁹ Moapostola Pauluse o ile a etsa papiso e bontšang hore bohle ka phuthehong ba momahane ebile baa tsotellana. (1 Bakor. 12:​14-26) E ka ’na eaba re lula hole le bona, empa re ntse re amehile ka bona. Haeba bara ba bang babo rona ba hlorisoa, kaofela ha rona re tšoenyeha haholo. Haeba ho na le barab’abo rona ba hlahetsoeng ke likoluoa, lintoa kapa likhohlano tsa lehae, ho na le ba bang ba ba thusang ho matlafatsa kamano ea bona le Molimo le ka lintho tseo ba li hlokang.​—2 Bakor. 1:​8-11.

¹⁰ Kaofela ha rona re lokela ho rapella barab’abo rona letsatsi le leng le le leng. Bara ba bang babo rona ba loantšana le teko ea hore ba etse se fosahetseng. Ba bang ba tobana le mathata a tsejoang ke bona feela. Ha ba bang bona ba hanyetsoa ke basebetsi-’moho le ke litho tsa malapa a bona tse sa lumelang. (Mat. 10:​35, 36; 1 Bathes. 2:​14) Sena sohle se re ama kaofela hobane re balumeli-’moho. (1 Pet. 5:9) Barab’abo rona ba bang ba sebetsa ka thata tšebeletsong ea Jehova ’me ba etella pele mosebetsing oa boboleli le ka phuthehong. Hape ho na le ba filoeng boikarabelo ba ho hlokomela mosebetsi oa lefatše lohle. Re lokela ho ba rapella, kaha seo se bontša hore rea ba rata ebile re amehile ka bona e le kannete, le hoja ka linako tse ling re sa khone ho ba thusa.​—Baef. 1:​16; 1 Bathes. 1:​2, 3; 5:25.

¹¹ Kaha maemo a lefatše ha a tsitsa matsatsing ana a ho qetela, batho ba Jehova ba lokela ho ikemisetsa ho thusana. Ka linako tse ling ha ho hlahile likoluoa tse kang litšisinyeho tsa lefatše le meroallo, ho ka ’na ha hlokahala hore ho etsoe matšolo a ho bokella liphallelo. Bakreste ba mehleng ea baapostola ba ile ba beha mohlala o motle tabeng ena. Barutuoa ba linaheng tse ling ba ile ba hopola keletso ea Jesu eaba ba romela barab’abo bona ba Judea lintho tseo ba neng ba li hloka nakong ea tlala ea boja-likata. (Lik. 11:​27-30; 20:​35) Moapostola Pauluse o ile a hlophisa hore liphallelo li ajoe ka mokhoa o hlophisehileng. (2 Bakor. 9:​1-15) Kajeno, ha barab’abo rona ba e-ba mathateng ’me ba hloka ho thusoa, mokhatlo hammoho le Bakreste ka bomong ba potlakela ho ba thusa le ho ba fa seo ba se hlokang.

¹² Lipaki Tsa Jehova tsohle li hlophiselitsoe ho etsa thato ea hae. Hona joale, thato ea hae ke hore litaba tse molemo tsa ’Muso li boleloe lefatšeng lohle hore e be bopaki ho lichaba tsohle. (Mat. 24:​14) Ha re ntse re etsa mosebetsi ona, thato ea Jehova ke hore re itšoare ka tsela e lumellanang le melao ea hae ea boitšoaro. (1 Pet. 1:​14-16) Re lokela ho ikemisetsa ho ikokobetsa ’me re tsoele pele ho bolela litaba tse molemo. (Baef. 5:​21) Ena hase nako ea ho ikhotsofatsa, empa ke nako ea ho beha ’Muso oa Molimo sebakeng sa pele bophelong ba rona ho feta leha e le neng pele. (Mat. 6:​33) Ho hopola sena le ho sebetsa re momahane ha re bolela litaba tse molemo ho tla etsa hore re thabe re be re khotsofale hona joale ’me re fumane mahlohonolo nakong e tlang.

¹³ Rona Lipaki Tsa Jehova, ha re tšoane le batho ba bang, re tsebahala ka bohloeki le ka ho chesehela tšebeletso ea Molimo oa rona. (Tite 2:​14) Tsela eo re rapelang Jehova ka eona e re khetholla ho batho ba bang. Hase feela hore re sebetsa le barab’abo rona mahetla a bapile lefatšeng lohle empa hape re lumela ntho e le ’ngoe ’me re phela tumellanong le seo Bibele e se rutang. Sena se ile sa boleloa esale pele ha Jehova a re ka moprofeta oa hae Sofonia: “Ke tla etsa hore lichaba li fetohele puong e hloekileng, e le hore kaofela ha tsona li ipiletse lebitsong la Jehova, e le hore li mo sebeletse ka mahetla a bapileng.”​—Sof. 3:9.

¹⁴ Ka mor’a moo Jehova o ile a bululela Sofonia hore a bolele hore na barapeli ba Molimo lefatšeng lohle e ne e tla ba batho ba mofuta ofe ’me a re: “Ha e le ba setseng ba Iseraele, ba ke ke ba etsa ho sa lokang, kapa ba bua leshano, leha e le hore ho tla fumanoa leleme le qhekellang melomong ea bona; etsoe ba tla iphepa ’me ba robale ba thakhaletse, ’me ho ke ke ha e-ba le ea mong ea etsang hore ba thothomele.” (Sof. 3:​13) Kaha re utloisisa Lentsoe la Jehova ’me re fetotse tsela eo re nahanang ka eona, re bile re phela ka tsela e lumellanang le melao ea Jehova, re sebetsa ka kutloano. Re finyella lintho tseo batho ba bonang eka ha ho motho ea ka li finyellang. Ka sebele re batho ba ikhethang, batho ba Molimo, ba mo tlotlisang lefatšeng lohle.​—Mik. 2:​12.