Khaolo ea Borobeli

“Jehova o Batla Eng ho Uena?”

1, 2. Ke hobane’ng ha ho khothatsa ho tseba seo Jehova a ileng a se etsa ha boitšoaro ba batho ba hae ba boholo-holo bo ne bo hlephile?

AK’U nahane ka ketsahalo ena: Ngoanana e mong o tšosoa ke motho ea kokotang ka matla monyako. O tšaba hore ke mohoebi oa molotsana ea batlang hore lelapa labo le mo lefe chelete eo le mo kolotang eona. Mohoebi enoa o se a qhekeletse batho ba bangata ka ho sebelisa litekanyo tse fosahetseng le ho ba lefisa tsoala e sa lumelloeng ke molao. E le hore a itsoelle pele ka mekhoa ena ea hae a sa etsoe letho, o fa baeta-pele ba motse tjotjo, ’me ba iphapanyetsa litletlebo tsa batho bao a ba hanyapetsang. Ngoanana enoa o ikutloa eka ha a na mang-oe; ntat’ae o lahlile lelapa o matha le ngoananyana e mong. Eena le ’ma’e ba ka ’na ba rekisoa hore e be makhoba.

² Ketsahalo ena e akaretsa e meng ea mekhoa e ileng ea nyatsoa ke baprofeta ba 12. (Amose 5:12; 8:4-6; Mikea 6:10-12; Sofonia 3:3; Malakia 2:13-16; 3:5) Haeba u ne u phela ka nako eo, u ka be u ile ua etsa joang? Le hoja ho bonahala hore ho ne ho hlile ho le hobe mehleng ea baprofeta bao, u ka khothatsoa ke tsela e ntle eo Jehova a ileng a sebelisana le batho ba hae ka eona. E, ha u bala libuka tsena tse 12 u tla hlokomela hore Molimo o ile a totobatsa litšobotsi tse ratehang le boikutlo bo botle. Khothatso ea hae e ka tiisa boitšoaro ba hao, ea u susumelletsa hore u etse se setle le hore u mo rorise. Kaha letsatsi la Jehova la kahlolo le atamela ka potlako, ho ela hloko molaetsa o khothatsang libukeng tsena ho tla u lemosa hore na ke eng seo Molimo a se batlang ho uena. Qala ka ho hlahloba se ileng sa etsahala mehleng ea Mikea, lilemong tsa bo-700 B.C.E.

KE ENG SEO JEHOVA A SE BATLANG HO UENA?

3, 4. (a) Ke boipiletso bofe bo amang maikutlo bo hlahang bukeng ea Mikea? (b) Potso e hlahang ho Mikea 6:8 e u ama joang ka ho toba?

³ Ha u bala buka ea Mikea, qalong u ka ’na ua nahana hore ke letoto le lelelele la lintho tseo Baiseraele ba bakoenehi ba qosoang ka tsona. Ho hlakile hore Jehova o ne a sa iphapanyetsa boitšoaro bo hlephileng ba batho ba hae ba inehetseng ho eena, ho akarelletsa le bao a ileng a re ‘ba hloile se molemo ’me ba rata bobe.’ (Mikea 3:2; 6:12) Leha ho le joalo, kantle ho nyatso eo, re boetse re fumana e ’ngoe ea likeletso tse ipiletsang le tse susumetsang ka ho fetisisa ka Bibeleng. Mikea o bua ka Moqapi oa melao e lokileng ’me o botsa potso ena e etsang hore motho a nahane ka ho teba: “Jehova o batla eng ho uena haese hore u sebelise toka u rate mosa ’me u inyenyefatse ha u tsamaea le Molimo oa hao?”—Mikea 6:8.

⁴ Na mantsoeng aa u lemoha kamoo ’Mōpi oa rōna a ipiletsang kateng? Ka lerato re hopotsoa maikutlo a molemo ao re ka khonang ho ba le ’ona ho e-na le ho itumella hore re khelosoe ke bokhopo bo atileng. Jehova oa tseba hore joaloka batho ba tšepahalang, re batla ho hlaolela litšobotsi tsa Hae, ’me o kholisehile hore re tla fela re etse joalo. U ne u tla araba joang haeba u ka botsoa ka ho toba hore na “Jehova o batla eng ho uena?” Na u ka bolela likarolo tse itseng bophelong ba hao tseo ho tsona melao ea Molimo ea boitšoaro e seng e ntse e fetola bophelo ba hao—kapa tseo e lokelang ho bo fetola ho tsona? Kamano ea hao le Molimo le tsela eo u phelang ka eona li tla ntlafala haholo ha u ntse u tsoela pele ho boloka melao eo. Kaha haufinyane lefatše lohle e tla ba paradeise, ikhothatse ka keletso ena: “Itjalleng peō ka ho loka; kotulang tumellanong le mosa o lerato. Itemeleng thite, ha ho sa na le nako ea ho batla Jehova ho fihlela a tla ’me a le rupela ka ho loka.” (Hosea 10:12) Joale a re hlahlobeng tse ling tsa lintlha tsa sehlooho keletsong ea bohlokoa ea Mikea 6:8.

“U INYENYEFATSE”

 5. Ke hobane’ng ha e le habohlokoa ‘ho inyenyefatsa’ ha re tsamaea le Molimo?

⁵ Re lokela ho hlokomela hore Mikea o re Jehova o batla hore ‘re inyenyefatse ha re tsamaea le’ Eena. Ha ho pelaelo hore re tla rua molemo ha re inyenyefatsa hobane “bohlale bo ho ba inyenyefatsang.” (Liproverbia 11:2) Ho inyenyefatsa ho akarelletsa ho tseba mefokolo eo re e baketsoeng ke sebe sa Adama. Mohato oa pele oa bohlokoa ha re leka ho qoba ho etsa sebe ka boomo ke ho lumela hore re tsoaletsoe sebeng.—Baroma 7:24, 25.

 6. Re ka rua molemo joang haeba ka ho inyenyefatsa re lemoha liphello tsa sebe?

⁶ Ke hobane’ng ha ho inyenyefatsa hammoho le ho ikokobetsa kelellong e le habohlokoa hakaale bakeng sa hore re qobe sebe sa ka boomo? Motho ea inyenyefatsang oa tseba hore na sebe se ka ba matla hakae. (Pesaleme ea 51:3) Hosea o re thusa hore re utloisise hore sebe se ka hohela le hore kamehla se fella ka mahlomola. Ka mohlala, Jehova o ile a tšepisa hore o tla “ahlola litaba” ka lebaka la ho se mamele ha batho ba hae ba boholo-holo. Na ebe see se bontša hore baetsalibe bao ba sa inyenyefatseng ba ne ba ka qoba liphello tsohle tsa liketso tsa bona? Mohlomong ba ne ba nahanne joalo, kaha hangata sebe sea thetsa ebile se etsa motho lekhoba. Taba ea bohlokoa ka ho fetisisa ke hore sebe se arola baetsalibe ho Molimo, se ka etsa hore ba qetelle ba le boemong bona bo bobe ka ho fetisisa: “Mesebetsi ea bona ha e lumelle hore ba khutlele ho Molimo oa bona.” Sebe sa ka boomo se tla senya matla a boitšoaro le botho ba mofosi, se mo fetole ‘motho ea tloaetseng ho etsa se kotsi.’ Ho feta moo, sebe se etsa hore moetsalibe a se ke a atleha bophelong. Ke ’nete hore ka nakoana ho ka ’na ha bonahala eka oa atleha, empa moetsalibe ea sa bakeng a ke ke a lebella hore Molimo a mo amohele.—Hosea 1:4; 4:11-13; 5:4; 6:8.

 7. Batho ba inyenyefatsang ba ikutloa joang ka tataiso ea Jehova?

⁷ Batho ba inyenyefatsang ba boetse baa lumela hore ba hloka tataiso ea Molimo hore ba qobe liphello tse bohloko tsa sebe. Mikea o ile a bona esale pele nako eo ka eona matšoele a neng a tla batla ka tieo ‘ho rupeloa ka litsela tsa Jehova’ le ho “tsamaea litseleng tsa hae”—’me nako eo ke eona ena ea rōna. Batho ba bonolo joalo ba batla “molao” le “lentsoe la Jehova.” Mohlomong le uena u thabela ho ba har’a ba lakatsang ho “tsamaea ka lebitso la Jehova” ka ho etsa seo a se hlokang. Empa, mohlomong joaloka Mikea, le uena u thahasella ho tseba litsela tse eketsehileng tseo ka tsona u ka lulang u ‘hloekile boitšoarong.’ (Mikea 4:1-5; 6:11) U tla rua molemo o moholo haeba ka ho inyenyefatsa u batla ho etsa seo Jehova a se batlang ho uena.

HLAOLELA BOITŠOARO BO HLOMPHEHANG

 8. Ke’ng seo u se hlokometseng ka boitšoaro lefatšeng kajeno?

⁸ Kahobane Jehova o lakatsa hore re atlehe moeeng le nameng, o batla hore re hloeke boitšoarong ho sa tsotellehe ho hlepha ha boitšoaro lefatšeng leo re phelang ho lona. (Malakia 2:15) Re foqoa melaetsa e buang ka ho kopanela liphate. Batho ba bangata ba nahana hore ho shebella litšoantšo le lifilimi tse manyala tse hlephisang boitšoaro, ho bala ka mekhoa e litšila ea ho kopanela liphate, le ho mamela lipina tse nang le mantsoe a khothalletsang boitšoaro bo bobe ke ntho e tloaelehileng bophelong. Ho phaella moo, ho na le batho ba sa hlompheng basali, ba nahanang hore ba lokela ho sebelisetsoa ho kopanela liphate feela. Kapa bacha sekolong ba ka ’na ba kenyelletsa mesoaso e litšila meqoqong ea bona ’me ka tsela e sa tobang ba bua ka ho kopanela liphate. U ka hana tšusumetso e joalo e senyang joang?

 9. Ba bangata ba ile ba hlōleha ho boloka melao ea Jehova joang mehleng ea baprofeta ba 12?

⁹ Libuka tsa baprofeta ba 12 tseo re ntseng re buisana ka tsona li fana ka keletso ea bohlokoa. Baprofeta bana ba phetse pele ho mehla ena moo ho seng ho e-na le libaka tseo ho shebelloang lifilimi ho tsona le tseo ho rekisoang livideo ho tsona, leha ho le joalo, mehleng ea bona ho ne ho e-na le litšoantšo tsa litho tsa botona, ho ne ho boetse ho e-na le seo ho neng ho thoe ke botekatse bo halalelang le boitšoaro bo hlabisang lihlong ba ho kopanela liphate le batho ba fapa-fapaneng. (1 Marena 14:24; Esaia 57:3, 4; Habakuke 2:15) U ka bona bopaki ba sena ho seo baprofeta ba ileng ba se ngola: “Etsoe, ha e le banna, ba ea moo ba leng bang le liotsoa, ’me ba etsa sehlabelo le matekatse a basali a tempele.” “Motho le ntat’ae ba ile ho ngoanana a le mong, ka morero oa ho hlompholla lebitso la ka le halalelang.” Nako le nako ba bang ba ne ba lefa “tefo ea letekatse” meketeng ea tsoalo.a Bofebe bo ne bo jele setsi, ’me balekane ba lenyalo ba sa tšepahaleng ba ne ba ‘sala morao ba ba ratang ka takatso e matla.’—Hosea 2:13; 4:2, 13, 14; Amose 2:7; Mikea 1:7.

10. (a) Sesosa se seholo sa boitšoaro bo bobe ke sefe? (b) Batho ba Molimo ba boholo-holo ba ile ba e-ba molato oa bohlola ba moea joang?

¹⁰ Mohlomong ua hlokomela hore boitšoaro bo bobe bo bontša boikutlo ba motho le sepheo sa hae. (Mareka 7:20-22) Ha Jehova a bua ka batho ba hae ba itšoereng hampe o ile a re “moea oa bohlola [“takatso e feteletseng ea ho kopanela liphate,” Contemporary English Version] o entse hore [ba] hlahlathele” ’me “ha baa ntšetsa letho pele haese boitšoaro bo hlephileng.” (Hosea 4:12; 6:9)b Zakaria o ile a bua ka “moea oa ho se hloeke.” (Zakaria 13:2) Batho ba ne ba e-na le boikutlo ba ho se tsotelle, ho se natse esita le ho nyelisa melao ea Jehova le bolaoli ba hae. Kahoo, e le hore motho a lokise sepheo sa hae se fosahetseng, o ne a lokela ho fetola monahano oa hae le pelo ea hae ka ho feletseng. Ho tseba sena ho lokela ho etsa hore Bakreste ba ananele haholoanyane thuso eo ba e fuoang hore ba qobe boitšoaro bo bobe hammoho le liphello tsa bona tse bohloko.

BATLA HO HLOEKA

11. Tse ling tsa liphello tsa boitšoaro bo bobe ke life?

¹¹ Mohlomong u lemohile hore hangata boitšoaro bo hlephileng bo qhala malapa, bo hlokisa bana tataiso ea batsoali, bo lebisa mafung a mabe bo bile bo fella ka ho bolaea ka ho ntša limpa. Ba hlokomolohang ’Mōpi litabeng tsa ho kopanela liphate hangata ba utloa bohloko ’meleng le maikutlong. Mikea o ile a ngola a re: “Ka lebaka la hore [motho] o fetohile ea sa hloekang, ho na le tšenyo; ’me mosebetsi oo oa ho senya o bohloko.” (Mikea 2:10) Ho tseba sena ho matlafatsa boikemisetso ba batho ba tšabang Molimo. Ba qoba ho silafatsa lipelo tsa bona le likelello tsa bona ka ho lula ba nahana ka lintho tse sa hloekang.—Matheu 12:34; 15:18.

12. Re rua molemo joang ha re talima ho kopanela liphate kamoo Jehova a ho talimang kateng?

¹² Bakreste ha ba qobe boitšoaro bo bobe feela ka lebaka la ho tšaba mafu kapa ho ba le bana ba matšeo. Baa tseba hore ho bohlokoa hore ba hlaolele ho rata molao oa Molimo le hore ba talime boitšoaro ka tsela eo a bo talimang ka eona. Jehova o bōpile batho ba e-na le takatso ea tlhaho ea ho kopanela liphate e le pontšo ea lerato pakeng tsa batho ba nyalaneng. Sena e ne e le karolo ea morero oa Molimo ha a bōpa batho. Ha batho ba kopanela liphate moo ho loketseng—e leng lenyalong—hoo ho molemo, ho etsa hore monna le mosali ba momahane ’me ka linako tse ling ho hlahisa bana. Leha ho le joalo, ha batho ba kopanela liphate ba sa nyalana, ketso ena e senya haholo joalokaha baprofeta ba 12 ba bontšitse. Boitšoaro bo bobe bo ile ba halefisa Molimo. Sena se ile sa fella ka mahlomola mehleng eo e fetileng, ’me le kajeno motho ea etsang boitšoaro bo bobe o tla ba mahlomoleng.

13. Re ka ‘tlosa bohlola ka pel’a rōna’ ’me ra qoba teko joang?

¹³ Hosea o ile a kōpa batho ba mehleng ea hae ka tieo hore ba ‘tlose bohlola ba bona ka pel’a bona,’ a bontša hore ba lokela ho nka khato e tiileng ea ho sireletsa boitšoaro ba bona. (Hosea 2:2) Rōna ho ka ba molemo hore re tlohe boemong leha e le bofe bo ka etsang hore re oele phosong. Ka mohlala, u ka ’na ua hlaheloa ke teko e itseng nako le nako sekolong kapa moo u lulang teng. Mohlomong u ke ke ua khona ho ea sekolong se seng kapa ho ea lula sebakeng se seng, empa ho ka ’na ha e-ba le litsela tse ling tsa hore u qobe boemo bo lekang ’me qetellong u ‘tlose bohlola ka pel’a hao.’ Tsebisa ba bang hore u Mokreste oa ’nete, u e mong oa Lipaki Tsa Jehova. Ka tsela e hlakileng, e hlomphang, hlalosa melao-motheo e u tataisang le seo u se lumelang. Etsa bonnete ba hore ba bang baa hlokomela hore u ikemiselitse ho boloka melao e phahameng ea Jehova. (Amose 5:15) Tsela e ’ngoe ea ho ‘tlosa bohlola ka pel’a hao’ ke hore u qobe litšoantšo tse manyala tse hlephisang boitšoaro le boithabiso bo belaetsang. Sena se ka akarelletsa hore u lahle makasine e itseng kapa hore u batle metsoalle e mecha—e ratang Jehova le e lumellanang le uena ntlheng ea hore u lokela ho etsa seo a se lebeletseng ho uena. (Mikea 7:5) E, ka thuso ea Jehova, u ka qoba ho silafatsoa ke boitšoaro bo bobe ba lefatše lena!

“U RATE MOSA”

14, 15. (a) ‘Ho rata mosa’ ho bolela’ng? (b) Ho rata mosa ho re thusa joang hore re be ba hlokang molato?

¹⁴ Mikea o ile a hatisa hore Jehova o batla hore re “rate mosa.” Ho ba mosa ho akarelletsa ho etsa lintho tse molemo ho e-na le ho etsa eng kapa eng e kotsi. Mosa o amana haufi le molemo le bokhabane. O re tlama hore re tšepahale ’me re hloke leeme ho seo re se etsang le ha re sebelisana le ba bang. Khaolong ea 6 bukeng ena, re hlahlobile likarolo tsa bohlokoa bophelong, tse kang khoebo le litaba tsa lichelete, tseo ho tsona ho leng bohlokoa haholo ho bontša toka le botšepehi. Empa tseo hase tsona feela likarolo tseo ho hlokahalang hore re bontše ho hloka leeme, botšepehi le mosa ho tsona bophelong.

¹⁵ Batho ba ratang mosa le ba batlang ho etsa ba bang hantle ba loanela ho ba ba hlokang molato. Ha Jehova a bua le Baiseraele ba neng ba sa phethe tšoanelo ea bona ea ho fana ka lintho tse bonahalang borapeling bo hloekileng, o ile a re: “Lea nkutsoetsa.” (Malakia 3:8) Na u ka lemoha litsela tseo motho a ka ‘utsoetsang’ Molimo ka tsona kajeno? Ho thoe’ng haeba Mokreste a tšoara menehelo ea ho ntšetsa pele mosebetsi oa ’Muso phuthehong ea habo kapa boemong leha e le bofe bo bong? Ke chelete ea mang eo? Ha e le hantle chelete eo ke ea Jehova, kaha e fanoe ka sepheo sa ho ntšetsa pele borapeli ba hae. (2 Bakorinthe 9:7) Na motho a ka nahana hore a ka “alima” chelete e joalo ho koala mabaka a tšohanyetso kapa ho sebelisa chelete ea monehelo ntle ho tumello? Le hanyenyane. Seo se tla tšoana hantle le ho utsoetsa Molimo! ’Me ka sebele e tla be e se ho bontša mosa kapa ho loka ho ba ntšitseng menehelo eo bakeng sa mosebetsi oa Molimo.—Liproverbia 6:30, 31; Zakaria 5:3.

16, 17. (a) Ba bang ba ile ba bontša meharo joang mehleng ea Amose le Mikea? (b) Molimo o ikutloa joang ka ho chachehela lintho tsa ba bang ka mohono?

¹⁶ Mosa le molemo li boetse li susumelletsa Bakreste hore ba qobe ho chachehela lintho tsa ba bang ka mohono. Mehleng ea Amose, meharo e feteletseng e ne e jele setsi. Bahanyapetsi ba sehlōhō ba ne ba ikemiselitse ho ‘rekisa ea lokileng’—e leng morapeli-’moho le bona—“bakeng sa silevera”! (Amose 2:6) Ho ne ho le joalo mehleng ea Mikea, ha barui ba Juda ba amoha batho ba sitoang ho itšireletsa thepa ea bona, ba bile ba e nka ka likhoka haeba ho hlokahala. (Mikea 2:2; 3:10) Ka ho amoha ba bang masimo a bona, batho bana ba meharo ba ne ba tlōla Molao oa Jehova: ho kopanyelletsa le molao oa ho qetela Melaong e Leshome le melao e khahlanong le ho rekisa naha eo e leng lefa.—Exoda 20:13, 15, 17; Levitike 25:23-28.

¹⁷ E ka ’na eaba kajeno ha hoa tloaeleha hore batho ba rekisoe kapa ba etsoe makhoba joaloka mehleng ea baprofeta. Leha ho le joalo, ho thoe’ng ka ho ja lichelete tsa batho kapa ho ba hanyapetsa? Ka sebele, Mokreste ea ratang mosa a ke ke a hanyapetsa barapeli-’moho le eena. Ka mohlala, oa hlokomela hore e ke ke ea e-ba ho loketseng kapa ho bontša mosa ho qala khoebo kapa ho buella letsete leo ka ho khetheha a shebileng hore le ntšetsoe pele ke balumeli-’moho le eena. Ho batla leano la ho etsa chelete ka potlako ka ho hanyapetsa Bakreste ba bang ho bontša meharo, eo Bakreste ba lemosoang hore ba e qobe. (Baefese 5:3; Bakolose 3:5; Jakobo 4:1-5) Meharo e ka bonahala leratong la chelete, takatsong ea ho fumana matla kapa ho iphumanela leruo, esita le ho ba pelo e telele lijong le linong, litabeng tsa ho kopanela liphate kapa linthong tse ling. Mikea o ile a bontša hore batho ba ichebileng bobona, ba meharo, ‘ba ke ke ba khora.’ Le kajeno ho ntse ho le joalo.—Mikea 6:14.

18, 19. (a) Ba bang ba baprofeta ba 12 ba ile ba re’ng ho bontša hore Jehova o hlokomela “mojaki”? (b) Ho thahasella ba bang ka tsela e lerato ho tla ntlafatsa likamano tsa hao le batho ba bang ba lulang sebakeng sa heno joang?

¹⁸ Jehova o ile a laela batho ba hae hore ‘ba se ke ba etsetsa mojaki leha e le ofe bolotsana.’ ’Me ha a sebelisa Malakia, Molimo o ile a re: ‘Ke tla atamela haufi le lōna bakeng sa kahlolo, khahlanong le ba lelekang mojaki.’ (Zakaria 7:10; Malakia 3:5) Na sebaka seo u lulang ho sona se ntse se fetoha ka lebaka la tšubuhlellano ea bajaki kapa batho ba bang ba lichaba lisele, ba merabe esele kapa ba semelo se sesele? Mohlomong ba falletse sebakeng sena ba batla ho sireletseha, mesebetsi kapa bophelo bo molemo. U ikutloa joang ka batho ba buang puo e fapaneng le ea hao le ba phelang ka tsela e fapaneng le ea hao? Na u iphumana u e-na le mekhoanyana e itseng ea khethollo, e leng se hlileng se leng khahlanong le mosa?

¹⁹ Nahana kamoo batho ba tlang ho thaba kateng haeba u bontša hore batho ba tsoang linaheng lisele kapa ba limelo tse fapaneng, le bona ba ntse ba tšoaneloa ke ’nete ea Bokreste joaloka bohle. Hape mosa o tla thibela boikutlo ba hore batho ba joalo ba fihlang ha ba na tokelo ea ho sebelisa Holo ea ’Muso le lintho tse ling. Moapostola Pauluse o ile a hopotsa Bakreste ba bang ba Bajuda ba lekholong la pele la lilemo, bao ka tsela e itseng ba neng ba khetholla batho bao e seng Bajuda, hore ha e le hantle, ho ne ho se motho ea tšoaneloang ke poloko; ke ka mosa o sa tšoanelang oa Molimo feela motho ofe kapa ofe a neng a ka bolokeha. (Baroma 3:9-12, 23, 24) Ho ba mosa ho ba bang ho tla re susumelletsa hore re thabele hore ebe hona joale lerato la Molimo le fihla ho batho ba bangata bao pele ba neng ba se na monyetla oa ho utloa litaba tse molemo. (1 Timothea 2:4) Hangata batho ba tsoang linaheng tse ling kapa ba limelo lisele ba kojoana li mahetleng, kahoo ho hlokahala hore re ba nahanele ’me re ba bontše mosa, re ba amohele, re tšoare e mong le e mong “joaloka letsoalloa” la moo re lulang teng.—Levitike 19:34.

U TSAMAEE LE MOLIMO OA ’NETE

20. Baiseraele ba bang ba ile ba batla tataiso hokae?

²⁰ Mikea o ile a boela a hatisa hore ho bohlokoa ho tsamaea le Molimo, ho mo tšepa joaloka Molimo oa ’nete, ho batla tataiso ea hae. (Liproverbia 3:5, 6; Hosea 7:10) Ka mor’a hore Bajuda ba khutle botlamuoeng, ba bang ba ile ba ea ho linohe, ho batho ba bolelang lintho tseo e leng hona li tla etsahala, le ho melimo ea bohata, mohlomong ba batla thuso nakong ea komello. Ha e le hantle, ba ne ba ipiletsa ho meea e khopo hore e ba thuse le hoja Jehova a ne a boletse ka ho hlaka hore o nyatsa liketso tseo kaofela. (Deuteronoma 18:9-14; Mikea 3:6, 11; 5:12; Hagai 1:10, 11; Zakaria 10:1, 2) Bajuda bao ba ne ba ikopanya le libōpuoa tsa moea tse hanyetsang Molimo oa ’nete!

21, 22. (a) Ke mekhoa efe ea ho sebelisana le meea e tloaelehileng sebakeng sa heno? (b) Ke hobane’ng ha bahlanka ba ’nete ba Jehova ba sa kenelle linthong tse etsoang ka matla a mohlolo?

²¹ Kajeno ba bang ba nahana hore meea e khopo e boletsoeng ka Mangolong e mpa e tšoantšetsa khopolo ea bobe feela. Leha ho le joalo, Bibele e senola hore bademona ba hlile ba teng ’me ke bona ba hlohlelletsang bonohe ba linaleli, boloi le mefuta e meng ea boselamose. (Liketso 16:16-18; 2 Petrose 2:4; Juda 6) Ka ho tšoanang, ho kotsi ho sebelisana le meea. Litsong tse ngata batho ba tšepile bo-kea-tseba le bo-ngakana-ntšonyana ba ipolelang hore ba na le matla a mohlolo, hape ba tšepile baloi. Ba bang ba batla tataiso ka ho noha liketsahalo tsa bophelo ba motho ka linaleli kapa ba sebelisa likarete tsa tarot, lithupa tse laolang, liboto tsa Ouija kapa mahakoe a khethehileng. Ho leka ho buisana le meea ea bafu le hona ho tloaelehile. Ho boleloa hore pele babusi ba bang ba etsa liqeto, ba sebelisa bonohe ba linaleli hape ba batla likeletso ho batho ba buisanang le meea. Ka ho hlakileng, sena sohle se khahlanong le keletso ea Mikea ea hore re tsamaee le Molimo oa ’nete, re latele tataiso ea hae.

²² Ka sebele uena—mohlanka oa ’nete oa Jehova—u lokela ho qoba mekhoa e joalo. Kholiseha hore ha ho mohla Molimo a sebelisang boselamose kapa matla a mohlolo ho senola thato ea hae kapa ho bontša matla a hae. Ho e-na le hoo, joalokaha Amose 3:7 e re tiisetsa, Jehova o ‘senolela bahlanka ba hae baprofeta taba ea hae ea lekunutu.’ Ho feta moo, ho kenella linthong tse sebetsang ka matla a mohlolo ho ka etsa hore motho a susumetsoe a be a laoloe ke moeta-pele oa bademona, Satane, ea leshano le ea ikemiselitseng ho thetsa batho. Eena le mahlahana a hae ba ikemiselitse ho ntša batho kotsi, ’me ka linako tsohle ba ’nile ba etsetsa batho sehlōhō esita le ho ba bolaea. (Jobo 1:7-19; 2:7; Mareka 5:5) Hoa utloahala hore ebe Mikea o ile a nyatsa bonohe le boloi ha a re khothalletsa hore re tsamaee le Molimo oa ’nete.

23. Ke mang feela ea ka re fang lintho tse loketseng tseo re li hlokang?

²³ Tataiso ea ’nete ea moea e fumanoa feela ho Jehova le borapeling ba hae bo hloekileng. (Johanne 4:24) Moprofeta Zakaria o ile a ngola, a re: “Etsang likōpo tsa lōna ho Jehova.” (Zakaria 10:1) Esita le haeba u hlaseloa ke makhotla a meea e khopo kapa a u leka, hopola hore “e mong le e mong ea ipiletsang lebitsong la Jehova o tla pholoha.” (Joele 2:32) Tšepiso ena ke ea bohlokoa ha re ntse re hopola letsatsi la hae le leholo.

24. U ithutile’ng ho Mikea 6:8?

²⁴ Ho hlakile hore mantsoe a Mikea 6:8 a etsa hore re nahane ka botebo. Hore re be batho ba matla boitšoarong, ho hlokahala hore re be le sepheo se loketseng le litšobotsi tsa Molimo. Hosea o ile a re khothatsa, rōna ba phelang “karolong e qetellang ea matsatsi.” O ile a re mehleng ea rōna, batho ba tšabang Molimo ba ne ba tla batla molemo oa Jehova. (Hosea 3:5) Amose o ile a tiisa hore Molimo o re memela hore re etse sona seo, a re: “Batlang se molemo, . . . e le hore le ’ne le phele.” Hape rea khothatsoa: “Le rate se molemo.” (Amose 5:14, 15) Haeba re etsa joalo, re tla khatholloa ke ho etsa seo Jehova a se batlang ho rōna.

[Mongolo o botlaaseng ba leqephe]

U KA ITHUTA ENG

• tabeng ea hore ebe Jehova o ipiletsa ho uena hore u phele ka melao ea hae?—Zakaria 6:15; Malakia 3:16, 18.

• ha u thuisa ka hore na ha e le hantle sebe ke eng le ha u nahana ka liphello tsa sona tse bohloko?—Malakia 4:1; Baroma 6:12-14; 1 Bakorinthe 6:18.

• liphosong tse ileng tsa etsoa ke batho ba Molimo ba boholo-holo?—Hosea 8:7; 10:12; 14:9.

U KA RUA MOLEMO JOANG

• ka ho talima ho kopanela liphate ka tsela eo Jehova a ho talimang ka eona?—Hosea 3:3; 4:11.

• ka ho sebelisa litemoso tsa baprofeta ba 12 tabeng ea ho qoba meharo le ho icheba bouena?—Mikea 7:5-7; Bafilipi 2:4.

• ka hore u se ke ua kenella mekhoeng ea ho sebelisana le meea le boloi?—Mikea 5:12; Nahume 3:4; Malakia 3:5.

[Lebokose le leqepheng la 100]

MOHLALA O MOTLE OA HO INYENYEFATSA LE BOTŠEPEHI

Jonase o ne a tšepahala a bile a inyenyefatsa, e leng litšobotsi tseo bangoli ba libuka tse ngata tseo e seng tsa Bibele ba se nang tsona. Ha aa ka a pata ho se mamele ha hae le linako tseo ka tsona a sa kang a tšepa Jehova. Ha aa ka a leka ho pata boikutlo bo fosahetseng boo a ileng a ba le bona ha a rongoa kapa ha Molimo a boloka Baninive. Ke mohlala o motle hakaakang oa ho inyenyefatsa oo re lokelang ho o etsisa!

[Setšoantšo se leqepheng la 98]

Jehova a ke ke a iphapanyetsa bobolu le leeme

[Setšoantšo se leqepheng la 104]

Ho tsebahatsa ka ho hlaka seo u se lumelang joaloka Mokreste ho tla u sireletsa

[Setšoantšo se leqepheng la 106]

Ka lerato Bakreste ba bangata ba thusa batho ba tsoang linaheng lisele hore ba ithute ka Jehova

[Litšoantšo tse leqepheng la 109]

Bahlanka ba Molimo ba lokela ho qoba lintho tse etsoang ka matla a mohlolo