Na U Khotsofaletse Litokisetso tsa Jehova tsa Moea?

“Le nteke ka hoo, ho bolela Jehova oa makhotla, ’me le bone ha nke ke ka le thibollela liphororo tsa leholimo, ke be ke le tšollele hlohonolofatso ka tekanyo e fetisisang!”—MALAKIA 3:10.

 1. Boholo ba libōpuoa tse phelang bo khotsofetse ka litokisetso life?

HAEBA u khaotsa ho phefumoloha moea, u tla shoa kamor’a metsotso e seng mekae. Haeba u khaotsa ho noa metsi, u tla shoa kamor’a matsatsi a se makae. Haeba u khaotsa ho ja lijo, u tla shoa kamor’a libeke tse seng kae. Empa haeba u khaotsa ho iphepa ka litokisetso tsa Jehova tsa moea, ha u e-shoa u tla shoela ruri. Jehova o fana ka moea, metsi le lijo tse hlokoang ke libōpuoa tsohle tse phelang. Kahoo, mopesaleme o re ho Jehova: “U fuparolla seatla sa hao, u kholisa tse utloang kaofela.” (Pesaleme ea 145:16) Takatso ea boholo ba lintho tse phelang e khotsofatsoa ke litokisetso tsa nama. Empa hona ha se ’nete ka libōpuoa tse batho.

 2. Takatso ea pelo ea motho ke eng, ’me tokisetso e hlokahalang bakeng sa ho e khotsofatsa ke efe?

² Jesu o ile a totobatsa sena ha a ne a re: “Motho a ke ke a phela ke bohobe feela, empa o tla phela le ke polelo tsohle tse tsoang molomong oa Molimo.” (Mattheu 4:4) Libōpuoa tse tlasana ha li nahane ka nako e sa feleng, empa motho o etsa joalo, joalokaha Moeklesia 3:11 (NW) e re: “O beile le nako e sa feleng lipelong tsa bona.” Kapa joalokaha Revised Standard Version e ngola tjena: “O beile nako e sa feleng kelellong ea motho.” Kahoo, takatso ea motho e tlohang botebong ba pelo ke ho phela ka nako e sa feleng, kapa ka ho sa feleng. Moea, metsi le bohobe ha lia lekana bakeng sa hoo. Ho phela ka ho sa feleng ho hloka litokisetso tsa moea tse theiloeng ‘lipolelong tsohle tse tsoang molomong oa Jehova.’ Kajeno, li fumanoa bukeng e le ’ngoe, Bibele, ’me li ngata haholo—e leng sohle seo u se hlokang, ho feta seo u ka se nkang. Raka ena ea lijo ha ho mohla e leng feela.

 3. Ke eng eo Jesu a e qollotseng e le ea bohlokoahali, ’me Pauluse o ile a ithuta lekunutu lefe?

³ Jesu o re rutile ho rapella lijo tse hlokahalang tsa nama: “U re fe kajeno bohobe ba rōna ba tsatsi le leng le le leng.” Empa hang kamorao ho moo o ile a bea litaba tsa moea ka pele-pele ha a ne a re: “Le mpe le batle ’muso oa Molimo le ho loka ha oona pele.” (Mattheu 6:11, 33) Lijo tsa nama li re boloka re phela letsatsi ka nako e ’ngoe; ho tsoela pele ho iphepa ka lijo tsa moea ho ka etsa joalo bophelo bohle, le ka ho sa feleng. Kahoo u se ke ua belaella lintho tse bonahalang. Pauluse ha a ka a etsa joalo. O buile ka mehloli ea lintho tsa moea e ileng ea etsa hore a khone ho khotsofala ho sa tsotellehe maemo a lintho tse bonahalang, a re: “Ke ithutile ho khora le ho lapa, ho ba naleng le ho ba bofumeng. Nka etsa tsohle ka Kreste ea mphang matla.”—Ba-Filippi 4:12, 13.

Koluoa e Tlela ba sa Khotsofalang

 4. Ke litokisetso life tse neng li sa lekana bakeng sa batho ba pele ba babeli, ’me ba ile ba batla eng e eketsehileng?

⁴ Leha ho le joalo, ba bangata ha baa khotsofalla litokisetso tsa Jehova. Batsoali ba rōna ba pele ha baa ka ba khotsofala. Ba ne ba phela tšimong ea paradeise—tšimo e ntle e neng e thabisa mahlo a bona, lipalesa tse monko o monate tse neng li nkhisa moea oo ba o phefumolohang hamonate, lijo tse hlabosang tse lutlisang mathe, ’mino oa linonyana o natefelang litsebe tsa bona. Ho feta moo, ba ne ba e-na le mosebetsi o thahasellisang oa ho hlokomela tšimo ena, le tlhohonolofatso ea ho tlatsa lefatše ka bana ba phethahetseng. Empa e ne e le baikhabi. Seo Molimo o neng o fane ka sona se ne se sa lekana. Ba ne ba batla ho eketsehileng. Ba ne ba batla ho iketsetsa liqeto ka se setle le se sebe. Kahoo ba etsa joalo, ’me qeto ea pele eo ba ileng ba e etsa e ne e le kotsi, e ileng ea fella ka hore ba lahleheloe ke ntho e ’ngoe le e ’ngoe ’moho le bana ba bona.—Genese 3:1-7, 16-19.

 5. Jehova o ile a hlohonolofatsa Baiseraele ka eng, hona ba ile ba itšoara joang?

⁵ Baiseraele ba ile ba etsisa mohlala oa bona o mobe. Molimo o ile oa ba lokolla bokhobeng Egepeta, oa ba etsa sechaba, oa ba fa Molao o phethahetseng, oa ba tataisa leetong la bona la lehoatateng, oa ba lokisetsa liaparo tseo ho seng mohla li ileng tsa taboha, ’me ka mohlolo oa ba phelisa ka manna a neng a theoha leholimong le metsi a ileng a tsoa lefikeng. Empa ha baa ka ba khotsofalla litokisetso tsa Jehova. (1 Ba-Korinthe 10:1-5) Ha ba haola lehoatateng, ba ’nile ba korotla nako le nako.—Exoda 13:21, 22; Numere 11:1-6; Deuteronoma 29:5.

 6. Ke tsela efe e ileng ea tlisetsa Baiseraele timetso e le sechaba?

⁶ Ba ’nile ba korotla leha ba se ba beiloe Lefatšeng la Pallo—lefatše le nonneng le noselitsoeng hantle ‘le kollang lebese le linotši.’ Ba ntse ba hloka teboho, ba ntse ba sa khotsofalle litokisetso tsa Jehova, ba lahla borapeli ba hae, ba retelehela borapeling ba bohata ba botona le botšehali, ba etsetsa Moloke mahlabelo ka bana ba bona, ’me ba itlisetsa timetso e le sechaba. Ha ba khutlisoa kholehong Babylona, ba latela lineano tsa molomo tse ileng tsa etsa Lentsoe la Molimo lefeela. Ba qetella ba bolaile Messia oa bona ea tšepisitsoeng, Kreste Jesu.—Deuteronoma 6:3; 8:7-9; Baahloli 10:6; 1 Marena 14:22-24; 2 Marena 21:1-16; Esaia 24:1-6; Mattheu 15:3-9; 27:17-26.

 7. Baruti ba Bokreste-’mōtoana ba kajeno ba tsoetse pele tseleng e tšoanang le ea baprista ba sa tšepahaleng ba mehleng ea Malakia joang?

⁷ Ho tla fihlela kajeno, batho ka kakaretso ba ’nile ba tsoela pele ho rata lithuto tsa bohata tsa bolumeli. Baruti ba nena lebitso la Jehova, ebile ha ba le sebelise. Ba mo hlompholla ka lithuto tseo e seng tsa Mangolo tse kang Boraro-bo-bong, ho se shoe ha moea le tlhokofatso e sa feleng ea mollo oa lihele. Lithuto tsa bona ha lia silafatsoa feela ke bohata bo nkiloeng Babylona ea boholo-holo le Egepeta ea boholo-holo empa hape, mabakeng a mangata, li silafalitsoe ke ho latola topollo ea Kreste le ho amohela thuto ea ho iphetola ha lintho. Li amoha Jehova thoriso e mo lokelang, joalokaha ho entse baprista ba mehleng ea Malakia.—Malakia 1:6-8; 3:7-9.

 8. (a) Ke memo efe eo baprista ba mehleng ea Malakia le baeta pele ba bolumeli ba kajeno ba ileng ba e hana? (b) Ke bo-mang ba ileng ba amohela memo eo, hona ka phello efe?

⁸ Baiseraele morao koo ba ne ba khothaletsoa ho itlhoekisa le ho khutlelana le Jehova. Jehova o itse: “Khutlelang ho ’na, ’me ke tla khutlela ho lōna.” O tsoetse pele ho ba mema ka ho re: “Le nteke ka hoo, ho bolela Jehova oa makhotla, ’me le bone ha nke ke ka le thibollela liphororo tsa leholimo, ke be ke le tšollele hlohonolofatso ka tekanyo e fetisisang!” (Malakia 3:7, 10) Ke masala a sechaba sa Bajode feela a ileng a khutla; kajeno, masala a tšepahalang a Iseraele oa moea a tsoile lefatšeng lena la malumeli a bohata. Oona, hammoho le bongata bo boholo ba batho bo hōlang ba barapeli ba kang linku tse ling, ba rorisa Jehova e le Lipaki tsa hae. (Johanne 10:16) Ho bona, Jehova o bolokile tšepiso ea hae ’me ‘o ba thibolletse liphororo tsa leholimo, le ho ba tšollela mahlohonolo ka tekanyo e fetisisang’—mokete oa sebele oa lijo tsa moea!—Esaia 25:6.

Lijo tsa Moea ka Bongata

 9. Ke litokisetso life tsa moea tse fumanehang kajeno, ka mekhoa efe, hona e le ka phello efe?

⁹ “Mohlanka ea khabane, ea bohlale” eo Jesu a profetileng ka eena mehleng ea rōna o tšoarehile ka ho lokisetsa lijo tsa moea ka bongata. (Mattheu 24:45) Selemong se fetileng feela, linaheng le lihlekehlekeng tsa maoatle tse 208, ’me e le ka lipuo tse ka bang 200, Lipaki tsa Jehova tse fetang limillione tse tharo li ile tsa etsa hore litokisetso tsena tsa moea li fumanehe ka maeto a ntlo le ntlo le ho abjoa ka makholo ha limillione a libuka, libukana le Libibele. Ba bangata ba ile ba e-ja lijo tsena tsa moea ’me ba ne ba khotsofetse: Ba bacha ba fetang 225 000 ba ile ba kolobetsoa ka selemo se le seng!

10. Ke litokisetso life tse fumanehang bakeng sa ho mamela keletso ea Pauluse ea ho bokana hammoho?

¹⁰ Litokisetso tsa Jehova tsa moea li boetse tsa etsoa hore li fumanehe ka likopano tsa setereke, likopano tsa potoloho le liboka tsa beke le beke tse hlano tse tšoaroang kamehla liphuthehong tse ka bang 52 000 tsa Lipaki tsa Jehova—kaofela e le ho utloa keletso ea Pauluse e ho Ba-Heberu 10:25 ea ‘ho se ngale liphutheho.’

11. Ke eng e tšoantšang tsela e lakatsehang bakeng sa ho lokisetsoa ha lijo tsa moea?

¹¹ Ha mosali a memela baeti lijong, ha a belise nama feela e be o e akhela poleiting. O sebelisa linoko le lintho tse e natefisang le lintho tse ling tse e khabisang hore e tle e ipiletse ha e shebjoa. Ponahalo ea eona feela le monko oa eona li lekane hore li lutlise mathe le hore maro a qaati a phalle. Ke ka tsela eo litokisetso tsa Jehova tsa moea li lokisitsoeng kateng—e seng ka mokhoa o omeletseng, le o tšoanang le oa libuka tse khōlō tsa boitsebiso, empa ka tsela e latsoehang ho thabisa kelello le ho ama pelo. Mokreste e mong le e mong o lokela ho latela mohlala oo. “Ha ke re, tsebe e ka ’na ea khetha lipolelo, joale ka mahalapa ha a tseba ho khetha lijo na?”—Jobo 12:11.

12. Ke mehlala efe eo re nang le eona ea ho lokisetsoa ha lijo tsa moea ka mokhoa o lutlisang mathe?

¹² Buka ea Tataiso ea Sekolo sa Boboleli sa Puso ea Leholimo thutong ea eona ea pele e hatisa ho sebelisoa ha mantsoe a thabisang. Salomone ha a ka a sebelisa mantsoe a nepahetseng feela empa o boetse a sebelisa a thabisang. (Moeklesia 12:10) Pesaleme ea 45:2 e ile ea profeta tjena ka Messia, Jesu Kreste: “Mosa o tšoloha melomong ea hao.” Ho ipakile ho bile joalo. Bamameli ba hae ba ile ba makatsoa ke “mantsoe a molemo a tsoang molomong oa hae.” Ba ’na ba mo khomarela, ba tsohella tempeleng ho tla mo utloa, ba mo mamela ka thabo, ba ne ba hlolletsoe ke tsela eo a rutang ka eona. Balaoli ba neng ba rometsoe ho ea mo tšoara ba ile ba re: “Ha ho e-so ho be motho ea buang joale ka motho eo, le ka mohla o le mong.” (Luka 4:22; 19:48; 21:38; Mareka 12:37; Mattheu 7:28; Johanne 7:46) Buka ea Tataiso e lokiselitsoe ho re thusa hore re bue mantsoe a thabisang a ’nete. Na u e sebelisa ka botlalo?

13. Ba-Efese 5:15-17 e hatisa hakae ka ‘ho lopolla nako,’ hona ke hobane’ng ha hoo ho hatisoa?

¹³ Ba-Efese 5:15-17 ea re eletsa: “Ha ho le joalo, iponeleng hore le tsamaee ka kelello, e seng joale ka maoatla, e mpe e be joale ka ba bohlale. Lopollang linako, hobane mehla e se e le mebe. Ka baka leo, le se ke la etsa ka booatla, le mpe le tsebisise hantle ho ratoang ke Molimo.” Lentsoe la Segerike le fetoletsoeng mona e le ‘nako’ ha le bolele nako ka kutloisiso e akaretsang feela empa le bolela nako e khethiloeng, nako e loketseng bakeng sa morero o khethehileng. Leetsi la Segerike le fetoletsoeng e le ‘ho lopolla’ ke ka sebopeho se matla, ’me “moelelong oa lona mohlomong le bolela ‘ho lopolla ka matla’; ke hore, ho sebelisa monyetla o mong le o mong o hlahang.”a Na u sebelisa monyetla o mong le o mong oa nako kemisong ea hao ho iketsa ea bohlale ka ho kopanela litokisetsong tsa Jehova tsa moea? U lokela ho etsa joalo. Kaofela re lokela ho etsa joalo. Hobane’ng? “Hobane mehla e se e le mebe.”

Ho Tloha Lehoatateng la Moea ho ea Paradeiseng ea Moea

14. Ke temana efe ea Bibele e sebeletsang e le mohlala oa tšobotsi e khethehileng ea New World Translation Reference Bible ea rōna ea puo ea Senyesemane?

¹⁴ Tokisetso ea moea e ikhethang ke New World Translation of the Holy Scriptures—With References ea rōna, e lokollotsoeng ka 1984. E na le litšobotsi tse ngata tse re nolofaletsang ho sebelisa ‘nako e lopolotsoeng’ ho eketsa tsebo ea rōna.b Mohlala o mong ke litšupiso tsa eona. Nka Pesaleme ea 1:3, e sebetsanang le boemo ba motho ea thuisang molao oa Molimo motšehare le bosiu. Temana eo e baleha tjena: “O joale ka sefate se hlomiloeng pel’a [“melatsoana ea,” NW] metsi a koellang, se beang litholoana tsa sona ka khoeli ea tsona, seo mahlaku a sona a sa foforeheng; see a se etsang kaofela sea mo atla.” Ho na le ho eketsehileng, ho hongata, ho amehang temaneng ena ho feta seo ’mali a kopanang le sona ha a bala ka potlako ’me a feta.

15. Ke lipotso life tse botsoang ka sefate sa Pesaleme ea 1:3 ’me ke leseli lefe leo Esaia 44:4 (NW) e fanang ka lona?

¹⁵ Ka kōpo hlokomela sena: Sefate sea lengoa. Se lenngoe ke mang? Se pela melatsoana, ka bongateng. Na sefate se le seng se mela mabopong a melatsoana e ’maloa? Che. Kahoo laba-labela ho tseba. Joale sefate see taba ea sona ke efe? Litšupiso li bula mahlo a kelello tsa rōna. Ke Esaia 44:4 le Esaia 61:3 le Jeremia 17:8. Esaia 44:4 (NW) e re batho ba hae ba tla ba joale ka lifate “pel’a matangoana a metsi.” Matangoana a mangata a metsi? E, melatsoana ke matangoana a nosetso a nosetsang lifate tse serapeng sa lifate tsa litholoana!

16. Ke tlhakiso efe hape e fanoang ke Esaia 61:3 le Jeremia 17:8?

¹⁶ Esaia 61:3 e bitsa tse ling tsa lifate tsena “lieike tsa ho loka, le lehlomela la Jehova le tlang ho mo tlotlisa.” Jehova ke eena ea li hlomang a bileng a li nosetsang, ’me ke eena ea tlotlisoang ke litholoana tse beoang ke lifate tsena! Jeremia 17:8 e tšoantša monna eo ea thuisang molao oa Molimo motšehare le bosiu le “sefate tse hlomiloeng pel’a metsi, seo metso ea sona e namelang metsing; leha ho ka tla komello, ha se utloe letho, le mahlaku a sona a ntse a le matala; le selemong sa letsatsi ha se tšabe letho, ha se lese ho bea litholoana.” Makhasi a sona ha a foforehe; ntho e ’ngoe le e ’ngoe eo se e etsang ea atleha!

17. Joale ho hlaha setšoantšo sefe mabapi le Pesaleme ea 1:3, ’me re nka karolo efe ho sona?

¹⁷ Joale mahlo a rōna aa tutuboloha! Pesaleme ea 1:3 e re fa setšoantšo se setle. Ba thuisang molao oa Jehova motšehare le bosiu ba tšoana le lifate tse lemiloeng pel’a mohloli oa metsi a sa psheng. Ha e sa le karolo efe kapa efe ea mekhatlo e hlophisitsoeng ea lefatše e omeletseng empa hona joale ba kopanela le mokhatlo o hlophisitsoeng oa Molimo o fuoang metsi a khathollang a ’nete ka bongata. Ka sebele, ba paradeiseng ea moea, ba khatholloa moeeng, ’me ba bea litholoana tsa moea tlotlisong ea Jehova. ’Me ak’u nahane feela! Molimo o sebelisa Lipaki tsa oona ho supisa batho tsela ea ho tsoa mekhatlong e se nang thuso e omeletseng le ea lehoatata ea lefatše lena hore ba ee paradeiseng ena e khathollang e noselitsoeng hantle ea moea.

18. Ba bang ba itšoara joang ha ba bona ba bang ba hatela pele bopaking, hona ke hobane’ng ha e ka ’na eaba baa haelloa?

¹⁸ Hore re tle re phethe mosebetsi ona ka mafolo-folo, re tlameha ho laea likelello tsa rōna le lipelo tsa rōna e le hore re ka sebelisa litokisetso tsohle tsa Jehova tsa moea. Ba bang ba utloa ba bang ba hlalosa litemana tsa Bibele ’me joale ba re: “Ke lakatsa eka nka be ke tseba Bibele joaloka eena!” Empa haeba ba joalo ba ka itaea hore ba ithute Bibele, le bona ba ka eketsa tsebo ea bona ea Bibele. Ba bang ba utloa ba bang ba paka ka ntlo le ntlo ’me joale ba re: “Ke lakatsa eka nka be ke paka joaloka eena ha a ea ka ntlo le ntlo!” Empa haeba ba itaea hore ba kopanele kamehla tšebeletsong ea tšimo, ba sebelisa buka Ho Bea Mabaka ka Mangolo, le bona e ka ba Lipaki tse hlomelletsoeng haholoanyane. Ba bang ba utloa ba bang ba fana ka lipuo tsa Bibele ’me joale ba re: “Ke lakatsa eka nka fana ka lipuo joaloka eena.” Empa le mona, haeba bana ba itaea hore ba lokisetse likabelo tsa bona hantle, ba monya lithuto tsa Buka ea Tataiso ea Sekolo sa Boboleli sa Puso ea Leholimo, le bona ba tla tsoela pele ho ba libui tse hloahloa.

19. Ke senotlolo sefe sa ho ntlafatsa matla a rōna a ho paka?

¹⁹ Joale, ho lakatsa ke ntho e ntle, empa takatso e se nang mesebetsi ha e phethe mosebetsi. Ke mosebetsi o etsang hore takatso e phethahale. Itaee e le hore u ka lopolla nako, ’me u etse mosebetsi o tla phetha takatso hore e be ea ’nete. Haeba u sa sebelise litšutšu, li tla repha. Haeba u sa sebelise tsebo ea kelello, e tla baleha. Haeba u sa sebelise kelello ea hao, matla a hao a ho nahana a tla fela. Haeba u sa sebelise tsebo, u tla lahleheloa ke seo u nang le sona. Nthong e ’ngoe le e ’ngoe, molao ke hore, “E sebelise kapa e tla u lahlehela.” Ke ka ‘ho sebelisoa matla a kelello e bang a koetlisitsoeng.’ Joale ‘matla a ho nahana ka booona a tla u lebela, kutloisiso e u boloke.’—Ba-Heberu 5:14; Liproverbia 2:11, NW.

20. Ka ho fumana molemo oa litokisetso tsa Jehova tsa moea, re tla qoba eng, hona re tla rua eng?

²⁰ Kahoo sebelisa litokisetso tsa Jehova tsa moea. Nyakalla le batho ba hae ba khotsofetseng. Baleha tlala eo Amose a e profetileng: “Bonang, matsatsi a tla, ho itsalo Morena Jehova, ao ke tla romela ho lapa lefatšeng, e seng ho lapela bohobe, leha e le ho nyoreloa metsi; empa e leng ho lapela mantsoe a Jehova.” (Amose 8:11) Kopanela le bao ba jang le ba nyakallang, e seng le ba hanang lijo ’me ba soaba: “Ho itsoe ke Morena Jehova: Bonang, bahlanka ba ka ba tla ja, empa lōna le tla lapa; bonang, bahlanka ba ka ba tla noa, empa lōna le tla nyoroa; bonang, bahlanka ba tla thaba, empa lōna le tla soaba.”—Esaia 65:13.

[Mongolo o botlaaseng ba leqephe]

Na u sa Hopola?

◻ Sechaba sa Iseraele se ile sa bontša ho se khotsofalle litokisetso tsa Jehova joang?

◻ Malakia 3:10 e phethahalitsoe holim’a Lipaki tsa Jehova joang?

◻ Ke moelelo ofe o ipatileng oa Pesaleme ea 1:3?

◻ Ke hobane’ng ha e le habohlokoa ho sebelisa lintho tseo re ithutileng tsona ka litokisetso tsa Jehova tsa moea?

[Setšoantšo se leqepheng la 15]

Bao ba thuisang molao oa Jehova ba tšoana le lifate tse hlomiloeng pel’a mohloli oa metsi a sa psheng