“A re ke re Lahleng Hohle ho re Imelang”

Mary o ile a lla, “Ke soabile haholo ’me ke nyahame.” Ha a bua ka moroalo oa boikarabelo ba Bokreste, mosali enoa oa Mokreste o ile a eketsa: “Ke bona metsoalle e khathala. Le ’na ke utloa mokhathala le khatello ea maikutlo. Ka kōpo nthuseng hore ke utloisise hore na ke hobane’ng ha sena se etsahala.”

NA LE uena u ikutloa hore u ka tlas’a khatello ea maikutlo, u khathetse haholo hore u ka hlokomela boikarabelo ba hao ba puso ea Molimo ka ho lekaneng? Na ka nako e ’ngoe ho bonahala tšebeletso ea Bokreste e le moroalo o boima, mojaro o sa mamelleheng? Bakreste ba bangata ba tšepahalang ba feta linakong tsa ho nyahama, hobane ka mehla re pota-potiloe ke matla a khahlanong le rōna a ka felisang thabo ea rōna. Ho ba Mokreste oa sebele kajeno e hlile ke phephetso. Ka hona, ka linako tse ling ba bang ba ka utloa eka tšebeletso ea Bokreste ke moroalo o boima.

Ho Batla Sesosa

Mangolo a hlakisa hore Jehova ha a lebella hore re etse lintho tseo re ke keng ra li finyella. Moapostola Johanne o itse ‘litaelo tsa Molimo ha li boima.’ (1 Johanne 5:3) Ka ho tšoanang Jesu o bolelletse balateli ba hae: “Jarang joko ea ka ’me le ithute ho ’na, hobane ke na le botho bo bonolo le pelo e ikokobelitseng, ’me le tla fumana khatholoho bakeng sa liphefumolohi tsa lōna. Hobane joko ea ka e mosa ’me mojaro oa ka o bobebe.” (Mattheu 11:29, 30, NW) Ho hlakile hore hase thato ea Jehova hore re ikutloe re imetsoe haholo tšebeletsong ea rōna ho eena.

Joale, ke joang, Mokreste ea tšepahalang a ka talimang boikarabelo ba hae ba Bokreste e le phahlo e boima? Mohlomong ho ameha mabaka a ’maloa. Hlokomela mantsoe ana a moapostola Pauluse: “A re ke re lahleng hohle ho re imelang . . . , ’me re ke re titime ka sebete peisong eo re e beetsoeng.” (Ba-Heberu 12:1) Mantsoe a Pauluse a supa hore ka nako e ’ngoe Mokreste a ka itjarisa meroalo e sa hlokahaleng. Sena ha se hlile ha se kopanyelletse libe tse tebileng. Empa mohlomong Mokreste a ka etsa liphoso kahlolong tse ka etsang hore bophelo ba hae e be bo rarahaneng haholo, li mo thatafalletse ho matha peisong e behiloeng ka pel’a rōna.

Pono e Leka-lekaneng ka Lintho tse Bonahalang

Ka mohlala, nahana ka taba ea mosebetsi oa boipheliso. Linaheng tse ngata, maemo a moruo a ka qobella Mokreste ho sebetsa lihora tse telele. Leha ho le joalo, hangata, batho ba sebetsa feela hore ba tsoele pele kapa ho re ba bokelle lintho tse ngata tse ntle. Ka ho hlahlobisisa hape litlhoko tsa bona tsa sebele, Bakreste ba bang ba ile ba ho fumana ho le bohlale ho etsa liphetoho boemong ba bona ba mosebetsi. Ho bile joalo ka Debbie le monna oa hae, bao ka bobeli e leng Lipaki tsa Jehova. O re: “Boemo ba rōna ba chelete bo ne bo fetohile, ’me ho ne ho se ho se lebaka la sebele la hore ke tsoele pele ke sebetsa ka mehla. Empa ho ne ho le thata ho khaotsa.” Kapele o ile a qala ho utloa khatello ea ho ba le mosebetsi o mongata. Oa hlalosa: “Moqebelo e ne e le lona feela letsatsi la ka leo ke lokolohileng ka lona ho etsa mosebetsi oa ntlo. Hangata ke ne ke ikutloa ke sa batle ho ea tšebeletsong ea tšimo. Ke ne ke khathatsehile ka hona, ’me letsoalo la ka le ne le nkhathatsa, empa leha ho le joalo, ke ne ke rata mosebetsi oa ka! Qetellong, ke ile ka lokela ho tobana le ’nete. Ho ne ho e-na le tharollo e le ’ngoe feela. Ke ile ka tlohela mosebetsi.” Ke ’nete hore, phetoho e khōlō joalo e ne e ka thatafalla ba bang. Leha ho le joalo, ho hlahlobisisa kemiso ea mosebetsi oa hao ka hloko ho ka senola hore u lokela ho etsa liphetoho tse itseng.

Ho ka ba le litsela tse ling tsa hore re itokolle mejarong e sa hlokahaleng. Ho thoe’ng ka ho fokotsa ho eta ha rōna khafetsa bakeng sa monyaka, lipapali, kapa boithabiso bo bong—ho kopanyelletsa le nako e sebelisoang ho shebelletsoe thelevishene? ’Me esita le ka mor’a ho finyella ho leka-lekana ho lakatsehang likarolong tsena, ho ka ’na ha hlokahala hore ka mehla ho etsoe liphetoho ho boloka ho leka-lekana hoo.

Ho Etsa Lintho ka ho Lekanyetsa ke Habohlokoa

Ho etsa lintho ka ho lekanyetsa litabeng tse joalo ho tla re thusa ho tloaelana le maemo a macha ha a hlaha. Ka hona, re ka boloka pono e kholisehileng ka tšebeletso ea rōna.—Ba-Efese 5:15-17; Ba-Filippi 4:5.

Na u iphumana u le tlas’a khatello ea ho etsa se lekanang le seo ba bang ba se etsang tšebeletsong ea Molimo? Sena le sona se ka eketsa ho belaela le ho nyahama bophelong ba hao. Le hoja mohlala o motle oa ba bang ka sebele o ka u khothalletsa ho etsa ho eketsehileng, ho etsa lintho ka ho lekanyetsa ho tla u thusa ho ipehela lipakane tseo u ka khonang ho li finyella ho lumellana le maemo a hao le matla a hao. Mangolo a re bolella: “E mong le e mong a ke a leke mesebetsi eo e leng ea hae, ’me ke moo a tla ba le sebaka sa ho ithorisa ka tsa hae, e seng ka tsa ba bang. Hobane e mong le e mong o tla jara phahlo ee e leng ea hae.”—Ba-Galata 6:4, 5.

Litloaelo tsa sebaka le lineano le tsona li ka eketsa boima mejarong ea rōna. Mehleng ea Jesu batho ba ne ba khathatsoa ke ho leka ho iphaphatha le melao e mengata ea bolumeli le lineano tse neng li behiloe ke batho. Kajeno, batho ba Jehova ba lokollotsoe lineanong tsa bohata tsa bolumeli. (Bapisa le Johanne 8:32.) Ho ntse ho le joalo, Mokreste a ka tšoareha ka ho fetelletseng ka litloaelo tsa sebaka. Ka mohlala, ka nako e ’ngoe liketsahalo tse kang machato li etsoa ka litloaelo tse majaba-jaba. Mohlomong litloaelo tsena ha li phoso ka botsona, ’me e ka ’na ea e-ba tse ntle haholo le tse thahasellisang. Leha ho le joalo, mohlomong Mokreste a ka ’na a hloka nako kapa chelete ea ho etsa lintho tseo kaofela, ’me ho phehella ho etsa joalo ho ka mo ekelletsa mejaro e meng e sa hlokahaleng.

Nahana ka se ileng sa etsahala ha Jesu a etela mosali ea bitsoang Maretha. Ho e-na le hore a rue molemo ka ho felletseng bohlaleng ba Jesu bo boholo, “Maretha o ne a tšoarehile ke mosebetsi o mongata.” O ne a e-na le lintho tse ngata tseo a neng a lokela ho li etsa. (Luka 10:40, BPN) Empa Jesu ka mosa o ile a eletsa hore a ka ’na a nolofatsa litokisetso tsa hae tsa lijo e le hore a ka rua molemo thutong ea hae. (Luka 10:41, 42) Sena se bontša hantle hore kahlolo e molemo le ho etsa lintho ka ho lekanyetsa li tla u thusa ho finyella ho leka-lekana ho loketseng tšebeletsong ea hao ea Bokreste.—Jakobo 3:17.

Kahlolo e molemo e boetse ea hlokahala ha u khetha metsoalle. Liproverbia 27:3 ea lemosa: “Lejoe le boima, le lona lehlabathe, empa hlonamo ea lehlanya e li feta tse peli.” Ka mehla, metsoalle ea hao e haufi e tla ba le tšusumetso e matla tseleng ea hao ea ho nahana. Ho ba le botsoalle le batho ba potlakelang ho fumana liphoso le ho tšoaea batho ba bang liphoso ka phuthehong ho ka jala lipeō tsa ho nyahama le monahano o phoso ka hare ho uena. (1 Ba-Korinthe 15:33) Haeba u hlokomela hore sena ke bothata, ho fetola ka bohlale metsoalle ea hao ho ka bebofatsa moroalo oa hao.

E-ba ea Inyenyefatsang ha U Tsamaea le Molimo

Ho Mikea 6:8, (NW) re fumana potso ena e susumetsang monahano: “Ke eng seo Jehova a se batlang ho uena ha e se . . . hore u inyenyefatse ha u tsamaea le Molimo oa hao?” Boinyenyefatso bo hlalosoa e le ho lemoha ha motho meeli ea hae. Ba sa lemoheng meeli ea bona ba ka ikimetsa ka lintho tse ngata tse ba tlamang. Sena se etsahetse ka Bakreste ba hōlileng moeeng, esita le balebeli, sa fella ka ho nyahama, ho soaba, le ho felloa ke thabo. Kenneth, moholo oa Mokreste, o ile a lumela: “Ke ile ka ipona ke tepella maikutlong, ’me ke ile ka re, Nke ke ka lumella sena se etsahale ho ’na. Ke ile ka fokotsa lintho tse ling tseo ke neng ke itlamme ka tsona ’me ka tsepamisa kelello linthong tseo ke khonang ho li etsa.”

Esita le moprofeta Moshe ea ikokobelitseng o ile a ba le bothata ba ho lemoha meeli ea hae. Kahoo Jethro, mohoehali oa hae, o ile a thusa Moshe ho nahana ka ho hlakileng mabapi le mosebetsi o moholohali oo a neng a leka ho o etsa ka boeena. Jethro o ile a botsa: “Taba eo u e etsetsang sechaba ke efe? . . . Taba eo u e etsang ha e molemo. U tla khathala ruri . . . hobane mosebetsi o ea u imela, u ka sitoa ho o phetha u ’notši. . . . U ikhethele banna ba bohlale har’a sechaba, . . . nyeoe tse kholo kaofela ba li tlise ho uena, linyeoe tsohle tse nyenyane ba li ahlole e le bona, ba u imolle, ba jare hammoho le uena.” Hang-hang Moshe o ile a qala ho abela ba bang mesebetsi ea hae e meng, ka hona a fumana thuso ho seo e neng e se e fetoha moroalo o sa jareheng.—Exoda 18:13-26.

Ka nako e ’ngoe Moshe o ile a re ho Jehova: “’Na ke ’notši, ke sitoa ho jara sechaba sena kaofela, hobane se nkimela ruri.” Hape, karabelo e bile hore a abe mosebetsi. Sena e ka ’na ea e-ba tharollo ea boemo ba hao haeba u ikutloa u imetsoe ke lintho tse ngata tse u tlamang.—Numere 11:14-17.

Jehova o re Thusa ho Jara Moroalo

Jesu o ile a re joko ea hae e mosa, ’me moroalo oa hae o bobebe empa hase o se nang boima. Joko eo Jesu a neng a re mema hore re inkele eona hase joko ea botsoa. Ke joko ea boinehelo bo phethahetseng ho Molimo joaloka morutuoa oa Jesu Kreste. Ka hona, tekanyo e itseng ea boima kapa khatello e tlisoa ke ho ba Mokreste oa sebele. (Mattheu 16:24-26; 19:16-29; Luka 13:24) Ha maemo a lefatše a ntse a mpefala le ho feta, likhatello li tla eketseha. Leha ho le joalo, re na le lebaka la ho ba ba kholisehileng ponong ea rōna hobane memo ea Jesu e bolela hore ba bang ba ka kena ka tlas’a joko ea hae le eena le hore o tla ba thusa.a Ka hona, hafeela re ntse re latela tataiso ea Kreste, moroalo oa rōna o tla lula o ntse o laoleha hobane o tla re thusa.

Molimo o hlokomela ba o ratang, ’me o lebela lipelo le matla a ho nahana a bohle bao ka thapelo ba lahlelang mejaro ea bona ho oona. (Pesaleme ea 55:22; Ba-Filippi 4:6, 7; 1 Petrose 5:6, 7) Mopesaleme o itse: “Morena a ke a rorisoe ka matsatsi ’ohle; o jara boima ba rōna ka matsatsi ’ohle!” (Pesaleme ea 68:19) E, tiiseha hore letsatsi le leng le le leng Molimo o tla u jarela mojaro oa hao haeba u lahla hohle ho u imelang ’me u matha ka mamello peisong eo u e behetsoeng.

[Mongolo o botlaaseng ba leqephe]

[Setšoantšo se leqepheng la 24]

Baholo ba bohlale ba ikemiselitse ho abela ba bang mesebetsi le ho abelana moroalo le bona