Na U ka be U Ile Ua Lemoha Mesia?
JESU KRESTE o ile a qeta lilemo tse tharo le halofo a bolela Lentsoe la Molimo har’a Baiseraele. Empa qetellong ea tšebeletso ea hae ea lefatšeng, batho ba bangata ba mehleng ea hae ba ne ba sa mo nke e le Mesia, kapa “Motlotsuoa” ea tšepisitsoeng oa Molimo. Hobane’ng?
Bibele e re thusa ho khetholla mabaka a mangata ao ka ’ona Bajuda ba lekholong la pele la lilemo ba sa kang ba amohela Jesu e le Mesia. Mabaka a mararo ho ana a sitisa ba bangata ho amohela boemo boo Jesu a leng ho bona kajeno e le Morena oa Bomesia ea busang.
“Re Batla ho Bona Pontšo”
Lebaka le leng leo ka lona Bajuda ba lekholong la pele la lilemo ba sa kang ba lemoha Mesia e bile ho hana ha bona ho amohela lipontšo tsa Mangolo tse neng li supa hore ke Mesia. Nako le nako, batho ba neng ba mamela Jesu ba ne ba batla hore a etse pontšo ho paka hore o ne a e-tsoa ho Molimo. Ka mohlala, Matheu 12:38 e tlaleha hore ba bang ba bangoli le Bafarisi ba ile ba re: “Mosuoe, re batla ho bona pontšo e tsoang ho uena.” Na Jesu o ne a se a sa ba etsetsa lipontšo? Ka sebele o ne a li entse.
Ka nako eo Jesu o ne a se a entse mehlolo e mengata. O ne a ile a fetola metsi veine, a phekola moshemane ea neng a e-shoa, a phekola mohoehali ea kulang oa Petrose, a hloekisa molepera, a etsa hore monna ea shoeleng litho a tsamaee, a folisa monna ea kutseng ka lilemo tse 38, a phekola letsoho le omeletseng la monna e mong, a imolla batho ba bangata maloetseng a bona a utloisang bohloko, a phekola lekhoba la molaoli oa lebotho la ntoa, a tsosa bafung mora oa mohlolohali e mong, a ba a phekola sefofu se semumu. Mehlolo ena e ne e etsahetse Kana, Kapernauma, Jerusalema le Naine. Ho feta moo, litaba tsa mehlolo e joalo li ile tsa tlala Judea eohle le naha e mathōkong a eona.—Johanne 2:1-12; 4:46-54; Matheu 8:14-17; 8:1-4; 9:1-8; Johanne 5:1-9; Matheu 12:9-14; Mareka 3:7-12; Luka 7:1-10; 7:11-17; Matheu 12:22.
Ho hlakile hore lipontšo li ne li le ngata tse pakang hore Jesu e ne e le Mesia. Le hoja a ile a etsa lipontšo tse ngata hakana ka pel’a batho, ha baa ka ba lumela ho eena. Ba ileng ba bona bopaki ba hore Jesu o ne a ronngoe ke Molimo empa ba sa ka ba mo amohela e le Mesia, ba ne ba foufetse moeeng. Lipelo tsa bona li ne li le thata ebile li sa angoe ke ’nete.—Johanne 12:37-41.
Mehleng ea rōna teng ho joang? Batho ba bang ba re, “Ke lumela feela ntho eo ke e boneng ka mahlo a ka.” Empa na ke bohlale ho itšoara ka tsela eo? Boprofeta ba Bibele bo bontša hore Jesu o se a behiloe teroneng e le Morena oa leholimo ’Musong oa Bomesia. Kaha ha a bonahale, re hloka pontšo e re thusang ho lemoha bobusi ba hae, bo ileng ba tšoaea qaleho ea matsatsi a ho qetela a tsamaiso ena e khopo ea lintho. Na u lemoha pontšo ee?—Matheu 24:3.
Ho ea ka Bibele, qaleho ea puso ea Kreste e le Morena oa Bomesia e ne e tla tšoauoa ka lintoa, litšisinyeho tsa lefatše, likhaello tsa lijo le mafu a seoa ka tekanyo eo ho seng mohla e kileng ea e-ba teng. “Matsatsing a ho qetela,” likamano tsa batho li ne li tla khetholloa ka boithati, meharo le ho hloka boitšoaro. (2 Timothea 3:1-5; Matheu 24:6, 7; Luka 21:10, 11) Ntle ho bopaki ba tatellano ea liketsahalo ho ea ka nako ea tsona, litšobotsi tse sa tšoaneng tse fetang 20 tsa matsatsi a qetello li khetholla qaleho ea puso ea Mesia ka 1914.—Bona Molula-Qhooa oa March 1, 1993, leqepheng la 5.
“Ba Ratang Chelete”
Lerato la lintho tse bonahalang ke lebaka le leng leo ka lona Bajuda ba ileng ba hana ho amohela Jesu e le Mesia. Ho nkela leruo holimo ho ile ha thibela ba bangata ho latela Jesu. Ka mohlala, Bafarisi ba ne ba tsebahala ka ho ba “ba ratang chelete.” (Luka 16:14) Nahana ka ’musi e mong e monyenyane oa morui ea ileng a atamela Jesu ’me a botsa hore na a ka fumana bophelo bo sa feleng joang. Jesu o ile a mo arabela ka ho re: “U boloke litaelo ka ho tsoelang pele.” Mohlomong ka lebaka la ho belaella hore ho hlokahala ho eketsehileng ho feta ho boloka melao e itseng, mohlankana enoa o ile a botsa: “Ke bolokile tsena kaofela; ke sa ntse ke haelloa ke eng?” Jesu a re ho eena: ‘Rekisa tseo e leng tsa hao ’me u fe mafutsana ’me u tla ba le letlotlo leholimong, ’me u tle u be molateli oa ka.’ E ne e le monyetla o mokaakang—ho ba morutuoa oa Mesia! Empa ’musi enoa o ile a tsamaea, a tsielehile. Hobane’ng? Hobane ho eena letlotlo la lefatšeng e ne e le la bohlokoa ho feta letlotlo la leholimong.—Matheu 19:16-22.
Boemo ha boa fetoha. Ho ba molateli oa ’makhonthe oa Morena oa Bomesia ho bolela ho etelletsa lithahasello tsa moea ka pele ho eng kapa eng, ho akarelletsa le ’ona matlotlo a lefatšeng. Ho bohle ba nang le lerato la lintho tse bonahalang, sena ke phephetso. Ka mohlala, banyalani ba bang ba baromuoa naheng e ’ngoe ea Bochabela ba ile ba bua le mosali e mong ka Bibele. Ka lebaka la ho lumela hore o ne a tla rata ho ithuta haholoanyane ka Jehova Molimo le Mora oa hae, Jesu Kreste, banyalani bana ba ile ba mo fa Molula-Qhooa le Tsoha! O ile a itšoara joang? A botsa: “Na limakasine tsee li tla nthusa hore ke fumane chelete e eketsehileng?” Mosali enoa o ne a thahasella lintho tse bonahalang haholo ho feta litaba tsa moea.
Banyalani bona bana ba ile ba ithuta Bibele le mohlankana ea ileng a qala ho ba teng libokeng Holong ea ’Muso. Batsoali ba hae ba ile ba re ho eena: “U itšenyetsa nako. U tšoanela ho batla mosebetsi oa bobeli, u sebetse mantsiboea ’me u fumane chelete e eketsehileng.” Ho bohloko hakaakang ha batsoali ba khothalletsa bana ba bona ho etelletsa lintho tse bonahalang ka pele ho ho ithuta ka Morena oa Bomesia! Maele a Sechaena a re: “’Musi leha a ka rua joang le joang, a ke ke a reka lilemo tse likete tse leshome tsa bophelo.”
Ba bangata ba hlokometse hore ho ithuta ka Morena oa Bomesia le ho mo latela ha ho siee sebaka sa lerato la chelete. Paki e ’ngoe ea Jehova e neng e e-na le khoebo ea eona e neng e buseletsa haholo, e ile ea re: “Ho monate haholo ho ba le chelete e ngata empa ha ho hlokahale. Chelete hase eona e etsang hore motho a thabe.” Hona joale ke setho sa lelapa la Bethele lekaleng le leng la Europe la Mokhatlo oa Watch Tower.
“Ho Tšaba Bajuda”
Ho tšaba batho ke lebaka le leng hape leo ka lona Bajuda ba sa kang ba amohela Jesu e le Mesia. Ho amohela Bomesia ba hae phatlalatsa ho ne ho bolela ho ipeha kotsing ea ho itšenyetsa botumo bo botle. Ho ba bang ho ne ho le boima ho itella ntho e joalo. Nahana ka Nikodemase eo e neng e le setho sa lekhotla le phahameng la Bajuda le bitsoang Sanhedrine. Ka lebaka la ho khahloa ke lipontšo le lithuto tsa Jesu, o ile a lumela: “Rabi, rea tseba hore uena joaloka mosuoe u tlile u tsoa ho Molimo; kaha ha ho le ea mong ea ka etsang lipontšo tsena tseo u li etsang ntle leha Molimo a e-na le eena.” Leha ho le joalo, Nikodemase o ile a ea ho Jesu ka mafifi, mohlomong e le ho qoba hore Bajuda ba bang ba mo tsebe.—Johanne 3:1, 2.
Ho ba bangata ba ileng ba utloa Jesu ha a bua, ho amoheloa ke batho e ne e le habohlokoa ho feta ho amoheloa ke Molimo. (Johanne 5:44) Ha Jesu a ne a le Jerusalema Moketeng oa Metlotloane ka 32 C.E., “ho ne ho e-na le menyenyetsi e mengata mabapi le eena har’a bongata.” Ha ho ea neng a bua ka Jesu phatlalatsa “ka lebaka la ho tšaba Bajuda.” (Johanne 7:10-13) Le batsoali ba monna eo Jesu a ileng a mo phekola bofofu, ba ne ba themelekana ho lumela hore mohlolo oo o ne o e-tsoa ho moemeli oa Molimo. Le bona ba ne ba “tšaba Bajuda.”—Johanne 9:13-23.
Ba bang baa hlokomela kajeno hore hona joale Jesu o busa e le Morena oa Bomesia leholimong, empa ba tšaba ho lumela sena phatlalatsa. Ho bona ke ntho e boima haholo ho tloha seriti har’a batho. Jeremane, ka mohlala, Paki e ’ngoe ea Jehova e bile le lipuisano tsa Bibele le monna e mong ea ileng a lumela ho re: “Seo lōna Lipaki le se bolelang ka Bibele ke ’nete. Empa haeba nka ba Paki kajeno, hosasane e mong le e mong o tla be a tseba. Ba tla nahana joang ka ’na mosebetsing, motseng le mokhatlong oo ’na le lelapa la ka re leng litho tsa oona? Nke ke ka khona.”
Ho tšaba motho ho bakoa ke eng? Boikhohomoso, ho rata botumo ka lapeng le har’a metsoalle, ho se batle ho songoa le ho kokobetsoa, ho tšoenyeha ka ho se kheme le bongata. Maikutlo a joalo e ba teko haholo-holo ho ba qalang ho ithuta Bibele le Lipaki tsa Jehova. Ka mohlala, mosali e mong e monyenyane o ile a nyakalla ha a tseba ka Paradeise eo ’Muso oa Bomesia o neng o tla e hloma lefatšeng tlas’a puso ea Jesu Kreste. Empa o ne a chesehela disco haholo, ’me ho tšaba motho ho ile ha mo thibela ho bua le ba bang ka tšepo ena. Qetellong, o ile a iteta sefuba hore a bue ka bolokolohi ka Bibele. Metsoalle ea hae ea disco ea mo hlanamela, empa monna oa hae le batsoali ba hae ba bontša thahasello. Mosali enoa le ’mè oa hae ba ile ba kolobetsoa qetellong, ’me monna oa hae le ntate oa hae ba qala ho ithuta Bibele. E bile moputso o mokaakang oa ho hlōla tšabo ea motho!
Na ka Sebele U Lemoha Mesia?
Barutuoa ba bang ba Jesu ba ne ba le teng ha a e-shoa thupeng ea tlhokofatso. Ba ne ba lemohile hore ke Mesia ea boletsoeng esale pele. Ho ne ho boetse ho le teng babusi ba Bajuda, bao, kamoo ho neng ho le kateng, ba neng ba sa ntsane ba batla pontšo. “A a ipholose, haeba enoa ke eena Kreste [kapa Mesia] oa Molimo, Mokhethoa.” (Luka 23:35) Na ba ne ba tla batla pontšo ka ho sa feleng? Jesu o ne a entse mehlolo e mengata haholo. Ho phaella moo, tsoalo ea hae, tšebeletso ea hae, nyeoe ea hae, polao ea hae le tsoho ea hae li ne li phethahalitse boprofeta bo bongata ba Mangolo a Seheberu.—Bona “Lengolo Lohle le Bululetsoe ke Molimo ’me le Molemo,” e hatisitsoeng ke Watchtower Bible and Tract Society of New York, Inc., leqepheng la 343-4.
Bo-mofeta-ka-tsela ba ile ba nyelisa Jesu, hobane ba ne ba hanne bopaki ba hore ke Mesia. (Matheu 27:39, 40) Ka lebaka la ho rata lintho tse bonahalang, masole a ile a arolelana liaparo tsa Jesu, a aba seaparo sa hae sa ka hare ka lotho. (Johanne 19:23, 24) Ho tšaba batho ho ile ha ipha sebaka liketsahalong tse ling. Ka mohlala, nahana ka Josefa oa Arimathea eo e neng e le setho sa Sanhedrine. E ‘ne e le morutuoa oa Jesu empa oa sephiri ka lebaka la ho tšaba ha hae Bajuda.’ Josefa le Nikodemase ba ile ba hlokomela setopo sa Jesu ka mor’a hore a shoe. Ka tsela eo Josefa o ile a hlōla ho tšaba batho hoo a neng a e-na le hona.—Johanne 19:38-40.
Na u ka be u ile ua lemoha hore Jesu ke Mesia haeba u ne u phela lekholong la pele la lilemo? Ho etsa joalo ho ka be ho ile ha u hloka hore u amohele bopaki ba Mangolo, u hane monahano oa ho rata lintho tse bonahalang le ho se inehele tšabong ea motho. Matsatsing ana a ho qetela, e mong le e mong ho rōna o lokela ho ipotsa, ‘Na hona joale ke lemoha hore Jesu ke Morena oa Bomesia?’ O tla tloha a laola litaba tsa lefatše. Ha seo se etsahala, na u tla ba har’a bao ka sebele ba lemohang hore Jesu Kreste ke Mesia ea tšepisitsoeng esale pele?
[Setšoantšo se leqepheng la 28]
Le ka mohla u se ke ua iphapanyetsa bopaki ba hore Jesu ke Morena oa Bomesia
[Setšoantšo se leqepheng la 31]
Hangata ho ithuta ka Mesia ho bolela ho hlōla tšabo ea hore na ba bang ba tla re’ng