Ba Ile ba Etsa Thato ea Jehova

Ketelo e Ileng ea Putsoa ka ho Enneng

E TLAMEHA ebe leeto la ho tloha Sheba ho ea Jerusalema le ne le le boima bakeng sa mofumahali. O ne a tloaetse ho phela mabothobothong. Joale, o ne a tsamaea ka likamele leeto le bolelele ba lik’hilomithara tse 2 400, boholo ba lona e le lehoatateng le chesang. Ho latela khakanyo e ’ngoe, e tlameha ebe leeto la hae le ile la nka matsatsi a 75, le hona e le ho ea feela!a

Ke hobane’ng ha mofumahali eo ea ruileng a ile a tloha lehaeng la hae le mabothobotho Sheba ’me a nka leeto leo le boima?

Tlaleho e Thahasellisang

Mofumahali oa Sheba o ile a tla Jerusalema ka mor’a ho “utloa tlaleho ka Solomone mabapi le lebitso la Jehova.” (1 Marena 10:1, NW) Ha hoa hlalosoa ka ho toba hore na mofumahali eo o ne a utloile eng. Leha ho le joalo, rea tseba hore Jehova o ile a hlohonolofatsa Solomone ka bohlale bo ikhethileng, leruo le tlhompho. (2 Likronike 1:11, 12) Ho tlile joang hore mofumahali a tsebe see? Kaha Sheba e ne e le setsi sa khoebo, e ka ’na eaba o ile a utloa ka botumo ba Solomone ka bahoebi ba neng ba etela naheng ea hae. E ka ’na eaba ba bang ba bona e ne e le ba kileng ba ea Ofire, naha eo Solomone a neng a e-na le litšebelisano tse khōlō haholo tsa khoebo le eona.—1 Marena 9:26-28.

Leha ho le joalo, mofumahali o ile a fihla Jerusalema ka “letšoele le leholo, le ka likamele tse bofileng libano le khauta e ngata haholo le mahakoe a bohlokoa.” (1 Marena 10:2a) Ba bang ba re “letšoele le leholo” le ne le akarelletsa basireletsi ba hlometseng. Sena se ka utloisisoa ha ho nahanoa hore mofumahali eo o ne a le boemong bo matla ba ho hlomphuoa ’me o ne a nkile lintho tsa bohlokoa bo ka jang mashome a limilione a liranta.b

Leha ho le joalo, hlokomela hore mofumahali enoa o ile a utloela ka botumo ba Solomone “mabapi le lebitso la Jehova.” Kahoo, lena e ne e se feela leeto la khoebo. Ka ho hlakileng, mofumahali eo o ne a tlile ka ho khetheha ho tla utloa bohlale ba Solomone—mohlomong le ho tla ithuta ho itseng ka Molimo oa hae, Jehova. Kaha ho ka etsahala hore ebe e ne e le oa leloko la Sema kapa la Kama, bao e neng e le barapeli ba Jehova, e ka ’na eaba o ne a labalabela ho utloa ka bolumeli ba baholo-holo ba hae.

Lipotso Tse Qakang, Likarabo Tse Khotsofatsang

Ha a kopana le Solomone, mofumahali eo o ile a qala ka ho mo leka ka “lipotso tse qakang.” (1 Marena 10:1, NW) Lentsoe la Seheberu le sebelisitsoeng mona le ka fetoleloa e le “lilotho.” Empa sena ha se bolele hore mofumahali eo o ile a kenya Solomone papaling ea bosaoana. Ho thahasellisang ke hore ho Pesaleme ea 49:4, lentsoe le tšoanang la Seheberu le sebelisitsoe ho hlalosa lipotso tsa bohlokoa tse mabapi le sebe, lefu le topollo. Ka hona, ho ka etsahala hore ebe mofumahali oa Sheba o ne a tšohla lintlha tse tebileng le Solomone, tse ileng tsa leka ho teba ha bohlale ba hae. Bibele e tlaleha hore o ile a qala ho “’mehela tsohle tsee a li hopotseng pelong ea hae.” Ka ho tšoanang, Solomone o ile a ‘mo arabela lipotso tsohle tsa hae, ha se ke ha e-ba taba le e ’ngoe e hlōlang morena, ee a sa kang a mo hlalosetsa eona.’—1 Marena 10:2b, 3.

Mofumahali oa Sheba o ile a khahloa ke bohlale ba Solomone le katleho ea ’muso oa hae hoo a ileng ‘a sala a khathetse matla.’ (1 Marena 10:4, 5, NW) Ba bang ba nka polelo ena e bolela hore mofumahali o ile a sala a “ahlame.” Setsebi se seng sona se bile se re o ile a ilibana! Ho sa tsotellehe hore na ho ile ha etsahala eng, mofumahali eo o ile a hlolloa ke seo a ileng a se bona le ho se utloa. O ile a re bahlanka ba Solomone ba thabile kahobane ba utloa bohlale ba morena, ’me o ile a rorisa Jehova ka ho beha Solomone teroneng. Joale o ile a fa morena limpho tse theko e boima, khauta feela ha e baloa ka lipalo tsa kajeno, e etsa R247 600 000. Solomone le eena o ile a fana ka limpho, a fa mofumahali eo “tsohle tsee a li lakalitseng, le tsee a li kōpileng.”c—1 Marena 10:6-13.

Seo re ka Ithutang Sona

Jesu o ile a sebelisa mofumahali oa Sheba e le mohlala o sebetsang bakeng sa bangoli le Bafarisi. O ile a ba bolella: “Mofumahali oa boroa o tla tsosoa kahlolong le moloko ona ’me o tla o ahlola; hobane o ile a tla a tsoa lipheletsong tsa lefatše ho tla utloa bohlale ba Solomone, empa, bonang! ho hong ho fetang Solomone ho teng mona.” (Matheu 12:42) E, mofumahali oa Sheba o ile a bontša kananelo e khōlō bakeng sa bohlale boo Molimo a neng a fane ka bona. Haeba o ne a tsamaile lik’hilomithara tse 2 400 ho ea mamela Solomone, ka sebele bangoli le Bafarisi ba ne ba tlamehile ho mamela Jesu ea neng a le har’a bona ka hloko.

Le rōna kajeno re ka bontša kananelo e tebileng bakeng sa Solomone e Moholoanyane, Jesu Kreste. Joang? Tsela e ’ngoe ke ka ho latela taelo ea hae ea ho ‘etsa batho ba lichaba tsohle barutuoa.’ (Matheu 28:19) Tsela e ’ngoe ke ka ho hlahlobela haufi mohlala oa Jesu le boikutlo ba hae ba kelello, ebe joale re nahana ka tsona.—Bafilippi 2:5; Baheberu 12:2, 3.

Ke ’nete hore ho latela mohlala oa Solomone e Moholoanyane ho tla hloka hore re etse boiteko bo itseng. Leha ho le joalo, re tla putsoa ka ho enneng. Ka sebele, Jehova o tšepisa batho ba hae hore haeba ba bontša moea oa boitelo, o tla ‘ba thibollela liphororo tsa leholimo, a be a ba tšollele hlohonolofatso ka tekanyo e fetisisang.’—Malakia 3:10.

[Mongolo o botlaaseng ba leqephe]