Khaolo ea 43

Bara le Barali Babo Rōna ke Bo-mang?

KA LEKHETLO le leng Mosuoe e Moholo o ile a botsa potso e ’ngoe e makatsang. E ne e re: “’Mè ke mang, ’me barab’eso ke bo-mang?” (Matheu 12:48) Na u ka araba potso eo?— Mohlomong ua tseba hore ’mè oa Jesu o bitsoa Maria. Empa na u tseba mabitso a barab’abo?— Na o ne a boetse a e-na le likhaitseli?—

Bibele e re barab’abo Jesu ba ne ba bitsoa “Jakobo le Josefa le Simone le Judase.” ’Me Jesu o ne a e-na le likhaitseli nakong ea ha a ne a etsa mosebetsi oa boboleli. Kaha Jesu e ne e le eena letsibolo, bana ba bang bohle ba ne ba le banyenyane ho eena.—Matheu 13:55, 56; Luka 1:34, 35.

Na barab’abo Jesu le bona e ne e le balateli ba hae?— Bibele e re qalong ba ne ba “sa bontše tumelo ho eena.” (Johanne 7:5) Leha ho le joalo, hamorao Jakobo le Judase (eo hape a bitsoang Juda) ba ile ba fetoha barutuoa ba hae, ’me ba bile ba ngola libuka tsa Bibele. Na ua tseba hore na ba ile ba ngola libuka life?— E, ba ile ba ngola buka ea Jakobo le ea Juda.

Le hoja ho sa buuoe ka likhaitseli tsa Jesu ka Bibeleng, rea tseba hore bonyane o ne a e-na le tse peli. Leha ho le joalo, e ka ’na eaba li ne li feta moo. Na likhaitseli tsee tsa hae e ile ea e-ba balateli ba hae?— Bibele ha e hlalose, kahoo ha re tsebe. Empa na ua tseba hore na ke hobane’ng ha Jesu a ile a botsa potso e reng, “’Mè ke mang, ’me barab’eso ke bo-mang?”— A re ke re bone.

Jesu o ne a ntse a ruta barutuoa ba hae ha motho e mong a mo kena hanong a re ho eena: “’M’ao le barab’eno ba eme ka ntle, ba batla ho bua le uena.” Kahoo Jesu o ile a sebelisa monyetla oo ho ruta thuto e ’ngoe ea bohlokoa ka ho botsa potso ena e makatsang: “’Mè ke mang, ’me barab’eso ke bo-mang?” O ile a otlollela letsoho ho barutuoa ba hae ’me a araba a khotsa a re: “Bonang! ’Mè le barab’eso!”

Jesu a ntan’o hlalosa seo a se bolelang, a re: “Mang kapa mang ea etsang thato ea Ntate ea leholimong, eo ke mor’eso, le morali’eso, le ’Mè.” (Matheu 12:47-50) Sena se bontša kamoo Jesu a neng a rata barutuoa ba hae kateng. O ne a re ruta hore barutuoa ba hae ba tšoana le barab’abo, baralib’abo le bo-’mè ho eena.

Ka nako eo banab’abo Jesu hantle—e leng Jakobo, Josefa, Simone le Judase—ba ne ba sa lumele hore Jesu ke Mora oa Molimo. E tlameha ebe ba ne ba sa lumele seo lengeloi Gabriele le neng le ile la se bolella ’mè oa bona. (Luka 1:30-33) Kahoo mohlomong ba ne ba tšoara Jesu ka ho hloka mosa. Motho leha e le mang ea etsang joalo hase mora kapa morali oabo motho oa sebele. Na u tseba motho e mong ea ileng a tšoara mora kapa morali oabo ka ho hloka mosa?—

Bibele e bua ka Esau le Jakobo le kamoo Esau a ileng a halefa kateng hoo a bileng a re: ‘Ke tlil’o bolaea mor’eso Jakobo.’ ’Mè oa bona Rebeka, o ile a tšoha hoo a ileng a romela Jakobo hore a ee sebakeng se seng e le hore Esau a se ke a mo bolaea. (Genese 27:41-46) Leha ho le joalo, ka mor’a lilemo tse ngata Esau o ile a fetoha, ’me a haka Jakobo le ho mo aka.—Genese 33:4.

Hamorao, Jakobo o ile a ba le bara ba 12. Empa bara ba baholo ba Jakobo ba ne ba sa rate moena oa bona Josefa. Ba ne ba mo honohela hobane e ne e le thatohatsi ea ntate oa bona. Kahoo ba ile ba mo rekisetsa batho ba rekisang makhoba ba neng ba le tseleng e eang Egepeta. Eaba ba bolella ntate oa bona hore Josefa o bolailoe ke sebata. (Genese 37:23-36) Na eo e ne e se taba e mpe?—

Hamorao baholoane ba Josefa ba ile ba soabela seo ba se entseng. Kahoo Josefa o ile a ba tšoarela. Na u bona kamoo Josefa a neng a tšoana le Jesu kateng?— Baapostola ba Jesu ba ile ba baleha ha a ne a le khathatsong, ’me Petrose a ba a latola hore oa mo tseba. Empa Jesu, ho tšoana le Josefa, o ile a ba tšoarela kaofela ha bona.

Ho ne ho boetse ho e-na le bara ba motho ba babeli, e leng Kaine le Abele. Le ho bona re ka ithuta ho itseng. Molimo o ile a khona ho bona pelo ea Kaine hore o ne a hlile a sa rate mor’abo. Kahoo Molimo a bolella Kaine hore o lokela ho fetola litsela tsa hae. Haeba Kaine a ne a hlile a rata Molimo, a ka be a ile a mamela. Empa o ne a sa rate Molimo. Ka letsatsi le leng Kaine o ile a re ho Abele: “A re ee naheng.” Abele o ile a tsamaea le Kaine. Ha ba le bang naheng, Kaine a otla mor’abo habohloko hoo a ileng a mo bolaea.—Genese 4:2-8.

Bibele e re bolella hore ho na le thuto ea bohlokoa eo re lokelang ho ithuta eona ho seo. Na ua tseba hore na ke efe?— ‘Ona ke molaetsa oo re o utloileng ho tloha tšimolohong: Re lokela ho ratana; re se ke ra tšoana le Kaine, ea neng a tsoa ho ea khopo.’ Kahoo bana ba motho ba lokela ho ratana. Ha baa lokela ho tšoana le Kaine.—1 Johanne 3:11, 12.

Ke hobane’ng ha re sa lokela ho tšoana le Kaine?— Ke hobane Bibele e re ‘o ne a tsoa ho ea khopo,’ e leng Satane Diabolose. Kaha Kaine o ile a itšoara joaloka Diabolose, ho ne ho tšoana feela leha Diabolose e ne e le ntate oa hae.

Na ua bona hore na ke hobane’ng ha e le habohlokoa hore u rate banab’eno?— Haeba u sa ba rate, u tla be u etsisa bana ba mang?— Bana ba Diabolose. Akere ha u batle ho ba etsisa?— Kahoo u ka bontša joang hore u batla ho ba ngoana oa Molimo?— Ka ho rata banab’eno e le kannete.

Empa lerato ke eng?— Lerato ke boikutlo bo tebileng bo ka hare ho rōna bo etsang hore re batle ho etsetsa batho ba bang lintho tse ntle. Re bontša hore re rata batho ba bang ha re e-na le boikutlo bo mofuthu ka bona le ha re ba etsetsa lintho tse ntle. Joale banab’abo rōna bao re lokelang ho ba rata ke bo-mang?— Hopola hore Jesu o ile a ruta hore ke batho ba bōpang lelapa le leholo la Bokreste.

Ke habohlokoa hakae hore re rate bara le barali baa babo rōna ba Bakreste?— Bibele e re: “Ea sa rateng mor’abo [kapa morali’abo], eo a mo boneng, a ke ke a rata Molimo, eo a e-s’o mo bone.” (1 Johanne 4:20) Kahoo re ke ke ra rata ba seng bakae feela ka lelapeng la Bokreste. Re lokela ho ba rata kaofela. Jesu o ile a re: “Bohle ba tla tseba ka sena hore le barutuoa ba ka, haeba le e-na le lerato har’a lōna.” (Johanne 13:35) Na u rata bara le barali bohle beno?— Hopola hore haeba u sa ba rate, e ke ke eaba u hlile u rata Molimo.

Re ka bontša joang hore re hlile re rata bara le barali babo rōna?— Haeba re ba rata, ha re na ho qoba ho ba haufi le bona hobane re sa batle ho ba buisa. Re tla bontša botsoalle ho bona kaofela. Kamehla re tla ba etsetsa se molemo le ho ithaopela ho arolelana lintho le bona. ’Me haeba ba le bothateng, re tla ba thusa hobane ha e le hantle re lelapa le leholo.

Haeba re hlile re rata bara le barali bohle babo rōna, seo se paka eng?— Se paka hore re barutuoa ba Jesu, Mosuoe e Moholo. ’Me na seo hase sona seo re batlang ho ba sona?—

Ho bontša lerato ho bara le barali babo rōna ho boetse ho tšohloa ho Bagalata 6:10 le 1 Johanne 4:8, 21. Ke hobane’ng ha u sa phetle Bibele ea hao ebe u bala litemana tsee?

[Setšoantšo se leqepheng la 223]

Jesu o ile a re bara le barali babo ke bo-mang?

[Setšoantšo se leqepheng la 224]

Re lokela ho ithuta thuto efe ho seo Kaine a ileng a se etsa Abele?

[Setšoantšo se leqepheng la 226]

U ka bontša joang hore u rata ngoan’eno?