Jesu—Bophelo le Tšebeletso tsa Hae

Ho Rua Molemo Litšoantšong tsa Jesu

HA BARUTUOA ba e-tla ho Jesu kamor’a puo ea hae ho matšoele lebōpong la leoatle, ba lakatsa ho tseba ka mokhoa oa hae o mocha oa ho ruta. E, ba ’nile ba mo utloa ha a sebelisa litšoantšo empa e seng ka mokhoa o batsi hakana. Kahoo ba batla ho tseba: “Na u buela’ng le bona ka litšoantšo na?”

Lebaka le leng leo a etsang joalo ka lona ke hore a phethahatse mantsoe a moprofeta: “Ke tla ahlamisa molomo oa ka ka litšoantšo, ke pepese litaba tse neng li patiloe ha e sa le lefatše le theoa.” Empa hona ho ama taba e kholoanyane. Ho sebelisa ha hae litšoantšo ho sebeletsa morero oa ho thusa ho senola se ka lipelong tsa batho.

Ha e le hantle, batho ba bangata ba thahasella Jesu feela e le mopheti oa lipale ea khabane le moetsi oa mehlolo ea khabane, e seng e le ea ka sebeletsoang joaloka Morena le ea ka lateloang ka boitelo. Ha ba batle ho sitisoa maikutlong a bona kapa tseleng eo ba phelang ka eona. Ha ba batle hore molaetsa o tebe ho fihlela moo. Joale Jesu o re:

“Ke ka baka leo ke buang le bona ka litšoantšo, kahobane leha ba bona, ha ba bone; leha ba utloa, ha ba utloe, ’me ha ba utloisise. Ho phethahala ho bona ho profetiloeng ke Esaia, ha a re: . . . pelo ea sechaba sena e nonne.”

Jesu o tsoela pele, “Empa mahlo a lōna a lehlohonolo, hobane a bona, le litsebe tsa lōna li lehlohonolo, hobane lia utloa. Ka ’nete ke re ho lōna: Baprofeta ba bangata le ba lokileng ba bangata ba lakalitse ho bona tseo le li bonang, ’me ha ba ka ba li bona, le ho utloa tseo le li utloang, ’me ha ba ka ba li utloa.”

E, baapostola ba 12 le ba nang le bona ba na le lipelo tse amohelang. Ka baka leo Jesu o re: “Ke hobane lōna le neiloe ho tseba liphiri tsa ’muso oa maholimo, empa bona ha ba ka ba neoa.” Ka lebaka la ho lakatsa ha bona kutloisiso, Jesu o hlalosetsa barutuoa ba hae setšoantšo sa mojali.

Jesu o re, “lijalo [“peō,” TLP] ke lentsoe la Molimo,” ’me mobu ke pelo. Oa hlalosa ka peō e jetsoeng ka thōko ho tsela moo ho leng thata: “Diabolose o’a tle, a hlakole lentsoe lipelong tsa bona, hore ba se ke ba lumela, le ho bolokeha.”

Ka lehlakoreng le leng, peō e jetsoeng mokurutlaneng ke lipelo tsa batho ba amohelang lentsoe ka thabo. Leha ho le joalo, kaha lentsoe le ke ke la teba lipelong tse joalo, batho bana ba oela ka thōko ha nako ea teko kapa hloriso e fihla.

Ha e le ka peō e oetseng har’a meutloa, Jesu o tsoela pele ho bolela hore e supa batho ba utloileng lentsoe. Bana, leha ho le joalo, ba hoholoa ke lipelaelo le maruo le menate ea bophelo bona, kahoo ba pupetsoa ka ho feletseng ’me ha ba phethe letho.

Qetellong, ka peō e jetsoeng mobung o motle, Jesu o re, bana ke bao, kamor’a ho utloa lentsoe ka pelo e ntle le e molemo, baa le boloka ’me ba bea litholoana ka mamello.

Barutuoa baa ba ileng ba batla Jesu hore ba fumane tlhaloso ea lithuto tsa hae ba lehlohonolo hakaakang! Morero oa Jesu ke hore litšoantšo tsa hae li utloisisoe, hore li fetisetse ’nete ho ba bang. O re, “Ha ho motho, ekareng ha a hotelitse lebone, ea le koahelang ka pitsa, leha e le ho le bea tlas’a malao.” Che, “o le hloma kandelareng.” Ka hona Jesu oa eketsa: “Ka baka leo, bonang kamoo le utloang kateng.” Mattheu 13:10-23, 34-36; Mareka 4:10-25, 33, 34; Luka 8:9-18; Pesaleme ea 78:2; Esaia 6:9, 10.

◆ Ke hobane’ng ha Jesu a buile ka litšoantšo?

◆ Barutuoa ba Jesu ba bontšitse joang hore ba fapane le matšoele?

◆ Jesu o hlalosa setšoantšo sa mojali joang?