Na Maruo a ka U Etsa ea Thabileng?
Morena Solomone o ne a tseba bohlokoa ba chelete. O ile a ngola: “Bohobe bo thabisa basebetsi, ’me veine eona e natefisa bophelo, empa chelete ke eona e etsang hore tsohle li fumanehe.” (Moeklesia 10:19, NW) Ho ja le metsoalle ho ka thabisa haholo, empa, u hloka chelete hore u fumane bohobe kapa veine. Kaha chelete ke oona mokhoa oo lintho tse bonahalang li fumanoang ka oona, ke eona e ‘etsang hore tsohle li fumanehe.’
LE HOJA Solomone a ne a ruile ka mokhoa o hlollang, o ne a tseba hore maruo a na le meeli ea ’ona. O ile a hlokomela hore bophelo ba ho rata lintho tse bonahalang ha bo lebise thabong. O ngotse: “Ea ratang chelete ha e k’e b’e mo lekane, ea ratang leruo kamehla oa le halala.”—Moeklesia 5:10, BPN.
A re nke hore morui o fumana leruo le eketsehileng le ho feta. Solomone o re: “Ha leruo le ata, bafepuoa baa ata.” (Moeklesia 5:11, BPN) Ha “leruo” kapa matlotlo a motho a ata, ho hlokahala batho ba bangata bakeng sa ho le hlokomela. Litei, bahlokomeli, bahlanka, balebeli le ba bang—kaofela ba lokela ho lefuoa bakeng sa tšebetso ea bona. Hoo ho boetse ho hloka chelete e ngata le ho feta.
Boemo bo joalo bo ama thabo ea motho ka ho toba. Xenophon, rahistori oa Mogerike ea phetseng lekholong la bone la lilemo B.C.E., o ile a ngola se ileng sa buuoa ke mofutsana e mong ea ileng a rua:
“Mehlolo! na u hlile u nahana hore . . . ho ba ha ka le ho hongata ho etsa hore ke phele ke thabile haholoanyane?” O ile a tsoela pele: “Ha u hlokomele hore hona joale, ho ja le ho noa le ho robala ha ka ho hang ha hoa nkekeletsa thabo e fetang eo ke neng ke e-na le eona ha ke sa le mofutsana. Ho ba ha ka le ho hongata ho nkekelelitse boikarabelo ba ho hlokomela lintho tse eketsehileng, ho abela ba bang lintho tse eketsehileng le matšoenyeho a ho hlokomela lintho tse eketsehileng ho feta tseo ke neng ke li hlokomela pele. Hona joale bahlanka ba bangata ba ntlo ea ka ba itšetlehile ka ’na bakeng sa lijo, ba bangata bakeng sa seo ba se noang, ’me ba bangata bakeng sa liaparo, ha ba bang ba hloka ho ea ngakeng; ’me e mong o ntlela ka taba ea hore phiri e hlasetse linku, kapa pholo e oetse selomong ’me ea shoa, kapa hore likhomo li hlasetsoe ke seoa se itseng. Kahoo, ’na ke bona eka . . . hona joale ha ke ruile ho hongata, ke na le matšoenyeho a eketsehileng ho feta ao ke neng ke e-na le ’ona ha ke sa na le ho fokolang.”
Lebaka le leng le etsang hore batho ba hahamalle leruo le eketsehileng ke ho thetsoa ke seo Jesu Kreste a se bitsitseng “matla a thetsang a maruo.” (Matheu 13:22) Ba thetsehile hobane ha ho mohla ba fumanang khotsofalo le thabo tseo ba li lebeletseng maruong ana ao ba a batlang ka sefutho se sekana. Ba beha lebaka la hore seo leruo le lenyenyane le hlōlehang ho se phetha, leruo le lengata le tla se phetha. Kahoo, ba lula ba loanela ho ba le ho eketsehileng.
Lerato la Chelete ha le Lebise Thabong
Ho ameha ha morui ka matlotlo a hae ho ka ’na ha mo sitisa ho robala ka khotso. Solomone oa ngola: “Boroko ba motho ea sebetsang bo monate, leha a e-ja haholo, leha a e-ja hanyenyane; empa khora ea morui ha e mo fe boroko.”—Moeklesia 5:12.
Ha motho a ameha ka ho feteletseng ka hore a ka ’na a lahleheloa ke matlotlo a hae, ho ameha ho fetang feela ho haelloa ke boroko. Ha Solomone a hlalosa motho ea lekhonatha, oa ngola: “O jella lefifing ka matsatsi ’ohle a hae, a tšoenyehile haholo, a kula ’me a halefile.” (Moeklesia 5:17, NW) Ho e-na le hore a fumane thabo leruong la hae, o le ja a ‘tšoenyehile,’ joalokaha eka o hlonamisoa le ke chelete eo a e sebelisang bakeng sa ho reka lijo. Maikutlo a sa utloahaleng joalo a ka ba a mo bakela ho kula. ’Me ho kula ho phaella matšoenyehong a ea lekhonatha hobane ho mo sitisa ho bokella leruo le eketsehileng.
Mohlomong sena se u hopotsa seo moapostola Pauluse a ileng a se ngola: “Ba ikemiselitseng ho rua ba oela molekong le lerabeng le litakatsong tse ngata tse se nang kelello le tse kotsi, tse lihelang batho timetsong le tšenyehong. Etsoe lerato la chelete ke motso oa mefuta eohle ea lintho tse kotsi, ’me ka ho hahamalla lerato lena ba bang . . . ba itlhabile hohle ka bohloko bo boholo.” (1 Timothea 6:9, 10) Batho baa qhekella, ba bue leshano, ba utsoe, ba iphetole matekatse, ’me ba be ba bolaee moo ba lelekisang chelete. Phello e ba motho ea hlabiloeng ke bohloko ba maikutlo, ba ’mele le ba moea moo a lekang ho fumana le ho tšoarella maruong. Na ee e utloahala e le tsela e lebisang thabong? Le hanyenyane!
Ho Khotsofalla Seo re Nang le Sona
Solomone o ne a e-na le ho hongata hoo a ka ho buang ka pono e leka-lekaneng ka maruo. O ngotse: “Joalo ka ha [motho] a na a tsoile mpeng ea ’m’ae, o tla ikhutlela a le feela, a ikele joalo ka ha a tlile; o tla ea a sa nke letho mokhathaleng oa hae, leo a ka eang le lona a le fuparetse ka letsoho. Hoo ke ho lemohileng ke hona: ho leng molemo le ho leng hotle, ke ho ja, le ho noa, le ho latsoa boiketlo ka mokhathala oohle oo motho a ikhathatsang ka oona tlas’a letsatsi, ka tšiu tsohle tsa bophelo tseo Molimo o mo neileng tsona; hobane ke eona kabelo eo a e abetsoeng.”—Moeklesia 5:15, 18.
Mantsoe ana a bontša hore thabo ha ea itšetleha ka ho phehella ho bokella leruo bakeng sa nako e tlang eo e ka ’nang eaba re tla be re se re le sieo ka eona. Ho molemohali ke hore re khotsofale le ho thabela se hlahisoang ke ho sebetsa ha rōna ka thata. Moapostola Pauluse o bontšitse maikutlo a tšoanang lengolong la hae le bululetsoeng le eang ho Timothea, a re: “Ha rea tlisa letho lefatšeng, leha e le hore re ka tloha le ntho leha e le efe. Kahoo, ha re e-na le tsa ho phela le liaparo le tšireletso, re tla khotsofalla lintho tsena.”—1 Timothea 6:7, 8; bapisa le Luka 12:16-21.
Senotlolo se Lebisang Thabong
Solomone o ne a e-na le monono oa maruo le oa bohlale ba bomolimo. Empa o ile a amahanya thabo le bohlale, eseng le chelete. O itse: “Ho lehlohonolo motho ea fumaneng bohlale, ea fihletseng kutloisiso; hobane khoebo ea jona e fetisa silefera, ho ata ha jona ho fetisa ha khauta. Bo fetisa liperela ka bohlokoa, tsohle tse lakatsehang ha li lekane le bona. Bo kakatletse bolelele ba litšiu letsohong le letona, le menono le boholo letsohong le letšehali. Litsela tsa bona ke litsela tse khahlehang, mebila ea bona ke khotso. Ke sefate sa bophelo ho ba bo ruileng, ba bo lotolotsang ba na le lehlohonolo.”—Liproverbia 3:13-18.
Ke hobane’ng ha bohlale bo feta lintho tse bonahalang? Solomone o ngotse: “Bohlale ke tširelo, joalo ka ha le eona chelete e le tširelo, empa moo tsebo e fetisang ka molemo, ke hobane bohlale bo phelisa ba bo ruileng.” (Moeklesia 7:12) Le hoja chelete e sireletsa ka tsela e itseng, e etsa hore mong’a eona a reke tseo a li hlokang, bohlale bo ka sireletsa motho hore a se etse lintho tse ka behang bophelo ba hae kotsing. Bohlale ba ’nete bo ke ke ba phemisa motho ho shoa pele ho nako feela, empa kaha bo thehiloe tšabong e nepahetseng ea Molimo, bo tla lebisa motho ho fumaneng bophelo bo sa feleng.
Ke hobane’ng ha bohlale ba bomolimo bo lebisa thabong? Hobane bohlale ba ’nete bo ka tsoa ho Jehova Molimo feela. Phihlelo e bontša hore thabo ea sebele e ka fumanoa feela ka ho mamela Ea Phahameng ka ho Fetisisa. Thabo e tšoarellang e itšetlehile ka boemo bo amohelehang ka pel’a Molimo. (Matheu 5:3-10) Ka ho sebelisa seo re ithutang sona ha re bala Bibele, re tla hlaolela “bohlale bo tsoang holimo.” (Jakobo 3:17) Ho tla re neha thabo eo le ka mohla maruo a ke keng a e tlisa.
[Setšoantšo se leqepheng la 5]
Morena Solomone o ne a tseba hore na ke eng e thabisang motho. Uena?