Jesu—Bophelo le Tšebeletso tsa Hae

Ba Hlohonolofalitsoe ka Taeo e Eketsehileng

BARUTUOA ba sa tsoa hlalosetsoa setšoantšo sa mojali. Empa joale ba batla ho ithuta ka ho eketsehileng. Baa kōpa, “Re qaqisetse setšoantšo sa mofoka oa tšimo.”

Boikutlo ba barutuoa bo fapane hakaakang le ba letšoele lohle le lebopong la leoatle! Batho bao ba haelloa ke takatso ea sebele ea ho ithuta moelelo oa litšoantšo tsena, ba khotsofaletse feela khutsufatso ea lintho tseo li li fupereng. Ha a bapisa bamameli bao ba lebopong la leoatle le barutuoa ba hae ba botsang, Jesu o re:

“Tekanyo eo le lekanyang ka eona, le lōna le tla lekanngoa ka eona; ’me ho tla phaelleloa lōna ba utloang.” Barutuoa ba tšoanelehela thahasello ea sebele ea Jesu le tlhokomelo ’me joale ba hlohonolofatsoa ka ho fumana taeo e eketsehileng. Kahoo, ha a arabela potso ea barutuoa ba hae, Jesu oa hlalosa:

“Ea jalang peō e ntle ke Mor’a motho; tšimo ke lefatše; peō e ntle ke bana ba ’muso; mofoka ke bana ba e mobe; sera se o jalileng ke Diabolose; kotulo ke bofelo ba lefatše; bakotuli bona ke mangeloi.”

Hoba a khetholle tšobotsi ka ’ngoe ea setšoantšo sa hae, Jesu o hlalosa phello. O re, qetellong ea tsamaiso ea lintho, “bakotuli,” kapa mangeloi, ba tla arola Bakreste-’mōtoana ba kang lehola ho “bana ba ’muso” ba ’nete. “Bana ba e mobe” joale ba tla tšoaeloa timetso, empa bana ba ’Muso oa Molimo, “ba lokileng,” ba tla khanya ’Musong oa Ntate oa bona.

Jesu o boetse o hlohonolofatsa barutuoa ba hae ba lipotso ka litšoantšo tse ling tse tharo. Pele, o re: “’Muso oa maholimo o joale ka letlotlo le patiloeng tšimong, leo eitseng hobane motho a le fumane, a boela a le pata; ’me ka baka la ho le thabela, o rekisa ka ntho tsohle tseo a nang le tsona, o ithekela tšimo eo.”

O boetse o tsoela pele, “’Muso oa maholimo hape o joale ka mohoebi ea batlang liperela tse ntle. Hobane a fumane perela ea bohlokoa, a ea, a bapatsa ka ntho tsohle tseo a nang le tsona, ’me a ithekela eona.”

Jesu ka boeena o tšoana le motho ea sibollang letlotlo le patiloeng le mohoebi ea fumanang perela ea bohlokoa. O ile a rekisa ntho e ’ngoe le e ’ngoe, joalokaha eka ho joalo, a tela boemo bo hlomphehang leholimong ho ba motho ea tlasana. Joale, e le motho lefatšeng, o utloa bohloko ke ho rohakoa le mahloriso a lehloeo, a paka hore o tšoaneleha ho ba ’Musi oa ’Muso oa Molimo.

Phephetso e boetse e beoa ka pel’a balateli ba Jesu hore ba rekise ntho e ’ngoe le e ’ngoe e le hore ba ka fumana moputso o moholo oa ho ba babusi ’moho le Kreste kapa bafo ba ’Muso oa lefatšeng. Na re tla nka ho ba le karolo ’Musong oa Molimo e le ntho ea bohlokoa ho feta ntho efe kapa efe bophelong, e le letlotlo la bohlokoahali kapa perela e ntlehali?

Qetellong, Jesu o tšoantša “’muso oa maholimo” le letlooa le tšelang litlhapi tsa mefuta eohle. Ha litlhapi li aroloa, tse mpe lia lahloa empa tse ntle lia bolokoa. Kahoo, Jesu o re, ho tla ba joalo qetellong ea tsamaiso ea lintho; mangeloi a tla arola ba khopo ho ba lokileng, a bolokela ba khopo timetso.

Jesu ka boeena o qala morero ona oa ho tšoasa, a bitsa barutuoa ba hae ba pele hore e be “ba tšoasang batho.” Ka tlas’a tsamaiso ea mangeloi mosebetsi oa ho tšoasa o tsoela pele ka makholo a lilemo. Qetellong ho fihla nako ea ho hula “letlooa,” le tšoantšetsang mekhatlo e hlophisitsoeng lefatšeng e ipolelang hore ke ea Bokreste.

Le hoja litlhapi tse mpe li lahleloa timetsong, ka teboho re ka balloa har’a ‘litlhapi tse ntle’ tse bolokoang. Ka ho bontša takatso e tšoanang e matla e kang ea barutuoa ba Jesu bakeng sa tsebo le kutloisiso tse eketsehileng, re ke ke ra hlohonolofatsoa feela ka taeo e eketsehileng empa le tlhohonolofatso ea Molimo ea bophelo bo sa feleng. Mattheu 13:36-52; 4:19; Mareka 4:24, 25.

◆ Barutuoa ba fapana joang le matšoele a lebopong la leoatle?

◆ Ke mang kapa ke eng e emeloang ke mojali, tšimo, peō e ntle, sera, kotulo le bakotuli?

◆ Jesu o fane ka litšoantšo life hape tse tharo, ’me re ka ithuta eng ho tsona?