‘Ho Fumana Perela e le ’Ngoe e Theko e Phahameng’

“’Muso oa maholimo ke pakane eo batho ba e hahamallang, ’me ba hahamallang pele baa o nka.”—MATHEU 11:12.

 1, 2. (a) Ke tšobotsi efe e sa tloaelehang eo Jesu a ileng a e hlalosa ho e ’ngoe ea lipapiso tsa hae tse buang ka ’Muso? (b) Jesu o ile a re’ng papisong ea perela e theko e phahameng?

NA HO na le ntho eo u e nkang e le ea bohlokoa hoo u neng u ka fana ka ntho e ’ngoe le e ’ngoe eo u nang le eona kapa ua tela sohle seo u nang le sona e le hore feela u be le eona? Le hoja batho ba bua ka ho itella ho finyella pakane e itseng—e kang chelete, botumo, matla kapa maemo—ha hoa tloaeleha hore motho a fumane ntho e khahlehang hoo a ka ikemisetsang ho tela ntho e ’ngoe le e ’ngoe eo a nang le eona hore a e fumane. Ho e ’ngoe ea lipapiso tsa hae tse susumelletsang motho ho nahana ka ho teba, tse buang ka ’Muso oa Molimo, Jesu Kreste o ile a bua ka tšobotsi ena e khahlehang empa e le e sa tloaelehang.

² Ke papiso, kapa setšoantšo, eo Jesu a ileng a e phetela barutuoa ba hae ba le bang, eo hangata e bitsoang papiso ea perela e theko e phahameng. Jesu o ile a re: “’Muso oa maholimo o joaloka mohoebi ea tsamaeang ea batlang liperela tse ntle. Ha a fumana perela e le ’ngoe e theko e phahameng, a tloha ’me ka potlako a rekisa lintho tsohle tseo a neng a e-na le tsona ’me a e reka.” (Matheu 13:36, 45, 46) Ke’ng seo Jesu a neng a batla hore bamameli ba hae ba ithute sona setšoantšong see? Hona re ka rua molemo joang mantsoeng a Jesu?

Bohlokoa ba Liperela

 3. Ke hobane’ng ha liperela tse ntle e ne e le tsa bohlokoa hakaale mehleng ea boholo-holo?

³ Ho tloha mehleng ea boholo-holo, liperela li ’nile tsa nkoa e le lintho tsa bohlokoahali tsa ho khabisa. Buka e ’ngoe e bolela hore ho ea ka setsebi sa Moroma, e leng Pliny e Moholo, liperela e ne e le tsona “tse ka sehloohong linthong tsohle tsa bohlokoa.” Ho fapana le khauta, silevera kapa majoe a mangata a bohlokoa, liperela li hlahisoa ke lintho tse phelang. Hoa tsebahala hore mefuta e meng ea li-oyster e ka fetola sebōpeho sa lintho tse li kukunelang—tse kang majoe a manyenyane—hore e be liperela tse phatsimang ka hore li-oyster tseo li ntše lero le tsejoang e le nacre le koahelang majoe ao. Mehleng ea boholo-holo, liperela tse ntle ka ho fetisisa li ne li bokelloa haholo Leoatleng le Lefubelu, Koung ea Persia le Leoatleng la Indian—hōle haholo le naha ea Iseraele. Ha ho pelaelo hore ke ka lona lebaka leo Jesu a ileng a bua ka “mohoebi ea tsamaeang ea batlang liperela tse ntle.” Hore motho a fumane liperela tseo ruri e leng tsa bohlokoa, ho hlokahala hore a etse boiteko bo matla.

 4. Thuto e ka sehloohong papisong ea Jesu ea mohoebi ea tsamaeang ke efe?

⁴ Esita le hoja ho tloha khale liperela tse ntle li ne li bitsa theko e phahameng, ho totobetse hore thuto e ka sehloohong papisong ea Jesu e ne e se bohlokoa ba chelete ba liperela. Papisong ena, Jesu ha aa ka a bapisa ’Muso oa Molimo le perela e theko e phahameng feela; o ile a bua ka “mohoebi ea tsamaeang ea batlang liperela tse ntle” le ka seo a ileng a se etsa ka mor’a hore a fumane perela eo e ntle. Ho fapana le morekisi ea tloaelehileng, mohoebi enoa ea tsamaeang oa liperela e ne e le motho ea ka bitsoang setsebi litabeng tsa khoebo, motho ea neng a sheba lintho ka leihlo le nchocho kapa ea neng a e-na le matla a ho lemoha litšobotsi tse ntle le lintlha tse poteletseng tse etsang hore perela e be e sa tloaelehang. O ne a tla tseba perela ea ’nete ha a e bona, ’me o ne a ke ke a thetsoa ka liperela tsa boleng bo tlaase kapa tsa bohata tse rekisoang.

 5, 6. (a) Ke’ng e thahasellisang ka ho khetheha ka mohoebi oa papisong ea Jesu? (b) Papiso ea letlotlo le patiloeng e senola eng ka mohoebi ea tsamaeang?

⁵ Ho na le taba e ’ngoe hape e thahasellisang ka mohoebi enoa. Ka tloaelo mohoebi o qala ka ho lekanyetsa hore na perela e ka rekoa ka bokae a tle a khone ho etsa qeto ea hore na o tla e lefella bokae e le hore a etse phaello. Hape o ne a ka ’na a nahana hore na ebe ho tla ba le motho ea ka rekang perela eo e le hore a ka e rekisa kapele. Ka mantsoe a mang, o ne a tla batla ho etsa phaello ka potlako ka letsete leo la hae, eseng ka hore perela eo e be ea hae. Empa litaba ha li joalo ka mohoebi enoa oa papisong ea Jesu. O ne a sa batle phaello ea chelete kapa molemo o bonahalang. Ha e le hantle, o ne a ikemiselitse ho tela “lintho tsohle tseo a neng a e-na le tsona”—mohlomong thepa eohle ea hae le lintho tsohle tsa hae—e le hore a fumane seo e leng khale a se batla.

⁶ Ho bahoebi ba bangata, seo monna eo oa papisong ea Jesu a ileng a se etsa mohlomong e ne e se ntho e bohlale. Rakhoebo ea masene o ne a ke ke a nahana ho kena khoebong e kotsi joalo. Empa mohoebi oa papisong ea Jesu o ne a talima lintho tsa bohlokoa ka tsela e fapaneng. O ne a ke ke a putsoa ka molemo leha e le ofe oa chelete, empa o ne a tla putsoa ka thabo le khotsofalo ea ho ba le ntho ea bohlokoa haholo. Taba ena e hlakisoa setšoantšong se tšoanang le seo, seo Jesu a ileng a se etsa. O ile a re: “’Muso oa maholimo o joaloka letlotlo le patiloeng tšimong, leo motho a ileng a le fumana ’me a le pata; ka lebaka la thabo eo a nang le eona oa ea ’me a rekise lintho tseo a nang le tsona ’me a reke tšimo eo.” (Matheu 13:44) E, thabo e tlisoang ke ho fumana letlotlo leo le ho ba le lona e ne e le matla hoo e ileng ea susumelletsa monna eo ho tela ntho e ’ngoe le e ’ngoe eo a neng a e-na le eona. Na kajeno ho na le batho ba joalo? Na ho na le letlotlo le lokeloang ke boitelo bo bokaalo?

Ba Ileng ba Ananela Bohlokoa ba ’Muso

 7. Jesu o ile a bontša joang hore o ne a ananela bohlokoa ba ’Muso haholo?

⁷ Jesu o ne a bua ka “’muso oa maholimo” ha a pheta papiso ea hae. Ka sebele eena ka boeena o ne a ananela bohlokoa ba ’Muso. Litlaleho tsa Kosepele li fana ka bopaki bo matla bo tšehetsang taba eo. Ka mor’a hore a kolobetsoe ka 29 C.E., Jesu o ile “a qala ho bolela ’me a re: ‘Bakang, kaha ’muso oa maholimo o atametse.’” O ile a ruta matšoele ka ’Muso oa Molimo ka lilemo tse tharo le halofo. O ile a pholletsa le naha eohle, a “tsamaea ho tloha motseng o mong ho ea ho o mong le ho tloha motsaneng o mong ho ea ho o mong, a bolela ’me a phatlalatsa litaba tse molemo tsa ’muso oa Molimo.”—Matheu 4:17; Luka 8:1.

 8. Jesu o ile a etsa’ng ho bontša seo ’Muso o tla se finyella?

⁸ Ka hore a etse mehlolo e mengata ho pholletsa le naha eo—e akarelletsang ho phekola ba kulang, ho fepa ba lapileng, ho laola maemo a leholimo, esita le ho tsosa bafu—Jesu o ile a boela a bontša seo ’Muso oa Molimo o tla se finyella. (Matheu 14:14-21; Mareka 4:37-39; Luka 7:11-17) Qetellong, o ile a paka botšepehi ba hae ho Molimo le ’Musong oa hae ka ho nehelana ka bophelo ba hae, a shoa e le moshoela-tumelo thupeng ea tlhokofatso. Feela joalokaha mohoebi ea tsamaeang a ile a tela ntho e ’ngoe le e ’ngoe eo a neng a e-na le eona ka ho rata hore a fumane ‘perela e theko e phahameng,’ Jesu o ile a phelela ’Muso a ba a o shoela.—Johanne 18:37.

 9. Ke tšobotsi efe e sa tloaelehang e ileng ea bonoa har’a barutuoa ba Jesu ba pele?

⁹ Jesu ha aa ka a qetella feela ka ho etsa hore ’Muso e be ntho e ka sehloohong bophelong ba hae empa hape o ile a bokella sehlopha se senyenyane sa balateli. Bana le bona e ne e le batho ba neng ba ananela bohlokoa ba ’Muso haholo. E mong oa bona e ne e le Andrease, eo qalong e neng e le morutuoa oa Johanne Mokolobetsi. Eitse ha ba utloa bopaki ba Johanne ba hore Jesu ke “Konyana ea Molimo,” Andrease le e mong oa barutuoa ba Johanne, eo ho ka etsahalang hore ebe e ne e le e mong oa bara ba Zebedea, eo le eena a neng a bitsoa Johanne, kapele-pele ba ile ba huleloa ho Jesu ’me ea e-ba balumeli. Empa litaba ha lia ka tsa fella moo. Hang feela, Andrease o ile a ea ho mor’abo e leng Simone, ’me a re ho eena: “Re fumane Mesia.” Kapele ka mor’a moo, Simone, (ea ileng a tsejoa e le Kefase, kapa Petrose) hammoho le Filipi le motsoalle oa hae Nathanaele le bona ba ile ba hlokomela hore Jesu ke Mesia. Ha e le hantle, Nathanaele o ile a susumelletseha hore a re ho Jesu: “U Mora oa Molimo, Morena oa Iseraele.”—Johanne 1:35-49.

Ba Susumelletseha ho Nka Bohato

10. Barutuoa ba ile ba etsa’ng ha Jesu a e-tla ’me a ba bitsa nako e itseng ka mor’a hore a kopane le bona ka lekhetlo la pele?

¹⁰ Thabo eo Andrease, Petrose, Johanne le ba bang ba bileng le eona ha ba fumana Mesia e ka ’na ea bapisoa le eo mohoebi ea tsamaeang a bileng le eona ha a fumana perela e theko e phahameng. Joale ba ne ba tla etsa joang? Likosepele ha li re bolelle seo ba ileng ba se etsa hang-hang ka mor’a hore ba kopane le Jesu ka lekhetlo lena la pele. Kamoo ho bonahalang kateng, ba bangata ba bona ba ile ba khutlela mokhoeng oa bona o tloaelehileng oa bophelo. Leha ho le joalo, hoo e ka bang ka mor’a likhoeli tse tšeletseng ho isa ho selemo, Jesu o ile a boela a kopana le Andrease, Petrose, Johanne le Jakobo mor’abo Johanne ba le khoebong ea bona ea ho tšoasa litlhapi Leoatleng la Galilea.a Ha Jesu a ba bona, o ile a re: “Ntšaleng morao, ’me ke tla le etsa batšoasi ba batho.” Ba ile ba etsa joang? Ha e bua ka Petrose le Andrease, tlaleho ea Matheu e re: “Hang-hang ha ba tlohela matlooa, ba mo latela.” Ha e le ka Jakobo le Johanne, re bala tjena: “Hang-hang ha ba siea sekepe ’me ba siea ntat’a bona, ba mo latela.” Tlaleho ea Luka e phaella ka ho re ba ile “ba tlohela ntho e ’ngoe le e ’ngoe eaba baa mo latela.”—Matheu 4:18-22; Luka 5:1-11.

11. E ka ’na eaba ke’ng e ileng ea etsa hore barutuoa ba nke bohato ka potlako ha Jesu a ba bitsa?

¹¹ Na barutuoa ba ne ba entse qeto ka lepotlapotla feela tjee? Le hanyenyane! Le hoja ba ile ba khutlela khoebong ea malapa a bona ea ho tšoasa litlhapi ka mor’a hore ba kopane le Jesu ka lekhetlo la pele, ha ho pelaelo hore seo ba neng ba se bone ba ba ba se utloa ka lekhetlo leo la pele se ile sa ba ama ka ho teba pelong le kelellong. Taba ea hore ebe ho ne ho fetile nako e batlang e etsa selemo e ne e tla ba fa nako e ngata ea hore ba nahane ka ho teba ka litaba tseo. Joale nako ea hore ba etse qeto e ne e fihlile. Na ba ne ba tla tšoana le mohoebi ea tsamaeang eo pelo ea hae e ileng ea susumetseha haholo ha a fumana perela ea bohlokoahali hoo, joalokaha Jesu a hlalositse, a ileng “a tloha ’me ka potlako” a etsa seo a neng a lokela ho se etsa hore a reke perela eo? E. Lipelo tsa bona li ile tsa susumetsoa ke seo ba neng ba se bone le ho se utloa. Ba ile ba hlokomela hore joale nako ea ho nka bohato e ne e fihlile. Kahoo, joalokaha tlaleho e re bolella, ntle le ho tsilatsila, ba ile ba tela ntho e ’ngoe le e ’ngoe ’me ea e-ba balateli ba Jesu.

12, 13. (a) Ba bangata ba ileng ba utloa Jesu ba ile ba etsa’ng? (b) Jesu o ile a re’ng ka barutuoa ba hae ba tšepahalang, hona mantsoe a hae a bolela’ng?

¹² Barutuoa baa ba tšepahalang ba ne ba fapane hakaakang le ba bang bao ho ileng ha buuoa ka bona hamorao litlalehong tsa Kosepele! Jesu o ne a phekotse batho ba bangata a ba a ba fepa empa ba ile ba itsoella pele ka mesebetsi ea bona ea letsatsi le letsatsi. (Luka 17:17, 18; Johanne 6:26) Ba bang ba bile ba ikhula ha Jesu a ba mema hore e be balateli ba hae. (Luka 9:59-62) Ho fapana le bao, hamorao ha Jesu a bua ka ba tšepahalang o ile a re: “Ho tloha matsatsing a Johanne Mokolobetsi ho fihlela joale ’muso oa maholimo ke pakane eo batho ba e hahamallang, ’me ba hahamallang pele baa o nka.”—Matheu 11:12.

¹³ Ho ‘hahamalla’ le ho ‘hahamalla pele’—mantsoe aa a bolela’ng? Mabapi le leetsi la Segerike leo mantsoe ana a tsoang ho lona, Vine’s Expository Dictionary of Old and New Testament Words e re: “Leetsi leo le bolela boikitlaetso.” Ha se bua ka temana ena, setsebi sa Bibele, Heinrich Meyer se re: “Ka tsela ena ho hlalosoa ho phehella ka tabatabelo, u sa cheche, le ho leka ka matla ho finyella ’muso oa Bomesia o atamelang . . . Ke thahasello e matla le e sefutho mabapi le ’muso oo (eseng feela ho khutsa le ho lebella ho hong).” Joaloka mohoebi ea tsamaeang, kapele-pele batho bana ba ’maloa ba ile ba hlokomela seo ruri e neng e le sa bohlokoa, ’me ka ho rata ba tela sohle seo ba neng ba e-na le sona ka lebaka la ’Muso.—Matheu 19:27, 28; Bafilipi 3:8.

Ba Bang ba Ile ba Kena Letšolong

14. Jesu o ile a lokisetsa baapostola mosebetsi oa ho bolela ka ’Muso joang, hona phello e bile efe?

¹⁴ Ha Jesu a ntse a tsoela pele ka tšebeletso ea hae, o ile a koetlisa ba bang a ba a ba thusa hore ba hahamalle ’Muso. O ile a qala ka ho khetha ba 12 ho barutuoa ba hae ’me a ba bitsa baapostola, kapa ba romiloeng ke eena. Jesu o ile a fa baapostola bana litaelo tse qaqileng tsa hore na ba phethe tšebeletso ea bona joang, a ba a ba lemosa ka liteko le mathata ao ba neng ba tla thulana le ’ona. (Matheu 10:1-42; Luka 6:12-16) Ka lilemo tse ka bang peli tse latelang, ba ile ba tsamaea le Jesu maetong a hae a boboleli ho pholletsa le naha eo, ’me ba thabela botsoalle bo haufi le eena nakong eo. Ba ile ba utloa lipolelo tsa hae, ba hlokomela mesebetsi ea hae e matla ’me ba bona mohlala oa hae. (Matheu 13:16, 17) Ha ho pelaelo hore sena sohle se ile sa ba ama ka ho teba, hoo joaloka mohoebi ea tsamaeang, ba ileng ba cheseha ’me ba batla ’Muso ka lipelo tsohle tsa bona.

15. Jesu o ile a re lebaka le neng le hlile le lokela ho thabisa barutuoa ba hae ke lefe?

¹⁵ Ho phaella ho baapostola ba 12, Jesu o ile a “khetha ba bang ba mashome a supileng ’me a ba romela ka bobeli ka pele ho eena ho kena motseng o mong le o mong le sebakeng se seng le se seng seo a neng a tla tla ho sona.” Hape o ile a ba bolella ka liteko le mathata ao ba neng ba tla thulana le ’ona ’me a ba laela hore ba bolelle batho ba re: “’Muso oa Molimo o atametse ho lōna.” (Luka 10:1-12) Ha ba 70 ba khutla, ba ne ba thabile haholo ’me ba tlalehela Jesu sena ba re: “Morena, esita le bademona ba behoa tlas’a rōna ka ho sebelisa lebitso la hao.” Empa mohlomong ba ile ba makala ha Jesu a senola hore ba tla fumana thabo e fetang eo kahobane ba chesehela ’Muso. O ile a re ho bona: “Le se ke la thabela hore ebe meea e behoa tlas’a lōna, empa le thabe kahobane mabitso a lōna a ngotsoe maholimong.”—Luka 10:17, 20.

16, 17. (a) Jesu o ile a re’ng ho baapostola ba hae ba tšepahalang bosiung ba ho qetela a e-na le bona? (b) Mantsoe a Jesu a ile a tlisetsa baapostola thabo joang le ho ba fa tiisetso efe?

¹⁶ Qetellong, ka bosiu ba ho qetela Jesu a e-na le baapostola, ka la 14 Nisane, 33 C.E., o ile a theha se ileng sa tsejoa e le Lijo Tsa Shoalane Tsa Morena ’me a ba laela hore ba ikhopotse ketsahalo eo. Mantsiboeeng ’ona ao, Jesu o ile a re ho ba 11 ba setseng: “Ke lōna ba nkhomaretseng litekong tsa ka; ’me ke etsa selekane le lōna, feela joalokaha Ntate a entse selekane le ’na, bakeng sa ’muso, e le hore le ka ja le ho noa tafoleng ea ka ’musong oa ka, le ho lula literoneng ho ahlola meloko e leshome le metso e ’meli ea Iseraele.”—Luka 22:19, 20, 28-30.

¹⁷ E tlameha ebe lipelo tsa baapostola li ile tsa tlala thabo le khotsofalo hakaakang ha ba utloa mantsoe ao a Jesu! Ba ne ba fuoa tlotla e phahameng ka ho fetisisa le monyetla o ikhethang ka ho fetisisa tseo motho leha e le ofe a neng a ka li fumana. (Matheu 7:13, 14; 1 Petrose 2:9) Joaloka mohoebi eane ea tsamaeang, ba ne ba tetse lintho tse ngata hore ba latele Jesu e le hore ba batle ’Muso. Joale ba ne ba tiisetsoa hore boitelo boo ba neng ba bo entse ho fihlela nakong eo, e ne e se ba lefeela.

18. Ntle ho baapostola ba 11, ke bo-mang bao qetellong le bona ba neng ba tla rua molemo ’Musong?

¹⁸ E ne e se baapostola ba neng ba e-na le Jesu feela bosiung boo ba neng ba tla rua molemo ’Musong. Thato ea Jehova e ne e le hore ka kakaretso batho ba 144 000 ba kenngoe selekaneng sa ’Muso e le babusi-’moho le Jesu Kreste ’Musong o khanyang oa leholimo. Ho phaella moo, ponong moapostola Johanne o ile a bona “bongata bo boholo, boo ho seng motho ea neng a khona ho bo bala, . . . bo eme ka pel’a terone le ka pel’a Konyana, . . . bo re: ‘Poloko ea rōna e tsoa ho Molimo oa rōna, ea lutseng teroneng, le Konyana.’” Bana ke bafo ba lefatšeng ba ’Muso oo.b—Tšenolo 7:9, 10; 14:1, 4.

19, 20. (a) Batho ba lichaba tsohle ba bulehetsoe ke monyetla ofe? (b) Ho tla tšohloa potso efe sehloohong se latelang?

¹⁹ Pejana feela Jesu a nyolohela leholimong, o ile a laela balateli ba hae ba tšepahalang a re: “Ka hona e-eang ’me le etse batho ba lichaba tsohle barutuoa, le ba kolobetse ka lebitso la Ntate le la Mora le la moea o halalelang, le ba rute ho boloka lintho tsohle tseo ke le laetseng tsona. ’Me, bonang! ke na le lōna ka matsatsi ’ohle ho fihlela qetellong ea tsamaiso ea lintho.” (Matheu 28:19, 20) Ka tsela eo, batho ba tsoang lichabeng tsohle e ne e tla ba barutuoa ba Jesu Kreste. Bana le bona ba ne ba tla tsepamisa lipelo tsa bona ’Musong—ho sa tsotellehe hore na moputso oa bona ke oa leholimong kapa oa lefatšeng—feela joalokaha mohoebi ea tsamaeang a ile a etsa joalo mabapi le perela e ntle.

²⁰ Mantsoe a Jesu a ile a bontša hore mosebetsi oa ho etsa barutuoa o ne o tla tsoela pele ho fihlela “qetellong ea tsamaiso ea lintho.” Kahoo, na mehleng ea rōna ho sa ntse ho e-na le batho ba ikemiselitseng ho fana ka sohle seo ba nang le sona e le hore ba batle ’Muso oa Molimo joaloka mohoebi ea tsamaeang? Potso ena e tla tšohloa sehloohong se latelang.

[Mongolo o botlaaseng ba leqephe]

Ho Batla ‘Perela e Theko e Phahameng’ Kajeno

“Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki.”—MATHEU 24:14.

 1, 2. (a) Bajuda ba ne ba ikutloa joang ka ’Muso oa Molimo mehleng ea Jesu? (b) Jesu o ile a etsa’ng hore a fane ka kutloisiso e nepahetseng ka ’Muso, hona liphello e bile life?

’MUSO OA MOLIMO e ne e le taba eo Bajuda ba e thahasellang haholo ha Jesu a e-tla lefatšeng. (Matheu 3:1, 2; 4:23-25; Johanne 1:49) Leha ho le joalo, qalong ba bangata ba bona ba ne ba sa utloisise ka botlalo boholo ba oona le matla a oona; hape ba ne ba sa utloisise hore e ne e tla ba puso e leholimong. (Johanne 3:1-5) Esita le ba bang ba ileng ba fetoha balateli ba Jesu ba ne ba sa utloisise ka botlalo seo ’Muso oa Molimo o leng sona kapa hore na ba lokela ho etsa’ng e le hore ba fumane tlhohonolofatso ea ho ba babusi-’moho le Kreste.—Matheu 20:20-22; Luka 19:11; Liketso 1:6.

² Ha nako e ntse e tsamaea, ka mamello Jesu o ile a ruta barutuoa ba hae lithuto tse ngata, tse akarelletsang papiso ea perela e theko e phahameng e tšohliloeng sehloohong se eteletseng sena pele, a ba bontša bohlokoa ba hore ba ikitlaetse ha ba batla ’Muso oa leholimo. (Matheu 6:33; 13:45, 46; Luka 13:23, 24) E tlameha ebe sena se ile sa ama lipelo tsa bona ka ho teba hobane kapele ba ile ba fetoha baboleli ba sa khathaleng le ba sebete ba litaba tse molemo tsa ’Muso likarolong tse hōle tsa lefatše, e leng taba e pakoang ka ho feletseng ke buka ea Liketso.—Liketso 1:8; Bakolose 1:23.

 3. Mabapi le mehla ea rōna, Jesu o ile a re’ng ka ’Muso?

³ Joale, ho thoe’ng mabapi le mehleng ea kajeno? Batho ba limilione ba bolelloa ka litlhohonolofatso tsa paradeise ea lefatšeng tlas’a ’Muso. Boprofeteng ba hae bo boholo bo buang ka “qetello ea tsamaiso ea lintho,” ka ho toba Jesu o ile a re: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo bo tla tla.” (Matheu 24:3, 14; Mareka 13:10) Hape o ile a hlalosa hore mosebetsi ona o moholohali o lokela ho phethoa ho sa tsotellehe litšitiso tse boima haholo le mathata, esita le mahloriso. Leha ho le joalo, o ile a fana ka tiisetso ena: “Ea mameletseng ho isa bofelong ke eena ea tla pholoha.” (Matheu 24:9-13) Ka tsela e itseng sena sohle se hloka boitelo le boinehelo bo tšoanang le ba mohoebi ea tsamaeang oa papisong ea Jesu. Na kajeno ho na le batho ba bontšang tumelo e joalo le cheseho ha ba batla ’Muso?

Thabo e Tlisoang ke ho Fumana ’Nete

 4. ’Nete ea ’Muso e ba le liphello life ho batho kajeno?

⁴ Mohoebi oa papisong ea Jesu o ile a thaba haholo ha a fumana seo a neng a lemoha hore ke ‘perela e theko e phahameng.’ Thabo eo e ile ea mo susumelletsa hore a etse sohle se neng se le matleng a hae hore a fumane perela eo. (Baheberu 12:1) Ka ho tšoanang, kajeno ’nete e mabapi le Molimo le ’Muso oa hae e hohela batho ebile ea ba susumetsa. Sena se re hopotsa se kileng sa buuoa ke Mor’abo rōna A. H. Macmillan, ea ngotseng buka e bitsoang Faith on the March e mabapi le ha a ntse a batla Molimo le morero oa Hae ka moloko oa batho. O ile a re: “Selemo le selemo, batho ba likete-kete ba ntse ba fumana seo ke se fumaneng. ’Me ke batho ba tšoanang le ’na le uena, hobane ba tsoa lichabeng tsohle, merabeng eohle, mekhoeng eohle ea bophelo ebile ke ba lilemo tsohle. ’Nete ha e khethe. E hohela batho ba mefuta eohle.”

 5. Re bona liphello life tse ntle tlalehong ea selemo sa tšebeletso sa 2004?

⁵ Bonnete ba mantsoe ao bo bonahala selemo le selemo ha litaba tse molemo tsa ’Muso oa Molimo li susumelletsa batho ba lipelo li tšepahalang hore ba nehele bophelo ba bona ho Jehova le ho etsa thato ea hae. Selemo sa tšebeletso sa 2004, se qalileng ka September 2003 ho fihlela ka August 2004, ha ea ka ea e-ba mokhelo. Likhoeling tseo tse 12, batho ba 262 416 ba ile ba tšoantšetsa boinehelo ba bona ho Jehova phatlalatsa ka hore ba kolobetsoe metsing. Sena se etsahetse linaheng tse 235, tseo ho tsona Lipaki Tsa Jehova li khannang lithuto tsa lehae tsa Bibele tse 6 085 387 beke le beke e le hore li thuse batho ba tsoang mekhoeng eohle ea bophelo le lichabeng tse ngata, merabeng le lipuong hore ba fumane ’nete e phelisang e tsoang Lentsoeng la Molimo.—Tšenolo 7:9.

 6. Ke hobane’ng ha ho ’nile ha e-ba le keketseho e tsitsitseng ho theosa le lilemo?

⁶ See sohle se finyeletsoe joang? Ha ho pelaelo hore Jehova o hulela batho bana ba nang le tšekamelo e nepahetseng ho eena. (Johanne 6:65; Liketso 13:48) Leha ho le joalo, re se lebale boinehelo le boiteko bo sa khaotseng ba batho ba ’nileng ba ikitlaetsa ho batla ’Muso. Ha a le lilemo li 79, Mor’abo rōna Macmillan o ile a ngola a re: “Ho tloha ha ke qala ho ithuta ka lintho tse tšepisitsoeng moloko oa batho o kulang le o shoang, tšepo eo ke nang le eona linthong tseo molaetsa oo oa Bibele o li senotseng ha e e-s’o ka e fifala. Hona nakong eo ke ile ka ikemisetsa ho fumana litaba tse eketsehileng mabapi le seo Bibele e se rutang e le hore ke khone ho thusa ba bang, bao joaloka ’na, ba ntseng ba batla ho tseba Molimo ea Matla ’Ohle, Jehova, le merero ea hae e metle ka moloko oa batho.”

 7. Ke phihlelo efe e bontšang thabo le cheseho ea ba fumanang ’nete ea Bibele?

⁷ Cheseho eo ea bonahala le har’a bahlanka ba Jehova kajeno. Ka mohlala, nahana ka Daniela oa Vienna, Austria. O ile a re: “Ho tloha bongoaneng, haesale Molimo e le motsoalle oa ka e moholo. Kamehla ke ne ke batla ho tseba lebitso la hae hobane ho ’na ha ho thoe ‘Molimo’ ho ne ho utloahala eka ha ho buuoe ka motho. Empa ke ile ka lokela ho ema ho fihlela ha ke ne ke le lilemo li 17, ha Lipaki Tsa Jehova li fihla heso. Li ile tsa hlalosa ntho e ’ngoe le e ’ngoe eo ke neng ke batla ho e tseba ka Molimo. Qetellong, ke ne ke fumane ’nete, ’me ho ne ho thabisa hakaakang! Ke ne ke thabile hoo ke ileng ka qala ho bolella e mong le e mong molaetsa oo.” Kapele, bana bao a neng a kena sekolo le bona ba ile ba mo soma ka lebaka la cheseho ea hae. Daniela o ile a tsoela pele ho re: “Leha ho le joalo, ke ne ke bona seo e le ho phethahala ha boprofeta ba Bibele, hobane ke ne ke ithutile hore Jesu o itse balateli ba hae ba ne ba tla hlouoa ba be ba hlorisoe ka lebaka la lebitso la hae. Ke ne ke thabile ebile ke hloletsoe.” Kapele, Daniela o ile a nehela bophelo ba hae ho Jehova, a kolobetsoa ’me a qala ho hahamalla pakane ea tšebeletso ea boromuoa. Ka mor’a hore a nyaloe, Daniela, hammoho le monna oa hae Helmut, ba ile ba qala mosebetsi oa ho pakela Maafrika, Machaena, Mafilipino le Maindia a neng a lula Vienna. Hona joale Daniela le Helmut ba sebeletsa e le baromuoa ka boroa-bophirimela ho Afrika.

Ha ba Tele

 8. Ke tsela efe e ’ngoe e putsang eo ka eona ba bangata ba bontšitseng lerato la bona ho Molimo le botšepehi ba bona ’Musong oa hae?

⁸ Ka sebele, kajeno tšebeletso ea boromuoa ke e ’ngoe ea litsela tseo ka tsona batho ba Jehova ba bonahatsang lerato la bona ho Molimo le botšepehi ba bona ’Musong oa hae. Joaloka mohoebi oa papisong ea Jesu, ba kenelang tšebeletso ena ba ikemiselitse ho ea libakeng tse hōle ka lebaka la ’Muso. Ho hlakile hore baromuoa bana ha ba tsamaele ho ea fumana litaba tse molemo tsa ’Muso; empa ba li isa ho batho ba lulang libakeng tsena tse hōle tsa lefatše, ba ba ruta hore e be barutuoa ba Jesu Kreste ebile ba ba thusa ho etsa joalo. (Matheu 28:19, 20) Linaheng tse ngata ba tlameha ho mamella mathata a sa tloaelehang. Empa mamello ea bona e putsoa ka ho enneng.

 9, 10. Ke liphihlelo life tse thabisang tseo baromuoa ba bileng le tsona libakeng tse hōle tse kang Central African Republic?

⁹ Ka mohlala, nahana ka Central African Republic, moo palo ea ba bileng teng Sehopotsong sa lefu la Kreste selemong se fetileng e neng e le 16 184, e leng palo e batlang e mena ea bahoeletsi ba ’Muso naheng eo ka makhetlo a supileng. Kaha ha ho na motlakase libakeng tse ngata naheng eo, hangata batho ba etsa mesebetsi ea bona ea lapeng ea letsatsi le letsatsi ba le ka ntle moriting oa sefate. Kahoo ho tloaelehile hore baromuoa ba etse mosebetsi oa bona oa boboleli ka tsela e tšoanang—ba khanne lithuto tsa Bibele ba le ka ntle tlas’a moriti oa sefate. Molemo oa ho balla ka ntle ke hore hoa khanya ebile ho pholile, empa ho na le molemo o mong hape. Batho ba moo ba rata Bibele haholo, ’me ho qoqa ka litaba tsa bolumeli ke ntho e tloaelehileng joaloka ho bua ka litaba tsa lipapali kapa boemo ba leholimo linaheng tse ling. Hangata, batho ba fetang ka tsela ba hlokomela se etsahalang ebe le bona ba kenella thutong.

¹⁰ Kahoo, ha moromuoa e mong a ntse a khanna thuto ea Bibele a le ka ntle, mohlankana e mong ea neng a lula ka mose ho seterata seo ba neng ba le ho sona o ile a tla ’me a re kaha o ne a e-s’o ka a eteloa, moromuoa eo o lokela ho tla a tl’o ithuta Bibele le eena ka ho tšoanang. Moromuoa o ile a thabela ho etsa joalo, ’me mohlankana eo o hatela pele ka potlako. Naheng eo, hangata mapolesa a emisa Lipaki ’mileng, eseng hore a li fe samane kapa tefiso e itseng hobane li tlōtse molao, empa hobane a kōpa litokollo tsa morao-rao tsa limakasine tsa Molula-Qhooa le Tsoha! kapa ho leboha Lipaki ka sehlooho se itseng seo a se thabetseng haholo.

11. Ho sa tsotellehe liteko, baromuoa ba sebelitseng ka nako e telele ba ikutloa joang ka tšebeletso ea bona?

¹¹ Bongata ba ba ileng ba kenela tšebeletso ea boromuoa lilemong tse fetileng tse 40 kapa tse 50 ba ntse ba sebeletsa ka botšepehi tšimong. Ke mohlala o motle hakaakang oa tumelo le tiisetso ho rōna bohle! Banyalani ba bang ba sebelelitse hammoho e le baromuoa linaheng tse tharo tse fapaneng ka lilemo tse fetang 42. Monna o re: “Ho ’nile ha e-ba le mathata. Ka mohlala, re ile ra loantša malaria ka lilemo tse 35. Empa ha ho mohla re kileng ra ikoahlaela qeto ea rōna ea ho ba baromuoa.” Mosali oa hae oa phaella: “Kamehla ho ’nile ha e-ba le lintho tse ngata tseo re li lebohang. Tšebeletso ea tšimo e thabisa haholo, ’me ho bobebe ho qalisa lithuto tsa Bibele. Ha u bona liithuti li tla libokeng ’me li tsebana, ho joalokaha eka ka linako tsohle ke ’moka oa lelapa oa ho thabela botsoalle.”

Ba “Nka Lintho Tsohle e le Tahlehelo”

12. Motho a ka bontša joang hore ka sebele o ananela bohlokoa ba ’Muso?

¹² Ha mohoebi ea tsamaeang a fumana perela e theko e phahameng, o ile “a tloha ’me ka potlako a rekisa lintho tsohle tseo a neng a e-na le tsona ’me a e reka.” (Matheu 13:46) Boikemisetso bona ba ho tela ntho e ka ’nang ea talingoa e le ea bohlokoa ke tšobotsi e tsebahatsang bao ka sebele ba ananelang bohlokoa ba ’Muso. Joaloka ea neng a tla kopanela khanyeng ea ’Muso le Kreste, moapostola Pauluse o ile a re: “Ka sebele ke hlile ke boetse ke nka lintho tsohle e le tahlehelo ka lebaka la bohlokoa bo fetisisang ba tsebo ea Kreste Jesu Morena oa ka. Ka lebaka la hae ke amohetse tahlehelo ea lintho tsohle ’me ke li nka e le lithōle tse ngata, e le hore nka rua Kreste.”—Bafilipi 3:8.

13. Motho e mong o ile a bontša joang hore o rata ’Muso oa Molimo Czech Republic?

¹³ Ka tsela e tšoanang, kajeno ba bangata ba ikemiselitse ho etsa liphetoho tse khōlō bophelong ba bona e le hore ba fumane litlhohonolofatso tsa ’Muso. Ka mohlala, ka October 2003, mosuoe-hlooho ea lilemo li 60 oa sekolo se seng Czech Republic o ile a fumana buka e thusang ho ithuta Bibele e bitsoang Tsebo e Isang Bophelong bo sa feleng. Ka mor’a hore a e bale, hang-hang o ile a ikopanya le Lipaki Tsa Jehova sebakeng sa habo hore a ithute Bibele. O ile a tsoela pele hantle moeeng ’me kapele a qalisa ho ba teng libokeng tsohle. Empa ho thoe’ng ka sepheo sa hae sa hore a iketele ho ba ramotse le ho ba setho sa ntlo ea senate? O ile a khetha ho kenela peiso e fapaneng—e leng peiso ea bophelo, hore e be ’moleli oa ’Muso. O ile a re: “Ke ile ka khona ho nehelana ka lingoliloeng tse ngata tsa Bibele ho bana bao ke ba rutang sekolong.” O ile a tšoantšetsa boinehelo ba hae ho Jehova ka hore a kolobetsoe metsing kopanong ka July 2004.

14. (a) Litaba tse molemo tsa ’Muso li susumelelitse ba limilione hore ba etse’ng? (b) Ke lipotso life tse lokelang ho nahanoa ka ho teba tseo re ka ipotsang tsona re le batho ka bomong?

¹⁴ Batho ba bang ba limilione ho pota lefatše ba nkile bohato ka tsela e tšoanang mabapi le litaba tse molemo tsa ’Muso. Ba tsoile lefatšeng le khopo, ba hlobola botho ba khale, ba tlohela metsoalle ea bona ea pele ’me ba tela lipakane tsa bona tsa lefatše. (Johanne 15:19; Baefese 4:22-24; Jakobo 4:4; 1 Johanne 2:15-17) Ke hobane’ng ha ba etsa see sohle? Hobane ba talima litlhohonolofatso tsa ’Muso oa Molimo e le tsa bohlokoa haholo ho feta ntho leha e le efe eo tsamaiso ea hona joale e ka fanang ka eona. Na u ikutloa ka tsela e tšoanang ka litaba tse molemo tsa ’Muso? Na li u susumelletsa hore u etse liphetoho tse hlokahalang e le hore mokhoa oa hao oa bophelo, lintho tseo u li nkang e le tsa bohlokoa le lipakane tsa hao li ka lumellana le seo Jehova a se hlokang? Ho etsa joalo ho tla u tlisetsa litlhohonolofatso tse enneng, hona joale le nakong e tlang.

Kotulo e Fihla Sehlohlolong

15. Ho profetiloe hore batho ba Molimo ba ne ba tla etsa’ng matsatsing a ho qetela?

¹⁵ Mopesaleme o ile a ngola a re: “Batho ba hao ba tla itlhahisa ka ho rata letsatsing la lebotho la hao la sesole.” Batho bana ba itlhahisitseng ba akarelletsa “sehlopha sa bahlankana ba joaloka marotholi a phoka” le “lebotho le leholo” la “basali ba bolelang litaba tse molemo.” (Pesaleme ea 68:11; 110:3) Phello e bile efe ka lebaka la ho khothala le boitelo ba batho ba Jehova—banna le basali, ba bacha le ba hōlileng—matsatsing aa a ho qetela?

16. Fana ka mohlala oa kamoo bahlanka ba Molimo ba ikitlaetsang kateng ho thusa ba bang hore ba ithute ka ’Muso.

¹⁶ Pula-maliboho e mong, kapa ’moleli oa nako e tletseng oa ’Muso naheng ea India o ne a ipotsa hore na batho ba fetang limilione tse peli ba sa utloeng litsebeng naheng eo ba ne ba ka thusoa joang hore ba ithute ka ’Muso. (Esaia 35:5) O ile a etsa qeto ea ho ngolisa sekolong se rutang puo ea matsoho se leng Bangalore e le hore a ithute eona. Ha a le moo, o ile a khona ho arolelana tšepo ea ’Muso le batho ba bangata ba sa utloeng litsebeng, ’me ha thehoa lihlopha tsa thuto ea Bibele. Nakong ea libeke tse ’maloa, batho ba fetang leshome ba ile ba qala ho tla libokeng Holong ea ’Muso. Hamorao, ha a le moketeng oa lenyalo, pula-maliboho eo o ile a kopana le mohlankana e mong ea sa utloeng litsebeng oa Calcutta ea neng a e-na le lipotso tse ngata le thahasello e matla ea ho tseba ho eketsehileng ka Jehova. Leha ho le joalo, bothata bo ne bo le teng. Mohlankana enoa o ne a lokela ho khutlela Calcutta, e bohōle ba lik’hilomithara tse ka bang 1 600, ho ea qalisa lithuto tsa koleche, ’me ho ne ho se na Lipaki tse tsebang puo ea matsoho moo. O ile a leka ka matla ho susumelletsa ntat’ae hore a mo lumelle ho ea sekolong Bangalore ho fapana le ho ea Calcutta, e le hore a ka tsoela pele ho ithuta Bibele. O ile a tsoela pele hantle moeeng, ’me hoo e ka bang ka mor’a selemo, o ile a nehela bophelo ba hae ho Jehova. Ka ho tšoanang, le eena o ile a ithuta Bibele le batho ba bangata ba sa utloeng litsebeng, ho akarelletsa le e mong eo e neng e le motsoalle oa hae ho tloha bongoaneng. Hona joale lekala la India le lokisetsa hore bo-pula-maliboho ba ithute puo ea matsoho e le hore ba ka thusa tšimong eo.

17. Pheta seo u utloang se khothatsa ka ho khetheha mabapi le tlaleho ea selemo sa tšebeletso sa 2004 e leqepheng la 19 ho ea ho la 22.

¹⁷ Leqepheng la 19 ho ea ho la 22 makasineng ena, u tla fumana tlaleho ea selemo sa tšebeletso sa 2004 e mabapi le mosebetsi oa tšimo oa Lipaki Tsa Jehova lefatšeng ka bophara. Ak’u e hlahlobe hakhutšoanyane, ’me u iponele bopaki ba hore batho ba Jehova ho pota lefatše ba tsepamisitse mehopolo ea bona ka matla tabeng ea ho batla ‘perela e theko e phahameng’ kajeno.

U ’ne U “Batle ’Muso Pele”

18. Ke boitsebiso bofe boo Jesu a sa kang a bo kenyelletsa papisong ea mohoebi ea tsamaeang, hona hobane’ng?

¹⁸ Ha re khutlela papisong ea Jesu ea mohoebi ea tsamaeang, rea hlokomela hore Jesu ha aa ka a re letho mabapi le hore na mohoebi eo o ne a tla iphelisa joang ka mor’a hore a rekise sohle seo a neng a e-na le sona. Ka ho utloahalang, ba bang ba ka ’na ba botsa ba re: ‘Mohoebi eo o ne a tla fumana lijo, liaparo le bolulo joang kaha joale o ne a sa salloa ke letho leo a ka iphelisang ka lona? Perela eo ea bohlokoa e ne e tla mo tsoela molemo ofe?’ Tseo e ne e tla ba lipotso tse utloahalang ha re sheba litaba ho ea kamoo batho ba li shebang kateng. Empa na Jesu ha aa ka a khothatsa barutuoa ba hae ka hore: “Joale, le ’ne le batle ’muso pele le ho loka ha hae, ’me lintho tsena tse ling tsohle le tla li ekeletsoa”? (Matheu 6:31-33) Taba e ka sehloohong papisong eo ke hore ho hlokahala re inehele ka pelo eohle ho Molimo ’me re chesehele ’Muso. Na ho na le seo re ka ithutang sona tabeng ee?

19. Ke thuto efe e ka sehloohong eo re ka ithutang eona papisong ea Jesu ea perela e theko e phahameng?

¹⁹ Ebang re sa tsoa ithuta litaba tse molemo tse babatsehang kapa re ’nile ra batla ’Muso le ho bolella ba bang ka litlhohonolofatso tsa oona ka lilemo tse mashome, re tlameha ho tsoela pele ho thahasella ’Muso oo haholo le ho o ela hloko. Tsena ke linako tse thata, empa re na le mabaka a utloahalang a ho lumela hore seo re se batlang ke ntho ea sebele ’me ha ho letho le ka bapisoang le sona—joaloka perela eane eo mohoebi a ileng a e fumana. Liketsahalo tsa lefatše hammoho le boprofeta ba Bibele bo seng bo phethahetse li fana ka bopaki bo kholisang ba hore re phela ‘qetellong ea tsamaiso ea lintho.’ (Matheu 24:3) Joaloka mohoebi ea tsamaeang, a re cheseheleng ’Muso oa Molimo ka pelo eohle ’me re thabeleng tokelo ea ho bolela litaba tse molemo.—Pesaleme ea 9:1, 2.