Jesu Bophelo le Tšebeletso tsa Hae

Ba Hlōleha ho Mo Tšoara

HA MOKETE oa Metlotloane o ntse o tsoela pele, baeta-pele ba bolumeli ba rōma bahlanka ba mapolesa ho ea tšoara Jesu. Ha a leke ho ipata. Jesu o tsoela pele ho ruta phatlalatsa, a re: “Ke sa lutse le lōna motsotso o se okae, ke ntoo ea ho ea nthomileng. Le tla mpatla, ’me ha le ka ke la mpona; le moo ke leng teng, le sitoa ho tla.”

Bajode ha ba utloisise, ka hona ba botsana: “Eo o tla ea kae, moo re ke keng ra mo fumana teng. Na o tla ea ho ba farasitseng har’a ba-Gerike, a rute ba-Gerike na? Taba ee a e boletseng e re’ng, ha a re: Le tla mpatla, ’me ha le ka ke la mpona, le moo ’na ke leng teng, lōna le sitoa ho tla?” Ha e le hantle, Jesu o bua ka ho atamela ha lefu la hae le ho tsohela ha hae leholimong, moo lira tsa hae li ke keng tsa mo latela.

Letsatsi la bosupa ’me e le la ho qetela la mokete la fihla. Hoseng ho hong le ho hong ha mokete, moprista o ne a ile a qhala metsi ao a a khileng selibeng sa Siloame, e le hore a tšolohele motheong oa aletare. Mohlomong a hopotsa batho ka mokete ona oa letsatsi le letsatsi, Jesu oa hoa, a re: “Ekare ha e mong a nyoriloe, a tle ho ’na, a noe. Ea lumelang ho ’na, linōka tsa metsi a kollang li tla kolla mpeng ea hae, joale ka ha lengolo le boletse.”

Ha e le hantle, mona Jesu o bua ka taba e khōlō e neng e tla latela ha moea o halalelang o ne o tla tšoloha. Selemong se hlahlamang ho tšoloha hona ha moea o halalelang ha etsahala ka Pentekonta. Mono, linōka tsa metsi a kollang tsa phalla ha barutuoa ba 120 ba qala ho bolella batho. Empa ho fihlela ka nako eo, ha ho na moea ka kutloisiso ea hore ha ho lea mong oa barutuoa ba Kreste ea tlotsoang ka moea o halalelang ’me a bitsetsoa bophelong ba leholimo.

Ha ba arabela thutong ea Jesu, ba bang ba qala hore: “Ka ’nete enoa ke moprofeta,” ka ho totobetseng ba supa moprofeta e moholoanyane ho Moshe eo ho neng ho tšepisitsoe hore o tla tla. Ba bang ba re: “Enoa ke Kreste.” Empa ba bang ba belaela: “Na Kreste a ka tsoa Galilea na? Na lengolo ha le bolele hobane Kreste o tla tsoa lelokong la Davida, le motseng oa Bethlehema, moo Davida a neng a le teng na?”

Ka hona letšoele la qala ho arohana. Ba bang ba batla hore Jesu a tšoaroe, empa ha ho ea mo isang letsoho. Ha bahlanka ba mapolesa ba khutla ba sa tšoara Jesu, baprista ba baholo le Bafarisi ba botsa: “Ha lea ka la mo tlisa ke’ng?”

Bahlanka ba araba: “Ha ho e-so ho be motho ea buang joalo ka motho eo, le ka mohla o le mong.”

Ba tletse bohale, baeta-pele ba bolumeli ba soma, ba fana ka bopaki ba bohata, ’me ba sebelisa mabitso a somang. Ba nyefola, ba re: ‘Hleka le lōna le thetsitsoe na? Ke mang ho babusi le ho bafarisi ea lumetseng ho eena? Empa bongata boo, bo sa tsebeng molao, bo rohakiloe.’

Ho sena, Nikodema, Mofarisi e bile e le ’musi oa Bajode (ke hore, setho sa Lekhotla le Phahameng la Bajode), o iteta sefuba ho buella Jesu. U ka ’na oa hopola hore selemo le halofo pejana, Nikodema o ile a tla ho Jesu bosiu ’me a bontša tumelo ho eena. Joale Nikodema o re: “Na molao oa rōna o ka hla oa ahlola motho a e-so ho utluoe, ho e-so ho tsejoe seo a se entseng na?”

Bafarisi ba halefa le ho feta hore e be e mong oa bona o sireletsa Jesu. Ba re ka mantsoe a hlabang: “Na le uena u tsoa Galilea na? Botsisisa, u lemohe hobane ha ho moprofeta ea hlahileng Galilea.”

Le hoja ka ho toba Mangolo a sa bolele hore moprofeta o ne a tla tsoa Galilea, a supa Kreste e le ea tsoang teng, a re “leseli le leholo” le ne le tla bonoa sebakeng sena. ’Me ho fapana le mashano, Jesu o hlahetse Bethlehema, ’me e ne e le setloholo sa Davida. Mohlomong ha Bafarisi ba hlokomela sena, e ka ’na eaba ba hlile baa ikarabella bakeng sa ho jala mashano ao batho ba nang le ’ona ka Jesu. Johanne 7:32-52; Esaia 9:1, 2; Mattheu 4:13-17.

◆ Ke eng se etsahalang moketeng hoseng ho hong le ho hong, ’me e ka ’na eaba Jesu o lebisitse tlhokomelo ho see joang?

◆ Ke hobane’ng ha bahlanka ba hlōleha ho tšoara Jesu, ’me baeta-pele ba bolumeli ba arabela joang?

◆ Nikodema ke mang, boikutlo ba hae ke bofe ka Jesu, ’me Bafarisi ba habo ba mo tšoara joang?

◆ Ke bopaki bofe bo teng ba hore Kreste o ne a tla tsoa Galilea?