U ka Ithuta Eng ho Bana?

“U ITŠOARA joaloka ngoana!” Haeba mantsoe ana a ne a ka tobisoa ho rōna, mohlomong re ne re ka khopiseha. Ha ho pelaelo hore, le hoja bana ba rateha hakana, ha ba na tsebo, phihlelo le bohlale tseo ka tloaelo li amahanngoang le ho hōla.—Jobo 12:12.

Leha ho le joalo, ka lekhetlo le leng Jesu o ile a re ho barutuoa ba hae: “Kannete ke re ho lōna, Ntle le hore le sokolohe ’me le be joaloka bana ba banyenyane, ho hang le ke ke la kena ’musong oa maholimo.” (Matheu 18:3) Jesu o ne a bolela’ng? Ke litšobotsi life tseo bana ba banyenyane ba nang le tsona tseo batho ba baholo ba lokelang ho li etsisa?

Sebeletsa ho Ikokobetsa Joaloka Bana

Nahana ka boemo bo ileng ba susumeletsa Jesu hore a bue mantsoe ao. Hoba a fihle Kapernauma ka mor’a leeto le lelelele, Jesu o ile a botsa barutuoa ba hae a re: “Le ne le phehisana ka’ng tseleng?” Barutuoa ba neng ba soabile ba ile ba khutsa, hobane ba ne ba phehisane har’a bona ka hore na e moholo ke mang. Qetellong, ba ile ba iteta sefuba eaba ba botsa Jesu: “Ha e le hantle ke mang e moholo ’musong oa maholimo?”—Mareka 9:33, 34; Matheu 18:1.

Ho ka ’na ha bonahala ho makatsa hore ebe barutuoa ba ne ba ka phehisana ka taba ea maemo ka mor’a hore ba be le Jesu ka lilemo tse ka bang tharo. Leha ho le joalo, ba ne ba hōliselitsoe bolumeling ba Sejuda, bo neng bo nka litaba tse joalo e le tsa bohlokoa haholo. Kamoo ho bonahalang kateng, ho hōlisetsoa bolumeling bo joalo, hammoho le ho se phethahale, ke hona ho ileng ha etsa hore barutuoa ba be le monahano o joalo.

Jesu o ile a lula fatše, a bitsa barutuoa ba hae, eaba o re: “Haeba leha e le mang a batla ho ba oa pele, e tla ba oa ho qetela ho bohle le mosebeletsi oa bohle.” (Mareka 9:35) Mohlomong mantsoe ana a ile a ba makatsa. Tsela eo Jesu a ileng a beha mabaka ka eona e ne e hanyetsana ka ho toba le tsela eo Bajuda ba neng ba talima bophahamo ka eona! Joale Jesu o ile a bitsetsa ngoana e monyenyane ho eena. Ha a kopa ngoana enoa ka mofuthu, o ile a hatisa ntlha ea hae a re: “Kannete ke re ho lōna, Ntle le hore le sokolohe ’me le be joaloka bana ba banyenyane, ho hang le ke ke la kena ’musong oa maholimo. Ka hona, mang kapa mang ea tla ikokobetsa joaloka ngoana enoa e monyenyane ke eena e moholo ’musong oa maholimo.”—Matheu 18:3, 4.

Eo e bile thuto e matla hakaakang ea boikokobetso! Ak’u bone ka mahlo a kelello se neng se etsahala. Sehlopha sa banna ba hōlileng ba lifahleho li hlokofetseng se ne se pota-potile ngoana a le mong e monyenyane, se tonetse ngoana enoa mahlo. E tlameha ebe ngoana enoa o ne a le lihlong a bile a sa belaelle letho hakaakang! Ka sebele o ne a se na lehloeo a bile a se lonya! Ka sebele o ne a ikokobelitse a bile a le bonolo! Ha ho pelaelo hore ngoana enoa e monyenyane o ile a bonahatsa hantle tšobotsi ea bomolimo ea boikokobetso.

Seo Jesu a neng a se bua sea utloahala. Kaofela ha rōna re lokela ho ikokobetsa joaloka bana haeba re batla ho rua ’Muso oa Molimo. Tokisetsong ea Jehova ea lelapa, ha ho na qhoebeshano ea ho hlōlisana kapa boikhohomoso. (Bagalata 5:26) Ha e le hantle, mekhoa ena ke eona e ileng ea susumeletsa Satane Diabolose hore a fetohele Molimo. Hase feela Jehova a e hloileng hakana!—Liproverbia 8:13.

Bakreste ba ’nete ba batla ho sebeletsa, eseng ho bontša matla ao ba nang le ’ona. Ho sa tsotellehe hore na mosebetsi ha o ratehe hakae kapa hore na motho eo re mo sebeletsang o boemong bo tlaase hakae, boikokobetso ba sebele bo re susumelletsa hore re sebeletse ba bang. Tšebeletso e joalo e bontšang boikokobetso e tlisa meputso e khotsofatsang. Jesu o re: “Mang kapa mang ea amohelang e mong oa bana ba banyenyane tjena ka lebitso la ka, oa nkamohela; ’me mang kapa mang ea nkamohelang, ha a amohele ’na feela, empa o amohela le ea nthomileng.” (Mareka 9:37) Ha re e-ba le moea oa ho fana ka bolokolohi, re bile re ikokobetsa joaloka bana, seo se etsa hore re be bonngoeng le Motho ea phahameng ka ho fetisisa bokahohleng le Mora oa hae. (Johanne 17:20, 21; 1 Petrose 5:5) Re tla fumana thabo e tlisoang ke ho fana. (Liketso 20:35) Hape re khotsofalla hore ebe re tlatsetsa hore ho be le khotso le bonngoe tse bonahalang har’a batho ba Molimo.—Baefese 4:1-3.

Ba Ruteha Habonolo Ebile ha ba Belaelle Batho ba Bang

Joale Jesu o totobatsa ntlha e ’ngoe eo batho ba baholo ba ka ithutang eona ho bana: “Mang kapa mang ea sa amoheleng ’muso oa Molimo joaloka ngoana e monyenyane ho hang a ke ke a kena ho oona.” (Mareka 10:15) Bana ha baa ikokobetsa feela; ba ruteha habonolo. ’Mè e mong o ile a re: “Ba monya boitsebiso joaloka seponche.”

Kahoo, e le hore re rue ’Muso oa Molimo, re lokela ho amohela molaetsa oa ’Muso ’me re o mamele. (1 Bathesalonika 2:13) Joaloka masea a sa tsoa tsoaloa, re lokela ho ‘hlaolela tabatabelo ea lebese le sa tsoakoang la lentsoe, e le hore ka lona re ka hōlela polokong.’ (1 Petrose 2:2) Joale ho thoe’ng haeba re thatafalloa ho utloisisa thuto e itseng ea Bibele? Mosali e mong ea sebetsang moo ho hlokomeloang bana o re: “Bana ba phehella ho botsa potso e reng ‘Hobane’ng?’ ho fihlela ba fumana likarabo tse khotsofatsang bakeng sa lipotso tsa bona.” Re lokela ho etsisa mohlala oa bona. Kahoo tsoela pele ho ithuta. Bua le Bakreste ba nang le phihlelo. Kōpa Jehova hore a u fe bohlale. (Jakobo 1:5) Ha ho pelaelo hore, ha nako e ntse e feta, u tla putsoa ka lebaka la ho phehella ha hao thapelong.—Matheu 7:7-11.

Leha ho le joalo, ba bang ba ka ’na ba ipotsa, ‘Na batho ba rutehang habonolo ba ke ke ba khelosoa habonolo?’ Ba ke ke ba khelosoa haeba ba e-na le tataiso e tšepahalang. Ka mohlala, ka tlhaho bana ba batla tataiso ho batsoali ba bona. Ntate e mong o re: “Batsoali ba bontša hore ke batho ba ka tšeptjoang ka ho sireletsa bana ba bona le ho ba hlokomela letsatsi le leng le le leng.” Ka sebele le rōna re tšepa Ntate oa rōna oa leholimo Jehova, ka mabaka a tšoanang. (Jakobo 1:17; 1 Johanne 4:9, 10) Jehova o re fa tataiso e sa foseng ka Lentsoe la hae le ngotsoeng. Moea oa hae o halalelang le mokhatlo oa hae o hlophisitsoeng oa re khothatsa le ho re tšehetsa. (Matheu 24:45-47; Johanne 14:26) Re tla lula re sireletsehile moeeng haeba re sebelisa litokisetso tsena.—Pesaleme ea 91:1-16.

Ho tšepa Molimo joaloka bana ho boetse ho re fa khotso ea kelello. Setsebi se seng sa Bibele se re: “Ha re le bana re kena leetong empa re se na chelete ea ho lefella leeto leo, re sa tsebe le hore na re tla fihla joang moo re eang teng, empa leha ho le joalo ha ho mohla re belaelang hore batsoali ba rōna ba tla re fihlisa moo re sireletsehile.” Na re tšepa Jehova ka tsela e tšoanang bophelong?—Esaia 41:10.

Ho tšepa Molimo ka ho feletseng ho re thusa ho qoba maikutlo le liketso tse ka behang bomoea ba rōna kotsing. Ho e-na le hoo, re tšepa mantsoe a Jesu ka ho feletseng ha a ne a re Ntat’a rōna ea maholimong o tseba liketso tsa rōna le hore hafeela re ntse re batla pele ’Muso le ho loka ha Molimo, Molimo o tla re hlokomela. Sena se tla re thusa ho hanela moleko oa ho nahana haholo ka matšoenyeho a lintho tse bonahalang ebe re hlokomoloha mesebetsi ea moea.—Matheu 6:19-34.

“Le be Bana Mabapi le Bobe”

Le hoja bana ba banyenyane ba tsoaloa ba sa phethahala, ba hloekile lipelong le likelellong ka mokhoa o khahlisang. Ka lebaka lena, Bibele e khothalletsa Bakreste: “Le be bana mabapi le bobe.”—1 Bakorinthe 14:20.

Nahana ka Monique ea lilemo li hlano, eo ka thabo a ileng a re ho ’mè oa hae: “Motsoalle oa ka e mocha, Sarah, o na le moriri o harelaneng hantle feela joaloka oa ka!” Ha aa ka a bua letho ka ’mala oa letlalo la Sarah le hore na ke oa morabe ofe. Motsoali e mong o re: “Bana ba banyenyane ha ba susumetsoe ke ho se tšoane ha ’mala oa letlalo la batho. Ha ba tsebe hore na morabe kapa leeme ke eng.” Ntlheng ena, ka sebele bana ba bonahatsa hantle haholo boikutlo ba Molimo oa rōna ea seng leeme, ea ratang batho ba lichaba tsohle.—Liketso 10:34, 35.

Bana ba boetse ba na le bokhoni bo babatsehang ba ho tšoarela ba bang. Motsoali e mong o re: “Ha Jack le Levi ba banyenyane ba loana, re ba bolella hore ba kōpe tšoarelo, ’me kapele-pele ka mor’a moo, u tla ba bona ba bapala hape ba thabile. Ha ba lule ba hloname, ha ba tsose lintho tse fetileng, kapa ho batla hore motho a etse lintho tse itseng pele ba ka mo tšoarela. Ba thabela ho tsoela pele ba ipapalla.” Ka sebele ba behela batho ba baholo mohlala o motle!—Bakolose 3:13.

Ho phaella moo, bana ba banyenyane ba lumela habonolo hore Molimo o teng. (Baheberu 11:6) Hangata mokhoa oa bona oa tlhaho oa ho hloka leeme o etsa hore ba pakele batho ba bang ka sebete. (2 Marena 5:2, 3) Lithapelo tsa bona tse bonolo, tse tlohang pelong, li ka nolofatsa batho ba pelo li thata. Hape ba khona ho bontša matla a tsotehang ha ba thulana le teko. Ka sebele bana ba banyenyane ke limpho tsa bohlokoa!—Pesaleme ea 127:3, 4.

Botle Boa Tsosolosoa

U ka ’na ua ipotsa, ‘Na ho ka khoneha hore batho ba baholo ba boele ba be le litšobotsi tse khahlehang tseo bana ba nang le tsona?’ Karabo e bonolo le e khothatsang ke hore, seo se ka khoneha! Ka sebele taelo ea Jesu ea hore re “be joaloka bana ba banyenyane” e bontša hore seo se ka khoneha.—Matheu 18:3.

Ka mohlala: Sehlopha se tsosolosang litšoantšo se ka ’na sa lokisa setšoantšo se itseng se neng se pentiloe ka bokhabane. Ha sehlopha sena se ntse se tsosolosa setšoantšo sena, se tlosa litšila tse bokellaneng ’me se lokisa mosebetsi o entsoeng ke batho ba se nang phihlelo ba neng ba leka ho se tsosolosa. Ka mor’a hore batho bana ba tsosolosang litšoantšo ba sebetse ka nako e telele ba sa fele pelo, joale batho bohle ba qala ho bona mebala ea pele e metle e loileng ea setšoantšo le botle ba sona ba tlhaho. Ka ho tšoanang, ka ho phehella, le ka thuso ea moea o halalelang oa Jehova, hammoho le tšehetso e lerato ea phutheho ea Bokreste, re ka boela ra bonahatsa litšobotsi tse ntle tsa tlhaho tseo re neng re e-na le tsona ha re ne re sa le bana.—Baefese 5:1.

[Setšoantšo se leqepheng la 9]

Bana ba ikokobelitse ka tlhaho

[Setšoantšo se leqepheng la 10]

Bana ba banyenyane ha ba leeme, ’me ba tšoarela kapele ba be ba lebale