Jesu Bophelo le Tšebeletso tsa Hae

Thuto ea Ho Tšoarela

HO BONAHALA Jesu a sa ntsane a le katlung Kapernauma le barutuoa ba hae. O ne a ntse a buisana le bona ka tsela ea ho sebetsana le mathata a pakeng tsa baena, kahoo Petrose oa botsa: “Morena, ngoan’eso ha a ntse a ntšiteloa, ke tla mo tšoarela hakae na?” Kaha baruti ba bolumeli ba Bajode ba buella ho tšoarela ho fihlela ka makhetlo a mararo, mohlomong Petrose o ho nka e le ho mosa haholo ho etsa tlhahiso: “E tla ba hasupa na?” Empa khopolo eohle ea ho boloka tlaleho e joalo e fosahetse. Jesu o lokisa monahano oa Petrose: “E se ke ea e-ba hasupa, e mpe e be hamashome a supileng a baloang hasupa.” O bontša hore ha ho moeli o lokelang ho beoa bakeng sa makhetlo ao Petrose a tšoarelang ngoan’abo ka ’ona.

Ho hatisa ho barutuoa tlamo ea bona ea ho tšoarela, Jesu o ba bolella setšoantšo. Ke sa morena ea batlang ho lokisa litaba tsa melato ea bahlanka ba hae. Mohlanka e mong ea nang le molato o moholohali oa lidenare tse 60 000 000 (hoo e ka bang R100 000 000) o tlisoa ho eena. Ha ho tsela eo a ka o lefang ka eona. Kahoo, joalokaha Jesu a hlalosa, morena o laela hore eena le mosali oa hae le bana ba hae ba rekisoe ’me ho lefshoe molato. Ha a rialo mohlanka eo o itihela maotong a mong’a hae ’me oa mo rapela: “Nkhauhele, ke tla u lefa tsohle,” (TLP).

A khannoa ke qenehelo, ka mohau mong’a hae o hlakola molato oohle o moholohali oa mohlanka eo. Jesu o tsoela pele ho bolela hore, empa hang ha a qeta ho etsa joalo, mohlanka enoa oa tsoa ’me o fumana mohlanka ’moho le eena ea mo kolotang lidenare tse 100 feela (hoo e ka bang R180). Monna eo o tlenya mohlanka ’moho le eena ka ’metso ’me o qala ho mo khama, a re: “Lefa molato oa hao.”

Empa mohlanka ’moho le eena ha a na chelete eo. Kahoo o itihela maotong a mohlanka eo a mo kolotang, oa rapela: “Nkhauhele, ke tla u lefa,” (TLP). Ho fapana le mong’a hae, mohlanka eo ha a na mohau, ’me o etsa hore mohlanka ’moho le eena a hlahleloe teronkong. Jesu o tsoela pele ho bolela hore bahlanka ba bang ba boneng se etsahetseng ba tsamaea ho ea bolella mong’a bona. Joale eena, ka khalefo o bitsa mohlanka eo. O re: “Mohlanka ea lonya, ke ne ke u leseletse molato oohle oa hao, kahobane u no u nthapetse. Ana e ne e se tšoanelo ea hao le uena ho hauhela molekane oa hao oa bohlanka joale ka ha ke ne ke u hauhetse le uena na?” Ka ho khoboheloa, mong’a bona o nea balebeli ba teronko mohlanka ea se nang mohau ho fihlela a ka lefa molato oohle oa hae.

Joale Jesu o qetella ka hore: “Le tla etsoa joalo ke Ntate ea maholimong, ha e mong le e mong oa lōna a sa tšoarele ngoan’abo litlōlo ka pelo ea hae eohle.” Ke thuto e molemo hakaakang ea ho tšoarela! Ha o bapisoa le molato o moholo oa sebe oo Molimo o re tšoaretseng oona, ka sebele tlōlo leha e le efe eo moena oa rōna oa Mokreste a re sitetsoeng ka eona e nyenyane. Ho feta moo, Jehova Molimo o ’nile a re tšoarela ka makhetlo a likete. Hangata, ha re hlokomele le libe tseo re mo siteloang ka tsona. Kahona, na re ke ke ra tšoarela moena oa rōna ka makhetlo a seng makae, le haeba re e-na le lebaka le utloahalang la ho belaela? Hopola, joalokaha Jesu a ile a ruta Thutong ea Thabeng, Molimo o tla ‘re tšoarela melato ea rōna, joalokaha le rōna re tšoaretse ba nang le melato ho rōna.’ Mattheu 18:21-35; 6:12; Ba-Kolosse 3:13.

◆ Potso ea Petrose mabapi le ho tšoarela ngoan’abo e tlisoa ke eng, ’me mohlomong ke hobane’ng ha a nka tlhahiso ea hae ea makhetlo a supileng e le e mosa?

◆ Karabelo ea morena kōpong ea mohlanka oa hae e fapana joang le karabelo ea mohlanka eo kōpong ea mohlanka ’moho le eena?

◆ Re ithuta eng setšoantšong sa Jesu?