Hona ho ke ke ha Etsahala!
“HO BONOLO hore kamele e tsoe lesobeng la nale ho e-na le hore morui a kene ’Musong oa Molimo.” (Matheu 19:24, BPN) Jesu Kreste o ile a bua sena ho ruta balateli ba hae thuto e itseng. ’Musi e mong e mocha ea ruileng o ne a sa tsoa hana memo ea ho ba molateli oa Jesu ’me a kopanele menyetleng e mengata e babatsehang ea moea. Monna eo o ile a khetha ho tšoarella maruong a hae ho e-na le ho latela Messia.
Jesu o ne a sa re ho hang ho ke ke ha etsahala hore motho ea ruileng a fumane bophelo bo sa feleng tokisetsong ea ’Muso, hobane batho ba itseng ba ruileng e ile ea e-ba balateli ba hae. (Mattheu 27:57; Luka 19:2, 9) Leha ho le joalo, hona ho ke ke ha etsahala ho motho ofe kapa ofe ea ruileng ea nang le lerato le leholoanyane bakeng sa maruo a hae ho feta lintho tsa moea. Ke feela ka ho hlokomela tlhoko ea hae ea moea le ho batla thuso ea bomolimo motho ea joalo a ka amohelang pholoho e fanoang ke Molimo.—Mattheu 5:3; 19:16-26.
Setšoantšo seo sa kamele le lesoba la nale ha sea lokela ho nkoa ka kutloisiso ea sebele. Jesu o ne a sebelisa pheteletso ho hatisa bothata bo talimaneng le batho ba ruileng ba lekang ho khahlisa Molimo ba sa ntsane ba tšoareletse mokhoa oa bophelo oa borui, oa ho rata lintho tse bonahalang.—1 Timothea 6:17-19.
Ba bang ba re lesoba la nale e ne e le khoro e nyenyane lerakong la motse eo kamele e neng e ka feta ho eona ka bothata haeba e ne e ka roloa moroalo oa eona. Empa lentsoe la Segerike rha·phisʹ, le fetoletsoeng e le “nale” ho Mattheu 19:24 le Mareka 10:25, le tsoa leetsing le bolelang “ho roka.” Ho Luka 18:25 lentsoe be·loʹne le bolela nale e rokang, ’me moo New World Translation ea baleha: “Ha e le hantle, ho bonolo hore kamele e ka feta lesobeng la nale e rokang ho feta hore motho ea ruileng a kene ’musong oa Molimo.” Batho ba bang ba boholong ba tšehetsa phetolelo ena. W. E. Vine o re: “Khopolo ea ho sebelisa ‘lesoba la nale’ bakeng sa likhoro tse nyenyane e bonahala e le ea morao tjena; ha e bonahale e kile ea e-ba teng mehleng ea boholo-holo.”—An Expository Dictionary of New Testament Words.
Kamele e khōlō e lekang ho feta lesobeng la nale e nyenyane e rokang “ho na le mokhoa oa ho feteletsa oa Bochabela,” ho rialo lengolo le leng la bopaki. ’Me mabapi le ba bang ba mano hoo ho neng ho bonahala ba etsa seo ho leng thata ho se etsa, The Babylonian Talmud e re: “Ba fetisa tlou lesobeng la nale.” Jesu o ne a sebelisa pheteletso e hlakileng le lintho tse hanyetsanang ka ho hlakileng ho hatisa ho ke keng ha etsahala. Ho ke ke ha etsahala hore kamele, kapa tlou, li fete lesobeng la nale e rokang. Leha ho le joalo, ka thuso ea bomolimo motho ea ruileng a ka lahla pono ea lintho tse bonahalang ’me ka ’nete a batle bophelo bo sa feleng. Ho joalo le ka bohle ba nang le takatso e tebileng ea ho ithuta le ho etsa thato ea Molimo ea Holimo-limo, Jehova.